1. Σαρ νιωθίνενα μερικά πφραλά κάνα προσπαθίνενα τι κερέν έργος; (Ντικχέν ι φωτογραφία-ντα)

 ΣΑΡ λαός ι Ιεχωβάσκο, μουτθαβάσα κο γιαβερά ο λατσσέ αμπέρια επειδή μανγκάσα αμαρέ Νταντές σο ισί κο ουρανός ντα μανγκάσα τι βοηθίνας ι τζενέν τι σικλιόν λέσκε. Μπουτ πφραλά ντα πφενιά μπεϊντίνενα μπουτ ο έργος. Γιαβερένγκε όμως, ισί δύσκολος τι αρακχέν χαρά κο έργος. Σόσκε; Μερικοί μπέκιμ ισί μπουτ λατζανέ ντα να τθερένα μπέσα πουμαρέ νεαυτόστε. Γιαβερά να νιωθίνενα λατσσές τι τζαν κο κχερά κι τζενένγκε χωρίς τι καλίνεν-λεν. Μερικοί μπέκιμ νταρένα ότι κα πάλντεν-λεν. Μερικοί χουρντιαρέλα μπερί σικλιλέ ότι νανέ λατσσό τι τθερέν διαφωνίες ι γιαβερέντζαρ. Παρόλο σο μανγκένα μπουτ ι Ιεχωβάς, ανταλά πφραλά ντα πφενιά δυσκολίντιβενα τι βακερέν ο λατσσέ αμπέρια κο τζενέ σο να τζανένα-λεν. Όμως, αγαβένα καζόμ σημαντικός ισί ανταβά έργος ντα οτθάρ νικιόνα μπουτ φαρ. Σίγουρα αβέλα ι Ιεχωβάσκο γκι κάνα ντικχέλα-λεν!

2. Άμα δυσκολίντιβενα τι αρακχέν χαρά κο έργος, σόσκε δεν πρέπει τι χασαρέν τουμαρί ζορ;

² Μήπως μπάζιμα δυσκολίντιβενα τι αρακχέν χαρά κο έργος ιτιρί κατά αισθήματα ανταλά; Άμα βα, μα χασαρέν τουμαρί ζορ. Άμα να τθερένα μπέσα τουμαρέ νεαυτόστε, ανταβά μπέκιμ τι σικαβέλ ότι ισινέν ταπεινοί ντα να μανγκένα τι ταρτίνεν οπρά-τουμέντε ι προσοχή. Σικαβέλα επίσης ότι να μανγκένα τι τθερέν διαφωνίες ι γιαβερέντζαρ. Ντα καέκ τζενό να μανγκέλα τι πάλντεν-λες, ειδικά κάνα προσπαθίνελα τι κερέλ λατσσιπέ κο γιαβερά. Τουμαρό Ντατ σο ισί κο ουρανός τζανέλα λατσσές ο δυσκολίες  σο νακχαβένα ντα μανγκέλα τι ντελ-τουμέν ι βοήθεια σο χρειαζίντιβενα. (Ησ. 41:13) Ανταλέ μαθημάστε, κα ντικχάς παντς συμβουλές σο κα βοηθίνεν-τουμέν τι κερέν κουμάντος ασακέ αισθήματα ντα τι τθερέν χαρά κο έργος.

ΤΙ ΜΟΥΚΧΕΝ Ο ΛΑΦΙ Ι ΝΤΕΒΛΕΣΚΟ ΤΙ ΝΤΕΛ-ΤΟΥΜΕΝ ΖΟΡ

3. Σο βοηθίνελας τον Ιερεμία τι κερέλ έργος;

³ Κατά πουρανέ μπρεσά, ο λάφια ι Ντεβλέσκε ντένας ζορ κο υπηρέτες λέσκε κάνα τθερένας τι κερέν εκ δύσκολος έργος. Σκεφτίνεν για παράδειγμας τον Ιερεμία, σο ισινέ προφήτης. Ο Ιερεμίας σακιντίνελας κάνα ο Ιεχωβά ντινάς-λες ο διορισμός τι κερέλ έργος. Βακερντάς: «Με να τζανάβα σαρ τι κεράβ λάφι, σόσκε ισινόμ τερνό». (Ιερ. 1:6) Παρόλο σο να ντέλας μπέσα πι νεαυτόστε, σαρ νασκιαρντάς ανταλά αισθήματα; Λέλας ζορ κατά λάφια ι Ιεχωβάσκε. Ο Ιερεμίας βακερντάς: «Λέσκε λάφια αβιλέ σαρ γιακ πφαντί αντρέ μι κοκαλέντε, ντα να μπορίναβας γιαβέρ τι ατσσικιαράβ-λεν αντρέ μάντε». (Ιερ. 20:8, 9) Παρόλο σο ο Ιερεμίας τθερέλας εκ δύσκολος τομέας, ο λάφια σο κα βακερέλας κο τζενέ ντένας-λες ι ζορ τι κερέλ ο έργος.

4. Σο αβέλα-πες κάνα διαβάνασα ο Λάφι ι Ντεβλέσκο ντα σκεφτίνασα-λες λατσσές; (Κολοσσαείς 1:9, 10)

⁴ Ο Χριστιανοί λένα ζορ κατά Λάφι ι Ντεβλέσκο. Κάνα ο απόστολος Παύλος γραφιντάς κι κχανγκιρί κο Κολοσσές, βακερντάς ότι κάνα λέσκε πφραλά κα σικλιόνας λατσσές ο θέλημας ι Ιεχωβάσκο, ανταβά κα τσσίντελας-λεν τι «τζουβντιόν τροπόσαρ σο ισί σωστός ι Ιεχωβάσκε» ντα τι “νικαβέν λατσσό καρπός κάθε λατσσέ πραγμάστε”. (Διαβάνεν Κολοσσαείς 1:9, 10) Εκ ανταλέ λατσσέ πραγματένταρ ισί ο λατσσέ αμπέρια. Οτθάρ, κάνα διαβάνασα ο Λάφι ι Ντεβλέσκο ντα σκεφτίνασα-λες λατσσές, μπαριόλα αμαρί πίστη κο Ιεχωβά ντα αγαβάσα ξεκάθαρα σόσκε ισί αζόμ σημαντικός τι μουτθαβάς ο λατσσέ αμπέρια ι Βασιλειάκε.

5. Σαρ κα ωφελίντιβεν καζόμ πο μπουτ αβέλα-πες κάνα διαβάνενα ντα σικλιαρένα-τουμέν κατά Γραφή;

⁵ Για τι ωφελίντιβεν καζόμ πο μπουτ αβέλα-πες κατά Λάφι ι Ντεβλέσκο, πρέπει τι διαβάνεν πφαρές. Τι διαβάνεν, τι σικλιαρέν-τουμέν κατά Γραφή ντα τι σκεφτίνεν λατσσές οντουλά σο διαβάνενα χωρίς τι σιγκιαρέν. Άμα δυσκολίντιβενα τι αγαβέν εκ εδάφιος, μα τζαν πο τελέ. Οκιά μπάνταρ, ρόντεν πο λατσσές ανταλέ εδαφιόσκε κο Ευρετήριο Εκδόσεων Σκοπιάς ή κο Οδηγός Έρευνας για τους Μάρτυρες του Ιεχωβά. Άμα κα σικλιαρέν-τουμέν χωρίς τι σιγκιαρέν, κα αβέν ατζέ πο σίγουροι ότι ο Λάφι ι Ντεβλέσκο ισί μπαγιά. (1 Θεσ. 5:21) Καζόμ πο σίγουροι κα αβέν, αζόμ πο μπουτ κα χαιρίνεν τι μουτθαβέν κο γιαβερά οντουλά σο σικλιλέν.

 ΤΙ ΚΕΡΕΝ ΛΑΤΣΣΙ ΠΡΟΕΤΟΙΜΑΣΙΑ Ι ΕΡΓΟΣΚΕ

6. Σόσκε πρέπει τι κεράς λατσσί προετοιμασία ι εργόσκε;

⁶ Άμα κερένα λατσσί προετοιμασία ι εργόσκε, αζομάν να κα αγχώντιβεν αζόμ μπουτ κάνα κα κερέν λάφι ι γιαβερέντζαρ. Ο Ιησούς βοηθιντάς πι μαθητέν τι προετοιμάντιβεν πριν τι μπουτσσαβέλ-λεν κο έργος. (Λουκ. 10:1-11) Ντα επειδή ο μαθητές κερντέ οντουλά σο σικλιαρντάς-λεν ο Ιησούς, τθερένας λατσσέ αποτελέσματα ντα νιωσάλε μπαρί χαρά.—Λουκ. 10:17.

7. Σαρ μπορίνασα τι κεράς προετοιμασία ι εργόσκε; (Ντικχέν ι φωτογραφία-ντα)

⁷ Σαρ μπορίνασα τι κεράς προετοιμασία ι εργόσκε; Χρειαζίντιβελα τι σκεφτίνας σο κα βακεράς, ντα σαρ κα βακεράς-λες τροπόσαρ σο κα αγαβέν-λες ο τζενέ. Επίσης, ισί λατσσό τι σκεφτίνας ι αντίδραση σο κα τθερέν ο τζενέ κο τομέας ντα τι τθεράς αμαρέ γκοντιάτε σαρ κα απαντίνας κι κάθε περίπτωση. Σοράν, καζόμ κα πλησιάνας ι τζενέν, τι προσπαθίνας τι αβάς άνετοι, τι ασάς ντα τι σικαβάς λένγκε αγάπη.

8. Σόσκε βακεράσα ότι ο Χριστιανοί μοιάζενα κο σκεύη τσικάκε σο βακερντάς ο απόστολος Παύλος;

⁸ Ο απόστολος Παύλος χρησιμοποιηντάς ανταβά παράδειγμας για τι σικαβέλ καλέ πραγμάστε μοιάζασα κάνα τζάσα κο έργος: «Τθεράσα ανταβά θησαυρός αντρέ σε σκεύη τσικάκε». (2 Κορ. 4:7) Καβά ισί ανταβά θησαυρός; Ισί ο έργος σο κεράσα, σο μπορίνελα τι σώνελ τζενέν. (2 Κορ. 4:1) Κον ισί ο σκεύη τσικάκε; Ισί ο υπηρέτες ι Ντεβλέσκε, σο βακερένα ο λατσσέ αμπέρια κο γιαβερά. Κο μπρεσά σο τζουβντιόλας ο Παύλος, ο έμποροι χρησιμοποιήνενας σκεύη σο ισινέ κερντέ από πηλός για τι ακχαρέν πουμαρέ πολύτιμα πράγματα, σαρ ισινέ ο χαμπίματα, η μολ ντα ο λοβέ. Αντικάς, ο Ιεχωβά-ντα ντινάς-αμέν μπέσα για τι μουτθαβάς ο πολύτιμα λατσσέ αμπέρια. Ι Ιεχωβάσκε βοηθειάσαρ, μπορίνασα τι τθεράς ι ζορ σο χρειαζίντιβασα για τι συνεχίνας τι μουτθαβάς ο λατσσέ αμπέρια.

ΤΙ ΠΡΟΣΕΥΧΙΝΤΙΒΕΝ ΓΙΑ ΘΑΡΡΟΣ

9. Σαρ μπορίνασα τι νικίνας ι νταρ κατά τζενέ ή ι νταρ ότι κα πάλντεν-αμέν; (Ντικχέν ι φωτογραφία-ντα)

⁹ Μερικές φορές, μπέκιμ τι νταράσα κατά τζενέ ή τι νταράσα ότι κα πάλντεν-αμέν. Σαρ μπορίνασα τι νακχαβάς ανταγιά δυσκολία; Τσσουβέν σημασία ι προσευχή σο κερντέ ο απόστολοι κάνα βακερντέ λένγκε τι τσσιναβέν τι κερέν έργος. Αντίς τι κερέλ-λεν κουμάντος η νταρ, μανγκλέ κατά Ιεχωβά τι βοηθίνελ-λεν «τι βακερέν [λέσκο] λάφι μπίνταρανες». Ο Ιεχωβά απαντιντάς  αμέσως λένγκε προσευχιάτε. (Πράξ. 4:18, 29, 31) Άμα μπάζιμα η νταρ κατά τζενέ κερέλα-αμέν τι αγχώντιβας, πρέπει αμέν-ντα τι προσευχίντιβας για τι βοηθίνελ-αμέν ο Ιεχωβά. Μανγκέν κατά Ιεχωβά τι μπαριαρέλ τουμαρί αγάπη ι τζενένγκε για μα τι νταρέν τι βακερέν λένγκε ο λατσσέ αμπέρια.

10. Σαρ βοηθίνελα-αμέν ο Ιεχωβά τι αβάς λέσκε Μάρτυρες; (Ησαΐας 43:10-12)

¹⁰ Ο Ιεχωβά ντινάς-αμέν ο διορισμός τι αβάς λέσκε Μάρτυρες ντα ντέλα πο λάφι τι ντελ-αμέν θάρρος. (Διαβάνεν Ησαΐας 43:10-12) Σκεφτίνεν σταρ κατά τρόπους σο κερέλα-λες ανταβά. Πρώτον, ο Ιησούς ισί αμέντζαρ κάθε φαρ σο βακεράσα ο λατσσέ αμπέρια. (Ματθ. 28:18-20) Δεύτερον, ο Ιεχωβά διοριντάς αγγελόν για τι βοηθίνεν-αμέν. (Αποκ. 14:6) Τρίτον, ο Ιεχωβά ντινάς-αμέν πο άγιος πνεύμας σαρ βοηθός για τι ανέλ αμαρέ γκοντιάτε ο πράγματα σο σικλιλάμ. (Ιωάν. 14:25, 26) Τέταρτον, ο Ιεχωβά ντινάς-αμέν αμαρέ πφραλέν ντα αμαρέ πφενίν για τι αβέν αμέντζαρ κο έργος. Ι Ιεχωβάσκε βοηθειάσαρ ντα με τη στήριξη σο ντένα-αμέν ο πφραλά, τθεράσα σο-ντα χρειαζίντιβασα για τι σικαβάς θάρρος ντα τι συνεχίνας ο έργος.

ΤΙ ΑΒΕΝ ΕΤΟΙΜΟΙ ΤΙ ΑΛΛΑΝΕΝ ΝΤΑ ΤΙ ΝΤΙΚΧΕΝ Ο ΕΡΓΟΣ ΣΩΣΤΕ ΤΡΟΠΟΣΑΡ

11. Σαρ κα μπορίνενας τι αρακχέν πο μπουτ τζενέν κο έργος; (Ντικχέν ι φωτογραφία-ντα)

¹¹ Μήπως χασαρένα τουμαρί ζορ κάνα αρακχένα χάνικ τζενέν κο κχερά; Άμα βα, πουτσέν-τουμέν: “Κατέ ισί ακανά ο τζενέ σο μπεσένα μι τομεάστε;” (Πράξ. 16:13) “Μήπως ισί-λεν κι μπουτί ή γκιλέ για ψώνια;” Άμα αβέλα-πες ανταβά, μήπως κα μπορίνενας τι αρακχέν πο μπουτ τζενέν άμα κα κερέν έργος κο ντρομ; Εκ πφραλ, ο Τζόσουα, βακερέλα: «Αρακχλόμ ευκαιρίες τι κεράβ έργος καζόμ πφιράβας κο εμπορικά κέντρα ντα γιαβερέ τθανέντε σο ισί μπουτ τζενέ». Βοβ ντα λέσκι ρομνί, η Μπρίτζετ, αρακχένα επίσης πο μπουτ τζενέν κο κχερά κάνα κερένα έργος νωρίς ιράτ ντα Κυριακή απόγευμας.—Εφεσ. 5:15, 16.

12. Σαρ μπορίνασα τι αγαβάς σο πακιάνα ο τζενέ ή σο απασχολίνελα-λεν;

¹² Άμα ο τζενέ να σικαβένα μπουτ ενδιαφέρον ι λατσσέ αμπερίνγκε, προσπαθίνεν τι αγαβέν σο πακιάνα ή σο απασχολίνελα-λεν. Ο Τζόσουα ντα η Μπρίτζετ, κάνα αρχίνενα τι κερέν λάφι, κερένα ι ερώτηση σο ισί κι ανγκλαϊνί σελίδα εκχέ φυλλαδιόσκι. Φιρειπείν, κάνα  χρησιμοποιήνενα ο φυλλάδιος Σο Πακιάνα Τουμέν ότι Ισί η Αγία Γραφή; βακερένα: «Μερικά τζενέ πακιάνα ότι η Αγία Γραφή ισί εκ βιβλίος κατά Ντεβέλ, ενώ γιαβερά να πακιάνα-λες. Τουμέν, σο βακερένα ανταλέσκε;» Μπουτ φαρ, ανταβά πουτρέλα ο ντρομ για τι κερέν εκ συζήτηση.

13. Σόσκε ισινάμ επιτυχιμέ κο έργος ατζέ-ντα κάνα ο τζενέ να ασουνένα-αμέν; (Παροιμίες 27:11)

¹³ Αμαρί επιτυχία κο έργος να τθερέλα τι κερέλ με το αποτελέσματα σο κα τθεράς. Σόσκε; Επειδή κάνα τζάσα κο έργος, κεράσα οντουβά σο μανγκέλα ο Ιεχωβά ντα λέσκο Τσσαβό τι κεράς—τι βακεράς ο λατσσέ αμπέρια. (Πράξ. 10:42) Ατζέ-ντα κάνα να αρακχάσα καεκχές τι κεράς λάφι ή κάνα ο τζενέ να μανγκένα τι ασουνέν-αμέν, μπορίνασα τι τθεράς χαρά επειδή τζανάσα ότι κεράσα ο γκι αμαρέ Νταντέσκο σο ισί κο ουρανός.—Διαβάνεν Παροιμίες 27:11.

14. Σόσκε μπορίνασα τι χαιρίνας κάνα εκ γιαβέρ πφραλ αρακχέλα εκχέ τζενές κο τομέας σο μανγκέλα τι ασουνέλ;

¹⁴ Μπορίνασα τι τθεράς χαρά-ντα κάνα εκ γιαβέρ πφραλ κο τομέας αρακχέλα εκχέ τζενές σο μανγκέλα τι ασουνέλ. Η Σκοπιά μοιασκιαρντάς αμαρό έργος με την προσπάθεια σο κερένα ο τζενέ για τι αρακχέν εκχέ τσσαβές σο χασάρντιλο. Μπουτ τζενέ ρόντενα λέσκε, ντα τζάνα μπουτέ τθανέντε. Κάνα αρακχένα ι τσσαβές, σαρέ χαιρίνενα, όχι σάντε ο τζενό σο αρακχλάς-λες. Αντικάς-ντα, σαρέ αντρέ κι κχανγκιρί βοηθίνενα για τι κεράς νεβέ μαθητέν. Χρειαζίντιβασα σαρέ ι πφραλέν κι κχανγκιρί για τι μπορίνας τι μπιτισκιαράς ο τομέας, ντα σαρέ χαιρίνενα κάνα εκ τζενό αρχίνελα τι αβέλ κο συναθροίσεις.

ΜΑ ΜΠΙΣΤΡΕΝ ΤΟΥΜΑΡΙ ΑΓΑΠΗ Ι ΙΕΧΩΒΑΣΚΕ ΝΤΑ Ι ΤΖΕΝΕΝΓΚΕ

15. Σαρ βοηθίνενα-αμέν ο εδάφια Ματθαίος 22:37-39 τι μπαριαράς αμαρό ενθουσιασμός ι εργόσκε; (Ντικχέν ι φωτογραφία-ντα)

¹⁵ Μπορίνασα τι μπαριαράς αμαρό ενθουσιασμός ι εργόσκε άμα να μπιστράσα αμαρί αγάπη ι Ιεχωβάσκε ντα ι τζενένγκε. (Διαβάνεν Ματθαίος 22:37-39) Σκεφτίνεν καζόμ χαιρίνελα ο Ιεχωβά κάνα ντικχέλα-αμέν τι κεράς έργος ντα καζόμ χαρά κα λεν ο τζενέ κάνα κα αρχίνεν μελέτη κατά Γραφή! Σκεφτίνεν επίσης ότι ο τζενέ σο κα δεχτίνεν ο λατσσέ αμπέρια κα τθερέν ζωή για πάντα.—Ιωάν. 6:40· 1 Τιμ. 4:16.

16. Σαρ μπορίνασα τι αρακχάς χαρά κο έργος κάνα ισινάμ πφαντέ αμαρέ κχερέστε; Βακερέν παραδείγματα.

¹⁶ Μήπως ναστί νικιόνα τουμαρέ κχερέσταρ; Άμα βα, σκεφτίνεν σο μπορίνενα τι κερέν για  τι σικαβέν αγάπη ι Ιεχωβάσκε ντα ι τζενένγκε. Αντρέ κο Κορωνοϊός, ο Σάμιουελ ντα η Ντάνια ισινέ πφαντέ πουμαρέ κχερέστε. Σαρό ανταβά βακίτι, κερένας συνέχεια έργος κατά τηλέφωνος, γραφίνενας επιστολές ντα κερένας μελέτες αντράλ κατά Zoom. Ο Σάμιουελ τθερέλας καρκίνος, ντα κάθε φαρ σο τζάλας κο νοσοκομείος για τι κερέλ θεραπεία, ντέλας μαρτυρία οντουλέντε σο ντικχέλας. Βοβ βακερέλα: «Κάνα νακχάσα δυσκολίες, μπορεί τι νιωθίνας αγχωμέ, τι κχινιάς ντα τι δοκιμάντιβελ αμαρί πίστη. Χρειαζίντιβελα τι αρακχάς χαρά κι υπηρεσία κι Ιεχωβάσκι». Καζόμ νακχένας ανταγιά δύσκολη κατάσταση, η Ντάνια πελί ντα έπρεπε τι ατσσόλ κο κρεβάτι τριν μασεκά. Σοράν, χρειαζίντιβελας αναπηρικός καροτσάκι σιοβ μασεκά. Βόι βακερέλα: «Προσπαθίναβας τι κεράβ σαρέ οντουλά σο μπορίναβας τι κεράβ. Μπορίναβας τι βακεράβ ο λατσσέ αμπέρια σε εκ νοσοκόμα σο αβέλας τι φροντίνελ-μαν ντα κο τζενέ σο ανένας μάνγκε πράγματα μι κχερέστε. Επίσης, κεράβας σουκάρ συζητήσεις κατά τηλέφωνος εκχέ τζουβλιάσαρ σο κερέλας μπουτί σε εκ εταιρία σο μπικινέλας ιατρικά πράγματα». Παρόλο σο ο πράγματα κι ζωή του Σάμιουελ ντα της Ντάνια αλλαξάλε, βον κερένας οντουβά σο μπορίνενας τι κερέν ντα αρακχένας χαρά ανταλέστε.

17. Σαρ κα βοηθίντιβεν καζόμ πο μπουτ αβέλα-πες κατά συμβουλές ανταλέ μαθημάσκε;

¹⁷ Ο παντς συμβουλές ανταλέ μαθημάσκε κα βοηθίνεν-αμέν πο μπουτ άμα κα κεράς-λεν σαρέ γιεκ. Η κάθε εκ συμβουλή ισί σαρ εκ κατά υλικά σο τθερέλα εκ συνταγή. Κάνα κα τσσουβάς σαρέ ο υλικά σο τθερέλα εκ συνταγή, ο χαμπέ ή ο γλυκός κα τθερέλ εκ λατσσί γεύση. Άμα κα κεράς σαρέ ο συμβουλές, κα αβάς έτοιμοι τι αντιμετωπίνας ο αρνητικά αισθήματα ντα κα τθεράς πο μπουτ χαρά κο έργος.