1. Καλά πφραλά βοηθιντέ τι κερντιόλ η κχανγκιρί κο Φίλιπποι;

ΚΑΝΑ ερεσλέ κο Φίλιπποι, ο απόστολος Παύλος, ο Σίλας, ο Λουκάς ντα ο Τιμόθεος αρακχλέ μπουτέ τζενέν σο μανγκένας τι σικλιόν ι Βασιλειάκε. Ανταλά σταρ πφραλά σο πφαμπόνας ι Ντεβλέσκε πραγματένγκε βοηθιντέ τι κερντιόλ εκ κχανγκιρί, ντα σαρέ ο μαθητές αρχισάλε τι κερέν συναθροίσεις, μάλλον κο κχερ κι Λυδιάκο, σο ισινέ εκ φιλόξενη πφεν.​—Πράξ. 16:40.

2. Καγιά δυσκολία τθερέλας χάνικ πιο σοράν οντιά κχανγκιρί;

² Χάνικ πιο σοράν, ανταγιά νεβί κχανγκιρί τθερέλας εκ δυσκολία. Ο Μπενγκ κερντάς ι ντουσμανίν τι τζαν μπαρί κόντρα κο έργος οντουλέ πιστέ Χριστιανόνγκο. Ι Παυλός ντα ι Σιλάς ασταρντέ-λεν, νταπλέ-λεν ντα τσσουντέ-λεν φυλακή. Κάνα νικίστιλε κατά φυλακή, γκιλέ τι ντικχέν ι νεβέ μαθητέν ντα ενθαρρυντέ-λεν. Σοράν, ο Παύλος, ο Σίλας ντα ο Τιμόθεος νασλέ κατά πόλη αλλά ντικχίντιβελα ότι ο Λουκάς μπεσλό οτθέ. Σο κα κερένας ακανά ο πφραλά κι νεβί κχανγκιρί; Ο Ιεχωβά πι πνευμάσαρ βοηθιντάς-λεν μα τι τσσιναβέν τι υπηρετίνεν-λες σαρέ πουμαρέ γκίσαρ. (Φιλιπ. 2:​12) Άκ’ σόσκε χαιρίνελας λένγκε ο Παύλος!

3. Καλέ πραγματένγκε προσευχίντιβελας ο Παύλος σαρ βακερένα ο εδάφια Φιλιππησίους 1:​9-11;

³ Περίπου ντες μπρεσά πιο σοράν, ο Παύλος γραφιντάς εκ επιστολή ι κχανγκιριάκε κο Φίλιπποι. Καζόμ διαβάνασα ανταγιά επιστολή, αγαβάσα εύκολα ι αγάπη σο τθερέλας ο Παύλος ι πφραλένγκε. Γραφιντάς: «Σικλιντίναβα σαρέ τουμένγκε ντα πφαμπάβα τουμένγκε σαρ ο Χριστός Ιησούς». (Φιλιπ. 1:8) Βακερντάς ότι προσευχίντιβελας λένγκε. Μολίνελας  ι Ιεχωβάς τι βοηθίνελ-λεν τι μπαριόλ λένγκι αγάπη, τι αβέν σίγουροι ότι αγαβένα καλά ισί ο πιο σημαντικά πράγματα, τι αβέν ντιπ σωστοί, μα τι κερέν ι γιαβερέν τι χασαρέν πουμαρί πίστη ντα τι αβέν πφερντέ δικαιοσύνη. Σίγουρα, αμέν-ντα αντιβές βοηθίντιβασα κατά λάφια σο βακερντάς ο Παύλος αντράλ πι γκίσταρ. Οτθάρ, κα διαβάνας σο γραφιντάς κο Φιλιππήσιοι. (Διαβάνεν Φιλιππησίους 1:​9-11) Σοράν, κα κεράς λάφι ι πραγματένγκε σο βακερντάς ντα κα ντικχάς σαρ μπορίνασα τι κεράς-λεν.

4. (α) Σαρ σικαντάς ο Ιεχωβά καζόμ μπουτ μανγκέλα-αμέν σαρ βακερένα ο εδάφια 1 Ιωάννη 4:9, 10; (β) Καζόμ πρέπει τι μανγκάς ι Ντεβλές;

⁴ Ο Ιεχωβά σικαντάς καζόμ μπουτ μανγκέλα-αμέν κάνα μπουτσσαντάς πι Τσσαβές κι πφουβ για τι μερέλ αμαρέ αμαρτιένγκε. (Διαβάνεν 1 Ιωάννη 4:9, 10) Ανταγιά αγάπη σο σικαβέλα αμαρό Ντεβέλ κερέλα-αμέν τι μανγκάς-λες. (Ρωμ. 5:8) Καζόμ πρέπει τι μανγκάς ι Ντεβλές; Ο Ιησούς απαντιντάς ανταλέ ερωτησιάτε κάνα βακερντάς εκχέ Φαρισαιόσκε: «Πρέπει τι μανγκές ι Ιεχωβάς τι Ντεβλές σαρέ τι γκίσαρ ντα σαρέ τι ψυχιάσαρ ντα σαρέ τι γκοντιάσαρ». (Ματθ. 22:​36, 37) Να μανγκάσα ι Ντεβλές επκάς γκίσαρ. Αλλά κάθε ντιβές μανγκάσα τι αβέλ πιο ζουρανί αμαρί αγάπη λέσκε. Ο Παύλος βακερντάς κο Φιλιππήσιοι ότι λένγκι αγάπη έπρεπε «τι μπαριόλ συνέχεια». Σαρ κα μπαριαράς αμαρί αγάπη ι Ντεβλέσκε;

5. Σαρ κα μπαριόλ αμαρί αγάπη ι Ντεβλέσκε;

⁵ Για τι μανγκάς ι Ντεβλές, πρέπει τι τζανάς-λες. Η Γραφή βακερέλα: «Οντουβά σο να μανγκέλα ι γιαβερέν να τζανέλα ι Ντεβλές, σόσκε ο Ντεβέλ ισί αγάπη». (1 Ιωάν. 4:8) Ο απόστολος Παύλος γραφιντάς ότι αμαρί αγάπη ι Ντεβλέσκε κα αβέλ πιο ζουρανί καζόμ “σικλιάσα ντα αγαβάσα πιο μπουτ πράγματα” Λέσκε. (Φιλιπ. 1:9) Κάνα κεράας μελέτη, μανγκλάμ ι Ντεβλές παρόλο σο να τζανάας μπουτ πράγματα λέσκε. Σοράν, καζόμ πιο μπουτ σικλιάας ι Ιεχωβάσκε, αζόμ πιο μπουτ μανγκάας-λες. Άκ’ σόσκε εκ κατά πιο σημαντικά πράγματα αμαρέ ζωγιάτε ισί τι σικλιαράς-αμέν κατά Ντεβλέσκο Λάφι ντα τι σκεφτίνας λατσσές οντουλά σο σικλιάσα!​—Φιλιπ. 2:16.

6. Κας πρέπει τι μανγκάς για τι μπαριόλ αμαρί αγάπη σαρ βακερένα ο εδάφια 1 Ιωάννη 4:​11, 20, 21;

⁶ Η μπαρί αγάπη σο σικαβέλα αμένγκε ο Ντεβέλ κα κερέλ-αμέν τι μανγκάς αμαρέ πφραλέν. (Διαβάνεν 1 Ιωάννη 4:​11, 20, 21) Μπορεί τι αμντίνασα ότι κα αβέλ εύκολος τι μανγκάς-λεν επειδή υπηρετίνασα ι Ιεχωβάς ντα μαράσα-αμέν τι τθεράς λέσκε σουκάρ ιδιότητες. Κεράσα οντουβά σο κερντάς ο Ιησούς, σο ντινάς πι ζωή αμένγκε επειδή μανγκλάς-αμέν μπουτ. Αλλά μπάζιμα μπορεί τι αβέλ αμένγκε δύσκολος τι ντας καν κι εντολή τι μανγκάς ο εκ ι γιαβερές. Σκεφτίνεν εκ παράδειγμας κατά κχανγκιρί κο Φίλιπποι.

7. Σο σικλιάσα κατά συμβουλή σο ντινάς ο Παύλος κι Ευοδία ντα κι Συντύχη;

⁷ Η Ευοδία ντα η Συντύχη υπηρετιντέας σαρέ πουμαρέ γκίσαρ «γιεκ» ι Παυλόσαρ. Αλλά μάλλον χαλέας-πες ντα τσσιναντέας τι αβέν αμαλινά. Κι επιστολή σο μπουτσσαντάς ο Παύλος κι κχανγκιρί σο ισινέ η Ευοδία ντα η Συντύχη γραφιντάς ο ναβά ανταλέ πφενίνγκε ντα βακερντάς λένγκε ξεκάθαρα «τι σκεφτίνεν με το ίδιος τρόπος». (Φιλιπ. 4:2, 3) Ο Παύλος σκεφτιντάς ότι ισινέ μπουτ σημαντικός τι βακερέλ σαρί κι κχανγκιρί: «Τι κερέν σαρέ ο πράγματα χωρίς τι γκρινιάνεν ντα χωρίς τι χαν-τουμέν λαφίντζαρ». (Φιλιπ. 2:​14) Σίγουρα, ανταγιά ξεκάθαρη συμβουλή βοηθιντάς ανταλέ πιστέ πφενίν, αλλά σαρέ ι γιαβερέν-ντα κι κχανγκιρί τι μανγκέν ο εκ ι γιαβερές ατζέ πιο μπουτ.

8. Σο μπορεί τι δυσκολίνελ-αμέν μπουτ τι μανγκάς αμαρέ πφραλέν, ντα σο κα βοηθίνελ-αμέν;

 ⁸ Ισί φαρ σο νανέ ιτς εύκολος αμένγκε τι μανγκάς αμαρέ πφραλέν σόσκε, σαρ η Ευοδία ντα η Συντύχη, ατσσάσα κο λάθη. Σαρέ κεράσα κάθε ντιβές λάθη. Άμα ατσσάσα κο λάθη κι γιαβερένγκε, αμαρί αγάπη λένγκε κα σουρντιόλ. Για παράδειγμας, άμα εκ πφραλ κα μπιστρέλ τι βοηθίνελ-αμέν τι καθαρίνας ι Αίθουσα, μπορεί τι χολιάνας. Άμα αζομάν κα ανάς αμαρέ γκοντιάτε σαρέ ο γιαβερά λάθη αμαρέ πφραλέσκε, κα χολιάνας λέσκε ατζέ πιο μπουτ ντα κα μανγκάς-λες πιο χάνικ. Άμα κα αβέλ τουμένγκε κάτι ασακό, ισί λατσσό τι σκεφτίνεν ότι ο Ιεχωβά ντικχέλα εμ αμαρέ λάθη εμ αμαρέ πφραλέσκε. Όμως, παρόλο σο κεράσα λάθη, συνεχίνελα τι μανγκέλ εμ αμαρέ πφραλές εμ αμέν. Οντουλέσκε, χρειαζίντιβελα τι μανγκάς αμαρέ πφραλέν σαρ ο Ιεχωβά ντα τι ντικχάς λένγκε λατσσέ ιδιότητες. Κάνα κεράσα μπαρέ προσπάθειες για τι μανγκάς αμαρέ πφραλέν, αβάσα πιο ενωμέ λέντζαρ.​—Φιλιπ. 2:1, 2.

9. Καλά ισί μερικά κατά «πιο σημαντικά πράγματα» σο βακερέλα ο Παύλος κι επιστολή σο μπουτσσαντάς κο Φιλιππήσιοι;

⁹ Αντράλ κατά άγιος πνεύμας, ο Παύλος ντινάς κο Φιλιππήσιοι, ντα σαρέ κο Χριστιανοί, ακαγιά συμβουλή: «Τι αβέν σίγουροι ότι αγαβένα καλά ισί ο πιο σημαντικά πράγματα». (Φιλιπ. 1:​10) Αντρέ ανταλέ σημαντικέ πραγματέντε ισί τι αγιάντιβελ ο ναβ ι Ιεχωβάσκο, τι αβέλ-πες μπαγιά λέσκο σκοπός ντα τι τθεράς ειρήνη ντα ενότητα κι κχανγκιρί. (Ματθ. 6:9, 10· Ιωάν. 13:​35) Κάνα τσσουβάσα πρώτα αμαρέ ζωγιάτε ανταλά πράγματα, σικαβάσα ότι μανγκάσα ι Ιεχωβάς.

10. Σο πρέπει τι κεράς για τι αβάς ντιπ σωστοί;

¹⁰ Ο Παύλος βακερντάς επίσης ότι πρέπει “τι αβάς ντιπ σωστοί”. Ανταβά να μανγκέλα τι βακερέλ ότι πρέπει τι αβάς τέλειοι. Ναστί αβάσα αζόμ σωστοί καζόμ ισί ο Ιεχωβά Ντεβέλ. Αλλά κα αβάς ντιπ σωστοί κι Ιεχωβάσκε γιακχά άμα κεράσα σο νακχέλα αμαρέ βαστένταρ για τι μπαριαράς αμαρί αγάπη ντα για τι αβάς σίγουροι ότι αγαβάσα καλά ισί ο πιο σημαντικά πράγματα. Εκ τρόπος για τι σικαβάς αμαρί αγάπη ισί τι κεράς ο πιο λατσσό για μα τι κεράς ι γιαβερέν τι χασαρέν πουμαρί πίστη.

11. Σόσκε δεν πρέπει τι κεράς ι γιαβερέν τι χασαρέν πουμαρί πίστη;

¹¹ Η συμβουλή μα τι κεράς ι γιαβερέν τι χασαρέν πουμαρί πίστη ισί μπουτ σημαντική. Σαρ μπορεί τι κεράς-λες ανταβά; Οντουλέντζαρ σο τραμπίνασα τι κεράς για τι διασκεδάνας, με το τρόπος σο ιριαβάσα-αμέν ή ατζέ-ντα αμαρέ μπουτιάσαρ. Οντουβά σο κεράσα μπορεί μα τι αβέλ λάθος. Άμα όμως οντουλά σο τραμπίνασα τι κεράς κα ενοχλίνεν ι συνείδηση εκχέ γιαβερέσκι αζόμ μπουτ σο κα κερέν-λες τι χασαρέλ πι πίστη, ανταβά ισί σοβαρός. Ο Ιησούς βακερντάς ότι κα αβέλας πιο λατσσό τι νακχαβέν αμαρέ κοριάτε εκ μπαρό μπαρ ντα τι φουρτίνεν-αμέν κι ντεριάβ παρά τι κεράς εκχές λέσκε μπρακένταρ τι χασαρέλ πι πίστη!​—Ματθ. 18:6.

12. Σο σικλιάσα εκχέ αντρογυνόσταρ σο ισί σκαπανείς;

¹² Ντικχέν σαρ ντινάς καν κι συμβουλή κι Ιησούσκι εκ αντρόγυνος σο ισί σκαπανείς. Λένγκε κχανγκιριάτε ισινέ εκ αντρόγυνος σο μπολντιλόας πριν χάνικ καιρός. Οντουλά ντούι νεβέ τζενέ μπαριλέ φαμιλίντε σο να μουκχένας-λεν τι κερέν μπουτ πράγματα. Πακιάνας ότι ο Χριστιανοί δεν πρέπει τι τζαν τι ντικχέν ταινίες, ατζέ-ντα ταινίες σο να ισινέ μπέτι. Ατσσιλέ πουταρντέ μόσαρ κάνα σικλιλέ ότι ο σκαπανείς γκιλέ ντα ντικχλέ ταινία. Αφού αβιλό-πες ανταβά, ο σκαπανείς τσσιναντέ τι τζαν τι ντικχέν ταινίες  μέχρι ο νεβέ πφραλά τι σικλιαρέν πουμαρί συνείδηση ντα τι αγαβέν πιο λατσσές σο ισί σωστός ντα σο νανέ. (Εβρ. 5:​14) Αντικάς, ο σκαπανείς σικαντέ ότι μανγκένας πουμαρέ νεβέ πφραλέν, όχι σάντε λαφίντζαρ, αλλά οντουλέντζαρ σο κερένας.​—Ρωμ. 14:​19-21· 1 Ιωάν. 3:18.

13. Σαρ μπορεί τι κεράς εκχέ πφραλές τι αμαρτίνελ;

¹³ Μπορεί τι κεράς επίσης εκχέ τζενές τι χασαρέλ πι πίστη άμα κα κεράς-λες τι αμαρτίνελ. Σαρ μπορεί τι αβέλ-πες ανταβά; Ανέν τουμαρέ γκοντιάτε ακαβά: Εκ τζενό σο κερέλας μελέτη μαρέλας-πες μπουτ καιρός για τι τσσιναβέλ ο πιπέ. Αγαντάς ότι έπρεπε τι τσσιναβέλ ντιπ ι μολ. Κερντάς μπουτ αλλαγές πι ζωγιάτε ντα μπολντιλό. Σοράν, κάνα γκιλό εκχέ παρεάτε πφραλέντζαρ, ο πφραλ σο καλιντάς-λες ντινάς-λες τι πιλ ντα βακερντάς λέσκε: «Ακανά ισινάν Χριστιανός. Τθερέσα ο πνεύμας ι Ιεχωβάσκο. Οντουλά σο τθερένα ο πνεύμας ι Ιεχωβάσκο ατσσικιαρένα-πες. Άμα ατσσικιαρέσα-τουτ, κα πις χωρίς τι ματιός». Σκεφτίνεν σο κα αβέλας-πες άμα ο νεβό πφραλ κα ασουνέλας ανταγιά μπέτι συμβουλή!

14. Σαρ βοηθίνενα-αμέν ο συναθροίσεις τι ντας καν κο συμβουλές σο ισί κο εδάφιος Φιλιππησίους 1:10;

¹⁴ Αμαρέ συναθροίσεις βοηθίνενα-αμέν τι ντας καν κο συμβουλές σο ισί κο εδάφιος Φιλιππησίους 1:​10 μπουτέ τροπόντζαρ. Πρώτον, ο μπερεκέτι πνευματικός χαμπέ σο λάσα οτθέ ανέλα αμαρέ γκοντιάτε καλά πράγματα ισί σημαντικά ι Ιεχωβάσκε. Δεύτερον, βοηθίντιβασα τι κεράς οντουλά σο σικλιάσα για τι αβάς ντιπ σωστοί. Ντα τρίτον, σικλιάσα σαρ «τι σικαβάς αγάπη ντα τι κεράς λατσσέ πράγματα». (Εβρ. 10:​24, 25) Καζόμ πιο μπουτ ζορ  λάσα αμαρέ πφραλένταρ, αζόμ πιο μπουτ μανγκάσα ι Ντεβλές ντα ι πφραλέν. Άμα μανγκάσα ι Ντεβλές ντα ι πφραλέν σαρέ αμαρέ γκίσαρ, κα κεράς σο νακχέλα αμαρέ βαστένταρ για μα τι κεράς αμαρέ πφραλέν τι χασαρέν πουμαρί πίστη.

15. Σο μανγκέλα τι βακερέλ τι αβάς «πφερντέ δικαιοσύνη»;

¹⁵ Ο Παύλος προσευχίντιβελας αντράλ πι γκίσταρ τι αβέν ο Φιλιππήσιοι «πφερντέ δικαιοσύνη». (Φιλιπ. 1:​11) Σίγουρα, ανταβά μανγκέλας τι βακερέλ τι μανγκέν ι Ιεχωβάς ντα λέσκε λαός. Επίσης, μανγκέλας τι βακερέλ τι κερέν λάφι κο γιαβερά για την πίστη σο τθερένας κο Ιησούς ντα ι μπουτ σουκάρ πραγματένγκε σο μπεκλεντίνενας. Κο εδάφιος Φιλιππησίους 2:​15 αρακχάσα εκ γιαβέρ-ντα λάφι: «Λένα-τουμέν ντα ντένα φως κο ντουνιάς». Ανταβά ανέλα αμαρέ γκοντιάτε ο λάφια ι Ιησούσκε σο βακερντάς ότι λέσκε μαθητές ισί «ο φως ι ντουνιάσκο». (Ματθ. 5:​14-16) Ντα ντινάς πι μαθητέντε ι εντολή τι «κερέν [βον-ντα] μαθητέν» ντα βακερντάς λένγκε ότι κα αβένας «μάρτυρες . . . ατζέ-ντα κο τθαν σο ισί πιο ντουρ οπράλ κι πφουβ». (Ματθ. 28:​18-20· Πράξ. 1:8) Ισινάμ «πφερντέ δικαιοσύνη» κάνα κεράσα σο νακχέλα αμαρέ βαστένταρ ανταλέ μπουτ σημαντικέ εργόστε.

16. Σαρ σικαβένα ο εδάφια Φιλιππησίους 1:​12-14 ότι μπορίνασα τι λας-αμέν ντα τι ντας φως ατζέ-ντα κάνα τθεράσα δυσκολίες; (Ντικχ ι φωτογραφία κι ανγκλαϊνί σελίδα)

¹⁶ Σαρ-ντα τι αβέν ο πράγματα αμαρέ ζωγιάτε, μπορίνασα τι λας-αμέν ντα τι ντας φως. Μπάζιμα, πράγματα σο ντικχίντιβενα ότι τσσιναβένα αμαρό έργος μπορεί τι πουτρέν αμένγκε ο ντρομ για τι βακεράς ο λατσσέ αμπέρια. Για παράδειγμας, ο απόστολος Παύλος ισινέ πφαντό εκχέ κχερέστε κι Ρώμη κάνα γραφιντάς ι επιστολή κο Φιλιππήσιοι. Παρόλο σο ισινέ πφαντό κερέλας έργος κο δεσμοφύλακες ντα οντουλέντε  σο τζάνας τι ντικχέν-λες. Ο Παύλος κερέλας ο έργος σαρέ πι γκίσαρ ατζέ-ντα κο δυσκολίες, ντα ανταβά ντέλας κο πφραλά σιγουριά ντα θάρρος «για τι βακερέν ο λάφια ι Ντεβλέσκε χωρίς τι νταρέν».​—Διαβάνεν Φιλιππησίους 1:​12-14· 4:22.

17. Σαρ κερένα έργος μπουτ πφραλά ντα πφενιά παρόλο σο τθερένα δυσκολίες;

¹⁷ Μπουτ πφραλά ντα πφενιά ισί μπίνταρανε σαρ ο Παύλος. Τζουβντιόνα τθεμέντε σο ναστί ντένα μαρτυρία κο ντρομ ή κχερ κχερέστε, οντουλέσκε αρακχένα γιαβερά τρόπους τι βακερέν ο λατσσέ αμπέρια. (Ματθ. 10:​16-20) Εκχέ ασακέ τθεμέστε, εκ επίσκοπος βακερντάς ότι κάθε ευαγγελιζόμενος ισί λατσσό τι κερέλ έργος πι τζενέντε, κο γείτονες, κο συμμαθητές, οντουλέντε σο κερέλα λέντζαρ μπουτί ντα οντουλέντε σο τζανέλα. Αντρέ σε ντούι μπρεσά, ο κχανγκιριά οτθέ αβιλέ πιο μπουτ. Μπορεί αμαρέ τθεμέστε τι κεράσα έργος ελεύθερα. Αλλά σικλιάσα κάτι μπουτ σημαντικός κατά πφραλά ντα κατά πφενιά σο αρακχένα γιαβερά τρόπους τι κερέν ο έργος: Πάντα τι κερέν ο έργος καζόμ πιο λατσσές αβέλα-πες ντα τι αβέν σίγουροι ότι ο Ιεχωβά κα ντελ-τουμέν ι ζορ σο χρειαζίντιβενα για τι νακχαβέν σο-ντα δυσκολίες τθερένα.​—Φιλιπ. 2:13.

18. Σο πρέπει τι μανγκάς τι κεράς σαρέ αμαρέ γκίσαρ;

¹⁸ Κο ντιβεσά σο τζουβντιάσα, πρέπει τι μανγκάς σαρέ αμαρέ γκίσαρ τι κεράς ο συμβουλές σο γραφιντάς ο Παύλος ι Ντεβλέσκε πνευμάσαρ κι επιστολή σο μπουτσσαντάς κο Φιλιππήσιοι. Τι αβάς σίγουροι ότι αγαβάσα καλά ισί ο πιο σημαντικά πράγματα, τι αβάς ντιπ σωστοί, μα τι κεράς ι γιαβερέν τι χασαρέν πουμαρί πίστη ντα τι αβάς πφερντέ δικαιοσύνη. Αντικάς κα μπαριόλ αμαρί αγάπη ντα κα δοξάνας αμαρέ λατσσέ Νταντές, ι Ιεχωβάς.