1. Σαρ μπορίνασα τι συνεργαζίντιβας ι Ιεχωβάσαρ;

ΟΤΑΝ ο Ιεχωβά κερντάς ι τζενέν, μανγκέλας τι αβέν λέσκε συνεργάτες. Παρόλο σο ο τζενέ αντιβές ισί ατελείς, ο πιστά τζενέ μπορίνενα τι συνεργαζίντιβεν ι Ιεχωβάσαρ κάθε ντιβές. Για παράδειγμας, αβάσα «συνεργάτες ι Ντεβλέσκε» κάνα βακεράσα ο λατσσέ αμπέρια λέσκε Βασιλειάκε ντα κεράσα μαθητέν. (1 Κορινθίους 3:​5-9) Ισί μπουτ μπαρό προνόμιος σο τραμπιντάς-αμέν ο παντοδύναμος Δημιουργός για τι κεράς εκ αζόμ σημαντικός έργος! Αλλά να συνεργαζίντιβασα ι Ιεχωβάσαρ σάντε κάνα κεράσα έργος. Ανταλέ μαθημάστε, κα ντικχάς γιαβερά-ντα τρόπους σο συνεργαζίντιβασα λέσαρ: κάνα βοηθίνασα αμαρί φαμιλί ντα γιαβερέν κι κχανγκιρί, κάνα σικαβάσα φιλοξενία, κάνα βοηθίνασα κο προγράμματα σο τθερέλα η οργάνωση σαρό κο ντουνιάς ντα κάνα κεράσα πιο μπουτ κι υπηρεσία κι Ιεχωβάσκι.​—Κολοσσαείς 3:23.

2. Σόσκε δεν πρέπει τι συγκρίνας ποτές οντουλά σο κεράσα αμέν ι Ιεχωβάσκε οντουλέντζαρ σο κερένα ο γιαβερά;

² Καζόμ κα ντικχάς ανταβά μάθημας, ισί σημαντικός τι ντας-αμέν γκοντί ότι ο κάθε τζενό ισί διαφορετικός. Η ηλικία, η υγεία, ο περιστάσεις ντα ο ικανότητες σο τθερέλα ο κάθε εκ νανέ ίδιες. Οτθάρ, μα συγκρίνεν οντουλά σο μπορίνενα τι κερέν τουμέν ι  Ιεχωβάσκε οντουλέντζαρ σο μπορίνενα τι κερέν ο γιαβερά. Ο απόστολος Παύλος βακερντάς: «Ο κάθε εκ τουμένταρ τι σκεφτίνελ με προσοχή οντουλά σο κερέλα, ντα αζομάν κα τθερέλ λόγος τι χαιρίνελ σάντε οντουλέσκε σο κερντάς βοβ ντα όχι επειδή συγκρίνελα-πες ι γιαβερέσαρ».​—Γαλάτες 6:4.

3. Σόσκε μπορίνασα τι βακεράς ότι κον φροντίνελα πι φαμιλί συνεργαζίντιβελα ι Ντεβλέσαρ;

³ Ο Ιεχωβά μπεκλεντίνελα αμένταρ τι φροντίνας αμαρί φαμιλί. Για παράδειγμας, μπορεί τι χρειαζίντιβελα τι νικαβέν λοβέ για το ανάγκες τουμαρέ φαμιλιάκε. Μπουτ νταγιά πρέπει τι μπεσέν κχερέ για τι αρακχαβέν πουμαρέ χουρντέ τσσαβέν. Ντα κάνα αμαρό ντατ ντα αμαρί ντάι να μπορίνενα τι φροντίνεν πουμαρό νεαυτός, μπορεί τι χρειαζίντιβελα τι φροντίνας-λεν αμέν. Ανταλά πράγματα πρέπει τι αβέν-πες. Η Γραφή βακερέλα: «Άμα εκ τζενό να ντέλα ο αναγκαία πι τζενέντε, ντα ειδικά πι φαμιλιάτε, νασλό κατά πίστη ντα ισί χειρότερος οντουλέσταρ σο να τθερέλα πίστη». (1 Τιμόθεο 5:8) Άμα τθερένα ευθύνες αντρέ κι φαμιλί, μπορεί μα τι κερένα ι Ιεχωβάσκε σαρέ οντουλά σο κα μανγκένας τι κερέν. Αλλά μα χασαρέν τουμαρό κουράγιος! Ο Ιεχωβά χαιρίνελα κάνα ντένα ο αναγκαία τουμαρέ φαμιλιάτε.​—1 Κορινθίους 10:31.

4. Σαρ μπορίνενα ο νταντά ντα ο νταγιά τι τσσουβέν πρώτα ι Βασιλεία, ντα καλά αποτελέσματα τθερένα;

⁴ Ο νταντά ντα ο νταγιά σο ισί Χριστιανοί συνεργαζίντιβενα ι Ιεχωβάσαρ κάνα βοηθίνενα πουμαρέ τσσαβέν τι τθερέν στόχους κι υπηρεσία κι Ιεχωβάσκι. Μπουτ νταντά ντα νταγιά κερντέ-λες ανταβά. Ο αποτέλεσμας ισινέ ότι πιο σοράν λένγκε τσσαβέ ντα λένγκε τσσαγιά αποφασιντέ τι υπηρετίνεν ι Ιεχωβάς κι ολοχρόνια υπηρεσία, ατζέ-ντα ντουρ πουμαρέ κχερέσταρ. Μερικοί ισί ιεραπόστολοι, γιαβερά κερένα σκαπανικός οτθέ σο υπαρχίντιβελα πιο μπαρί ανάγκη για τι βακέρντιβεν ο λατσσέ αμπέρια ντα κάποιοι υπηρετίνενα κο Μπέθελ. Σίγουρα, κάνα λένγκε τσσαβέ υπηρετίνενα ντουρ, ο νταντά ντα ο νταγιά μπορεί μα τι τθερένα ι ευκαιρία τι ντικχέν πουμαρέ τσσαβέν καζόμ κα μανγκένας. Αλλά, χωρίς τι ντικχέν πουμαρό νεαυτός, ενθαρρύνενα-λεν τι συνεχίνεν τι υπηρετίνεν ι Ιεχωβάς κατέ-ντα τι αβέν. Σόσκε; Επειδή ισί μπουτ χαρούμενοι σο λένγκε τσσαβέ τσσουβένα ι Ιεχωβάς κι πρώτη θέση πουμαρέ ζωγιάτε. (3 Ιωάννη 4) Μπουτ ανταλέ νταντένταρ ντα νταΐνταρ, νιωθίνενα σαρ η Άννα, σο βακερντάς ότι “δανειντάς” πι τσσαβές τον Σαμουήλ κο Ιεχωβά. Νιωθίνενα ότι ισί μπαρό προνόμιος τι συνεργαζίντιβεν ι Ιεχωβάσαρ ανταλέ τροπόσαρ.​—1 Σαμουήλ 1:28.

5. Σαρ κα μπορίνενας τι βοηθίνεν ι πφραλέν τουμαρέ κχανγκιριάτε; (Ντικχ ι φωτογραφία σο ισί κι αρχή)

⁵ Άμα να πιένενα-τουμέν ι φαμιλιάκε υποχρεώσεις, μήπως κα μπορίνενας τι βοηθίνεν ι πφραλέν σο ισί νασφαλέ ή πφουρέ ή σο τθερένα γιαβερά ανάγκες; Ή μπορίνενα τι βοηθίνεν οντουλέν σο φροντίνενα ασακέ τζενέν; Ρόντεν τουμαρέ κχανγκιριάτε οντουλένγκε σο μπορεί τι χρειαζίντιβενα βοήθεια. Για παράδειγμας, μπορεί τι υπαρχίντιβελα εκ πφεν σο αρακχαβέλα πι νταντές ή πι νταγιά σο ισί πφουρέ. Κα μπορίνενας τι κερέν παρέα λάκε νταντέσαρ ή λάκε νταγιάσαρ για τι μπορίνελ βόι τι κερέλ γιαβερά πράγματα; Ή μπορεί τι βακερέν εκχέσκε τι γκερέν-λες τουμέν κι συνάθροιση, τι βοηθίνεν-λες ι ψωνίντζαρ ή τι τζαν τι ντικχέν εκχέ τζενές κο νοσοκομείος. Κάνα κερένα-λες ανταβά, μπορεί τι συνεργαζίντιβενα ι Ιεχωβάσαρ για τι ντιντιόλ απάντηση εκχέ προσευχιάτε.​—Διαβάνεν 1 Κορινθίους 10:24.

6. Σαρ μπορίνασα τι σικαβάς φιλοξενία;

⁶ Ο συνεργάτες ι Ντεβλέσκε ισί γνωστοί για τη φιλοξενία σο σικαβένα. Κι Γραφή, η λέξη «φιλοξενία» μανγκέλα τι βακερέλ «λατσσιπέ ι ξενόνγκε». (Εβραίους 13:2, υποσημείωση) Κο Λάφι κι Ντεβλέσκο μπορίνασα τι διαβάνας παραδείγματα σο σικλιαρένα-αμέν σαρ τι σικαβάς ανταβά λατσσιπέ. (Γένεση 18:​1-5) Μπορίνασα ντα πρέπει τι βοηθίνας ι γιαβερέν κάνα-ντα ντιντιόλα-αμέν η ευκαιρία τι κεράς-λες ανταβά, είτε «ισινάμ λέντζαρ τζενέ κι πίστη» είτε όχι.​—Γαλάτες 6:10.

7. Σαρ βοηθίντιβενα κάνα σικαβένα φιλοξενία κο ολοχρόνιοι υπηρέτες;

⁷ Για τι συνεργαζίντιβεν ι Ιεχωβάσαρ, μήπως μπορίνενα τι σικαβέν φιλοξενία κο ολοχρόνιοι υπηρέτες σο χρειαζίντιβενα εκ τθαν τι μπεσέν; (Διαβάνεν 3 Ιωάννη 5, 8) Όταν κεράσα-λες ανταβά, βοηθίντιβενα εμ βον εμ αμέν. Η Γραφή βακερέλα ότι αντικάς “ενθαρρύντιβασα” ο εκ κατά γιαβέρ. (Ρωμαίους 1:​11, 12) Ντικχέν ι εμπειρία σο τθερέλας ο Όλαφ. Όταν ισινέ τερνό, εκ εργένη επίσκοπος περιοχής γκιλό λέσκε κχανγκιριάτε ντα χρειαζίντιβελας εκ τθαν τι μπεσέλ, αλλά καέκ κατά κχανγκιρί να μπορίνελας τι βοηθίνελ-λες. Ο Όλαφ πουτσλάς πι νταντές ντα πι νταγιά, σο να ισινέ κι αλήθεια, αν κα μπορίνελας ο επίσκοπος περιοχής τι μπεσέλ λένγκε κχερέστε. Βον δεχτιντέ, αλλά βακερντέ ότι ο Όλαφ κα χρειαζίντιβελας τι σοβέλ κο καναπές. Ο Όλαφ κερντάς-λες ανταβά, ντα να μετανιωσάλο. Νακχλάς εκ μπουτ σουκάρ εβδομάδα με τον επίσκοπο περιοχής! Ιστίνας πρωί ντα κερένας λάφι μπουτ σουκάρ πραγματένγκε καζόμ χάνας πρωινός. Ο επίσκοπος περιοχής ενθαρρυντάς-λες αζόμ μπουτ σο ο Όλαφ αποφασιντάς τι αρχίνελ ι ολοχρόνια υπηρεσία. Ο Όλαφ, 40 μπρεσά ακανά, υπηρετίνελα σαρ ιεραπόστολος διάφορε τθεμέντε.

8. Σόσκε πρέπει τι σικαβάς λατσσιπέ ατζέ-ντα αν ο γιαβερά να σικαβένα εκτίμηση κι αρχή; Βακερέν εκ παράδειγμας.

⁸ Μπορίνασα τι σικαβάς αγάπη ι ξενόνγκε μπουτέ τροπόντζαρ, ατζέ-ντα άμα κι αρχή να σικαβένα εκτίμηση. Για παράδειγμας, εκ πφεν κι Ισπανία κερέλας μελέτη κι Γιέσικα, σο ισινέ κατά Ισημερινός. Εκ ντιβές, σαρ κερένας ι μελέτη, η Γιέσικα να σταματίνελας τι ροβέλ. Η πφεν πουτσλάς-λα σο τθερέλας. Η Γιέσικα βακερντάς λάκε ότι πριν τι τζαλ κι Ισπανία ισινέ μπουτ τσορορί. Εκ ντιβές να τθερέλας ιτς χαμπέ για τι ντελ πι τσσαγιά, τθερέλας σάντε πανί. Η Γιέσικα, καζόμ προσπαθίνελας τι σοβκιαρέλ ι χουρντιά, προσευχίντιβελας για βοήθεια. Χάνικ πιο σοράν, γκιλέ λάκε ντούι Μάρτυρες ντα ντινέ-λα εκ περιοδικός. Αλλά βόι να συμπεριφερισάλι λένγκε λατσσές, πφαραντάς ο περιοδικός σο ντινέ-λα, ντα βακερντάς: «Ανταβά κα νταβ μι τσσαγιά τι χαλ;» Ο πφενιά προσπαθιντέ τι ντεν-λα κουράγιος, αλλά η Γιέσικα να ασουνέλας. Σοράν, ο πφενιά μουκχλέ αβριάλ λάκε πορτάταρ εκ καλάθι χαμπιματέντζαρ. Ακανά, καζόμ κερένας ι μελέτη, ροβέλας επειδή αγαντάς ότι να τσσουντάας σημασία ι απάντηση σο ντινάς ο Ντεβέλ λάκε προσευχιάτε. Αλλά η Γιέσικα ισινέ αποφασισμέ τι υπηρετίνελ ι Ιεχωβάς. Επειδή οντουλά πφενιά ντινέ αντράλ πουμαρέ γκίσταρ, ο αποτελέσματα ισινέ μπουτ λατσσέ.​—Εκκλησιαστής 11:1, 6.

9, 10. (α) Καλά ισινέ μερικές ευκαιρίες σο τθερένας ο Ισραηλίτες για τι κερέν αντράλ πουμαρέ γκίσταρ πράγματα ι Ντεβλέσκε; (β) Καλέ τροπόντζαρ μπορίνενα ο πφραλά τι βοηθίνεν κι κχανγκιρί αντιβές;

⁹ Κο πουρανέ μπρεσά, ο Ισραηλίτες τθερένας μπουτ διαφορετικές ευκαιρίες για τι κερέν αντράλ πουμαρέ γκίσταρ πράγματα ι Ντεβλέσκε. (Έξοδος 36:2· 1 Χρονικών 29:5· Νεεμίας 11:2) Αλλά τουμέν-ντα αντιβές τθερένα μπουτ ευκαιρίες για τι ντεν αντράλ τουμαρέ γκίσταρ τουμαρό σαάτι, τουμαρέ υλικά πράγματα ντα τουμαρέ ικανότητες για τι βοηθίνεν ι πφραλέν. Κάνα κερένα-λες ανταβά, κα αβέν μπουτ χαρούμενοι ντα ο Ιεχωβά κα ευλογίνελ-τουμέν.

¹⁰ Ο Λάφι ι Ντεβλέσκο βακερέλα ι μουρσένγκε κι κχανγκιρί τι υπηρετίνεν ι γιαβερέν σαρ διακονικοί υπηρέτες ντα πρεσβύτεροι ντα αντικάς κα συνεργαζίντιβεν ι Ιεχωβάσαρ. (1 Τιμόθεο 3:1, 8, 9· 1 Πέτρου 5:2, 3) Οντουλά σο κερένα-λες ανταβά, μανγκένα τι βοηθίνεν ι γιαβερέν με τρόπους σο επηρεάνενα λένγκι ζωή ντα λένγκι λατρεία. (Πράξεις 6:​1-4) Πουτσλέ-τουμέν ο πρεσβύτεροι αν κα μανγκένας τι υπηρετίνεν σαρ ταξιθέτης ή τι βοηθίνεν κο έντυπα, κο τομείς, κι περιποίηση κι κχανγκιριάκι ή κάπου γιαβερτθέ; Ο πφραλά σο βοηθίνενα ανταλέ τροπόντζαρ βακερένα ότι απολαμβάνενα-λες μπουτ.

11. Σαρ βοηθίντιλι εκ πφεν σο συμμετεχιντάς κο προγράμματα για την οικοδόμηση;

¹¹ Οντουλά σο συμμετεχίνενα αντράλ πουμαρέ γκίσταρ κο προγράμματα για την οικοδόμηση κερένα νεβέ αμαλέν. Εκ πφεν, η Μάρτζι, κερντάς μπουτί 18 μπρεσά σε προγράμματα για τι χτίντιβεν Αίθουσες Βασιλείας. Οτθέ, χρειαζίντιβελας τι σικαβέλ ενδιαφέρον ι πιο τερνέ πφενίνγκε ντα τι βοηθίνελ-λεν τι σικλιόν πιο μπουτ πράγματα. Βακερέλα ότι ανταβά ισί εκ μπουτ λατσσό τρόπος για τι ενθαρρύνελ ο εκ ι γιαβερές. (Ρωμαίους 1:​12) Κι πραγματικότητα, κάνα τθερέλας δυσκολίες, ο αμαλά σο κερντάς  κι οικοδόμηση ενθαρρύνενας-λα. Συμμετεχιντέν ποτές τουμέν σε εκ ασακό πρόγραμμας; Μπορίνενα τι συμμετεχίνεν, ατζέ-ντα άμα να τζανένα τι κερέν ασακέ μπουτιά.

12. Σαρ μπορίνενα τι βοηθίνεν κάνα αβέλα-πες εκ καταστροφή;

¹² Επίσης, μπορίνασα τι συνεργαζίντιβας ι Ιεχωβάσαρ όταν βοηθίνασα αμαρέ πφραλέν κάνα αβέλα-πες εκ καταστροφή. Για παράδειγμας, μπορίνασα τι ντας λοβέ. (Ιωάννης 13:​34, 35· Πράξεις 11:​27-30) Εκ γιαβέρ τρόπος σο μπορίνασα τι βοηθίνας ισί τι καθαρίνας ή τι λατσσαράς ζημιές σο αβιλέ-πες κατά καταστροφή. Η Γκαμπριέλα, εκ πφεν κατά Πολωνία σο σχεδόν καταστραφισάλο λάκο κχερ από εκ πλημμύρα, χαιρισάλι μπουτ κάνα ντικχλάς πφραλέν γιαβερέ κχανγκιρίνταρ τι αβέν ντα τι βοηθίνεν-λα. Κάνα σκεφτίνελα ανταγιά εμπειρία, βακερέλα ότι να ανησυχίνελα για το υλικά πράγματα σο χασαρντάς, αλλά ντέλα προσοχή οντουλέντε σο κερδιντάς. Βόι βακερέλα: «Ανταγιά εμπειρία σικαντάς μάνγκε ότι ισί μπαρό προνόμιος ντα ντέλα μπαρί χαρά ντα ευτυχία τι αβάς αντρέ κι Χριστιανική κχανγκιρί». Μπουτ πφραλά σο λένα βοήθεια κάνα αβέλα-πες εκ καταστροφή βακερένα ότι νιωθίνενα βον-ντα αντικάς. Ντα κον συνεργαζίντιβελα ι Ιεχωβάσαρ για τι ντελ βοήθεια οντουλέ πφραλέν νιωθίνελα μπουτ ευτυχισμέ ντα πφερντό.​—Διαβάνεν Πράξεις 20:​35· 2 Κορινθίους 9:6, 7.

13. Σαρ κεράσα πιο ζουρανί αμαρί αγάπη ι Ιεχωβάσκε κάνα κεράσα πράγματα λέσκε αντράλ αμαρέ γκίσταρ; Βακερέν εκ παράδειγμας.

¹³ Εκ πφεν, η Στέφανι, ντα γιαβερά πφραλά λάκε τθανέστε συνεργασάλε ι Ντεβλέσαρ κάνα βοηθιντέ πφραλέν σο γκιλέας κο Ηνωμένες Πολιτείες επειδή αβέλας-πες τζένγκι λένγκε τθεμέστε. Βοηθιντέ οντουλέ τζενέν τι αρακχέν κχερά ντα έπιπλα. Βόι βακερέλα: «Συγκινίντιβαας καζόμ ντικχάας ι χαρά ντα ι εκτίμηση σο τθερένας κάνα νιωθίνενας ι αγάπη σο σικαβένα ο πφραλά σαρό κο ντουνιάς. Οντουλά φαμιλιά αμντίνενα ότι αμέν βοηθιντάμ-λεν, αλλά η αλήθεια ισί ότι βον βοηθιντέ-αμέν πιο μπουτ. Ντικχλάμ αγάπη, ενότητα, πίστη ντα εμπιστοσύνη κο Ιεχωβά. Σαρέ ανταλά κερντέ πιο ζουρανί αμαρί αγάπη ι Ιεχωβάσκε ντα ανταβά μπαριαρντάς ατζέ πιο μπουτ αμαρί εκτίμηση σαρέ οντουλένγκε σο ντέλα-αμέν λέσκι οργάνωση».

14, 15. (α) Σο βακερντάς ο προφήτης Ησαΐας; (β) Σαρ μπορίνενα ο Χριστιανοί αντιβές τι μοιάζεν κο Ησαΐας;

¹⁴ Κα μανγκένας τι συνεργαζίντιβεν πιο μπουτ ι Ιεχωβάσαρ; Κα μανγκένας τι τζαν οτθέ σο υπαρχίντιβελα πιο μπαρί ανάγκη; Σίγουρα, να χρειαζίντιβελα τι νασάς ντουρ αμαρέ τθεμέσταρ για τι ντας αντράλ αμαρέ γκίσταρ. Αλλά μερικά πφραλά μπορίνενα τι κερέν-λες ανταβά. Βον μοιάζενα κο  προφήτης Ησαΐας. Κάνα πουτσλάς ο Ιεχωβά: «Κας κα μπουτσσαβάβ, ντα κον κα τζαλ αμένγκε;» βοβ βακερντάς: «Ακατέ ισινόμ! Μπούτσσαβ-μαν!» (Ησαΐας 6:8) Τουμέν μανγκένα ντα μπορίνενα τι βοηθίνεν ι οργάνωση ι Ιεχωβάσκι; Καλά ισί μερικοί τρόποι σο μπορίνενα τι βοηθίνεν;

¹⁵ Κάνα κερέλας λάφι για το έργος, ο Ιησούς βακερντάς: «Ο θερισμός ισί μπουτ, αλλά ο εργάτες χάνικ. Οτθάρ, μολίνεν οντουλές σο ισί ο Κύριος κο θερισμός τι μπουτσσαβέλ εργάτες κο θερισμός». (Ματθαίος 9:​37, 38) Μπορίνενα τι υπηρετίνεν σαρ σκαπανείς οτθέ σο υπαρχίντιβελα πιο μπαρί ανάγκη; Ή μήπως μπορίνενα τι βοηθίνεν εκχέ γιαβερές τι κερέλ-λες ανταβά; Μπουτ πφραλά ντα πφενιά νιωθίνενα ότι ο πιο λατσσό τρόπος τι σικαβέν πουμαρί αγάπη ι Ντεβλέσκε ντα ι γιαβερένγκε ισί τι κερέν ο σκαπανικός οτθέ σο υπαρχίντιβελα πιο μπαρί ανάγκη. Μπορίνενα τι σκεφτίνεν γιαβερά τρόπους για τι κερέν πιο μπουτ πράγματα κι υπηρεσία κι Ντεβλέσκι; Αν κα κερέν-λες ανταβά, κα αβέν μπουτ χαρούμενοι.

16, 17. Καλέ γιαβερέ τροπόντζαρ μπορίνενα τι κερέν πιο μπουτ κι υπηρεσία κι Ιεχωβάσκι;

¹⁶ Μανγκένα τι υπηρετίνεν κο Μπέθελ ή τι βοηθίνεν κι οικοδόμηση, είτε για χάνικ καιρός είτε για εκ ή πιο μπουτ ντιβεσά κι εβδομάδα; Η οργάνωση ι Ιεχωβάσκι πάντα τθερέλα ανάγκη τζενέν σο μανγκένα αντράλ πουμαρέ γκίσταρ τι υπηρετίνεν ι Ιεχωβάς κατέ-ντα τι χρειαζίντιβελ, τζενέν σο κα κερέν σο-ντα κα μανγκέν λένταρ, ατζέ-ντα άμα τζανένα τι κερέν λατσσές εκ γιαβέρ μπουτί. Ο Ιεχωβά εκτιμίνελα σαρέ οντουλέν σο μανγκένα αντράλ πουμαρέ γκίσταρ τι κερέν θυσίες ντα τι υπηρετίνεν κάι-ντα χρειαζίντιβελα.​—Ψαλμός 110:3.

¹⁷ Κα μανγκένας τι λεν πιο μπουτ σικλιαριπέ για τι μπορίνεν τι υπηρετίνεν ι Ιεχωβάς πιο λατσσές; Ίσως κα μπορίνενας τι κερέν αίτηση για τι τζαν κι Σχολή για Ευαγγελιστές της Βασιλείας. Ανταγιά σχολή σικλιαρέλα ώριμε πφραλέν ντα πφενίν σο ισί κι ολοχρόνια υπηρεσία για τι χρησιμοποιήνελ-λεν η οργάνωση ι Ιεχωβάσκι πιο μπουτ πραγματέντε. Οντουλά σο παρακολουθίνενα ανταγιά σχολή πρέπει τι αβέν έτοιμοι τι υπηρετίνεν κάι-ντα κα μπουτσσαβέν-λεν. Κα μανγκένας τι κερέν πιο μπουτ ι Ιεχωβάσκε ανταλέ τροπόσαρ;​—1 Κορινθίους 9:23.

18. Καβά κα αβέλ ο αποτέλεσμας άμα συνεργαζίντιβενα ι Ιεχωβάσαρ κάθε ντιβές;

¹⁸ Επειδή ισινάμ ο λαός ι Ιεχωβάσκο, ντάσα αντράλ αμαρέ γκίσταρ ντα σικαβάσα λατσσιπέ ντα αγάπη. Ενδιαφερίντιβασα ι γιαβερένγκε κάθε ντιβές. Ανταβά ανέλα αμένγκε χαρά, ειρήνη ντα ευτυχία. (Γαλάτες 5:​22, 23) Σαρ-ντα τι ισί ο πράγματα τουμαρέ ζωγιάτε, κα τθερέν χαρά άμα μοιάζενα κο Ιεχωβά σο ντέλα αντράλ πι γκίσταρ ντα άμα ισινέν πολύτιμοι συνεργάτες λέσκε!​—Παροιμίες 3:9, 10.