1, 2. Σόσκε μπορεί τι βακερντάς ο Ιησούς ο λάφια σο ισί κο εδάφια Ιωάννης 4:​35, 36;

ΕΚ ΦΑΡ, ο Ιησούς νακχλόας αντράλ κατά χωράφια σο ισινέ μάλλον πφερντέ γκιβά σο να μπαριλέας ατζέκ. (Ιωάν. 4:​3-6) Κα νακχένας περίπου σταρ μάσεκ για τι αβέν έτοιμα γκιντιμάσκε. Ο Ιησούς βακερντάς κάτι σο πρέπει τι ασούντιλο μπουτ περίεργος: «Βάντεν τουμαρέ γιακχά ντα ντικχέν ο χωράφια, ότι ισί παρνέ γκιντιμάσκε». (Διαβάνεν Ιωάννης 4:​35, 36) Σο μανγκέλας τι βακερέλ;

² Ντικχίντιβελα ότι ο Ιησούς κερέλας λάφι τζενένγκε, όχι γκιβένγκε. Σκεφτίνεν σο αβιλό-πες χάνικ πιο τζανγκλέ. Παρόλο σο ο Ιουδαίοι ο πιο μπουτ φαρ να τθερένας σχέση ι Σαμαρειτέντζαρ, ο Ιησούς κερντάας λάφι εκχέ τζουβλιάσαρ σο ισινέ Σαμαρείτισσα, ντα βόι ασουντάας! Ντα αζομάν σο ο Ιησούς βακερέλας ότι ο χωράφια ισινέ «παρνέ γκιντιμάσκε», μπουτ Σαμαρείτες σο ασουντέας ι Ιησούσκε κατά τζουβέλ τζάνας λέστε για τι σικλιόν πιο μπουτ πράγματα. (Ιωάν. 4:9, 39-42) Εκ βιβλίος σο σχολιάνελα ι Γραφή βακερέλα ανταλέ ιστοριάκε: «Η απόφαση ι τζενένγκι τι τζαν αζόμ σουγκό τι αρακχέν ι Ιησούς ντα τι ασουνέν-λες . . . σικαβέλας ότι ισινέ σαρ γκιβά έτοιμα γκιντιμάσκε».

3. Άμα ντικχένα ι τζενέν σαρ ντικχέλας-λεν ο Ιησούς, σόσκε κα βακερέν πιο λατσσές ο λατσσέ αμπέρια;

³ Σαρ ντικχένα ι τζενέν σο βακερένα λένγκε ο λατσσέ αμπέρια; Ντικχένα-λεν σαρ μπαρέ γκιβά σο ισί έτοιμα γκιντιμάσκε; Άμα βα, κα αβέν-πες τριν πράγματα. Πρώτον, κα κερέν ο έργος χωρίς τι χασαρέν χρόνος. Ο γκιντιπέ αβέλα-πες συγκεκριμέ βακιτίστε. Να τθεράσα μπουτ χρόνος. Δεύτερον, κα χαιρίνεν καζόμ κα ντικχέν τζενέν τι ασουνέν ο λατσσέ αμπέρια. Η Γραφή βακερέλα ότι “ο τζενέ χαιρίνενα κάνα γκίντενα οντουλά σο νικαβένα ο χωράφια”. (Ησ. 9:3) Ντα τρίτον, κα πακιάν ότι κάθε τζενό σο κερένα λέσαρ λάφι μπορίνελα τι αβέλ μαθητής  ι Ιησούσκο, οτθάρ κα βακερέν λέσκε πράγματα σο τθερέλα ανάγκη τι ασουνέλ.

4. Σο κα σικλιάς κατά απόστολος Παύλος ανταλέ μαθημάστε;

⁴ Μερικοί μαθητές ι Ιησούσκε μπορεί τι πακιάνας ότι ο Σαμαρείτες να κα αβένας ποτές λέσκε μαθητές, αλλά ο Ιησούς να σκεφτίνελας αντικάς. Πακιάλας ότι βον-ντα κα μπορίνενας τι αβέν λέσκε μαθητές. Αμέν-ντα πρέπει τι ντικχάς αντικάς ι τζενέν σο αρακχάσα κο έργος. Ο απόστολος Παύλος μουκχλάς μπουτ λατσσό παράδειγμας αμένγκε. Σο σικλιάσα λέσταρ; Ανταλέ μαθημάστε, κα ντικχάς ότι ο Παύλος (1) τζανέλας σο πακιάνας ο τζενέ σο βακερέλας λένγκε ο λατσσέ αμπέρια, (2) αγαβέλας σο μπεϊντίνενας ντα (3) πακιάλας ότι μπορίνενας τι αβέν μαθητές Ιησούσκε.

5. Σόσκε αγαβέλας ο Παύλος ι τζενέν σο ασουνένας-λες κι συναγωγή;

⁵ Ο Παύλος βακερέλας ο λατσσέ αμπέρια μπουτ φαρ κι Ιουδαιόνγκε συναγωγές. Για παράδειγμας, κι συναγωγή κι Θεσσαλονίκη, «τριν σάββατα κερέλας λέντζαρ λάφι λογικά κατά Γραφή». (Πράξ. 17:1, 2) Μάλλον νιωθίνελας άνετα κι συναγωγή. Μπαριλόας σαρ Ιουδαίος. (Πράξ. 26:4, 5) Αγαβέλας ι Ιουδαιόν, οτθάρ μπορίνελας τι κερέλ λέντζαρ λάφι με σιγουριά.​—Φιλιπ. 3:4, 5.

6. Σο διαφορά τθερένας ο τζενέ κι αγορά κι Αθήνα οντουλένταρ σο ασουντέ ο λατσσέ αμπέρια κατά Παύλος κι συναγωγή;

⁶ Κάνα ο ντουσμάνια κερντέ ι Παυλός τι νασέλ κατά Θεσσαλονίκη ντα σοράν κατά Βέροια, γκιλό κι Αθήνα. Οτθέ, πάλι «αρχισάλο τι συζητίνελ λογικά κι συναγωγή ι Ιουδαιόντζαρ ντα ι γιαβερέντζαρ σο ντένας λατρεία ι Ντεβλές». (Πράξ. 17:​17) Κάνα όμως γκιλό τι βακερέλ ο λατσσέ αμπέρια κι αγορά, τθερέλας τι κερέλ διαφορετικέ τζενέντζαρ. Οτθέ ισινέ φιλόσοφοι ντα τζενέ γιαβερέ τθεμένταρ σο βακερένας ότι λέσκε λάφια ισινέ «νεβό σικλιαριπέ». Επίσης, βακερντέ λέσκε: «Βακερέσα λάφια σο να ασουντάμ-λεν ατζέκ φαρ».​—Πράξ. 17:​18-20.

7. Σαρ βακερντάς ο Παύλος ο λατσσέ αμπέρια με διαφορετικός τρόπος σαρ βακερένα ο εδάφια Πράξεις 17:​22, 23;

⁷ Διαβάνεν Πράξεις 17:​22, 23. Ο Παύλος να βακερντάς ο λατσσέ αμπέρια κο τζενέ σο ισινέ γιαβερέ τθεμένταρ κι Αθήνα αντικάς σαρ βακερντάας-λεν κο Ιουδαίοι κι συναγωγή. Μάλλον σκεφτιντάς: “Σο πακιάνα ο τζενέ κι Αθήνα;” Ντινάς μπουτ λατσσές σημασία λένγκο τθεμ ντα αγαντάς λένγκε έθιμα σο τθερένας τι κερέν ι θρησκειάσαρ. Σοράν, ρόντελας τι αρακχέλ καλά πράγματα σο πακιάνας βον μοιάζενας οντουλέντζαρ σο σικλιαρέλα η Γραφή. Εκ σπουδαγμέ τζενό, σο γραφιντάς κάποια πράγματα ι Γραφιάκε,  βακερέλα: «Σαρ Ιουδαίος Χριστιανός, αγαβέλα ότι κι Ελλάδα ο τζενέ πακιάνα ψεύτικε ντεβλέντε ντα να ντένα λατρεία ι “αληθινέ” Ντεβλές ι Ιουδαιόνγκο ντα ι Χριστιανόνγκο, αλλά προσπαθίνελα τι σικαβέλ ότι οντουβά Ντεβέλ νανέ ξένος ι τζενένγκε σο μπεσένα κι Αθήνα». Ανταλέσταρ αγαβάσα ότι ο Παύλος ισινέ έτοιμος τι κερέλ λέντζαρ λάφι με διαφορετικός τρόπος. Βακερντάς κο Αθηναίοι ότι ο λάφια σο βακερέλας αβένας κατά “Ντεβέλ σο να Τζανένας” ντα σο ντένας-λες λατρεία. Παρόλο σο ο τζενέ γιαβερέ τθεμένταρ να τζανένας ο Γραφές, ο Παύλος να πακιάλας ότι να κα αβένας ποτές Χριστιανοί. Αλλά ντικχέλας-λεν σαρ γκιβά σο μπαριλέας ντα ισινέ έτοιμα γκιντιμάσκε, οτθάρ αλλαντάς ο τρόπος σο βακερντάς λένγκε ο λατσσέ αμπέρια.

8. (α) Σαρ μπορίνενα τι αγαβέν σο θρησκεία τθερένα ο τζενέ σο αρακχένα; (β) Άμα κάποιος κα βακερέλ ότι τθερέλα πιρί θρησκεία, σαρ μπορίνενα τι απαντίνεν;

⁸ Σαρ ο Παύλος, τι ντεν σημασία κο πράγματα σο ντικχένα. Τι ρόντεν πράγματα σο σικαβένα σο πακιάνα ο τζενέ τουμαρέ τθανέστε. Σαρ λατσσαρντάς ο τζενό πο κχερ; Μήπως λέσκο ναβ, ο τρόπος σο ιριαβέλα-πες ντα λατσσαρέλα-πες ή ατζέ-ντα ο λάφι σο κερέλα σικαβένα σο θρησκεία τθερέλα; Μπορεί τι βακερντάς τουμένγκε ότι τθερέλα πιρί θρησκεία. Κάνα αβέλα-πες κάτι ασακό κι Φλουτούρα, σο ισί ειδική σκαπάνισσα, βόι βακερέλα: «Αβιλόμ, όχι για τι κεράβ-τουτ τι πακιάς οντουβά σο πακιάβα με, αλλά για τι βακεράβ τούκε ακαλέ θεμάσκε . . .».

9. Καλά πράγματα σο πακιάλα εκ τζενό σο τθερέλα πιρί θρησκεία μπορεί τι μοιάζεν οντουλέντζαρ σο σικλιαρέλα η Γραφή;

⁹ Καλέ πραγματένγκε κα μπορίνενας τι κερέν λάφι εκχέ τζενέσαρ σο τθερέλα πιρί θρησκεία; Προσπαθίνεν τι αρακχέν καλά πράγματα σο πακιάλα βοβ μοιάζενα οντουλέντζαρ σο σικλιαρέλα η Γραφή. Μπορεί τι πακιάλα σάντε εκχέ Ντεβλέστε, μπορεί τι βακερέλα ότι ο Ιησούς σωντάς ι τζενέν ή μπορεί τι πακιάλα ότι τζουβντιάσα ντιβεσέντε πφερντέ πφιρνιπέ σο ατζεχάνικ κα τελειώνεν. Αστάρντιβεν οντουλένταρ σο συμφωνίνενα για τι βακερέν ο λάφια ι Γραφιάκε τροπόσαρ σο κα ταρτίνελ ι τζενές.

10. Σο πρέπει τι προσπαθίνας τι κεράς, ντα σόσκε;

¹⁰ Τι τθερέν τουμαρέ γκοντιάτε ότι ο τζενέ μπορεί μα τι πακιάνα σαρέ οντουλά σο σικλιαρέλα λένγκι θρησκεία. Οτθάρ, ατζέ-ντα άμα κα αγαβέν σο θρησκεία τθερέλα ο τζενό, προσπαθίνεν τι αβέν σίγουροι οντουλέσκε σο πακιάλα βοβ. «Μπουτ τζενέ αντιβές τσσουβένα πουμαρέ θρησκειάτε λάφια σο βακερένα γκοντιαβέρ τζενέ», βακερέλα ο Ντέιβιντ, εκ ειδικός σκαπανέας κι Αυστραλία. Η Ντονάλτα, σο μπεσέλα κι Αλβανία, βακερέλα: «Αρακχάσα τζενέν σο βακερένα ότι τθερένα θρησκεία, αλλά σοράν μουτθαβένα αμένγκε ότι να πακιάνα μπαγιά κο  Ντεβέλ». Ντα εκ ιεραπόστολος κι Αργεντινή βακερέλα ότι μερικοί πακιάνα κι Τριάδα, αλλά μπορεί μα τι πακιάνα μπαγιά ότι ο Ντατ, ο Τσσαβό ντα ο άγιος πνεύμας ισί εκ Ντεβέλ. «Κάνα τζανάβα-λες ανταβά, μπορίναβα μπουτ πιο εύκολα τι αρακχάβ πράγματα σο συμφωνίνασα ι τζενέσαρ», βακερέλα βοβ. Οτθάρ, τι προσπαθίνεν τι αγαβέν σο πακιάνα μπαγιά ο τζενέ. Αντικάς, κα μπορίνεν τι “αβέν τα πάντα σαβέ τι μανγκές τζενένγκε”.​—1 Κορ. 9:​19-23.

11. Σαρ ο τρόπος σο κερντάς λάφι ο Παύλος ταρτιντάς ι τζενέν κατά Λύστρα σαρ βακερένα ο εδάφια Πράξεις 14:​14-17;

¹¹ Διαβάνεν Πράξεις 14:​14-17. Ο Παύλος αγαντάς σο μπεϊντίνενας ο τζενέ ντα κερέλας λάφι ι κάθε εκχέσαρ με διαφορετικός τρόπος. Για παράδειγμας, μπουτ τζενέ κο Λύστρα τζανένας χάνικ πράγματα ή να τζανένας τίποτα ι Γραφιάκε. Οτθάρ, ο Παύλος κερέλας λάφι τροπόσαρ σο μπορίνενας τι αγαβέν. Κερντάς λάφι ι μπερεκέτι πραγματένγκε σο νικαβέλα η πφουβ ντα εκχέ πφερντέ ζωγιάκε. Βακερντάς λάφια ντα παραδείγματα σο ισινέ εύκολος τι αγαβέν-λεν ο τζενέ.

12. Σαρ μπορίνενα τι αγαβέν σο μπεϊντίνενα ο τζενέ ντα τι αλλάνεν ο τρόπος σο κερένα λάφι ι κάθε εκχέσαρ;

¹² Τι προσπαθίνεν τι αγαβέν σο μπεϊντίνενα ο τζενέ σο αρακχένα κο έργος ντα τι αλλάνεν ο τρόπος σο κερένα λάφι ι κάθε εκχέσαρ. Σαρ κα αγαβέν σο μπεϊντίνελα τι κερέλ εκ τζενό κάνα ντικχένα λες ή λέσκο κχερ; Πάλι, τι ντεν λατσσές σημασία. Μπορεί τι τθερέλα μπαχτσές, τι διαβάνελα εκ βιβλίος, τι λατσσαρέλα πο αυτοκίνητος ή τι κερέλα κάτι γιαβέρ. Άμα αβέλα-πες, σόσκε μα τι αστάρντιβεν ανταλέσταρ σο κερέλα για τι πουτρέν λέσαρ συζήτηση; (Ιωάν. 4:7) Ατζέ-ντα λέσκε σέα μπορεί τι σικαβένα κατάρ ισί, σο μπουτί κερέλα ή καγιά ισί λέσκι αγαπημέ ομάδα. Ο Γκουστάβο βακερέλα αμένγκε: «Πουταρντόμ συζήτηση εκχέ τερνέσαρ 19 μπρεσένγκο σο ιρίλας εκ μπλούζα σο τθερέλας ι φωτογραφία εκχέ διάσημε τραγουδιστίσκι. Πουτσλόμ-λες ανταλέσκε, ντα βοβ βακερντάς μάνγκε σόσκε μπεϊντίνελας οντουλέ τραγουδιστής. Κατά συζήτηση  αρχισάλαμ μελέτη, ντα ακανά οντουβά τερνό ισί πφραλ».

13. Σαρ κα μπορίνενας τι βακερέν εκχέ τζενέσκε τι κερέλ μελέτη τροπόσαρ σο κα ταρτίνελ-λες;

¹³ Κάνα βακερένα εκχέ τζενέσκε τι κερέλ μελέτη, τι κερέν-λες ανταβά τροπόσαρ σο κα ταρτίνελ-λες. Σικαβέν λέσκε σαρ κα βοηθίνελ-λες η μελέτη. (Ιωάν. 4:​13-15) Για παράδειγμας, εκ πφεν σο βακερένα λάκε Πόπη γκιλί εκχέ τζουβλιάτε, σο σικαντάς ενδιαφέρον. Κάνα η Πόπη ντικχλάς κο ντουβάρι εκ πτυχίος σο σικαβέλας ότι η τζουβέλ σπουδαντάς ντα ισινέ καθηγήτρια, βακερντάς ότι αμέν-ντα σικλιαράσα ι τζενέν αντράλ κατά Γραφή ντα κατά συναθροίσεις. Η τζουβέλ μανγκλάς τι κερέλ μελέτη, ο γιαβέρ ντιβές γκιλί κι συνάθροιση ντα χάνικ πιο σοράν γκιλί κι συνέλευση περιοχής. Εκ μπρες πιο σοράν, μπολντιλί. Σκεφτίνεν: “Καλέ πραγματένγκε ενδιαφερίντιβενα ο τζενέ; Μπορίναβα τι βακεράβ λένγκε τι κερέν μελέτη τροπόσαρ σο κα ταρτίνελ-λεν;”

14. Σαρ μπορίνενα τι αλλάνεν ο τρόπος σο κερένα ι κάθε τζενές μελέτη κατά Γραφή;

¹⁴ Αφού κα αρχίνεν εκ μελέτη, κάθε φαρ τι προετοιμάνεν-τουμέν ντα τι τθερέν τουμαρέ γκοντιάτε σαρ μπαριλό ο τζενό ντα σο μπεϊντίνελα τι κερέλ. Κάνα προετοιμάνενα-τουμέν, τι τραμπίνεν καλά εδάφια κα διαβάνεν, καλά βίντεα κα σικαβέν ντα καλά παραδείγματα κα βακερέν για τι ντεν-λες τι αγαβέλ ο αλήθειες ι Γραφιάκε. Σκεφτίνεν: “Σο κα ταρτίνελ πιο μπουτ ανταλέ τζενές ντα κα ερεσέλ λέσκε γκίστε;” (Παρ. 16:​23) Κι Αλβανία, εκ σκαπάνισσα σο βακερένα λάκε Φλόρα κερέλας μελέτη εκχέ τζενιά σο βακερντάς ξεκάθαρα: «Ναστί πακιάβα ότι κα τζουβντιόν ο μουλέ». Η Φλόρα να ζορισκιαρντάς-λα τι πακιάλ. Βόι βακερέλα: «Σκεφτιντόμ ότι έπρεπε πρώτα τι σικλιόλ ι Ντεβλές σο ντέλα πο λάφι τι τζουβντιαρέλ ι μουλέν». Από αζομάν, κάθε φαρ σο κερένας μελέτη, η Φλόρα βακερέλας καζόμ μπουτ αγάπη, σοφία ντα ζορ τθερέλα ο Ιεχωβά. Πιο σοράν, η τζενί πακιαντάς ότι ο μουλέ κα τζουβντιόν. Ακανά ισί εκ πιστή πφεν.

15. Σο δυσκολίες τθερέλας ο Παύλος σαρ βακερένα ο εδάφια Πράξεις 17:​16-18, αλλά σόσκε να βακερντάς ότι ο Αθηναίοι να κα αβένας ποτές Χριστιανοί;

¹⁵ Διαβάνεν Πράξεις 17:​16-18. Ο Παύλος να πακιάλας ότι ο Αθηναίοι να κα αβένας ποτές Χριστιανοί, παρόλο σο λένγκι πόλη ισινέ πφερντί ψεύτικε ντεβλέντζαρ, λουμνικανέ πραγματέντζαρ ντα λαφίντζαρ σο βακερένας γκοντιαβέρ τζενέ. Ντα να μουκχλάς λένγκε προσβολές τι κερέν-λες τι χασαρέλ πι ζορ. Βοβ αβιλό Χριστιανός παρόλο σο πριν “βακερέλας λάφια σο προσβαλίνενας ι Ντεβλές, τζάλας κόντρα λέσκε λαόσαρ ντα να σικαβέλας σεβασμός”. (1 Τιμ. 1:​13) Σαρ ο Ιησούς πακιάλας ότι ο Παύλος κα αβέλας λέσκο μαθητής, αντικάς ο Παύλος-ντα πακιάλας ότι ο Αθηναίοι κα αβένας μαθητές ι Ιησούσκε. Ντα μπαγιά μπουτ τζενέ αβιλέ μαθητές.​—Πράξ. 9:​13-15· 17:34.

16, 17. Σο σικαβέλα ότι σαβέ τι μανγκές τζενέ μπορίνενα τι αβέν μαθητές ι Χριστόσκε; Βακερέν εκ παράδειγμας.

¹⁶ Κο πρώτος αιώνας, σαβέ τι μανγκές τζενέ αβένας μαθητές ι Ιησούσκε. Κάνα ο Παύλος γραφιντάς κο Χριστιανοί κι Κόρινθος, βακερντάς ότι μερικά πφραλά οντουλέ κχανγκιριάταρ ανγκλέ ισινέ τσορά ή κερένας λουμνικανέ πράγματα. Σοράν βακερντάς: «Ασακέ τζενέ ισινένας μερικοί τουμένταρ. Αλλά καθαρισάλεν». (1 Κορ. 6:​9-11) Κα αγαβένας τουμέν ότι ανταλά τζενέ κα αλλάνενας ντα κα αβένας μαθητές;

¹⁷ Αντιβές, μπουτ τζενέ ισί έτοιμοι τι κερέν ο αλλαγές σο πρέπει για τι αβέν μαθητές ι Ιησούσκε. Για παράδειγμας, η Γιούκινα, εκ ειδική σκαπάνισσα κι Αυστραλία, σικλιλί ότι σαβέ τι μανγκές τζενέ μπορίνενα τι ασουνέν ο λατσσέ αμπέρια ι Γραφιάκε.  Εκ φαρ, σε εκ μεσιτικός γραφείος, ντικχλάς εκχέ τερνέ τζουβλιά σο τθερέλας τατουάζ ντα ιρίλας μπουτ μπουγλέ σέα. Η Γιούκινα βακερέλα: «Κι αρχή σακιντισάλομ, αλλά σοράν κερντόμ λάσαρ λάφι. Αγαντόμ ότι μανγκέλας αζόμ μπουτ τι σικλιόλ ι Γραφιάκε σο μερικά κατά τατουάζ σο τθερέλας ισινέ εδάφια κατά Ψαλμοί!» Η τζουβέλ αρχισάλι τι κερέλ μελέτη ντα τι τζαλ κο συναθροίσεις. *

18. Σόσκε δεν πρέπει τι βακεράς ότι εκ τζενό να κα σικλιόλ ποτές ι Ιεχωβάσκε;

¹⁸ Μήπως ο Ιησούς πακιάλας ότι ο χωράφια ισινέ έτοιμα γκιντιμάσκε επειδή μπεκλεντίνελας ότι ο πιο μπουτ τζενέ κα τζάνας παλά-λέστε; Νάα. Η Γραφή βακερέλας ότι χάνικ κα πακιάνας λέστε. (Ιωάν. 12:​37, 38) Επίσης, ο Ιησούς μπορίνελας τι ντικχέλ σο τθερένα ο τζενέ πουμαρέ γκίστε. (Ματθ. 9:4) Όμως, βακερέλας σαρέ πι γκίσαρ ο λατσσέ αμπέρια σαριλέντε ντα προσπαθίνελας τι βοηθίνελ οντουλέ χάνικ τζενέν σο πακιάνας. Άρα, αμέν σο ναστί ντικχάσα σο τθερένα ο τζενέ πουμαρέ γκίστε, δεν πρέπει τι βακεράς ότι εκ τζενό ή ο τζενέ εκχέ τθεμέσκε να κα σικλιόν ποτές ι Ιεχωβάσκε! Αλλά τι πακιάς ότι ο τζενέ μπορίνενα τι αβέν μαθητές. Ο Μαρκ, εκ ιεραπόστολος κι Μπουρκίνα Φάσο, βακερέλα: «Μπουτ φαρ, ο τζενέ σο αμντίναβα ότι κα τζαν λατσσές κο τέλος τσσιναβένα ι μελέτη. Αλλά ο τζενέ σο αμντίναβα ότι κα τσσιναβέν τζάνα μπουτ λατσσές. Οτθάρ, σικλιλόμ ότι ισί πιο λατσσές τι μουκχάς ο πνεύμας ι Ιεχωβάσκο τι οδηγίνελ-αμέν».

19. Σαρ πρέπει τι ντικχάς ι τζενέν;

¹⁹ Κι αρχή, μπορεί τι ντικχίντιβελα ότι να αρακχάσα μπουτέ τζενέν σαρ μπαρέ γκιβά, σο ισί έτοιμα γκιντιμάσκε. Αλλά μα μπιστρέν οντουβά σο βακερντάς ο Ιησούς πι μαθητένγκε. Ο χωράφια ισί παρνέ, δηλαδή έτοιμα γκιντιμάσκε. Ο τζενέ μπορίνενα τι αλλάνεν ντα τι αβέν μαθητές ι Χριστόσκε. Ο Ιεχωβά ντικχέλα ανταλέ τζενέν, σο μπορεί τι αβέν μαθητές, σαρ «πολύτιμα πράγματα». (Αγγ. 2:7) Άμα ντικχάσα ι τζενέν σαρ ντικχέλα-λεν ο Ιεχωβά ντα ο Ιησούς, κα σικλιάς σαρ μπαριλέ ντα σο μπεϊντίνενα. Να κα αβέν αμένγκε σαρ ξένοι αλλά σαρ τζενέ σο μπορεί τι αβέν πφραλά ντα πφενιά.