Οντουλά σο γραφιντάς ο Ματθαίος ι πραγματένγκε σο αβιλέ-πες κάνα μπιάντιλο ο Ιησούς ντα ι πρώτε μπρεσένγκε σο τζουβντιλό κι πφουβ ισί διαφορετικά οντουλένταρ σο γραφιντάς ο Λουκάς επειδή γραφιντέ ο πράγματα σο σκεφτιντέ ντα κερντέ διαφορετικά τζενέ.

Ο Ματθαίος γραφιντάς πράγματα σο τθερένα τι κερέν με τον Ιωσήφ. Βακερέλα σο κερντάς ο Ιωσήφ κάνα σικλιλό ότι η Μαρία ατσσιλί κχαμνί, σο βακερντάς λέσκε εκ άγγελος εκχέ σουνέστε ντα σαρ κερντάς οντουλά σο βακερντάς λέσκε οντουβά άγγελος. (Ματθαίος 1:​19-25) Βακερέλα επίσης σαρ εκ άγγελος προειδοποιηντάς εκχέ σουνέστε τον Ιωσήφ τι τζαλ κι Αίγυπτος γιεκ πι φαμιλιάσαρ ντα σαρ ο Ιωσήφ ντινάς καν. Ο Ματθαίος σοράν βακερέλα αμένγκε ότι ο Ιωσήφ ντικχλάς ατζέκ εκ σουνό σο βακερντάς λέσκε εκ άγγελος τι βουρτίνελ κο Ισραήλ, ότι βουρτισάλο ντα ότι αποφασιντάς τι μπεσέλ πι φαμιλιάσαρ κι Ναζαρέτ. (Ματθαίος 2:​13, 14, 19-23) Κο πρώτα ντούι κεφάλαια κο Ευαγγέλιος σο γραφιντάς ο Ματθαίος, ο ναβ του Ιωσήφ ισί εφτά φαρ, αλλά ι Μαριάκο σάντε σταρ.

Όμως, οντουλά σο γραφιντάς ο Λουκάς τθερένα τι κερέν ι Μαριάσαρ. Βακερέλα σο αβιλό όταν γκιλό ο άγγελος Γαβριήλ κι Μαρία, σο αβιλό όταν γκιλί βόι κι Ελισάβετ, σο ισινέ λάσαρ τζενέ, ντα επίσης ο λάφια σο βακερντάς η Μαρία για τι δοξάνελ ι Ιεχωβάς. (Λουκάς 1:​26-56) Βακερέλα επίσης ο λάφια σο βακερντάς ο Συμεών κι Μαρία οντουλένγκε σο κα τσσίντελας ο Ιησούς κο μέλλον. Σοράν, ο Λουκάς βακερέλα σο αβιλό-πες αζομάν σο ο Ιησούς ισινέ 12 μπρεσένγκο ντα γκιλό πι φαμιλιάσαρ κο ναός. Ατζέ-ντα κι περίπτωση ανταλάτε, ο Λουκάς γραφιντάς ο λάφια ι Μαριάκε, ντα όχι του Ιωσήφ, ντα βακερέλα αμένγκε ότι η Μαρία επηρεασάλι μπουτ σαρέ ανταλέ πραγματένταρ σο αβιλέ-πες. (Λουκάς 2:​19, 34, 35, 48, 51) Κο πρώτα ντούι κεφάλαια κο Ευαγγέλιος σο γραφιντάς ο Λουκάς, ο ναβ ι Μαριάκο ισί 12 φαρ, αλλά του Ιωσήφ σάντε 3. Άρα, ο Ματθαίος βακερέλα αμένγκε πιο μπουτ πράγματα οντουλένγκε σο σκεφτίνελας ντα κερέλας ο Ιωσήφ. Ο Λουκάς, όμως, κερέλα λάφι οντουλένγκε σο σκεφτίνελας ντα κερέλας η Μαρία.

Επίσης, ανταλά ντούι Ευαγγέλια σικαβένα με διαφορετικός τρόπος κατάρ αστάρντιβελας ο Ιησούς. Ο Ματθαίος γραφιντάς κατάρ αστάρντιβελας ο Ιωσήφ ντα σικαβέλα ότι ο Ιησούς, σο τθερέλας μαμοσολό τον Ιωσήφ, τθερέλας ο νόμιμος δικαίωμας για τη βασιλεία του Δαβίδ. Σόσκε; Επειδή ο Ιωσήφ αστάρντιβελας κατά Σολομώντας, σο ισινέ τσσαβό του βασιλιά Δαβίδ. (Ματθαίος 1:6, 16) Όμως, ο Λουκάς γραφίνελα κατάρ αστάρντιβελας η Μαρία ντα σικαβέλα ότι ο Ιησούς, σαρ τσσαβό ι Μαριάκο, τθερέλας ο φυσικός δικαίωμας, δηλαδή “κατά σώμας”, για τη βασιλεία του Δαβίδ. (Ρωμαίους 1:3) Σόσκε; Επειδή η Μαρία αστάρντιβελας κατά Νάθαν, σο ισινέ εκ γιαβέρ τσσαβό του βασιλιά Δαβίδ. (Λουκάς 3:​31) Αλλά σόσκε να γραφίνελα ο Λουκάς ότι η Μαρία ισί τσσάι του Ηλί; Επειδή κο επίσημα χαρτιά σο σικαβένας κατάρ αστάρντιβελας εκ τζενό, ο πιο μπουτ φαρ γραφίνενας σάντε ο ναβά ι μουρσένγκε κατά φαμιλί. Οτθάρ, όταν κάποιος ντικχέλας ότι ο Λουκάς γραφίνελα τον Ιωσήφ σαρ τσσαβό του Ηλί, αγαβέλας ότι ο Ιωσήφ ισινέ τζαμουτρό του Ηλί.​—Λουκάς 3:23.

Ο Ματθαίος ντα ο Λουκάς γραφιντέ καλέ τζενένταρ αστάρντιβελας ο Ιησούς, οτθάρ αγαβάσα ότι ο Μεσσίας σο βακερντάας ο Ντεβέλ ότι κα αβέλας ισινέ ο Ιησούς. Τζανένας αζόμ μπουτ τζενέ ότι ο Ιησούς αστάρντιβελας κατά βασιλιάς Δαβίδ σο ατζέ-ντα ο Φαρισσαίοι ντα ο Σαδδουκαίοι να μπορίνενας τι βακερέν ότι ανταβά να ισινέ μπαγιά. Επειδή ο Ματθαίος ντα ο Λουκάς γραφιντέ κατάρ αστάρντιβελας ο Ιησούς, αμαρί πίστη αβέλα πιο ζουρανί ντα ισινάμ σίγουροι ότι ο γιαβερά-ντα υποσχέσεις ι Ντεβλέσκε κα αβέν-πες μπαγιά.