ΠΕΡΣΙ, χιλιάδες πφραλά σαρό κο ντουνιάς αβιλέ πρεσβύτεροι ντα διακονικοί υπηρέτες. Αν ισινέν εκ ανταλένταρ, σίγουρα χαιρίνενα σο μπορίνενα τι υπηρετίνεν ι Ιεχωβάς ντα ι πφραλέν ανταλέ νεβέ τροπόσαρ.

Ισί όμως λογικός τι αγχώνεν-ντα χάνικ. Ο Τζέισον, εκ τερνό πρεσβύτερος, βακερέλα: «Κι αρχή κάνα διορισάλομ, νιωθίναβας ότι μο νεβέ ευθύνες τασαβένας-μαν». Ο Μωυσής ντα ο Ιερεμίας νιωθίνενας ότι να μπορίνενας τι ντεν-λεν πέρα κάνα λιντέ νεβέ διορισμοί κατά Ιεχωβά. (Έξοδος 4:​10· Ιερεμίας 1:6) Αν νιωθίνενα τουμέν-ντα αντικάς, σο μπορίνενα τι κερέν για τι ντεν πιο μπουτ μπέσα τουμαρέ νεαυτόστε ντα τι συνεχίνεν τι κερέν πρόοδος; Μπορίνενα τι σικλιόν μπουτ κατά παράδειγμας ι Τιμοθεόσκο.​—Πράξεις 16:​1-3.

Ο Τιμόθεος μάλλον ισινέ περίπου 20 μπρεσένγκο κάνα αρχισάλο τι κερέλ ταξίδια ι Παυλόσαρ. Κι αρχή, ο Τιμόθεος μπορεί τι νιωθίνελας ότι να μπορίνελας τι σικλιαρέλ ντα τι ντελ συμβουλές ι γιαβερέν επειδή ισινέ μπουτ τερνό. (1 Τιμόθεο 4:​11, 12· 2 Τιμόθεο 1:1, 2, 7) Όμως, συνεχιντάς τι κερέλ πρόοδος ντα ντες μπρεσά πιο σοράν ο Παύλος βακερντάς κο Φιλιππήσιοι: «Τθεράβα ελπίδα, άμα μανγκέλα ο Κύριος Ιησούς, τι μπουτσσαβάβ τουμένγκε ατζεχάνικ ι Τιμοθεός». Σόσκε νιωθίνελας αντικάς ο Παύλος; Βοβ βακερντάς: «Να τθεράβα καεκχέ γιαβερές σαρ λέστε».​—Φιλιππησίους 2:​19, 20.

Σόσκε ισί ο Τιμόθεος εκ μπουτ λατσσό παράδειγμας ι πρεσβυτερόνγκε; Ντικχέν σιοβ λόγοι.

1. Ενδιαφερίντιβελας μπαγιά ι τζενένγκε. Ο Παύλος βακερντάς κο πφραλά σο μπεσένας κο Φίλιπποι ότι ο Τιμόθεος κα “ενδιαφερίντιβελας μπαγιά” λένγκε. (Φιλιππησίους 2:​20) Ο Τιμόθεος μανγκέλας ο πφραλά τι ατσσόν πασέ κο Ιεχωβά ντα ισινέ έτοιμος τι ντελ πι σαατίσταρ ντα πι ζοριάταρ για τι βοηθίνελ-λεν.

Ο Γουίλιαμ, σο ισί πρεσβύτερος πιο μπουτ από 20 μπρεσά, πάντα βακερέλα κο νεβέ πρεσβύτεροι: «Τι μανγκέν ι πφραλέν. Τι ντικχέν πρώτα λένγκε ανάγκες ντα σοράν ο πράγματα σο πρέπει τι οργανώνεν ντα τι κανονίνεν κι κχανγκιρί». Μα τι αβέν σαρ ο οδηγός εκχέ λεωφορειόσκο σο πιο μπουτ ενδιαφερίντιβελα τι ερεσέλ πι σαατίστε κι κάθε στάση παρά τι λελ ι τζενέν.

2. Τσσουβέλας ο έργος ι Ιεχωβάσκο κι πρώτη θέση. Ο Παύλος βακερντάς ότι ο Τιμόθεος ισινέ διαφορετικός οντουλένταρ σο “ντικχένας πουμαρό συμφέρον, [ντα] όχι ι Ιησού Χριστόσκο”. (Φιλιππησίους 2:​21) Ο Παύλος ντικχλάς ότι μερικά πφραλά ντένας μπουτ προσοχή πουμαρέ νεαυτόστε. Μπάζιμα τσσουβένας οντουλά σο μανγκένας βον πιο οπρέ κατά έργος ι Ιεχωβάσκο. Αλλά ο Τιμόθεος να κερέλας-λες ανταβά! Κάνα τθερέλας ι ευκαιρία τι κερέλ πιο μπουτ κο έργος κι Ντεβλέσκο, ισινέ έτοιμος σαρ ο Ησαΐας, σο βακερντάς: «Ακατέ ισινόμ! Μπούτσσαβ-μαν!»​—Ησαΐας 6:8.

Σαρ μπορίνενα τι αβέν ισορροπημέ κάνα φροντίνενα για το ανάγκες σο τθερένα τουμέν ντα για το ανάγκες ι κχανγκιριάκε; Πρώτον, τι ακολουθίνεν ι συμβουλή ι Παυλόσκι: «Τι αβέν σίγουροι ότι αγαβένα καλά ισί ο πιο σημαντικά πράγματα». (Φιλιππησίους 1:​10) Τι τσσουβέν πρώτα ο έργος ι Ιεχωβάσκο. Δεύτερον, νασέν κατά πράγματα σο λένα τουμένταρ μπουτ σαάτι ντα ζορ. Ο Παύλος βακερντάς κο Τιμόθεος: «Τι νασές κατά πράγματα σο μανγκένα ο τζενέ κάνα ισί τερνέ, αλλά τι προσπαθίνες τι τθερές δικαιοσύνη, πίστη, αγάπη, ειρήνη».​—2 Τιμόθεο 2:22.

3. Μαρέλας-πες κο έργος κι Ιεχωβάσκο. Ο Παύλος βακερντάς: «[Ο Τιμόθεος] σαρ εκ χουρντό πι νταντέσαρ υπηρετιντάς σαρ δούλος μάντζαρ για τι βακέρντιβεν πιο μπουτ ο λατσσέ αμπέρια». (Φιλιππησίους 2:​22) Ο  Τιμόθεος ισινέ μπουτιαρνό. Μαρέλας-πες κο έργος κι Ιεχωβάσκο γιεκ ι Παυλόσαρ, ντα ανταβά κερντάς πιο ζουρανί λένγκι φιλία.

Κι οργάνωση κι Ιεχωβάσκι αντιβές ισί μπουτ έργος τι κεράς. Ανταβά έργος ντέλα μπαρί χαρά ντα κα βοηθίνελ-τουμέν τι αβέν πιο πασέ τουμαρέ πφραλέντζαρ ντα πφενίντζαρ. Οτθάρ, τι αβέν σίγουροι ότι πάντα τθερένα «μπουτ πράγματα τι κερέν κο έργος κι Κυριόσκο».​—1 Κορινθίους 15:58.

4. Κερέλας οντουλά σο σικλιόλας. Ο Παύλος γραφιντάς κο Τιμόθεος: «Ακολουθιντάν προσεκτικά μο σικλιαριπέ, ο τρόπος σο τζουβντιάβα, μο σκοπός, μι πίστη, μι υπομονή, μι αγάπη, ο τρόπος σο νταϊντίναβα». (2 Τιμόθεο 3:​10) Ο Τιμόθεος κερέλας οντουλά σο σικλιόλας, οτθάρ ντιντιλέ-λες πιο μπαρέ ευθύνες.​—1 Κορινθίους 4:17.

Σόσκε μα τι αρακχέν εκχέ πρεσβυτερός με εμπειρία σο κα μπορίνελ τι ντελ-τουμέν συμβουλές ντα κα αβέλ παράδειγμας τουμένγκε; Ο Τομ, σο ισί μπουτ μπρεσά πρεσβύτερος, ντέλα-πες γκοντί ότι εκ έμπειρος πρεσβύτερος ενδιαφερισάλο λέσκε ντα σικλιαρντάς-λες μπουτ λατσσές. Ο Τομ βακερέλα: «Μπουτ φαρ μανγκάβας λέσταρ συμβουλές ντα κεράβας-λεν. Ανταβά βοηθιντάς-μαν σουγκό τι νταβ πιο μπουτ μπέσα μι νεαυτόστε».

5. Συνεχιντάς τι κερέλ μπαρέ προσπάθειες. Ο Παύλος βακερντάς κο Τιμόθεος: «Τι κερές μπαρέ προσπάθειες με στόχος τι αβές αφοσιωμέ κο Ντεβέλ». (1 Τιμόθεο 4:7) Ατζέ-ντα αν εκ αθλητής τθερέλα προπονητής, πρέπει τι γυμνάντιβελ κορκορό-ντα. Ο Παύλος βακερντάς κο Τιμόθεος: «Συνέχινε τι διαβάνες ανγκλάλ κο γιαβερά, τι ενθαρρύνες, τι σικλιαρές. . . . Τι σκεφτίνες ανταλά πράγματα· τι τθερές το γκι λέντε, για τι αγαντίντιβελ σαριλέντε ότι κερέσα πρόοδος».​—1 Τιμόθεο 4:​13-15.

Τουμέν-ντα πρέπει τι συνεχίνεν τι βελτιώνεν τουμαρέ ικανότητες. Τι διαβάνεν ντα τι σκεφτίνεν προσεκτικά ι Γραφή ντα τι σικλιόν ο πιο νεβέ οδηγίες σο ντέλα η οργάνωση. Μα τι στηρίντιβεν μπουτ τουμαρέ νεαυτόστε. Κα αβέλας λάθος τι σκεφτίνεν ότι τθερένα αζόμ μπουτ μπαρί εμπειρία σο μπορίνενα τι αντιμετωπίνεν ι κάθε κατάσταση χωρίς τι ρόντεν προσεκτικά. Σαρ ο Τιμόθεος, “μα τσσιναβέν τι ντεν προσοχή κο πράγματα σο τθερένα σχέση τουμαρέ νεαυτόσαρ ντα με το τρόπος σο σικλιαρένα”.​—1 Τιμόθεο 4:16.

6. Στηρίντιβελας κο πνεύμας κι Ιεχωβάσκο. Κάνα κερντάς λάφι για το έργος ι Τιμοθεόσκο, ο Παύλος βακερντάς λέσκε μα τι μπιστρέλ ακαβά: «Αράκχαβ ι άγιε πνευμάσαρ, σο μπεσέλα αντρ’ αμέντε, ανταβά θησαυρός σο ντιντιλό τούτε». (2 Τιμόθεο 1:​14) Ο Τιμόθεος χρειαζίντιβελας τι στηρίντιβελ κο πνεύμας κι Ντεβλέσκο.

Ο Ντόναλντ, σο ισί πρεσβύτερος μπουτ μπρεσά, βακερέλα: «Ο μουρσά σο ισί διορισμέ πρέπει τι αγαβέν ότι λένγκι φιλία ι Ντεβλέσαρ τθερέλα μπαρί αξία. Οντουλά σο κερένα-λες ανταβά, καζόμ τζάλα, κα αβέν πιο ζουρανέ. Αν βον προσευχίντιβενα για τι λεν ο πνεύμας ι Ντεβλέσκο ντα προσπαθίνενα τι τθερέν λέσκο καρπός, κα αβέν μπαρί ευλογία πουμαρέ πφραλένγκε».​—Ψαλμός 84:7· 1 Πέτρου 4:11.

Ισί μπουτ ενθαρρυντικός τι ντικχάς νεβέ διακονικόν ντα πρεσβυτερόν σο βον-ντα συνεχίνενα τι κερέν πρόοδος κο έργος κι Ιεχωβάσκο σαρ κερένα τουμέν. Ο Τζέισον, σο βακερντάμ λέσκε πιο οπρέ, βακερέλα: «Οτθάρ μπερί σο αβιλόμ πρεσβύτερος, σικλιλόμ μπουτ πράγματα ντα ντάβα πιο μπουτ μπέσα μι νεαυτόστε. Ακανά απολαμβάναβα μπαγιά μο διορισμός ντα αγαβάβα ότι ισί σουκάρ προνόμιος!»

Κα συνεχίνεν τουμέν τι κερέν πρόοδος; Αν κα ακολουθίνεν ο παράδειγμας ι Τιμοθεόσκο, αζομάν κα αβέν τουμέν-ντα ευλογία ι πφραλένγκε.