1, 2. (α) Σαρ τζανάσα ότι μπορίνασα τι ιριάς ο νεβό χαρακτήρας; (β) Καλά ιδιότητες σο τθερέλα ο νεβό χαρακτήρας ντικχάσα κο εδάφια Κολοσσαείς 3:​10-14;

Η ΦΡΑΣΗ «νεβό χαρακτήρας» υπαρχίντιβελα ντούι φαρ κι Αγία Γραφή​—Μετάφραση Νέου Κόσμου. (Εφεσίους 4:​24· Κολοσσαείς 3:​10) Ανταβά χαρακτήρας «κερντιλό αντικάς σαρ μανγκέλα ο Ντεβέλ». Μπορίνασα τι ιριάς ανταβά νεβό χαρακτήρας; Βα. Ο Ιεχωβά κερντάς ι τζενέν τι μοιάζεν λέστε, οτθάρ μπορίνασα τι τθεράς λέσκε σουκάρ ιδιότητες.​—Γένεση 1:​26, 27· Εφεσίους 5:1.

² Ισί αλήθεια ότι, επειδή κληρονομιντάμ ι ατέλεια, σαρέ μπάζιμα μανγκάσα λάθος πράγματα. Επίσης, επηρεάντιβασα κατά γιαβερά τζενέ. Όμως, επειδή ο Ιεχωβά σικαβέλα αμένγκε έλεος ντα βοηθίνελα-αμέν, μπορίνασα τι τθεράς ο χαρακτήρας σο μανγκέλα βοβ τι τθεράς. Για τι μπορίνας τι αβάς αποφασισμέ τι κεράς-λες ανταβά, κα ντικχάς μπερεκέτι ιδιότητες σο τθερέλα ο νεβό χαρακτήρας. (Διαβάνεν  Κολοσσαείς 3:​10-14) Επίσης, κα ντικχάς σαρ μπορίνασα τι σικαβάς ανταλά ιδιότητες κο έργος.

3. Καγιά ισί εκ ιδιότητα σο τθερέλα ο νεβό χαρακτήρας;

³ Ο Παύλος εξηγιντάς ότι εκ σημαντική ιδιότητα σο τθερέλα ο νεβό χαρακτήρας ισί ότι να ξεχωρίνελα ι τζενέν. Βακερντάς: «Να υπαρχίντιβελα Έλληνας ή Ιουδαίος, τζενό σο κερέλα περιτομή ή τζενό σο να κερέλα περιτομή, ξένος, Σκύθης, δούλος, ελεύθερος». * (Ντικχ ι υποσημείωση.) Κι εκκλησία, καέκ δεν πρέπει τι νιωθίνελ ότι ισί πιο λατσσό κατά γιαβερά επειδή ισί από γιαβέρ φυλή ή τθεμ ή επειδή τθερέλα κάποια θέση κι κοινωνία. Σόσκε; Επειδή ισινάμ μαθητές ι Χριστόσκε ντα “σαρέ ισινάμ ενωμέ σαρ εκ τζενό”.​—Κολοσσαείς 3:​11· Γαλάτες 3:28.

4. (α) Σαρ πρέπει τι συμπεριφερίντιβεν κο γιαβερά ο υπηρέτες ι Ιεχωβάσκε; (β) Σο μπορεί τι κερέλ ι Χριστιανόν μα τι αβέν ενωμέ;

⁴ Όταν ιριάσα ο νεβό χαρακτήρας, σεβάνασα ντα ντάσα τιμή σαρέ κο τζενέ, ατζέ-ντα άμα ισί από γιαβέρ φυλή ή άμα μπαριλέ διαφορετικά. (Ρωμαίους 2:​11) Ανταβά μπορεί τι ισί μπουτ δύσκολος μερικέ τθεμέντε. Για παράδειγμας, πριν κάποια μπρεσά κι Νότια Αφρική, η κυβέρνηση τσσουντάς ι τζενέν σο ισινέ από γιαβερά φυλές τι μπεσέν συγκεκριμέ τθανέντε. Ο πιο μπουτ τζενέ οντουλέ τθεμέστε, αλλά εμ ο Μάρτυρες-ντα, συνεχίνενα τι μπεσέν οντουλέ τθανέντε. Ο Κυβερνών Σώμας μανγκέλας τι βοηθίνελ ι πφραλέν τι “σικαβέν πιο μπουτ αγάπη”. Οτθάρ, κο Οκτώβριος 2013 κανονιντέ κάτι σο κα βοηθίνελας ι πφραλέν σο ισινέ από γιαβερά φυλές τι γνωρίντιβεν πιο λατσσές.​—2 Κορινθίους 6:13.

5, 6. (α) Σο κανονισάλο εκχέ τθεμέστε για τι αβέλ ο λαός ι Ντεβλέσκο πιο ενωμέ; (Ντικχ ι φωτογραφία σο ισί κι αρχή.) (β) Καλά ισινέ ο αποτελέσματα;

⁵ Ο πφραλά κανονιντέ κάποια σαββατοκύριακα τι γκιντίντιβεν ο Μάρτυρες ντουέ διαφορετικέ εκκλησιένταρ, σο κερένας λάφι γιαβέρ τσσιπ ή ισινέ από γιαβέρ φυλή, για τι κερέν πράγματα γιεκ. Πφραλά ντα πφενιά κατά ντούι-ντα εκκλησίες νικιόνας γιεκ κο έργος, παρακολουθίνενας γιεκ ο συναθροίσεις ντα τζάνας ο εκ κο κχερ κι γιαβερέσκο. Μπουτ εκκλησίες κερντέ-λες ανταβά, ντα ο γραφείος τμήματος λιντάς λατσσέ αμπέρια. Ανταβά κερντάς εντύπωση ατζέ-ντα ι τζενένγκε σο νανέ Μάρτυρες. Για παράδειγμας, εκ παπάζι βακερντάς: «Να ισινόμ Μάρτυρας, αλλά πρέπει τι βακεράβ ότι ο έργος σο κερένα ισί μπουτ λατσσές οργανωμέ ντα τθερένα ενότητα, παρόλο σο ισινέν από γιαβερά φυλές». Σαρ νιωσάλε ο πφραλά ντα ο πφενιά ανταλέσκε;

⁶ Κι αρχή, η Νόμα, εκ πφεν σο κερέλα λάφι ι τσσιπ κόζα, λατζάλας μπουτ τι καλίνελ πι κχερέστε ι πφραλέν κατά αγγλική εκκλησία. Αλλά αφού νικίστιλι κο έργος πφραλέντζαρ ντα πφενίντζαρ σο να ισινέ καλιαρντέ ντα γκιλί λένγκε κχερέντε, νιωθίνελας πιο άνετα. Βόι βακερντάς:  «Ισί φυσιολογικά τζενέ σαρ ισινάμ αμέν!» Οτθάρ, όταν ο πφραλά ντα ο πφενιά κατά αγγλική εκκλησία γκιλέ για έργος ι πφραλέντζαρ σο κερένας λάφι ι τσσιπ κόζα, η Νόμα καλιντάς πι κχερέστε μερικέ οντουλέ πφραλένταρ για τι χαν. Κερντάς λάκε μπαρί εντύπωση όταν ντικχλάς ότι εκ πφραλ οντουλένταρ σο καλιντάς, εκ πρεσβύτερος σο να ισινέ καλιαρντό, μπεσλό σε εκ πλαστικός τελάρος. Χάρη οντουλέσταρ σο κανονισάλο, μπουτ πφραλά κερντέ νεβέ αμαλέν ντα συνεχίνενα τι γνωρίνεν γιαβερέ πφραλέν σο ισί διαφορετικοί λένταρ.

7. Σόσκε πρέπει πάντα τι σικαβάς συμπόνια;

⁷ Μέχρι τι καταστραφίντιβελ ι Μπενγκέσκο ντουνιάς, ι Ιεχωβάσκο λαός κα νακχέλ δοκιμασίες. Η ανεργία, ο νασφαλίματα, ο διωγμός, ο φυσικές καταστροφές, ο τσορίματα ντα γιαβερά δυσκολίες μπορεί τι επηρεάνεν-αμέν. Για τι βοηθίνας ο εκ ι γιαβερές κο δοκιμασίες, πρέπει τι τθεράς αληθινή συμπόνια, δηλαδή τι τζιτζίνας μπαγιά ι γιαβερένγκε. Άμα τζιτζίνασα ι γιαβερένγκε με αγάπη, κα σικαβάς λένγκε λατσσιπέ. (Εφεσίους 4:​32) Ανταλά ισί ατζέ μερικές ιδιότητες σο τθερέλα ο νεβό χαρακτήρας. Κα βοηθίνεν-αμέν τι μοιάζας κο Ντεβέλ ντα τι ντας παρηγοριά κο γιαβερά.​—2 Κορινθίους 1:3, 4.

8. Καλά λατσσέ πράγματα μπορίνενα τι αβέν-πες όταν τζιτζίνασα ντα σικαβάσα λατσσιπέ σαρέ οντουλένγκε σο ισί κι εκκλησία; Βακερέν εκ παράδειγμας.

⁸ Σαρ μπορίνασα τι σικαβάς πιο μπουτ λατσσιπέ οντουλένγκε σο ισί αμαρέ εκκλησιάτε ντα αβιλέ γιαβερέ τθεμέσταρ ή νακχένα δύσκολα; Μανγκάσα τι καλωσορίνας-λεν, τι αβάς αμαλά λέντζαρ ντα τι βοηθίνας-λεν τι αγαβέν ότι χρειαζίντιβασα-λεν αμαρέ εκκλησιάτε. (1 Κορινθίους 12:​22, 25) Για παράδειγμας, ο Ντάνικαρλ νασλό κατά Φιλιππίνες ντα γκιλό κι Ιαπωνία. Επειδή ισινέ ξένος, να συμπεριφερίντιβενας λέσκε κι μπουτί αζόμ λατσσές σαρ κο γιαβερά εργάτες. Σοράν, γκιλό σε εκ συνάθροιση σο κερένας ο Μάρτυρες του Ιεχωβά. Ο Ντάνικαρλ βακερντάς: «Σχεδόν σαρέ οτθέ ισινέ Ιάπωνες, όμως καλωσοριντέ-μαν αντράλ πουμαρέ γκίσταρ, σαρ τι τζανένας-μαν από πριν». Ο λατσσιπέ σο συνεχίνενας τι σικαβέν λέσκε ο πφραλά βοηθιντάς-λες τι πλησιάνελ ι Ιεχωβάς. Σιγά σιγά, ο Ντάνικαρλ μπολντιλό ντα αντιβές ισί πρεσβύτερος. Ο γιαβερά πρεσβύτεροι ισί χαρούμενοι σο βοβ ντα λέσκι ρομνί, η Τζένιφερ, ισί λένγκε εκκλησιάτε ντα βακερένα: «Τθερένα εκ μπουτ απλή ζωή σαρ σκαπανείς ντα ισί εκ μπουτ λατσσό παράδειγμας επειδή τσσουβένα πρώτα ι Βασιλεία».​—Λουκάς 12:31.

9, 10. Βακερέν μερικά παραδείγματα σο σικαβένα ο λατσσέ αποτελέσματα σο αβένα όταν τζιτζίνασα ι γιαβερένγκε κο έργος.

⁹ Τθεράσα ι ευκαιρία «τι κεράς ο λατσσό σαριλένγκε» όταν βακεράσα ο λατσσέ αμπέρια ι Βασιλειάκε. (Γαλάτες 6:​10) Μπουτ Μάρτυρες τζιτζίνενα για το μετανάστες ντα προσπαθίνενα τι σικλιόν λένγκι τσσιπ. (1 Κορινθίους 9:​23) Λένγκε προσπάθειες αντέ λατσσέ αποτελέσματα. Για παράδειγμας, εκ σκαπάνισσα κι Αυστραλία, η Τίφανι, σικλιλί ι τσσιπ σουαχίλι για τι βοηθίνελ εκχέ εκκλησιάτε κο Μπρίσμπεϊν, σο κερένα λάφι οντιά τσσιπ. Παρόλο σο έπρεπε τι κερέλ μπαρέ προσπάθειες για τι σικλιόλ ι τσσιπ, λάκι ζωή ισί πφερντί νόημας. Η Τίφανι βακερέλα: «Άμα μανγκέσα τι απολαμβάνες ο έργος, ο πιο λατσσό πράγμας σο κα μπορίνεας τι  κερές ισί τι υπηρετίνες εκχέ εκκλησιάτε σο κερένα λάφι γιαβέρ τσσιπ. Ισί σαρ τι κερέσα ταξίδι αλλά χωρίς τι νασές τι τθεμέσταρ. Σικλιόσα πφραλέν ντα πφενίν σο ισί σαρό κατά ντουνιάς ντα ντικχέσα πασάλ ι ενότητα σο τθερένα».

¹⁰ Εκ φαμιλί κι Ιαπωνία κερντάς κάτι ασακό. Η Σάκικο, η τσσάι οντουλέ φαμιλιάκι, βακερέλα: «Μπουτ φαρ κο έργος αρακχάας μεταναστέν κατά Βραζιλία. Όταν σικαβάας λένγκε εδάφια λένγκε Γραφιάταρ κι πορτογαλική τσσιπ, σαρ για παράδειγμας ο εδάφια Αποκάλυψη 21:3, 4 ή Ψαλμός 37:​10, 11, 29, ντένας προσοχή ντα μερικές φορές ροβένας». Οντιά φαμιλί τζιτζίνελας οντουλέ τζενένγκε ντα μανγκέλας τι βοηθίνελ-λεν τι σικλιόν ι αλήθεια. Οτθάρ, αρχισάλε τι σικλιόν πορτογαλικά σαρ φαμιλί. Σοράν, οντιά φαμιλί βοηθιντάς τι αβέλ εκ πορτογαλική εκκλησία. Σαρέ ανταλά μπρεσά, βοηθιντέ μπουτέ μεταναστέν τι αρχίνεν τι υπηρετίνεν ι Ιεχωβάς. Η Σάκικο βακερέλα: «Έπρεπε τι κεράς μπαρέ προσπάθειες για τι σικλιάς πορτογαλικά, αλλά σαρέ οντουλά σο κερντάμ νανέ τίποτα ανγκλάλ κο ευλογίες σο τθεράσα. Ευχαριστίνασα αντράλ αμαρέ γκίσταρ ι Ιεχωβάς».​—Διαβάνεν Πράξεις 10:​34, 35.

11, 12. (α) Σόσκε μανγκάσα τι ιριάς ο νεβό χαρακτήρας; (β) Σο κα βοηθίνελ-αμέν τι ατσσάς ταπεινοί;

¹¹ Μανγκάσα τι ιριάς ο νεβό χαρακτήρας για τι δοξάνας ι Ιεχωβάς, όχι για τι ισαρέν-αμέν ο γιαβερά. Ντεν-τουμέν γκοντί ότι ατζέ-ντα εκ τέλειος άγγελος αβιλό υπερήφανος ντα αμαρτιντάς. (Ντικχ Ιεζεκιήλ 28:​17) Αμέν ισινάμ ατελείς, άρα ισί ατζέ πιο δύσκολος τι ατσσικιαράς ντουρ ι υπερηφάνεια. Αλλά μπορίνασα τι ιριάς ι ταπεινότητα. Σο κα βοηθίνελ-αμέν τι κεράς-λες ανταβά;

¹² Εκ πράγμας σο κα βοηθίνελ-αμέν τι αβάς ταπεινοί ισί τι διαβάνας ο Λάφι ι Ντεβλέσκο κάθε ντιβές ντα τι σκεφτίνας οντουλά σο διαβάνασα. (Δευτερονόμιο 17:​18-20) Ισί μπουτ σημαντικός τι σκεφτίνας οντουλά σο σικλιαρντάς-αμέν ο Ιησούς ντα ι ταπεινότητα σο τθερέλας. (Ματθαίος 20:​28) Ο Ιησούς ισινέ αζόμ ταπεινός σο τθοντάς ο πιντρέ πι αποστολένγκε. (Ιωάννης 13:​12-17) Εκ γιαβέρ πράγμας σο μπορίνασα τι κεράς ισί τι προσευχίντιβας κο Ιεχωβά για τι ντελ-αμέν πο πνεύμας. Λέσκο πνεύμας μπορίνελα τι βοηθίνελ-αμέν τι νικαβάς ριζάσαρ αμαρέ γκοντιάταρ ότι ισινάμ πιο λατσσέ  κατά γιαβερά.​—Γαλάτες 6:3, 4· Φιλιππησίους 2:3.

13. Σο ευλογίες τθεράσα όταν ισινάμ ταπεινοί;

¹³ Διαβάνεν Παροιμίες 22:4. Ο Ιεχωβά μανγκέλα αμένταρ τι αβάς ταπεινοί. Η ταπεινότητα ανέλα μπουτ ευλογίες. Όταν ισινάμ ταπεινοί, η εκκλησία κα τθερέλ πιο μπουτ ειρήνη ντα κα αβέλ ενωμέ. Επίσης, ο Ιεχωβά κα σικαβέλ αμένγκε ο λατσσιπέ σο να αξίνασα-λες. Ο απόστολος Πέτρος βακερντάς: «Σαρέ τι σικαβέν ταπεινότητα ο εκ ι γιαβερέσκε, επειδή ο Ντεβέλ να μανγκέλα οντουλέν σο ισί υπερήφανοι, αλλά κο ταπεινοί σικαβέλα λατσσιπέ σο να αξίνενα-λες».​—1 Πέτρου 5:5.

14. Κον ντέλα-αμέν ο πιο λατσσό παράδειγμας για τι σικαβάς ηρεμία ντα υπομονή;

¹⁴ Κο ντουνιάς αντιβές, άμα εκ τζενό ισί ήρεμος ντα τθερέλα υπομονή, ο γιαβερά αμντίνενα ότι ισί αδύναμος. Αλλά ανταβά νανέ μπαγιά. Ανταλά σουκάρ ιδιότητες αβένα κατά Ιεχωβά, σο ισί ο πιο Ζουρανό κο σύμπαν. Βοβ τθερέλα μπαρί ηρεμία ντα υπομονή, οτθάρ ντέλα-αμέν ο πιο λατσσό παράδειγμας για τι κεράς αμέν-ντα ο ίδιος. (2 Πέτρου 3:9) Για παράδειγμας, σκεφτίνεν καζόμ υπομονή κερέλας ο Ιεχωβά όταν χρησιμοποιηντάς πι αγγελόν για τι απαντίνελ κο Αβραάμ ντα κο Λωτ. (Γένεση 18:​22-33· 19:​18-21) Ντα σκεφτίνεν ι υπομονή σο κερέλας ο Ιεχωβά για πιο μπουτ από 1.500 μπρεσά με το λαός Ισραήλ σο να ντέλας καν.​—Ιεζεκιήλ 33:11.

15. Σαρ σικαντάς ο Ιησούς ηρεμία ντα υπομονή;

¹⁵ Ο Ιησούς ισινέ ήρεμος. (Ματθαίος 11:​29) Σικαβέλας μπαρί υπομονή όταν λέσκε μαθητές κερένας λάθη. Όταν ισινέ κι πφουβ, μπουτ φαρ κρίνενας-λες ντα κατηγορίνενας-λες σινανέ. Όμως, νταϊντιντάς με ηρεμία ντα υπομονή μέχρι κο μεριπέ. Όταν ο Ιησούς νακχέλας μπαρί ντουκχ οπράλ κο κας σο βασανιντέ-λες, μανγκλάς πι Νταντέσταρ τι συγχωρίνελ ι τζενέν σο μουνταρένας-λες. Βοβ βακερντάς: «Να τζανένα σο κερένα». (Λουκάς 23:​34) Ατζέ-ντα όταν ο Ιησούς ισινέ μπουτ αγχωμέ ή ντουκχάλας, σικαβέλας ηρεμία ντα υπομονή.​—Διαβάνεν 1 Πέτρου 2:​21-23.

16. Σαρ μπορίνασα τι σικαβάς ηρεμία ντα υπομονή;

¹⁶ Ο Παύλος βακερντάς εκ τρόπος σο μπορίνασα τι σικαβάς ηρεμία ντα υπομονή όταν γραφιντάς: «Τι νταϊντίνεν ο εκ ι γιαβερές ντα τι συγχωρίνεν ο εκ ι γιαβερές αντράλ τουμαρέ γκίσταρ, άμα κάποιος τθερέλα παράπονος εκχέ τζενέσταρ. Σαρ ο Ιεχωβά συγχωριντάς-τουμέν αντράλ πι γκίσταρ, αντικάς τι συγχωρίνεν τουμέν-ντα». (Κολοσσαείς 3:​13) Για τι συγχωρίνας ι γιαβερέν, πρέπει τι αβάς ήρεμοι ντα τι τθεράς υπομονή. Ανταβά κα μπαριαρέλ ντα κα ατσσικιαρέλ ι ενότητα κι εκκλησία.

17. Σόσκε ισί σημαντική η ηρεμία ντα η υπομονή;

¹⁷ Ο Ιεχωβά μανγκέλα αμένταρ τι αβάς ήρεμοι ντα τι τθεράς υπομονή ι γιαβερέντζαρ. Άμα μανγκάσα τι τζουβντιάς κο νεβό ντουνιάς, πρέπει τι τθεράς ανταλά ιδιότητες. (Ματθαίος 5:5· Ιακώβου 1:​21) Όταν ισινάμ ήρεμοι ντα τθεράσα υπομονή, δοξάνασα ι Ιεχωβάς ντα βοηθίνασα ι γιαβερέν τι κερέν ο ίδιος.​—Γαλάτες 6:1· 2 Τιμόθεο 2:​24, 25.

18. Σαρ η αγάπη να μουκχέλα-αμέν τι ξεχωρίνας ι τζενέν;

¹⁸ Σαρέ ο ιδιότητες σο ντικχλάμ τθερένα τι κερέν με την αγάπη. Για παράδειγμας, ο μαθητής Ιάκωβος έπρεπε τι ντελ συμβουλή ι πφραλέν επειδή να συμπεριφερίντιβενας κο τσορορέ αζόμ λατσσές καζόμ συμπεριφερίντιβενας κο χουλανέ. Εξηγιντάς ότι ανταβά τζάλας κόντρα κι Ντεβλέσκι εντολή σο βακερέλα τι “μανγκάς ι τζενές σο ισί πασέ αμέντε σαρ μανγκάσα αμαρό νεαυτός”. Σοράν βακερντάς: «Άμα ξεχωρίνενα ι τζενέν, κερένα αμαρτία». (Ιακώβου 2:8, 9) Άμα μανγκάσα ι τζενέν, να κα κεράς πέρα καεκχές επειδή ισί από γιαβέρ φυλή, νανέ μορφωμέ ή να τθερέλα σημαντική θέση κι κοινωνία. Πρέπει αντράλ αμαρέ γκίσταρ μα τι ξεχωρίνας ι τζενέν ντα όχι τι προσποιήνας-αμέν.

19. Σόσκε ισί σημαντικός τι ιριάς ι αγάπη;

¹⁹ Επίσης, «η αγάπη κερέλα υπομονή», «σικαβέλα λατσσιπέ» ντα «να πφερντιόλα μπαρικανιπέ». (1 Κορινθίους 13:4) Πρέπει τι τθεράς υπομονή ντα τι αβάς λατσσέ ντα ταπεινοί για τι συνεχίνας τι βακεράς ο λατσσέ αμπέρια κο τζενέ. (Ματθαίος 28:​19) Ανταλά ιδιότητες βοηθίνενα-αμέν τι τθεράς λατσσέ σχέσεις σαρέ αμαρέ πφραλέντζαρ ντα πφενίντζαρ κι εκκλησία. Όταν σαρέ σικαβάσα ασακί αγάπη, αμαρέ εκκλησίες κα αβέν ενωμέ ντα κα ντεν δόξα κο Ιεχωβά. Επίσης, ο γιαβερά κα ντικχέν ανταγιά ενότητα ντα κα μανγκέν τι αβέν κι αλήθεια. Οτθάρ, ο τελευταία λάφια σο βακερέλα η Γραφή για το νεβό χαρακτήρας ισί: «Εκτός σαρέ ανταλένταρ ιρίν ι αγάπη, επειδή ενώνελα τέλεια ι τζενέν».​—Κολοσσαείς 3:14.

20. (α) Σο πρέπει τι πουτσάς αμαρό νεαυτός, ντα σόσκε; (β) Καβά σουκάρ πράγμας μπεσάσα τι αβέλ-πες;

²⁰ Ο κάθε εκ πρέπει τι πουτσέλ πο νεαυτός: “Σο γιαβερά αλλαγές πρέπει τι κεράβ για τι νικαβάβ οπρά-μάνταρ ντα τι ατσσικιαράβ ντουρ ο πουρανό χαρακτήρας;” Πρέπει τι κεράς προσευχή κο Ιεχωβά ντα τι μολίνας-λες τι βοηθίνελ-αμέν. Χρειαζίντιβελα τι προσπαθίνας μπουτ τι αλλάνας ο λάθος πράγματα σο σκεφτίνασα ντα κεράσα για τι μπορίνας τι “νακχάς κι βασιλεία κι Ντεβλέσκι”. (Γαλάτες 5:​19-21) Πρέπει επίσης τι πουτσάς αμαρό νεαυτός: “Συνεχίναβα τι διορθώναβ ο τρόπος σο σκεφτίναβα για τι νταβ χαρά ι Ιεχωβάς;” (Εφεσίους 4:​23, 24) Ισινάμ ατελείς, οτθάρ πρέπει τι συνεχίνας τι κεράς μπαρέ προσπάθειες για τι ιριάς ντα τι ατσσικιαράς οπρ’ αμέντε ο νεβό χαρακτήρας. Ανταγιά ισί εκ προσπάθεια σο να σταματίνελα. Καζόμ σουκάρ κα αβέλ η ζωή όταν ο κάθε τζενό κα ιρίλ ο νεβό χαρακτήρας ντα κα τθερέλ ο τέλειες ιδιότητες ι Ιεχωβάσκε!