1. Σόσκε ντάσα απαντήσεις κο συναθροίσεις;

 ΣΟΣΚΕ τζάσα κο συναθροίσεις; Ο πο σημαντικός λόγος ισί για τι ντας δόξα κο Ιεχωβά. (Ψαλμ. 26:​12· 111:1) Επίσης, τζάσα κο συναθροίσεις για τι ενθαρρύνας ο εκ ι γιαβερές ανταλέ δύσκολε ντιβεσέντε. (1 Θεσ. 5:​11) Κάνα βάντασα αμαρό βας ντα ντάσα εκ απάντηση, κεράσα ο ντούι-ντα πράγματα.

2. Καλά ευκαιρίες τθεράσα για τι ντας απαντήσεις αμαρέ συναθροισιέντε;

² Κάθε εβδομάδα, τθεράσα ευκαιρίες τι ντας απαντήσεις αμαρέ συναθροισιέντε. Για παράδειγμας, κο σαββατοκύριακος μπορίνασα τι ντας απαντήσεις κο Μάθημας κι Σκοπιάκο. Κι συνάθροιση σο αβέλα-πες αντρέ κι εβδομάδα, μπορίνασα τι ντας απαντήσεις κο Διαμάντια Κατά Αγία Γραφή, κο Σικλιαριπέ ι Γραφιάκο κι Κχανγκιρί ντα κο γιαβερά μέρη σο τθερένα ερωτήσεις.

3. Καλά δυσκολίες μπέκιμ τι τθεράς, ντα σαρ βοηθίνενα-αμέν ο εδάφια Εβραίους 10:​24, 25;

³ Σαρέ μανγκάσα τι ντας δόξα κο Ιεχωβά ντα τι ντας ζορ αμαρέ πφραλέντε ντα πφενίντε. Αλλά υπαρχίντιβενα ντούι πράγματα σο μπέκιμ τι δυσκολίνεν-αμέν κάνα ισί τι ντας απαντήσεις. Μπορεί τι λελ-αμέν άγχος κάνα σκεφτίνασα ότι κα ντας εκ απάντηση. Ή μπορεί τι κεράς σαρ σαρ για τι ντας απαντήσεις, αλλά ο πφραλά σο κερένα ο μέρη μα τι ντεν-αμέν απάντηση αζόμ φαρ καζόμ κα μανγκάας. Σαρ μπορίνασα τι νακχαβάς ανταλά δυσκολίες; Αρακχάσα ι απάντηση κι επιστολή σο γραφιντάς ο απόστολος Παύλος κο Εβραίοι. Κάνα εξηγιντάς σόσκε ισί σημαντικός τι τζας κο συναθροίσεις, βακερντάς ότι πρέπει τι τθεράς πο μπουτ αμαρέ γκοντιάτε «τι ντας ζορ ο εκ ι γιαβερές». (Διαβάνεν Εβραίους 10:​24, 25) Άμα ντάσα-αμέν γκοντί ότι ο γιαβερά μπορίνενα τι λεν ζορ ατζέ-ντα άμα κα βακεράς εκ απλή απάντηση σο σικαβέλα αμαρί πίστη, κα αβέλ πο εύκολος αμένγκε τι βάντας αμαρό βας. Οκιά μπάνταρ, άμα ο πφραλά σο κερένα ο μέρη να ντένα-αμέν απάντηση μπουτ φαρ, μπορίνασα τι χαιρίνας  σόσκε ο γιαβερά κι κχανγκιρί κα τθερέν ι ευκαιρία τι ντεν απαντήσεις.​—1 Πέτρ. 3:8.

4. Καλά τριν σημεία κα ντικχάς ανταλέ μαθημάστε;

⁴ Ανταλέ μαθημάστε, κα ντικχάς πρώτα σαρ μπορίνασα τι ντας ζορ ο εκ ι γιαβερές εκχέ χουρντέ κχανγκιριάτε σο νανέ μπουτ τζενέ για τι απαντίνεν. Σοράν, κα ντικχάς σαρ μπορίνασα τι ντας ζορ ο εκ ι γιαβερές εκχέ μπαρέ κχανγκιριάτε, σο βάντενα μπουτ τζενέ πουμαρό βας για τι απαντίνεν. Κο τέλος, κα ντικχάς σαρ τι απαντίνας τροπόντζαρ σο ντένα μπαρί ζορ κο γιαβερά.

5. Σαρ μπορίνασα τι ντας ζορ ο εκ ι γιαβερές άμα ο τζενέ κι συνάθροιση ισί χάνικ;

⁵ Εκχέ χουρντέ κχανγκιριάτε ή ομιλόστε, ο πφραλ σο κερέλα ο μέρος να τθερέλα μπουτέ τζενέν τι τραμπίνελ για τι ντεν απαντήσεις. Μπάζιμα, μπέκιμ τι χρειαζίντιβελ τι μπεκλεντίνελ χάνικ μέχρι τι βάντελ εκ τζενό πο βας για τι απαντίνελ. Η συνάθροιση μπέκιμ τι ντικχίντιβελα βαρετή, ντα ανταβά νανέ ιτς ενθαρρυντικός. Σο μπορίνενα τι κερέν; Τι αβέν έτοιμοι τι βάντεν τουμαρό βας μπουτ φαρ. Αντικάς, μπέκιμ τι βοηθίνεν γιαβερέν-ντα τι απαντίνεν πο μπουτ φαρ.

6, 7. Σαρ μπορίνασα μα τι αγχώντιβας αζόμ μπουτ κάνα απαντίνασα;

⁶ Σο αβέλα-πες όμως άμα λέλα-τουμέν άγχος σάντε σο σκεφτίνενα ότι κα ντεν εκ απάντηση; Μπουτ τζενέ νιωθίνενα αντικάς. Όμως, για τι ντεν πο μπουτ ζορ τουμαρέ πφραλέν ντα πφενίν, κα αβέλας λατσσό τι ρόντεν τρόπους για μα τι αγχώντιβεν αζόμ μπουτ. Σαρ μπορίνενα τι κερέν-λες ανταβά;

⁷ Μπέκιμ τι βοηθίνελ-τουμέν μπουτ τι ντικχέν κάποιες συμβουλές σο ισί κο πο πουρανέ Σκοπιές. b Για παράδειγμας, τι προετοιμάντιβεν λατσσές. (Παρ. 21:5) Καζόμ πο λατσσές τζανένα οντουλά σο κα ντικχάς κι συνάθροιση, αζόμ πο εύκολος κα αβέλ τουμένγκε τι βάντεν τουμαρό βας. Επίσης, τι ντεν χουρντέ απαντήσεις. (Παρ. 15:​23· 17:​27) Εκ χουρντί απάντηση κα αγχώνελ-τουμέν πο χάνικ. Εκ χουρντί απάντηση, ντουέ τρινέ λαφίντζαρ, μπορεί τι αβέλ πο εύκολος τι αγαβέν-λα τουμαρέ πφραλά ντα τουμαρέ πφενιά παρά εκ μπαρί απάντηση σο τθερέλα μπουτ σκέψεις. Άμα κα ντεν εκ χουρντί απάντηση τουμαρέ λαφίντζαρ, κα σικαβέν ότι προετοιμαντέν-τουμέν λατσσές ντα ότι αγαντέν ξεκάθαρα οντουλά σο κα ντικχάς οτθέ.

8. Σαρ ντικχέλα ο Ιεχωβά αμαρέ προσπάθειες κάνα κεράσα ο πο λατσσό σο μπορίνασα;

⁸ Σο αβέλα-πες όμως άμα κερένα ανταλά συμβουλές αλλά τουμαρό άγχος πάλι να μουκχέλα-τουμέν τι ντεν πο μπουτ από εκ ή ντούι απαντήσεις; Τι αβέν σίγουροι ότι ο Ιεχωβά κα εκτιμίνελ τουμαρέ μπαρέ προσπάθειες για τι κερέν ο πο λατσσό σο μπορίνενα. (Λουκ. 21:​1-4) Τι κεράβ ο πο λατσσό να μανγκέλα τι βακερέλ ότι ζορισκιαράβα μο νεαυτός αζόμ μπουτ σο ανταβά τασαβέλα-μαν. (Φιλιπ. 4:5) Ντικχέν άμα μπορίνενα τι κερέν πο μπουτ πράγματα, τσσουβέν στόχος τι κερέν-λεν ντα προσευχίντιβεν τι αβέν ήρεμοι. Κι αρχή, ο πρώτος στόχος σο μπορεί τι τσσουβάς μερικοί αμένταρ ισί τι ντας εκ χουρντί απάντηση.

9. Καγιά δυσκολία μπέκιμ τι υπαρχίντιβελ κο μπαρέ κχανγκιριά;

⁹ Άμα τουμαρέ κχανγκιριάτε ισί μπουτ πφραλά, μπέκιμ τι νακχένα εκ γιαβέρ δυσκολία. Μπορεί τι βάντενα πουμαρό βας αζόμ μπουτ πφραλά ντα πφενιά ντα αντικάς τουμέν μα τι τθερέν ι ευκαιρία τι απαντίνεν μπερεκέτι φαρ. Για παράδειγμας, η Ντανιέλ πάντα μπεϊντίνελας τι ντελ απαντήσεις κο  συναθροίσεις. c Ντικχέλα-λες σαρ εκ τρόπος για τι ντελ λατρεία ι Ιεχωβάς, τι ντελ ζορ κο γιαβερά ντα τι ατσσικιαρέλ ο αλήθειες ι Γραφιάκε πι γκοντιάτε. Αλλά κάνα γκιλί εκχέ πο μπαρέ κχανγκιριάτε, να τθερέλας ι ευκαιρία τι ντελ αζόμ μπουτ απαντήσεις. Ισινέ φαρ σο να ντέλας ούτε εκ απάντηση σαρί κι συνάθροιση. «Πφανγκιλό μο γκι», βακερντάς η Ντανιέλ. «Νιωθίναβας ότι χασαρντόμας εκ προνόμιος. Κάνα ανταβά αβέλα-πες παλάλ γιαβερέστε, νακχέλα τι γκοντιάταρ μήπως κερένα-λες επίτηδες».

10. Σο μπορίνασα τι κεράς για τι αβάς πο σίγουροι ότι κα ντας εκ απάντηση;

¹⁰ Μήπως νιωθίνενα τουμέν-ντα σαρ η Ντανιέλ; Άμα βα, μπορεί τι περέν κι παγίδα μα τι προσπαθίνεν ιτς τι ντεν απαντήσεις ντα απλώς τι μπεσέν τι ασουνέν ι συνάθροιση. Αλλά μα τσσιναβέν τι προσπαθίνεν. Σο μπορίνενα τι κερέν; Μπέκιμ τι βοηθίνελ-τουμέν τι ετοιμάνεν μπερεκέτι απαντήσεις ι κάθε συναθροισιάκε. Αντικάς, άμα να κα απαντίνεν κι αρχή, κα τθερέν γιαβερά ευκαιρίες πο σοράν. Κάνα προετοιμάνενα-τουμέν για το μάθημας ι Σκοπιάκο, τι σκεφτίνεν σαρ ταιριάνελα η κάθε παράγραφος ι θεμάσαρ σο τθερέλα ο μάθημας. Άμα κα κερέν-λες ανταβά, μάλλον κα τθερέν κάτι λατσσό τι βακερέν καζόμ κα αβέλ-πες ο μάθημας. Επίσης, κα μπορίνεν τι προετοιμάντιβεν για τι ντεν απαντήσεις κο παράγραφοι σο βακερένα πο αχόρτ αλήθειες, σο ισί πο δύσκολος τι εξηγίνελ-λεν κάποιος. (1 Κορ. 2:​10) Σόσκε; Επειδή κο παράγραφοι οντουλά, μπέκιμ μα τι βάντεν μπουτ τζενέ πουμαρό βας. Σο αβέλα-πες όμως άμα, ενώ κερένα ανταλά συμβουλές, νακχένα μπουτ συναθροίσεις χωρίς τι ντιντιόλ-τουμέν ατζέκ η ευκαιρία τι ντεν εκ απάντηση; Κα μπορίνενας, πριν κατά συνάθροιση, τι τζαν κο πφραλ σο κα κερέλ ο μέρος ντα τι βακερέν λέσκε καλέ ερωτησιάτε κα μανγκένας τι απαντίνεν.

11. Σο βακερέλα αμένγκε τι κεράς ο εδάφιος Φιλιππησίους 2:4;

¹¹ Διαβάνεν Φιλιππησίους 2:4. Ι Ντεβλέσκε πνευμάσαρ, ο απόστολος Παύλος βακερντάς κο Χριστιανοί τι ντικχέν ο λατσσιπέ ι γιαβερένγκο. Σαρ μπορίνασα τι κεράς ανταγιά συμβουλή κο συναθροίσεις; Άμα κα ντας-αμέν γκοντί ότι γιαβερά-ντα μανγκένα τι απαντίνεν, σαρ μανγκάσα αμέν-ντα.

12. Καβά ισί εκ λατσσό τρόπος για τι ντας ζορ ι γιαβερέν κο συναθροίσεις; (Ντικχέν ι φωτογραφία-ντα)

 ¹² Σκεφτίνεν ακαβά: Κάνα ισινέν τουμαρέ αμαλέντζαρ, κα κερένας αζόμ μπουτ λάφι σο να κα μουκχένας-λεν τι βακερέν τίποτα; Σίγουρα νάα! Μανγκένα τι ασουνέν λεν-ντα τι κερέν λάφι. Αντικάς κο συναθροίσεις-ντα, μανγκάσα τι μουκχάς καζόμ πο μπουτ τζενέν αβέλα-πες τι ντεν απαντήσεις. Ντα εκ κατά πο λατσσέ τρόπους για τι ντας ζορ αμαρέ πφραλέν ντα αμαρέ πφενίν ισί τι ντας-λεν ι ευκαιρία τι κερέν λάφι οντουλένγκε σο πακιάνα. (1 Κορ. 10:​24) Για τι ντικχάς σαρ μπορίνασα τι κεράς-λες ανταβά.

13. Σαρ μπορίνασα τι μουκχάς καζόμ πο μπουτ τζενέν αβέλα-πες τι απαντίνεν;

¹³ Ο πρώτος πράγμας σο μπορίνασα τι κεράς ισί τι ντας χουρντέ απαντήσεις, ντα αντικάς τι μουκχάς σαάτι για τι απαντίνεν πο μπουτ τζενέ. Ο πρεσβύτεροι ντα γιαβερά πφραλά σο ισί μπουτ μπρεσά κι αλήθεια μπορίνενα τι ντεν ο λατσσό παράδειγμας. Ατζέ-ντα κάνα ντάσα εκ χουρντί απάντηση, δεν πρέπει τι βακεράς σαρέ ο λάφια σο ισί κι παράγραφος. Άμα κα κεράς-λες ανταβά, να κα ατσσόν-ντα μπουτ πράγματα τι βακερέν ο γιαβερά. Για παράδειγμας, κι παράγραφος σο ισινάμ ακανά ντιντιόνα ντούι συμβουλές: τι ντεν χουρντέ απαντήσεις ντα μα τι βακερέν σαρέ ο λάφια σο ισί κι παράγραφος. Άμα ισινέν ο πρώτος σο κα απαντίνελ κι παράγραφος σο ντικχάσα ακανά, κα μπορίνενας τι βακερέν σάντε εκ πράγμας.

14. Σο κα βοηθίνελ-αμέν τι αγαβάς καζόμ φαρ κα βάντας αμαρό βας; (Ντικχέν ι φωτογραφία-ντα)

¹⁴ Τι αγαβέν καζόμ φαρ πρέπει τι βάντεν τουμαρό βας. Άμα αμαρό βας ισί συνέχεια οπρέ, μπέκιμ τι κεράς ι πφραλές σο κερέλα ο μέρος τι νιωθίνελ υποχρεωμέ τι ντελ-αμέν μπουτ απαντήσεις, παρόλο σο υπαρχίντιβενα γιαβερά σο να τθερένας ατζέκ ι ευκαιρία τι απαντίνεν. Κάτι ασακό κα κερέλας ι γιαβερέν τι χασαρέν πουμαρί ζορ ντα μα τι βάντεν πουμαρό βας.​—Εκκλ. 3:7.

15. (α) Σο πρέπει τι κεράς άμα να τθεράσα ι ευκαιρία τι ντας απάντηση; (β) Σαρ μπορίνελα ο πφραλ σο κερέλα ο μέρος τι σικαβέλ ότι σκεφτίνελα σαριλέν; (Ντικχέν ο πλαίσιος « Άμα Κερένα εκ Μέρος»)

¹⁵ Κάνα μπουτ πφραλά βάντενα πουμαρό  βας, μπέκιμ να αβέλα-πες τι απαντίνας αζόμ φαρ καζόμ κα μανγκάας. Μπάζιμα, ο πφραλ σο κερέλα ο μέρος μπέκιμ μα τι μπορίνελ τι ντελ-αμέν καέκ απάντηση. Ανταβά μπέκιμ τι στεναχωρίνελ-αμέν, αλλά πρέπει τι μαράς-αμέν μα τι αμντίνας ότι τθερέλα κάτι αμέντζαρ.​—Εκκλ. 7:9.

16. Σαρ μπορίνασα τι ντας ζορ οντουλέν σο ντένα απαντήσεις;

¹⁶ Άμα να αβέλα-πες τι απαντίνεν αζόμ μπουτ καζόμ κα μανγκένας, κα μπορίνενας τι ασουνέν προσεκτικά κάνα απαντίνενα ο γιαβερά ντα σοράν κατά συνάθροιση τι ισαρέν-λεν ι απαντησιένγκε σο ντινέ. Τουμαρό ισαριπέ μπορεί τι ντελ τουμαρέ πφραλέν ντα πφενίν αζόμ ζορ καζόμ κα ντένας-λεν τουμαρέ απαντήσεις. (Παρ. 10:​21) Ο ισαριπέ ισί ατζέκ εκ τρόπος για τι ντας ζορ ο εκ ι γιαβερές.

17. (α) Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι ετοιμάνεν απαντήσεις σο ισί λένγκε ηλικιάκε; (β) Σαρ ντικχλάμ κο βίντεος, καλά σταρ πράγματα μπορίνασα τι κεράς για τι ετοιμάνας εκ απάντηση; (Ντικχέν ι υποσημείωση-ντα)

¹⁷ Σο γιαβέρ μπορίνασα τι κεράς για τι ντας ζορ ο εκ ι γιαβερές αμαρέ συναθροισιέντε; Άμα τθερένα τσσαβέν, τι βοηθίνεν-λεν τι ετοιμάνεν απαντήσεις σο ισί λένγκε ηλικιάκε. (Ματθ. 21:​16) Μπάζιμα, εκ μάθημας κερέλα λάφι σοβαρέ πραγματένγκε, σαρ ισί ο προβλήματα κο μπιαβ ή σαρ τι αβάς πάκι κο γιακχά κι Ντεβλέσκε. Ανταλέ μαθηματέντε-ντα, μάλλον  κα υπαρχίντιβεν εκ ή ντούι παράγραφοι σο μπορίνελα τι απαντίνελ εκ τσσαβό. Επίσης, βοηθίνεν τουμαρέ τσσαβέν τι αγαβέν σόσκε μάλλον να κα ντιντιόλ-λεν η ευκαιρία τι απαντίνεν κάθε φαρ σο βάντενα πουμαρό βας. Άμα κα εξηγίνεν-λες λένγκε ανταβά, να κα στεναχωρίντιβεν άμα κα τραμπίντιβεν γιαβερά αντίς λένγκε.​—1 Τιμ. 6:​18. d

18. Σαρ μπορίνασα μα τι ταρτίνας ι προσοχή αμαρέ νεαυτόστε κάνα ντάσα απαντήσεις; (Παροιμίες 27:2)

¹⁸ Σαρέ μπορίνασα τι ετοιμάνας απαντήσεις σο κερένα ι πίστη ι γιαβερένγκι πο ζουρανί, ντένα δόξα ι Ιεχωβάς ντα ζορ αμαρέ πφραλέν ντα πφενίν. (Παρ. 25:​11) Παρόλο σο μπάζιμα μπέκιμ τι βακεράς εκ χουρντί ιστορία αμαρέ ζωγιάταρ, δεν πρέπει τι κεράς μπουτ λάφι αμαρέ νεαυτόσκε. (Διαβάνεν Παροιμίες 27:2· 2 Κορ. 10:​18) Οκιά μπάνταρ, προσπαθίνασα τι ταρτίνας ι προσοχή κο Ιεχωβά, λέσκε Λαφίστε ντα λέσκε λαόστε. (Αποκ. 4:​11) Όμως, άμα η ερώτηση σε εκ παράγραφος μανγκέλα αμένταρ τι βακεράς σαρ νιωθίνασα αμέν, αζομάν ισί σωστός τι κεράς-λες ανταβά. Κα αρακχέν εκ ασακό παράδειγμας κι γιαβέρ παράγραφος ανταλέ μαθημάσκι.

19. (α) Καβά κα αβέλ ο αποτέλεσμας άμα σκεφτίνασα σαρέ οντουλέν σο ισί κι συνάθροιση; (Ρωμαίους 1:​11, 12) (β) Σόσκε μπεϊντίνενα τουμέν ο προνόμιος τι ντεν απαντήσεις κο συναθροίσεις;

¹⁹ Παρόλο σο να υπαρχίντιβενα κανόνες σο βακερένα αμένγκε σαρ τι απαντίνας, σαρέ μπορίνασα τι μαράς-αμέν για τι ντας απαντήσεις σο κα ντεν ζορ. Ανταβά μπέκιμ μανγκέλα τι βακερέλ τι ντας πο μπουτ απαντήσεις. Ή μπέκιμ μανγκέλα τι βακερέλ τι ερεσέν-αμέν ο ευκαιρίες σο τθεράσα τι ντας απαντήσεις, ντα τι χαιρίνας σο ο γιαβερά-ντα τθερένα ι ευκαιρία τι απαντίνεν. Άμα ντικχάσα ο λατσσιπέ ι γιαβερένγκο κο συναθροίσεις, κα μπορίνας σαρέ “τι ενθαρρύντιβας ο εκ κατά γιαβέρ”.​—Διαβάνεν Ρωμαίους 1:​11, 12.