Ο ΙΕΧΩΒΑ ντινάς πο πνεύμας κο απόστολος Παύλος για τι γραφίνελ εννιά ιδιότητες, σο αβένα κατά άγιος πνεύμας. (Γαλάτες 5:​22, 23) Σαρέ γιεκ, ανταλά σουκάρ ιδιότητες βακέρντιβενα «ο καρπός του πνεύματος». * (Ντικχ ι υποσημείωση.) Επίσης, ανταβά καρπός ισί εκ κατά πράγματα σο πρέπει τι τθερέν ο Χριστιανοί για τι ιρίν «ο νεβό χαρακτήρας». (Κολοσσαείς 3:​10) Σαρ εκ δέντρος κα νικαβέλ φρούτα κάνα ποτίντιβελα σωστά, αντικάς-ντα εκ τζενό κα σικαβέλ ανταλά σουκάρ ιδιότητες κάνα τθερέλα ο άγιος πνεύμας πι ζωγιάτε.​—Ψαλμός 1:​1-3.

Η πρώτη ιδιότητα σο βακερντάς ο Παύλος ισί η αγάπη. Καζόμ σημαντική ισί ανταγιά ιδιότητα; Ο Παύλος βακερντάς ότι άμα να τθερέλας αγάπη, να ισινέ «τίποτα». (1 Κορινθίους 13:2) Αλλά σο ισί η αγάπη, ντα σαρ μπορίνασα τι μπαριαράς ντα τι σικαβάς ανταγιά ιδιότητα κάθε ντιβές;

Παρόλο σο ισί μπουτ δύσκολος τι εξηγίνας σο ισί ακριβώς η αγάπη, η Αγία Γραφή βακερέλα σαρ σκεφτίνελα ντα σο κερέλα εκ τζενό σο σικαβέλα αγάπη. Για παράδειγμας, εκ τζενό σο σικαβέλα αγάπη “κερέλα υπομονή, σικαβέλα λατσσιπέ ντα χαιρίνελα με την αλήθεια”. Όταν εκ τζενό τθερέλα αγάπη, «αντιχίνελα-λεν σαρέ, πακιάλα-λεν σαρέ, νταϊντίνελα-λεν σαρέ, τθερέλα ελπίδα σαρέ ι πραγματένγκε». Μανγκέλα αντράλ πι γκίσταρ ι γιαβερέν, πφαμπόλα λένγκε μπαγιά ντα ισί εκ λατσσό αμάλ. Όμως, όταν εκ τζενό να τθερέλα αγάπη, αβέλα μπαρικανό, εγωιστής, ζηλίνελα, κερέλα μπέτι πράγματα ντα να συγχωρίνελα. Αμέν αντί τι σικαβάς ασακέ μπέτι ιδιότητες, μανγκάσα τι σικαβάς ι γιαβερένγκε αληθινή αγάπη, σο «να ντικχέλα πο συμφέρον».​—1 Κορινθίους 13:​4-8.

«Ο Ντεβέλ ισί αγάπη». (1 Ιωάννη 4:8) Σαρέ οντουλά σο λατσσαρντάς αλλά εμ οντουλά σο κερέλα σικαβένα-λες ανταβά. Ο πιο μπαρό πράγμας σο κερντάς ο Ντεβέλ για τι σικαβέλ πι αγάπη ι τζενένγκε ισινέ ότι μπουτσσαντάς ι Ιησούς κι πφουβ τι τσσίντελ μπουτ ντα τι μερέλ αμένγκε. Ο απόστολος Ιωάννης βακερντάς: «Ανταλέσταρ σικάντιλι αμένγκε η αγάπη ι Ντεβλέσκι, σόσκε ο Ντεβέλ μπουτσσαντάς πι μοναδικέ Τσσαβές κο ντουνιάς για τι τθεράς αμέν ζωή λέσταρ. Η αγάπη τθερέλα τι κερέλ ανταλέσαρ: Όχι ότι αμέν μανγκλάμ ι Ντεβλές, αλλά ότι βοβ μανγκλάς-αμέν ντα μπουτσσαντάς πι Τσσαβές σαρ θυσία αμαρέ αμαρτιένγκε». (1 Ιωάννη 4:9, 10) Επειδή ο Ντεβέλ σικαντάς αμένγκε αγάπη, αμαρέ αμαρτίες μπορίνενα τι συγχωρίντιβεν ντα μπορίνασα τι τθεράς ελπίδα ντα ζωή.

Ο Ιησούς σικαντάς πι αγάπη ι τζενένγκε κάνα ντινάς πι ζωή για τι κερέλ ο θέλημας ι Ντεβλέσκο. Ο απόστολος Παύλος βακερέλα αμένγκε: «Ανταλέ “θελημάσαρ” αβιλάμ πάκι επειδή ο σώμας ι Ιησού Χριστόσκο θυσιασάλο εκ φαρ για πάντα». (Εβραίους 10:9, 10) Καέκ τζενό να κα μπορίνελας τι σικαβέλ πιο μπαρί αγάπη. Ο Ιησούς βακερντάς: «Καέκ να τθερέλα πιο μπαρί αγάπη ανταλάταρ, τι ντελ πι ζωή πι αμαλένγκε». (Ιωάννης 15:​13) Όμως, μπορίνενα ατελείς τζενέ τι σικαβέν ι αγάπη σο σικαντάς ο Ιεχωβά ντα ο Ιησούς; Βα! Για τι ντικχάς σαρ.

Ο Παύλος βακερέλα αμένγκε: «Τι μοιάζεν κο Ντεβέλ, αφού ισινέν λέσκε αγαπημέ τσσαβέ, ντα τι πφιρέν με αγάπη, σαρ μανγκλάς-αμέν ο Χριστός-ντα ντα ντινάς πο νεαυτός αμένγκε». (Εφεσίους 5:1, 2) Σο μανγκέλα τι βακερέλ τι “πφιράς με αγάπη”; Μανγκέλα τι βακερέλ τι σικαβάς αγάπη συνέχεια. Να βακεράσα απλά ότι μανγκάσα ι γιαβερέν. Σικαβάσα-λες οντουλέντζαρ σο κεράσα. Ο Ιωάννης γραφιντάς: «Μο τσσαβέ, πρέπει τι μανγκάς, όχι λαφίντζαρ ούτε μόσαρ, αλλά οντουλέντζαρ σο κεράσα ντα με αλήθεια». (1 Ιωάννη 3:​18) Για παράδειγμας, βακεράσα ο «λατσσέ αμπέρια ι βασιλειάκε» επειδή μανγκάσα ι Ιεχωβάς ντα ι γιαβερέ τζενέν. (Ματθαίος 24:​14· Λουκάς 10:​27) Επίσης, “πφιράσα με αγάπη” όταν κεράσα υπομονή, όταν σικαβάσα λατσσιπέ ντα όταν συγχωρίνασα. Κεράσα αμαρέ ζωγιάτε οντουβά σο βακερέλα η Γραφή: «Σαρ ο Ιεχωβά συγχωριντάς-τουμέν αντράλ πι γκίσταρ, αντικάς τι συγχωρίνεν τουμέν-ντα».​—Κολοσσαείς 3:13.

Όμως, άμα ντάσα συμβουλή ή διορθώνασα γιαβερέν, ανταβά να μανγκέλα τι βακερέλ ότι να σικαβάσα αγάπη. Για παράδειγμας, για τι ησυχάνελ εκ χουρντό σο ροβέλα, μπουτ νταντά ντα νταγιά μπορεί απλά τι κερέν σο-ντα μανγκέλα ο χουρντό. Αλλά ο ντατ ντα η ντάι σο μανγκένα μπαγιά πουμαρέ τσσαβές κα αβέν σταθεροί αζομάν σο κα χρειαζίντιβελ. Αντικάς-ντα, παρόλο σο ο Ντεβέλ ισί αγάπη, «οντουλές σο μανγκέλα ο Ιεχωβά, διορθώνελα-λες». (Εβραίους 12:6) Άρα σικαβάσα αγάπη όταν διορθώνασα ι γιαβερέν με το σωστός τρόπος όταν χρειαζίντιβελα. (Παροιμίες 3:​11, 12) Όμως, πρέπει τι ντας-αμέν γκοντί ότι σαρέ ισινάμ ατελείς ντα μπουτ φαρ να καταφερίνασα τι σικαβάς αγάπη. Άρα, σαρέ μπορίνασα τι σικαβάς πιο μπουτ αγάπη. Σαρ μπορίνελα τι αβέλ-πες ανταβά; Για τι ντικχάς τριν τρόπους.

Πρώτον, μανγκέν κατά Ντεβέλ τι ντελ-τουμέν πο άγιος πνεύμας, σο μπαριαρέλα ι αγάπη. Ο Ιησούς βακερντάς ότι ο Ιεχωβά ντέλα «άγιος πνεύμας οντουλέντε σο μανγκένα λέσταρ». (Λουκάς 11:​13) Άρα μπορίνασα τι αβάς σίγουροι ότι, άμα προσευχίντιβασα για άγιος πνεύμας ντα μουκχάσα-λες τι βοηθίνελ-αμέν, κα σικαβάς ατζέ πιο μπουτ αγάπη. (Γαλάτες 5:​16) Για παράδειγμας, άμα ισινέν πρεσβύτερος, μπορίνενα τι μανγκέν ο άγιος πνεύμας για τι βοηθίνελ-τουμέν τι σικαβέν αγάπη όταν ντένα συμβουλές κατά Γραφή κο γιαβερά. Ή άμα τθερένα τσσαβέν, μπορίνενα τι μανγκέν ο άγιος πνεύμας ι Ντεβλέσκο για τι βοηθίνελ-τουμέν τι διορθώνεν τουμαρέ τσσαβέν, όχι χολιάσαρ, αλλά με αγάπη.

Δεύτερον, σκεφτίνεν προσεκτικά σαρ σικαντάς ο Ιησούς αγάπη ατζέ-ντα όταν συμπεριφερίντιβενας λέσκε με μπέτι τρόπος. (1 Πέτρου 2:​21, 23) Άμα κάποιος προσβαλίνελα-τουμέν ή αδικίνελα-τουμέν, πουτσέν τουμαρό νεαυτός: “Σο κα κερέλας ο Ιησούς;” Εκ πφεν, η Λι, αγαντάς ότι ανταγιά ερώτηση βοηθιντάς-λα τι σκεφτίνελ πριν τι κερέλ κάτι. Βόι βακερέλα: «Εκ φαρ, εκ τζουβέλ σο κεράβας λάσαρ μπουτί μπουτσσαντάς εκ μήνυμας σαρέ οντουλέντε σο κεράας μπουτί γιεκ ντα βακερντάς λάφια, σο να ισινέ μπαγιά, μάνγκε ντα για το τρόπος σο κεράβας μπουτί. Πληγωσάλομ μπουτ. Αλλά σοράν πουτσλόμ μο νεαυτός: “Σαρ πρέπει τι συμπεριφερίντιβαβ ανταλέ τζενιάτε για τι μοιάζαβ κο Ιησούς;” Αφού σκεφτιντόμ σο κα κερέλας ο Ιησούς, αποφασιντόμ μα τι κεράβ-λες θέμας. Πιο σοράν, λιντόμ αμπέρι ότι βόι νακχέλας εκ μπαρό πρόβλημας υγείας ντα ισινέ μπουτ αγχωμέ. Σκεφτιντόμ ότι μάλλον γραφιντάς ανταλά λάφια χωρίς τι σκεφτίνελ-λεν λατσσές. Επειδή τθεράβας μι γκοντιάτε σαρ σικαβέλας αγάπη ο Ιησούς ατζέ-ντα όταν κερένας-λες κάτι, μπορισάλομ τι σικαβάβ με-ντα ασακί αγάπη οντουλέ τζενιάτε». Άμα κα μοιάζας κο Ιησούς, κα σικαβάς πάντα αγάπη κο γιαβερά.

Τρίτον, σικλιόν τι μανγκέν ι γιαβερέν πιο μπουτ τουμαρέ νεαυτόσταρ. Ασακί αγάπη πρέπει τι τθερέν ο αληθινοί μαθητές ι Ιησούσκε. (Ιωάννης 13:​34, 35) Ο Ιησούς σικαντάς ασακί αγάπη ντα μουκχλάς ο τέλειος παράδειγμας αμένγκε. Σαρ κερντάς-λες ανταβά; Όταν μουκχλάς ο ουρανός, «μουκχλάς ι ζωή σο τθερέλας» ντα ερεσλό «μέχρι κο μεριπέ» αμένγκε. (Φιλιππησίους 2:​5-8) Καζόμ σικαβάσα ι αγάπη σο σικαντάς ο Ιησούς, αζόμ πιο μπουτ κα σκεφτίνας ντα κα αισθάντιβας σαρ βοβ, ντα κα τσσουβάς ι γιαβερένγκε ανάγκες πιο οπρέ αμαρένταρ.

Αβένα μπουτ λατσσέ αποτελέσματα όταν σικαβάσα αγάπη. Ελάν τι ντικχάς ντούι παραδείγματα:

• ΙΣΙΝΑΜ ΠΦΡΑΛΑ ΤΖΕΝΕΝΤΖΑΡ ΣΑΡΟ ΚΑΤΑ ΝΤΟΥΝΙΑΣ: Επειδή τθεράσα αγάπη ο εκ ι γιαβερέσκε, τζανάσα ότι, καλέ εκκλησιάτε-ντα τι τζας κι πφουβ, αμαρέ πφραλά ντα πφενιά κα καλωσορίνεν-αμέν αντράλ πουμαρέ γκίσταρ. Καζόμ μπαρί ευλογία ισί τι τζανάς ότι μανγκένα-αμέν “σαρέ αμαρέ πφραλά σο ισί σαρό κο ντουνιάς”! (1 Πέτρου 5:9) Μπορίνασα τι αρακχάς ασακί αγάπη σάντε αντρέ κο λαός κι Ντεβλέσκο.

• ΕΙΡΗΝΗ: Όταν “νταϊντίνασα ο εκ ι γιαβερές με αγάπη”, μπορίνασα τι απολαμβάνας “ι ειρήνη σο κερέλα-αμέν τι αβάς γιεκ”. (Εφεσίους 4:2, 3) Ντικχάσα ανταγιά ειρήνη κο συναθροίσεις ντα αμαρέ συνελευσιέντε. Να συμφωνίνενα ότι ανταγιά ειρήνη ναστί αρακχένα-λα πουθενά αντρέ ανταλέ τρουγιμέ ντουνιάστε; (Ψαλμός 119:​165· Ησαΐας 54:​13) Όταν προσπαθίνασα τι τθεράς ειρήνη ι γιαβερέντζαρ, σικαβάσα ότι μανγκάσα-λεν μπαγιά, ντα ανταβά κερέλα χαρούμενος αμαρέ Νταντές σο ισί κο ουρανός.​—Ψαλμός 133:​1-3· Ματθαίος 5:9.

Ο Παύλος γραφιντάς: «Η αγάπη κερέλα λατσσιπέ». (1 Κορινθίους 8:1) Κι πρώτη επιστολή κο Κορινθίους, κο κεφάλαιος 13, σο μερικοί βακερένα λέσκε «Ύμνος της Αγάπης», ο Παύλος εξηγίνελα σο λατσσιπέ κερέλα η αγάπη. Η αγάπη ντικχέλα ο συμφέρον ι γιαβερένγκο. Η αγάπη ενδιαφερίντιβελα για το ανάγκες σο τθερένα ο γιαβερά. (1 Κορινθίους 10:​24· 13:5) Η αγάπη κερέλα τι αβέν ο φαμιλιά αγαπημέ ντα ο εκκλησίες ενωμέ επειδή σκεφτίνελα ι γιαβερέν, ισί ευαίσθητη, κερέλα υπομονή ντα σικαβέλα λατσσιπέ.​—Κολοσσαείς 3:14.

Υπαρχίντιβενα μπουτ τρόποι για τι σικαβάς αγάπη κο γιαβερά, αλλά αμαρί αγάπη ι Ντεβλέσκε κερέλα ο πιο μπαρό λατσσιπέ ντα ισί η πιο σημαντική αγάπη σο υπαρχίντιβελα. Σόσκε; Επειδή αμαρί αγάπη λέσκε κερέλα-αμέν τι αβάς ενωμέ! Τζενέ σο τζουβντιλέ διαφορετικά, σο ισί γιαβερέ τθεμέσταρ ντα κερένα λάφι γιαβέρ τσσιπ ντένα μαζί δόξα κο Ιεχωβά, ντα υπηρετίνενα-λες «σαρέ γιεκ». (Σοφονίας 3:9) Τι αβάς αποφασισμέ κάθε ντιβές τι σικαβάς ανταγιά μπουτ σημαντική ιδιότητα σο αβέλα κατά καρπός σο τθερέλα ο πνεύμας ι Ντεβλέσκο.