1. Σο ντικχέλα ο Ιεχωβά πι λαόστε;

Ο ΙΕΧΩΒΑ ΝΤΕΒΕΛ «χαιρίνελα πι λαόσαρ». (Ψαλμ. 149:4) Σο σουκάρ ισί ανταβά! Ο Ιεχωβά ντικχέλα αμαρέ λατσσέ ιδιότητες. Ντικχέλα σο μπορίνασα τι κεράς ντα ταρτίνελα-αμέν πασέ πέστε. Άμα κα ατσσάς πιστοί λέστε, κα ατσσόλ πασ’ αμέντε για πάντα!​—Ιωάν. 6:44.

2. Σόσκε μερικοί να πακιάνα ότι ο Ιεχωβά μανγκέλα-λεν;

² Μερικοί μπορεί τι βακερένα: “Τζανάβα ότι ο Ιεχωβά μανγκέλα πι λαός, αλλά σαρ μπορίναβα τι αβάβ σίγουρος ότι μανγκέλα μαν προσωπικά;” Σόσκε κα μπορίνελας εκ τζενό τι πουτσέλ κάτι ασακό; Η Οξάνα, * σο νακχλάς μπουτ μπέτι κάνα ισινέ χουρντί, βακερέλα: «Ισινόμας μπουτ ευτυχισμέ κάνα μπολντιλόμ ντα λιντόμ ο σκαπανικός. Αλλά σοράν από 15 μπρεσά, αρχισάλε τι αβέν μι γκοντιάτε ο μπέτι πράγματα σο νακχλόμ κάνα ισινόμας χουρντί. Σκεφτίναβας ότι χασαρντόμας ι ευλογία ι Ιεχωβάσκι ντα ότι να αξίναβας τι μανγκέλ-μαν». Η Γιούα, εκ σκαπάνισσα σο βόι-ντα νακχλάς μπουτ δύσκολα κάνα ισινέ χουρντί, βακερέλα: «Ντινόμ μι ζωή κο Ιεχωβά επειδή μανγκάβας τι κεράβ λέσκο γκι. Αλλά ισινόμας σίγουρη ότι να κα μανγκέλας-μαν ποτές».

3. Σο κα ντικχάς ανταλέ μαθημάστε;

³ Σαρ ανταλά πιστά πφενιά, αντικάς τουμέν-ντα μανγκένα μπουτ ι Ιεχωβάς αλλά μπορεί μα τι πακιάνα σαρέ τουμαρέ γκίσαρ ότι μανγκέλα-τουμέν βοβ. Σόσκε πρέπει τι αβέν σίγουροι ότι πφαμπόλα τουμένγκε μπαγιά; Ντα σο μπορεί τι βοηθίνελ-τουμέν κάνα σκεφτίνενα ότι ο Ιεχωβά να μανγκέλα-τουμέν; Για τι ντικχάς ο απαντήσεις ανταλέ ερωτησιέντε.

4. Σόσκε ισί επικίνδυνος τι πακιάς ότι ο Ιεχωβά να μανγκέλα-αμέν;

⁴ Η αγάπη ντέλα-αμέν ζορ τι κεράς μπουτ πράγματα. Άμα ισινάμ σίγουροι ότι ο Ιεχωβά μανγκέλα-αμέν ντα ισί πασ’ αμέντε, κα μανγκάς τι υπηρετίνας-λες σαρέ αμαρέ γκίσαρ παρόλο σο τθεράσα δυσκολίες αμαρέ ζωγιάτε. Οκιά μπάνταρ, άμα να πακιάσα σαρέ αμαρέ γκίσαρ ότι ο Ντεβέλ πφαμπόλα αμένγκε, “να κα τθεράς μπουτ ζορ”. (Παρ. 24:​10) Ντα άμα κα χασαράς αμαρί ζορ ντα κα σκεφτίνας ότι ο Ντεβέλ να μανγκέλα-αμέν, κα αβέλ πιο δύσκολος τι τζας κόντρα κο Μπενγκ.​—Εφεσ. 6:16.

5. Σο αβιλό-πες μερικέ πφραλένγκε ντα πφενίνγκε σο σκεφτίνενας ότι ο Ντεβέλ να μανγκέλα-λεν;

⁵ Αντιβές, μερικοί πιστοί Χριστιανοί αβιλέ μπίζουρανε πνευματικά επειδή σκεφτίνενας ότι ο Ιεχωβά να μανγκέλα-λεν. Εκ πρεσβύτερος, ο Τζέιμς, βακερέλα: «Παρόλο σο υπηρετίναβας κο Μπέθελ ντα μπεϊντίναβας ο έργος σο κεράβας εκχέ κχανγκιριάτε σο κερντιόλας λάφι εκ γιαβέρ τσσιπ, να ισινόμας σίγουρος άμα ο Ιεχωβά ισινέ ευχαριστιμέ οντουλέντζαρ σο κεράβας λέσκε. Νακχλό μι γκοντιάταρ ατζέ-ντα ότι ο Ιεχωβά να ασουνέλας μο προσευχές». Η Εύα, σο ισί βόι-ντα κο Μπέθελ, βακερέλα: «Αγαντόμ ότι ισί επικίνδυνος τι σκεφτίνες ότι ο Ιεχωβά να μανγκέλα-τουτ, σόσκε ανταβά ατσσικιαρέλα-τουτ παλάλ οντουλέντε σο μανγκέσα τι κερές λέσκε. Να ντέλα το γκι τι κερές πράγματα κι Ιεχωβάσκι υπηρεσία ντα να τθερέσα χαρά». Ο Μάικλ, σο ισί τακτικός σκαπανέας ντα πρεσβύτερος, βακερέλα: «Άμα να πακιάσα ότι ο Ντεβέλ πφαμπόλα τούκε, κα τσσίντες-τουτ ντουρ λέσταρ χωρίς τι αγαβές-λες».

6. Σο πρέπει τι κεράς κάνα σκεφτίνασα ότι ο Ντεβέλ να μανγκέλα-αμέν;

⁶ Ανταλά εμπειρίες σικαβένα μπουτ λατσσές ότι, άμα σκεφτίνασα ότι ο Ιεχωβά να μανγκέλα-αμέν, κα αβέλ-πες αμένγκε πνευματικός ζιάνι. Αλλά σο πρέπει τι κεράς κάνα νακχέλα αμαρέ γκοντιάταρ ότι ο Ιεχωβά να μανγκέλα-αμέν; Πρέπει τι νασκιαράς ανταγιά σκέψη! Τι μανγκέν κατά Ιεχωβά τι βοηθίνελ-τουμέν τι πάλντεν “ο σκέψεις σο κερένα-τουμέν τι ανησυχίνεν” ντα τι ντελ-τουμέν πι ειρήνη σο «κα αρακχαβέλ τουμαρό γκι ντα τουμαρί γκοντί». (Ψαλμ. 139:​23· Φιλιπ. 4:6, 7) Τι ντεν-τουμέν γκοντί ότι να ισινέν κορκορέ. Γιαβερά-ντα πφραλά ντα πφενιά μαρένα-πες  τι νασκιαρέν ο αισθήματα σο κερένα-λεν τι νιωθίνεν μπέτι. Ατζέ-ντα ο υπηρέτες ι Ιεχωβάσκε κο πουρανέ μπρεσά νακχλέ ασακέ προβλήματα. Ντικχέν σο σικλιάσα κατά απόστολος Παύλος.

7. Καλά προβλήματα νακχέλας ο Παύλος;

⁷ Μήπως τθερένα μπουτ μπουτιά αντρέ κι κχανγκιρί ντα νιωθίνενα ότι ναστί κερένα-λεν σαρέ λατσσές; Άμα βα, μπορίνενα τι αγαβέν ι Παυλός. Βοβ ανησυχίνελας, όχι σάντε εκχέ κχανγκιριάκε, αλλά «σαρέ ι κχανγκιρίνγκε». (2 Κορ. 11:​23-28) Μήπως τθερένα εκ νασφαλιπέ για μπουτ μπρεσά σο μπουτ φαρ λέλα τουμαρί χαρά; Ο Παύλος τθερέλας εκ «καντρό αντρέ κο σώμας» σο κερέλας-λες τι τσσίντελ μπουτ. Ανταβά μπορεί τι ισινέ εκ πρόβλημας υγείας ντα μανγκέλας μπουτ τι λοκχιόλ λέσταρ. (2 Κορ. 12:​7-10) Μήπως τουμαρέ λάθη κερένα-τουμέν τι χασαρέν τουμαρί ζορ; Ανταβά αβέλας-πες κο Παύλος-ντα μπάζιμα. Επειδή έπρεπε συνέχεια τι μαρέλ-πες για τι κερέλ ο σωστός, βακερντάς: «Σο ταλαιπωρία τσσίνταβα!»​—Ρωμ. 7:​21-24.

8. Σο βοηθίνελας ι Παυλός τι νταϊντίνελ πο προβλήματα;

⁸ Παρόλο σο νακχέλας σαβέ τι μανγκές δοκιμασίες ντα πράγματα σο κερένας-λες τι χασαρέλ πι ζορ, ο Παύλος να τσσιναντάς τι υπηρετίνελ ι Ιεχωβάς. Σο ντέλας-λες ι ζορ τι κερέλ-λες ανταβά; Παρόλο σο αγαβέλας μπουτ λατσσές ότι κερέλας λάθη, τθερέλας μπαρί πίστη κο λύτρος. Τζανέλας λατσσές ότι ο Ιησούς βακερντάας ότι «οντουβά σο σικαβέλα πίστη λέστε, [κα] τθερέλ ζωή για πάντα». (Ιωάν. 3:​16· Ρωμ. 6:​23) Βα, ο Παύλος ισινέ εκ τζενό σο σικαβέλας πίστη κο λύτρος. Ισινέ σίγουρος ότι ο Ιεχωβά συγχωρίνελα ατζέ-ντα οντουλέν σο κερντέ μπαρέ αμαρτίες άμα κα μετανιώνεν.​—Ψαλμ. 86:5.

9. Σο σικλιάσα κατά λάφια ι Παυλόσκε σο ισί κο εδάφιος Γαλάτες 2:20;

⁹ Επίσης, ο Παύλος πακιάλας ότι ο Ντεβέλ μανγκέλας-λες μπουτ επειδή μπουτσσαντάας ι Ιησούς τι μερέλ λέσκε. (Διαβάνεν Γαλάτες 2:​20) Ντικχέν ι σιγουριά ι Παυλόσκι κο τελευταία λάφια κι εδαφιόσκε: “Ο Τσσαβό ι Ντεβλέσκο . . . μανγκλάς-μαν ντα ντινάς πι ζωή μάνγκε”. Ο Παύλος να τσσουντάς όρια κι αγάπη κι Ντεβλέσκι σαρ τι βακερέλας: “Αγαβάβα σόσκε ο Ιεχωβά μανγκέλα μι πφραλέν, αλλά μαν να υπαρχίντιβελα περίπτωση τι μανγκέλ-μαν”. Ο Παύλος βακερντάς κο Ρωμαίοι: «Ο Χριστός μουλό αμένγκε ενώ ισινάμας ατζέκ αμαρτωλοί». (Ρωμ. 5:8) Η αγάπη ι Ντεβλέσκι να τθερέλα όρια!

10. Σο σικλιάσα κατά εδάφια Ρωμαίους 8:​38, 39;

 ¹⁰ Διαβάνεν Ρωμαίους 8:​38, 39. Ο Παύλος ισινέ σίγουρος ότι ο Ντεβέλ μανγκέλας-λες μπουτ. Γραφιντάς ότι τίποτα «ναστί τσσιναβέλα-αμέν κατά Ντεβλέσκι αγάπη». Τζανέλας ότι ο Ιεχωβά κερντάας υπομονή ι Ισραηλιτέντζαρ ντα τζανέλας ότι ο Ιεχωβά σικαντάας λέσκε έλεος. Γιαβερέ λαφίντζαρ, ο Παύλος βακερέλας: “Αφού ο Ιεχωβά μπουτσσαντάς πι Τσσαβές τι μερέλ μάνγκε, σόσκε μα τι πακιάβ σαρέ μι γκίσαρ ότι μανγκέλα-μαν;”​—Ρωμ. 8:32.

11. Παρόλο σο ο Παύλος κερντάας αμαρτίες σαρ οντουλά σο βακέρντιβενα κο εδάφια 1 Τιμόθεο 1:​12-15, σόσκε ισινέ σίγουρος ότι ο Ντεβέλ μανγκέλας-λες;

¹¹ Διαβάνεν 1 Τιμόθεο 1:​12-15. Μπάζιμα ι Παυλός μπέκιμ τι χάνας-λες ο τύψεις οντουλένγκε σο κερντάας ανγκλέ. Να κερέλα αμένγκε εντύπωση σο βακερντάς ότι ισινέ ο πιο «μπαρό» αμαρτωλός! Πριν τι σικλιόλ ι αλήθεια, ο Παύλος τζάλας μπαρί κόντρα σαρέ ι Χριστιανόντζαρ, ατζέ-ντα κο γιαβερά πόλεις. Μερικέν τσσουβέλας-λεν κι φυλακή ντα γιαβερέν σο γκερένας-λεν κο δικαστήρια ψηφίνελας τι μουνταρέν-λεν. (Πράξ. 26:​10, 11) Μπορίνενα τι σκεφτίνεν σαρ νιωθίνελας ο Παύλος κάνα αρακχέλας εκχέ τερνέ Χριστιανός σο βοβ βακερντάας τι μουνταρέν λέσκε νταντές ντα λέσκε νταγιά; Ο Παύλος νιωθίνελας μπέτι ι λαθίνγκε σο κερντάας ανγκλέ, αλλά τζανέλας ότι ναστί κα κερέλας τίποτα για τι αλλάνελ-λεν. Πακιάλας ότι ο Χριστός μουλόας λέσκε ντα γραφιντάς: «Ι Ντεβλέσκε λατσσιμάσαρ σο να αξίναβα-λες ισινόμ οντουβά σο ισινόμ». (1 Κορ. 15:3, 10) Σο σικλιάσα αμέν; Πρέπει τι αβέν σίγουροι ότι ο Ιησούς μουλό τουμένγκε ντα πουταρντάς ο ντρομ για τι αβέν λατσσέ αμαλά ι Ιεχωβάσαρ. (Πράξ. 3:​19) Ανταβά σο ισί σημαντικός ι Ντεβλέσκε ισί σο κεράσα ακανά ντα σο κα κεράς κο μέλλον, όχι ο λάθη σο κερντάμ ανγκλέ, είτε  ισινάμας Μάρτυρες ι Ιεχωβάσκε είτε όχι.​—Ησ. 1:18.

12. Σαρ μπορίνενα τι βοηθίνεν-αμέν ο εδάφια 1 Ιωάννη 3:​19, 20 άμα νιωθίνασα ότι να τθεράσα καέκ αξία ή ότι ο Ιεχωβά να αβέλα-πες τι μανγκέλ-αμέν;

¹² Κάνα σκεφτίνενα ότι ο Ιησούς μουλό για τι ιτσσάρντιβεν τουμαρέ αμαρτίες, μπορεί τι βακερένα: “Να νιωθίναβα άξιος ανταλέσκε”. Σόσκε μπορεί τι νιωθίνενα αντικάς; Αμαρό γκι σο ισί ατελής μπορεί τι χουχαβέλα-αμέν ντα τι κερέλα-αμέν τι νιωθίνας ότι να τθεράσα καέκ αξία ή ότι ο Ιεχωβά να αβέλα-πες τι μανγκέλ-αμέν. (Διαβάνεν 1 Ιωάννη 3:​19, 20) Κάνα σκεφτίνασα αντικάς, πρέπει τι ντας-αμέν γκοντί ότι «ο Ντεβέλ ισί πιο μπαρό αμαρέ γκίσταρ». Πρέπει τι αβάς σίγουροι ότι ο Ιεχωβά μανγκέλα-αμέν μπουτ ντα συγχωρίνελα-αμέν. Για τι κεράς-λες ανταβά, πρέπει τι διαβάνας λέσκο Λάφι κάθε ντιβές, τι προσευχίντιβας λέστε μπουτ φαρ ντα τι κεράς παρέα αμαρέ πφραλέντζαρ ντα πφενίντζαρ. Σόσκε ισί σημαντικός τι κεράς ανταλά πράγματα;

13. Σαρ βοηθίντιβασα κάνα σικλιαράσα-αμέν κατά Ντεβλέσκο Λάφι; (Ντικχέν ο πλαίσιος « Σαρ Βοηθίνελα-λεν ο Λάφι ι Ντεβλέσκο»)

¹³ Τι σικλιαρέν-τουμέν κατά Γραφή κάθε ντιβές ντα κα ντικχέν πιο λατσσές ο σουκάρ ιδιότητες ι Ιεχωβάσκε. Κα αγαβέν καζόμ μπουτ μανγκέλα-τουμέν. Άμα σκεφτίνενα λατσσές οντουλά σο διαβάνενα κάθε ντιβές κατά Ντεβλέσκο Λάφι, κα σκεφτίνεν πιο καθαρά ντα κα “τσσουβέν σε εκ σειράς ο πράγματα” τουμαρέ γκοντιάτε ντα τουμαρέ γκίστε. (2 Τιμ. 3:​16) Εκ πρεσβύτερος, σο βακερένα λέσκε Κέβιν ντα νιωθίνελας ότι να αξίνελας, βακερέλα: «Κάνα διαβαντόμ ο Ψαλμός 103 ντα σκεφτιντόμ-λες λατσσές, αλλαντόμ ο τρόπος σο σκεφτίναβας ντα αγαντόμ σαρ νιωθίνελας μπαγιά ο Ιεχωβά μάνγκε». Η Εύα βακερέλα: «Κο τέλος κι κάθε ντιβεσέσκο μπεσάβα ντα σκεφτίναβα ι Ιεχωβάσκε πράγματα. Ανταβά ηρεμίνελα μο γκι ντα μπαριαρέλα μι πίστη».

14. Σαρ βοηθίνελα-αμέν η προσευχή;

¹⁴ Τι προσευχίντιβεν μπουτ φαρ. (1 Θεσ. 5:​17) Για τι αβάς λατσσέ αμαλά εκχέ τζενέσαρ πρέπει τι κεράς λέσαρ λάφι μπουτ φαρ ντα τι βακεράς λέσκε σαρ νιωθίνασα. Ανταβά αβέλα-πες ι Ιεχωβάσαρ-ντα. Κάνα βακεράσα λέσκε αντράλ κατά προσευχή σαρ νιωθίνασα, σο σκεφτίνασα ντα οντουλά σο κερένα-αμέν τι ανησυχίνας, σικαβάσα ότι ντάσα λέσκε μπέσα ντα ότι τζανάσα ότι μανγκέλα-αμέν. (Ψαλμ. 94:​17-19· 1 Ιωάν. 5:​14, 15) Η Γιούα βακερέλα: «Μι προσευχιέντε, να βακεράβα κο Ιεχωβά σάντε σο αβιλό-πες μάνγκε αντρέ κο ντιβές. Πουτράβα λέσκε μο γκι ντα μουτθαβάβα λέσκε σαρ νιωθίναβα μπαγιά. Σιγά σιγά, αρχισάλομ τι ντικχάβ ι Ιεχωβάς, όχι σαρ εκ διευθυντής εκχέ εταιριάκο, αλλά σαρ εκ Ντατ σο μανγκέλα μπαγιά πι τσσαβέν».​—Ντικχέν ο πλαίσιος « Διαβαντέν-λες;»

15. Σαρ σικαβέλα ο Ιεχωβά ότι πφαμπόλα αμένγκε;

 ¹⁵ Τι κερέν παρέα ι πφραλέντζαρ. Βον ισί δώρος κατά Ιεχωβά. (Ιακ. 1:​17) Ο Ιεχωβά σικαβέλα ότι πφαμπόλα αμένγκε επειδή ντινάς-αμέν αμαρέ πφραλέν ντα πφενίν κι κχανγκιρί σο σικαβένα «πάντα αγάπη». (Παρ. 17:​17) Κι επιστολή κο Κολοσσαείς, ο Παύλος γραφιντάς ο ναβά μερικέ Χριστιανόνγκε σο ντινέας-λες ζορ ντα βακερντάς ότι “λοκχιαρντέ μπουτ λέσκο γκι”. (Κολ. 4:​10, 11) Ατζέ-ντα ο Χριστός Ιησούς χρειαζίντιβελας ντα εκτιμίνελας ι βοήθεια σο ντένας-λες λέσκε αμαλά, εμ άγγελοι εμ τζενέ.​—Λουκ. 22:​28, 43.

16. Σαρ βοηθίνενα-αμέν αμαρέ πφραλά τι αβάς πιο πασέ κο Ιεχωβά;

¹⁶ Μανγκένα βοήθεια κατά πφραλά σο ισί δώρος κατά Ιεχωβά; Κάνα πουτρένα λένγκε τουμαρό γκι, ανταβά να μανγκέλα τι βακερέλ ότι τουμαρί πίστη νανέ ζουρανί. Οκιά μπάνταρ, ανταβά μπορεί τι αρακχαβέλ-τουμέν. Ντικχέν σο βακερέλα ο Τζέιμς: «Ο λατσσέ αμαλά βοηθιντέ-μαν μπουτ. Κάνα τθεράβα μπέτι αισθήματα, ασουνένα-μαν με υπομονή ντα βακερένα μάνγκε ότι μανγκένα-μαν. Κάνα κερένα-λες ανταβά, ντικχάβα ότι ο Ιεχωβά μανγκέλα-μαν ντα πφαμπόλα μάνγκε». Καζόμ σημαντικός ισί τι αβάς λατσσέ αμαλά αμαρέ πφραλέντζαρ ντα πφενίντζαρ!

17, 18. Κας πρέπει τι ασουνάς, ντα σόσκε;

¹⁷ Ο Μπενγκ μανγκέλα τι τσσιναβάς τι κεράς ο σωστός. Μανγκέλα τι πακιάς ότι ο Ιεχωβά να μανγκέλα-αμέν, ότι να αξίνασα τι σώντιβας. Αλλά σαρ ντικχλάμ, ανταβά νανέ μπαγιά.

¹⁸ Ο Ιεχωβά μανγκέλα-τουμέν. Τθερένα μπουτ μπαρί αξία λέσκε. Άμα ντένα-λες καν, κα “ατσσόν λέσκε μανγκιμάστε” για πάντα, σαρ ατσσόλα ο Ιησούς-ντα. (Ιωάν. 15:​10) Οτθάρ, μα ασουνέν ούτε ι Μπενγκές ούτε τουμαρό γκι κάνα βακερέλα τουμένγκε ότι ο Ιεχωβά να μανγκέλα-τουμέν. Οκιά μπάνταρ, τι ασουνέν ι Ιεχωβάς, σο ντικχέλα ο λατσσό κο κάθε εκ αμένταρ. Τι αβέν σίγουροι ότι βοβ «χαιρίνελα πι λαόσαρ», σο αντρέ-λέστε ισινέν τουμέν-ντα!