1, 2. (α) Σόσκε η σκλαβιά ντα η ελευθερία ισινέ σημαντικά πράγματα κο ντιβεσά κι Παυλόσκε; (β) Κάσταρ βακερντάς ο Παύλος ότι αβέλα η αληθινή ελευθερία;

Ο ΠΡΩΤΟΙ Χριστιανοί τζουβντιόνας κι Ρωμαϊκή Αυτοκρατορία. Οτθέ, ο τζενέ ισαρένας-πες ντα βακερένας ότι τθερένας λατσσέ νόμους, δικαιοσύνη ντα ελευθερία. Όμως, οντιά ζουρανί αυτοκρατορία στηρίντιβελας κο δούλοι για τι κερέν ι πιο σκληρή μπουτί. Εκ εποχή, σε κάθε 3 τζενέ σο τζουβντιόνας οτθέ, ο εκ τανό ισινέ δούλος. Σίγουρα, η σκλαβιά ντα η ελευθερία ισινέ μπουτ σημαντικά πράγματα ι λαόσκε, εμ ι Χριστιανόνγκε.

² Ο απόστολος Παύλος γραφιντάς μπουτ φαρ ι ελευθεριάκε. Αλλά να προσπαθίνελας τι λατσσαρέλ ο προβλήματα ι ντουνιάσκε, σαρ προσπαθίνενας μπουτ τζενέ αζομάν. Ο Παύλος ντα ο γιαβερά Χριστιανοί κερένας μπαρέ προσπάθειες τι βακερέν κο τζενέ ο λατσσέ αμπέρια ι Ντεβλέσκε Βασιλειάκε ντα τι βοηθίνεν-λεν τι αγαβέν καζόμ σημαντικός ισινέ ο λύτρος σο ντινάς ο Χριστός Ιησούς. Ο Παύλος βακερντάς κο Χριστιανοί κατέ τι αρακχέν ι αληθινή ελευθερία, κάνα γραφιντάς: «Ο Ιεχωβά ισί  ο Πνεύμας, ντα οτθέ σο ισί ο πνεύμας ι Ιεχωβάσκο, ισί ελευθερία».​—2 Κορινθίους 3:17.

3, 4. (α) Σο βακερντάς ο Παύλος κο εδάφια πριν κατά 2 Κορινθίους 3:​17; (β) Σο πρέπει τι κεράς για τι τθεράς ι ελευθερία σο αβέλα κατά Ιεχωβά;

³ Κι δεύτερη επιστολή κο Κορινθίους, ο Παύλος βακερντάς σο αβιλό-πες κο Μωυσής κάνα γουλίστιλο κατά βες Σινά αφού ισινέας ανγκλάλ σε εκ άγγελος ι Ιεχωβάσκο. Λέσκο μούι λέλας-πες! Κάνα ο Ισραηλίτες ντικχλέ ι Μωυσής, νταρασάλε, οτθάρ βοβ ιτσσαρντάς πο μούι εκχέ κοτορέσαρ. (Έξοδος 34:​29, 30, 33· 2 Κορινθίους 3:7, 13) Ο Παύλος εξηγιντάς: «Κάνα όμως εκ τζενό αβέλα κο Ιεχωβά, ο κοτόρ νικιόλα». (2 Κορινθίους 3:​16) Σο μανγκέλας τι βακερέλ ο Παύλος;

⁴ Κο γιαβέρ μάθημας, σικλιλάμ ότι σάντε ο Ιεχωβά, σο κερντάς σαρέ ο πράγματα, τθερέλα ελευθερία χωρίς όρια. Άρα, ισί λογικός ότι «οτθέ σο ισί ο πνεύμας ι Ιεχωβάσκο» ισί ελευθερία. Αλλά ο Παύλος βακερντάς ότι άμα μανγκάσα τι τθεράς ανταγιά ελευθερία, πρέπει τι τζας κο Ιεχωβά. Ανταβά μανγκέλα τι βακερέλ ότι πρέπει τι τθεράς εκ λατσσί φιλία λέσαρ. Ο Ισραηλίτες κι έρημος ντικχένας ο πράγματα σαρ ντικχένας-λεν ο τζενέ, όχι σαρ ντικχέλας-λεν ο Ιεχωβά. Ισινέ σαρ τι ιτσσαρέλας εκ κοτόρ λένγκι γκοντί ντα λένγκο γκι. Μανγκένας τι χρησιμοποιήνεν πουμαρί νεβί ελευθερία για τι κερέν οντουλά σο μανγκένας βον.​—Εβραίους 3:​8-10.

5. (α) Σο ελευθερία ντέλα ο πνεύμας ι Ιεχωβάσκο; (β) Σαρ τζανάσα ότι εκ τζενό μπορίνελα τι τθερέλ ι ελευθερία σο ντέλα ο Ιεχωβά ατζέ-ντα άμα ισί δούλος ή κι φυλακή; (γ) Καλέ ερωτησιέντε χρειαζίντιβελα τι απαντίνας;

⁵ Η ελευθερία σο ντέλα ο πνεύμας ι Ιεχωβάσκο νανέ σάντε η ελευθερία σο λέλα εκ δούλος. Οντουβά πνεύμας ανέλα μπουτ πιο μπαρί ελευθερία οντουλάταρ σο κα μπορίνενας τι ανέν ο τζενέ. Μπορίνελα τι ελευθερώνελ-αμέν για μα τι αβάς δούλοι ούτε κι αμαρτία ντα κο μεριπέ, ούτε κι ψεύτικη θρησκεία ντα κο πράγματα σο τθερένα τι κερέν λάσαρ. (Ρωμαίους 6:​23· 8:2) Σο σουκάρ ελευθερία ισί ανταγιά! Ατζέ-ντα εκ δούλος ή εκ τζενό σο ισί κι φυλακή μπορίνελα τι τθερέλ ανταγιά ελευθερία. (Γένεση 39:​20-23) Η πφεν Νάνσι Γιουέν ντα ο πφραλ Χάρολντ Κινγκ τθερένας ανταγιά ελευθερία παρόλο σο ισινέ μπουτ μπρεσά κι φυλακή για την πίστη σο τθερένας. Κο JW Broadcasting, μπορίνενα τι ντικχέν-λεν τι βακερέν οντουλένγκε σο νακχλέ. (Τραμπίνεν ΣΥΝΕΝΤΕΥΞΕΙΣ ΚΑΙ ΕΜΠΕΙΡΙΕΣ > ΑΝΤΙΜΕΤΩΠΙΣΗ ΔΟΚΙΜΑΣΙΩΝ) Ακανά κα απαντίνας ντουέ ερωτησιέντε. Σαρ μπορίνασα τι σικαβάς ότι αμαρί ελευθερία τθερέλα μπαρί αξία αμένγκε; Ντα σαρ μπορίνασα τι χρησιμοποιήνας σωστά αμαρί ελευθερία;

6. Σαρ σικαντέ ο Ισραηλίτες ότι να εκτιμίνενας ι ελευθερία σο ντινάας-λεν ο Ιεχωβά;

⁶ Κάνα λάσα εκ δώρος σο τθερέλα μπαρί αξία, μανγκάσα τι ευχαριστίνας οντουλές σο ντινάς-λες αμέντε. Ο Ισραηλίτες όμως να εκτιμιντέ ι ελευθερία σο ντινάς-λεν ο Ιεχωβά. Αφού νακχλέ σάντε χάνικ μασεκά από αζομάν σο ο Ιεχωβά ελευθερωντάς-λεν κατά Αίγυπτος, αρχισάλε τι σικλιντίνεν ι πραγματένγκε σο χάνας ντα πίνας  οτθέ. Γκρινιάνενας για το μάννα, σο ισινέ ο χαμπέ σο ντέλας-λεν ο Ιεχωβά. Ντα μανγκλέ ατζέ-ντα τι βουρτίνεν κι Αίγυπτος! Λένγκε, “ο ματσσέ, ο καστραβίτσες, ο χαρμπουζιά, ο πράσα, ο πουρουμά ντα ο σιρά” ισινέ πιο σημαντικά κατά ελευθερία σο ντινάας-λεν ο Ιεχωβά για τι υπηρετίνεν-λες. Να κερέλα αμένγκε εντύπωση σο ο Ιεχωβά χολιασάλο μπουτ λένγκε. (Αριθμοί 11:5, 6, 10· 14:3, 4) Ανταλέσταρ λάσα εκ σημαντικός μάθημας.

7. Σαρ κερντάς ο Παύλος πι ζωγιάτε ι συμβουλή σο ντινάς κο εδάφιος 2 Κορινθίους 6:1, ντα σαρ μπορίνασα αμέν-ντα τι κεράς-λες ανταβά;

⁷ Ο Παύλος βακερντάς σαρέ κο Χριστιανοί μα τι μπιστρέν τι σικαβέν εκτίμηση για την ελευθερία σο ντινάς-αμέν ο Ιεχωβά αντράλ πι Τσσαβέσταρ, κατά Ιησούς Χριστός. (Διαβάνεν 2 Κορινθίους 6:1) Ο Παύλος ισινέ ατελής, δούλος κι αμαρτία ντα κο μεριπέ, ντα ανταβά κερέλας-λες τι νιωθίνελ μπουτ μπέτι. Όμως, βακερντάς: «Ευχαριστίναβα ι Ντεβλές αντράλ κατά Ιησούς Χριστός σο ισί αμαρό Κύριος!» Σόσκε βακερντάς-λες ανταβά; Ο Παύλος εξηγιντάς ι Χριστιανόνγκε: “Ο νόμος ι πνευμάσκο σο ντέλα-τουμέν ζωή για τι τζουβντιόν γιεκ ι Ιησού Χριστόσαρ, ελευθερωντάς-τουμέν κατά νόμος ι αμαρτιάκο ντα ι μεριμάσκο”. (Ρωμαίους 7:​24, 25· 8:2) Σαρ ο Παύλος, αμέν-ντα δεν πρέπει τι μπιστράς ποτές ότι ο Ιεχωβά ελευθερωντάς-αμέν για μα τι αβάς δούλοι κι αμαρτία ντα κο μεριπέ. Χάρη κο λύτρος, μπορίνασα τι υπηρετίνας αμαρέ Ντεβλές με πάκι συνείδηση, ντα ανταβά κερέλα-αμέν μπαγιά ευτυχισμέ.​—Ψαλμός 40:8.

8, 9. (α) Καγιά προειδοποίηση ντινάς ο απόστολος Πέτρος για το τρόπος σο πρέπει τι χρησιμοποιήνας αμαρί ελευθερία; (β) Σαρ κα μπορίνελας εκ τζενό τι χρησιμοποιήνελ πι ελευθερία με λάθος τρόπος;

⁸ Να ερεσέλα σάντε τι βακεράς ότι εκτιμίνασα ι Ιεχωβάς. Πρέπει επίσης τι προσοχίνας μα τι χρησιμοποιήνας αμαρί ελευθερία με λάθος τρόπος. Για παράδειγμας, ο απόστολος Πέτρος προειδοποιηντάς-αμέν μα τι χρησιμοποιήνας αμαρί ελευθερία σαρ εκ δικαιολογία για τι κεράς λάθος  πράγματα. (Διαβάνεν 1 Πέτρου 2:​16) Ανταγιά προειδοποίηση ανέλα αμαρέ γκοντιάτε οντουλά σο αβιλέ-πες ι Ισραηλιτένγκε κι έρημος. Αντιβές-ντα χρειαζίντιβασα ανταγιά προειδοποίηση, ίσως ατζέ πιο μπουτ. Ο Μπενγκ ντα λέσκο ντουνιάς ντένα μπουτ πράγματα σο μπορίνενα τι ταρτίνεν αμαρί προσοχή. Ανταλά πράγματα τθερένα τι κερέν ι ιριαϊμάσαρ, ι χαμάσαρ, ι πιμάσαρ ντα με τη διασκέδαση. Ο τζενέ σο κερένα διαφημίσεις χρησιμοποιήνενα σουκάρ τζενέν για τι κερέν-αμέν τι σκεφτίνας ότι πρέπει τι κινάς πράγματα σο να χρειαζίντιβασα μπαγιά. Ισί μπουτ εύκολος τι χουχάντιβας ανταλέ ντουνιάσταρ ντα τι χρησιμοποιήνας αμαρί ελευθερία με λάθος τρόπος.

⁹ Η συμβουλή ι Πετρόσκι τθερέλα τι κερέλ πιο σημαντικέ πραγματέντζαρ-ντα, σαρ ισί η εκπαίδευση σο κα λας ντα η μπουτί σο κα κεράς. Για παράδειγμας, κο σχολείος πιένενα ι τερνέν τι κερέν μπαρέ προσπάθειες για τι τζαν κο πιο λατσσέ πανεπιστήμια. Μπουτ τζενέ βακερένα λένγκε ότι, άμα κα σπουδάνεν, κα αρακχέν λατσσέ μπουτιά, κα νικαβέν μπουτ λοβέ ντα ο γιαβερά κα σεβάνεν-λεν. Ντα μπορεί τι σικαβέν λένγκε πληροφορίες για τι κερέν-λεν τι πακιάν ότι οντουλά σο γκιλέ κο πανεπιστήμιος νικαβένα πιο μπουτ λοβέ οντουλένταρ σο να γκιλέ. Κάνα ο τερνέ πρέπει τι λεν αποφάσεις σο κα επηρεάνεν λένγκι ζωή, μπορεί τι σκεφτίνεν ότι κα αβέλας μπουτ λατσσό τι σπουδάνεν. Αλλά σο πρέπει τι ντεν-πες γκοντί εμ βον εμ λένγκε νταντά ντα νταγιά;

10. Σο πρέπει τι ντας-αμέν γκοντί κάνα λάσα προσωπικές αποφάσεις;

¹⁰ Μερικοί πακιάνα ότι, αφού ανταλά πράγματα ισί προσωπικά, πρέπει τι τθερέν ι ελευθερία τι τραμπίνεν σο μανγκένα βον, άμα λένγκι συνείδηση μουκχέλα-λεν. Μπορεί τι τθερένα πουμαρέ γκοντιάτε ο λάφια ι Παυλόσκε: «Σόσκε τι κρίντιβελ μι ελευθερία κατά συνείδηση εκχέ γιαβερέ τζενέσκι;» (1 Κορινθίους 10:​29) Παρόλο σο τθεράσα ι ελευθερία τι τραμπίνας σο εκπαίδευση κα λας ντα σο μπουτί κα κεράς, πρέπει τι ντας-αμέν γκοντί ότι αμαρί ελευθερία τθερέλα όρια ντα ότι αμαρέ αποφάσεις ανένα είτε λατσσέ είτε μπέτι αποτελέσματα. Οτθάρ ο Παύλος βακερντάς: «Σαρέ ο πράγματα ισί νόμιμα, αλλά να βοηθίνενα σαρέ ο πράγματα. Σαρέ ο πράγματα ισί νόμιμα, αλλά να ενθαρρύνενα σαρέ ο πράγματα». (1 Κορινθίους 10:​23) Άρα, παρόλο σο τθεράσα ι ελευθερία τι λας προσωπικές αποφάσεις, οντουβά σο μανγκάσα αμέν νανέ ο πιο σημαντικός.

11. Σόσκε ελευθερωντάς-αμέν ο Ιεχωβά;

¹¹ Κάνα ο Πέτρος προειδοποιηντάς-αμέν μα τι χρησιμοποιήνας αμαρί ελευθερία με λάθος τρόπος, βακερντάς ότι ο σωστός τρόπος τι χρησιμοποιήνας-λα ισί «σαρ δούλοι ι Ντεβλέσκε». Ο Ιεχωβά χρησιμοποιηντάς ι Ιησούς για τι ελευθερώνελ-αμέν κατά σκλαβιά σο τθεράας κι αμαρτία ντα κο μεριπέ για τι μπορίνας τι χρησιμοποιήνας σαρί αμαρί ζωή κι υπηρεσία Λέσκι.

12. Σο παράδειγμας ντινάς-αμέν ο Νώε ντα λέσκι φαμιλί;

¹² Ο πιο λατσσό τρόπος για τι χρησιμοποιήνας αμαρί ελευθερία ισί τι ντας αμαρέ σαατίσταρ ντα αμαρέ ζοριάταρ για τι υπηρετίνας ι Ιεχωβάς καζόμ πιο λατσσές μπορίνασα. Ανταβά κα αρακχαβέλ-αμέν για μα τι μουκχάς ο στόχοι ανταλέ ντουνιάσκε ντα ο πράγματα σο μανγκάσα τι λεν ι πρώτη θέση αμαρέ ζωγιάτε. (Γαλάτες 5:​16) Σκεφτίνεν σο κερντάς ο Νώε ντα λέσκι φαμιλί. Τζουβντιόνας εκχέ ντουνιάστε  πφερντό βία ντα λουμνιπέ. Αλλά να ανακατούντιλε κο στόχοι ντα κο πράγματα σο κερένας ο τζενέ αζομάν. Τραμπιντέ τι ατσσόν αφοσιωμέ κο πράγματα σο βακερντάας ο Ιεχωβά τι κερέν. Κερντέ ι κιβωτός, γκιντιντέ πράγματα για τι χαν βον ντα ο ζώα ντα προειδοποιηντέ ι τζενέν ότι κα αβέλας ο Κατακλυσμός. «Ο Νώε κερντάς σαρέ οντουλά σο βακερντάας λέσκε ο Ντεβέλ. Κερντάς ακριβώς αντικάς». (Γένεση 6:​22) Ο αποτέλεσμας ισινέ ότι ο Νώε ντα λέσκι φαμιλί σωσάλε κατά τέλος οντουλέ ντουνιάσκο.​—Εβραίους 11:7.

13. Καγιά εντολή ντινάς-αμέν ο Ιεχωβά;

¹³ Σο βακερντάς αμένγκε ο Ιεχωβά τι κεράς αντιβές; Σαρ μαθητές ι Ιησούσκε, τζανάσα ότι ο Ντεβέλ ντινάς-αμέν ι εντολή τι βακεράς ο λατσσέ αμπέρια. (Διαβάνεν Λουκάς 4:​18, 19) Αντιβές, ο Μπενγκ κοριαρντάς ι πιο μπουτ τζενέν ντα βον να αγαβένα ότι ισί δούλοι κι ψεύτικη θρησκεία, κο υλικά πράγματα ντα κο πολιτικός σύστημας. (2 Κορινθίους 4:4) Σαρ ο Ιησούς, τθεράσα ο προνόμιος τι βοηθίνας ι τζενέν τι γνωρίνεν ντα τι ντεν λατρεία ι Ιεχωβάς, ι Ντεβλές σο ντέλα ελευθερία. (Ματθαίος 28:​19, 20) Νανέ εύκολος τι βακεράς κο γιαβερά ο λατσσέ αμπέρια. Μερικέ τθεμέντε, ο τζενέ να μανγκένα τι σικλιόν ι Ντεβλέσκε ντα μερικοί νευριάνενα μπουτ κάνα βακεράσα λένγκε ο λατσσέ αμπέρια. Αλλά αφού ο Ιεχωβά ντινάς-αμέν ι εντολή τι κεράς-λες ανταβά, πρέπει τι πουτσάς-αμέν: “Μπορίναβα τι χρησιμοποιήναβ μι ελευθερία για τι κεράβ πιο μπουτ κι υπηρεσία κι Ιεχωβάσκι;”

14, 15. Σο αποφασιντέ τι κερέν μπουτ υπηρέτες ι Ιεχωβάσκε; (Ντικχ ι φωτογραφία σο ισί κι αρχή)

¹⁴ Λάσα θάρρος κάνα σικλιάσα ότι μπουτ υπηρέτες ι Ιεχωβάσκε αγαντέ ότι ο τέλος ανταλέ ντουνιάσκο ισί μπουτ πασέ ντα αποφασιντέ τι τζουβντιόν πιο απλά ντα τι αρχίνεν ο σκαπανικός. (1 Κορινθίους 9:​19, 23) Μερικοί κερένα σκαπανικός πουμαρέ κχανγκιριάτε, ενώ γιαβερά τζάνα γιαβερέ κχανγκιρίντε σο χρειαζίντιβενα βοήθεια. Κο τελευταία παντς μπρεσά, πιο μπουτ από 250.000 τζενέ αρχισάλε ο σκαπανικός, ντα ακανά υπαρχίντιβενα πιο μπουτ από 1.100.000 τακτικοί σκαπανείς. Καζόμ σουκάρ ισί σο αζόμ μπουτ τζενέ χρησιμοποιήνενα πουμαρί ελευθερία για τι υπηρετίνεν ι Ιεχωβάς αντικάς!​—Ψαλμός 110:3.

¹⁵ Σο βοηθιντάς-λεν τι χρησιμοποιήνεν σωστά πουμαρί ελευθερία; Σκεφτίνεν τον Τζον ντα την Τζούντιθ, σο υπηρετιντέ μπουτέ τθεμέντε κο τελευταία 30 μπρεσά. Ντένα-πουμέν γκοντί ότι, κάνα αρχισάλι η Σχολή Υπηρεσίας Σκαπανέα κο 1977, ενθαρρύνενας ι σκαπανίν τι νασέν πουμαρέ κχανγκιριάταρ ντα τι υπηρετίνεν οτθέ σο ισί πιο μπαρί ανάγκη. Για τι πετυχίνεν ανταβά στόχος, ο Τζον ντα η Τζούντιθ έπρεπε τι ατσσικιαρέν απλή πουμαρί ζωή. Οτθάρ, ο Τζον αλλαντάς μπουτ φαρ μπουτί. Τελικά, γκιλέ τι κερέν έργος εκχέ γιαβερέ τθεμέστε. Σο βοηθιντάς-λεν τι νακχαβέν δυσκολίες, σαρ για παράδειγμας τι σικλιόν εκ νεβί τσσιπ ντα τι συνηθίνεν εκχέ  ξένε τθεμέστε σο ο τζενέ τθερένα γιαβερά συνήθειες ντα ο καιρός ισί διαφορετικός; Προσευχίντιβενας κο Ιεχωβά ντα στηρίντιβενας λέστε για τι βοηθίνελ-λεν. Σαρ νιωθίνενα σο υπηρετιντέ ι Ιεχωβάς αντικάς σαρέ ανταλά μπρεσά; Ο Τζον βακερέλα: «Νιωθίναβας ότι κεράβας σαρέ μι γκίσαρ ο πιο λατσσό πράγμας σο κα μπορίναβας τι κεράβ. Ο Ιεχωβά αβιλό πιο πραγματικός μάνγκε, σαρ εκ λατσσό ντατ. Ακανά αγαντόμ πιο λατσσές σο μανγκέλα τι βακερέλ ο εδάφιος Ιακώβου 4:8: “Πλησιάνεν ι Ντεβλές, ντα βοβ κα πλησιάνελ-τουμέν”. Τζανάβας ότι αρακχλόμ οντουβά σο ρόνταβας, εκ ζωή πφερντί ικανοποίηση».

16. Σαρ χρησιμοποιηντέ σωστά πουμαρί ελευθερία χιλιάδες τζενέ;

¹⁶ Μερικοί, σαρ ο Τζον ντα η Τζούντιθ, μπορίνενα τι κερέν σκαπανικός μπουτ καιρός. Αλλά γιαβερά, σο να μπορίνενα τι κερέν μπουτ πράγματα, κερένα σκαπανικός για χάνικ καιρός. Μπουτ τζενέ βοηθίνενα κι οικοδόμηση σο αβέλα-πες σαρό κο ντουνιάς. Για παράδειγμας, περίπου 27.000 πφραλά ντα πφενιά γκιλέ τι βοηθίνεν τι κερντιόν ο κεντρικά γραφεία κο Γουόργουικ κι Νέα Υόρκη. Μερικοί κερντέ μπουτί ντούι εβδομάδες, γιαβερά χάνικ μασεκά ντα γιαβερά πιο μπουτ από εκ μπρες. Μπουτ λένταρ κερντέ θυσίες για τι υπηρετίνεν κο Γουόργουικ. Ντινέ μπουτ λατσσό παράδειγμας σόσκε χρησιμοποιηντέ πουμαρί ελευθερία για τι ντεν δόξα κο Ιεχωβά, κο Ντεβέλ σο ντέλα ελευθερία!

17. Σο μπορίνασα τι μπεκλεντίνας άμα ακανά χρησιμοποιήνασα λατσσές αμαρί ελευθερία;

¹⁷ Ισινάμ πφερντέ εκτίμηση σο γνωριντάμ ι Ιεχωβάς ντα τθεράσα ι ελευθερία σο ανέλα η αληθινή λατρεία. Οτθάρ, τι σικαβάς οντουλέντζαρ σο τραμπίνασα ότι ανταγιά ελευθερία τθερέλα μπαρί αξία αμένγκε. Αντίς τι χρησιμοποιήνας-λα με λάθος τρόπος, τι χρησιμοποιήνας-λα για τι υπηρετίνας ι Ιεχωβάς καζόμ πιο λατσσές μπορίνασα. Αντικάς, κα μπορίνας τι απολαμβάνας ο ευλογίες σο ντινάς πο λάφι ο Ιεχωβά, κάνα κα νικιόλ μπαγιά ακαγιά προφητεία: «Η δημιουργία κα ελευθερώντιβελ για μα τι αβέλ σκλαβωμέ εκχέ σωμάστε σο κερνιόλα, αλλά κα λελ ι ελευθερία σο τθερένα με δόξα ο τσσαβέ ι Ντεβλέσκε».​—Ρωμαίους 8:21.