1. Σο πρέπει τι κεράς σαρέ;

ΚΑ ΜΑΝΓΚΕΝΑΣ τι τθάβντεν σε εκ αγώνας σο τζανένα ότι ισί δύσκολος, ειδικά άμα ισινένας νασφαλέ ή κχινέ; Μάλλον νάα. Ο απόστολος Παύλος όμως βακερντάς ότι σαρέ ο αληθινοί Χριστιανοί τθάβντενα σε εκ αγώνας. (Εβρ. 12:1) Σαρέ, τερνέ ντα πφουρέ, ζουρανέ ντα κχινέ, πρέπει τι νταϊντίνας μέχρι κο τέλος για τι λας ο βραβείος σο ντέλα-αμέν ο Ιεχωβά.​—Ματθ. 24:13.

2. Σόσκε ο Παύλος κερέλας λάφι μπίνταρανες σαρ βακερένα ο εδάφια 2 Τιμόθεο 4:7, 8;

² Ο Παύλος κερέλας λάφι μπίνταρανες σόσκε “τθαβντισάλο μέχρι κο τέλος”. (Διαβάνεν 2 Τιμόθεο 4:7, 8) Αλλά καλέ τθαβντιμάσκε κερέλας λάφι;

3. Καλέ τθαβντιμάσκε κερέλας λάφι ο Παύλος;

³ Ο Παύλος μπάζιμα βακερέλας παραδείγματα κατά αγώνες σο αβένας κι πουρανί Ελλάδα για τι σικλιαρέλ σημαντικά πράγματα. (1 Κορ. 9:​25-27· 2 Τιμ. 2:5) Μπουτ φαρ, βακερντάς ότι η Χριστιανική ζωή ισί σαρ εκ αγώνας τθαβντιμάσκο. (1 Κορ. 9:​24· Γαλ. 2:2· Φιλιπ. 2:​16) Εκ τζενό αρχίνελα τι τθάβντελ κάνα ντέλα πο λάφι τι τζουβντιόλ ι Ιεχωβάσκε ντα μπολντιόλα. (1 Πέτρ. 3:​21) Ερεσέλα κο τέλος κάνα ο Ιεχωβά ντέλα-λες ζωή για πάντα σαρ βραβείος.​—Ματθ. 25:​31-34, 46· 2 Τιμ. 4:8.

4. Σο κα ντικχάς ανταλέ μαθημάστε;

⁴ Σαρ μοιάζελα εκ μπαρό αγώνας τθαβντιμάσκο ι ζωγιάσαρ σο τθερέλα εκ Χριστιανός; Μοιάζελα μπουτέ πραγματέντε, αλλά αμέν κα ντικχάς τριν. Πρώτον, πρέπει τι λας ο σωστός ντρομ. Δεύτερον, πρέπει τι τθεράς αμαρέ γιακχά κο τέλος κι ντρομέσκο. Τρίτον, μα τι τσσιναβάς τι τθάβντας ατζέ-ντα κάνα τθεράσα προβλήματα.

5. Καβά ντρομ πρέπει τι λας, ντα σόσκε;

⁵ Για τι κερδίνεν ο βραβείος ο τζενέ σο τθάβντενα μπαγιά σε εκ αγώνας, πρέπει τι τθάβντεν εκχέ συγκεκριμέ ντρομέστε.  Αντικάς αμέν-ντα άμα μανγκάσα τι λας ο βραβείος σο ντέλα ζωή για πάντα, πρέπει τι λας ο Χριστιανικός ντρομ, δηλαδή τι τζουβντιάς σαρ ο Χριστιανοί. (Πράξ. 20:​24· 1 Πέτρ. 2:​21) Όμως, ο Σατανάς ντα οντουλά σο μοιάζενα λέστε μανγκένα τι τραμπίνας γιαβερά πράγματα ντα τι “τθάβντας λέντζαρ”. (1 Πέτρ. 4:4) Πρασάνα-αμέν σο λιντάμ ανταβά ντρομ ντα βακερένα ότι λένγκο ντρομ ισί πιο λατσσό, ότι γκερέλα κι ελευθερία. Αλλά λένγκε λάφια νανέ μπαγιά.​—2 Πέτρ. 2:19.

6. Σο σικλιόνα κατά Μπράιαν;

⁶ Κον τθάβντελα οντουλέντζαρ σο επηρεάντιβενα κατά Μπενγκέσκο ντουνιάς αγαβέλα μπουτ σουγκό ότι ο ντρομ σο τραμπιντάς να γκερέλα κι ελευθερία αλλά κι σκλαβιά. (Ρωμ. 6:​16) Σκεφτίνεν σο αβιλό-πες κο Μπράιαν. Λέσκο ντατ ντα λέσκι ντάι βακερένας λέσκε τι λελ ο Χριστιανικός ντρομ. Αλλά κι εφηβεία, ο Μπράιαν να ισινέ σίγουρος άμα κα αβέλας ευτυχισμέ ανταλέ ντρομέστε. Τραμπιντάς τι τθάβντελ οντουλέντζαρ σο τζουβντιόνα σαρ μανγκέλα ο Μπενγκ. «Να νακχέλας μι γκοντιάταρ ότι η ελευθερία σο μανγκάβας κα κερέλας-μαν μα τι μπορίναβ τι τσσιναβάβ μερικά γκεραλέ πράγματα», βακερέλα. «Ερεσλόμ κο σημείος τι πιαβ ναρκωτικά, τι ματιάβ ντα τι κεράβ λουμνιπέ. Καζόμ νακχένας ο μπρεσά, πιάβας ατζέ πιο επικίνδυνα ναρκωτικά ντα ναστί τζουβντιάβας μπι λένγκο. . . . Οτθάρ, αρχισάλομ τι μπικινάβ ναρκωτικά για τι συνεχίναβ τι τζουβντιάβ αντικάς». Τελικά, ο Μπράιαν αποφασιντάς τι τζουβντιόλ σαρ μανγκέλα ο Ιεχωβά. Αλλαντάς ντρομ ντα μπολντιλό κο 2001. Ακανά σο λιντάς ο Χριστιανικός ντρομ, ισί μπαγιά ευτυχισμέ. *

7. Καλά ντούι ντρομά πουτάρντιβενα ανγκλ’ αμέντε σαρ βακερένα ο εδάφια Ματθαίος 7:​13, 14;

⁷ Καζόμ σημαντικός ισί τι τραμπίνας ο σωστός ντρομ! Ο Σατανάς μανγκέλα τι τσσιναβάς σαρέ τι τθάβντας κο στενός ντρομ σο «οδηγίνελα κι ζωή» ντα τι τσσουβάς-αμέν κο μπουγλό ντρομ, σο πφιρένα ο πιο μπουτ τζενέ κο ντουνιάς. Ανταβά ντρομ ισί πιο εύκολος ντα μπουτ τζενέ πφιρένα λέστε. Αλλά «οδηγίνελα κι καταστροφή». (Διαβάνεν Ματθαίος 7:​13, 14) Για τι ατσσάς κο σωστός ντρομ ντα μα τι νασάς λέσταρ, πρέπει τι ντας μπέσα κο Ιεχωβά ντα τι ασουνάς-λες.

8. Άμα εκ τζενό σο τθάβντελα κα περέλ, σο κερέλα;

⁸ Ο τζενέ σο τθάβντενα σε εκ μπαρό αγώνας τθαβντιμάσκο ντικχένα ντιπ ανγκλά-πουμέντε για μα τι περέν. Ατζέ-ντα αντικάς  τι αβέν ο πράγματα, μπορεί τι περέν κατά λάθος οπράλ εκχέ γιαβερέ τζενέστε σο τθάβντελα ή τι ισταβέν εκχέ γουρνάτε. Άμα κα περέν, ιστίνα ντα συνεχίνενα τι τθάβντεν. Τθερένα πουμαρέ γκοντιάτε πιο μπουτ, όχι οντουλέστε σο κερντάς-λεν τι περέν, αλλά κο τέλος κι ντρομέσκο ντα κο βραβείος σο μπεκλεντίνενα τι κερδίνεν.

9. Σο πρέπει τι κεράς άμα κα περάς;

⁹ Κο αγώνας σο κεράσα αμέν, μπορεί μπουτ φαρ τι περάς κάνα κεράσα λάθη οντουλέντζαρ σο βακεράσα ή κεράσα. Ή ο τζενέ σο τθάβντενα αμέντζαρ μπορεί τι κερέν λάθη σο ντουκχαβένα αμαρό γκι. Ανταβά να κερέλα αμένγκε εντύπωση. Σαρέ ισινάμ ατελείς ντα σαρέ τθάβντασα κο στενός ντρομ κι ζωγιάκο. Οτθάρ, κα αβέν φαρ σο κα «περάς» ο εκ οπράλ κο γιαβέρ. Ο Παύλος αγαβέλας ότι μπάζιμα σαρέ κα τθεράς λόγους για τι κεράς “παράπονα”. (Κολ. 3:​13) Αντίς όμως τι ντικχάς οντουβά σο κερντάς-αμέν τι περάς, τι τθεράς αμαρέ γιακχά κο βραβείος σο ισί ανγκλ’ αμέντε. Άμα κα περάς, τι τραμπίνας τι ιστιάς ντα τι συνεχίνας τι τθάβντας. Άμα πφερντιάσα κερκιπέ, ασταράσα χολί ντα να μανγκάσα τι ιστιάς, να κα ερεσάς κο τέλος ούτε κα λας ο βραβείος. Επίσης, κα αβάς εμπόδιος ι γιαβερένγκε σο προσπαθίνενα τι τθάβντεν κο στενός ντρομ κι ζωγιάκο.

10. Σαρ να κα κεράς ι γιαβερέν “τι περέν”;

¹⁰ Εκ γιαβέρ τρόπος για μα τι κεράς οντουλέν σο τθάβντενα αμέντζαρ “τι περέν” ισί τι κεράς οντουβά σο μπεϊντίνενα βον άμα ανταβά αβέλα-πες αντίς τι μανγκάς τι νακχέλ αμαρό. (Ρωμ. 14:​13, 19-21· 1 Κορ. 8:9, 13) Ατθέ ντικχάσα εκ σημαντική-ντα διαφορά κατά τζενέ σο τθάβντενα μπαγιά σε εκ αγώνας. Βον τσσουβένα κόντρα ο εκ ι γιαβερέσαρ, ντα ο κάθε εκ προσπαθίνελα τι κερδίνελ ο βραβείος πι νεαυτόσκε. Σκεφτίνενα πρώτα πουμαρό συμφέρον. Οτθάρ, μερικοί για τι ερεσέν ανγκλάλ μπορεί τι ταρτίνενα ι γιαβερέν. Αλλά αμέν να τσσουβάσα κόντρα ο εκ ι γιαβερέσαρ. (Γαλ. 5:​26· 6:4) Οντουβά σο μανγκάσα ισί τι βοηθίνας καζόμ αβέλα-πες πιο μπουτ τζενέν τι ερεσέν κο τέλος αμέντζαρ ντα τι λεν ο βραβείος ι ζωγιάκο. Προσπαθίνασα τι κεράς ι συμβουλή σο γραφιντάς ο Παύλος ι Ντεβλέσκε πνευμάσαρ “μα τι ντικχάς σάντε αμαρό συμφέρον, αλλά ο συμφέρον ι γιαβερένγκο-ντα”.​—Φιλιπ. 2:4.

11. Κατέ τθερέλα πο γιακχά εκ τζενό σο τθάβντελα, ντα σόσκε;

 ¹¹ Εκτός ότι ντικχένα ο ντρομ ευθεία ανγκλά-πουμέντε, ο τζενέ σο τθάβντενα μπαγιά σε εκ αγώνας τθερένα πουμαρέ γιακχά κο τέλος κι ντρομέσκο. Ατζέ-ντα άμα να ντικχένα-λες πουμαρέ γιακχίντζαρ, σκεφτίνενα ότι ερεσένα κο τέλος ντα ότι λένα ο βραβείος. Τθάβντενα σόσκε τθερένα ξεκάθαρα πουμαρέ γκοντιάτε ο βραβείος.

12. Σο ντέλα-αμέν λατσσιμάσαρ ο Ιεχωβά;

¹² Κο αγώνας σο τθάβντασα αμέν, ο Ιεχωβά ντέλα λατσσιμάσαρ πι λαόστε εκ μπουτ λατσσό βραβείος άμα κα ερεσέν κο τέλος: ζωή για πάντα είτε κο ουρανός είτε κο παράδεισος κι πφουβ. Η Γραφή σικαβέλα σαρ κα αβέλ ανταβά βραβείος, οτθάρ μπορίνασα τι σκεφτίνας καζόμ σουκάρ κα αβέλ αμαρί ζωή. Άμα ατσσικιαράσα αμαρέ γκοντιάτε ντα αμαρέ γκίστε ι ελπίδα σο ντινάς-αμέν ο Ιεχωβά, να κα μουκχάς τίποτα τι κερέλ-αμέν τι περάς.

13. Σο τθεράσα αμέν σο να τθερένα ο τζενέ σο τθάβντενα;

¹³ Ο τζενέ σο τθάβντενας κο αγώνες σο αβένας-πες κο πουρανέ μπρεσά κι Ελλάδα έπρεπε μα τι τσσιναβέν τι τθάβντεν ατζέ-ντα άμα κα κχινιόνας ντα κα ντουκχάνας. Αλλά σάντε πουμαρέ γυμνασμέ σωμάστε ντα πουμαρέ ζοριάτε μπορίνενας τι βασίντιβεν. Σαρ οντουλά τζενέ σο τθάβντενας, αντικάς αμέν-ντα κεράσα πράγματα για τι αβάς «γυμνασμέ» ντα τι τθάβντας κο αγώνας σο τθεράσα. Αλλά τθεράσα κάτι σο να τθερένας βον. Αμέν μπορίνασα τι λας ζορ κατά Ιεχωβά, οντουλέσταρ σο λέσκι ζορ να χασάρντιβελα. Άμα στηρίντιβασα κο Ιεχωβά, βοβ ντέλα πο λάφι, όχι σάντε τι βοηθίνελ-αμέν τι αβάς γυμνασμέ, αλλά τι κερέλ-αμέν ζουρανέ-ντα!​—1 Πέτρ. 5:10.

14. Σαρ βοηθίνενα-αμέν ο εδάφια 2 Κορινθίους 12:9, 10 τι νταϊντίνας ο προβλήματα;

¹⁴ Ο Παύλος αρακχέλας μπουτ προβλήματα κο αγώνας σο κερέλας. Προσβαλίνενας-λες ντα τζάνας λέσαρ κόντρα ο γιαβερά ντα, εκτός ανταλέσταρ, μπάζιμα βοβ-ντα νιωθίνελας μπίζουρανο ντα μαρέλας-πες εκχέ “καντρέσαρ κο σώμας”, σαρ βακερέλας ο ίδιος ανταλέσκε. (2 Κορ. 12:7) Αντίς όμως τι ντικχέλας ανταλά προβλήματα σαρ εκ λόγος για τι τσσιναβέλ τι υπηρετίνελ ι Ιεχωβάς, ντικχέλας-λεν σαρ ευκαιρία για τι στηρίντιβελ λέστε. (Διαβάνεν 2 Κορινθίους 12:9, 10) Οτθάρ, ο Ιεχωβά βοηθίνελας-λες τι ντελ-λεν πέρα σαρέ κο δοκιμασίες σο τθερέλας.

15. Σο κα ντικχάς άμα κα μοιάζας κο Παύλος;

¹⁵ Μπορεί τι προσβαλίνενα αμέν-ντα ο γιαβερά ή τι τζάνα αμέντζαρ κόντρα οντουλένγκε σο πακιάσα. Μπορεί επίσης τι ισινάμ νασφαλέ ή κχινέ. Αλλά άμα κα μοιάζας κο Παύλος, σαρέ ανταλά προβλήματα μπορεί τι αβέν ευκαιρία τι ντικχάς ο λατσσιπέ ι Ιεχωβάσκο.

16. Ατζέ-ντα άμα ισινέν νασφαλέ, σο μπορίνενα τι κερέν;

¹⁶ Μήπως ισινέν αζόμ νασφαλέ σο ναστί ιστίνα κατά κρεβάτι ή ισινέν εκχέ ανηπηρικέ καροτσίστε; Μήπως τουμαρέ κοτσά να τθερένα ζορ ή ναστί ντικχένα λατσσές; Ατζέ-ντα άμα νακχένα κάτι ασακό, μπορίνενα τι τθάβντεν οντουλέντζαρ σο ισί τερνέ ντα ζουρανέ! Μπουτ πφουρέ ντα μπουτ τζενέ σο ισί μπίζουρανε τθάβντενα κο ντρομ κι ζωγιάκο. Να κερένα-λες ανταβά πουμαρέ ζοριάσαρ. Αλλά λένα ζορ κατά Ιεχωβά κάνα ασουνένα ο συναθροίσεις κατά τηλέφωνος ή κάνα ντικχένα-λεν κο βίντεος. Κερένα βον-ντα μαθητέν κάνα κερένα λάφι κο γιατροί, κο νοσηλευτές ντα πουμαρέ τζενέντε.

17. Σαρ νιωθίνελα ο Ιεχωβά οντουλένγκε σο να κερένα σαρέ οντουλά σο κα μανγκένας ι Ιεχωβάσκε;

¹⁷ Άμα ναστί κερένα σαρέ οντουλά σο κα  μανγκένας ι Ιεχωβάσκε, μα χασαρέν τουμαρί ζορ ντα μα σκεφτίνεν ότι ναστί κα τθάβντεν κο ντρομ κι ζωγιάκο. Ο Ιεχωβά μανγκέλα-τουμέν επειδή ισινέν πιστοί ντα κερένα υπομονή αζόμ μπρεσά. Ακανά πιο μπουτ από ποτές τθερένα ανάγκη λέσκι βοήθεια, ντα βοβ να κα μουκχέλ-τουμέν. (Ψαλμ. 9:​10) Κα αβέλ πασέ τουμέντε ατζέ πιο μπουτ. Ντεν σημασία κο λάφια εκχέ πφενιάκε σο ισί μπουτ νασφαλί: «Καζόμ πιο μπουτ νασφάλιβαβα, ο ευκαιρίες σο τθεράβα τι βακεράβ ι αλήθεια γιαβερέντε αβένα πιο χάνικ. Τζανάβα όμως ότι ατζέ-ντα ο χουρντέ προσπάθειες ανένα χαρά κι Ιεχωβάσκο γκι, ντα ανταβά κερέλα-μαν χαρούμενη». Κάνα νιωθίνενα ότι χασαρντέν τουμαρί ζορ, τι ντεν-τουμέν γκοντί ότι να ισινέν κορκορέ. Τι σκεφτίνεν ο παράδειγμας ι Παυλόσκο ντα τι ανέν τουμαρέ γκοντιάτε ακαλά λάφια σο ντένα ζορ: «Αρακχάβα χαρά κάνα ισινόμ μπίζουρανο, . . . σόσκε κάνα ισινόμ μπίζουρανο, αζομάν ισινόμ ζουρανό».​—2 Κορ. 12:10.

18. Καλά δυσκολίες νακχένα μερικά τζενέ;

¹⁸ Μερικά τζενέ σο τθάβντενα κο ντρομ κι ζωγιάκο νακχένα εκ γιαβέρ πρόβλημας. Τθερένα προβλήματα σο να ντικχίντιβενα ντα μπορεί μα τι αγαβένα-λεν ο γιαβερά. Για παράδειγμας, μπορεί τι τθερένα κατάθλιψη, άγχος ή τι τσσουβένα πουμαρέ γκίστε μπουτέ πραγματένγκε. Σόσκε ισί μπουτ δύσκολα ο πράγματα ανταλέ τζενένγκε σο μανγκέλα-λεν ο Ιεχωβά μπουτ; Επειδή κάνα εκ τζενό πφανγκλάς πο βας ή ισί εκχέ ανηπηρικέ καροτσίστε, σαρέ ντικχένα λέσκο πρόβλημας ντα μπορεί τι νικιόλα λένταρ τι βοηθίνεν-λες. Όμως, κάνα εκ τζενό τθερέλα συναισθηματικά ή ψυχολογικά προβλήματα, ο γιαβερά μπορεί μα τι αγαβέν σο τθερέλα. Ντουκχάλα σαρ εκ τζενό σο πφανγκλάς πο βας, αλλά ο γιαβερά μπορεί μα τι κερέν προσπάθειες για τι λοκχιαρέν λέσκο γκι.

19. Σο σικλιάσα κατά παράδειγμας σο μουκχλάς ο Μεφιβοσθέ;

¹⁹ Άμα ναστί κερένα κάποια πράγματα σο κα μανγκένας ντα νιωθίνενα ότι ο γιαβερά να αγαβένα-τουμέν ίσως μπορίνενα τι λεν ζορ κατά παράδειγμας σο μουκχλάς ο Μεφιβοσθέ. (2 Σαμ. 4:4) Βοβ τθερέλας εκ αναπηρία ντα εκ φαρ κριντάς-λες άδικα ο βασιλιάς Δαβίδ. Ο Μεφιβοσθέ να φταίνελας για το δοκιμασίες σο νακχέλας. Όμως, να χολιασάλο. Εκτιμίνελας ο λατσσέ πράγματα σο τθερέλας πι ζωγιάτε. Εκτιμίνελας ο λατσσιπέ σο σικαντάας λέσκε ο Δαβίδ ανγκλέ. (2 Σαμ. 9:​6-10) Οτθάρ, κάνα ο Δαβίδ κριντάς-λες άδικα, ο Μεφιβοσθέ να ατσσιλό ανταλέ πραγμάστε. Να μουκχλάς ο λάθος σο κερντάς ο Δαβίδ τι πφερέλ-λες κερκιπέ. Ούτε κατηγοριντάς ι Ιεχωβάς οντουλέσκε σο κερντάς ο Δαβίδ. Ο Μεφιβοσθέ σκεφτιντάς σο κα μπορίνελας τι κερέλ για τι  στηρίνελ οντουλές σο τσσουντάας ο Ιεχωβά βασιλιάς. (2 Σαμ. 16:​1-4· 19:​24-30) Ο Ιεχωβά κανονιντάς τι γραφίντιβελ λέσκε Λαφίστε ανταβά λατσσό παράδειγμας σο μουκχλάς ο Μεφιβοσθέ αμαρέ λατσσιμάσκε.​—Ρωμ. 15:4.

20. Σαρ μπορεί τι επηρεάνελ μερικέ τζενέν η ανησυχία, αλλά καλέ πραγμάσκε μπορίνενα τι αβέν σίγουροι;

²⁰ Μερικά πφραλά ντα πφενιά ανησυχίνενα ή αγχώνενα κάνα ισί γιαβερέ τζενέντζαρ. Μπορεί μα τι αβέλα λένγκε εύκολος τι αβέν μπουτέ τζενέντζαρ, αλλά συνεχίνενα τι τζαν κο συναθροίσεις ντα κο συνελεύσεις. Ισί λένγκε μπουτ δύσκολος τι κερέν λάφι τζενέντζαρ σο να τζανένα, αλλά κο έργος πουτρένα συζητήσεις ι τζενέντζαρ σο αρακχένα. Άμα ανταβά αβέλα-πες τουμένγκε-ντα, τι τζανέν ότι να νιωθίνενα σάντε τουμέν αντικάς. Μπουτ τζενέ μαρένα-πες ασακέ προβληματέντζαρ. Τι ντεν-τουμέν γκοντί ότι ο Ιεχωβά χαιρίνελα κάνα προσπαθίνενα αντράλ τουμαρέ γκίσταρ. Συνεχίνενα τι κερέν τουμαρό αγώνας ντα ανταβά σικαβέλα ότι βοβ ευλογίνελα-τουμέν ντα ντέλα-τουμέν ι ζορ σο χρειαζίντιβενα. * (Φιλιπ. 4:6, 7· 1 Πέτρ. 5:7) Άμα υπηρετίνενα ι Ιεχωβάς παρόλο σο ναστί κερένα κάποια πράγματα ή τθερένα κατάθλιψη, μπορίνενα τι αβέν σίγουροι ότι κερένα λέσκο γκι.

21. Σο κα μπορίνας τι κεράς σαρέ με τη βοήθεια ι Ιεχωβάσκι;

²¹ Ευτυχώς, υπαρχίντιβενα διαφορές κο πραγματικός αγώνας σο κερένα ο τζενέ σο τθάβντενα ντα κο αγώνας σο βακερντάς ο Παύλος. Σε εκ αγώνας τθαβντιμάσκο κο πουρανέ μπρεσά, σάντε εκ τζενό κερδίνελας ο βραβείος. Οκιά μπάνταρ, σαρέ οντουλά σο νταϊντίνενα κο Χριστιανικός αγώνας λένα σαρ βραβείος ζωή για πάντα. (Ιωάν. 3:​16) Επίσης, σε εκ αγώνας σο τθάβντενα ο τζενέ, σαρέ έπρεπε τι αβέν μπουτ λατσσές γυμνασμέ. Αλλιώς, μπορεί μα τι νικίνενας. Οκιά μπάνταρ όμως, μπουτ αμένταρ ναστί κερένα κάποια πράγματα, όμως νταϊντίνενα. (2 Κορ. 4:​16) Με τη βοήθεια ι Ιεχωβάσκι, σαρέ κα τθάβντας μέχρι κο τέλος κι ντρομέσκο!