1. Σο πρέπει τι κερέν ο Χριστιανοί για τι τελειώνεν ο αγώνας ι ζωγιάκο;

Ο ΧΡΙΣΤΙΑΝΟΙ τθάβντενα κο αγώνας κι ζωγιάκο. Είτε αρχισάλαμ τι τθάβντας ακανά είτε τθάβντασα μπρεσά, πρέπει τι συνεχίνας μέχρι τι ερεσάς κο τέλος. Ο συμβουλές σο ντινάς ο απόστολος Παύλος κο Χριστιανοί κο Φίλιπποι ντένα-αμέν ζορ για τι κεράς-λες ανταβά. Μερικοί οντουλέ Χριστιανόνταρ υπηρετίνενας ι Ιεχωβάς μπουτ μπρεσά κάνα λιντέ ι επιστολή ι Παυλόσκι. Τθάβντενας λατσσές, ντα ο Παύλος αντάς λένγκε γκοντιάτε ότι έπρεπε τι συνεχίνεν τι τθάβντεν με υπομονή. Μανγκέλας τι κερέν οντουβά σο κερντάς βοβ ντα τι “συνεχίνεν τι μαρέν-πες για τι λεν ο βραβείος”.​—Φιλιπ. 3:14.

2. Σόσκε βακεράσα ότι ο συμβουλές σο ντινάς ο Παύλος κο Φιλιππήσιοι ισινέ λατσσέ;

² Ο συμβουλές σο ντινάς ο Παύλος κο Φιλιππήσιοι ισινέ λατσσέ. Ο τζενέ κο Φίλιπποι γκιλέ μπουτ κόντρα ι πφραλέντζαρ αζομάν σο κερντιλί η κχανγκιρί. Κο 50 Κ.Χ., ο Παύλος ντα ο Σίλας ντινέ καν κι Ντεβλέσκι εντολή τι “τζαν κι Μακεδονία”, ντα ερεσλέ κο Φίλιπποι. (Πράξ. 16:9) Οτθέ, ντικχλέ εκχέ τζουβλιά, ι Λυδιά, σο «ασουνέλας, ντα ο Ιεχωβά πουταρντάς ντιπ λάκο γκι» κο λατσσέ αμπέρια. (Πράξ. 16:​14) Μπουτ σουγκό, βόι ντα οντουλά σο μπεσένας λάκε κχερέστε μπολντιλέ. Ο Μπενγκ όμως να ατσσιλό πφαντέ βαστέντζαρ. Μερικά μουρσά λιντέ σβάρνα ι Παυλός ντα ι Σιλάς, γκερντέ-λεν ανγκλάλ κο τζενέ σο κυβερνίνενας ι πόλη ντα βακερντέ ψέματα ότι ανένας προβλήματα. Οτθάρ, νταπλέ-λεν, τσσουντέ-λεν φυλακή ντα σοράν μανγκλέ λένταρ τι νασέν κατά πόλη. (Πράξ. 16:​16-40) Μήπως μουκχλέ-πες; Νάα! Ντα σο κερντέ ο πφραλά ντα ο πφενιά κι νεβί κχανγκιρί; Βον-ντα νταϊντιντέ! Σίγουρα λιντέας μπαρί ζορ κατά λατσσό παράδειγμας ι Παυλόσκο ντα ι Σιλάσκο.

3. Σο τζανέλας ο Παύλος, ντα καλά ερωτήσεις κα ντικχάς;

 ³ Ο Παύλος να μανγκέλας τι μουκχέλ-πες σο-ντα τι αβέλας-πες. (2 Κορ. 4:​16) Τζανέλας όμως ότι, για τι τθάβντελ μέχρι κο τέλος, έπρεπε τι τθερέλ πο γιακχά κο βραβείος. Σο σικλιάσα κατά Παύλος; Καλά παραδείγματα αμαρέ ντιβεσένταρ σικαβένα ότι μπορίνασα αμέν-ντα τι νταϊντίνας παρόλο σο τθεράσα προβλήματα; Ντα σαρ κα κερέν-αμέν μα τι μουκχάς-αμέν ποτές οντουλά σο μπεκλεντίνασα τι αβέν;

4. Σο κερέλας ο Παύλος για μα τι ατσσόλ πφαντέ βαστέντζαρ;

⁴ Ντεν-τουμέν γκοντί σαρ μαρέλας-πες ο Παύλος κάνα γραφιντάς ι επιστολή κο Φιλιππήσιοι. Ισινέ πφαντό πι κχερέστε κι Ρώμη. Ναστί νικιόλας αβρί τι κερέλ λάφι κο τζενέ. Αλλά να ατσσιλό πφαντέ βαστέντζαρ, κερέλας λάφι οντουλέντζαρ σο τζάνας λέσκε κχερέστε ντα γραφίνελας επιστολές κχανγκιρίνγκε σο ισινέ ντουρ. Αντιβές-ντα, μπουτ πφραλά σο ναστί νικιόνα πουμαρέ κχερένταρ κερένα ο πιο λατσσό για τι βακερέν ο λατσσέ αμπέρια κο τζενέ σο τζάνα λένγκε κχερέντε. Ντα γραφίνενα επιστολές σο ντένα ζορ τζενέντε σο ναστί αρακχάσα-λεν κχερέ.

5. Σο βοηθιντάς ι Παυλός τι ατσσικιαρέλ πο γιακχά κο βραβείος σαρ βακερντάς κο εδάφια Φιλιππησίους 3:​12-14;

⁵ Ο Παύλος να μουκχλάς ο λατσσέ ντα ο μπέτι πράγματα σο κερντάας τι ταρτίνεν λέσκι προσοχή. Βακερντάς ότι έπρεπε τι “μπιστρέλ οντουλά σο ισινέ παλάλ” για “τι ερεσέλ οντουλέντε σο ισινέ ανγκλάλ”, γιαβερέ λαφίντζαρ για τι τθάβντελ μέχρι κο τέλος πο αγώνας. (Διαβάνεν Φιλιππησίους 3:​12-14) Σο κερντάς ο Παύλος για μα τι ταρτίντιβελ λέσκι προσοχή; Πρώτον, παρόλο σο κερντάας μπουτ σημαντικά πράγματα πριν τι αβέλ Χριστιανός, πακιάλας ότι οντουλά ισινέ «σκουπίδια». (Φιλιπ. 3:​3-8) Δεύτερον, παρόλο σο νιωθίνελας μπέτι σο γκιλόας κόντρα κο Χριστιανοί, να μουκχλάς τι τσσιναβέλ-λες ανταβά. Ντα τρίτον, να αμντίνελας ότι οντουλά σο κερντάας ι Ιεχωβάσκε ερεσένας. Ο Παύλος κερντάς μπουτ πράγματα κο έργος παρόλο σο τσσουντέ-λες φυλακή, νταπλέ-λες, φουρτιντέ λέσκε μπαρά, βουλιαξάλο ι καραβίντζαρ κο ταξίδια ντα να τθερέλας χαμπέ ή σέα. (2 Κορ. 11:​23-27) Αλλά σο-ντα τι κερντάας ή σο-ντα τι νακχλάας, τζανέλας ότι δεν έπρεπε τι τσσιναβέλ τι μαρέλ-πες. Ανταβά πρέπει τι κεράς αμέν-ντα.

6. Καλά μπορεί τι ισί χάνικ πράγματα σο «ισί παλάλ»;

⁶ Σαρ κα μπιστράς αμέν-ντα «οντουλά σο ισί παλάλ» σαρ κερέλας ο Παύλος; Ισί τζενέ αμένταρ σο νιωθίνενα τύψεις ι πουρανέ αμαρτιένγκε σο κερντέ ντα χρειαζίντιβελα τι νασκιαρέν ανταλά αισθήματα. Άμα νιωθίνασα αντικάς, σόσκε μα τι ρόντας πιο μπουτ πράγματα για το λύτρος σο ντινάς ο Χριστός κάνα σικλιαράσα αμαρό νεαυτός κατά Γραφή; Αμαρό γκι μπορεί τι λοκχιόλ άμα σικλιάσα πιο μπουτ ανταλέ πραγμάσκε, κεράσα σκέψεις ντα προσευχή. Μπορεί ατζέ-ντα τι τσσιναβάς τι νιωθίνας τύψεις ι αμαρτιένγκε σο ο Ιεχωβά συγχωριντάς. Ντικχέν σο γιαβέρ σικλιάσα κατά Παύλος. Ισί τζενέ σο μουκχλέ εκ λατσσί μπουτί για τι κερέν πιο μπουτ ι Ιεχωβάσκε. Άμα κερντάμ-λες αμέν-ντα ανταβά, κα μπιστράς οντουλά σο ισί παλάλ άμα να σικλιντίνασα ι πραγματένγκε σο χασαρντάμ. (Αριθ. 11:​4-6· Εκκλ. 7:​10) «Οντουλά σο ισί παλάλ» μπορεί ατζέ-ντα τι ισί πράγματα σο κερντάμ κι υπηρεσία κι Ιεχωβάσκι ή δοκιμασίες σο τθεράας. Σίγουρα, άμα ανάσα αμαρέ γκοντιάτε σαρ βοηθιντάς-αμέν ο Ιεχωβά κο μπρεσά σο νακχλέ, μπορεί τι τζας πιο πασέ αμαρέ Νταντέστε. Αλλά ανταβά δεν πρέπει ποτές τι κερέλ-αμέν τι  πακιάς ότι οντουλά σο κερντάμ ι Ιεχωβάσκε ερεσένα.​—1 Κορ. 15:58.

7. Σο πρέπει τι κεράς για τι κερδίνας ο αγώνας ι ζωγιάκο σαρ βακερένα ο εδάφια 1 Κορινθίους 9:​24-27; Βακερέν εκ παράδειγμας.

⁷ Ο Παύλος αγαβέλας λατσσές ακαλά λάφια σο βακερντάς ο Ιησούς: «Τι μαρέν-τουμέν». (Λουκ. 13:​23, 24) Τζανέλας ότι, σαρ ο Χριστός, έπρεπε βοβ-ντα τι μαρέλ-πες μέχρι κο τέλος. Οτθάρ βακερντάς ότι ι Χριστιανόνγκι ζωή ισί σαρ ο τθαβντιπέ. (Διαβάνεν 1 Κορινθίους 9:​24-27) Κο τθαβντιπέ, ο τζενέ τθερένα πουμαρέ γκοντιάτε τι ερεσέν κο τέλος ντα να μουκχένα καέκ πράγμας τι ταρτίνελ λένγκι προσοχή. Για παράδειγμας, άμα βον τθάβντενα αντρέ κι πόλη μπορεί τι νακχέν ανγκλάλ κατά μαγαζιά ή γιαβερέ πραγματένταρ σο κα ταρτίνενας λένγκι προσοχή. Αβέλα-πες εκ τζενό σο τθάβντελα τι ατσσόλ ντα τι ντικχέλ πέσκε ο μαγαζιά; Να κα κερέλ-λες ανταβά άμα μανγκέλα τι νικίνελ! Κο αγώνας κι ζωγιάκο, πρέπει αμέν-ντα μα τι μουκχάς καέκ πράγμας τι ταρτίνελ αμαρί προσοχή. Άμα ατσσικιαράσα αμαρέ γιακχά κο βραβείος ντα μαράσα-αμέν σαρ ο Παύλος, κα λας ο βραβείος!

8. Καλά τριν δυσκολίες κα ντικχάς;

⁸ Ντικχέν ακανά τριν δυσκολίες σο κα κερένας-αμέν τι τθάβντας πιο πφαρές. Η πρώτη ισί κάνα ο πράγματα σο μπεκλεντίνασα να αβένα-πες, η δεύτερη ισί κάνα μπαριάσα ντα χασαράσα αμαρί ζορ ντα η τρίτη ισί κάνα ο προβλήματα ατσσικιαρένα μπουτ. Κα βοηθίντιβας μπουτ άμα κα σικλιάς σαρ νταϊντιντέ γιαβερά τζενέ σο νακχαντέ-λεν ανταλά.​—Φιλιπ. 3:17.

9. Σο μπορεί τι αβέλ-πες αμένγκε άμα ο πράγματα σο μπεκλεντίνασα να αβένα-πες;

⁹ Πράγματα σο μπεκλεντίνασα ντα να αβένα-πες. Σαρέ μπεσάσα σαρ σαρ ι λατσσέ πραγματένγκε σο ντινάς πο λάφι ο Ιεχωβά ότι κα ανέλ. Κάνα ο προφήτης Αββακούμ βακερντάς καζόμ μπουτ μανγκέλας τι νασέλ ο πφιρνιπέ κατά Ιούδας, ο Ιεχωβά βακερντάς λέσκε τι “συνεχίνελ τι μπεκλεντίνελ”. (Αββακ. 2:3) Όμως, άμα οντουλά σο μπεκλεντίνασα να αβένα αζομάν σο μανγκάσα, μπορεί τι τσσιναβάς τι πφαμπάς ι Ντεβλέσκε πραγματένγκε. Μπορεί ατζέ-ντα τι χασαράς αμαρί ζορ. (Παρ. 13:​12) Ανταβά αβιλό-πες κο  1914. Αζομάν, μπουτ χρισμέ Χριστιανοί μπεκλεντίνενας ότι οντουβά μπρες κα τζάνας κο ουρανός. Κάνα ανταβά να αβιλό-πες, σο κερντέ ο πιστά πφραλά ντα πφενιά;

10. Σο κερντάς εκ αντρόγυνος κάνα οντουβά σο μανγκένας να αβιλό-πες αζομάν σο μπεκλεντίνενας;

¹⁰ Ντικχέν σο κερντέ ντούι πιστά πφραλά σο νακχλέ εκ ασακί δυσκολία. Ο πφραλ Ρόγιαλ Σπατς μπολντιλό κο 1908 κάνα ισινέ 20 μπρεσένγκο. Πακιάλας σαρέ πι γκίσαρ ότι ατζεχάνικ κα τζάλας κο ουρανός. Κο 1911, κάνα μανγκλάς κατά Περλ τι παντρίνεν, βακερντάς λάκε: «Τζανέσα σο κα αβέλ-πες κο 1914. Άμα ισί τι παντρίνας, πιο λατσσές τι σιγκιαράς!» Μουκχλάς ανταβά αντρόγυνος ο αγώνας ι ζωγιάκο επειδή να γκιλέ κο ουρανός κο 1914; Νάα! Οντουβά σο μανγκένας πιο μπουτ ισινέ τι κερέν ι Ιεχωβάσκο γκι, όχι τι τζαν κο ουρανός. Σο-ντα τι αβέλας-πες, κα συνεχίνενας ο αγώνας με υπομονή. Ο Ρόγιαλ ντα η Περλ κερένας μπουτ πράγματα ι Ιεχωβάσκε ντα ατσσιλέ πιστοί μέχρι σο τελειωσάλι λένγκι ζωή κι πφουβ μπουτ μπρεσά πιο σοράν. Σίγουρα, τουμέν-ντα μανγκένα μπουτ τι ντικχέν ι Ιεχωβάς τι δικαιώνελ πο ναβ, τι σικαβέλ ότι ο τρόπος σο κυβερνίνελα ισί δίκαιος ντα τι κερέλ σαρέ οντουλά σο βακερντάς. Τι αβέν σίγουροι ότι ανταλά πράγματα κα αβέν-πες κι Ιεχωβάσκο βακίτι. Μέχρι αζομάν, τι κεράς μπουτ πράγματα αμαρέ Ντεβλέσκε ντα μα τι μουκχάς ποτές ο πράγματα σο να αβένα-πες αζομάν σο μπεκλεντίνασα τι κερέν-αμέν τι τθάβντας πιο πφαρές ή τι χασαράς αμαρί ζορ.

11, 12. Σόσκε μπορίνασα τι συνεχίνας ο αγώνας ατζέ-ντα άμα μπαριλάμ ντα χασαρντάμ αμαρί ζορ; Βακερέν εκ παράδειγμας.

¹¹ Κάνα μπαριάσα ντα χασαράσα αμαρί ζορ. Εκ τζενό σο τθάβντελα πρέπει τι τθερέλ ζουρανό σώμας. Αλλά αμέν να χρειαζίντιβασα ζουρανό σώμας για τι τθάβντας λατσσές κο Χριστιανικός αγώνας. Μπουτ τζενέ σο μπαριλέ ντα νανέ αζόμ ζουρανέ καζόμ ισινέ ανγκλέ, ατζέκ ατζέκ μανγκένα σαρέ πουμαρέ γκίσαρ τι ντεν κο Ιεχωβά ο πιο λατσσό σο τθερένα. (2 Κορ. 4:​16) Για παράδειγμας, κάνα ο πφραλ Άρθουρ Σέκορντ * ισινέ 88 μπρεσένγκο, πφαντάας 55 μπρεσά κο Μπέθελ. Ισινέ μπίζουρανο ντα τθερέλας προβλήματα υγείας. Εκ νοσοκόμα γκιλί λέσκε κρεβατίστε για τι φροντίνελ-λες. Ντικχλάς-λες ντα βακερντάς λέσκε με αγάπη: «Πφραλ Σέκορντ, κερντάν μπουτ πράγματα ι Ιεχωβάσκε». Αλλά ο Άρθουρ να τθερέλας πι γκοντί κο πράγματα σο κερντάας. Ντικχλάς-λα κο γιακχά, ασάντιλο ντα βακερντάς: «Ανταβά ισί μπαγιά. Ο σημαντικός όμως νανέ σο κερντάμ αλλά σο κα κεράς ακανά ντα κο ντιβεσά σο αβένα».

¹² Μπορεί τουμέν-ντα τι υπηρετίνενα ι Ιεχωβάς μπουτ μπρεσά ντα ακανά τι αγαβένα ότι ναστί κερένα οντουλά σο κερένας επειδή να τθερένα λατσσί υγεία. Άμα αβέλα-πες  ανταβά, μα μουκχέν-τουμέν. Τι αβέν σίγουροι ότι ο Ιεχωβά εκτιμίνελα μπουτ σαρέ οντουλά σο κερντέν λέσκε. (Εβρ. 6:​10) Ντα μα μπιστρέν ότι αμαρί μπαρί αφοσίωση να σικάντιβελα κατά μπουτ πράγματα σο κεράσα κι υπηρεσία κι Ιεχωβάσκι. Σικαβάσα καζόμ αφοσιωμέ ισινάμ λέστε κάνα ατσσικιαράσα αμαρί χαρά ντα αμαρί ελπίδα, ντα κεράσα ο πιο λατσσό σο μπορίνασα. (Κολ. 3:​23) Ο Ιεχωβά τζανέλα σο ναστί κεράσα ντα να μανγκέλα αμένταρ πιο μπουτ οντουλένταρ σο μπορίνασα τι ντας.​—Μάρκ. 12:​43, 44.

13. Σαρ ντένα-αμέν ζορ οντουλά σο αβιλέ-πες κο Ανατόλι ντα κι Λίντιγια για μα τι τσσιναβάς τι υπηρετίνας ι Ιεχωβάς ατζέ-ντα άμα νακχάσα μπουτ δοκιμασίες;

¹³ Προβλήματα σο ατσσικιαρένα μπουτ. Μερικοί υπηρέτες ι Ιεχωβάσκε νταϊντιντέ παρόλο σο μπουτ μπρεσά τθερένας δοκιμασίες ντα τζάνας λέντζαρ κόντρα. Για παράδειγμας, ο Ανατόλι Μέλνικ * ισινέ σάντε 12 μπρεσένγκο κάνα ασταρντέ λέσκε νταντές, τσσουντέ-λες φυλακή ντα μπουτσσαντέ-λες κι Σιβηρία, πιο μπουτ από 7.000 χιλιόμετρα ντουρ πι φαμιλιάταρ σο μπεσέλας κι Μολδαβία. Εκ μπρες πιο σοράν, ο Ανατόλι, λέσκι ντάι ντα λέσκε παππούδες μπουτσσάντιλε βον-ντα κι Σιβηρία. Κάνα γκιλέ οτθέ, τζάνας κο συναθροίσεις εκχέ γιαβερέ γκαβέστε, αλλά έπρεπε τι πφιρέν 30 χιλιόμετρα αντρέ κο βιβ ντα κο σιλ. Πιο σοράν, ο πφραλ Μέλνικ κερντάς τριν μπρες φυλακή ντουρ πι ρομνιάταρ, κατά Λίντιγια, ντα πι τσσαγιάταρ σο ισινέ εκχέ μπρεσέσκι αζομάν. Παρόλο σο οντουλά δυσκολίες ατσσικιαρντέ μπρεσά, ο Ανατόλι ντα λέσκι φαμιλί να τσσιναντέ τι υπηρετίνεν πιστά ι Ιεχωβάς. Ακανά, ο Ανατόλι ισί 82 μπρεσένγκο ντα υπηρετίνελα κι Επιτροπή του Τμήματος εκχέ τθεμέστε κι Κεντρική Ασία. Σαρ ο Ανατόλι ντα η Λίντιγια, τι κεράς αμέν-ντα σο νακχέλα αμαρέ βαστένταρ κι υπηρεσία κι Ιεχωβάσκι ντα μα τι τσσιναβάς τι νταϊντίνας σαρ νταϊντιντάμ ανγκλέ-ντα.​—Γαλ. 6:9.

14. Σο αγαβέλας ο Παύλος ότι έπρεπε τι κερέλ για τι λελ ο βραβείος;

¹⁴ Ο Παύλος ισινέ σίγουρος ότι κα τελειώνελας ο αγώνας ντα κα λέλας ο βραβείος. Σαρ χρισμέ Χριστιανός, μπεκλεντίνελας τι λελ «ο βραβείος, δηλαδή ι ζωή κο ουρανός, σο ο Ντεβέλ κα ντελ οντουλέντε σο καλιντάς». Αλλά για τι λελ ο βραβείος, αγαβέλας ότι έπρεπε τι “συνεχίνελ τι μαρέλ-πες”. (Φιλιπ. 3:​14) Ο Παύλος βακερντάς κο Φιλιππήσιοι εκ μπουτ σουκάρ παράδειγμας για τι βοηθίνελ-λεν τι τθερέν πουμαρέ γιακχά κο βραβείος.

15. Καβά παράδειγμας βακερντάς ο Παύλος για τι βοηθίνελ ι Χριστιανόν κο Φίλιπποι τι “συνεχίνεν τι μαρέν-πες”;

 ¹⁵ Ο Παύλος βακερντάς κο Φιλιππήσιοι ότι κα τζουβντιόνας κο ουρανός σαρ πολίτες κι Ντεβλέσκι κυβέρνηση. (Φιλιπ. 3:​20) Σόσκε ισινέ σημαντικός ανταβά; Αζομάν ο τζενέ μανγκένας τι αβέν Ρωμαίοι πολίτες σόσκε ανταβά ισινέ μπουτ λατσσό λένγκε. * Αλλά ο χρισμέ Χριστιανοί ισινέ πολίτες κι Ντεβλέσκι κυβέρνηση, ντα ανταβά ισινέ μπουτ πιο λατσσό. Οντουλέσκε, ο Παύλος βακερντάς κο Φιλιππήσιοι «τι τζουβντιόν σαρ πολίτες [ι Ντεβλέσκε Βασιλειάκε] αντικάς σαρ πρέπει τι τζουβντιόν ο τζενέ σο βακερένα ο λατσσέ αμπέρια ι Χριστόσκε». (Φιλιπ. 1:​27, υποσ.) Ο χρισμέ Χριστιανοί αντιβές ντένα μπουτ λατσσό παράδειγμας σόσκε συνεχίνενα τι μαρέν-πες για τι λεν ι αιώνια ζωή κο ουρανός.

16. Είτε μπεκλεντίνασα τι τζουβντιάς κο ουρανός είτε κι πφουβ, σο πρέπει τι συνεχίνας τι κεράς σαρ βακερένα ο εδάφια Φιλιππησίους 4:6, 7;

¹⁶ Είτε μπεκλεντίνασα τι τζουβντιάς για πάντα κο ουρανός είτε κο παράδεισος κι πφουβ, πρέπει τι συνεχίνας τι μαράς-αμέν για τι λας ο βραβείος. Σο-ντα τι νακχάσα δεν πρέπει τι ντικχάς ο πράγματα σο ισί παλάλ ούτε τι μουκχάς τίποτα τι ατσσικιαρέλ-αμέν παλάλ. (Φιλιπ. 3:​16) Μπορεί τι μπεκλεντίνασα μπουτ μπρεσά τι νικιόν μπαγιά οντουλά σο βακερντάς ο Ιεχωβά ή μπορεί ακανά μα τι ισινάμ τερνέ ντα ζουρανέ. Μπορεί μπουτ μπρεσά τι νακχάσα δυσκολίες ντα τι τζάνα αμέντζαρ κόντρα. Σο-ντα τι αβέλα-πες τουμένγκε, «μα ανησυχίνεν για τίποτα». Τι βακερέν ι Ντεβλέσκε οντουλά σο μανγκένα ντα τι μολίνεν-λες, ντα βοβ κα ντελ-τουμέν ειρήνη σο ισί πιο οπρέ σαρέ οντουλένταρ σο σκεφτίνενα.​—Διαβάνεν Φιλιππησίους 4:6, 7.

17. Σο κα σικλιάς κο γιαβέρ μάθημας;

¹⁷ Σαρ εκ τζενό σο τθάβντελα σε εκ αγώνας τσσουβέλα σαρί πι ζορ κάνα ερεσέλα κο τέλος, αντικάς αμέν-ντα τι κεράς ο πιο λατσσό για τι τελειώνας ο αγώνας ι ζωγιάκο. Τι κεράς σο νακχέλα αμαρέ βαστένταρ για τι τθεράς αμαρέ γιακχά κο σουκάρ πράγματα σο ισί ανγκλ’ αμέντε. Σο πρέπει τι κεράς για τι συνεχίνας τι τζας ανγκλάλ ντα τι νταϊντίνας κο αγώνας; Κο γιαβέρ μάθημας κα σικλιάς σο πρέπει τι τσσουβάς πρώτα αμαρέ ζωγιάτε ντα σαρ τι “αβάς σίγουροι ότι αγαβάσα καλά ισί ο πιο σημαντικά πράγματα”.​—Φιλιπ. 1:9, 10.