1. Σο στόχοι μπορίνασα τι τσσουβάς;

 ΕΠΕΙΔΗ ισινάμ αληθινοί Χριστιανοί, μανγκάσα ι Ιεχωβάς μπουτ. Μανγκάσα τι κεράς ο πο λατσσό κι Ιεχωβάσκι υπηρεσία. Αλλά για τι κεράς σαρέ οντουλά σο μπορίνασα ι Ιεχωβάσκε, πρέπει τι τσσουβάς στόχοι σαρ ισί τι μπαριαράς Χριστιανικές ιδιότητες, τι σικλιάς πράγματα σο χρειαζίντιβελα ντα τι ρόντας τρόποι για τι υπηρετίνας ι γιαβερέν. b

2. Σόσκε πρέπει τι τσσουβάς στόχοι κι υπηρεσία κι Ιεχωβάσκι ντα τι μαράς-αμέν τι κεράς-λεν;

² Σόσκε πρέπει τι μανγκάς τι κεράς πρόοδος; Πο μπουτ, επειδή μανγκάσα τι κεράς ο γκι αμαρέ Νταντέσκο, ι Ιεχωβάσκο σο μανγκέλα-αμέν μπουτ. Αβέλα ι Ιεχωβάσκο γκι κάνα ντικχέλα-αμέν τι χρησιμοποιήνας καζόμ πο μπουτ αβέλα-πες αμαρέ ικανότητες κι υπηρεσία λέσκι. Επίσης, μανγκάσα τι κεράς πρόοδος για τι βοηθίνας πο μπουτ αμαρέ πφραλέν ντα αμαρέ πφενίν. (1 Θεσ. 4:9, 10) Καζόμ βακίτι-ντα τι αβάς κι αλήθεια σαρέ μπορίνασα τι κεράς πρόοδος. Σαρ κα κεράς-λες ανταβά;

3. Σο βακερντάς ο απόστολος Παύλος ι Τιμοθεόσκε τι κερέλ σαρ βακερένα ο εδάφια 1 Τιμόθεο 4:​12-16;

³ Ο Τιμόθεος ισινέ εκ μπουτ λατσσό τερνό σο ισινέ πρεσβύτερος κάνα ο απόστολος Παύλος γραφιντάς λέσκε πι πρώτη επιστολή. Όμως, ο Παύλος βακερντάς λέσκε τι συνεχίνελ τι κερέλ πρόοδος. (Διαβάνεν 1 Τιμόθεο 4:​12-16) Καζόμ κα διαβάνεν ο λάφια ι Παυλόσκε, κα ντικχέν ότι βακερντάς ι Τιμοθεόσκε τι κερέλ πρόοδος ντουέ τροπόντζαρ: τι μπαριαρέλ Χριστιανικές ιδιότητες σαρ ισί ο μανγκιπέ, η πίστη ντα η αγνότητα ντα τι σικλιόλ πράγματα σο χρειαζίντιβελα σαρ ισί τι αβέλ πο λατσσό κο διάβασμας  ανγκλάλ κο γιαβερά, κι ενθάρρυνση ντα κο σικλιαριπέ. Ο παράδειγμας ι Τιμοθεόσκο κα σικαβέλ αμένγκε σαρ τι τσσουβάς στόχοι σο μπορίνασα τι κεράς-λεν για τι υπηρετίνας πο λατσσές ι Ιεχωβάς. Κα ντικχάς επίσης σαρ μπορίνασα τι κεράς πο μπουτ ι Ιεχωβάσκε.

4. Σο κερντάς ι Τιμοθεός τι αβέλ λατσσό υπηρέτης ι Ιεχωβάσκο σαρ βακερένα ο εδάφια Φιλιππησίους 2:​19-22;

⁴ Σο κερντάς ι Τιμοθεός τι αβέλ λατσσό υπηρέτης ι Ιεχωβάσκο; Ο μπουτ λατσσέ ιδιότητες σο τθερέλας. (Διαβάνεν Φιλιππησίους 2:​19-22) Κατά λάφια ι Παυλόσκε αγαβάσα ότι ο Τιμόθεος ισινέ ταπεινός, αφοσιωμέ, μπουτιαρνό ντα μπεσαλής. Μανγκέλας ι πφραλέν ντα πφαμπόλας λένγκε. Οτθάρ, ο Παύλος μανγκέλας-λες ντα να σακιντίνελας τι ντελ-λες δύσκολους διορισμούς. (1 Κορ. 4:​17) Ο Ιεχωβά κα μανγκέλ-αμέν πο μπουτ ντα κα αβάς πο λατσσέ υπηρέτες λέσκε κι κχανγκιρί κάνα μπαριαράσα ο ιδιότητες σο μανγκέλα.​—Ψαλμ. 25:9· 138:6.

5. (α) Σαρ κα τραμπίνεν καγιά Χριστιανική ιδιότητα μανγκένα τι μπαριαρέν; (β) Σαρ προσπαθίνελα η τερνί πφεν τι κερέλ ο στόχος σο τσσουντάς τι πφαμπόλ πο μπουτ ι γιαβερένγκε σαρ σικαβέλα η φωτογραφία;

⁵ Τραμπίνεν εκ στόχος. Κερέν προσευχή ντα σκεφτίνεν καλά πράγματα κατά χαρακτήρας τουμαρό χρειαζίντιβελα τι κερέν πο λατσσέ. Τραμπίνεν εκ ιδιότητα σο κα μανγκένας τι κερέν μπουτί οπρά-λάτε. Για παράδειγμας, μήπως κα μπορίνενας τι πφαμπόν πο μπουτ τουμαρέ πφραλένγκε ντα τουμαρέ πφενίνγκε ή τι μανγκέν πο μπουτ τι αβέν πασέ λέντε; Μήπως χρειαζίντιβελα τι αβέν πο ειρηνικοί ντα συγχωρητικοί; Μπέκιμ τι βοηθίντιβεν άμα κα μανγκέν εκχέ μπεσαλή αμαλέσταρ τι σικαβέλ τουμένγκε σαρ τι αβέν πο λατσσέ.​—Παρ. 27:6.

6. Σαρ μπορίνενα τι μπαριαρέν εκ ιδιότητα;

⁶ Κερέν μπουτί οπράλ κο στόχος σο τσσουντέν. Σαρ μπορίνενα τι κερέν-λες ανταβά; Εκ τρόπος ισί τι διαβάνεν λατσσές ι ιδιοτητάκε σο μανγκένα τι μπαριαρέν. Βακερέν ότι μανγκένα τι αβέν πο συγχωρητικοί. Μπορίνενα τι διαβάνεν ντα τι σκεφτίνεν ιστορίες τζενένγκε κατά Γραφή σο συγχωρίνενας αντράλ πουμαρέ γκίσταρ ι γιαβερέν ντα τζενένγκε σο να κερένας-λες ανταβά. Ντικχέν ο παράδειγμας ι Ιησούσκο. Βοβ συγχωρίνελας αντράλ πι γκίσταρ ι γιαβερέν. (Λουκ. 7:​47, 48) Να ντικχέλας λένγκε λάθη, αλλά οντουλά σο μπορίνενας τι κερέν. Οκιά μπάνταρ, ο Φαρισαίοι κο ντιβεσά κι Ιησούσκε «πακιάνας ότι ο γιαβερά να αξίνενας τίποτα». (Λουκ. 18:9) Αφού κα σκεφτίνεν ανταλά παραδείγματα, πουτσέν-τουμέν: “Σο ντικχάβα με κο γιαβερά; Καλά ιδιότητες σο τθερένα  τραμπίναβα τι ντικχάβ;” Άμα δυσκολίντιβενα τι συγχωρίνεν εκχέ τζενές, γραφίνεν καζόμ αβέλα-πες πο μπουτ λατσσέ ιδιότητες σο τθερέλα οντουβά τζενό. Σοράν πουτσέν-τουμέν: “Σαρ ντικχέλα ο Ιησούς ανταλέ τζενές; Κα συγχωρίνελας-λες;” Άμα κα κεράς-λες ανταβά, κα μπορίνας τι αλλάνας αμαρό τρόπος σκέψης. Κι αρχή, μπέκιμ τι χρειαζίντιβελα τι μαράς-αμέν για τι συγχωρίνας εκχέ τζενές σο πφανγκλάς αμαρό γκι. Αλλά άμα κα συνεχίνας τι μαράς-αμέν, καζόμ κα νακχέλ ο βακίτι κα μανγκάς πο μπουτ τι συγχωρίνας.

7. Καλέ τροπόντζαρ χρησιμοποιήνελα ο Ιεχωβά αντιβές μπουτιαρνέ τζενέν σαρ αγαβάσα κατά εδάφιος Παροιμίες 22:29;

⁷ Εκ γιαβέρ στόχος σο μπορίνενα τι τσσουβέν ισί τι σικλιόν πράγματα σο χρειαζίντιβελα. Σκεφτίνεν καζόμ μπουτ τζενέ χρειαζίντιβελα τι κερέν μπουτί για τι λατσσάρντιβεν Μπέθελ, Αίθουσες Συνελεύσεων ντα Αίθουσες Βασιλείας. Μπουτ λένταρ σικλιλέ τι κερέν μπουτί επειδή ισινέ πφραλέντζαρ ντα πφενίντζαρ σο τζανένας λατσσές τι κερέν ανταγιά μπουτί. Σαρ ντικχίντιβελα κι φωτογραφία, εμ πφραλά εμ πφενιά σικλιόνα τι κερέν πράγματα σο χρειαζίντιβελα για τι βοηθίνεν τι ατσσόν περιποιημέ ο Αίθουσες Συνελεύσεων ντα ο Αίθουσες Βασιλείας. Ανταλέ ντα γιαβερέ τροπόντζαρ, ο Ιεχωβά Ντεβέλ, «σο ισινέ ντα κα ατσσόλ Βασιλιάς για πάντα», ντα ο Χριστός Ιησούς, ο «Βασιλιάς οντουλένγκο σο κυβερνίνενα σαρ βασιλιάδες», κερένα μπουτ σουκάρ πράγματα αντράλ μπουτιαρνέ τζενένταρ. (1 Τιμ. 1:​17· 6:​15· διαβάνεν Παροιμίες 22:​29) Μανγκάσα τι κεράς ο πο λατσσό ντα τι χρησιμοποιήνας οντουλά σο τζανάσα για τι δοξάνας ι Ιεχωβάς, όχι αμαρό νεαυτός.​—Ιωάν. 8:54.

8. Σαρ κα τραμπίνεν καβά πράγμας κα σικλιόν τι κερέν;

⁸ Τραμπίνεν εκ στόχος. Σο κα μπορίνενας τι σικλιόν; Πουτσέν ι πρεσβυτερόν τουμαρέ κχανγκιριάκε ντα μπέκιμ ι επισκοπός τουμαρέ περιοχιάκο σο πακιάνα βον ότι κα μπορίνενας τι σικλιόν τι κερέν. Άμα, για παράδειγμας, κα βακερέν τουμένγκε τι αβέν πο λατσσέ κο ομιλίες ντα κο σικλιαριπέ, μανγκέν λένταρ τι σικαβέν τουμένγκε εκ συγκεκριμέ πράγμας σο χρειαζίντιβελα τι κερέν μπουτί οπρά-λέστε. Σοράν, κερέν πράγματα για τι αβέν πο λατσσέ ανταλέστε. Σαρ μπορίνελα τι αβέλ-πες ανταβά;

9. Σαρ μπορίνενα τι σικλιόν τι κερέν κάτι σο χρειαζίντιβελα;

⁹ Κερέν μπουτί οπράλ κο στόχος σο τσσουντέν. Βακερέν ότι μανγκένα τι αβέν πο λατσσέ κο σικλιαριπέ. Κα μπορίνενας τι σικλιαρέν-τουμέν μπουτ λατσσές κατά βιβλιάριος Τι Συνεχίνεν τι Διαβάνεν ντα τι Σικλιαρέν πιο Λατσσές. Κάνα κα ντιντιόλ-τουμέν εκ διορισμός κι συνάθροιση σο αβέλα-πες αντρέ κι εβδομάδα, κα μπορίνενας τι μανγκέν εκχέ πφραλέσταρ σο κερέλα μπρεσά ομιλίες τι ασουνέλ πο τζανγκλέ τουμαρί ομιλία ντα τι βακερέλ τουμένγκε κατέ χρειαζίντιβενα τι αβέν πο λατσσέ. Τι τζανέν-τουμέν ο γιαβερά, όχι σάντε οντουλένγκε σο τζανένα τι κερέν, αλλά ότι ισινέν μπουτιαρνέ ντα μπεσαλήδες.​—Παρ. 21:5· 2 Κορ. 8:22.

10. Σικαβέν εκχέ παραδειγμάσαρ σαρ αβέλα-πες τι σικλιάς τι κεράς κάτι σο ισί δύσκολος.

¹⁰ Σο αβέλα-πες όμως άμα οντουβά σο μανγκένα τι σικλιόν τι κερέν ισί δύσκολος τουμένγκε; Μα μουκχέν-τουμέν! Εκ πφραλ, ο Γκάρι, τθερέλας εκ πρόβλημας, οτθάρ ναστί διαβάνελας λατσσές. Ντέλα-πες γκοντί καζόμ μπέτι νιωθίνελας κάνα προσπαθίνελας τι διαβάνελ ζουρανές κι συνάθροιση. Αλλά να τσσιναντάς τι κερέλ μπουτί οπράλ ανταλέστε. Ακανά βακερέλα ότι, χάρη κο σικλιαριπέ σο λιντάς, μπορίνελα τι κερέλ ομιλίες κι συνάθροιση αλλά κο συνελεύσεις-ντα!

11. Σο κα βοηθίνελ-αμέν τι λας πο μπουτ ευθύνες σαρ ο Τιμόθεος;

¹¹ Σικλιλό άραγες ο Τιμόθεος τι κερέλ αζόμ  σουκάρ ομιλίες ή τι σικλιαρέλ μπουτ λατσσές; Η Γραφή να βακερέλα. Αλλά σίγουρα ο Τιμόθεος, καζόμ τζάλας, κερέλας πο λατσσές πο ευθύνες σόσκε ασουνέλας ο συμβουλές ι Παυλόσκε. (2 Τιμ. 3:​10) Αντικάς αμέν-ντα, άμα κεράσα μπουτί οπράλ οντουλέντε σο τζανάσα τι κεράς, κα μπορίνας τι λας πο μπουτ ευθύνες.

12. Σαρ ντικχλέν λατσσιπέ κατά βοήθεια ι γιαβερένγκι;

¹² Σαρέ ντικχάσα λατσσιπέ κατά βοήθεια ι γιαβερένγκι. Κάνα ισινάμ κο νοσοκομείος, εκτιμίνασα μπουτ σο αβένα τι ντικχέν-αμέν ο πρεσβύτεροι σο υπηρετίνενα κο Επιτροπές Προσέγγισης Νοσοκομείων ή κο Ομάδες Επισκέψεων σε Ασθενείς. Κάνα νακχάσα εκ πρόβλημας αμαρέ ζωγιάτε εκτιμίνασα κάνα εκ λατσσό πρεσβύτερος ντέλα πι σαατίσταρ για τι ασουνέλ-αμέν ντα τι κοβλιαρέλ αμαρί ντουκχ. Κάνα μανγκάσα βοήθεια εκχέ μελετιάσαρ, χαιρίνασα κάνα εκ σκαπανέας σο τζανέλα τι κερέλ μελέτες αβέλα αμέντζαρ κι μελέτη ντα ντέλα-αμέν συμβουλές. Σαρέ ανταλά πφραλά ντα πφενιά χαιρίνενα σο βοηθίνενα-αμέν. Μπορίνασα αμέν-ντα τι τθεράς ασακί χαρά άμα βοηθίνασα αμαρέ πφραλέν. «Ισί πο ευτυχισμέ εκ τζενό κάνα ντέλα παρά κάνα λέλα», βακερντάς ο Ιησούς. (Πράξ. 20:​35) Άμα μανγκένα τι κερέν πο μπουτ ι Ιεχωβάσκε ανταλέ ή γιαβερέ τροπόντζαρ, σο κα βοηθίνελ-τουμέν οπράλ ανταλέστε;

13. Σο πρέπει τι ντας-αμέν γκοντί κάνα μανγκάσα τι τσσουβάς εκ στόχος;

¹³ Τσσουβέν συγκεκριμέ στόχοι. Για παράδειγμας, μπέκιμ σκεφτίνενα: “Μανγκάβα τι κεράβ πο μπουτ κι κχανγκιρί”. Αλλά μπέκιμ ισί δύσκολος τι τζανέν σαρ τι κερέν ανταβά στόχος ντα να αβέλα-πες τι αγαβέν άμα κερντέν-λες. Οτθάρ, τσσουβέν στόχοι σο ισί ξεκάθαροι ντα συγκεκριμέ. Κα μπορίνενας ατζέ-ντα τι γραφίνεν τουμαρό στόχος ντα σαρ σκεφτίνενα τι κερέν-λες.

14. Σόσκε πρέπει τι αβάς λογικοί κάνα τσσουβάσα στόχοι;

¹⁴ Επίσης, πρέπει τι αβάς λογικοί κάνα τσσουβάσα στόχοι. Σόσκε; Επειδή νανέ αμαρέ βαστέντε σαρέ οντουλά σο αβένα-πες αμένγκε. Για παράδειγμας: Ο απόστολος Παύλος βοηθιντάς τι κερντιόλ εκ νεβί κχανγκιρί κι Θεσσαλονίκη. Σίγουρα, ο Παύλος τσσουντάς στόχος τι μπεσέλ οτθέ ντα τι βοηθίνελ οντουλέ νεβέ Χριστιανόν. Αλλά οντουλά σο τζάνας λέσαρ κόντρα κερντέ-λες τι νασέλ κατά πόλη. (Πράξ. 17:​1-5, 10) Άμα κα μπεσέλας, κα τσσουβέλας  σε κίνδυνος πι πφραλέν. Αλλά ο Παύλος να ατσσιλό πφαντέ βαστέντζαρ. Πο σοράν, μπουτσσαντάς ι Τιμοθεός τι βοηθίνελ ι νεβέ Χριστιανόν κι Θεσσαλονίκη τι τθερέν ζουρανί πίστη. (1 Θεσ. 3:​1-3) Καζόμ μπαρί χαρά πρέπει τι λιντέ ο πφραλά κι Θεσσαλονίκη σο ο Τιμόθεος μανγκλάς τι βοηθίνελ κατέ-ντα χρειαζίντιβελας!

15. Σαρ κα μπορίνενας τι επηρεάνεν αμαρό στόχος ο πράγματα σο νανέ αμαρέ βαστέντε; Βακερέν εκ παράδειγμας.

¹⁵ Μπορίνασα τι σικλιάς κάτι οντουλέσταρ σο αβιλό-πες κο Παύλος κι Θεσσαλονίκη. Μπέκιμ τι μανγκάσα εκ προνόμιος, αλλά ναστί λάσα-λες σόσκε αβένα-πες πράγματα σο νανέ αμαρέ βαστέντε ντα να μουκχένα-αμέν τι τθεράς-λες. (Εκκλ. 9:​11) Άμα αβέλα-πες τουμένγκε-ντα ανταβά, τι αβέν έτοιμοι τι τραμπίνεν εκ γιαβέρ στόχος σο ισί τουμαρέ βαστέστε. Ανταβά κερντάς εκ ζευγάρι, ο Τεντ ντα η Χάιντι. Εκ νασφαλιπέ κερντάς-λεν τι νασέν κατά Μπέθελ. Αλλά ο μανγκιπέ σο τθερένας ι Ιεχωβάσκε κερντάς-λεν τι αρακχέν γιαβερά τρόποι για τι κερέν πο μπουτ πράγματα κι υπηρεσία κι Ιεχωβάσκι. Πρώτα, λιντέ ο τακτικός σκαπανικός. Σοράν, αβιλέ ειδικοί σκαπανείς, ντα ο Τεντ λιντάς σικλιαριπέ για τι αβέλ επίσκοπος περιοχής. Σοράν όμως, βακέρντιλο ότι ο πφραλά σο μπαριλέ κα τσσιναβέν τι αβέν επίσκοποι περιοχής. Ο Τεντ ντα η Χάιντι αγαντέ ότι νακχλέ λένγκε μπρεσά ανταλέ διορισμόσκε. Παρόλο σο στεναχωρισάλε, αγαντέ ότι μπορίνενας τι υπηρετίνεν ι Ιεχωβάς γιαβερέ τροπόντζαρ. Ο Τεντ βακερέλα: «Σικλιλάμ ότι μπορίνασα τι υπηρετίνας ι Ιεχωβάς μπουτέ τροπόντζαρ».

16. Σο σικλιάσα κατά εδάφιος Γαλάτες 6:4;

¹⁶ Ναστί κεράσα κουμάντος σο-ντα αβέλα-πες αμαρέ ζωγιάτε. Οτθάρ, δεν πρέπει τι σκεφτίνας ότι ισινάμ σημαντικοί ι Ιεχωβάσκε σάντε άμα τθεράσα προνόμια ούτε τι συγκρίνας ο προνόμια σο τθεράσα αμέν οντουλέντζαρ σο τθερένα γιαβερά. Η Χάιντι βακερέλα: «Τι ειρήνη νασέλα κάνα συγκρίνεσα τι ζωή οντουλέντζαρ σο ντικχέσα τι αβέν-πες κι ζωή κι γιαβερένγκι». (Διαβάνεν Γαλάτες 6:4) Ισί σημαντικός τι ρόντας τρόπους τι βοηθίνας ι γιαβερέν ντα τι υπηρετίνας ι Ιεχωβάς. c

17. Σο μπορίνενα τι κερέν για τι λεν προνόμια κι υπηρεσία κι Ιεχωβάσκι;

¹⁷ Ατσσικιαρέν τουμαρί ζωή απλή ντα μα τσσουβέν τουμένγκε σινανέ μπόρτζια. Αντικάς, κα αβέλ τουμένγκε πο εύκολος τι κερέν πο μπουτ κι υπηρεσία κι Ιεχωβάσκι. Τσσουβέν χουρντέ στόχοι σο βοηθίνενα-τουμέν τι κερέν πο μπαρέ στόχοι. Για παράδειγμας, άμα τουμαρό μπαρό στόχος ισί τι κερέν ο τακτικός σκαπανικός, μήπως ακανά κα μπορίνενας τι κερέν ο βοηθητικός σκαπανικός κάθε μάσεκ; Άμα τουμαρό στόχος ισί τι αβέν διακονικός υπηρέτης,  μήπως κα μπορίνενας τι ντεν πο μπουτ τουμαρέ σαατίσταρ για τι κερέν έργος ή τι τζαν τι ντικχέν νασφαλέ ντα πφουρέ πφραλέν τουμαρέ κχανγκιριάταρ; Οντουλά σο σικλιόνα τι κερέν ακανά μπέκιμ τι βοηθίνεν-τουμέν τι τθερέν ανγκλά-τουμέντε πο μπουτ προνόμια κι υπηρεσία κι Ιεχωβάσκι. Μανγκέν σαρέ τουμαρέ γκίσαρ τι κερέν ο πο λατσσό σο μπορίνενα σο-ντα διορισμός ντιντιόλα-τουμέν.​—Ρωμ. 12:11.

18. Σο σικλιόνα κατά Μπέβερλι σαρ σικαβέλα η φωτογραφία;

¹⁸ Ατζέ-ντα άμα ισινάμ μπουτ πφουρέ, μπορίνασα τι τσσουβάς στόχοι κι υπηρεσία κι Ιεχωβάσκι ντα τι κεράς-λεν. Ανέν τουμαρέ γκοντιάτε εκχέ πφενιά σο βακερένα λάκε Μπέβερλι, ντα ισί 75 μπρεσένγκι. Επειδή ισινέ μπουτ νασφαλί, η Μπέβερλι ναστί πφιρέλας. Αλλά μανγκέλας αντράλ πι γκίσταρ τι κερέλ καζόμ πο μπουτ έργος αβέλας-πες κι εκστρατεία ι Αναμνησιάκε. Οτθάρ, τσσουντάς συγκεκριμέ στόχοι. Κάνα κερντάς-λεν, ισινέ μπουτ χαρούμενη. Οντουλά σο κερντάς βοηθιντέ γιαβερέν-ντα τι κερέν ο πο λατσσό σο μπορίνενας κο έργος. Ο Ιεχωβά εκτιμίνελα μπουτ ο έργος αμαρέ πφουρέ πφραλένγκο, ατζέ-ντα άμα ο πράγματα λένγκε ζωγιάτε να μουκχένα-λεν τι κερέν σαρέ οντουλά σο μανγκένα.​—Ψαλμ. 71:​17, 18.

19. Καλά ισί μερικοί στόχοι σο μπορίνασα τι τσσουβάς κι Ιεχωβάσκι υπηρεσία;

¹⁹ Τσσουβέν στόχοι σο ισί τουμαρέ βαστέντε. Μπαριαρέν ιδιότητες σο κα κερέν ι Ιεχωβάσκο γκι. Σικλιόν πράγματα σο κα βοηθίνεν-τουμέν τι κερέν πο μπουτ ι Ντεβλέσκε ντα λέσκε οργανωσιάκε. Ρόντεν τρόπους για τι βοηθίνεν τουμαρέ πφραλέν ντα πφενίν πο μπουτ. d Σαρ αβιλό-πες κο Τιμόθεος, ι Ιεχωβάσκε βοηθειάσαρ “τι αγαντίντιβελ σαριλέντε ότι κερένα πρόοδος”.​—1 Τιμ. 4:15.