Σόσκε βακερντάς ο Ιησούς χάνικ πριν τι μερέλ ο λάφια ι Δαβιδίσκε σο ισί κο εδάφιος Ψαλμός 22:1;

Χάνικ πριν τι μερέλ, ο Ιησούς βακερντάς ο λάφια σο ισί γραμμέ κο εδάφιος Ματθαίος 27:​46: «Ντέβλα μου, Ντέβλα μου, σόσκε μουκχλάν-μαν;» Ανταλέ λαφίντζαρ, ο Ιησούς κερντάς τι νικιόν μπαγιά ο λάφια ι Δαβιδίσκε σο ισί γραμμέ κο εδάφιος Ψαλμός 22:1. (Μάρκ. 15:​34) Κα αβέλας λάθος τι σκεφτίνας ότι ο Ιησούς βακερντάς ανταλά λάφια επειδή ισινέ στεναχωριμέ ή επειδή οντιά στιγμή χασαρντάς πι πίστη. Ο Ιησούς αγαβέλας μπουτ λατσσές σόσκε έπρεπε τι μερέλ ντα μανγκέλας τι κερέλ-λες ανταβά. (Ματθ. 16:​21· 20:​28) Επίσης τζανέλας ότι, ι στιγμή σο κα μερέλας, ο Ιεχωβά έπρεπε τι τσσιναβέλ τι “αρακχαβέλ-λες”. (Ιώβ 1:​10) Αντικάς, ο Ιεχωβά μουκχλάς ι Ιησούς τι σικαβέλ ότι κα ατσσόλας πιστός σαρ-ντα τι μερέλας.​—Μάρκ. 14:​35, 36.

Σόσκε λοιπόν βακερντάς ο Ιησούς ο λάφια ανταλέ ψαλμόσταρ; Παρόλο σο να ισινάμ σίγουροι, κα ντικχάς σόσκε ο Ιησούς μπέκιμ τι βακερντάς ανταλά λάφια. *

Κάνα ο Ιησούς βακερντάς ανταλά λάφια, μάλλον μανγκέλας τι σικαβέλ ότι ο Ιεχωβά να κα κερέλας κάτι για τι σώνελ-λες κατά μεριπέ. Ο Ιησούς έπρεπε τι ντελ ο λύτρος χωρίς τι βοηθίνελ-λες ο Ιεχωβά. Έπρεπε «τι μερέλ ι κάθε τζενέσκε».​—Εβρ. 2:9.

Κάνα ο Ιησούς βακερντάς χάνικ λάφια οντουλέ ψαλμόσταρ, μάλλον μανγκέλας τι κερέλ ι γιαβερέν τι ανέν πουμαρέ γκοντιάτε σαρό ο ψαλμός. Κι εποχή κι Ιησούσκι, ο Ιουδαίοι  σικλιόνας αβριάλ μπουτ ψαλμούς. Κάνα ασουνένας εκ εδάφιος εκχέ ψαλμόσταρ, αμέσως αβέλας λένγκε γκοντιάτε σαρό ο ψαλμός. Άμα ο Ιησούς τθερέλας κάτι ασακό πι γκοντιάτε, ανταβά κα βοηθίνελας λέσκε μαθητέν σο ισινέ Ιουδαίοι τι ντεν-πες γκοντί ο μπουτ προφητείες οντουλέ ψαλμόσκε σο τθερένας τι κερέν λέσκε μεριμάσαρ. (Ψαλμ. 22:7, 8, 15, 16, 18, 24) Επίσης, ο τελευταία λάφια ι ψαλμόσκε ντένα δόξα ι Ιεχωβάς ντα βακερένα ότι βοβ ισί ο Βασιλιάς σαρέ ι πφουβιάκο.​—Ψαλμ. 22:​27-31.

Κάνα ο Ιησούς βακερντάς ανταλά λάφια ι Δαβιδίσκε, μάλλον μανγκέλας τι βακερέλ ότι ισινέ αθώος. Πριν τι μερέλ ο Ιησούς, γκερντέ-λες κο δικαστήριος, δικαντέ-λες παράνομα ντα βακερντέ ότι ισινέ ένοχος επειδή προσβαλιντάας ι Ντεβλές. (Ματθ. 26:​65, 66) Ο δικαστές γκιντισάλε σιγκιαριντός αντρέ κι ιράτ ντα κερντέ ι δίκη χωρίς τι ντεν καν κο νόμοι σο υπαρχίντιβενας. (Ματθ. 26:​59· Μάρκ. 14:​56-59) Κάνα ο Ιησούς πουτσλάας «Ντέβλα μου, Ντέβλα μου, σόσκε μουκχλάν-μαν;», μάλλον μανγκέλας τι σικαβέλ σαριλένγκε ότι να κερντάας καέκ λάθος ντα ότι να υπαρχίντιβελας λόγος τι μουνταρέν-λες.

Επίσης, ο Ιησούς μάλλον ανέλας κι γιαβερένγκι γκοντί ότι, παρόλο σο ο Δαβίδ, σο γραφιντάς οντουβά ψαλμός, τσσιντιντάας μπουτ πράγματα, ανταβά να μανγκέλας τι βακερέλ ότι ο Ιεχωβά να ισινέ ευχαριστιμέ λέσαρ. Η ερώτηση σο κερντάς ο Δαβίδ να σικαβέλας ότι να τθερέλας πίστη. Αφού κερντάς ανταγιά ερώτηση, βακερντάς καζόμ σίγουρος ισινέ ότι ο Ιεχωβά κα σώνελας πι λαός, ντα ο Ιεχωβά συνεχιντάς τι ευλογίνελ-λες. (Ψαλμ. 22:​23, 24, 27) Αντικάς ο Ιησούς-ντα, “ο Τσσαβό ι Δαβιδίσκο”, παρόλο σο ταλαιπωρισάλο οπράλ κο κας σο βασανίνενας-λες, ανταβά να μανγκέλας τι βακερέλ ότι ο Ιεχωβά να ισινέ ευχαριστιμέ λέσαρ.​—Ματθ. 21:9.

Ο Ιησούς μάλλον σικαβέλας καζόμ στεναχωριμέ ισινέ επειδή ο Ιεχωβά έπρεπε τι τσσιναβέλ τι αρακχαβέλ-λες για τι σικαβέλ ότι τθερέλα πο γκι σαστό Λέστε. Κι αρχή, ο σκοπός ι Ιεχωβάσκο να ισινέ τι ταλαιπωρίντιβελ ντα τι μερέλ λέσκο Τσσαβό. Ανταβά έπρεπε τι αβέλ-πες αφού ο Αδάμ ντα η Εύα γκιλέ κόντρα κο Ιεχωβά. Ο Ιησούς να κερντάας καέκ λάθος, αλλά έπρεπε τι ταλαιπωρίντιβελ ντα τι μερέλ για τι ντελ απάντηση κο Μπενγκ ντα για τι ντελ ο λύτρος σο έπρεπε τι ντιντιόλ ντα αντικάς τι λελ παλάλ οντουβά σο χασαρντάς ο Αδάμ. (Μάρκ. 8:​31· 1 Πέτρ. 2:​21-24) Ανταβά κα μπορίνελας τι αβέλ-πες σάντε άμα ο Ιεχωβά για εκ στιγμή κα τσσιναβέλας τι αρακχαβέλ ι Ιησούς για πρώτη φαρ λέσκε ζωγιάτε.

Ο Ιησούς μάλλον προσπαθίνελας τι βοηθίνελ πι μαθητέν τι σκεφτίνεν σόσκε ο Ιεχωβά μουκχλάς-λες τι μερέλ ανταλέ τροπόσαρ. * Ο Ιησούς τζανέλας ότι επειδή κα μερέλας οπράλ κο κας σαρ εγκληματίας, ανταβά κα κερέλας μπουτέ τζενέν τι χασαρέν πουμαρί πίστη. (1 Κορ. 1:​23) Άμα λέσκε μαθητές κα αγαβένας σόσκε ο Ιησούς έπρεπε τι μερέλ, κα ντικχένας-λες σαρ Οντουβά σο σωντάς-λεν ντα όχι σαρ εγκληματίας.​—Γαλ. 3:​13, 14.

Καβά-ντα τι αβέλας ο λόγος σο ο Ιησούς βακερντάς ανταλά λάφια, αγαβέλας ότι κάνα μερέλας οπράλ κο κας κερέλας οντουβά σο μανγκέλας ο Ιεχωβά. Χάνικ πιο σοράν αφού βακερντάς ο λάφια ανταλέ ψαλμόσκε, ο Ιησούς βακερντάς: «Αβιλό-πες!» (Ιωάν. 19:​30· Λουκ. 22:​37) Βα, επειδή ο Ιεχωβά για εκ στιγμή τσσιναντάς τι αρακχαβέλ ι Ιησούς, ντινάς-λες ι ευκαιρία τι κερέλ σαρέ οντουλά σο βακερντάας λέσκε τι κερέλ κι πφουβ. Ντα ντινάς-λες ι ευκαιρία τι κερέλ τι νικιόν μπαγιά σαρέ οντουλά σο γραφίντιλε λέσκε «κο Νόμος κι Μωυσίσκο ντα κο Προφήτες ντα κο Ψαλμοί».​—Λουκ. 24:44.