1, 2. (α) Σο μπορεί τι κερέλ-αμέν τι πουτσάς: «Μέχρι κάνα»; (β) Σόσκε ο παραδείγματα πιστέ τζενένγκε κο πουρανέ μπρεσά μπορίνενα τι ντεν-αμέν θάρρος αντιβές;

«ΜΕΧΡΙ κάνα;» Ανταγιά ισινέ η ερώτηση σο κερντέ ο πιστοί προφήτες Ησαΐας ντα Αββακούμ. (Ησαΐας 6:​11· Αββακούμ 1:2) Όταν ο βασιλιάς Δαβίδ γραφιντάς ο Ψαλμός 13, κερντάς ανταγιά ερώτηση σταρ φαρ. (Ψαλμός 13:1, 2) Ντα όταν ο Ιησούς Χριστός κερντάς λάφι τζενέντζαρ σο να τθερένας πίστη, πουτσλάς: «Μέχρι κάνα;» (Ματθαίος 17:​17) Αμέν-ντα αντιβές μπορεί τι κεράς ι ίδια ερώτηση.

² Σο μπορεί τι κερέλ-αμέν τι πουτσάς: «Μέχρι κάνα»; Μπορεί τι νακχλάμ κάποια αδικία. Ή μπορεί τι ισινάμ νασφαλέ ή τι πφουρίλιβασα. Μπορεί τι ισινάμ αγχωμέ επειδή τζουβντιάσα ντιβεσέντε σο ισί “μπουτ δύσκολα ντα νανέ εύκολος τι ντας-λεν πέρα”. (2 Τιμόθεο 3:1) Ή μπορεί ο γκεραλέ πράγματα σο αβένα-πες αμαρέ τθεμέστε τι κερένα-αμέν τι νιωθίνας ότι ισινάμ κχινέ ντα ότι χασαρντάμ αμαρό κουράγιος.  Καβά-ντα τι αβέλ ο λόγος, λάσα θάρρος επειδή τζανάσα ότι ο Ιεχωβά να χολιασάλο πι πιστέ υπηρετόνγκε κο πουρανέ μπρεσά σο κερντέ ανταγιά ερώτηση.

3. Σο μπορίνελα τι βοηθίνελ-αμέν όταν νακχάσα εκ πρόβλημας;

³ Σο μπορίνελα τι βοηθίνελ-αμέν όταν νακχάσα εκ πρόβλημας σο ισί δύσκολος τι νταϊντίνας-λες; Ο Ντεβέλ τσσουντάς ι Ιακωβός, σο ισινέ μιλαδέλφια ι Ιησούσαρ, τι βακερέλ αμένγκε: «Κερέν υπομονή, πφραλάλεν, μέχρι τι αβέλ ο Κύριος». (Ιακώβου 5:7) Άρα, σαρέ χρειαζίντιβασα υπομονή. Αλλά σο ισί η υπομονή, ντα σαρ μπορίνασα τι σικαβάς ανταγιά σουκάρ ιδιότητα;

4, 5. (α) Σο ισί η υπομονή ντα σαρ μπορίνασα τι τθεράς υπομονή; (β) Σαρ εξηγίνελα ο Ιάκωβος ι υπομονή; (Ντικχ ι φωτογραφία σο ισί κι αρχή.)

⁴ Η Αγία Γραφή βακερέλα ότι η υπομονή αβέλα κατά άγιος πνεύμας ι Ντεβλέσκο. Άμα ο Ντεβέλ να βοηθίνελα ι τζενέν, σο ισί ατελείς, ισί δύσκολος λένγκε τι τθερέν υπομονή όταν νακχένα μπαρέ δυσκολίες. Η υπομονή ισί δώρος κατά Ντεβέλ. Όταν κεράσα υπομονή, σικαβάσα αμαρί αγάπη ι Ιεχωβάσκε ντα ι γιαβερένγκε. Όταν να τθεράσα υπομονή, αμαρί αγάπη ι πφραλένγκε ντα ι γιαβερένγκε χασαρέλα πι ζορ. (1 Κορινθίους 13:4· Γαλάτες 5:​22) Σαρ βοηθίνελα-αμέν η υπομονή; Βοηθίνελα-αμέν τι νταϊντίνας κο δυσκολίες χωρίς τι τσσιναβάς τι ντικχάς ι ζωή με λατσσό τρόπος. (Κολοσσαείς 1:​11· Ιακώβου 1:3, 4) Η υπομονή επίσης βοηθίνελα-αμέν τι ατσσάς πιστοί κο Ιεχωβά σο-ντα προβλήματα νακχάσα. Κα βοηθίνελ-αμέν μα τι κεράς κακός οντουλένγκε σο μπορεί τι κερντέ αμένγκε κακός. Η Γραφή βακερέλα ότι πρέπει τι αγαβάς σαρέ αμαρέ γκίσαρ καζόμ σημαντικός ισί τι μπεκλεντίνας. Ανταβά ισί εκ σημαντικός μάθημας σο λάσα κατά εδάφια Ιακώβου 5:7, 8. (Διαβάνεν)

⁵ Σόσκε πρέπει τι μπεκλεντίνας σαρέ αμαρέ γκίσαρ τι κερέλ ο Ιεχωβά οντουλά σο βακερντάς; Ο μαθητής Ιάκωβος συγκρίνελα-αμέν εκχέ γεωργόσαρ. Παρόλο σο ο γεωργός μαρέλα-πες μπουτ για τι τσσουβέλ σπόρος πι χωραφίστε, να μπορίνελα τι κερέλ κουμάντος ο καιρός ή καζόμ σουγκό κα μπαριόν ο φυτά. Χρειαζίντιβελα τι μπεκλεντίνελ με υπομονή για τι γκίντελ «ο καρπός ι πφουβιάκο σο τθερέλα μπαρί αξία». Αντικάς αβέλα-πες αμέντζαρ-ντα. Καζόμ μπεκλεντίνασα τι νικιόν μπαγιά ο υποσχέσεις ι Ιεχωβάσκε, υπαρχίντιβενα μπουτ πράγματα σο να μπορίνασα τι κεράς κουμάντος. (Μάρκος 13:​32, 33· Πράξεις 1:7) Σαρ ο γεωργός, αμέν-ντα χρειαζίντιβελα τι μπεκλεντίνας με υπομονή.

6. Σο μπορίνασα τι σικλιάς κατά προφήτης Μιχαίας;

⁶ Ο προφήτης Μιχαίας έπρεπε τι νταϊντίνελ δυσκολίες σαρ ανταλά σο νακχάσα αμέν αντιβές. Τζουβντιόλας αζομάν σο κυβερνίνελας ο βασιλιάς Άχαζ. Επειδή ο Άχαζ ισινέ μπουτ πφιρνό βασιλιάς, ο λαός κερέλας μπουτ μπέτι πράγματα. Ο πράγματα ισινέ αζόμ μπέτι σο η Γραφή βακερέλα ότι ο τζενέ “τζανένας μπουτ λατσσές τι κερέν ο κακός”. (Διαβάνεν Μιχαίας 7:​1-3) Ο Μιχαίας τζανέλας ότι να μπορίνελας τι αλλάνελ ανταλά πράγματα. Σο κα κερέλας; Βακερέλα αμένγκε: «Με, όμως, κα τθεράβ συνέχεια μο γιακχά κο Ιεχωβά. Κα μπεκλεντίναβ με υπομονή μι Ντεβλέσκε σο κα σώνελ-μαν. Μο Ντεβέλ κα ασουνέλ-μαν». (Μιχαίας 7:7) Σαρ ο Μιχαίας, αντικάς αμέν-ντα χρειαζίντιβελα τι “μπεκλεντίνας με υπομονή ι Ντεβλέσκε”.

7. Σόσκε να ερεσέλα σάντε τι μπεκλεντίνας τι κερέλ ο Ιεχωβά οντουλά σο βακερντάς;

⁷ Αν αμέν τθεράσα πίστη σαρ οντιά σο  τθερέλας ο Μιχαίας, κα μανγκάς σαρέ αμαρέ γκίσαρ τι μπεκλεντίνας ι Ιεχωβάσκε. Αμέν να ισινάμ σαρ εκ φυλακισμέ τζενό σο μπεκλεντίνελα πι κελίστε μέχρι τι αβέλ ο ντιβές σο κα μουνταρέν-λες. Βοβ ισί αναγκασμέ τι μπεκλεντίνελ ντα να μπεσέλα οντουλέ ντιβεσέσκε σαρ σαρ. Καζόμ διαφορετικά ισί ο πράγματα αμένγκε! Αμέν μανγκάσα τι μπεκλεντίνας ι Ιεχωβάσκε επειδή τζανάσα ότι, κο σωστός σαάτι, βοβ κα κερέλ ι υπόσχεση σο ντινάς τι ντελ-αμέν ζωή για πάντα! Οτθάρ, “νταϊντίνασα σαρέ ο πράγματα με υπομονή ντα χαρά”. (Κολοσσαείς 1:​11, 12) Καζόμ μπεκλεντίνασα, προσοχίνασα μα τι κεράς παράπονα ντα τι βακεράς ότι ο Ιεχωβά αργίνελα τι κερέλ οντουλά σο βακερντάς. Άμα κα κεράας-λες ανταβά, να κα χαιρίνελας.​—Κολοσσαείς 3:12.

8. Σο σικλιάσα κατά πιστά μουρσά ντα τζουβλιά σο τζουβντιλέ κο πουρανέ μπρεσά;

⁸ Σο κα βοηθίνελ-αμέν τι μπεκλεντίνας ατζέ πιο μπουτ αντράλ αμαρέ γκίσταρ; Μπορίνασα τι σκεφτίνας πιστέ μουρσέν ντα τζουβλίν σο τζουβντιλέ κο πουρανέ μπρεσά ντα μπεκλεντίνενας με υπομονή τι κερέλ ο Ιεχωβά οντουλά σο βακερντάς. (Ρωμαίους 15:4) Καζόμ σκεφτίνασα λένγκε παραδείγματα, ισί λατσσό τι ντας-αμέν γκοντί καζόμ καιρός έπρεπε τι μπεκλεντίνεν, σόσκε μανγκένας σαρέ πουμαρέ γκίσαρ τι μπεκλεντίνεν ντα σαρ ευλογιντάς-λεν ο Ιεχωβά επειδή τθερένας υπομονή.

9, 10. Καζόμ καιρός μπεκλεντίνενας ι Ιεχωβάσκε ο Αβραάμ ντα η Σάρρα;

⁹ Σκεφτίνεν τον Αβραάμ ντα τη Σάρρα.  Επειδή σικαντέ «πίστη ντα υπομονή», κληρονομιντέ «ο υποσχέσεις». Η Γραφή βακερέλα αμένγκε ότι «αφού πρώτα ο Αβραάμ σικαντάς υπομονή», ο Ιεχωβά ντινάς πο λάφι ότι κα ευλογίνελας-λες ντα κα κερέλας-λες ντατ εκχέ μπαρέ λαόσκο. (Εβραίους 6:​12, 15) Σόσκε έπρεπε τι σικαβέλ υπομονή ο Αβραάμ; Επειδή κα νακχέλας μπουτ καιρός για τι νικιόλ μπαγιά οντιά υπόσχεση. Στις 14 Νισάν, κο μπρες 1943 Π.Κ.Χ., ο Αβραάμ, η Σάρρα ντα σαρέ ο τζενέ σο μπεσένας λέντζαρ νακχλέ ο Ευφράτης Ποταμός ντα γκιλέ κο Υποσχεμέ Τθεμ. Όμως, ο Αβραάμ έπρεπε τι μπεσέλ 25 μπρεσά μέχρι τι μπιαντιόλ λέσκο τσσαβό, ο Ισαάκ, ντα έπρεπε τι μπεσέλ ατζέκ 60 μπρεσά μέχρι τι μπιαντιόν λέσκε αγγόνια, ο Ησαύ ντα ο Ιακώβ.​—Εβραίους 11:9.

¹⁰ Καζόμ τθανά κατά Υποσχεμέ Τθεμ κληρονομιντάς ο Αβραάμ; Η Γραφή βακερέλα ότι ο Ιεχωβά «να ντινάς-λες τίποτα οντουλέ τθεμέσταρ για κληρονομιά, ούτε εκ χουρντό τθαν για τι τσσουβέλ πο πιντρό· αλλά ντινάς πο λάφι ότι κα ντέλας-λες λέστε, ντα σοράν λέσταρ λέσκε προσαγγονίστε, παρόλο σο μέχρι αζομάν να τθερέλας τσσαβές». (Πράξεις 7:5) Έπρεπε τι νακχέν 430 μπρεσά από αζομάν σο ο Αβραάμ νακχλάς ο Ευφράτης Ποταμός για τι αβέν λέσκε προσάγγονα ο λαός σο κα τζουβντιόλας οντουλέ τθεμέστε.​—Έξοδος 12:​40-42· Γαλάτες 3:17.

11. Σόσκε ο Αβραάμ μπεκλεντίνελας σαρέ πι γκίσαρ, ντα καλά ευλογίες κα ντικχέλ επειδή τθερέλας υπομονή;

¹¹ Ο Αβραάμ μπεκλεντίνελας σαρέ πι γκίσαρ, επειδή ισινέ σίγουρος ότι ο Ιεχωβά κα ατσσικιαρέλας πο υποσχέσεις. Τθερέλας πίστη κο Ιεχωβά. (Διαβάνεν Εβραίους 11:​8-12) Χαιρίνελας τι μπεκλεντίνελ παρόλο σο μουλό χωρίς τι ντικχέλ τι αβέν-πες σαρέ ο υποσχέσεις ι Ντεβλέσκε. Αλλά σκεφτίνεν ι χαρά σο κα τθερέλ ο Αβραάμ όταν κα αναστίντιβελ κο Παράδεισος κι πφουβ. Κα κερέλ λέσκε μπαρί εντύπωση όταν κα διαβάνελ σε μπουτ σημεία κι Γραφή οντουλά σο κερντάς βοβ ντα λέσκι φαμιλί. * (Ντικχ ι υποσημείωση.) Σκεφτίνεν καζόμ μπουτ κα χαιρίνελ κάνα κα σικλιόλ ο σημαντικός ρόλος σο τθερέλας για τι αβέλ-πες ι Ιεχωβάσκο σκοπός για τον Μεσσία! Σίγουρα κα νιωθίνελ ότι αξίνελας τι μπεκλεντίνελ ανταλέ ευλογιένγκε.

12, 13. Σόσκε χρειαζίντιβελας τι κερέλ ο Ιωσήφ υπομονή, ντα σαρ σικαντάς ότι ντικχέλας ο πράγματα με λατσσό τρόπος;

¹² Ο δισέγγονος του Αβραάμ, ο Ιωσήφ, κερέλας βοβ-ντα υπομονή σαρέ πι γκίσαρ. Νακχλάς μπουτ μπαρέ αδικίες πι ζωγιάτε. Πρώτα, λέσκε πφραλά μπικιντέ-λες για τι αβέλ δούλος κάνα ισινέ περίπου 17 μπρεσένγκο. Σοράν, κατηγορισάλο ψεύτικε λαφίντζαρ ότι προσπαθιντάς τι βιάνελ πι αφεντικόσκε ρομνιά ντα τσσουντέ-λες κι φυλακή. (Γένεση 39:​11-20· Ψαλμός 105:​17, 18) Παρόλο σο ο Ιωσήφ ισινέ εκ πιστός υπηρέτης ι Ντεβλέσκο, ντικχίντιβελας ότι τιμωρίντιβελας ντα όχι ότι ευλογίντιβελας. Αλλά μετά από 13 μπρεσά, σαρέ αλλαξάλε. Ο Ιωσήφ νικίστιλο κατά φυλακή ντα αβιλό ο πιο μπαρό αρχηγός κι Αίγυπτος μετά κατά Βασιλιάς.​—Γένεση 41:​14, 37-43· Πράξεις 7:9, 10.

¹³ Μήπως ο αδικίες σο νακχλάς ο Ιωσήφ πφερντέ λέσκο γκι κερκιπέ; Μήπως νιωσάλο ότι ο Ιεχωβά παρατιντάας-λες; Όχι. Ο Ιωσήφ μπεκλεντίνελας με υπομονή. Σο βοηθιντάς-λες; Η πίστη σο τθερέλας κο Ιεχωβά. Αγαβέλας ότι ο Ιεχωβά κερέλας  κουμάντος ο πράγματα. Ντικχάσα-λες ανταβά οντουλένταρ σο βακερντάς πι πφραλένγκε: «Μα νταρέν. Μήπως ισινόμ με κι θέση κι Ντεβλέσκι; Παρόλο σο μανγκένας τι κερέν μάνγκε κακός, ο Ντεβέλ αντάς ανταλέσταρ λατσσιπέ για τι ατσσικιαρέλ μπουτέ τζενέν κι ζωή, σαρ κερέλα αντιβές». (Γένεση 50:​19, 20) Ο Ιωσήφ τζανέλας ότι αξίνελας τι μπεσέλ για το ευλογίες ι Ιεχωβάσκε.

14, 15. (α) Σόσκε κερέλα αμένγκε εντύπωση η υπομονή σο τθερέλας ο Δαβίδ; (β) Σο βοηθιντάς τον Δαβίδ τι μπεκλεντίνελ με υπομονή;

¹⁴ Ο βασιλιάς Δαβίδ-ντα νακχλάς μπουτ αδικίες. Ο Ιεχωβά τραμπιντάς τον Δαβίδ για τι αβέλ βασιλιάς κο Ισραήλ όταν ισινέ τερνό. Όμως ο Δαβίδ έπρεπε τι μπεκλεντίνελ 15 μπρεσά μέχρι τι αβέλας βασιλιάς πι φαράτε. (2 Σαμουήλ 2:3, 4) Μερικέ οντουλέ μπρεσένταρ, ο Δαβίδ έπρεπε τι γκεραβέλ-πες κατά βασιλιάς Σαούλ, σο προσπαθίνελας τι μουνταρέλ-λες. * (Ντικχ ι υποσημείωση.) Οτθάρ, ο Δαβίδ αζομάν να τθερέλας πιρό κχερ. Αναγκασάλο τι μπεσέλ γιαβερέ τθεμέστε ή κο σπηλιές σο ισινέ κι έρημος. Τελικά, ο Σαούλ μουλό εκχέ τζενγκίστε. Όμως, ο Δαβίδ έπρεπε τι μπεσέλ περίπου εφτά μπρες ατζέ για τι αβέλας τελικά βασιλιάς σαρό κο λαός Ισραήλ.​—2 Σαμουήλ 5:4, 5.

¹⁵ Σόσκε μανγκέλας ο Δαβίδ τι μπεκλεντίνελ με υπομονή; Απαντίνελα αμένγκε κο ίδιος ψαλμός σο πουτσλάς σταρ φαρ: «Μέχρι κάνα;» Οτθέ βακερέλα: «Με, όμως, ντάβα μπέσα κι αφοσιωμέ αγάπη σο τθερέσα· μι καρδιά κα χαιρίνελ επειδή κα σώνες-μαν. Κα γκιλιαβάβ κο Ιεχωβά, σόσκε βοβ πφερντάς-μαν ευλογίες». (Ψαλμός 13:5, 6) Ο Δαβίδ τζανέλας ότι ο Ιεχωβά μανγκέλας-λες ντα ότι Βοβ κα αβέλας πάντα αφοσιωμέ λέστε. Σκεφτίνελας σαρ βοηθιντάας-λες κο παρελθόν ντα μπεσέλας σαρ σαρ ι ντιβεσέσκε σο ο Ιεχωβά κα ντέλας τέλος λέσκε δοκιμασιέντε. Ο Δαβίδ τζανέλας ότι αξίνελας τι μπεσέλ για το ευλογίες ι Ιεχωβάσκε.

16, 17. Σαρ μουκχλάς ο Ιεχωβά Ντεβέλ ντα ο Ιησούς Χριστός εκ μπουτ λατσσό παράδειγμας επειδή μπεκλεντίνενα σαρέ πουμαρέ γκίσαρ;

¹⁶ Ο Ιεχωβά να μανγκέλα αμένταρ τι κεράς κάτι σο να μανγκέλα τι κερέλ βοβ. Ντινάς-αμέν ο πιο λατσσό παράδειγμας επειδή μπεκλεντίνελα σαρέ πι γκίσαρ. (Διαβάνεν 2 Πέτρου 3:9) Για παράδειγμας, πριν από χιλιάδες μπρεσά κο κήπος της Εδέμ, ο Σατανάς κατηγοριντάς ι Ιεχωβάς ότι ισινέ άδικος. Ο Ιεχωβά «μπεκλεντίνελα με υπομονή» τι αβέλ ο ντιβές σο σαρέ κα αγιάνεν λέσκο ναβ. Ο αποτέλεσμας κα αβέλ τι τθερέν μπουτ σουκάρ ευλογίες οντουλά σο «μπεκλεντίνενα λέσκε σαρ σαρ».​—Ησαΐας 30:​18, υποσημείωση ΜΝΚ, κι αγγλική.

¹⁷ Ο Ιησούς-ντα μπεκλεντίνελα σαρέ πι γκίσαρ. Όταν ισινέ κι πφουβ, ισινέ πιστός μέχρι κο μεριπέ. Κο μπρες 33, γκιλό κο ουρανός ντα σικαντάς κο Ιεχωβά ι αξία σο τθερέλας λέσκι θυσία. Αλλά έπρεπε τι μπεκλεντίνελ μέχρι κο 1914 για τι αρχίνελ  τι κυβερνίνελ σαρ Βασιλιάς. (Πράξεις 2:​33-35· Εβραίους 10:​12, 13) Ντα επίσης πρέπει τι μπεκλεντίνελ τι τελειώνελ λέσκι Βασιλεία, σο κα ατσσικιαρέλ χίλια μπρεσά, για τι καταστραφίντιβεν σαρέ λέσκε ντουσμάνια. (1 Κορινθίους 15:​25) Μπεκλεντίνελα μπουτ καιρός. Όμως, αξίνελα τι μπεσέλ ανταλέ ευλογιένγκε.

18, 19. Σο κα βοηθίνελ-αμέν τι μανγκάς τι μπεκλεντίνας με υπομονή;

¹⁸ Αγαβάσα ξεκάθαρα ότι ο Ιεχωβά μανγκέλα αμένταρ τι κεράς υπομονή, τι μπεκλεντίνας σαρέ αμαρέ γκίσαρ. Σο κα βοηθίνελ-αμέν τι κεράς-λες ανταβά; Χρειαζίντιβελα τι προσευχίντιβας κο Ντεβέλ για τι ντελ-αμέν πο άγιος πνεύμας. Ντεν-τουμέν γκοντί ότι η υπομονή αβέλα κατά άγιος πνεύμας ι Ντεβλέσκο. (Εφεσίους 3:​16· 6:​18· 1 Θεσσαλονικείς 5:​17-19) Οτθάρ, τι μολίνεν ι Ιεχωβάς τι βοηθίνελ-τουμέν για τι νταϊντίνεν με υπομονή!

¹⁹ Επίσης, ντεν-τουμέν γκοντί ότι οντουβά σο βοηθιντάς τον Αβραάμ, τον Ιωσήφ ντα τον Δαβίδ τι μπεκλεντίνεν με υπομονή για τι νικιόν μπαγιά ο υποσχέσεις ι Ιεχωβάσκε ισινέ η πίστη ντα η εμπιστοσύνη σο τθερένας Λέστε. Να σκεφτίνενας σάντε πουμαρό νεαυτός ντα οντουλά σο μανγκένας. Όταν σκεφτίνασα καζόμ λατσσές γκιλέ ο πράγματα λένγκε, αμέν-ντα κα λας δύναμη για τι μπεκλεντίνας με υπομονή ι Ντεβλέσκε.

20. Σο πρέπει τι αβάς αποφασισμέ τι κεράς;

²⁰ Οτθάρ, παρόλο σο νακχάσα δοκιμασίες, ισινάμ αποφασισμέ τι “μπεκλεντίνας ι Ντεβλέσκε”. Μερικές φορές μπορεί τι πουτσάσα: «Μέχρι κάνα, Ιεχωβά;» (Ησαΐας 6:​11) Αλλά με τη βοήθεια σο λάσα κατά άγιος πνεύμας ι Ντεβλέσκο, μπορίνασα τι μοιάζας κο προφήτης Ιερεμίας ντα τι βακεράς: «Ο Ιεχωβά ισί μι κληρονομιά» ντα «άκ’ σόσκε κα μπεκλεντίναβ λέσκε».​—Θρήνοι 3:​21, 24.