1. Βακερέν σαρ ισινέ ο πράγματα κάνα ο Ιησούς κερντάς πο πρώτος θαύμας.

 ΑΝΕΝ τουμαρέ γκοντιάτε σαρ ισινέ ο πράγματα χάνικ πριν τι τελειώνελ ο μπρες 29 Κ.Χ., αζομάν σο ο Ιησούς κα αρχίνελας τι κερέλ πο έργος. Ο Ιησούς ντα λέσκι ντάι, η Μαρία, ντα μερικοί λέσκε μαθητένταρ, ισί καλεσμέ κο τραπέζι εκχέ μπιαβέσκο κι Κανά, εκ γκαβ βόρεια κατά Ναζαρέτ​—σο ισί η πόλη σο μπαριλό ο Ιησούς. Η Μαρία ισί αμαλίν ι φαμιλιάσαρ ντα μάλλον βοηθίνελα ι καλεσμέν. Αλλά καζόμ αβέλα ο τραπέζι ι μπιαβέσκο, τθερένα εκ πρόβλημας σο κα μπορίνελας τι ανέλ μπαρί λατζ κι φαμιλί ντα κο αντρόγυνος: Τζάλα τι μπιτίνελ η μολ. b Μπέκιμ τι αβιλέ πο μπουτ τζενέ οντουλένταρ σο μπεκλεντίνενας. Η Μαρία τζάλα σαμπούκι πι τσσαβέστε ντα βακερέλα λέσκε: «Να τθερένα μολ». (Ιωάν. 2:​1-3) Σο κερέλα ο Ιησούς; Κάτι σο να μπεκλεντίνελα καέκ. Εκχέ θαυμάσαρ, κερέλα ο πανί μπουτ «λατσσί μολ».​—Ιωάν. 2:9, 10.

2, 3. (α) Καλά θαύματα κερντάς ο Ιησούς; (β) Σο λατσσιπέ κερένα αμένγκε ο θαύματα σο κερντάς ο Ιησούς;

² Σοράν ανταλέσταρ, ο Ιησούς κερντάς μπουτ γιαβερά-ντα θαύματα καζόμ κερέλας πο έργος. c Χρησιμοποιηντάς ι ζορ σο ντέλας-λες ο Ντεβέλ για τι βοηθίνελ δεκάδες χιλιάδες τζενέν. Για παράδειγμας, ο τζενέ κο ντούι κατά θαύματα λέσκε​—κάνα παρβαρντάς 5.000 μουρσέν ντα πο σοράν 4.000 μουρσέν​—μπέκιμ τι αβένας σαρέ μαζί 27.000 ντα πο μπουτ, άμα κα τσσουβάς ι τζουβλίν ντα ι χουρντέν σο ισινέ οτθέ. (Ματθ. 14:15-21· 15:32-38)  Κο ντούι-ντα περιπτώσεις, ο Ιησούς κερντάς λατσσές μπουτέ νασφαλέν. (Ματθ. 14:14· 15:30, 31) Σκεφτίνεν καζόμ μπουτ πρέπει τι σαστισάλεας οντουλά τζενέ σο κερντάς-λεν λατσσές ο Ιησούς ντα παρβαρντάς-λεν!

³ Ο θαύματα σο κερντάς ο Ιησούς τθερένα μπαρί σημασία αμένγκε αντιβές. Ανταλέ μαθημάστε, κα ντικχάς σο σικλιάσα κατά θαύματα ι Ιησούσκε ντα σαρ ανταλά θαύματα κερένα πο ζουρανί αμαρί πίστη. Σοράν, κα ντικχάς σαρ μπορίνασα τι μοιάζας κο Ιησούς, σο ισινέ ταπεινός ντα αγαβέλας ι τζενένγκι ντουκχ κάνα κερέλας θαύματα.

4. Καλένγκε σικλιάσα κατά θαύματα σο κερντάς ο Ιησούς;

⁴ Ο θαύματα ι Ιησούσκε σικλιαρένα-αμέν μπουτ πράγματα όχι σάντε λέσκε, αλλά λέσκε Νταντέσκε-ντα. Ανταλά πράγματα κερένα αμαρί πίστη πο ζουρανί. Ο Ιεχωβά ισινέ Οντουβά σο ντέλας-λες ι ζορ για τι κερντιόν ο θαύματα. Ο εδάφιος Πράξεις 10:​38 βακερέλα αμένγκε: «Ο Ντεβέλ τραμπιντάς-λες [ι Ιησούς] άγιε πνευμάσαρ ντα ζοριάσαρ, ντα βοβ νακχλό κατά τθεμ καζόμ κερέλας ο λατσσιπέ ντα κερέλας λατσσές σαρέ οντουλέν σο ζορισκιαρέλας-λεν ο Μπενγκ, επειδή ο Ντεβέλ ισινέ λέσαρ». Ανέν τουμαρέ γκοντιάτε κάτι ατζέκ. Σο-ντα βακερέλας ντα κερέλας ο Ιησούς​—αντρέ οντουλέντε ισινέ λέσκε θαύματα-ντα—​σικαβέλας ο τρόπος σο σκεφτίνελα ντα νιωθίνελα λέσκο Ντατ. (Ιωάν. 14:9) Ντικχέν τριν μαθήματα σο σικλιάσα κατά θαύματα ι Ιησούσκε.

5. Σο τσσίντελας ι Ιησούς τι κερέλ θαύματα; (Ματθαίος 20:​30-34)

⁵ Πρώτον, ο Ιησούς ντα λέσκο Ντατ μανγκένα-αμέν μπουτ. Κάνα ο Ιησούς ισινέ κι πφουβ, σικαβέλας καζόμ μπουτ μανγκέλας ι τζενέν κάνα κερέλας θαύματα για τι βοηθίνελ οντουλέν σο τθερένας ντουκχ. Εκ φαρ, ντούι κορορέ μολίνενας ι Ιησούς τι βοηθίνελ-λεν. (Διαβάνεν Ματθαίος 20:​30-34) Τσσουβέν σημασία ακαβά. Ο Ιησούς πρώτα «τζιτζισάλο λένγκε» ντα σοράν κερντάς-λεν λατσσές. Ο πουρανό μπαλαμανό λάφι σπλαγχνίζομαι, σο χρησιμοποιήντιβελα ατθέ, μανγκέλα τι βακερέλ ότι πφαμπάσα ι γιαβερένγκε ντιπ αντράλ αμαρέ γκίσταρ. Επειδή ο Ιησούς πφαμπόλας ι γιαβερένγκε ντα μανγκέλας-λεν, παρβαρντάς μποκχαλέν ντα κερντάς λατσσές εκχέ λεπρός. (Ματθ. 15:​32· Μάρκ. 1:​41) Μπορίνασα τι αβάς σίγουροι ότι ο Ιεχωβά Ντεβέλ ντα λέσκο Τσσαβό “μανγκένα-αμέν μπουτ” ντα πφανγκιόλα λένγκο γκι κάνα αμέν τθεράσα ντουκχ. (Λουκ. 1:​78· 1 Πέτρ. 5:7) Μπεσένα σαρ σαρ τι νασκιαρέν σαρέ ο προβλήματα σο ανένα ντουκχ κο τζενέ!

6. Καγιά ζορ ντινάς ο Ντεβέλ κο Ιησούς;

⁶ Δεύτερον, ο Ντεβέλ ντινάς κο Ιησούς ι ζορ τι ντελ τέλος σαρέ κο προβλήματα σο τθερένα ο τζενέ. Αντράλ πι θαυματένταρ, ο Ιησούς σικαντάς ότι τθερέλα ι ζορ τι νασκιαρέλ ο εμπόδια σο αμέν να κα μπορίναας τι νασκιαράς-λεν κορκορέ. Για παράδειγμας, τθερέλα ι ζορ τι νασκιαρέλ ι αιτία ι προβληματένγκι σο τθερένα ο τζενέ​—δηλαδή ι αμαρτία σο λιντάμ ντα ο μπέτι αποτελέσματα σο τθεράσα ιτιρί λάταρ, σαρ ισί ο νασφαλίματα ντα ο μεριπέ. (Ματθ. 9:​1-6· Ρωμ. 5:​12, 18, 19) Ο θαύματα σο κερντάς σικαντέ ότι μπορίνελα τι κερέλ λατσσές «σο-ντα νασφαλιπέ» ισί, ατζέ-ντα τι αναστίνελ ι μουλέν. (Ματθ. 4:​23· Ιωάν. 11:​43, 44) Επίσης, τθερέλα ι ζορ τι κερέλ κουμάντος ο μπαρέ καταιγίδες ντα τι νικίνελ ι δαιμονέν. (Μάρκ. 4:​37-39· Λουκ. 8:2) Καζόμ μπουτ ηρεμίνελα-αμέν σο τζανάσα ότι ο Ιεχωβά ντινάς αζόμ μπαρί ζορ πι Τσσαβέστε!

7, 8. (α) Καγιά σιγουριά ντένα-αμέν ο θαύματα σο κερντάς ο Ιησούς; (β) Τουμέν, καβά θαύμας μπεσένα σαρ σαρ τι ντικχέν κο νεβό ντουνιάς;

 ⁷ Τρίτον, μπορίνασα τι αβάς ντιπ σίγουροι ότι ο ευλογίες σο κα ανέλ η Βασιλεία ι Ντεβλέσκι κα αβέν μπαγιά. Ο θαύματα σο κερντάς ο Ιησούς κάνα ισινέ κι πφουβ σικλιαρένα-αμέν σο κα κερέλ σαρό κο ντουνιάς σαρ Βασιλιάς κο ουρανός κι Ντεβλέσκι Βασιλεία. Σκεφτίνεν σο κα αβέλ-πες σουγκό, κάνα ο Χριστός κα κυβερνίνελ. Κα τθεράς μπουτ λατσσί υγεία, σόσκε βοβ κα νασκιαρέλ σο-ντα νασφαλιπέ νακχάσα. (Ησ. 33:​24· 35:5, 6· Αποκ. 21:3, 4) Ποτές να κα μποκχάλιβας ούτε κα τθεράς προβλήματα ιτιρί κατά φυσικές καταστροφές. (Ησ. 25:6· Μάρκ. 4:​41) Κα τθεράς ι μπαρί χαρά τι καλωσορίνας αμαρέ αγαπημέ τζενέν σο κα νικιόν κατά «μεζάρια» ντα κα τζουβντιόν πάλι. (Ιωάν. 5:​28, 29) Τουμέν, καβά θαύμας μπεσένα σαρ σαρ τι ντικχέν κο νεβό ντουνιάς;

⁸ Κάνα ο Ιησούς κερέλας θαύματα, ισινέ μπουτ ταπεινός ντα αγαβέλας ι τζενένγκι ντουκχ. Αμέν-ντα πρέπει τι σικαβάς ο ίδιες ιδιότητες. Για τι ντικχάς ντούι παραδείγματα. Κα αρχίνας οντουλέσαρ σο αβιλό-πες κι μπιαβέσκο τραπέζι κι Κανά.

9. Σο κερντάς ο Ιησούς κο τραπέζι κι μπιαβέσκο; (Ιωάννης 2:​6-10)

⁹ Διαβάνεν Ιωάννης 2:​6-10. Κάνα μπιτισάλι η μολ κο τραπέζι κι μπιαβέσκο, ισινέ ο Ιησούς υποχρεωμέ τι κερέλ κάτι; Νάα. Να υπαρχίντιβελας καέκ προφητεία σο βακερέλας ότι  ο Μεσσίας κα κερέλας εκ ασακό θαύμας. Ανέν τουμαρέ γκοντιάτε όμως σαρ κα νιωθίνενας τουμέν άμα κα μπιτίνενας ο μολιά τουμαρέ μπιαβέστε. Ντικχίντιβελα ότι ο Ιησούς πφαμπόλας οντουλέ φαμιλιάκε, ντα πο μπουτ ι μποριάκε ντα ι τζαμουτρέσκε, ντα μανγκέλας τι γλιτώνελ-λεν κατά λατζ. Οτθάρ, σαρ βακερντάμ κι αρχή, κερντάς εκ θαύμας. Κερντάς ο πανί​—περίπου 390 λίτρα—​τι αβέλ μπουτ λατσσί μολ. Μπορεί τι κερντάς αζόμ μπουτ λίτρα μολ για τι πιλ-λα ο ζευγάρι κο μέλλον ή για τι μπικινέλ-λα ντα τι λελ λοβέ. Καζόμ μπουτ εκτιμιντάς-λες ανταβά ο ζευγάρι!

10. Καλά ισί μερικές σημαντικές λεπτομέρειες κατά ιστορία σο ισί κο Ιωάννης, κεφάλαιος 2; (Ντικχέν ι φωτογραφία-ντα)

¹⁰ Ανέν τουμαρέ γκοντιάτε μερικές σημαντικές λεπτομέρειες κατά ιστορία σο ισί κο Ιωάννης, κεφάλαιος 2. Ντινέν προσοχή ότι ο Ιησούς να πφερντάς βοβ ο κχορά πανίσαρ; Αντίς τι ταρτίνελ ι προσοχή οπρά-πέστε, βακερντάς κο υπηρέτες τι πφερέν ο κχορά. (Εδάφια 6, 7) Ντα αφού κερντάς ο πανί μολ, ο Ιησούς να γκερντάς βοβ χάνικ μολ οντουλέστε σο κερέλας κουμάντος κο τραπέζι κι μπιαβέσκο. Οκιά μπάνταρ, βακερντάς κο υπηρέτες τι κερέν-λες ανταβά. (Εδάφιος 8) Ντα μήπως ο Ιησούς λιντάς εκ ποτήρι μολ, βαντιντάς-λες ανγκλάλ κο καλεσμέ ντα ισαρντάς-πες: “Δοκιμάνεν ακαλέ μολιάταρ σο με κερντόμ”; Σίγουρα όχι!

11. Σο σικλιάσα κατά θαύμας ι Ιησούσκο;

¹¹ Σο σικλιάσα κατά θαύμας ι Ιησούσκο σο κερντάς ο πανί μολ; Σικλιάσα σαρ τι αβάς ταπεινοί. Ο Ιησούς να ισαρντάς-πες για το θαύμας. Ποτές να ισαρέλας-πες οντουλένγκε σο κερέλας. Οκιά μπάνταρ, ισινέ ταπεινός ντα ντέλας πάντα σαρί ι δόξα ντα ι τιμή πι Νταντέστε. (Ιωάν. 5:​19, 30· 8:​28) Άμα κα μοιάζας κο Ιησούς ντα να τθεράσα μπαρί ιδέα αμαρέ νεαυτόσκε, να κα ισαράς-αμέν ι λατσσέ πραγματένγκε σο κεράσα. Σο-ντα κεράσα κι υπηρεσία κι Ιεχωβάσκι, πρέπει τι ισαράς-αμέν, όχι αμαρέ νεαυτόσκε, αλλά αμαρέ μπουτ λατσσέ Ντεβλέσκε σο τθεράσα ο προνόμιος τι υπηρετίνας-λες. (Ιερ. 9:​23, 24) Πρέπει τι ντας σαρί ι τιμή λέστε. Για τι σκεφτίνας: Κα μπορίναας τι κεράς κάτι λατσσό χωρίς τι τθεράς ι βοήθεια ι Ιεχωβάσκι;​—1 Κορ. 1:​26-31.

12. Καβά ισί εκ γιαβέρ τρόπος σο μπορίνασα τι αβάς ταπεινοί σαρ ο Ιησούς; Βακερέν εκ παράδειγμας.

¹² Ανέν τουμαρέ γκοντιάτε εκ γιαβέρ τρόπος σο μπορίνασα τι αβάς ταπεινοί σαρ ο Ιησούς. Βακερέν ότι εκ πρεσβύτερος ντέλα μπουτ σαάτι για τι βοηθίνελ εκχέ τερνέ διακονικέ υπηρετής τι προετοιμάνελ πι πρώτη δημόσια ομιλία. Ντα αντικάς ανταβά τερνό πφραλ κερέλα εκ ομιλία σο ντέλα ζορ ντα χαρά σαρί κι κχανγκιρί. Σοράν κατά συνάθροιση, κάποιος τζάλα πασέ κο πρεσβύτερος ντα βακερέλα: “Ανταβά τερνό κερντάς εκ μπουτ σουκάρ ομιλία, α;” Χρειαζίντιβελα ο πρεσβύτερος τι βακερέλ: “Βα, αφού βοηθιντόμ-λες μπουτ σαάτια”; Ή κα μπορίνελας τι βακερέλ ταπεινά: “Βα, ισινέ μπουτ σουκάρ. Καμαρώναβα-λες”; Άμα ισινάμ ταπεινοί, να κα τθεράς ι ανάγκη τι λας ο ισαριπέ ι λατσσέ πραγματένγκε σο κεράσα ι γιαβερένγκε. Ερεσέλα-αμέν σο τζανάσα ότι ο Ιεχωβά ντικχέλα ντα εκτιμίνελα σο-ντα κεράσα. (Ντικχέν Ματθαίος 6:​2-4· Εβρ. 13:​16) Σίγουρα, κεράσα ι Ιεχωβάσκο γκι κάνα μοιάζασα κο Ιησούς ντα σικαβάσα ότι ισινάμ ταπεινοί.​—1 Πέτρ. 5:6.

13. Σο ντικχέλα ο Ιησούς πασέ κι Ναΐν, ντα σο κερέλα ανταλέσκε; (Λουκάς 7:​11-15)

¹³ Διαβάνεν Λουκάς 7:​11-15. Ανέν τουμαρέ γκοντιάτε σο αβιλό-πες κο 31 Κ.Χ. Ο Ιησούς γκιλό κι Ναΐν, σο ισινέ εκ τθεμ κι Γαλιλαία πασέ κι Σουνάμ. Οτθέ, ο προφήτης Ελισαιέ τζουβντιαρντάς εκχέ τζουβλιάκε τσσαβές περίπου 900 μπρεσά πο τζανγκλέ. (2 Βασ. 4:​32-37)  Καζόμ ο Ιησούς ερεσέλα κι μπαρί πόρτα, ντικχέλα τζενέν σο τζάνα εκχέ κηδειάτε τι νικιόν κατά πόλη. Ο πράγματα ισί μπουτ δύσκολα​—εκ χήρα χασαρντάς πι μοναδικέ τσσαβές. Αλλά ανταγιά ντάι, σο πφανγκιλό λάκο γκι, νανέ κορκορί. Ισί μπουτ τζενέ κατά τθεμ γιεκ λάσαρ. Ο Ιησούς σταματίνελα ι τζενέν ντα κερέλα κάτι μπουτ ξεχωριστός ανταλέ νταγιάκε​—τζουβντιαρέλα λάκε τσσαβές! Ανταγιά ισί η πρώτη κατά τριν αναστάσεις σο κερντάς ο Ιησούς ντα ισί γραμμέ κο Ευαγγέλια.

14. Καλά ισί μερικές σημαντικές λεπτομέρειες κατά ιστορία σο ισί κο Λουκάς, κεφάλαιος 7; (Ντικχέν ι φωτογραφία-ντα)

¹⁴ Ανέν τουμαρέ γκοντιάτε μερικές σημαντικές λεπτομέρειες κατά ιστορία σο ισί κο Λουκάς, κεφάλαιος 7. Ντινέν προσοχή ότι ο Ιησούς «ντικχλάς» ι νταγιά ντα σοράν «τζιτζισάλο λάκε»; (Εδάφιος 13) Οτθάρ, οντουβά σο ντικχλάς​—μπέκιμ ο ροϊπέ λάκο καζόμ τζάλας για τι πραχούνελ πι τσσαβές—​κερντάς-λες τι αγαβέλ λάκι ντουκχ. Ο Ιησούς να τζιτζισάλο απλώς ι νταγιάκε. Σικαντάς επίσης ότι αγαβέλας λάκι ντουκχ. Κερντάς λάσαρ λάφι ντα σίγουρα ηρεμιντάς-λα κάνα βακερντάς: «Μα ροβ». Σοράν, κερντάς κάτι για τι βοηθίνελ-λα. Αντάς λάκε τσσαβές πάλι κι ζωή ντα «ντινάς-λες λέσκε νταγιάτε».​—Εδάφια 14, 15.

15. Σο μπορίνασα τι σικλιάς κατά θαύμας ι Ιησούσκο;

¹⁵ Σο μπορίνασα τι σικλιάς κατά θαύμας σο κερντάς ο Ιησούς σο τζουβντιαρντάς ι χηράκε τσσαβές; Σικλιάσα ότι χρειαζίντιβελα τι αγαβάς ι ντουκχ οντουλένγκι σο χασαρντέ εκχέ τζενές. Σίγουρα, αμέν να μπορίνασα τι τζουβντιαράς ι μουλέν, σαρ ο Ιησούς. Όμως, σαρ ο Ιησούς, μπορίνασα αμέν-ντα τι ντικχάς προσεκτικά οντουλέν σο χασαρντέ εκχέ τζενές. Αντικάς, κα αγαβάς πο εύκολα λένγκι ντουκχ. Μπορίνασα τι πετυχίνας-λες κάνα βακεράσα ντα κεράσα σο-ντα μπορίνασα για τι βοηθίνας-λεν ντα τι ντας-λεν παρηγοριά. d (Παρ. 17:​17· 2 Κορ. 1:3, 4· 1 Πέτρ. 3:8) Ατζέ-ντα εκ χουρντό λάφι ή εκ χουρντί πράξη μπορίνελα τι ενθαρρύνελ-λεν.

16. Σαρ ντικχίντιβελα κι φωτογραφία, σο σικλιόνα κατά εμπειρία σο τθερέλας εκ ντάι σο χασαρντάας πι τσσαγιά ακανά σουγκό;

¹⁶ Ντικχέν εκ εμπειρία. Πριν από μερικά μπρεσά, εκχέ συναθροισιάτε, οτθέ σο γκιλιαβένας  ο ύμνος, εκ πφεν τσσουντάς σημασία ότι εκ ντάι απέναντι λάταρ ροβέλας. Οντουβά ύμνος τθερέλας τι κερέλ με την ελπίδα της ανάστασης, ντα οντιά ντάι χασαρντάας πι χουρντέ τσσαγιά ακανά σουγκό. Η πφεν γκιλί σουγκό πασέ λάτε, λιντάς-λα ανγκάλι ντα γκιλιαντέ γιεκ οντουβά ύμνος. Οντιά ντάι βακερντάς σοράν: «Πφερντιλό μο γκι μανγκιπέ ι πφραλένγκε ντα ι πφενίνγκε». Εκτιμιντάς μπουτ σο γκιλί κι συνάθροιση. «Οτθέ κα αρακχάς βοήθεια», βακερντάς, «οτθέ, κι Αίθουσα Βασιλείας». Μπορίνασα τι αβάς σίγουροι ότι ο Ιεχωβά ντικχέλα ντα εκτιμίνελα ατζέ-ντα ο πο χουρντέ πράγματα σο κεράσα για τι σικαβάς ότι αγαβάσα ι ντουκχ οντουλένγκι σο χασαρντέ εκχέ τζενές ντα «ισί μπουτ στεναχωριμέ».​—Ψαλμ. 34:18.

17. Σο σικλιλάμ ανταλέ μαθημάστε;

¹⁷ Κάνα διαβάνασα κο Ευαγγέλια ο ιστορίες για το θαύματα σο κερντάς ο Ιησούς, ανταβά μπορίνελα τι μπαριαρέλ αμαρί πίστη. Ανταλά ιστορίες σικλιαρένα-αμέν ότι ο Ιεχωβά ντα ο Ιησούς μανγκένα-αμέν μπουτ, ότι ο Ιησούς τθερέλα ι ζορ τι τσσιναβέλ σαρέ ο προβλήματα ι τζενένγκε ντα ότι μπορίνασα τι αβάς ντιπ σίγουροι για το ευλογίες σο κα ανέλ η Βασιλεία, σο ισί αζόμ πασέ. Καζόμ ντικχάσα ο λεπτομέρειες ανταλέ ιστοριένταρ, μπορίνασα τι σκεφτίνας τρόπους για τι σικαβάς ο ιδιότητες σο τθερέλας ο Ιησούς. Κα μπορίνενας τι ντικχέν γιαβερά-ντα θαύματα ι Ιησούσκε κάνα σικλιαρένα-τουμέν κατά Γραφή ή κι Φαμιλιάκι Λατρεία. Ντικχέν σο μπορίνενα τι σικλιόν ντα σοράν βακερέν οντουλά σο σικλιλέν κο γιαβερά. Ανέν τουμαρέ γκοντιάτε καζόμ ζορ κα ντεν ανταλά συζητήσεις εμ τουμέν εμ ι γιαβερέν!​—Ρωμ. 1:​11, 12.

18. Σο κα ντικχάς κο γιαβέρ μάθημας;

¹⁸ Καζόμ μπιτισκιαρέλας πο έργος, ο Ιησούς κερντάς ι τελευταία κατά τριν αναστάσεις σο βακερέλα η Γραφή ότι κερντάς. Αλλά ανταγιά ισινέ διαφορετική​—αντάς κι ζωή πι αγαπημέ αμαλές σο ισινέ μουλό κο μεζάρι σταρ ντιβές. Σο μπορίνασα τι σικλιάς ανταλέ θαυμάσταρ κατά Γραφή; Ντα σαρ μπορίνασα τι κεράς πο ζουρανί αμαρί ελπίδα κι ανάσταση; Κα λας απάντηση ανταλέ ερωτησιέντε κο γιαβέρ μάθημας.