1. Καλά θυσίες κερντέ μπουτ υπηρέτες ι Ντεβλέσκε, ντα σόσκε;

ΕΚΑΤΟΜΜΥΡΙΑ υπηρέτες ι Ντεβλέσκε αντιβές κερντέ θυσίες. Μπουτ πφραλά ντα πφενιά τραμπιντέ τι ατσσόν εργένια. Μερικά αντρόγυνα τραμπιντέ για χάνικ μα τι κερέν τσσαβέν. Μπουτ φαμιλιά ατσσικιαρένα πουμαρί ζωή απλή. Σαρέ λιντέ ανταλά αποφάσεις για εκ σημαντικός λόγος: Μανγκένα τι κερέν ο πιο λατσσό για τι υπηρετίνεν ι Ιεχωβάς. Ισί χαρούμενοι ντα σίγουροι ότι ο Ιεχωβά κα ντελ-λεν σαρέ οντουλά σο τθερένα πραγματικά ανάγκη. Κα κερέλ-λες ανταβά ο Ιεχωβά; Βα. Σόσκε ισινάμ αζόμ σίγουροι; Εκ λόγος ισί ότι ο Ιεχωβά ντινάς ευλογίες κο Αβραάμ, κο «ντατ σαρέ οντουλένγκο σο τθερένα πίστη».​—Ρωμ. 4:11.

2. (α) Σόσκε δεχτιντάς ο Αβραάμ τι νασέλ κατά Ουρ σαρ βακερένα ο εδάφια Εβραίους 11:​8-10, 16; (β) Σο κα ντικχάς ανταλέ μαθημάστε;

² Ο Αβραάμ δεχτιντάς τι μουκχέλ ι άνετη ζωή σο τθερέλας κι Ουρ. Σόσκε; Επειδή μπεκλεντίνελας «για την πόλη σο τθερέλα πραγματικά θεμέλια». (Διαβάνεν Εβραίους 11:​8-10, 16) Καγιά ισί ανταγιά «πόλη»; Καλά δυσκολίες τθερέλας ο Αβραάμ καζόμ μπεκλεντίνελας τι κερντιόλ ανταγιά πόλη; Σαρ κα μοιάζας κο Αβραάμ ντα οντουλέντε σο ισινέ σαρ λέστε αμαρέ ντιβεσέντε;

3. Καγιά ισί η πόλη σο μπεκλεντίνελας ο Αβραάμ;

³ Η πόλη σο μπεκλεντίνελας ο Αβραάμ ισί η Βασιλεία ι Ντεβλέσκι. Αντρέ ανταλέ Βασιλειάτε ισί ο Ιησούς Χριστός ντα ο 144.000 χρισμέ Χριστιανοί. Ο Παύλος βακερέλα ότι η Βασιλεία ισί η “πόλη ι τζουβντέ Ντεβλέσκι, η Ιερουσαλήμ σο ισί κο ουρανός”. (Εβρ. 12:​22· Αποκ. 5:​8-10· 14:1) Ο Ιησούς σικλιαρντάς  πι μαθητέν τι προσευχίντιβεν τι αβέλ ανταγιά Βασιλεία για τι αβέλ-πες οντουβά σο μανγκέλα ο Ντεβέλ κι πφουβ σαρ αβέλα-πες κο ουρανός.​—Ματθ. 6:10.

4. Καζόμ πράγματα τζανέλας ο Αβραάμ για την πόλη, δηλαδή ι Βασιλειάκε, σο ντινάς πο λάφι ο Ντεβέλ ότι κα ανέλας σαρ βακερένα ο εδάφια Γένεση 17:1, 2, 6;

⁴ Τζανέλας ο Αβραάμ σαρ κα αβέλας οργανωμέ η Βασιλεία ι Ντεβλέσκι; Νάα. Μπουτ μπρεσά, ανταλά πράγματα ισινέ «ιερός μυστικός». (Εφεσ. 1:​8-10· Κολ. 1:​26, 27) Αλλά ο Αβραάμ τζανέλας ότι μερικοί λέσκε προσαγγονίνταρ κα αβένας βασιλιάδες επειδή ο Ιεχωβά ντινάας-λες πο λάφι. (Διαβάνεν Γένεση 17:1, 2, 6) Ο Αβραάμ τθερέλας αζόμ ζουρανί πίστη οντουλέντε σο βακερντάς ο Ντεβέλ ότι κα κερέλ, σο ισινέ σαρ τι ντικχέλας Οντουλές σο τραμπιντάς ο Ιεχωβά, δηλαδή ι Μεσσιάς, σο κα αβέλας ο Βασιλιάς κι Βασιλεία κι Ντεβλέσκι. Άκ’ σόσκε ο Ιησούς βακερντάς κο Ιουδαίοι σο τζουβντιόνας αζομάν: «Ο Αβραάμ τουμαρό ντατ χαιρισάλο σο κα ντικχέλας μο ντιβές, ντα ντικχλάς-λες ντα πουτάρντιλο λέσκο γκι». (Ιωάν. 8:​56) Σίγουρα, ο Αβραάμ τζανέλας ότι λέσκε προσάγγονα κα αβένας αντρέ κι Βασιλεία σο κα ανέλας ο Ιεχωβά, ντα μπεκλεντίνελας αντράλ πι γκίσταρ τι νικιόλ μπαγιά οντουβά σο βακερντάς ο Ιεχωβά.

5. Σαρ τζανάσα ότι ο Αβραάμ μπεκλεντίνελας για την πόλη σο σχεδιαντάς ο Ντεβέλ;

⁵ Σαρ σικαντάς ο Αβραάμ ότι μπεκλεντίνελας για την πόλη, δηλαδή ι Βασιλειάκε, σο σχεδιαντάς ο Ντεβέλ; Ο Αβραάμ να τσσιντιντάς καεκχέ βασιλειάταρ σο ισινέ κι πφουβ. Τραμπιντάς τι τζουβντιόλ εκ ακάρινγκ εκ οκόρινγκ αντίς τι μπεσέλ εκχέ τθανέστε ντα τι τσσίντελ εκχέ βασιλιάσταρ. Επίσης, ο Αβραάμ να προσπαθιντάς τι κερέλ εκ βασίλειος πέσκε. Αλλά ντέλας καν κο Ιεχωβά ντα μπεκλεντίνελας Βοβ τι κερέλ τι νικιόν μπαγιά λέσκε λάφια. Ανταλέσαρ σο κερντάς, ο Αβραάμ σικαντάς ότι τθερέλας μπουτ ζουρανί πίστη κο Ιεχωβά. Για τι ντικχάς μερικές δυσκολίες σο τθερέλας ντα σο σικλιάσα λέσταρ.

6. Σο πόλη ισινέ η Ουρ;

⁶ Η πόλη σο μουκχλάς ο Αβραάμ ισινέ αρακχαντί, ντα ο τζενέ ισινέ μορφωμέ ντα χουλανέ. Μπαρέ ντουβάρια ντα εκ μπαρό  χαντάκι πανίσαρ αρακχαβένας-λα κατά τριν μεριές. Οντουλά σο μπεσένας κι Ουρ τζανένας λατσσές μαθηματικά, τι διαβάνεν ντα τι γραφίνεν. Ντα ντικχίντιβελα ότι μπουτ τζενέ κι πόλη ισινέ έμποροι σόσκε ο αρχαιολόγοι αρακχλέ οτθέ μπουτ έγγραφα σο χρησιμοποιήντιβενας κο εμπόριος. Ο κχερά ισινέ κερντέ τουβλένταρ ντα ο ντουβάρια σοβαντίνενας-λεν ντα ντένας-λεν ασβέστη. Μερικά κχερά ανταλένταρ τθερένας 13 ή 14 δωμάτια ντονταλάι εκχέ αυλιάταρ σο ισινέ κερντί μπαρέντζαρ.

7. Σόσκε ο Αβραάμ έπρεπε τι ντελ μπέσα κο Ιεχωβά ότι κα αρακχαβέλας λες ντα λέσκι φαμιλί;

⁷ Ο Αβραάμ έπρεπε τι ντελ μπέσα κο Ιεχωβά ότι κα αρακχαβέλας εμ λες εμ λέσκι φαμιλί. Σόσκε; Ανέν τουμαρέ γκοντιάτε ότι ο Αβραάμ ντα η Σάρρα μουκχλέ ο αρακχαντό ντα μπαρό κχερ σο τθερένας κι Ουρ για τι μπεσέν τσαντιρίντε κι Χαναάν. Να κα αρακχαβένας-λεν μπαρέ ντουβάρια ντα μπαρέ χαντάκια πανίσαρ. Ντα ακανά ο ντουσμάνια κα μπορίνενας εύκολα τι κερέν λένγκε ζιάνι.

8. Σο δυσκολίες νακχλάς ο Αβραάμ;

⁸ Ο Αβραάμ κερέλας οντουβά σο μανγκέλας ο Ντεβέλ, αλλά αβιλό ο ντιβές σο μαρέλας-πες τι ανέλ ο μαντρό πι φαμιλιάτε. Πελί μπαρί μποκχ κο τθεμ σο μπουτσσαντάας-λες ο Ιεχωβά. Οντιά μποκχ ισινέ αζόμ μπαρί σο ο Αβραάμ αποφασιντάς τι τζαλ πι φαμιλιάσαρ για χάνικ κι Αίγυπτος. Αλλά, καζόμ ισινέ κι Αίγυπτος, ο Φαραώ, ο βασιλιάς ι τθεμέσκο, λιντάς λέσταρ λέσκε ρομνιά. Σκεφτίνεν καζόμ μπουτ ανησυχίνελας ο Αβραάμ μέχρι σο ο Ιεχωβά τιμωριντάς ι Φαραώς ντα ο Φαραώ γκερντάς παλάλ ι Σαρρά.​—Γέν. 12:​10-19.

9. Καλά προβλήματα τθερέλας ο Αβραάμ κι φαμιλί;

⁹ Ο Αβραάμ τθερέλας προβλήματα κι φαμιλί-ντα. Η Σάρρα, λέσκι ρομνί σο μανγκέλας-λα μπουτ, ναστί κερέλας τσσαβέν. Μπουτ μπρεσά ισινέ ο ντούι-ντα στεναχωριμέ ιτιρί ανταλέσταρ. Τελικά, η Σάρρα ντινάς κο Αβραάμ πι υπηρετριά, σο βακερένας λάκε Άγαρ, για τι κερέλ βόι τσσαβέν λάκε. Κάνα όμως η Άγαρ ατσσιλί κχαμνί κο Ισμαήλ, αρχισάλι τι πρασάλ ι Σαρρά. Ο πράγματα αβιλέ αζόμ δύσκολα σο η Σάρρα παλντιντάς-λα.​—Γέν. 16:​1-6.

10. Κάνα ο Αβραάμ έπρεπε τι ντελ μπέσα κο Ιεχωβά, ντα σόσκε ισινέ δύσκολος ανταβά;

¹⁰ Τελικά, η Σάρρα ατσσιλί κχαμνί κατά Αβραάμ ντα κερντάς εκχέ τσσαβές σο ο Αβραάμ τσσουντάς λέσκε Ισαάκ. Ο Αβραάμ μανγκέλας πι ντουέ-ντα τσσαβέν. Αλλά επειδή ο Ισμαήλ συμπεριφερίντιβελας μπέτι κο Ισαάκ, ο Αβραάμ βακερντάς κο Ισμαήλ ντα κι Άγαρ τι νασέν. (Γέν. 21:​9-14) Σοράν, ο Ιεχωβά μανγκλάς κατά Αβραάμ τι ντελ πι τσσαβές σαρ θυσία. (Γέν. 22:1, 2· Εβρ. 11:​17-19) Ο ντούι-ντα φαρ, ο Αβραάμ έπρεπε τι ντελ μπέσα κο Ιεχωβά ντα τι αβέλ σίγουρος ότι βοβ κα κερέλας τι τζαν λατσσές ο πράγματα λέσκε τσσαβένγκε.

11. Σόσκε έπρεπε ο Αβραάμ τι μπεκλεντίνελ ι Ιεχωβάσκε με υπομονή;

¹¹ Σαρέ οντουλά μπρεσά, ο Αβραάμ έπρεπε τι σικλιόλ τι μπεκλεντίνελ με υπομονή ι Ιεχωβάσκε. Ντικχίντιβελα ότι ισινέ πιο μπουτ από 70 μπρεσένγκο κάνα νασλό κατά Ουρ πι φαμιλιάσαρ. (Γέν. 11:​31–12:4) Τζουβντιόλας τσαντιρίντε περίπου 100 μπρεσά ντα τζάλας εκ ακάρινγκ εκ οκόρινγκ κι Χαναάν. Μουλό κάνα ισινέ 175 μπρεσένγκο. (Γέν. 25:7) Αλλά να ντικχλάς ι Ιεχωβάς τι ντελ ι Χαναάν λέσκε προσαγγονίντε, σαρ ντινάας πο λάφι. Ούτε τζουβντιλό για τι ντικχέλ τι αβέλ η πόλη, η Βασιλεία ι Ντεβλέσκι. Όμως, βακέρντιβελα ότι ο Αβραάμ μουλό «πφουρό ντα ευχαριστιμέ». (Γέν. 25:8) Παρόλο σο ο Αβραάμ τθερέλας αζόμ μπουτ δυσκολίες, ατσσικιαρντάς ζουρανί πι πίστη ντα μπεκλεντίνελας αντράλ πι γκίσταρ ι Ιεχωβάσκε. Σόσκε μπορισάλο τι νταϊντίνελ;  Επειδή σαρέ λέσκε ζωγιάτε, ο Ιεχωβά αρακχαβέλας-λες ντα ντικχέλας-λες σαρ αμάλ.​—Γέν. 15:1· Ησ. 41:8· Ιακ. 2:​22, 23.

12. Καλέ πραγμάσκε μπεκλεντίνασα, ντα σο κα ντικχάς;

¹² Σαρ ο Αβραάμ, αμέν-ντα μπεκλεντίνασα για την πόλη σο τθερέλα πραγματικά θεμέλια. Αμέν όμως να μπεκλεντίνασα τι κερντιόλ. Η Βασιλεία ι Ντεβλέσκι αβιλί-πες κο 1914 ντα κερέλα κουμάντος κο ουρανός. (Αποκ. 12:​7-10) Αλλά μπεκλεντίνασα τι κερέλ κουμάντος σαρί κι πφουβ. Καζόμ μπεκλεντίνασα τι αβέλ-πες ανταβά, πρέπει τι νταϊντίνας μπουτ δυσκολίες σαρ οντουλά σο τθερέλας ο Αβραάμ ντα η Σάρρα. Μπορισάλε υπηρέτες ι Ιεχωβάσκε αμαρέ ντιβεσέντε τι κερέν οντουβά σο κερντάς ο Αβραάμ; Ο ιστορίες πφραλένγκε ντα πφενίνγκε σο ισί κι Σκοπιά σικαβένα ότι μπουτ τζενέ αντιβές σικαντέ πίστη ντα υπομονή σαρ ο Αβραάμ ντα η Σάρρα. Κα ντικχάς χάνικ ανταλέ ιστοριένταρ ντα σο σικλιάσα λένταρ.

13. Σο σικλιόνα κατά πφραλ Γουόλντεν;

¹³ Τι κερέν θυσίες αντράλ τουμαρέ γκίσταρ. Για τι τσσουβάς πρώτα αμαρέ ζωγιάτε ι πόλη ι Ντεβλέσκι, ι Βασιλεία, πρέπει τι αβάς σαρ ο Αβραάμ, σο κερντάς θυσίες αντράλ πι γκίσταρ για τι κερέλ ι Ντεβλέσκο γκι. (Ματθ. 6:​33· Μάρκ. 10:​28-30) Ντικχέν ο παράδειγμας ι πφραλέσκο Μπιλ Γουόλντεν. * Κο 1942, χάνικ πριν τι τελειώνελ ο πανεπιστήμιος κο ΗΠΑ, αρχισάλο τι κερέλ μελέτη ι Ιεχωβάσκε Μαρτυρέντζαρ. Λέσκο καθηγητής αρακχλάας λέσκε μπουτί για τι κερέλ κάνα κα τελειώνελας ο πανεπιστήμιος, αλλά ο Μπιλ να μανγκλάς. Βακερντάς ότι αποφασιντάας τι κερέλ ο πιο λατσσό για τι υπηρετίνελ ι Ντεβλές ντα μα τι κερέλ μπουτί οπράλ οντουλέστε σο σπουδαντάς. Χάνικ πιο σοράν, καλιντέ-λες κο στρατός αλλά βοβ βακερντάς με σεβασμός ότι να κα τζάλας, οτθάρ τσσουντέ λέσκε πρόστιμος 10.000 δολάρια ντα παντς μπρεσά κι φυλακή. Κάνα πφαντάς τριν μπρεσά κι φυλακή, νικίστιλο. Πιο σοράν, καλιντέ-λες κι Σχολή Γαλαάδ ντα υπηρετιντάς σαρ ιεραπόστολος κι Αφρική. Σοράν, ο Μπιλ παντρισάλο ι Ευάσαρ, ντα  υπηρετιντέ γιεκ κι Αφρική. Ανταβά μανγκέλας τι βακερέλ ότι έπρεπε τι κερέν θυσίες. Τελικά, βουρτισάλε κο Ηνωμένες Πολιτείες για τι αρακχαβέλ ο Μπιλ πι νταγιά. Βοβ βακερέλα πι ζωγιάκε: «Χαιρίναβα μπουτ κάνα σκεφτίναβα ο μπαρό προνόμιος σο τθεράβας τι υπηρετίναβ ι Ιεχωβάς πιο μπουτ από 70 μπρεσά. Μπουτ φαρ ευχαριστίναβα-λες σο βοηθιντάς-μαν τι νταβ σαρί μι ζωή για τι υπηρετίναβ-λες». Τουμέν, μπορίνενα τι ντεν σαρί τουμαρί ζωή για τι υπηρετίνεν-λες ολοχρόνια;

14, 15. Σο σικλιάσα οντουλένταρ σο νακχλάς ο πφραλ Αποστολίδης ντα λέσκι ρομνί;

¹⁴ Μα μπεκλεντίνεν ότι να κα τθερέν προβλήματα τουμαρέ ζωγιάτε. Κατά Αβραάμ σικλιάσα ότι ατζέ-ντα οντουλά σο υπηρετίνενα σαρί πουμαρί ζωή ι Ιεχωβάς τθερένα προβλήματα. (Ιακ. 1:2· 1 Πέτρ. 5:9) Ανταβά αβιλό-πες κο πφραλ-ντα Αριστοτέλης Αποστολίδης. * Μπολντιλό κο 1946 κι Ελλάδα ντα κο 1952 νισανλισάλο εκχέ πφενιάσαρ, ι Ελενιάσαρ, ντα μανγκένας γιεκ τι κερέν μπουτ πράγματα ι Ιεχωβάσκε. Όμως, η Ελένη νασφάλιλι ντα ο γιατροί αρακχλέ ότι τθερέλας καρκίνος κο σορό. Νικαντέ ο καρκίνος, αλλά χάνικ μπρεσά σοράν λένγκε μπιαβέσταρ νικαντάς πάλι. Ο γιατροί κερντέ πάλι εγχείρηση, αλλά η Ελένη ατσσιλί μπανγκί, ντα ναστί κερέλας λατσσές λάφι. Να τσσιναντάς τι κερέλ έργος αντράλ πι γκίσταρ παρόλο σο ισινέ νασφαλί ντα παρόλο σο αζομάν τζάνας λέντζαρ κόντρα.

¹⁵ Ο Αριστοτέλης φροντίνελας πι ρομνιά 30 μπρεσά. Καζόμ κερέλας-λες ανταβά, ισινέ πρεσβύτερος, κερέλας μπουτί κο επιτροπές συνελεύσεων ντα βοηθιντάς τι χτίντιβελ εκ Αίθουσα Συνελεύσεων. Κο 1987, η Ελένη τθερέλας εκ ατύχημας κο έργος ντα ντινάς-πες. Ισινέ τριν μπρεσά σε κώμας ντα σοράν μουλί. Ο Αριστοτέλης βακερέλα χάνικ λαφίντζαρ οντουλένγκε σο νακχλάς: «Ανταλά μπρεσά, τθεράβας μπουτ προβλήματα ντα μερικά ανταλένταρ αβιλέ-πες οτθέ σο να μπεκλεντίναβας λένγκε. Οτθάρ, έπρεπε τι αβάβ αποφασισμέ τι νταϊντίναβ ντα μα τι μουκχάβ τίποτα τι κερέλ-μαν τι χασαράβ μι ζορ. Όμως, ο Ιεχωβά ντέλας-μαν πάντα ι ζορ σο χρειαζίντιβαβας για  τι νακχαβάβ ανταλά προβλήματα». (Ψαλμ. 94:​18, 19) Καζόμ μπουτ μανγκέλα ο Ιεχωβά οντουλέν σο κερένα ο πιο λατσσό παρόλο σο τθερένα προβλήματα!

16. Καγιά λατσσί συμβουλή ντινάς ο πφραλ Νορ πι ρομνιάτε;

¹⁶ Τι τθερέν τουμαρέ γιακχά οντουλέντε σο κα αβέν ανγκλ’ αμέντε. Ο Αβραάμ ντικχέλας κο ευλογίες σο κα ντέλας-λες ο Ιεχωβά, ντα ανταβά βοηθιντάς-λες τι νταϊντίνελ πο προβλήματα. Η πφεν Όντρεϊ Χάιντ σκεφτίνελας πάντα ι ελπίδα σο τθερέλας ανγκλά-πέστε, παρόλο σο λάκο πρώτος ρομ, ο Νάθαν Νορ, μουλό από καρκίνος ντα λάκο δεύτερος ρομ, ο Γκλεν Χάιντ, νασφάλιλο ντα τθερέλας Αλτσχάιμερ. * Σαρ βακερέλα βόι, βοηθιντέ-λα ο λάφια σο βακερντάας λάκε ο πφραλ Νορ χάνικ εβδομάδες πριν τι μερέλ: «Ο Νάθαν βακερντάς μάνγκε: “Σοράν κατά μεριπέ, οντουβά σο μπεκλεντίνασα τι αβέλ-πες ισί σίγουρος, ντα να κα τθεράς ατζέκ φαρ προβλήματα”. Σοράν, βακερντάς: “Τι ντικχές ανγκλάλ, σόσκε οτθέ ισί τι ευλογία. . . . Τι τθερές τι κερές μπουτ πράγματα​—προσπάθινε τι κερές σαρέ τι ζωγιάτε πράγματα ι γιαβερένγκε. Ανταβά κα βοηθίνελ-τουτ τι αρακχές χαρά”». Βοηθίνελα-αμέν μπουτ ανταγιά συμβουλή​—τι κεράς πάντα ο λατσσιπέ κο γιαβερά ντα “τι χαιρίνας επειδή τθεράσα ι ελπίδα”!​—Ρωμ. 12:12.

17. (α) Σόσκε πρέπει τι τθεράς αμαρέ γιακχά οντουλέντε σο κα αβέν ανγκλ’ αμέντε; (β) Σο πρέπει τι κεράς για τι ντικχάς ο ευλογίες σο ισί ανγκλ’ αμέντε σαρ βακερέλα ο εδάφιος Μιχαίας 7:7;

¹⁷ Αντιβές, ισί πιο μπουτ λόγοι από ποτές τι τθεράς αμαρέ γιακχά οντουλέντε σο κα αβέν ανγκλ’ αμέντε. Ο πράγματα σο αβένα-πες ανταλέ ντουνιάστε σικαβένα ξεκάθαρα ότι ισινάμ κο τέλος κι τελευταίε ντιβεσένγκο. Ατζεχάνικ να κα χρειαζίντιβελ τι μπεκλεντίνας ι Ντεβλέσκε Βασιλειάκε τι κερέλ κουμάντος σαρί κι πφουβ. Εκ κατά μπουτ ευλογίες σο κα τθεράς ισί ότι κα ντικχάς αμαρέ τζενέν σο μουλέ τι αβέν πάλι κι ζωή. Αζομάν ο Ιεχωβά κα ντελ ευλογίες κο Αβραάμ σο ατσσιλό πιστός ντα τθερέλας υπομονή κάνα κα τζουβντιαρέλ λες ντα λέσκι φαμιλί κι πφουβ. Κα αβέν οτθέ για τι ντικχέν-λεν; Μπορίνενα τι αβέν άμα, σαρ ο Αβραάμ, κερένα θυσίες αντράλ τουμαρέ γκίσταρ ι Ντεβλέσκε Βασιλειάκε, άμα ατσσικιαρένα τουμαρί πίστη παρόλο σο ισί προβλήματα ντα άμα κα σικλιόν τι μπεκλεντίνεν με υπομονή ι Ιεχωβάσκε.​—Διαβάνεν Μιχαίας 7:7.