1. Καλέ πραγματένγκε ισινάμ σίγουροι;

 ΣΑΡ λαός ι Ιεχωβάσκο, τζανάσα ότι βοβ μανγκέλα-αμέν ντα ότι μανγκέλα τι απολαμβάνας καζόμ πο μπουτ αβέλα-πες ι ζωή. (Ρωμ. 8:​35-39) Ισινάμ επίσης σίγουροι ότι ο αρχές ι Γραφιάκε πάντα βοηθίνενα-αμέν κάνα κεράσα-λεν αμαρέ ζωγιάτε. (Ησ. 48:​17, 18) Σο αβέλα-πες όμως άμα νακχάσα προβλήματα σο να μπεκλεντίναας λένγκε;

2. Σο προβλήματα μπέκιμ τι νακχάσα, ντα σο μπέκιμ τι πουτσάσα-αμέν ιτιρί ανταλέ προβληματένταρ;

² Σαρέ ο υπηρέτες ι Ιεχωβάσκε νακχένα προβλήματα. Για παράδειγμας, εκ τζενό αμαρέ φαμιλιάταρ μπορεί τι κερέλ κάτι σο κα πφανγκέλ αμαρό γκι. Μπέκιμ τι τθεράς εκ μπαρό πρόβλημας υγείας σο να μουκχέλα-αμέν τι κεράς μπουτ πράγματα κι υπηρεσία κι Ιεχωβάσκι. Μπέκιμ τι ταλαιπωρίντιβασα κατά μπέτι αποτελέσματα σο αντάς εκ φυσική καταστροφή. Ή μπέκιμ τι τζάνα αμέντζαρ κόντρα οντουλένγκε σο πακιάσα. Κάνα νακχάσα ασακέ προβλήματα, μπέκιμ τι πουτσάσα-αμέν: “Σόσκε αβέλα-πες μάνγκε ανταβά; Κερντόμ κάτι κακός; Μήπως ανταβά σικαβέλα ότι ο Ιεχωβά να ευλογίνελα-μαν;” Νιωσάλεν ποτές τουμέν-ντα αντικάς; Άμα βα, μα χασαρέν τουμαρί ζορ. Μπουτ αφοσιωμέ υπηρέτες ι Ιεχωβάσκε νιωσάλεας αντικάς.​—Ψαλμ. 22:1, 2· Αββακ. 1:2, 3.

3. Σο σικλιάσα κατά εδάφιος Ψαλμός 34:19;

³ Διαβάνεν Ψαλμός 34:​19. Ντικχέν ντούι σημαντικά σημεία ανταλέ ψαλμόστε: (1) Ο δίκαιοι νακχένα προβλήματα. (2) Ο Ιεχωβά σώνελα-αμέν κατά προβλήματα. Σαρ σώνελα-αμέν ο Ιεχωβά; Εκ τρόπος ισί ότι βοηθίνελα-αμέν μα τι πακιάς ότι ο πράγματα  αμαρέ ζωγιάτε κα τζαν πάντα λατσσές ανταλέ ντουνιάστε. Ενώ ο Ιεχωβά ντέλα πο λάφι ότι κα τθεράς χαρά κι υπηρεσία λέσκι, να ντέλα όμως πο λάφι ότι να κα τθεράς ιτς προβλήματα ακανά. (Ησ. 66:​14) Βακερέλα αμένγκε τι τθεράς αμαρέ γιακχά ανγκλ’ αμέντε​—κο βακίτι σο κα τθεράς ι ζωή σο βοβ μανγκέλα τι απολαμβάνας για πάντα. (2 Κορ. 4:​16-18) Μέχρι τι αβέλ-πες ανταβά όμως, βοηθίνελα-αμέν τι συνεχίνας τι υπηρετίνας-λες κάθε ντιβές.​—Θρ. 3:​22-24.

4. Σο κα ντικχάς ανταλέ μαθημάστε;

⁴ Για τι ντικχάς ακανά σο μπορίνασα τι σικλιάς κατά παράδειγμας πιστέ τζενένγκο κατά πουρανέ μπρεσά ντα αμαρέ ντιβεσένταρ. Σαρ κα ντικχάς, μπορεί τι νακχάς προβλήματα σο να μπεκλεντίνασα. Αλλά άμα κα βασίντιβας κο Ιεχωβά, βοβ σίγουρα κα ντελ-αμέν ζορ. (Ψαλμ. 55:​22) Καζόμ κα ντικχάς ανταλά παραδείγματα, πουτσέν-τουμέν: “Σο κα κεράβας με άμα κα αβέλας-πες κάτι ασακό; Σαρ μπαριαρένα ανταλά παραδείγματα μι μπέσα κο Ιεχωβά; Καλά πράγματα σικλιάβα σο μπορίναβα τι κεράβ-λεν μι ζωγιάτε;”

5. Καλά προβλήματα νακχλάς ο Ιακώβ ιτιρί κατά Λάβαν; (Ντικχέν ι φωτογραφία κι ανγκλαϊνί σελίδα)

⁵ Μερικοί υπηρέτες ι Ιεχωβάσκε κο πουρανέ μπρεσά νακχλέ προβλήματα σο να μπεκλεντίνενας. Ντικχέν σο αβιλό-πες κο Ιακώβ. Λέσκο ντατ ντινάς-λες εντολή τι λελ ρομνιά κατά τσσαγιά σο τθερέλας ο Λάβαν, σο ισινέ τζενέ λέσαρ ντα πακιάλας κο Ιεχωβά, ντα βακερντάς λέσκε ότι ο Ιεχωβά κα ευλογίνελας-λες μπουτ. (Γέν. 28:​1-4) Ο Ιακώβ κερντάς ο σωστός. Νασλό κατά Χαναάν ντα γκιλό κο τθεμ σο τζουβντιόλας ο Λάβαν, σο τθερέλας ντουέ τσσαΐν. Λένγκε ναβά ισινέ Λεία ντα Ραχήλ. Ο Ιακώβ τσσουντάς μεράκι ι πο χουρντέ τσσαγιάκε σο τθερέλας ο Λάβαν, ι Ραχηλιάκε, ντα συμφωνιντάς τι κερέλ μπουτί λάκε νταντέσκε εφτά μπρεσά πριν τι παντρίνελ λάσαρ. (Γέν. 29:​18) Αλλά ο πράγματα να γκιλέ αντικάς σαρ μπεκλεντίνελας ο Ιακώβ. Ο Λάβαν χουχαντάς-λες ντα παντρισκιαρντάς-λες πι πο μπαρέ τσσαγιάσαρ, ι Λειάσαρ. Ο Λάβαν μουκχλάς ι Ιακωβίς τι παντρίνελ ι Ραχηλιάσαρ-ντα, εκ εβδομάδα πο σοράν, σάντε άμα κα κερέλας μπουτί ατζέκ εφτά μπρεσά. (Γέν. 29:​25-27) Επίσης, ο Λάβαν ισινέ άδικος κο μπουτιά σο κερέλας ι Ιακωβίσαρ. Ο Λάβαν χουχαβέλας-λες 20 μπρεσά!​—Γέν. 31:​41, 42.

6. Καλά γιαβερά προβλήματα νακχλάς ο Ιακώβ;

⁶ Ο Ιακώβ νακχλάς γιαβερά-ντα προβλήματα. Τθερέλας μπαρί φαμιλί, αλλά λέσκε τσσαβέ να τζάνας-λεν πάντα λατσσές ο εκ ι γιαβερέσαρ. Ερεσλέ κο σημείος τι μπικινέν ατζέ-ντα σαρ δούλος πουμαρέ πφραλές, ι Ιωσηφίς. Ντούι τσσαβέ ι Ιακωβίσκε, ο Συμεών ντα ο Λευί, αντέ λατζ πουμαρέ φαμιλιάτε ντα μελιαρντέ ο ναβ ι Ιεχωβάσκο. Επίσης, η αγαπημέ ρομνί ι Ιακωβίσκι, η Ραχήλ, μουλί καζόμ μπιανέλας πι δεύτερε τσσαβές. Ντα επειδή πελί εκ μπαρί μποκχ, ο Ιακώβ αναγκασάλο τι νασέλ κι Αίγυπτος πι πφουριματέντε.​—Γέν. 34:​30· 35:​16-19· 37:​28· 45:​9-11, 28.

7. Σαρ σικαβέλας ο Ιεχωβά κο Ιακώβ ότι τθερέλας Λέσκι ευλογία;

⁷ Παρόλο σο νακχλάς ανταλά προβλήματα, ο Ιακώβ ποτές να χασαρντάς πι πίστη κο Ιεχωβά ντα κο υποσχέσεις Λέσκε. Ντα ο Ιεχωβά σικαβέλας κο Ιακώβ ότι τθερέλας Λέσκι ευλογία. Για παράδειγμας, παρόλο σο ο Λάβαν ισινέ άδικος, ο Ιεχωβά ευλογίνελας ι Ιακωβίς μπουτέ πραγματέντζαρ. Σκεφτίνεν επίσης καζόμ μπαρί εκτίμηση πρέπει τι τθερέλας ο Ιακώβ ι Ιεχωβάσκε κάνα ντικχλάς πάλι ι Ιωσηφίς​—ι τσσαβές σο για μπουτ μπρεσά αμντίνελας ότι ισινέ μουλό! Επειδή ισινέ λατσσέ αμαλά ι Ιεχωβάσαρ, ο Ιακώβ μπορισάλο τι νακχαβέλ ο προβλήματα σο τθερέλας. (Γέν. 30:​43· 32:9, 10· 46:​28-30) Κάνα ισινάμ λατσσέ αμαλά ι Ιεχωβάσαρ, μπορίνασα  αμέν-ντα τι νακχαβάς ο προβλήματα σο αβένα οτθέ σο να μπεκλεντίνασα λένγκε.

8. Σο μανγκέλας τι κερέλ ο βασιλιάς Δαβίδ;

⁸ Ο βασιλιάς Δαβίδ να μπορίνελας τι κερέλ σαρέ οντουλά σο μανγκέλας τι κερέλ κι υπηρεσία κι Ιεχωβάσκι. Για παράδειγμας, μανγκέλας σαρέ πι γκίσαρ τι κερέλ εκ ναός πι Ντεβλέσκε. Βακερντάς-λες ανταβά κο προφήτης Νάθαν. Ο Νάθαν απαντιντάς: «Κερ οντουβά σο ισί αντρέ τι γκίστε, επειδή ο αληθινός Ντεβέλ ισί τούσαρ». (1 Χρον. 17:1, 2) Ανέν τουμαρέ γκοντιάτε καζόμ ζορ πρέπει τι ντινέ ανταλά λάφια ι Δαβιδίς. Μπέκιμ αρχισάλο τι κερέλ αμέσως σχέδια ανταλέ μπαρέ ναόσκε.

9. Σο κερντάς ο Δαβίδ κάνα ο αμπέρια να ισινέ σουκάρ;

⁹ Μπουτ σουγκό όμως, ο προφήτης ι Ιεχωβάσκο να βουρτισάλο σουκάρ αμπερίντζαρ. «Οντιά ιράτ», ο Ιεχωβά βακερντάς κο Νάθαν ότι να κα αβέλας ο Δαβίδ οντουβά σο κα χτίνελας ο ναός. Ανταβά κα κερέλας-λες εκ λέσκε τσσαβένταρ. (1 Χρον. 17:3, 4, 11, 12) Σο κερντάς ο Δαβίδ κάνα σικλιλό-λες ανταβά; Κερντάς εκ αλλαγή κο στόχος σο τθερέλας. Αρχισάλο τι γκίντελ λοβέ ντα ο πράγματα σο κα χρειαζίντιβελας λέσκο τσσαβό, ο Σολομών, οντουλέ ναόσκε.​—1 Χρον. 29:​1-5.

10. Σαρ ευλογιντάς ο Ιεχωβά ι Δαβιδίς;

¹⁰ Αμέσως μόλις βακερντάς κο Δαβίδ ότι να κα χτίνελας βοβ ο ναός, ο Ιεχωβά κερντάς συμφωνία λέσαρ. Ντινάς κο Δαβίδ πο λάφι ότι εκ λέσκε προσαγγονίνταρ κα κυβερνίνελας για πάντα. (2 Σαμ. 7:​16) Κο νεβό ντουνιάς, ανέν τουμαρέ γκοντιάτε ι χαρά ι Δαβιδίσκι κάνα κα σικλιόλ ότι ο βασιλιάς κι Βασιλεία κι Ιησούσκι σο κα ατσσικιαρέλ χίλια μπρεσά αστάρντιβελα λέσταρ! Ανταγιά ιστορία βοηθίνελα-αμέν τι αγαβάς ότι, ατζέ-ντα άμα να μπορίνασα τι κεράς σαρέ οντουλά σο μανγκάας τι κεράς ι Ιεχωβάσκε, αμαρό Ντεβέλ μπορεί τι τθερέλ αμένγκε γιαβερά ευλογίες, σο μπέκιμ να νακχλέας ιτς αμαρέ γκοντιάταρ.

11. Σαρ ευλογίντιβενας ο Χριστιανοί κο πρώτος αιώνας παρόλο σο η Βασιλεία να αβιλί κάνα μπεκλεντίνενας λάκε; (Πράξεις 6:7)

¹¹ Ο Χριστιανοί κο πρώτος αιώνας νακχλέας μερικά προβλήματα σο να μπεκλεντίνενας λένγκε. Για παράδειγμας, μπεκλεντίνενας σαρ σαρ τι αβέλ η Βασιλεία ι Ντεβλέσκι, αλλά να τζανένας κάνα κα αβέλας-πες ανταβά. (Πράξ. 1:6, 7) Οτθάρ, σο κερντέ; Ατσσιλέ απασχολημέ κο έργος. Καζόμ βακερένας ο λατσσέ αμπέρια πο μπουτ τθανέντε, ο Χριστιανοί ντικχένας μπαρέ αποδείξεις ότι ο Ιεχωβά ευλογίνελας λένγκε προσπάθειες.​—Διαβάνεν Πράξεις 6:7.

12. Σο κερντέ ο Χριστιανοί κο πρώτος αιώνας κάνα πελί μποκχ;

¹² Εκ φαρ, πελί μπαρί μποκχ «σαρί κι πφουβ». (Πράξ. 11:​28) Ανταγιά μποκχ αβιλί κο πρώτοι Χριστιανοί-ντα. Ανέν τουμαρέ γκοντιάτε καζόμ μπουτ πρέπει τι ταλαιπωρισάλε επειδή να τθερένας πράγματα χαμάσκε. Σίγουρα, ο σορέ ι φαμιλιάκε ανησυχίνενας άμα κα ανένας ο αναγκαία πουμαρέ φαμιλιάτε. Ντα σο κα βακεράς μερικέ τερνένγκε σο μανγκένας τι κερέν πο μπουτ κο έργος; Μήπως σκεφτισάλε ότι έπρεπε τι νακχέλ πρώτα η μποκχ ντα σοράν τι κερέν πο μπουτ ι Ιεχωβάσκε; Σαρ-ντα τι αβένας ο πράγματα λένγκε ζωγιάτε, ο Χριστιανοί γκιλέ-λεν λατσσές. Συνεχιντέ τι βακερέν ο λατσσέ αμπέρια με το τρόπος σο μπορίνελας ο κάθε εκ, ντα ισινέ χαρούμενοι σο ιλιαβένας οντουλά σο τθερένας πουμαρέ πφραλέντζαρ ντα πφενίντζαρ κι Ιουδαία.​—Πράξ. 11:​29, 30.

13. Καλά ευλογίες νιωσάλε ο Χριστιανοί κάνα πελί η μποκχ;

¹³ Καλά ευλογίες τθερένας ο Χριστιανοί κάνα πελί η μποκχ; Οντουλά σο λιντέ υλικά πράγματα ντικχλέ πουμαρέ γιακχίντζαρ ότι ο Ιεχωβά βοηθίνελας-λεν. (Ματθ. 6:​31-33) Μπέκιμ νιωσάλε ατζέ πο πασέ πουμαρέ πφραλέντζαρ ντα πφενίντζαρ σο τθαβντισάλεας τι βοηθίνεν-λεν. Οντουλά σο ντινέ πουμαρέ λοβένταρ ντα πουμαρέ πραγματένταρ ή βοηθιντέ εκχέ γιαβερέ  τροπόσαρ ανταλέ εργόστε νιωσάλε ι χαρά σο τθεράσα κάνα ντάσα. (Πράξ. 20:​35) Ο Ιεχωβά ευλογίνελας-λεν σαριλέν επειδή κερένας ο αλλαγές σο χρειαζίντιβενας.

14. Σο αβιλό-πες κο Βαρνάβας ντα κο απόστολος Παύλος, ντα καβά ισινέ ο αποτέλεσμας; (Πράξεις 14:​21, 22)

¹⁴ Ο Χριστιανοί κο πρώτος αιώνας νακχένας μπουτ φαρ διωγμός, μπάζιμα οτθέ σο να μπεκλεντίνενας λέσκε. Σκεφτίνεν σο αβιλό-πες κο Βαρνάβας ντα κο απόστολος Παύλος κάνα βακερντέ ο λατσσέ αμπέρια κο Λύστρα. Κι αρχή, ο τζενέ σο ασουνένας-λεν δεχτιντέ-λεν αντράλ πουμαρέ γκίσταρ. Αλλά πο σοράν, κάποια τζενέ σο τζάνας λέντζαρ κόντρα «κερντέ ι τζενέν τι νευριάνεν», ντα μερικοί οντουλέ ίδιε τζενένταρ φουρτιντέ μπαρά ι Παυλόσκε ντα μουκχλέ-λες, επειδή αμντισάλεας ότι ισινέ μουλό. (Πράξ. 14:​19) Αλλά ο Βαρνάβας ντα ο Παύλος συνεχιντέ τι βακερέν ο λατσσέ αμπέρια γιαβερτθέ. Καβά ισινέ ο αποτέλεσμας; Κερντέ «μπερεκέτι μαθητέν», ντα οντουλέντζαρ σο βακερένας ντα κερένας ντινέ ζορ πουμαρέ πφραλέν ντα πουμαρέ πφενίν. (Διαβάνεν Πράξεις 14:​21, 22) Μπουτ τζενέ βοηθίντιλε επειδή ο Παύλος ντα ο Βαρνάβας να τσσιναντέ τι βακερέν ο λατσσέ αμπέρια ατζέ-ντα κάνα ο γιαβερά γκιλέ λέντζαρ κόντρα ξαφνικά. Άμα να τσσιναβάσα τι κεράς ο έργος σο ντινάς-αμέν ο Ιεχωβά, κα ευλογίντιβας αμέν-ντα.

15. Σο σικλιόνα κατά παράδειγμας ι πφραλέσκο Α. Χ. Μακμίλαν;

¹⁵ Πριν κατά 1914, ο λαός ι Ιεχωβάσκο μπεκλεντίνελας τι αβέν-πες κάποια σημαντικά πράγματα. Ανέν τουμαρέ γκοντιάτε για παράδειγμας ι πφραλές Α. Χ. Μακμίλαν. Σαρ αμντίνενας γιαβερά-ντα πφραλά αζομάν, ο πφραλ Μακμίλαν πακιάλας ότι μπουτ σουγκό κα τζάλας κο ουρανός. Εκχέ ομιλιάτε σο κερντάς κο Σεπτέμβριος κο 1914, βακερντάς: «Μπέκιμ ανταγιά ισί η τελευταία δημόσια ομιλία σο κεράβα». Όμως, τζανάσα ότι να ισινέ λέσκι τελευταία ομιλία οντιά. Πο σοράν, ο πφραλ Μακμίλαν γραφιντάς: «Μπέκιμ μερικοί αμένταρ σιγκιαράας μπουτ κάνα σκεφτίναας ότι κα τζάας κο ουρανός αμέσως». Σοράν βακερντάς: «Οντουβά σο έπρεπε τι κεράς ισινέ τι ατσσάς απασχολημέ κο έργος κι Κυριόσκο». Ο πφραλ Μακμίλαν μπαγιά συνεχιντάς τι κερέλ μπουτ πράγματα. Πφαμπόλας ι εργόσκε. Τθερέλας ο προνόμιος τι ντελ ζορ μπουτέ πφραλέν σο ισινέ κι φυλακή επειδή ατσσιλέ ουδέτεροι. Επίσης, να τσσιναντάς τι τζαλ κο συναθροίσεις ατζέ-ντα κάνα ισινέ μπουτ πφουρό. Σο λατσσιπέ ντικχλάς ο πφραλ Μακμίλαν επειδή κερέλας μπουτ πράγματα ι Ιεχωβάσκε καζόμ μπεκλεντίνελας τι τζαλ κο ουρανός; Χάνικ πριν τι μερέλ, κο 1966, γραφιντάς: «Μι πίστη αντιβές ισί αζόμ ζουρανί καζόμ ισινέ πάντα». Σο σουκάρ ισί τι ντικχάς αμέν-ντα ο πράγματα αντικάς, ατζέ-ντα άμα νταϊντίνασα δοκιμασίες για πο μπουτ βακίτι οντουλέσταρ σο αμντίναας!​—Εβρ. 13:7.

16. Καβά πρόβλημας σο να μπεκλεντίνενας τθερένας ο Χέρμπερτ Τζένινγκς ντα λέσκι ρομνί; (Ιακώβου 4:14)

¹⁶ Μπουτ υπηρέτες ι Ιεχωβάσκε τθερένα νασφαλίματα σο να μπεκλεντίνενας ότι κα τθερέν. Για παράδειγμας, πι ιστοριάτε, ο πφραλ Χέρμπερτ Τζένινγκς b βακερντάς καζόμ μπουτ μπεϊντίνενας βοβ ντα λέσκι ρομνί πουμαρό διορισμός σαρ ιεραπόστολοι κι Γκάνα. Εκ ντιβές όμως, αρακχλέ λέσκε εκ σοβαρός ψυχολογικός πρόβλημας. Ο πφραλ Τζένινγκς αντάς πι γκοντιάτε ο λάφια ι εδαφιόσκε Ιακώβου 4:​14, σο σικαβένα ότι να τζανέσα σο ντισιόλα τούκε «γιαβίν». (Διαβάνεν) Βοβ γραφιντάς: «Έπρεπε τι ντικχάς ο πράγματα σαρ ισινέ, οτθάρ ετοιμαντάμ-αμέν τι νασάς κατά Γκάνα, τι μουκχάς αμαρέ μπουτέ ντα λατσσέ αμαλέν ντα  τι βουρτίνας κο Καναδάς [τι λας εκ θεραπεία κατά γιατρούς]». Ο Ιεχωβά βοηθιντάς ι πφραλές Τζένινγκς ντα λέσκε ρομνιά τι συνεχίνεν τι υπηρετίνεν-λες πιστά παρόλο σο νακχένας ανταβά πρόβλημας.

17. Σαρ βοηθιντάς ο παράδειγμας ι πφραλέσκο Τζένινγκς μερικέ πφραλέν;

¹⁷ Πι ιστοριάτε, ο πφραλ Τζένινγκς βακερντάς ο πράγματα αντικάς σαρ ισινέ. Ανταβά βοηθιντάς μπουτέ τζενέν. Εκ πφεν γραφιντάς: «Καέκ φαρ να λιντάς-μαν αζόμ μπουτ ροϊπέ σαρ λιντάς-μαν κάνα διαβαντόμ ανταγιά ιστορία. . . . Κάνα διαβαντόμ ότι ο πφραλ Τζένινγκς χρειαζίντιλο τι μουκχέλ εκ διορισμός για τι φροντίνελ πι υγεία, ανταβά βοηθιντάς-μαν τι ντικχάβ μο πρόβλημας εκχέ ισορροπημέ τροπόσαρ». Εκ γιαβέρ-ντα πφραλ γραφιντάς κάτι ασακό: «Αφού υπηρετιντόμ σαρ πρεσβύτερος 10 μπρεσά, χρειαζίντιλο τι μουκχάβ μο προνόμιος σόσκε τθεράβας εκ ψυχολογικός πρόβλημας. Νιωθίναβας ότι γκιλόμ-λεν αζόμ χάλια σο μπουτ φαρ πφανγκιόλας μο γκι κάνα διαβάναβας ιστορίες πφραλένγκε. . . . Αλλά ντέλας-μαν ζορ σο ο πφραλ Τζένινγκς να τσσιναντάς πο αγώνας». Ανταβά ανέλα αμαρέ γκοντιάτε ότι, κάνα νταϊντίνασα προβλήματα σο να μπεκλεντίναας λένγκε, μπορίνασα τι ντας ζορ ι γιαβερέν. Ατζέ-ντα άμα ο πράγματα αμαρέ ζωγιάτε να τζάνα αντικάς σαρ κα μανγκάας, μπορίνασα πάλι τι αβάς εκ παράδειγμας τζενέσκο σο σικαβέλα πίστη ντα υπομονή.​—1 Πέτρ. 5:9.

18. Σο σικλιόνα κατά παράδειγμας εκχέ χηράκο κι Νιγηρία, σαρ σικαβένα ο φωτογραφίες;

¹⁸ Δυσκολίες σαρ ισί ο νασφαλιπέ ι Κορωνοϊόσκο επηρεαντέ μπουτέ υπηρετόν ι Ιεχωβάσκε. Για παράδειγμας, εκ χήρα κι Νιγηρία ατσσιλίας μπουτ χάνικ λοβέντζαρ ντα χαμπιματέντζαρ. Εκ ντιβές, λάκι τσσάι πουτσλάς-λα σο κα χάνας αφού κα κερένας ο τελευταίος φλιτζάνι ρύζι σο ατσσιλόας-λεν. Αμαρί πφεν βακερντάς πι τσσαγιάκε ότι να ατσσιλέας-λεν ιτς λοβέ ούτε χαμπίματα, αλλά έπρεπε τι μοιάζεν κι χήρα κατά Σαρεπτά​—τι κερέν πουμαρό τελευταίος χαμπέ ντα τι ντεν σαρί πουμαρί  μπέσα κο Ιεχωβά. (1 Βασ. 17:​8-16) Πριν τι αρχίνεν τι σκεφτίνεν σο κα χάνας κο μεσημέρι, λιντέ εκ κουτίς με το αναγκαία πράγματα κατά πφραλά. Ο χαμπίματα σο ισινέ αντρέ κο κουτίς κα ερεσένας-λεν πο μπουτ από ντούι εβδομάδες. Η πφεν βακερντάς ότι να αγαντάας καζόμ προσεκτικά ασουνέλας ο Ιεχωβά οντουλά σο βακερντάας πι τσσαγιάκε. Βα, κάνα στηρίντιβασα κο Ιεχωβά, ο προβλήματα σο να μπεκλεντίνασα μπορίνενα τι ανέν-αμέν πο πασέ λέστε.​—1 Πέτρ. 5:6, 7.

19. Σο διωγμός νακχλάς ο πφραλ Αλεξέι Γιερσόφ;

¹⁹ Ο τελευταία μπρεσά, μπουτ πφραλά ντα πφενιά νακχλέ διωγμός, σο μπέκιμ να μπεκλεντίνενας. Ντικχέν σο αβιλό-πες κο πφραλ Αλεξέι Γιερσόφ, σο τζουβντιόλα κι Ρωσία. Ο λαός ι Ιεχωβάσκο οντουλέ τθεμέστε τθερέλας κάποια ελευθερία κάνα μπολντιλό ο πφραλ Γιερσόφ κο 1994. Κο μπρεσά σο αβιλέ όμως, ο πράγματα κι Ρωσία αλλαξάλε. Κο 2020, τσσουντέ-πες κο κχερ κι πφραλέσκο Γιερσόφ ντα ροντιντέ-λες, ντα λιντέ μπουτ λέσκε πραγματένταρ. Σοράν από μπουτ μασεκά, η κυβέρνηση κερντάς μήνυση ι πφραλέσκε. Κάτι ατζέ πο χειρότερος ισινέ ότι ο κατηγορίες βασίντιβενας μερικέ βιντεόντε σο γκιντιντάας εκ τζενό. Ανταβά τζενό, για πο μπουτ από εκ μπρες, κερέλας-πες χάι ότι μανγκέλας τι κερέλ μελέτη κατά Γραφή. Σο μπέτι πράγμας ισινέ ανταβά!

20. Σαρ κερντάς πο ζουρανί πι φιλία ι Ιεχωβάσαρ ο πφραλ Γιερσόφ;

²⁰ Αβιλό-πες καέκ λατσσιπέ κατά δοκιμασία σο νακχλάς ο πφραλ Γιερσόφ; Βα, λέσκι φιλία ι Ιεχωβάσαρ αβιλί πο ζουρανί. Βοβ βακερέλα: «Ακανά, προσευχίντιβαβα γιεκ μι ρομνιάσαρ πο μπουτ φαρ. Αγαβάβα ότι να κα μπορίναβας τι νταβ πέρα ανταλά προβλήματα άμα να κα τθεράβας ι βοήθεια ι Ιεχωβάσκι». Ντα βακερέλα: «Κάνα σικλιαράβα-μαν κατά Γραφή, ανταβά βοηθίνελα-μαν μα τι χασαράβ μι ζορ. Σκεφτίναβα λατσσές ο παραδείγματα πιστέ τζενένγκε κατά πουρανέ μπρεσά. Η Γραφή τθερέλα μπουτ ιστορίες σο σικαβένα καζόμ σημαντικός ισί τι ατσσάς ήρεμοι ντα τι ντας μπέσα κο Ιεχωβά».

21. Σο σικλιλάμ ανταλέ μαθημάστε;

²¹ Σο σικλιλάμ ανταλέ μαθημάστε; Ανταλέ ντουνιάστε, μπάζιμα νακχάσα προβλήματα σο να μπεκλεντίνασα λένγκε. Όμως ο Ιεχωβά πάντα βοηθίνελα πι υπηρετόν κάνα βασίντιβενα λέστε. Σαρ βακερέλα ο εδάφιος ανταλέ μαθημάσκο, «μπουτ ισί ο προβλήματα σο τθερέλα ο δίκαιος, αλλά ο Ιεχωβά σώνελα-λες σαρέ ανταλένταρ». (Ψαλμ. 34:​19) Οτθάρ, τι τθεράς αμαρέ γιακχά, όχι κο ταλαιπωρίες σο τσσίντασα, αλλά κι ζορ κι Ιεχωβάσκι σο στηρίνελα-αμέν. Άμα κα κεράς-λες ανταβά, σαρ ο απόστολος Παύλος, αντικάς αμέν-ντα κα μπορίνας τι βακεράς: «Σαρέ ι πραγματένγκε τθεράβα ι ζορ χάρη οντουλέσταρ σο ντέλα-μαν ζορ».​—Φιλιπ. 4:13.