1. Σο μανγκένα τι κερέν σαρέ ο υπηρέτες ι Ντεβλέσκε, ντα σόσκε; (Ντικχ ι φωτογραφία κι ανγκλαϊνί σελίδα)

Ο ΧΡΙΣΤΟΣ ΙΗΣΟΥΣ ντινάς πι μαθητέντε ακαγιά εντολή: «Τζαν ντα κερέν μαθητέν σαρέ κατά τθεμά». (Ματθ. 28:​19) Σαρέ ο πιστοί υπηρέτες ι Ντεβλέσκε μανγκένα τι σικλιόν σαρ τι κερέν «λατσσές» ανταγιά υπηρεσία σο ντιντιλί-λεν. (2 Τιμ. 4:5) Ανταβά έργος ισί πιο σημαντικός ντα πιο λατσσό σαρέ κατά γιαβερά πράγματα ντα πρέπει τι αβέλ-πες χωρίς τι χασάρντιβελ χρόνος. Αλλά μπορεί τι αβέλ δύσκολος τι ντας κι υπηρεσία κι Ντεβλέσκι καζόμ σαάτι κα μανγκάας.

2. Καλά δυσκολίες τθεράσα καζόμ υπηρετίνασα ι Ντεβλές;

² Χρειαζίντιβελα τι ντας αμαρέ σαατίσταρ ντα αμαρέ ζοριάταρ γιαβερέ-ντα σημαντικέ πραγματέντε. Μπορεί τι κεράσα μπουτ σαάτια μπουτί κάθε ντιβές για τι τθεράς οντουλά σο χρειαζίντιβασα αμέν ντα αμαρί φαμιλί. Μπορεί τι τθεράσα μπουτ ευθύνες κι φαμιλί ή μπορεί τι ισινάμ νασφαλέ, τι τθεράσα κατάθλιψη ή τι νακχάσα ο προβλήματα σο ανένα ο πφουρίματα. Σαρ κα υπηρετίνας ι Ντεβλές καζόμ πιο λατσσές αβέλα-πες άμα τθεράσα ασακέ δυσκολίες;

3. Σο αγαβάσα οντουλένταρ σο βακερντάς ο Ιησούς κο εδάφιος Ματθαίος 13:23;

³ Άμα ναστί ντένα μπουτ τουμαρέ σαατίσταρ κι υπηρεσία κι Ιεχωβάσκι, μα χασαρέν τουμαρό κουράγιος. Ο Ιησούς τζανέλα ότι ναστί κεράσα σαρέ ο ίδια πράγματα ι Ιεχωβάσκε. (Διαβάνεν Ματθαίος 13:​23) Ο Ιεχωβά εκτιμίνελα μπουτ σο-ντα κεράσα για τι υπηρετίνας-λες κάνα ντικχέλα ότι ντάσα-λες ο πιο λατσσό σο τθεράσα. (Εβρ. 6:​10-12) Οκιά μπάνταρ, μπορεί τι πακιάσα ότι μπορίνασα τι κεράς πιο μπουτ. Ανταλέ μαθημάστε, κα σικλιάς σαρ τι τσσουβάς ι υπηρεσία ι Ντεβλέσκι πρώτα αμαρέ ζωγιάτε, σαρ τι ατσσικιαράς  απλή αμαρί ζωή ντα σαρ τι αβάς πιο λατσσέ κάνα βακεράσα ο λατσσέ αμπέρια ντα σικλιαράσα. Πρώτα κα ντικχάς σαρ υπηρετίνασα ι Ντεβλές καζόμ πιο λατσσές αβέλα-πες.

4. Σαρ υπηρετίνασα ι Ντεβλές καζόμ πιο λατσσές αβέλα-πες;

⁴ Για τι υπηρετίνας ι Ντεβλές καζόμ πιο λατσσές αβέλα-πες, πρέπει τι βακεράς ο λατσσέ αμπέρια ντα τι σικλιαράς καζόμ πιο μπουτ μπορίνασα. Αλλά ο Ιεχωβά να ντικχέλα σάντε καζόμ σαάτι υπηρετίνασα-λες. Ντικχέλα σόσκε κεράσα-λες ανταβά. Επειδή μανγκάσα ι Ιεχωβάς ντα ι τζενέν, υπηρετίνασα-λες σαρέ αμαρέ γκίσαρ. * (Μάρκ. 12:​30, 31· Κολ. 3:​23) Ανταβά μανγκέλα τι βακερέλ ότι ντάσα κι υπηρεσία κι Ντεβλέσκι καζόμ πιο μπουτ αβέλα-πες αμαρέ ζοριάταρ. Άμα εκτιμίνασα ο προνόμιος σο τθεράσα τι βακεράς ο λατσσέ αμπέρια, κα κεράς ο πιο λατσσό για τι βακεράς-λεν καζόμ πιο μπουτ τζενένγκε αβέλα-πες.

5, 6. Σικαβέν εκχέ παραδειγμάσαρ σαρ αβέλα-πες εκ τζενό σο να τθερέλα μπουτ χρόνος τι τσσουβέλ ι υπηρεσία ι Ντεβλέσκι πρώτα πι ζωγιάτε.

⁵ Σκεφτίνεν εκχέ τερνές σο μπεϊντίνελα τι κχελέλ κιθάρα. Μπεϊντίνελα τι κχελέλ κάνα-ντα τι αβέλ. Εκ ντιβές βακερένα λέσκε τι κχελέλ κιθάρα εκχέ μαγαζίστε κο σαββατοκύριακα. Αλλά ο λοβέ σο λέλα να ερεσένα-λες για τι ποκινέλ πο έξοδα. Οτθάρ, κερέλα ατζέκ εκ μπουτί εκχέ μπακαλίστε παντς ντιβεσά κι εβδομάδα. Παρόλο σο ο πιο μπουτ σαάτια ισί κο μπακάλι, λέσκο γκι ισί κι κιθάρα. Μανγκέλα μπουτ τι σικλιόλ τι κχελέλ πιο λατσσές ντα τι αβέλ ανταγιά η μπουτί λέσκι. Μέχρι τι αβέλ-πες ανταβά, μπεϊντίνελα τι κχελέλ κιθάρα κάθε φαρ σο ντιντιόλα-λες η ευκαιρία, ατζέ-ντα για χάνικ.

⁶ Αντικάς τουμέν-ντα, ίσως ναστί ντένα μπουτ τουμαρέ σαατίσταρ κο έργος. Όμως, ο έργος ισί ανταβά σο μπεϊντίνενα τι κερέν. Κερένα σο νακχέλα τουμαρέ βαστέσταρ για τι βακερέν ο λατσσέ αμπέρια ατζέ πιο λατσσές ντα τι ερεσέν κι τζενένγκο γκι. Αλλά τθερένα τι κερέν μπουτ πράγματα, οτθάρ μπορεί τι πουτσένα τουμαρό νεαυτός σαρ  αβέλα-πες τι τσσουβέν ο έργος πρώτα τουμαρέ ζωγιάτε.

7, 8. Σαρ κα κεράς οντουβά σο κερέλας ο Ιησούς;

⁷ Ο Ιησούς μουκχλάς αμένγκε μπουτ λατσσό παράδειγμας οπράλ ανταλέστε. Ο πιο σημαντικός πράγμας λέσκε ισινέ τι κερέλ λάφι ι Ντεβλέσκε Βασιλειάκε. (Ιωάν. 4:​34, 35) Πφιρντάς μπουτ χιλιόμετρα για τι κερέλ λάφι καζόμ πιο μπουτ τζενέντε αβέλας-πες. Ρόντελας πάντα ευκαιρίες τι κερέλ λάφι κο τζενέ λένγκε κχερέντε ντα γιαβερτθέ. Ο Ιησούς τσσουντάς ι Ντεβλέσκι υπηρεσία πρώτα πι ζωγιάτε.

⁸ Αμέν κα κεράς οντουβά σο κερέλας ο Χριστός άμα ρόντασα ευκαιρίες τι βακεράς ο λατσσέ αμπέρια κάνα ντα κατέ αβέλα-πες. Για τι κεράς-λες ανταβά, ισινάμ έτοιμοι τι μουκχάς πράγματα σο μπεϊντίνασα. (Μάρκ. 6:​31-34· 1 Πέτρ. 2:​21) Μερικά πφραλά ντα πφενιά ισί ειδικοί, τακτικοί ή βοηθητικοί σκαπανείς. Γιαβερά σικλιλέ εκ γιαβέρ τσσιπ ή γκιλέ οτθέ σο ισί πιο μπαρί ανάγκη. Αλλά μπουτ έργος αβέλα-πες κατά ευαγγελιζόμενοι-ντα σο ναστί κερένα-λεν ανταλά, αλλά κερένα ο πιο λατσσό σο μπορίνενα. Ο Ιεχωβά να μανγκέλα αμένταρ πιο μπουτ οντουλένταρ σο μπορίνασα τι ντας. Μανγκέλα σαρέ τι τθεράς χαρά καζόμ υπηρετίνασα-λες ντα βακεράσα ο «μπουτ σουκάρ ντα λατσσέ αμπέρια ι ευτυχισμέ Ντεβλέσκε».​—1 Τιμ. 1:​11· Δευτ. 30:11.

9. (α) Σαρ τσσουβέλας ο Παύλος πρώτα πι ζωγιάτε ο έργος ατζέ-ντα κάνα κερέλας μπουτί; (β) Σαρ ντικχέλας ο Παύλος ι Ντεβλέσκι υπηρεσία σαρ σικαβένα ο εδάφια Πράξεις 28:​16, 30, 31;

⁹ Ο απόστολος Παύλος μουκχλάς αμένγκε λατσσό παράδειγμας σόσκε τσσουντάς ι Ντεβλέσκι υπηρεσία πρώτα πι ζωγιάτε. Κάνα ισινέ κι Κόρινθος κο δεύτερος ιεραποστολικός ταξίδι, τθερέλας μπουτ χάνικ λοβέ ντα έπρεπε τι λατσσαρέλ τσαντίρια. Αλλά ανταγιά μπουτί να ισινέ ο πιο σημαντικός πράγμας ι Παυλόσκε. Κερέλας-λα για τι νικαβέλ ο αναγκαία ντα αντικάς τι βακερέλ ο λατσσέ αμπέρια κο τζενέ σο μπεσένας κι Κόρινθος “χωρίς τι μανγκέλ λένταρ λοβέ”. (2 Κορ. 11:7) Παρόλο σο έπρεπε τι κερέλ μπουτί-ντα, ατσσικιαρντάς ι υπηρεσία ι Ντεβλέσκι κι πρώτη θέση ντα κερέλας λάφι κο τζενέ κάθε Σάββατος. Κάνα ο πράγματα αβιλέ πιο λατσσές, ο Παύλος μπορίνελας τι κερέλ πιο μπουτ κο έργος. “Αρχισάλο τι αβέλ συνέχεια απασχολημέ κο λάφι ντα ντέλας μαρτυρία κο Ιουδαίοι για τι σικαβέλ ότι ο Ιησούς ισί ο Χριστός”. (Πράξ. 18:​3-5· 2 Κορ. 11:9) Πιο σοράν, κάνα ισινέ φυλακισμέ πι κχερέστε κι Ρώμη ντούι μπρεσά, ντέλας μαρτυρία οντουλέντε σο τζάνας τι ντικχέν-λες ντα γραφίνελας επιστολές. (Διαβάνεν Πράξεις 28:​16, 30, 31) Να μανγκέλας τι μουκχέλ τίποτα τι αβέλ πιο σημαντικός κατά Ντεβλέσκι υπηρεσία. Βοβ γραφιντάς: «Αφού τθεράσα ανταγιά υπηρεσία . . . , να κα μουκχάς-λα». (2 Κορ. 4:1) Σαρ ο Παύλος, ατζέ-ντα άμα πρέπει τι ντας μπουτ αμαρέ σαατίσταρ κι μπουτί, μπορίνασα τι τσσουβάς ο έργος πρώτα αμαρέ ζωγιάτε.

10, 11. Σαρ κα υπηρετίνας ι Ντεβλές καζόμ πιο λατσσές αβέλα-πες άμα τθεράσα προβλήματα υγείας;

¹⁰ Άμα ο πφουρίματα ή ο προβλήματα υγείας να μουκχένα-αμέν τι κεράς έργος κχερ κχερέστε καζόμ κα μανγκάας, ισί γιαβερά-ντα τρόποι για τι βακεράς ο λατσσέ αμπέρια. Ο Χριστιανοί κο πρώτος αιώνας κερένας λάφι κάι-ντα αρακχένας τζενέν. Ρόντενας τι βακερέν ο λατσσέ αμπέρια κχερ κχερέστε, οτθέ σο γκιντίντιβενας μπουτ τζενέ, ατζέ-ντα κάνα να ισινέ κο έργος. (Πράξ. 17:​17· 20:​20) Άμα ναστί πφιράσα μπουτ, μπορεί τι μπεσάς εκχέ τθανέστε σο ισί μπουτ τζενέ ντα τι κεράς λάφι οντουλέντζαρ σο νακχένα οτθάρ. Ή μπορεί τι βακεράς ο λατσσέ αμπέρια  κάνα να ισινάμ κο έργος, τι γραφίνας επιστολές ή τι κεράς έργος κατά τηλέφωνος. Μπουτ πφραλά ντα πφενιά σο ισί-λεν ασακέ μπαρέ δυσκολίες τθερένα μπαρί χαρά κάνα βακερένα ο λατσσέ αμπέρια ανταλέ τροπόντζαρ.

¹¹ Ατζέ-ντα άμα τθερένα προβλήματα υγείας, μπορίνενα τι υπηρετίνεν ι Ντεβλές καζόμ πιο λατσσές αβέλα-πες. Ντεν-τουμέν γκοντί ι Παυλός, σο βακερντάς: «Σαρέ ι πραγματένγκε τθεράβα ι ζορ χάρη οντουλέσταρ σο ντέλα-μαν ζορ». (Φιλιπ. 4:​13) Ο Παύλος χρειαζίντιλο ανταγιά ζορ κάνα νασφάλιλο σε εκ ιεραποστολικός ταξίδι. Βακερντάς κο Γαλάτες: «Η πρώτη φαρ σο πουτάρντιλο μάνγκε ο ντρομ για τι βακεράβ τουμένγκε ο λατσσέ αμπέρια ισινέ ιτιρί εκχέ νασφαλιμάσταρ». (Γαλ. 4:​13) Τουμαρέ προβλήματα υγείας μπορεί τι πουτρέν τουμένγκε-ντα ο ντρομ για τι βακερέν ο λατσσέ αμπέρια γιαβερέντε, σαρ ισί ο γιατροί, ο νοσοκόμοι ή γιαβερά τζενέ σο αρακχαβένα-τουμέν. Μπουτ ανταλέ τζενένταρ ισί κι μπουτί κάνα ο πφραλά τζάνα λένγκε κχερέντε.

12. Σο μανγκέλα τι βακερέλ τι ντικχέλ αμαρί γιακχ «εκ πράγμας»;

¹² Ο Ιησούς βακερντάς: «Ο λυχνάρι ι σωμάσκο ισί η γιακχ. Οτθάρ, άμα τι γιακχ ντικχέλα εκ πράγμας [ή γιαβέρτουλους «ισί απλή», υποσ.], σαρό το σώμας κα αβέλ αντρέ κο φως». (Ματθ. 6:​22) Σο μανγκέλας τι βακερέλ ο Ιησούς; Πρέπει τι ατσσικιαράς απλή αμαρί ζωή ή γιαβέρτουλους τι τθεράς εκ σκοπός ντα μα τι νασέν αμαρέ γιακχά  λέσταρ. Ο Ιησούς μουκχλάς αμένγκε παράδειγμας επειδή τσσουβέλας πρώτα πι ζωγιάτε ι Ντεβλέσκι υπηρεσία. Ντα σικλιαρντάς πι μαθητέν-ντα τι ατσσικιαρέν πουμαρέ γιακχά κι Ιεχωβάσκι υπηρεσία ντα λέσκε Βασιλειάτε. Αμέν κεράσα οντουβά σο κερέλας ο Ιησούς άμα τσσουβάσα ο έργος πρώτα αμαρέ ζωγιάτε, ντα “μανγκάσα πρώτα ι Βασιλεία ντα [ι Ντεβλέσκι] δικαιοσύνη”.​—Ματθ. 6:33.

13. Σο κα βοηθίνελ-αμέν τι ατσσικιαράς αμαρέ γιακχά κι Ντεβλέσκι υπηρεσία;

¹³ Εκ τρόπος για τι ατσσικιαράς αμαρέ γιακχά κι Ντεβλέσκι υπηρεσία ισί τι κεράς πιο απλή αμαρί ζωή ντα αντικάς τι ντας πιο μπουτ αμαρέ σαατίσταρ για τι βοηθίνας ι γιαβερέν τι σικλιόν ι Ιεχωβάς ντα τι μανγκέν-λες. * Για παράδειγμας, μήπως κα μπορίναας τι αλλάνας ο σαάτια σο κεράσα μπουτί για τι κεράς πιο μπουτ έργος αντρέ κι εβδομάδα; Άμα μερικές διασκεδάσεις λένα αμένταρ μπουτ σαάτι, μήπως κα μπορίναας τι κεράς μερικές αλλαγές;

14. Καλά αλλαγές κερντάς εκ αντρόγυνος για τι ντεν πιο μπουτ κι Ντεβλέσκι υπηρεσία;

¹⁴ Ανταβά κερντάς εκ πρεσβύτερος, ο Ιλάιας, ντα λέσκι ρομνί. Βοβ βακερέλα: «Ανγκλέ ναστί κεράας σκαπανικός, αλλά σιγά σιγά κεράας χουρντέ πράγματα σο βοηθιντέ-αμέν τι κεράς πιο μπουτ έργος. Για παράδειγμας, χαλαβάας πιο χάνικ λοβέ, μουκχλάμ μερικές διασκεδάσεις σο λένας αμένταρ μπουτ σαάτι ντα ακανά αγαβάσα ότι να ισινέ σημαντικές, ντα μανγκλάμ αμαρέ αφεντικόνταρ τι αλλάνεν ο σαάτια σο κεράας μπουτί. Αντικάς, μπορίναας τι νικιάς κο έργος απόγευμας, τι κεράς πιο μπουτ μελέτες ντα τι τζας κο έργος αντρέ κι εβδομάδα ντούι φαρ κο μάσεκ. Σο μπαρί χαρά τθεράας!»

15, 16. Σαρ κα κεράς ο έργος ατζέ πιο λατσσές σαρ σικαβένα ο εδάφια 1 Τιμόθεο 4:​13, 15; (Ντικχ ο πλαίσιος-ντα « Στόχοι σο κα Βοηθίνεν-μαν τι Υπηρετίναβ ι Ντεβλές Καζόμ πιο Λατσσές Αβέλα-πες»)

¹⁵ Εκ γιαβέρ τρόπος για τι υπηρετίνας πιο λατσσές ι Ντεβλές ισί τι κεράς πιο λατσσές ο έργος. Μπουτ φαρ ο τζενέ σο κερένα εκ μπουτί πρέπει τι σικλιόν ατζέ πιο μπουτ πράγματα οντουλέ μπουτιάκε για τι κερέν-λα πιο λατσσές. Ανταβά πρέπει τι κεράς αμέν-ντα. Πρέπει τι σικλιάς ατζέ πιο μπουτ πράγματα για τι κεράς πιο λατσσές αμαρό έργος.​—Παρ. 1:5· διαβάνεν 1 Τιμόθεο 4:​13, 15.

¹⁶ Αλλά σαρ κα κεράς-λες ανταβά; Άμα ντάσα μπουτ προσοχή οντουλέντε σο σικλιάσα κι Συνάθροιση Ζωή ντα Έργος. Ανταγιά συνάθροιση ντέλα-αμέν μπουτ σουκάρ σικλιαριπέ για τι κεράς αμαρό έργος ατζέ πιο λατσσές. Για παράδειγμας, κάνα ο πφραλ ντέλα συμβουλή οντουλέντε σο κερντέ εκ διορισμός, σικλιάσα αμέν-ντα σαρ τι κεράς πιο λατσσές ο έργος. Ισί λατσσό τι κεράς οντουλά σο σικλιλάμ ι γιαβέρ φαρ σο κα βακεράς ο λατσσέ αμπέρια εκχέ τζενέσκε. Κα μπορίναας τι μανγκάς βοήθεια κατά επίσκοπος ομίλου, τι τζας κο έργος λέσαρ ή με εκ σκαπανέας, με το επίσκοπος περιοχής ή εκχέ γιαβερέ πφραλέσαρ σο κερέλα λατσσές ο έργος. Καζόμ χρησιμοποιήνασα πιο λατσσές σαρέ ο Εργαλεία για τι Σικλιαράς, κα μπεϊντίνας πιο μπουτ τι βακεράς ο λατσσέ αμπέρια ντα τι σικλιαράς ι τζενέν.

17. Σο κα αβέλ-πες άμα υπηρετίνενα ι Ντεβλές καζόμ πιο λατσσές αβέλα-πες;

¹⁷ Σο μπαρό προνόμιος ισί τι μουκχέλ-αμέν ο Ιεχωβά τι αβάς λέσκε «συνεργάτες»! (1 Κορ. 3:9) Κάνα αβένα «σίγουροι ότι αγαβένα καλά ισί ο πιο σημαντικά πράγματα» ντα ατσσικιαρένα τουμαρέ γιακχά κι Ντεβλέσκι υπηρεσία, κα «υπηρετίνεν ι Ιεχωβάς χαράσαρ». (Φιλιπ. 1:​10· Ψαλμ. 100:2) Σαρ υπηρέτες ι Ντεβλέσκε, μπορίνενα τι αβέν σίγουροι ότι βοβ κα ντελ-τουμέν ι ζορ σο χρειαζίντιβενα για τι υπηρετίνεν-λες σο-ντα δυσκολίες ή προβλήματα τθερένα. (2 Κορ. 4:1, 7· 6:4) Είτε μπορίνενα τι κερέν χάνικ είτε μπουτ πράγματα κο έργος, κα “τθερέν λόγος τι χαιρίνεν” άμα υπηρετίνενα ι Ντεβλές σαρέ τουμαρέ γκίσαρ. (Γαλ. 6:4) Κάνα υπηρετίνενα ι Ιεχωβάς καζόμ πιο λατσσές αβέλα-πες, σικαβένα ότι μανγκένα λες ντα ι τζενέν. “Άμα κα κερέν-λες ανταβά κα σώνεν εμ τουμέν εμ οντουλέν σο ασουνένα-τουμέν”.​—1 Τιμ. 4:16.