1, 2. Σαρ αβέλα-πες τι ακολουθίνας ι Ιησούσκε βήματα; Βακερέν εκ παράδειγμας.

ΣΚΕΦΤΙΝΕΝ ότι γιεκ γιαβερέ τζενέντζαρ πφιρένα αντρέ κι ερημιά, εκχέ τθανέστε σο ισί επικίνδυνος ντα πφερντό βιβ. Εκ τζενό σο τζανέλα λατσσές ι περιοχή οδηγίνελα-τουμέν. Καζόμ πφιρέλα, μουκχέλα πατημασιές, ή γιαβέρτουλους βήματα, κο βιβ. Κάποια στιγμή, να ντικχένα-λες! Αλλά να νταρένα. Οκιά μπάνταρ, γιεκ ι γιαβερέ τζενέντζαρ, ακολουθίνενα λέσκε βήματα καζόμ πιο πιστά μπορίνενα!

² Σαρ αληθινοί Χριστιανοί, ισί σαρ τι πφιράσα αμέν-ντα αντρέ κι ερημιά, εκχέ τθανέστε σο ισί επικίνδυνος​—ανταλέ πφιρνέ ντουνιάστε. Ισινάμ μπουτ χαρούμενοι σο ο Ιεχωβά ντινάς-αμέν πι Τσσαβές, ι Ιησού Χριστός, σο οδηγίνελα-αμέν τέλεια ντα μπορίνασα τι ακολουθίνας λέσκε βήματα πιστά. (1 Πέτρ. 2:​21) Εκ βιβλίος σο κερέλα λάφι ι Γραφιάκε βακερέλα ότι ακατέ ο Πέτρος μοιασκιαρέλα ι Ιησούς εκχέ τζενέσαρ σο οδηγίνελα γιαβερέν. Σαρ εκ ασακό τζενό μουκχέλα πατημασιές, αντικάς ο Ιησούς-ντα, μουκχλάς βήματα σο μπορίνασα τι ακολουθίνας. Για τι ντικχάς ακαλά τριν ερωτήσεις: Σο μανγκέλα τι βακερέλ τι ακολουθίνας ι Ιησούσκε βήματα; Σόσκε πρέπει τι κεράς-λες ανταβά; Σαρ μπορίνασα τι κεράς-λες;

3. Σο μανγκέλα τι βακερέλ τι ακολουθίνας ο βήματα εκχέ τζενέσκε;

³ Σο μανγκέλα τι βακερέλ τι ακολουθίνας ο βήματα εκχέ τζενέσκε; Κι Αγία Γραφή, ο λάφια «πφιράβα» ντα «πιντρέ» μπάζιμα μανγκένα τι σικαβέν σο κερέλα εκ τζενό πι ζωγιάτε. (Γέν. 6:9· Παρ. 4:​26) Μπορίνασα τι βακεράς ότι οντουλά σο κερέλα εκ τζενό πι ζωγιάτε ισί σαρ πατημασιές, ή γιαβέρτουλους βήματα,  σο μουκχέλα καζόμ πφιρέλα. Οντουλέσκε, τι ακολουθίνας ο βήματα εκχέ τζενέσκε μανγκέλα τι βακερέλ τι κεράς οντουλά σο κερέλα βοβ.

4. Σο μανγκέλα τι βακερέλ τι ακολουθίνας ι Ιησούσκε βήματα;

⁴ Άρα, σο μανγκέλα τι βακερέλ τι ακολουθίνας ι Ιησούσκε βήματα; Για τι βακεράς-λες απλά, μανγκέλα τι βακερέλ τι κεράς οντουλά σο κερέλας βοβ. Κο εδάφιος ανταλέ μαθημάσκο, ο απόστολος Πέτρος βακερέλα ότι ο Ιησούς, σο τσσιντιντάς μπουτ, σικαβέλα αμένγκε σαρ τι σικαβάς υπομονή. Όμως, μπορίνασα τι μοιάζας κο Ιησούς μπουτέ γιαβερέ-ντα τροπόντζαρ. (1 Πέτρ. 2:​18-25) Κι πραγματικότητα, σαρί λέσκι ζωή​—σαρέ οντουλά σο βακερντάς ντα κερντάς—​ισί αμένγκε λατσσό παράδειγμας.

5. Μπορίνενα ο ατελείς τζενέ τι μοιάζεν κο Ιησούς σο ισινέ τέλειος τζενό; Εξηγίνεν.

⁵ Σαρ ατελείς τζενέ, μπορίνασα μπαγιά τι μοιάζας κο Ιησούς; Βα, μπορίνασα. Ντεν-τουμέν γκοντί ότι ο Πέτρος βακερντάς “τι ακολουθίνας ο βήματα [ι Ιησούσκε] πιστά”, όχι τέλεια. Άμα ακολουθίνασα λέσκε βήματα προσεκτικά, δηλαδή άμα κεράσα ο πιο λατσσό σο μπορίνασα σαρ ατελείς τζενέ, αζομάν κεράσα οντουβά σο βακερντάς ο απόστολος Ιωάννης: “Τι πφιρέν ακριβώς σαρ πφιρντάς [ο Ιησούς]”.​—1 Ιωάν. 2:6.

6, 7. Σόσκε μπορίνασα τι βακεράς ότι άμα ακολουθίνασα ο βήματα ι Ιησούσκε κα αβάς πιο λατσσέ αμαλά ι Ιεχωβάσαρ;

⁶ Άμα ακολουθίνασα ο βήματα ι Ιησούσκε, κα αβάς πιο λατσσέ αμαλά ι Ιεχωβάσαρ. Σόσκε βακεράσα-λες ανταβά; Πρώτον, ο Ιησούς σικαντάς αμένγκε σαρ τι τζουβντιάς για τι κεράς ο γκι ι Ντεβλέσκο. (Ιωάν. 8:​29) Οντουλέσκε, άμα ακολουθίνασα ο βήματα ι Ιησούσκε, κα κεράς ο γκι ι Ιεχωβάσκο. Ντα μπορίνασα τι αβάς σίγουροι ότι ο Ιεχωβά κα αβέλ πιο πασέ οντουλέντε σο μαρένα-πες τι αβέν λέσκε αμαλά.​—Ιακ. 4:8.

 ⁷ Δεύτερον, ο Ιησούς μοιάζελας τέλεια πι Νταντέστε. Άκ’ σόσκε μπορίνελας τι βακερέλ: «Οντουβά σο τθερέλα ντικχλό μαν τθερέλα ντικχλό ι Νταντές-ντα». (Ιωάν. 14:9) Μπορίνασα τι τθεράς ο ιδιότητες ι Ιησούσκε ντα τι συμπεριφερίντιβας σαρ βοβ. Για παράδειγμας, τζιτζισάλο εκχέ τζενέσκε σο ισινέ λεπρός, αγαντάς σαρ νιωθίνελας εκ τζουβέλ σο τθερέλας εκ πφαρό νασφαλιπέ ντα πφαμπόλας οντουλένγκε σο χασαρντέας τζενέν κο μεριπέ. Κάνα μοιάζασα κο Ιησούς, μοιάζασα κο Ιεχωβά-ντα. (Μάρκ. 1:​40, 41· 5:​25-34· Ιωάν. 11:​33-35) Καζόμ πιο μπουτ μοιάζασα κο Ιεχωβά, αζόμ πιο λατσσέ αμαλά αβάσα λέσαρ.

8. Εξηγίνεν σόσκε κα “νικίνας” ι ντουνιάς άμα ακολουθίνασα ο βήματα ι Ιησούσκε.

⁸ Άμα ακολουθίνασα ο βήματα ι Ιησούσκε, ανταβά πφιρνό ντουνιάς να κα ταρτίνελ αμαρί προσοχή. Ι τελευταία ιράτ πριν τι μερέλ, ο Ιησούς μπορίνελας τι βακερέλ: «Με νικιντόμ ι ντουνιάς». (Ιωάν. 16:​33) Οντουβά σο μανγκέλας τι βακερέλ ισινέ ότι να μουκχλάας ο πράγματα σο κερέλας ντα σκεφτίνελας ανταβά ντουνιάς τι επηρεάνεν λέσκι ζωή. Ο Ιησούς ποτές να μπισταρντάς ότι αβιλόας κι πφουβ για τι δικαιώνελ ο ναβ ι Ιεχωβάσκο. Σο κα κεράς αμέν; Ανταλέ ντουνιάστε, υπαρχίντιβενα μπουτ πράγματα σο κα μπορίνενας τι ταρτίνεν αμαρί προσοχή. Αλλά άμα, σαρ ο Ιησούς, τσσουβάσα πρώτα αμαρέ ζωγιάτε οντουβά σο μανγκέλα ο Ιεχωβά, κα “νικίνας” αμέν-ντα ι ντουνιάς.​—1 Ιωάν. 5:5.

9. Σο πρέπει τι κεράς για τι ατσσάς κο ντρομ σο ντέλα ζωή για πάντα;

⁹ Άμα ακολουθίνασα ο βήματα ι Ιησούσκε, κα τθεράς ζωή για πάντα. Κάνα εκ χουλανό τερνό πουτσλάς-λες σο έπρεπε τι κερέλ για τι τζουβντιόλ για πάντα, ο Ιησούς βακερντάς: «Έλα τι αβές μο μαθητής». (Ματθ. 19:​16-21) Ο Ιησούς βακερντάς μερικέ Ιουδαιόνγκε σο να πακιάνας ότι βοβ ισινέ ο Χριστός: «Μο μπρακέ . . . αβένα παλά-μάντε. Ντάβα-λεν ζωή για πάντα». (Ιωάν. 10:​24-29) Επίσης, ο Ιησούς βακερντάς κο Νικόδημος, σο ισινέ κο Σάνχεδριν ντα μανγκέλας τι σικλιόλ πιο μπουτ λέσκε, ότι οντουβά σο «σικαβέλα πίστη λέστε» κα «τθερέλ ζωή για πάντα». (Ιωάν. 3:​16) Αμέν σικαβάσα πίστη κο Ιησούς άμα κεράσα οντουλά σο σικλιαρντάς-αμέν πι λαφίντζαρ ντα πι ζωγιάσαρ. Άμα κα κεράς-λες ανταβά, κα ατσσάς κο ντρομ σο ντέλα ζωή για πάντα.​—Ματθ. 7:14.

10. Σο πρέπει τι κεράς για “τι σικλιάς” ι Ιησούσκε πιο λατσσές; (Ιωάννης 17:3)

¹⁰ Για τι μπορίνας τι ακολουθίνας ο βήματα ι Ιησούσκε πιστά, πρέπει πρώτα τι σικλιάς λέσκε. (Διαβάνεν Ιωάννης 17:3) Ανταβά ισί κάτι σο δεν πρέπει τι τσσιναβάς τι κεράς. Καζόμ τζάλα, πρέπει τι συνεχίνας τι σικλιάς-λες ατζέ πιο λατσσές. Πρέπει τι σικλιάς λέσκε ιδιότητες, ο τρόπος σο σκεφτίνελα, ντα λέσκε αρχές. Καζόμ-ντα καιρός τι αβάς κι αλήθεια, πρέπει τι συνεχίνας τι προσπαθίνας τι σικλιάς ι Ιεχωβάσκε ντα λέσκε Τσσαβέσκε.

11. Σο σικλιάσα κατά σταρ Ευαγγέλια;

 ¹¹ Για τι βοηθίνελ-αμέν τι σικλιάς λέσκε Τσσαβέσκε, ο Ιεχωβά μανγκλάς τι γραφίνελ πι Λαφίστε ο σταρ Ευαγγέλια. Ο Ευαγγέλια βακερένα αμένγκε σο κερντάς ο Ιησούς πι ζωγιάτε ντα πι εργόστε. Σικαβένα αμένγκε σο βακερντάς, σο κερντάς ντα σαρ νιωθίνελας. Ανταλά σταρ βιβλία βοηθίνενα-αμέν τι “σκεφτίνας λατσσές” λέσκο παράδειγμας. (Εβρ. 12:3) Μπορίνασα τι βακεράς ότι τθερένα ο βήματα ι Ιησούσκε. Οντουλέσκε, κάνα διαβάνασα ο Ευαγγέλια, μπορίνασα τι σικλιάς ι Ιησούσκε ατζέ πιο λατσσές. Αντικάς, μπορίνασα τι ακολουθίνας λέσκε βήματα πιστά.

12. Σαρ μπορίνασα τι βοηθίντιβας καζόμ πιο μπουτ αβέλα-πες κατά Ευαγγέλια;

¹² Για τι βοηθίντιβας καζόμ πιο μπουτ αβέλα-πες κατά Ευαγγέλια, να ερεσέλα σάντε τι διαβάνας-λεν. Πρέπει τι ντας αμαρέ σαατίσταρ για τι σικλιαράς-αμέν λένταρ ντα τι σκεφτίνας-λεν λατσσές. (Ντικχέν Ιησούς του Ναυή 1:8, υποσημείωση) Για τι ντικχάς ακανά καλά ντούι πράγματα βοηθίνενα-αμέν τι σκεφτίνας λατσσές ο Ευαγγέλια ντα τι κεράς αμαρέ ζωγιάτε οντουλά σο διαβάνασα οτθέ.

13. Σαρ μπορίνενα τι τζουβντιαρέν τουμαρέ γκοντιάτε ο ιστορίες σο τθερένα ο Ευαγγέλια;

¹³ Πρώτον, τι τζουβντιαρέν τουμαρέ γκοντιάτε ο ιστορίες σο τθερένα ο Ευαγγέλια. Τι χρησιμοποιήνεν τουμαρί φαντασία για τι ντικχέν, τι ασουνέν ντα τι νιωθίνεν οντουλά σο αβιλέ-πες. Για τι κερέν-λες ανταβά, ρόντεν κο έντυπα σο ντέλα-αμέν η οργάνωση ι Ιεχωβάσκι. Τι διαβάνεν σαρί ι ιστορία​—οντουλά σο βακέρντιβενα πιο τζανγκλέ ή πιο σοράν. Τι ρόντεν για τι αρακχέν πιο μπουτ πράγματα ι τζενένγκε ντα ι τθεμένγκε σο ισί κι ιστορία. Τι συγκρίνεν ι ιστορία σο διαβάνενα ι ιστοριάσαρ σο ισί γραμμέ εκχέ γιαβερέ Ευαγγελιόστε. Μπάζιμα, εκ Ευαγγέλιος βακερέλα κάτι σο να βακερέλα εκ γιαβέρ Ευαγγέλιος.

14, 15. Σαρ μπορίνασα τι κεράς αμαρέ ζωγιάτε οντουλά σο σικλιάσα κατά Ευαγγέλια;

¹⁴ Δεύτερον, τι κερέν τουμαρέ ζωγιάτε οντουλά σο σικλιόνα κατά Ευαγγέλια. (Ιωάν. 13:​17) Αφού κα διαβάνεν προσεκτικά εκ ιστορία κατά Ευαγγέλια, πουτσέν-τουμέν:  “Σικλιλόμ κάτι σο μπορίναβα τι κεράβ-λες μι ζωγιάτε; Σαρ μπορίναβα τι χρησιμοποιήναβ ανταγιά ιστορία για τι βοηθίναβ εκχέ γιαβερές;” Προσπαθίνεν τι ανέν τουμαρέ γκοντιάτε εκχέ τζενές ντα σοράν, μανγκιμάσαρ ντα χωρίς τι ανέν-λες σε δύσκολη θέση, βακερέν λέσκε οντουβά σο σικλιλέν.

¹⁵ Για τι ντικχάς εκ παράδειγμας σο σικαβέλα αμένγκε σαρ μπορίνασα τι κεράς ανταλά ντούι πράγματα. Κα ντικχάς ι ιστορία ι τσορορέ χηράκι σο ντικχλάς ο Ιησούς κο ναός.

16. Σαρ μπορίνασα τι τζουβντιαράς αμαρέ γκοντιάτε οντουλά σο αβένα-πες κο εδάφιος Μάρκος 12:41;

¹⁶ Τζουβντιαρέν τουμαρέ γκοντιάτε ι ιστορία. (Διαβάνεν Μάρκος 12:​41) Σκεφτίνεν σο αβέλα-πες. Ισί 11 Νισάν κο μπρες 33 Κ.Χ. ντα αντρέ χάνικ ντιβεσέντε ο Ιησούς κα μερέλας. Οντουβά ντιβές, ο πιο μπουτ σαάτι ισινέ κο ναός ντα σικλιαρέλας. Αλλά ο παπάζια γκιλέας λέσαρ μπαρί κόντρα. Πιο τζανγκλέ ανταλέσταρ, μερικοί λένταρ πουτσλέ-λες κον ντινάς-λες ι εξουσία για τι κερέλ οντουλά σο κερέλας. Γιαβερά πουτσλέ-λες πράγματα σο αμντίνενας ότι ναστί κα απαντίνελας. (Μάρκ. 11:​27-33· 12:​13-34) Ακανά ο Ιησούς ισί εκχέ γιαβερέ τθανέστε κο ναός. Ατθέ, μάλλον κο τθαν σο βακέρντιβελα Αυλή των Γυναικών, μπορίνελα τι ντικχέλ ο κουτιά ι λοβένγκε. Μπεσέλα ντα ντικχέλα ι τζενέν σο τσσουβένα λοβέ κο κουτιά. Ντικχέλα μπουτέ χουλανέ τζενέν τι τσσουβέν μπουτ λοβέ. Μπέκιμ ισί μπουτ πασέ ντα ασουνέλα ο λοβέ σο μπασένα καζόμ περένα αντρέ κο κουτιά.

17. Σο κερντάς η τσορορί χήρα σαρ βακερέλα ο εδάφιος Μάρκος 12:42;

¹⁷ Διαβάνεν Μάρκος 12:​42. Χάνικ πιο σοράν, ο Ιησούς ντικχέλα εκχέ γιαβερέ τζουβλιά. Ισί εκ “τσορορί χήρα”. (Λουκ. 21:2) Λάκι ζωή ισί μπουτ δύσκολη ντα μπέκιμ να τθερέλα μπερεκέτι λοβέ για τι κινέλ σαρέ οντουλά σο χρειαζίντιβελα. Όμως, τζάλα ανγκλάλ εκχέ κουτίσταρ ντα τσσουβέλα ντούι λεπτά, σο μάλλον ούτε σο ασούντιβενα καζόμ περένα αντρέ κο κουτίς. Ο Ιησούς τζανέλα σο τσσουντάς αντρέ. Τσσουντάς ντούι λεπτά, ο πιο χουρντέ νομίσματα σο υπαρχίντιβενας. Ντούι λεπτά να ερεσένας ούτε για τι κινέν εκ σπουργίτι, σο ισινέ εκ κατά πιο φτηνά τσιρικλέ σο χρησιμοποιήνενας χαμάσκε.

18. Σο βακερντάς ο Ιησούς ι λοβένγκε σο τσσουντάς η χήρα σαρ βακερένα ο εδάφια Μάρκος 12:​43, 44;

¹⁸ Διαβάνεν Μάρκος 12:​43, 44. Ο Ιησούς ατσσόλα πουταρντέ μόσαρ. Ντέλα βίκος πι μαθητέν ντα βακερέλα λένγκε ι χηράκε: «Ακαγιά τσορορί χήρα τσσουντάς πιο μπουτ σαρέ κατά γιαβερά». Σοράν βακερέλα: «Σαρέ [ντα πιο μπουτ ο χουλανέ] τσσουντέ πουμαρέ μπουτέ λοβένταρ, αλλά βόι τσσουντάς σαρέ οντουλά σο τθερέλας για τι τζουβντιόλ». Κάνα ανταγιά πιστή χήρα τσσουντάς ο τελευταία λοβέ σο τθερέλας οντουβά ντιβές, σικαντάς καζόμ μπαρί μπέσα ντέλας κο Ιεχωβά.​—Ψαλμ. 26:3.

19. Σο σικλιάσα κατά λάφια ι Ιησούσκε ι τσορορέ χηράκε;

¹⁹ Τι κερέν τουμαρέ ζωγιάτε οντουλά σο σικλιόνα κατά ιστορία. Πουτσέν-τουμέν: “Σο σικλιάβα κατά λάφια ι Ιησούσκε ι τσορορέ χηράκε;” Σκεφτίνεν χάνικ οντουλέ χηρά. Σίγουρα μανγκέλας τι ντελ πιο μπουτ κο Ιεχωβά. Όμως, κερντάς οντουβά σο μπορίνελας. Ντινάς-λες ο πιο λατσσό σο τθερέλας. Ντα ο Ιησούς τζανέλας ότι ο λοβέ σο τσσουντάς τθερένας μπαρί αξία κο γιακχά λέσκε Νταντέσκε. Ανταλέ ιστοριάταρ σικλιάσα κάτι σημαντικός: Ο Ιεχωβά χαιρίνελα κάνα υπηρετίνασα-λες αντράλ αμαρέ γκίσταρ. (Ματθ. 22:​37· Κολ. 3:​23) Χαιρίνελα κάνα ντικχέλα ότι κεράσα σαρέ οντουλά σο μπορίνασα! Για παράδειγμας, χαιρίνελα κάνα ντικχέλα ότι ντάσα αμαρέ σαατίσταρ ντα αμαρέ ζοριάταρ για τι ντας-λες λατρεία, σαρ ισί ο έργος ντα ο συναθροίσεις.

20. Σαρ μπορίνενα τι κερέν οντουλά σο σικλιλάμ κατά ιστορία ι χηράκι; Βακερέν εκ παράδειγμας.

 ²⁰ Σαρ μπορίνενα τι κερέν οντουλά σο σικλιλέν ανταλέ ιστοριάταρ; Προσπαθίνεν τι ανέν τουμαρέ γκοντιάτε τζενέν σο τθερένα ανάγκη τι ασουνέν ότι ο Ιεχωβά χαιρίνελα οντουλέντζαρ σο κερένα. Για παράδειγμας, μήπως τζανένα εκχέ πφουρέ πφενιά σο τθερέλα τύψεις ή νιωθίνελα άχρηστη επειδή ισί νασφαλί ή επειδή να τθερέλα ι ζορ για τι κερέλ κο έργος οντουλά σο κερέλας ανγκλέ; Ή μήπως μπορίνενα τι σκεφτίνεν εκχέ πφραλές σο τθερέλα εκ πφαρό νασφαλιπέ ντα χασαρέλα πι ζορ επειδή ναστί αβέλα κάθε φαρ κι συνάθροιση; Για τι βοηθίνεν ασακέ τζενέν, βακερέν λένγκε εκ «λατσσό λάφι σο ντέλα ζορ». (Εφεσ. 4:​29) Βακερέν λένγκε οντουλά σο σικλιλάμ κατά ιστορία ι τσορορέ χηράκι. Τουμαρέ λάφια μπορίνενα τι κερέν-λεν τι αβέν σίγουροι ότι ο Ιεχωβά χαιρίνελα κάνα ντάσα-λες ο πιο λατσσό σο τθεράσα. (Παρ. 15:​23· 1 Θεσ. 5:​11) Κάνα ισαρένα γιαβερέν επειδή ντένα κο Ιεχωβά ο πιο λατσσό σο τθερένα, ατζέ-ντα άμα οντουβά σο ντένα ντικχίντιβελα χουρντό, ακολουθίνενα ο βήματα ι Ιησούσκε πιστά.

21. Σο μανγκένα τι κερέν;

²¹ Ισινάμ πφερντέ εκτίμηση σο ο Ευαγγέλια βακερένα αζόμ μπουτ πράγματα ι Ιησούσκε ζωγιάκε ντα βοηθίνενα-αμέν τι μοιάζας λέστε, τι ακολουθίνας λέσκε βήματα πιστά! Κάνα σικλιαρένα-τουμέν κατά Γραφή ή κι Φαμιλιάκι Λατρεία, κα μπορίνενας τι διαβάνεν ο Ευαγγέλια. Τι ντας-αμέν γκοντί ότι, για τι βοηθίντιβας πιο μπουτ κατά μελέτη σο κεράσα, πρέπει τι τζουβντιαράς αμαρέ γκοντιάτε ο ιστορίες ντα τι κεράς αμαρέ ζωγιάτε οντουλά σο σικλιάσα λένταρ. Πρέπει τι κεράς οντουλά σο κερντάς ο Ιησούς, αλλά πρέπει επίσης τι ασουνάς οντουλά σο βακερντάς. Κο γιαβέρ μάθημας κα ντικχάς σο σικλιάσα κατά τελευταία λάφια σο βακερντάς ο Ιησούς πριν τι μερέλ.