ΕΠΕΙΔΗ η ζωή αβιλί μπουτ δύσκολη ανταλέ “τελευταίε ντιβεσέντε”, χρειαζίντιβασα υπομονή πιο μπουτ από ποτές. (2 Τιμόθεο 3:​1-5) Μπουτ τζενέ κο ντουνιάς να κερένα υπομονή. Ισί εγωιστές, μπεϊντίνενα τι χαν-πες ντα να ατσσικιαρένα πουμαρό νεαυτός. Οτθάρ, πρέπει τι σκεφτίνας: “Μήπως μοιάζαβα κο τζενέ κι ντουνιάσκε σο να κερένα υπομονή; Σο μανγκέλα τι βακερέλ τι κεράβ υπομονή; Σαρ μπορίναβα τι κεράβ πάντα υπομονή;”

Σο μανγκέλα τι βακερέλ η λέξη «υπομονή» σαρ χρησιμοποιήντιβελα κι Αγία Γραφή; Εκ τζενό σο κερέλα υπομονή να νταϊντίνελα απλά εκ πρόβλημας. Αλλά μπεκλεντίνελα με ελπίδα ότι ο πράγματα κα αβέν πιο λατσσές. Να σκεφτίνελα σάντε πο νεαυτός, αλλά ενδιαφερίντιβελα για το αισθήματα ι γιαβερένγκε, ατζέ-ντα οντουλένγκε σο μπορεί τι χολιασκιαρντέ-λες ή τι συμπεριφερισάλε λέσκε μπέτι. Συνεχίνελα τι τθερέλ ι ελπίδα ότι κα τζαλ-λεν πιο λατσσές οντουλέ τζενέντζαρ. Οτθάρ, νανέ παράξενος σο η Γραφή βακερέλα ότι η υπομονή αβέλα κατά αγάπη. * (Ντικχ ι υποσημείωση) (1 Κορινθίους 13:4) Επίσης, η υπομονή ισί αντρέ κο “καρπός κι πνευμάσκο”. (Γαλάτες 5:​22, 23) Άρα, σο πρέπει τι κεράς για τι τθεράς ανταγιά ιδιότητα;

Αν μανγκάσα τι κεράς υπομονή, πρέπει τι προσευχίντιβας για τι βοηθίνελ-αμέν ο άγιος πνεύμας, σο ο Ιεχωβά ντέλα-λες οντουλέντε σο τθερένα λέσκε εμπιστοσύνη. (Λουκάς 11:​13) Ανταβά πνεύμας ισί μπουτ ζουρανό, αλλά πρέπει τι συνεχίνας τι κεράς πράγματα σο ταιριάνενα οντουλέντζαρ σο μανγκάσα αμαρέ προσευχέντε. (Ψαλμός 86:​10, 11) Ανταβά μανγκέλα τι βακερέλ ότι πρέπει τι κεράς σο νακχέλα αμαρέ βαστέσταρ για τι κεράς υπομονή κάθε ντιβές. Αλλά μπάζιμα μπορεί μα τι καταφερίνασα-λες. Σο μπορίνελα τι βοηθίνελ-αμέν;

Πρέπει τι διαβάνας ντα τι σκεφτίνας προσεκτικά ο τέλειος παράδειγμας ι Ιησούσκο ντα τι ακολουθίνας-λες. Κάνα ο απόστολος Παύλος κερντάς λάφι για το «νεβό χαρακτήρας», σο λέστε ισί η υπομονή-ντα, βακερντάς αμένγκε: «Η ειρήνη ι Χριστόσκι τι κερέλ κουμάντος τουμαρό γκι». (Κολοσσαείς 3:​10, 12, 15) Για τι κεράς-λες ανταβά, πρέπει τι ακολουθίνας ο παράδειγμας ι Ιησούσκο ντα τι αβάς πφερντέ σιγουριά ότι κο σωστός βακίτι, ο Ντεβέλ κα διορθώνελ ο πράγματα. Αν τθεράσα ανταγιά σιγουριά, να κα χασαράς αμαρί υπομονή, σο-ντα τι αβέλ-πες.​—Ιωάννης 14:​27· 16:33.

Σαρέ μανγκάσα τι αβέλ ο νεβό ντουνιάς καζόμ πιο σουγκό αβέλα-πες. Αλλά σικλιάσα τι κεράς πιο μπουτ υπομονή κάνα σκεφτίνασα καζόμ υπομονή κερέλα ο Ιεχωβά αμέντζαρ. Η Γραφή βακερέλα αμένγκε: «Ο Ιεχωβά να αργίνελα τι ανέλ πι υπόσχεση, σαρ αμντίνενα μερικοί, αλλά κερέλα υπομονή τουμέντζαρ επειδή να μανγκέλα τι καταστραφίντιβελ καέκ τζενό αλλά σαρέ τι μετανιώνεν». (2 Πέτρου 3:9) Άρα, κάνα σκεφτίνασα ι υπομονή σο κερέλα ο Ιεχωβά αμέντζαρ, κα κεράς αμέν-ντα πιο μπουτ υπομονή ι γιαβερέντζαρ. (Ρωμαίους 2:4) Κάνα χρειαζίντιβελα τι κεράς υπομονή;

Αμαρέ ζωγιάτε, χρειαζίντιβελα τι κεράς υπομονή μπουτέ περιπτωσιέντε. Για παράδειγμας, χρειαζίντιβασα υπομονή για μα τι τσσιναβάς οντουλέν σο κερένα λάφι άμα μανγκάσα τι βακεράς κάτι σο πακιάσα ότι ισί σημαντικός. (Ιακώβου 1:​19) Επίσης, χρειαζίντιβασα υπομονή κάνα ο γιαβερά χολιασκιαρένα-αμέν. Αντίς τι χασαράς αμαρί υπομονή, ισί λατσσό τι σκεφτίνας σαρ αντιδράνελα ο Ιεχωβά ντα ο Ιησούς κο αδυναμίες σο τθεράσα αμέν. Να ντένα μπουτ προσοχή κο χουρντέ πράγματα σο κεράσα μπουτ φαρ λάθος. Αλλά ντικχένα αμαρέ λατσσέ ιδιότητες ντα με υπομονή ντένα-αμέν χρόνος για τι αβάς πιο λατσσέ.​—1 Τιμόθεο 1:​16· 1 Πέτρου 3:12.

Χρειαζίντιβασα επίσης υπομονή κάνα εκ τζενό βακερέλα αμένγκε ότι βακερντάμ ή κερντάμ κάτι λάθος. Μπορεί κι αρχή τι χολιάνας ντα τι δικαιολογίνας-αμέν. Αλλά ο Λάφι ι Ντεβλέσκο βακερέλα αμένγκε μα τι αντιδράνας αντικάς. Βακερέλα: «Πιο λατσσές τι κερέλ εκ τζενό υπομονή παρά τι αβέλ μπαρικανό. Μα σίγκιαρ τι προσβαλίντιβες, επειδή σαρέ οντουλά σο σιγκιαρένα τι προσβαλίντιβεν σικαβένα ότι να τθερένα γκοντί». (Εκκλησιαστής 7:8, 9, υποσημείωση) Άρα, ατζέ-ντα άμα κατηγορίνενα-αμέν σινανέ, πρέπει τι κεράς υπομονή ντα τι σκεφτίνας προσεκτικά πριν τι αντιδράνας. Ανταβά κερντάς ο Ιησούς κάνα ο γιαβερά κατηγοριντέ-λες σινανέ.​—Ματθαίος 11:19.

Ειδικά ο νταντά ντα ο νταγιά χρειαζίντιβελα τι κερέν υπομονή κάνα πρέπει τι βοηθίνεν πουμαρέ τσσαβέν για τι διορθώνεν ο τρόπος σο σκεφτίνενα ή για μα τι μανγκέν λάθος πράγματα. Ντικχέν ο παράδειγμας ι Ματιάσκο, σο υπηρετίνελα κο Μπέθελ κι Σκανδιναβία. Κάνα ο Ματίας ισινέ έφηβος, λέσκε συμμαθητές πρασάνας-λες οντουλένγκε σο πακιάλας. Κι αρχή, λέσκο ντατ ντα λέσκι ντάι να τζανένας τίποτα ανταλέσκε. Αλλά σοράν ντικχλέ ότι αρχίνελας μα τι αβέλ σίγουρος οντουλένγκε σο πακιάλας. Ο Γίλις, ο ντατ ι Ματιάσκο, βακερέλα ότι βοβ ντα λέσκι ρομνί έπρεπε τι κερέν μπουτ υπομονή. Ο Ματίας πουτσέλας: «Κον ισί ο Ντεβέλ; Ντα άμα η Γραφή νανέ ο Λάφι ι Ντεβλέσκο; Σαρ τζανάσα ότι ο Ντεβέλ μανγκέλα μπαγιά αμένταρ τι κεράς ακαβά ή οκουβά;» Επίσης, πουτσέλας πι νταντές: «Σόσκε τι κρίνελ-μαν κάποιος άμα να νιωθίναβα ή να πακιάβα οντουβά σο πακιάσα τούι;»

Ο Γίλις βακερέλα: «Ισινέ φαρ σο αμαρό τσσαβό πουτσέλας-αμέν ντα ισινέ χολιαμέ, όχι πι νταγιάκε ή μάνγκε, αλλά ι αληθειάκε, σόσκε πακιάλας  ότι η αλήθεια κερέλας λέσκι ζωή μπουτ δύσκολη». Σαρ βοηθιντάς ο Γίλις πι τσσαβές; «Μπεσάβας ντα κεράβας λέσαρ λάφι μπουτ σαάτια». Ο Γίλις απλά ασουνέλας ι Ματιάς ντα κερέλας λέσκε ερωτήσεις για τι αγαβέλ σαρ νιωθίνελας ντα σο πακιάλας. Μπάζιμα, ο Γίλις εξηγίνελας κάτι πι τσσαβέσκε ντα βακερέλας λέσκε τι σκεφτίνελ-λες καέκ ντούι ντιβεσά ντα σοράν τι κερέν πάλι λάφι. Γιαβερά φαρ, ο Γίλις βακερέλας ότι βοβ-ντα χρειαζίντιβελας μερικά ντιβεσά για τι σκεφτίνελ κάτι σο βακερντάας λέσκο τσσαβό. Επειδή κερένας συχνά λάφι, ο Ματίας αρχισάλο τι αγαβέλ σο σημασία τθερέλα ο λύτρος ντα ότι ο Ιεχωβά μανγκέλα-αμέν ντα τθερέλα ο δικαίωμας τι κυβερνίνελ-αμέν. Λέσκο ντατ βακερέλα: «Ανταβά λιντάς μπουτ χρόνος ντα μπουτ φαρ ισινέ δύσκολος. Όμως, σιγά σιγά, η αγάπη ι Ιεχωβάσκε μπαριλί αντρέ λέσκε γκίστε. Μι ρομνί ντα με ισινάμ μπουτ χαρούμενοι σο προσπαθιντάμ με υπομονή ντα καταφεριντάμ τι βοηθίνας αμαρέ τσσαβές ντα τι ερεσάς λέσκε γκίστε αζομάν σο ισινέ έφηβος».

Καζόμ ο Γίλις ντα λέσκι ρομνί βοηθίνενας με υπομονή πουμαρέ τσσαβές, ισινέ σίγουροι ότι ο Ιεχωβά κα βοηθίνελας-λεν. Ο Γίλις βακερέλα: «Μπουτ φαρ, βακεράβας κο Ματίας ότι η μπαρί αγάπη σο τθεράας λέσκε κερέλας λέσκε νταγιά ντα μαν τι προσευχίντιβας ατζέ πιο μπουτ κο Ιεχωβά για τι βοηθίνελ-λες τι αγαβέλ». Ο ντατ ντα η ντάι ι Ματιάσκι ισί μπαγιά ευτυχισμέ σο κερντέ υπομονή ντα να τσσιναντέ τι προσπαθίνεν!

Χρειαζίντιβασα επίσης υπομονή κάνα φροντίνασα εκχέ τζενές αμαρέ φαμιλιάταρ ή εκχέ αμαλές σο τθερέλα εκ νασφαλιπέ σο ατσσικιαρέλα μπουτ μπρεσά. Ντικχέν ο παράδειγμας ι Ελενάκο * (ντικχ ι υποσημείωση), σο βόι-ντα μπεσέλα κι Σκανδιναβία.

Πριν οχτώ μπρεσά περίπου, ο ρομ ι Ελενάκο κερντάς ντούι εγκεφαλικά σο αντέ λέσκε μπαρό πρόβλημας κο σορό. Οτθάρ, ναστί νιωθίνελα χαρά, στεναχώρια ή συμπόνια. Ανταγιά κατάσταση ισί μπουτ δύσκολη ι Ελενάκε. Βόι βακερέλα: «Χρειαζίντιβελα μπουτ υπομονή ντα μπουτ προσευχές». Επίσης, βακερέλα: «Κάτι σο ντέλα-μαν κουράγιος ισί μο αγαπημέ εδάφιος, ο Φιλιππησίους 4:​13, σο βακερέλα: “Σαρέ ι πραγματένγκε τθεράβα ι ζορ χάρη οντουλέσταρ σο ντέλα-μαν ζορ”». Με τη δύναμη ντα με τη βοήθεια ι Ιεχωβάσκι, η Έλενα νταϊντίνελα ανταγιά κατάσταση με υπομονή.​—Ψαλμός 62:5, 6.

Ο Ιεχωβά ντέλα ο πιο λατσσό παράδειγμας για τι κεράς υπομονή. (2 Πέτρου 3:​15) Κι Γραφή, μπουτ φαρ διαβάνασα καζόμ μπαρί υπομονή κερέλα ο Ιεχωβά. (Νεεμίας 9:​30· Ησαΐας 30:​18) Ντένα-τουμέν γκοντί σο κερντάς ο Ιεχωβά κάνα ο Αβραάμ πουτσλάς-λες μπουτ φαρ για την απόφαση σο λιντάς τι καταστραφίνελ ο Σόδομα; Ο Ιεχωβά να τσσιναντάς τον Αβραάμ. Ασουντάς με υπομονή σο-ντα ερώτηση ντα ανησυχία τθερέλας ο Αβραάμ. Σοράν, ο Ιεχωβά σικαντάς ότι ασουντάας λέσκε ανησυχίες ντα βακερντάς λέσκε ότι να κα καταστραφίνελας ο Σόδομα αν κα αρακχέλας ατζέ-ντα ντεσέ δίκαιε τζενέν οτθέ. (Γένεση 18:​22-33) Ο Ιεχωβά πάντα ασουνέλα με υπομονή, ντα ποτές να αντιδράνελα υπερβολικά!

Η υπομονή ισί εκ μπουτ σημαντική ιδιότητα κατά νεβό χαρακτήρας σο πρέπει τι τθερέν σαρέ ο Χριστιανοί. Αν κεράσα ο πιο λατσσό σο μπορίνασα για τι κεράς υπομονή, δοξάνασα αμαρέ λατσσέ Νταντές, ι Ιεχωβάς, σο κερέλα υπομονή, ντα κα αβάς οντουλένταρ «σο τθερένα πίστη ντα υπομονή, ντα οτθάρ κληρονομίνενα ο υποσχέσεις».​—Εβραίους 6:​10-12.