1. Σαρ μπορίνενα τι αβέν λατσσέ αμαλά εκχέ τζενέσαρ;

ΓΙΑ τι αβέν αμαλά εκχέ τζενέσαρ, ο πιο μπουτ φαρ πρέπει τι νακχέν χρόνος λέσαρ. Καζόμ κερένα λάφι εκχέ τζενέσαρ οντουλένγκε σο σκεφτίνενα ντα νιωθίνενα, αβένα αμαλά. Αλλά μπάζιμα νανέ αζόμ εύκολος τι αβάς λατσσέ αμαλά ι Ιησούσαρ. Σόσκε;

2. Καγιά ισί η πρώτη δυσκολία;

² Η πρώτη δυσκολία ισί ότι να ντικχλάμ αμαρέ γιακχίντζαρ ι Ιησούς. Μπουτ Χριστιανοί σο τζουβντιόνας κο ντιβεσά κι αποστολόνγκε να ντικχλέ βον-ντα ι Ιησούς. Όμως, ο απόστολος Πέτρος βακερντάς: «Παρόλο σο να ντικχλέν-λες ποτές, μανγκένα-λες. Παρόλο σο ακανά να ντικχένα-λες, τθερένα πίστη λέστε». (1 Πέτρ. 1:8) Άρα, αβέλα-πες τι αβάς αμαλά ι Ιησούσαρ παρόλο σο να ντικχλάμ-λες αμαρέ γιακχίντζαρ.

3. Καγιά ισί η δεύτερη δυσκολία;

³ Η δεύτερη δυσκολία ισί ότι ναστί κεράσα λάφι κο Ιησούς. Κάνα κεράσα προσευχή, βακεράσα οντουλά σο τθεράσα αμαρέ γκοντιάτε κο Ιεχωβά. Ενώ μπορεί τι προσευχίντιβασα κο ναβ κι Ιησούσκο, να κεράσα λάφι λέσαρ. Ντα ο Ιησούς να μανγκέλα τι προσευχίντιβας λέστε. Σόσκε; Επειδή κάνα κεράσα προσευχή ντάσα λατρεία, ντα πρέπει τι ντας λατρεία  σάντε ι Ιεχωβάς. (Ματθ. 4:​10) Αλλά μπορίνασα τι σικαβάς ότι μανγκάσα ι Ιησούς.

4. Καγιά ισί η τρίτη δυσκολία, ντα σο κα ντικχάς ανταλέ μαθημάστε;

⁴ Η τρίτη δυσκολία ισί ότι ο Ιησούς τζουβντιόλα κο ουρανός, οτθάρ ναστί νακχάσα χρόνος λέσαρ. Αλλά μπορίνασα τι σικλιάς μπουτ πράγματα λέσκε παρόλο σο νανέ κι πφουβ αμέντζαρ. Κα ντικχάς σταρ πράγματα σο μπορίνασα τι κεράς για τι αβάς πιο λατσσέ αμαλά λέσαρ. Πρώτα όμως κα ντικχάς σόσκε ισί μπουτ σημαντικός τι αβάς λατσσέ αμαλά ι Χριστόσαρ.

5. Σόσκε πρέπει τι αβάς αμαλά ι Ιησούσαρ; (Ντικχέν ο πλαίσια-ντα « Η Φιλία ι Ιησούσαρ Βοηθίνελα-αμέν τι Αβάς Αμαλά ι Ιεχωβάσαρ» ντα « Σωστή Άποψη ι Ιησούσκε»)

⁵ Πρέπει τι αβάς αμαλά ι Ιησούσαρ άμα μανγκάσα τι αβάς λατσσέ αμαλά ι Ιεχωβάσαρ. Σόσκε; Ντικχέν σάντε ντούι λόγοι. Εκ λόγος ισί ότι ο Ιησούς βακερντάς πι μαθητένγκε: «Ο Ντατ πφαμπόλα τουμένγκε, σόσκε τουμέν πφαμπιλέν μάνγκε». (Ιωάν. 16:​27) Επίσης βακερντάς: «Καέκ ναστί αβέλα κο Ντατ άμα να αβέλα μέσω μάνταρ». (Ιωάν. 14:6) Άμα προσπαθίνασα τι αβάς αμαλά ι Ιεχωβάσαρ χωρίς τι αβάς αμαλά ι Ιησούσαρ, ισί σαρ τι προσπαθίνασα τι τσσουβάς-αμέν εκχέ κτιριόστε χωρίς τι νακχάς κατά πόρτα. Ο Ιησούς χρησιμοποιηντάς εκ ασακό παράδειγμας κάνα βακερντάς ότι βοβ ισί «η πόρτα ι μπρακένγκε». (Ιωάν. 10:7) Εκ γιαβέρ λόγος ισί ότι ο Ιησούς τθερέλας ο ιδιότητες πι Νταντέσκε. Βακερντάς πι μαθητένγκε: «Οντουβά σο τθερέλα ντικχλό μαν τθερέλα ντικχλό ι Νταντές-ντα». (Ιωάν. 14:9) Οτθάρ, εκ σημαντικός τρόπος τι σικλιάς ι Ιεχωβάς ισί τι σικλιάς ι Ιησούσκε ζωγιάκε. Καζόμ σικλιάσα ι Ιησούσκε, αζόμ πιο μπουτ κα  μανγκάς-λες. Ντα καζόμ πιο λατσσέ αμαλά αβάσα ι Ιησούσαρ, αζόμ πιο μπουτ κα μανγκάς λέσκε Νταντές.

6. Καλέ γιαβερέ πραγμάσκε πρέπει τι αβάς αμαλά ι Ιησούσαρ; Εξηγίνεν.

⁶ Πρέπει τι αβάς αμαλά ι Ιησούσαρ για τι λας απάντηση αμαρέ προσευχιέντε. Να ερεσέλα τι βακεράς αμαρέ προσευχιέντε ο λάφι «κο ναβ κι Ιησούσκο». Πρέπει τι αγαβάς σαρ ο Ιεχωβά χρησιμοποιήνελα ι Ιησούς για τι απαντίνελ αμαρέ προσευχιέντε. Ο Ιησούς βακερντάς κο απόστολοι: «Σο-ντα τι μανγκέν μι ναβέστε κα κεράβ-λες». (Ιωάν. 14:​13) Παρόλο σο ο Ιεχωβά ισί οντουβά σο ασουνέλα αμαρέ προσευχές ντα απαντίνελα, ντινάς κο Ιησούς ι ευθύνη τι κερέλ οντουβά σο αποφασιντάς Βοβ. (Ματθ. 28:​18) Οτθάρ, πριν τι απαντίνελ ο Ντεβέλ αμαρέ προσευχιέντε, ντικχέλα άμα κερντάμ ο συμβουλές ι Ιησούσκε. Για παράδειγμας, ο Ιησούς βακερντάς: «Άμα κα συγχωρίνεν ι τζενένγκε λάθη, τουμαρό Ντατ σο ισί κο ουρανός κα συγχωρίνελ τουμέν-ντα· αλλά άμα να κα συγχωρίνεν ι τζενένγκε λάθη, ούτε τουμαρό Ντατ κα συγχωρίνελ τουμαρέ λάθη». (Ματθ. 6:​14, 15) Καζόμ σημαντικός ισί τι σικαβάς λατσσιπέ κο γιαβερά σαρ σικαβέλα αμένγκε ο Ιεχωβά ντα ο Ιησούς!

7. Καλά τζενέ βοηθίντιβενα κατά θυσία ι Ιησούσκι;

⁷ Σάντε οντουλά σο ισί λατσσέ αμαλά ι Ιησούσαρ κα βοηθίντιβεν κατά θυσία ι Ιησούσκι. Σαρ τζανάσα-λες; Ο Ιησούς βακερντάς ότι κα «ντελ πι ζωή πι αμαλένγκε». (Ιωάν. 15:​13) Ο πιστά τζενέ σο τζουβντιλέ πριν τι αβέλ ο Ιησούς κι πφουβ κα χρειαζίντιβελ τι σικλιόν λέσκε ντα τι μανγκέν-λες. Ασακέ μουρσά ντα τζουβλιά σαρ ο Αβραάμ, η Σάρρα, ο Μωυσής ντα η Ραάβ κα τζουβντιόν, αλλά ατζέ-ντα ανταλά δίκαιοι υπηρέτες ι Ιεχωβάσκε κα χρειαζίντιβελ τι αβέν αμαλά ι Ιησούσαρ για τι τζουβντιόν για πάντα.​—Ιωάν. 17:3· Πράξ. 24:​15· Εβρ. 11:​8-12, 24-26, 31.

8, 9. Σο μπορίνασα τι κεράς άμα ισινάμ αμαλά ι Ιησούσαρ, ντα σόσκε ισί ανταβά σημαντικός σαρ βακερένα ο εδάφια Ιωάννης 15:4, 5;

⁸ Χαιρίνασα σο συνεργαζίντιβασα ι Ιησούσαρ για τι βακεράς ντα τι σικλιαράς ο λατσσέ αμπέρια ι Βασιλειάκε. Κάνα ο Ιησούς ισινέ κι πφουβ, ισινέ δάσκαλος. Οτθάρ μπερί σο βουρτισάλο κο ουρανός, συνεχίνελα σαρ σορό ι κχανγκιριάκο τι οδηγίνελ ανταβά έργος. Ντικχέλα ντα εκτιμίνελα ο προσπάθειες σο κερένα για τι βοηθίνεν καζόμ πιο μπουτ τζενέν αβέλα-πες τι σικλιόν λες ντα λέσκε Νταντές. Κι πραγματικότητα, σάντε με τη βοήθεια ι Ιεχωβάσκι ντα ι Ιησούσκι μπορίνασα τι κεράς ανταβά έργος.​—Διαβάνεν Ιωάννης 15:4, 5.

⁹ Ο Λάφι ι Ντεβλέσκο σικλιαρέλα ξεκάθαρα ότι πρέπει τι τθεράς αγάπη ι Ιησούσκε ντα τι ατσσικιαράς-λα για τι κεράς ι Ιεχωβάσκο γκι. Οτθάρ, κα ντικχάς σταρ πράγματα σο μπορίνασα τι κεράς για τι αβάς αμαλά ι Ιησούσαρ.

10. Καβά ισί ο πρώτος πράγμας σο πρέπει τι κεράς για τι αβάς αμαλά ι Ιησούσαρ;

¹⁰ (1) Σικλιόν ι Ιησούς. Μπορίνασα τι κεράς-λες ανταβά κάνα διαβάνασα ο βιβλία Ματθαίος, Μάρκος, Λουκάς ντα Ιωάννης. Καζόμ σκεφτίνασα λατσσές ο ιστορίες ι Γραφιάκε σο τθερένα τι κερέν ι Ιησούσκε ζωγιάσαρ, μανγκάσα ντα σεβάνασα ι Ιησούς επειδή σικαβέλας λατσσιπέ ι γιαβερένγκε. Για παράδειγμας, παρόλο σο ισινέ ο Κύριος πι μαθητένγκο, να τθερέλας-λεν σαρ δούλοι. Αλλά βακερέλας λένγκε σο σκεφτίνελας ντα σο νιωθίνελας. (Ιωάν. 15:​15) Αγαβέλας λένγκι ντουκχ ντα ροβέλας λέντζαρ. (Ιωάν. 11:​32-36) Ατζέ-ντα ο ντουσμάνια ι Ιησούσκε ντικχένας ότι ο τζενέ  σο ασουνένας λέσκε λάφια αβένας αμαλά λέσαρ. (Ματθ. 11:​19) Κάνα μοιάζασα κο Ιησούς σο σικαβέλας λατσσιπέ πι μαθητένγκε, τζάσα-λεν πιο λατσσές ι γιαβερέντζαρ, ισινάμ ευτυχισμέ ντα αμαρί εκτίμηση ι Χριστόσκε μπαριόλα.

11. Καβά ισί ο δεύτερος πράγμας σο πρέπει τι κεράς για τι αβάς αμαλά ι Ιησούσαρ, ντα σόσκε ισί σημαντικός ανταβά;

¹¹ (2) Τι σκεφτίνεν ντα τι κερέν ο πράγματα σαρ ο Ιησούς. Καζόμ πιο μπουτ σικλιάσα σαρ σκεφτίνελα ο Ιησούς ντα σκεφτίνασα αμέν-ντα σαρ βοβ, αζόμ πιο λατσσέ αμαλά κα αβάς λέσαρ. (1 Κορ. 2:​16) Σαρ μπορίνασα τι αβάς σαρ ο Ιησούς; Ντικχέν σάντε εκ παράδειγμας. Ο Ιησούς σκεφτίνελας πιο μπουτ σαρ τι βοηθίνελ ι γιαβερέν παρά τι κερέλ οντουβά σο μανγκέλας βοβ. (Ματθ. 20:​28· Ρωμ. 15:​1-3) Επειδή σκεφτίνελας αντικάς, ντέλας πέσταρ ντα συγχωρίνελας. Να προσβαλίντιβελας εύκολα οντουλένταρ σο βακερένας λέσκε ο γιαβερά. (Ιωάν. 1:​46, 47) Να μουκχλάς ο λάθη σο κερντέας ο τζενέ τι επηρεάνεν ο τρόπος σο ντικχέλας-λεν. (1 Τιμ. 1:​12-14) Ο Ιησούς βακερντάς: «Ανταλέσταρ κα αγαβέν σαρέ ότι ισινέν μο μαθητές, άμα τθερένα αγάπη ο εκ ι γιαβερέσκε». (Ιωάν. 13:​35) Κα αβέλας λατσσό τι πουτσέν-τουμέν: «Κεράβα σο νακχέλα μι βαστέσταρ για τι τθεράβ ειρήνη μι πφραλέντζαρ ντα μι πφενίντζαρ σαρ ο Ιησούς;»

12. Καβά ισί ο τρίτος πράγμας σο πρέπει τι κεράς για τι αβάς αμαλά ι Ιησούσαρ, ντα σαρ μπορίνασα τι κεράς-λες;

¹² (3) Τι στηρίνεν ι Χριστόσκε πφραλέν. Ο Ιησούς ντικχέλα σο-ντα κεράσα λέσκε χρισμέ πφραλένγκε σαρ τι κερντάμ-λες λέσκε. (Ματθ. 25:​34-40) Ο πιο σημαντικός τρόπος για τι στηρίνας ι χρισμέ πφραλέν ισί τι κεράς ο πιο λατσσό για τι βακεράς ντα τι σικλιαράς ο λατσσέ αμπέρια, σαρ βακερντάς αμένγκε ο Ιησούς τι κεράς. (Ματθ. 28:​19, 20· Πράξ. 10:​42) Σάντε άμα κα βοηθίνεν-λεν ο “γιαβερά μπρακέ” κα μπορίνεν ο πφραλά ι Χριστόσκε τι κερέν ανταβά μπαρό έργος σο αβέλα-πες ακανά σαρό κο ντουνιάς. (Ιωάν. 10:​16) Άμα ισινέν κατά γιαβερά μπρακέ, κάθε φαρ σο κερένα ανταβά έργος, σικαβένα τουμαρί αγάπη εμ ι Χριστόσκε πφραλένγκε εμ ι Ιησούσκε.

13. Σαρ μπορίνασα τι κεράς ι συμβουλή ι Ιησούσκι σο ισί κο εδάφιος Λουκάς 16:9;

¹³ Επίσης, αβάσα αμαλά ι Ιεχωβάσαρ ντα ι Ιησούσαρ κάνα ντάσα λοβέ ι εργόσκε σο κερένα-λες κουμάντος βον. (Διαβάνεν Λουκάς 16:9) Για παράδειγμας, μπορίνασα τι κεράς συνεισφορές ανταλέ εργόσκε σο αβέλα-πες σαρό κο ντουνιάς. Αντικάς, βοηθίνασα τι βακέρντιβεν ο λατσσέ αμπέρια τζενέντε σο μπεσένα ντουρ, τι χτίντιβεν ντα τι λατσσάρντιβεν ο τθανά σο ντάσα λατρεία ντα τι βοηθίνας οντουλέν σο νακχλέ εκ φυσική καταστροφή ή κάτι γιαβέρ. Μπορίνασα επίσης τι ντας λοβέ αμαρέ κχανγκιριάκε ντα τι βοηθίνας οντουλέν σο τζανάσα ότι τθερένα ανάγκη. (Παρ. 19:​17) Ανταλά ισί χάνικ πράγματα σο μπορίνασα τι κεράς για τι στηρίνας ι Χριστόσκε πφραλέν.

14. Καβά ισί ο τέταρτος πράγμας σο πρέπει τι κεράς για τι αβάς αμαλά ι Ιησούσαρ σαρ βακερένα ο εδάφια Εφεσίους 4:​15, 16;

¹⁴ (4) Τι στηρίνεν οντουλά σο κανονίνελα ι Ιεχωβάσκι οργάνωση. Αβάσα πιο λατσσέ αμαλά ι Ιησούσαρ, σο ισί ο σορό ι κχανγκιριάκο, κάνα συνεργαζίντιβασα οντουλέντζαρ σο τσσουντάς τι αρακχαβέν-αμέν. (Διαβάνεν Εφεσίους 4:​15, 16) Για παράδειγμας, ακανά κεράσα σο νακχέλα αμαρέ βαστένταρ για τι χρησιμοποιήντιβεν σαρέ ο θέσεις κο Αίθουσες Βασιλείας. Οτθάρ, μερικά κχανγκιριά αβιλέ γιεκ γιαβερέντζαρ ντα λένγκο τομέας αλλαξάλο. Αντικάς, να χαλαβάσα σινανέ ο λοβέ σο ντιντιόνα κι Ιεχωβάσκι οργάνωση. Αλλά  επειδή αβιλί-πες ανταγιά αλλαγή, μερικοί ευαγγελιζόμενοι έπρεπε τι συνηθίνεν νεβέ πραγματέντε. Ανταλά πιστά τζενέ μπορεί τι υπηρετίνενας εκχέ κχανγκιριάτε μπουτ μπρεσά ντα μπορεί τι ισινέ αμαλά ι πφραλέντζαρ ντα ι πφενίντζαρ οτθέ. Αλλά ακανά μανγκλέ λένταρ τι υπηρετίνεν εκχέ γιαβερέ κχανγκιριάτε. Καζόμ μπουτ πρέπει τι χαιρίνελα ο Ιησούς σο ντικχέλα ανταλέ πιστέ μαθητέν τι στηρίνεν ανταγιά απόφαση!

15. Σαρ κα αβέλ πιο λατσσί αμαρί φιλία ι Ιησούσαρ κο ντιβεσά σο κα αβέν;

¹⁵ Οντουλά σο ισί χρισμέ με άγιος πνεύμας μπεκλεντίνενα τι αβέν γιεκ ι Ιησούσαρ για πάντα ντα τι κυβερνίνεν λέσαρ κι Ντεβλέσκι Βασιλεία. Βον κα αβέν μπαγιά γιεκ ι Χριστόσαρ​—κα ντικχέν-λες, κα κερέν λέσαρ λάφι ντα κα αβέν λέσαρ. (Ιωάν. 14:2, 3) Οντουλά-ντα σο μπεκλεντίνενα τι τζουβντιόν κι πφουβ κα τθερέν ι αγάπη ντα ι προσοχή ι Ιησούσκι. Παρόλο σο να κα ντικχέν ι Ιησούς, λένγκι φιλία λέσαρ κα αβέλ πιο λατσσί καζόμ κα απολαμβάνεν ι ζωή σο κα ντελ-λεν ο Ιεχωβά ντα ο Ιησούς.​—Ησ. 9:6, 7.

16. Καλά ευλογίες λάσα επειδή ισινάμ αμαλά ι Ιησούσαρ;

¹⁶ Κάνα αβάσα αμαλά ι Ιησούσκε, λάσα μπουτ ευλογίες. Για παράδειγμας, μανγκέλα-αμέν ντα βοηθίνελα-αμέν ακανά. Ντέλα-αμέν ι ευκαιρία τι τζουβντιάς για πάντα. Ντα ο πιο σημαντικός, η φιλία σο τθεράσα ι Ιησούσαρ βοηθίνελα-αμέν τι αβάς μπουτ λατσσέ αμαλά λέσκε Νταντέσαρ, ι Ιεχωβάσαρ. Σο μπαρό προνόμιος ισί τι βακέρντιβας αμαλά ι Ιησούσκε!