1, 2. Σόσκε ισινέ αναστατωμέ ο Ιησούς;

Ο ΤΕΛΕΥΤΑΙΟΣ ντιβές σο τζουβντιλό σαρ τζενό, ο Ιησούς ισινέ αναστατωμέ. Μπουτ σουγκό κα μερέλας μπέτι τροπόσαρ κο βαστά κι πφιρνέ τζενένγκε. Αλλά να τθερέλας πι γκοντιάτε σάντε ανταβά. Μανγκέλας μπουτ πι Νταντές ντα μανγκέλας τι κερέλ λέσκο γκι. Τζανέλας ότι, αν κα ατσσόλας πιστός κι δοκιμασία σο κα τθερέλας ανγκλά-πέστε, κα βοηθίνελας τι δικαιώντιβελ ι Ιεχωβάσκο ναβ. Ο Ιησούς μανγκέλας ι τζενέν-ντα, ντα τζανέλας ότι σάντε άμα κα ατσσόλας πιστός μέχρι κο μεριπέ κα πουτρέλας ο ντρομ για τι τζουβντιόν για πάντα.

² Παρόλο σο ο Ιησούς ισινέ αγχωμέ, τθερέλας ειρήνη. Βακερντάας πι αποστολόνγκε: «Ντάβα-τουμέν μι ειρήνη». (Ιωάν. 14:​27) Τθερέλας ι «ειρήνη ι Ντεβλέσκι», δηλαδή ι ηρεμία σο αβέλα κάνα εκ τζενό ισί αμάλ ι Ιεχωβάσαρ. Ανταγιά ειρήνη ηρεμίνελας λέσκι γκοντί ντα λέσκο γκι.​—Φιλιπ. 4:6, 7.

3. Σο κα ντικχάς ανταλέ μαθημάστε;

³ Καέκ αμένταρ να κα νακχέλ αζόμ μπαρί δοκιμασία σαρ ο Ιησούς, αλλά σαρέ οντουλά σο ακολουθίνενα-λες κα τθερέν δοκιμασίες. (Ματθ. 16:​24, 25· Ιωάν. 15:​20) Ντα σαρ ο Ιησούς, αντικάς αμέν-ντα μπάζιμα κα αναστατώντιβας. Σο κα κεράς για μα τι ανησυχίνας μπουτ ντα για μα τι χασαράς ι ειρήνη αμαρέ γκοντιάκι; Κα ντικχάς τριν πράγματα σο κερντάς ο Ιησούς καζόμ κερέλας πι Νταντέσκο έργος κι πφουβ ντα κα σικλιάς σαρ κα μοιάζας λέστε κάνα νακχάσα δοκιμασίες.

4. Καζόμ κα τθερέν ο εδάφιος 1 Θεσσαλονικείς 5:​17 τουμαρέ γκοντιάτε, βακερέν παραδείγματα σο σικαβένα ότι ο Ιησούς κερντάς μπουτ προσευχές ο τελευταίος ντιβές σο τζουβντιλό κι πφουβ.

⁴ Διαβάνεν 1 Θεσσαλονικείς 5:​17. Ο Ιησούς κερντάς  μπουτ προσευχές ο τελευταίος ντιβές σο τζουβντιλό κι πφουβ. Κάνα σικαντάς πι μαθητένγκε σαρ τι ντεν-πες γκοντί λέσκο μεριπέ, κερντάς προσευχή ι μαντρέσκε ντα ι μολιάκε. (1 Κορ. 11:​23-25) Πριν τι νασέν κατά τθαν σο κερντέ ο Πάσχας, κερντάς προσευχή γιεκ πι μαθητέντζαρ. (Ιωάν. 17:​1-26) Κάνα γκιλέ κο Όρος των Ελαιών οντιά ιράτ, κερντάς μπουτ προσευχές. (Ματθ. 26:​36-39, 42, 44) Ατζέ-ντα ο τελευταία λάφια σο βακερντάς πριν τι μερέλ ισινέ προσευχή. (Λουκ. 23:​46) Ο Ιησούς προσευχισάλο κο Ιεχωβά σαρέ οντουλένγκε σο αβιλέ-πες οντουβά τελευταίος ντιβές σο τζουβντιλό κι πφουβ.

5. Σόσκε ο απόστολοι να ατσσιλέ μπίνταρανε;

⁵ Εκ λόγος σο ο Ιησούς νταϊντιντάς ι δοκιμασία ισινέ ότι προσευχίντιβελας μπουτ φαρ ντα μανγκέλας πι Νταντέσταρ τι βοηθίνελ-λες. Ο απόστολοι, οκιά μπάνταρ, τσσιναντέ τι κερέν προσευχή οντιά ιράτ. Οτθάρ, να ατσσιλέ μπίνταρανε κάνα αβιλό ο σαάτι τι δοκιμάντιβεν. (Ματθ. 26:​40, 41, 43, 45, 56) Κάνα νακχάσα δοκιμασίες, κα ατσσάς πιστοί σάντε αν μοιάζασα κο Ιησούς ντα “να τσσιναβάσα τι προσευχίντιβας”. Σο μπορίνασα τι μανγκάς κι προσευχή;

6. Σαρ κα βοηθίνελ-αμέν η πίστη τι τθεράς ειρήνη;

⁶ Μπορίνασα τι προσευχίντιβας κο Ιεχωβά τι “ντελ-αμέν πιο μπουτ πίστη”. (Λουκ. 17:5· Ιωάν. 14:1) Χρειαζίντιβασα πίστη επειδή ο Μπενγκ κα δοκιμάνελ σαρέ οντουλέν σο ακολουθίνενα ι Ιησούς. (Λουκ. 22:​31) Σαρ κα βοηθίνελ-αμέν η πίστη τι τθεράς ειρήνη ατζέ-ντα κάνα νακχάσα δοκιμασίες παλάλ γιαβερέστε; Άμα κερντάμ σο νακχέλα αμαρέ βαστέσταρ για τι νακχαβάς εκ πρόβλημας, η πίστη κα κερέλ-αμέν τι μουκχάς ο πράγματα κο Ιεχωβά. Πακιάσα σαρέ  αμαρέ γκίσαρ ότι βοβ τζανέλα σο τι κερέλ μπουτ πιο λατσσές αμένταρ, οτθάρ τθεράσα ειρήνη αμαρέ γκοντιάτε ντα αμαρέ γκίστε.​—1 Πέτρ. 5:6, 7.

7. Σο σικλιλέν κατά Ρόμπερτ;

⁷ Η προσευχή βοηθίνελα-αμέν τι ατσσικιαράς ι ειρήνη αμαρέ γκοντιάκι σο-ντα δοκιμασίες τι νακχάσα. Ανέν τουμαρέ γκοντιάτε εκχέ πιστέ πρεσβυτερός σο νακχλάς ο 80 ντα βακερένα λέσκε Ρόμπερτ. Βοβ βακερέλα: «Η συμβουλή σο ισί κο εδάφια Φιλιππησίους 4:6, 7 βοηθιντάς-μαν τι νταϊντίναβ μπουτ δοκιμασίες μι ζωγιάτε. Τθεράβας οικονομικά προβλήματα. Επίσης, για χάνικ καιρός τσσιναντόμ τι αβάβ πρεσβύτερος». Σο κερέλα ο Ρόμπερτ για τι ατσσικιαρέλ ι ειρήνη πι γκοντιάκι; «Κάνα αρχίναβα τι ανησυχίναβ κεράβα προσευχή», βακερέλα. «Πακιάβα ότι, καζόμ πιο μπουτ προσευχίντιβαβα ντα μολίναβα ι Ντεβλές, αζόμ πιο μπαρί ειρήνη τθεράβα».

8. Καβά ισί εκ γιαβέρ λόγος σο τθερέλας ειρήνη αντρέ πέστε ο Ιησούς σαρ σικαβέλα ο εδάφιος Ιωάννης 8:29;

⁸ Διαβάνεν Ιωάννης 8:​29. Ατζέ-ντα κάνα τθερέλας διωγμός, ο Ιησούς τθερέλας ειρήνη αντρέ πέστε σόσκε τζανέλας ότι ντέλας χαρά πι Νταντές. Ντινάς καν ατζέ-ντα κάνα ισινέ δύσκολος λέσκε. Μανγκέλας πι Νταντές ντα τσσουντάς λέσκι υπηρεσία πρώτα πι ζωγιάτε. Πριν τι αβέλ κι πφουβ, ισινέ «μπουτ λατσσό εργάτης» ι Ντεβλέσκο. (Παρ. 8:​30) Καζόμ ισινέ κι πφουβ, σικλιαρέλας αντράλ πι γκίσταρ πι Νταντέσκε. (Ματθ. 6:9· Ιωάν. 5:​17) Ανταβά έργος ντέλας μπαρί χαρά ι Ιησούς.​—Ιωάν. 4:​34-36.

9. Σαρ βοηθίνελα-αμέν ο έργος τι ατσσικιαράς ι ειρήνη σο τθεράσα αντρ’ αμέντε;

 ⁹ Κα μοιάζας κο Ιησούς άμα ντάσα καν ι Ιεχωβάς ντα “τθεράσα πάντα μπουτ πράγματα τι κεράς κο έργος κι Κυριόσκο”. (1 Κορ. 15:​58) Κάνα ισινάμ «συνέχεια απασχολημέ» κο έργος, ισί πιο εύκολος τι ντικχάς αμαρέ προβλήματα σαρ ισί ντα μα τι μπαριαράς-λεν αμαρέ γκοντιάτε. (Πράξ. 18:5) Για παράδειγμας, ο τζενέ σο αρακχάσα κο έργος μπουτ φαρ τθερένα πιο μπαρέ προβλήματα αμένταρ. Όμως, κάνα σικλιόνα τι μανγκέν ι Ιεχωβάς ντα κερένα λέσκε συμβουλές, τθερένα πιο λατσσί ντα ευτυχισμέ ζωή. Κάθε φαρ σο ντικχάσα τι αβέλ-πες ανταβά, αβάσα ατζέ πιο σίγουροι ότι ο Ιεχωβά κα αρακχαβέλ-αμέν. Ανταγιά σιγουριά βοηθίνελα-αμέν τι ατσσικιαράς ι ειρήνη σο τθεράσα αντρ’ αμέντε. Εκ πφεν σο τθερέλα σαρί πι ζωή κατάθλιψη ντα αμντίνελα ότι να αξίνελα, αγαντάς ότι ανταβά ισί μπαγιά. Βόι βακερέλα: «Κάνα νικιάβα πιο μπουτ κο έργος, κεράβα κουμάντος μο συναισθήματα πιο λατσσές ντα ισινόμ πιο ευτυχισμέ. Πακιάβα ότι ανταβά αβέλα-πες σόσκε, κάνα ισινόμ κο έργος, νιωθίναβα πιο πασέ κο Ιεχωβά».

10. Σο σικλιλέν κατά Μπρέντα;

¹⁰ Σκεφτίνεν ο παράδειγμας εκχέ πφενιάκο-ντα σο βακερένα λάκε Μπρέντα. Εμ βόι εμ λάκι τσσάι τθερένα εκ πφαρό νασφαλιπέ. Η Μπρέντα ισί σε αναπηρικός καροτσάκι ντα να τθερέλα μπουτ ζορ. Τζάλα κο έργος κχερ κχερέστε κάνα μπορίνελα, αλλά ντέλα μαρτυρία πιο μπουτ με επιστολές. Βόι βακερέλα: «Κάνα λιντόμ απόφαση, εμ μι γκοντιάτε εμ μι γκίστε, ότι να κα αβάβ λατσσές ανταλέ ντουνιάστε, μπορισάλομ τι κεράβ ο πιο λατσσό κο έργος. Ντα ο έργος κερέλα-μαν τι μπιστράβ μο ανησυχίες ντα τι σκεφτίναβ σαρ κα βοηθίναβ ι τζενέν. Κερέλα-μαν τι ατσσικιαράβ μι γκοντιάτε ο μπουτ σουκάρ ντιβεσά σο κα αβέν».

11-13. (α) Σαρ σικαντέ ο απόστολοι ντα γιαβερά τζενέ ότι ισινέ λατσσέ αμαλά ι Ιησούσκε; (β) Σαρ κερένας-λες τι νιωθίνελ λέσκε αμαλά;

¹¹ Σαρέ οντουλά ντιβεσά σο ο Ιησούς κερέλας πι Νταντέσκο έργος, ο πιστοί απόστολοι σικαντέ ότι ισινέ λατσσέ αμαλά λέσκε. Ισινέ σαρ ο αμάλ σο βακερέλα η Γραφή: «Υπαρχίντιβελα αμάλ σο ισί πιο πιστός εκχέ πφραλέσταρ». (Παρ. 18:​24) Ο Ιησούς εκτιμίνελας ασακέ αμαλέν. Κάνα ισινέ κι πφουβ, καέκ λέσκε πφραλένταρ να πακιαντάς λέστε. (Ιωάν. 7:​3-5) Λέσκε τζενέ αμντίνενας ότι ντιλίντιλοας. (Μάρκ. 3:​21) Αλλά ι ιράτ πριν τι μερέλ βακερντάς κο πιστοί απόστολοι: «Τουμέν ατσσιλέν πασέ μάντε μι δοκιμασιέντε».​—Λουκ. 22:28.

¹² Ισινέ φαρ σο ο απόστολοι πφανγκένας ι Ιησούσκο γκι, βοβ όμως να ατσσόλας κο λάθη σο κερένας, αλλά ντικχέλας ότι τθερένας πίστη λέστε. (Ματθ. 26:​40· Μάρκ. 10:​13, 14· Ιωάν. 6:​66-69) Ι τελευταία ιράτ πριν τι μερέλ, σο ισινέ ανταλέ πιστέ τζενέντζαρ, βακερντάς λένγκε: «Βακεράβα ότι ισινέν αμαλά, σόσκε σαρέ οντουλά σο ασουντόμ μι Νταντέσταρ μουτθαντόμ-λεν τουμένγκε». (Ιωάν. 15:​15) Σίγουρα, ο αμαλά ι Ιησούσκε ντένας-λες μπαρί ζορ. Η βοήθεια σο ντινέ-λες κο έργος ανέλας λέσκε μπαρί χαρά.​—Λουκ. 10:​17, 21.

¹³ Εκτός κατά απόστολοι, ο Ιησούς τθερέλας γιαβερέ-ντα αμαλέν, μουρσέν ντα τζουβλίν, σο βοηθίνενας-λες κο έργος ντα γιαβερέ πραγματέντε σο χρειαζίντιβελας. Μερικοί πουτρένας λέσκε πουμαρέ κχερά για τι χαλ μαντρό λέντζαρ. (Λουκ. 10:​38-42· Ιωάν. 12:1, 2) Γιαβερά τζάνας παλά-λέστε κο ταξίδια ντα ντένας-λες πουμαρέ πραγματένταρ. (Λουκ. 8:3) Ο Ιησούς τθερέλας λατσσέ αμαλέν επειδή ισινέ βοβ-ντα λατσσό αμάλ. Κερέλας λατσσέ πράγματα ι γιαβερένγκε ντα να μπεκλεντίνελας λένταρ τι  κερέν πράγματα σο ναστί κερένας. Παρόλο σο ισινέ τέλειος, εκτιμίνελας ι βοήθεια σο ντένας-λες λέσκε αμαλά σο να ισινέ τέλειοι. Ντα βον σίγουρα βοηθίνενας-λες τι ατσσικιαρέλ ι ειρήνη σο τθερέλας αντρέ πέστε.

14, 15. Σαρ μπορίνασα τι αρακχάς λατσσέ αμαλέν, ντα σαρ βοηθίνενα-αμέν βον;

¹⁴ Ο λατσσέ αμαλά βοηθίνενα-αμέν τι ατσσάς πιστοί κο Ιεχωβά. Ντα ο πιο λατσσό τρόπος για τι αρακχάς λατσσέ αμαλέν ισί τι αβάς αμέν-ντα λατσσέ αμαλά. (Ματθ. 7:​12) Για παράδειγμας, η Γραφή βακερέλα αμένγκε τι ντας αμαρέ νεαυτόσταρ κο γιαβερά, ειδικά οντουλέντε σο “τθερένα ανάγκη”. (Εφεσ. 4:​28) Αβέλα τουμαρέ γκοντιάτε καέκ τζενό τουμαρέ κχανγκιριάταρ σο μπορίνενα τι βοηθίνεν-λες; Μήπως μπορίνενα τι τζαν τι ψωνίνεν εκχέ πφραλέσκε σο ισί πφουρό ή νασφαλό ντα ναστί νασέλα κατά κχερ; Μήπως μπορίνενα τι κερέν χαμπέ εκχέ τσορορέ φαμιλιάκε; Αν τζανένα τι χρησιμοποιήνεν ο ιστότοπος jw.org^® ντα ι εφαρμογή JW Library^®, μήπως κα μπορίνενας τι βοηθίνεν γιαβερέν-ντα κι κχανγκιρί τι χρησιμοποιήνεν-λεν; Κάνα τθεράσα αμαρέ γκοντιάτε τι βοηθίνας ι γιαβερέν, κα αβάς ευτυχισμέ.​—Πράξ. 20:35.

¹⁵ Αμαρέ αμαλά κα στηρίνεν-αμέν κάνα νακχάσα δοκιμασίες ντα κα βοηθίνεν-αμέν τι ατσσικιαράς ι ειρήνη σο τθεράσα αντρ’ αμέντε. Σαρ ο Ελιού ασουνέλας κάνα ο Ιώβ βακερέλας σο τσσίντελας, αντικάς αμαρέ αμαλά-ντα βοηθίνενα-αμέν άμα ασουνένα με υπομονή κάνα πουτράσα λένγκε αμαρό γκι. (Ιώβ 32:4) Δεν πρέπει τι μπεκλεντίνας αμαρέ αμαλένταρ τι βακερέν αμένγκε βον σο τι κεράς, αλλά ισί λατσσό τι ασουνάς ο συμβουλές σο ντένα-αμέν κατά Γραφή.  (Παρ. 15:​22) Ντα σαρ ο βασιλιάς Δαβίδ, αντικάς αμέν-ντα μα τι αβάς μπαρικανέ αλλά τι μουκχάς αμαρέ αμαλέν τι βοηθίνεν-αμέν κάνα τθεράσα ανάγκη. (2 Σαμ. 17:​27-29) Ασακέ λατσσέ αμαλά ισί δώρος κατά Ιεχωβά.​—Ιακ. 1:17.

16. Καβά ισί ο μόνος τρόπος για τι τθεράς ειρήνη σαρ βακερένα ο εδάφια Φιλιππησίους 4:6, 7; Εξηγίνεν.

¹⁶ Διαβάνεν Φιλιππησίους 4:6, 7. Σόσκε βακερέλα αμένγκε ο Ιεχωβά ότι μπορίνασα τι τθεράς ι ειρήνη σο ντέλα «αντράλ κατά Χριστός Ιησούς»; Επειδή σάντε άμα αγαβάσα ο ρόλος σο τθερέλα ο Ιησούς κι Ντεβλέσκο σκοπός ντα άμα πακιάσα λέστε, κα τθεράς αμαρέ γκοντιάτε ντα αμαρέ γκίστε ειρήνη σο να χασάρντιβελα. Για παράδειγμας, αντράλ κατά θυσία σο κερντάς ο Ιησούς, σαρέ αμαρέ αμαρτίες μπορίνενα τι συγχωρίντιβεν. (1 Ιωάν. 2:​12) Καζόμ λοκχιόλα αμαρό γκι σο τζανάσα-λες ανταβά! Σαρ Βασιλιάς κι Βασιλεία κι Ντεβλέσκι, ο Ιησούς κα νασκιαρέλ σαρέ ο προβλήματα σο μπορεί τι ανέλ αμένγκε ο Μπενγκ ντα λέσκο ντουνιάς. (Ησ. 65:​17· 1 Ιωάν. 3:8· Αποκ. 21:3, 4) Ανταβά κερέλα-αμέν τι μπεκλεντίνας σαρ σαρ ι σουκάρ ντιβεσένγκε σο κα αβέν! Ντα παρόλο σο ο Ιησούς ντινάς-αμέν εκ δύσκολη μπουτί, ισί αμέντζαρ ντα υποστηρίνελα-αμέν ανταλέ τελευταίε ντιβεσέντε. (Ματθ. 28:​19, 20) Ανταβά κερέλα-αμέν μπίνταρανε! Λοκχιόλα αμαρό γκι, μπεκλεντίνασα σουκάρ ντιβεσένγκε ντα ισινάμ μπίνταρανε. Ανταλά πράγματα ισί μπουτ σημαντικά για τι τθεράς ειρήνη αμαρέ γκοντιάτε.

17. (α) Σαρ μπορίνελα εκ Χριστιανός τι ατσσικιαρέλ ι ειρήνη σο τθερέλα αντρέ πέστε; (β) Σο κα μπορίνας τι κεράς σαρ βακερέλα ο εδάφιος Ιωάννης 16:33;

¹⁷ Σαρ κα ατσσικιαρέν ι ειρήνη τουμαρέ γκοντιάκι κάνα τασαβένα-τουμέν μπαρέ δοκιμασίες; Αν κερντέν οντουβά σο κερντάς ο Ιησούς-ντα. Πρώτον, τι προσευχίντιβεν ντα μα τι τσσιναβέν τι κερέν-λες ανταβά σο-ντα τι αβέλ-πες. Δεύτερον, τι ντεν καν ι Ιεχωβάς ντα τι βακερέν ο λατσσέ αμπέρια αντράλ τουμαρέ γκίσταρ ατζέ-ντα κάνα ισί δύσκολος. Ντα τρίτον, τι μανγκέν βοήθεια τουμαρέ αμαλένταρ. Αζομάν η ειρήνη ι Ντεβλέσκι κα αρακχαβέλ τουμαρί γκοντί ντα τουμαρό γκι. Ντα σαρ ο Ιησούς, αντικάς τουμέν-ντα κα νικίνεν σαρέ κο δοκιμασίες.​—Διαβάνεν Ιωάννης 16:33.