ΙΣΙ καέκ πράγμας σο κα μανγκένας μπουτ τι κερέν κι κχανγκιρί αλλά ακανά ναστί κερένα-λες; Μπορεί τι ισί εκ ευθύνη σο τθερέλα-λα εκ γιαβέρ. Ή μπορεί τι ισί εκ διορισμός ή εκ υπηρεσία σο τθερένας. Αλλά άμα ακανά πφουρίλιλεν, άμα τουμαρί υγεία νανέ λατσσί, άμα τθερένα οικονομικά προβλήματα ή μπουτ πράγματα τι κερέν τουμαρέ φαμιλιάτε, ναστί κερένα οντουλά σο κερένας ανγκλέ. Ή μπορεί τι αβιλέ-πες αλλαγές κι οργάνωση αμαρί ντα ακανά εκ γιαβέρ τζενό τι κερέλα κάτι σο κερένας τουμέν μπουτ μπρεσά. Σο-ντα τι αβέλα-πες, μπορεί τι νιωθίνενα ότι να κερένα σαρέ οντουλά σο κα μανγκένας κι υπηρεσία κι Ντεβλέσκι. Οντουλέσκε, μπορεί μπάζιμα τι τσσουβένα τουμαρέ γκίστε. Σο κα κερέν για μα τι χασαρέν τουμαρό κουράγιος ντα για μα τι αβέλ κερκιπέ ντα χολί τουμαρέ γκίστε; Σαρ κα ατσσικιαρέν τουμαρί χαρά;

Ο παράδειγμας σο μουκχλάς ο Ιωάννης ο Βαφτιστής σικλιαρέλα-αμέν σαρ τι ατσσικιαράς αμαρί χαρά. Ο Ιεχωβά ντινάς κο Ιωάννης μπουτ σουκάρ πράγματα τι κερέλ, αλλά μάλλον να μπεκλεντίνελας οντουλά σο αβιλέ-πες λέσκε ζωγιάτε. Μπορεί μα τι νακχλόας λέσκε γκοντιάταρ ότι κα νακχέλας κι φυλακή πιο μπουτ καιρός από ό,τι νακχλό κι Ντεβλέσκι υπηρεσία. Αλλά ατσσικιαρντάς πι χαρά σαρέ πι ζωγιάτε. Σο βοηθιντάς-λες; Ντα σαρ κα ατσσικιαράς αμέν-ντα αμαρί χαρά ατζέ-ντα άμα ο πράγματα να τζάνα σαρ μπεκλεντίναας;

Περίπου κο Απρίλιος 29 Κ.Χ., ο Ιωάννης αρχισάλο τι κερέλ οντουβά σο βακερντάς λέσκε ο Ιεχωβά, τι πουτρέλ ο ντρομ ι Μεσσιάσκε. Βακερέλας: «Μετανιώνεν, σόσκε η Βασιλεία σο ισί κο ουρανός ερεσλί». (Ματθ. 3:2· Λουκ. 1:​12-17) Ασουντέ-λες μπουτ τζενέ. Αβένας μπουτ ντουράλ για τι ασουνέν λέσκε λάφια, ντα μπουτ λένταρ μετανιωσάλε ντα μπολντιλέ. Ο Ιωάννης προειδοποιήνελας μπίνταρανες ι παπαζίν, σο ισαρένας-πες ότι ισινέ σωστοί, ότι άμα να κα αλλάνενας κα καταστραφίντιβενας. (Ματθ. 3:​5-12) Ο πιο σημαντικός πράγμας σο κερντάς ισινέ περίπου κο Οκτώβριος 29 Κ.Χ. κάνα μπολντάς ι Ιησούς. Οτθάρ μπερί, ο Ιωάννης βακερέλας ι γιαβερένγκε τι αβέν μαθητές οντουλέσκε σο βακερντάας ο Ντεβέλ ότι κα αβέλας Μεσσίας, ι Ιησούσκε.​—Ιωάν. 1:​32-37.

Ο Ιεχωβά ντινάς κο Ιωάννης εκ μπουτ σημαντική μπουτί, οντουλέσκε ο Ιησούς βακερντάς: «Σαρέ κατά τζενέ σο μπιάντιλε να νικίστιλο καέκ  πιο μπαρό κατά Ιωάννης Βαφτιστής». (Ματθ. 11:​11) Σίγουρα, ο Ιωάννης χαιρίνελας για το ευλογίες σο λιντάς. Σαρ ο Ιωάννης, μπουτ τζενέ αντιβές τζουβντιλέ μπουτ μπαρέ ευλογίες. Για παράδειγμας, ο Τέρενς ντα λέσκι ρομνί, η Σάντρα, ισί πιο μπουτ από 50 μπρεσά κι ολοχρόνια υπηρεσία. Ο Τέρενς βακερέλα: «Τθεράβας μπουτ σουκάρ διορισμούς. Ισινόμας σκαπανέας, Μπεθελίτης, ειδικός σκαπανέας, επίσκοπος περιοχής, επίσκοπος περιφερείας ντα ακανά ισινόμ πάλι ειδικός σκαπανέας». Χαιρίνασα κάνα λάσα διορισμούς κι Ντεβλέσκι υπηρεσία, αλλά σαρ κα σικλιάς κατά Ιωάννης, πρέπει τι προσπαθίνας τι ατσσικιαράς αμαρί χαρά κάνα ο πράγματα αμαρέ ζωγιάτε αλλάνενα.

Ο Ιωάννης ο Βαφτιστής ατσσικιαρντάς πι χαρά σόσκε να τσσιναντάς ποτές τι εκτιμίνελ οντουλά σο ντινάας-λες ο Ιεχωβά. Ντικχέν εκ παράδειγμας. Σοράν κατά μπολντιπέ ι Ιησούσκο, ο μαθητές ι Ιωαννίσκε αβιλέ πιο χάνικ ενώ ο μαθητές ι Ιησούσκε πιο μπουτ. Ο μαθητές ι Ιωαννίσκε ανησυχίνενας ανταλέσκε ντα βακερντέ λέσκε: «Ντικχ! [ο Ιησούς] μπολέλα, ντα σαρέ τζάνα λέστε». (Ιωάν. 3:​26) Ο Ιωάννης βακερντάς: «Κον τθερέλα ι μποριά ισί ο τζαμουτρό. Αλλά ο αμάλ ι τζαμουτρέσκο, κάνα μπεσέλα ντα ασουνέλα-λες, τθερέλα μπαρί χαρά σο ασουνέλα ι τζαμουτρέσκι φωνή. Οτθάρ με-ντα ισινόμ πφερντό χαρά». (Ιωάν. 3:​29) Ο Ιωάννης να μανγκέλας τι αβέλ πιο λατσσό κατά Ιησούς ούτε νακχλό λέσκε γκοντιάταρ ότι λέσκο διορισμός να ισινέ σημαντικός επειδή ο Ντεβέλ ντινάς κο Ιησούς τι κερέλ εκ πιο μπαρί μπουτί. Αλλά ατσσικιαρντάς πι χαρά σόσκε εκτιμίνελας ι μπουτί σο τθερέλας βοβ σαρ «ο αμάλ ι τζαμουτρέσκο».

Ο Ιωάννης νιωθίνελας πφερντό παρόλο σο λέσκο διορισμός ισινέ δύσκολος. Για παράδειγμας, ο Ιωάννης ισινέ Ναζηραίος οτθάρ μπερί σο μπιάντιλο, οντουλέσκε δεν έπρεπε τι πιλ μολ. (Λουκ. 1:​15) Ο Ιησούς σικαντάς καζόμ απλή ζωή τθερέλας ο Ιωάννης κάνα βακερντάς ότι «να χάλας ούτε πίλας». Οκιά μπάνταρ, ο Ιησούς ντα λέσκε μαθητές να ισινέ Ναζηραίοι, οντουλέσκε μπορίνενας τι τζουβντιόν σαρ ο γιαβερά τζενέ. (Ματθ. 11:​18, 19) Ντα παρόλο σο ο Ιωάννης να κερντάς θαύματα, τζανέλας ότι ανταγιά ζορ ντιντιλί κο μαθητές κι Ιησούσκε, εμ μερικέ τζενέντε σο ανγκλέ ισινέ λέσκε μαθητές. (Ματθ. 10:1· Ιωάν. 10:​41) Αντίς τι μουκχέλ ασακέ διαφορές τι ταρτίνεν λέσκι προσοχή, ο Ιωάννης ατσσιλό αφοσιωμέ σαρέ πι γκίσαρ κο διορισμός σο ντινάας-λες ο Ιεχωβά.

Άμα αμέν-ντα εκτιμίνασα μπουτ αμαρό διορισμός κι υπηρεσία κι Ιεχωβάσκι, κα αρακχαβάς αμαρί χαρά. Ο Τέρενς βακερέλα: «Τθεράβας μι γκοντιάτε ο διορισμός σο λάβας κάθε φαρ». Κάνα ανέλα πι γκοντιάτε πι ζωή κι ολοχρόνια υπηρεσία, βακερέλα: «Να μετανιώναβα ιτς. Σάντε σουκάρ πράγματα ντάβα-μαν γκοντί».

Κα μπαριαράς ι χαρά σο τθεράσα κι υπηρεσία κι Ντεβλέσκι άμα σκεφτίνασα σο ισί οντουβά σο ντέλα αξία κο κάθε διορισμός. Ισί ο μπουτ σουκάρ πράγμας σο ντινάς-αμέν ο Ντεβέλ, τι αβάς λέσκε «συνεργάτες». (1 Κορ. 3:9) Κάνα τθεράσα εκ σουκάρ ντα πααλίς πράγμας, αρακχαβάσα-λες για τι ατσσόλ σουκάρ. Αμέν-ντα, άμα ανάσα αμαρέ γκοντιάτε καζόμ σουκάρ ισί τι υπηρετίνας ι Ντεβλές, κα ατσσικιαράς αμαρί χαρά. Να ντικχάσα άμα οντουλά σο κεράσα ι Ιεχωβάσκε ισί πιο μπουτ οντουλένταρ σο κερένα ο γιαβερά. Ντα να αμντίνασα ότι οντουλά σο ντινάς-αμέν ο Ιεχωβά τι κεράς ισί μπουτ χάνικ ανγκλάλ οντουλέντε σο ντινάς γιαβερέντε.​—Γαλ. 6:4.

Ο Ιωάννης μάλλον τζανέλας ότι λέσκι υπηρεσία να κα ατσσικιαρέλας μπουτ, αλλά μπορεί μα τι τζανέλας καζόμ σουγκό κα τσσινάντιβελας. (Ιωάν. 3:​30) Κο 30 Κ.Χ., σιοβ μασεκά αφού μπολντάς ι Ιησούς, πφαντιλό φυλακή κατά βασιλιάς Ηρώδης. Ατζέ-ντα αζομάν, κερέλας σο νακχέλας λέσκε βαστένταρ για τι ντελ μαρτυρία. (Μάρκ. 6:​17-20) Σο βοηθιντάς-λες τι ατσσικιαρέλ πι χαρά κάνα αβιλέ-πες ανταλά αλλαγές; Τθερέλας πι γκοντιάτε ι Ντεβλέσκε πράγματα.

Καζόμ ο Ιωάννης ισινέ κι φυλακή, λέλας αμπέρι ότι ο έργος ι Ιησούσκο μπαριόλας ατζέ πιο μπουτ. (Ματθ. 11:2· Λουκ. 7:​18) Ισινέ σίγουρος ότι ο Ιησούς ισινέ ο Μεσσίας, αλλά μπορεί τι σκεφτίνελας σαρ κα κερέλας ο Ιησούς σαρέ οντουλά σο βακερέλας η Γραφή ι Μεσσιάσκε. Ο Ιωάννης τζανέλας ότι ο Μεσσίας κα αβέλας βασιλιάς, οτθάρ μπορεί τι πουτσέλας άμα κα αρχίνελας τι κυβερνίνελ σουγκό ντα άμα κα νικαβέλας-λες κατά φυλακή. Μανγκέλας τι τζανέλ  πιο μπουτ οντουλένγκε σο κα κερέλας ο Ιησούς, οντουλέσκε μπουτσσαντάς ντουέν πι μαθητένταρ τι πουτσέν-λες: «Τούι ισινάν Οντουβά σο αβέλα ή τι μπεκλεντίνας γιαβερέσκε;» (Λουκ. 7:​19) Κάνα βουρτισάλε, ο Ιωάννης σίγουρα ασουνέλας-λεν μπουτ προσεκτικά καζόμ κερένας λάφι ι θαυματένγκε σο κερντάας ο Ιησούς ντα βακερένας λέσκε ι απάντηση σο μπουτσσαντάας λέσκε: «Ο κορορέ ακανά ντικχένα, ο μπανγκέ πφιρένα, ο λεπροί αβένα λατσσές, ο κασουκέ ασουνένα, ο μουλέ ιστίνα ντα κο τσορορέ βακέρντιβενα λατσσέ αμπέρια».​—Λουκ. 7:​20-22.

Ο Ιωάννης σίγουρα λιντάς ζορ λένγκε λαφίνταρ. Οντουλά σο σικλιλό σικαντέ ότι ο Ιησούς κερέλας τι νικιόν μπαγιά ο προφητείες σο βακερέλας η Γραφή ι Μεσσιάσκε. Παρόλο σο ο Ιησούς να κα νικαβέλας ι Ιωαννής κατά φυλακή, ο Ιωάννης τζανέλας ότι να κερντάας πι υπηρεσία σινανέ. Παρόλο σο νακχέλας δυσκολίες, τθερέλας λόγους τι αβέλ ευτυχισμέ.

Σαρ ο Ιωάννης, αντικάς αμέν-ντα, άμα τθεράσα αμαρέ γκοντιάτε ι Ντεβλέσκε πράγματα, κα νταϊντίνας χαράσαρ. (Κολ. 1:​9-11) Κα κεράς-λες ανταβά άμα διαβάνασα ι Γραφή ντα σκεφτίνασα οντουλά σο σικλιάσα. Ανταβά κα ανέλ αμαρέ γκοντιάτε ότι οντουλά σο κεράσα κι Ντεβλέσκι υπηρεσία ποτές να κα τζαν χαμέ. (1 Κορ. 15:​58) Η Σάντρα βακερέλα: «Διαβάναβα εκ κεφάλαιος ι Γραφιάκο κάθε ντιβές, ντα ανταβά βοηθίνελα-μαν τι αβάβ πιο πασέ κο Ιεχωβά. Βοηθίνελα-μαν τι τθεράβ μι γκοντιάτε λες, όχι μαν». Ντα ισί λατσσό τι τθεράς αμαρέ γκοντιάτε ο αμπέρια σο λάσα κατά έργος αμαρέ πφραλένγκο. Αντικάς να κα ντικχάς σάντε οντουλά σο αβένα-πες αμαρέ ζωγιάτε αλλά κα τθεράς αμαρέ γκοντιάτε οντουλά σο κερέλα ο Ιεχωβά. Η Σάντρα βακερέλα: «Ο προγράμματα σο νικιόνα κάθε μάσεκ κο JW Broadcasting^® βοηθίνενα-αμέν τι νιωθίνας πιο πασέ κι οργάνωση ντα τι ατσσικιαράς αμαρί χαρά κο διορισμός σο τθεράσα».

Κο χάνικ καιρός σο ο Ιωάννης ο Βαφτιστής κερέλας ι Ντεβλέσκι υπηρεσία, τθερέλας “ο πνεύμας ντα ι ζορ σο τθερέλας ο Ηλίας” ντα, σαρ ο Ηλίας, «ισινέ τζενό σο τθερέλας αισθήματα σαρ αμαρέ». (Λουκ. 1:​17· Ιακ. 5:​17) Άμα σαρ ο Ιωάννης εκτιμίνασα οντουλά σο ντέλα-αμέν ο Ιεχωβά ντα ατσσάσα αφοσιωμέ κι υπηρεσία λέσκι, κα ατσσικιαράς αμέν-ντα αμαρί χαρά σο-ντα τι αβέλ-πες.