1. Καβά προνόμιος τθεράσα;

ΣΟ ΜΠΑΡΟ προνόμιος ισί τι αβάς αντρέ κι κχανγκιρί κι Ιεχωβάσκι! Τθεράσα ειρήνη ντα χαρά καζόμ ντάσα λατρεία ι Ιεχωβάς αμαρέ πφραλέντζαρ ντα αμαρέ πφενίντζαρ. Καγιά ισί τουμαρί μπουτί κι κχανγκιρί;

2. Καβά παράδειγμας βακερντάς ο απόστολος Παύλος μερικέ επιστολέντε σο γραφιντάς ι Ντεβλέσκε πνευμάσαρ;

² Σικλιάσα μπουτ πράγματα ανταλέσκε εκχέ παραδειγμάσταρ σο βακερντάς ο απόστολος Παύλος μερικέ επιστολέντε σο γραφιντάς ι Ντεβλέσκε πνευμάσαρ. Σαρέ ανταλέ επιστολέντε, ο Παύλος μοιασκιαρντάς ι κχανγκιρί ι σωμάσαρ ντα βακερντάς ότι ο τζενέ αντρέ κι κχανγκιρί ισί σαρ ο μέρη ι σωμάσκε.​—Ρωμ. 12:​4-8· 1 Κορ. 12:​12-27· Εφεσ. 4:16.

3. Καλά τριν πράγματα κα ντικχάς ανταλέ μαθημάστε;

³ Ανταλέ μαθημάστε, κα ντικχάς καλά τριν σημαντικά πράγματα σικλιάσα κατά παράδειγμας σο γραφιντάς ο Παύλος. Πρώτον, κα σικλιάς ότι ο κάθε εκ αμένταρ τθερέλα εκ μπουτί * κι κχανγκιρί κι Ιεχωβάσκι. Δεύτερον, κα ντικχάς σο τι κεράς άμα δυσκολίντιβασα τι αγαβάς καγιά ισί αμαρί μπουτί κι κχανγκιρί. Ντα τρίτον, κα ντικχάς σόσκε πρέπει τι συνεχίνας τι κεράς ι μπουτί σο ντινάς-αμέν ο Ιεχωβά κι κχανγκιρί.

4. Σο σικλιαρένα-αμέν ο εδάφια Ρωμαίους 12:4, 5;

⁴ Ο πρώτος πράγμας σο σικλιάσα κατά παράδειγμας σο βακερντάς ο Παύλος ισί ότι ο κάθε εκ αμένταρ τθερέλα σημαντική μπουτί κι φαμιλί κι Ιεχωβάσκι. Ο Παύλος αρχίνελα πο παράδειγμας αντικάς: «Σαρ εκ σώμας τθερέλα μπουτ μέρη, αλλά να κερένα σαρέ ο μέρη ι ίδια μπουτί, αντικάς αμέν-ντα, παρόλο σο ισινάμ μπουτ ντανέ, ισινάμ εκ σώμας γιεκ ι Χριστόσαρ, αλλά ο κάθε εκ ισί εκ μέρος σο ναστί κερέλα ο εκ μπι ι γιαβερέσκο». (Ρωμ. 12:4, 5) Σο μανγκέλας τι βακερέλ ο Παύλος; Ότι ο κάθε εκ αμένταρ, παρόλο σο τθερέλα διαφορετική μπουτί κι κχανγκιρί, ισί σημαντικός.

5. Καλά «δώρα» ντινάς ο Ιεχωβά κι κχανγκιρί;

⁵ Κάνα σκεφτίνενα οντουλέν σο τθερένα εκ μπουτί κι κχανγκιρί, μπορεί τουμαρί γκοντί τι τζάλα αμέσως οντουλέντε σο τθερένα ευθύνες. (1 Θεσ. 5:​12· Εβρ. 13:​17) Ισί μπαγιά ότι, αντράλ κατά Χριστός, ο Ιεχωβά ντινάς πι κχανγκιριάτε «τζενέν σαρ δώρα». (Εφεσ. 4:8) Αντρέ ανταλέ τζενέντε ισί ο Κυβερνών Σώμας, ο βοηθοί σο τθερέλα ο Κυβερνών Σώμας, ο πφραλά κο Επιτροπές Τμήματος, ο επίσκοποι περιοχής, ο πφραλά σο σικλιαρένα κο θεοκρατικές σχολές, ο πρεσβύτεροι ντα ο διακονικοί υπηρέτες. Σαρέ ανταλέ πφραλέν τσσουντάς-λεν ο άγιος πνεύμας τι αρακχαβέν ι Ιεχωβάσκε μπρακέν ντα τι ντεν-λεν ζορ.​—1 Πέτρ. 5:2, 3.

6. Σο μαρένα-πες τι κερέν ο πφραλά σο τθερένα ευθύνες κι κχανγκιρί σαρ βακερένα ο εδάφια 1 Θεσσαλονικείς 2:​6-8;

⁶ Ανταλέ πφραλέν τσσουντάς-λεν ο άγιος πνεύμας για τι τθερέν διάφορες ευθύνες. Σαρ ο βαστά ντα ο τσανγκά, σο ισί μέρη ι σωμάσκε, κερένα μπουτί για τι βοηθίνεν σαρό ο σώμας, αντικάς ανταλά πφραλά-ντα κερένα μπουτ μπουτί για τι βοηθίνεν σαρί ι κχανγκιρί. Να μανγκένα τι ισαρέν-λεν ο γιαβερά. Αλλά μαρένα-πες τι ντεν ζορ ι πφραλέν ντα ι πφενίν κι κχανγκιρί. (Διαβάνεν 1 Θεσσαλονικείς 2:​6-8) Ευχαριστίνασα ι Ιεχωβάς ανταλέ πιστέ μουρσένγκε σο τσσουβένα ι γιαβερένγκο συμφέρον πιο οπρέ πουμαρέσταρ!

7. Καλά ευλογίες τθερένα οντουλά σο ισί κι ολοχρόνια υπηρεσία;

⁷ Μερικοί κι κχανγκιρί μπορεί τι ισί ιεραπόστολοι, ειδικοί σκαπανείς ή τακτικοί σκαπανείς. Μάλιστα, πφραλά ντα πφενιά σαρό κο ντουνιάς τραμπιντέ τι λεν ι ολοχρόνια υπηρεσία για τι βακερέν ο λατσσέ αμπέρια ντα τι κερέν μαθητέν. Οτθάρ, βοηθιντέ μπουτέν τι αβέν μαθητές ι Ιησού Χριστόσκε. Παρόλο σο ανταλά ολοχρόνιοι υπηρέτες να τθερένα μπουτ λοβέ ή πράγματα, ο Ιεχωβά πφερντάς-λεν ευλογίες. (Μάρκ. 10:​29, 30) Μανγκάσα μπουτ ανταλέ πφραλέν ντα πφενίν ντα εκτιμίνασα-λεν μπουτ σο ισί αντρέ κι κχανγκιρί!

8. Σόσκε ισί ο κάθε πφραλ σημαντικός ι Ιεχωβάσκε;

⁸ Σάντε ο υπεύθυνα πφραλά ντα οντουλά σο ισί κι ολοχρόνια υπηρεσία τθερένα μπουτί κι κχανγκιρί; Νάα. Ο κάθε πφραλ σο βακερέλα ο λατσσέ αμπέρια ισί σημαντικός ι Ντεβλέσκε ντα ι κχανγκιριάκε. (Ρωμ. 10:​15· 1 Κορ. 3:​6-9) Εκ κατά πιο σημαντικά πράγματα σο μανγκέλα τι κερέλ η κχανγκιρί, ισί τι κερέλ μαθητέν αμαρέ Κυριόσκε, ι Ιησού Χριστόσκε. (Ματθ. 28:​19, 20· 1 Τιμ. 2:4) Σαρέ, εμ ο μπολντέ εμ ο μπίμπολντε ευαγγελιζόμενοι, προσπαθίνενα τι τσσουβέν ανταβά έργος πρώτα πουμαρέ ζωγιάτε.​—Ματθ. 24:14.

9. Σόσκε ισί σημαντικά αμαρέ πφενιά κι κχανγκιρί;

⁹ Ο Ιεχωβά ντέλα κο πφενιά σημαντική μπουτί κι κχανγκιρί. Ανταλά πιστά πφενιά σο μπορεί τι ισί παντριμέ, νταγιά, χήρες ή εργένια, τθερένα λέσκε μπαρί αξία.  Η Γραφή βακερέλα μπερεκέτι λατσσέ τζουβλίνγκε σο κερντέ ι Ντεβλέσκο γκι. Ανταλά τζουβλιά ισί μπουτ λατσσέ παραδείγματα σόσκε σικαντέ σοφία, ισινέ πιστές, πφαμπόνας ι εργόσκε, ισινέ μπίνταρανε, ντένας αντράλ πουμαρέ γκίσταρ ντα κερένας λατσσέ πράγματα. (Λουκ. 8:2, 3· Πράξ. 16:​14, 15· Ρωμ. 16:3, 6· Φιλιπ. 4:3· Εβρ. 11:​11, 31, 35) Ισινάμ πφερντέ εκτίμηση ι Ιεχωβάσκε σο τθεράσα αμαρέ κχανγκιρίντε πφενίν σο σικαβένα ανταλά σουκάρ ιδιότητες!

10. Σόσκε ισί σημαντικά ο πφουρέ πφραλά;

¹⁰ Εκ γιαβέρ ευλογία ισί ότι τθεράσα κι κχανγκιρί μπουτέ πφουρέ πφραλέν. Μερικέ κχανγκιρίντε ισί πφουρέ πφραλά ντα πφενιά σο υπηρετιντέ πιστά ι Ιεχωβάς σαρί πουμαρί ζωή. Γιαβερά πφουρέ μπορεί τι ισί νεβέ κι αλήθεια. Μπουτ φαρ, ο πφουρέ πφραλά νακχένα προβλήματα υγείας κατά πφουρίματα. Ανταλά προβλήματα μπορεί μα τι μουκχένα-λεν τι κερέν μπουτ πράγματα κι κχανγκιρί ντα κο έργος. Όμως, κερένα σο νακχέλα λένγκε βαστένταρ για τι κερέν έργος, τι ντεν ζορ ι πφραλέν ντα τι σικλιαρέν-λεν! Ντα βοηθίντιβασα μπουτ οντουλένταρ σο σικλιλέ πουμαρέ ζωγιάτε. Ισί μπουτ σουκάρ κο γιακχά κι Ιεχωβάσκε αλλά εμ αμαρέντε.​—Παρ. 16:31.

11, 12. Σαρ ντένα-τουμέν ζορ ο τερνέ σο ισί τουμαρέ κχανγκιριάτε;

¹¹ Σκεφτίνεν αμαρέ τερνέν-ντα. Τθερένα μπουτ προβλήματα σόσκε μπαριόνα ανταλέ ντουνιάστε σο κερέλα-λες κουμάντος ο Σατανάς ο Διάβολος ντα λέσκε γκεραλέ σκέψεις. (1 Ιωάν. 5:​19) Όμως, σαρέ λάσα ζορ κάνα ντικχάσα αμαρέ τερνέν τι ντεν απαντήσεις κο συναθροίσεις, τι νικιόν κο έργος ή τι κερέν λάφι μπίνταρανες οντουλένγκε σο πακιάνα. Βα, τουμέν ο τερνέ ισινέν μπουτ σημαντικοί κι κχανγκιρί κι Ιεχωβάσκι!​—Ψαλμ. 8:2.

¹² Όμως, μερικά πφραλά ντα πφενιά δυσκολίντιβενα τι πακιάν ότι ισί σημαντικοί αντρέ κι κχανγκιρί. Σο μπορεί τι βοηθίνελ ι κάθε εκχές αμένταρ τι νιωθίνελ ότι τθερέλα εκ μπουτί κι κχανγκιρί; Για τι ντικχάς.

13, 14. Σόσκε μπορεί τι νιωθίνενα μερικοί ότι νανέ σημαντικοί ι κχανγκιριάκε;

¹³ Ντικχέν ο δεύτερος πράγμας σο σικλιάσα κατά παράδειγμας σο βακερντάς ο Παύλος. Λέσκε λάφια ανένα αμαρέ γκοντιάτε εκ πρόβλημας σο τθερένα μπουτ πφραλά αντιβές: δυσκολίντιβενα τι πακιάν ότι ισί σημαντικοί ι κχανγκιριάκε. Ο Παύλος γραφίνελα: «Άμα ο πιντρό κα βακερέλ: “Επειδή να ισινόμ βας, να ισινόμ μέρος ι σωμάσκο”, να τσσιναβέλα τι αβέλ μέρος ι σωμάσκο. Ντα άμα ο καν κα βακερέλ: “Επειδή να ισινόμ γιακχ, να ισινόμ μέρος ι σωμάσκο”, να τσσιναβέλα τι αβέλ μέρος ι σωμάσκο». (1 Κορ. 12:​15, 16) Σο μανγκέλας τι βακερέλ ο Παύλος;

¹⁴ Άμα συγκρίνενα τουμαρό νεαυτός ι γιαβερέντζαρ κι κχανγκιρί, μπορεί τι αρχίνεν τι πακιάν ότι να τθερένα αξία. Μερικοί κι κχανγκιρί μπορεί τι σικλιαρένα λατσσές, τι οργανώνενα λατσσές ο πράγματα κι κχανγκιρί ή τι τζανένα λατσσές σαρ τι ντεν ζορ ι γιαβερέν. Τουμέν όμως μπορεί τι πακιάνα ότι να ισινέν αζόμ λατσσέ ανταλέ πραγματέντε σαρ ισί βον. Ανταβά σικαβέλα ότι ισινέν ταπεινοί ντα αγαβένα ότι ναστί κερένα-λεν σαρέ. (Φιλιπ. 2:3) Αλλά τθερέν τουμαρί γκοντί. Άμα συγκρίνενα συνέχεια τουμαρό νεαυτός οντουλέντζαρ σο τθερένα μπαρέ ταλέντα, κα χασαρέν τουμαρί ζορ. Ντα μπορεί τι νιωθίνεν, σαρ βακερντάς ο Παύλος, ότι να τθερένα καέκ μπουτί κι κχανγκιρί. Σο κα βοηθίνελ-τουμέν τι νασκιαρέν ανταλά αισθήματα;

15. Σαρ πρέπει τι ντικχάς ο χαρίσματα σο μπορεί τι τθεράσα σαρ βακερένα ο εδάφια 1 Κορινθίους 12:​4-11;

¹⁵ Σκεφτίνεν ακαβά: Μερικοί κατά πρώτοι Χριστιανοί λιντέ κατά Ιεχωβά ο χαρίσματα ι άγιε πνευμάσκε για τι κερέν θαύματα, αλλά να λιντέ σαρέ ο Χριστιανοί ο ίδια χαρίσματα. (Διαβάνεν 1 Κορινθίους 12:​4-11) Ο Ιεχωβά ντινάς-λεν διαφορετικά χαρίσματα ντα ικανότητες, αλλά ο κάθε Χριστιανός ισινέ σημαντικός. Αντιβές, να τθεράσα ανταλά χαρίσματα ι άγιε πνευμάσκε. Όμως, ακανά-ντα ισί μπαγιά ακαβά:  Μπορεί μα τι τθεράσα σαρέ ο ίδια ταλέντα, αλλά ισινάμ σαρέ σημαντικοί ι Ιεχωβάσκε.

16. Καγιά συμβουλή σο βακερντάς ο απόστολος Παύλος πρέπει τι κεράς;

¹⁶ Αντίς τι συγκρίνας αμαρό νεαυτός γιαβερέ Χριστιανόντζαρ, πρέπει τι κεράς ι συμβουλή ι Παυλόσκι: «Ο κάθε εκ τουμένταρ τι σκεφτίνελ με προσοχή οντουλά σο κερέλα, ντα αζομάν κα τθερέλ λόγος τι χαιρίνελ σάντε οντουλέσκε σο κερντάς βοβ ντα όχι επειδή συγκρίνελα-πες ι γιαβερέσαρ».​—Γαλ. 6:4.

17. Σαρ κα βοηθίντιβας άμα κα κεράς ι συμβουλή ι Παυλόσκι;

¹⁷ Άμα κα κεράς ι συμβουλή ι Παυλόσκι ντα κα σκεφτίνας με προσοχή οντουλά σο κεράσα, μπορεί τι αρχίνας τι αγαβάς ότι τθεράσα χαρίσματα ντα ικανότητες σο να τθερένα γιαβερά πφραλά. Για παράδειγμας, εκ πρεσβύτερος, μπορεί μα τι κερέλα μπουτ λατσσέ ομιλίες, αλλά μπορεί τι ισί μπουτ λατσσό κο έργος. Ή μπορεί μα τι οργανώνελα αζόμ λατσσές ο πράγματα κι κχανγκιρί σαρ κερένα γιαβερά πρεσβύτεροι, αλλά μπορεί τι σικαβέλα αγάπη ντα ο πφραλά τι νιωθίνενα άνετα τι μανγκέν λέσταρ συμβουλές κατά Γραφή. Ή μπορεί τι τθερέλα ο ναβ ότι σικαβέλα φιλοξενία. (Εβρ. 13:2, 16) Κάνα ντικχάσα αμαρέ χαρίσματα, κα νιωθίνας σουκάρ οντουλένγκε σο μπορίνασα τι κεράς ι κχανγκιριάκε. Επίσης, να κα ζηλίνας ι πφραλέν σο τθερένα διαφορετικά χαρίσματα αμένταρ.

18. Σαρ μπορίνασα τι σικλιαράς πιο λατσσές;

¹⁸ Σο-ντα μπουτί τι τθεράσα κι κχανγκιρί, σαρέ πρέπει τι μανγκάς τι υπηρετίνας ι Ντεβλές πιο λατσσές ντα τι σικλιαράς πιο λατσσές. Για τι βοηθίνελ-αμέν, ο Ιεχωβά σικλιαρέλα-αμέν αντράλ κατά οργάνωση σο τθερέλα. Για παράδειγμας, κι συνάθροιση σο κεράσα αντρέ κι εβδομάδα σικλιάσα τι αβάς πιο λατσσέ κο έργος. Προσπαθίνενα τι κερέν οντουλά σο σικλιόνα ανταλέ συναθροισιάτε;

19. Σο μπορίνενα τι κερέν για τι νακχέν ι Σχολή για Ευαγγελιστές της Βασιλείας;

¹⁹ Επίσης, ο Ιεχωβά σικλιαρέλα-αμέν μπουτ λατσσές αντράλ κατά Σχολή για Ευαγγελιστές της Βασιλείας. Πφραλά ντα πφενιά σο ισί κι ολοχρόνια υπηρεσία ντα ισί 23 μέχρι 65 μπρεσένγκε μπορίνενα τι νακχέν ανταγιά σχολή. Μπορεί τι αμντίνενα ότι τουμέν ναστί κα νακχέν ποτές ανταγιά σχολή. Αντίς όμως τι σκεφτίνεν σόσκε ναστί νακχένα-λα, σκεφτίνεν σόσκε μανγκένα τι νακχέν-λα. Σοράν, σκεφτίνεν σο μπορίνενα τι κερέν για τι τθερέν ο προσόντα. Με τη βοήθεια ι Ιεχωβάσκι ντα με μπουτ προσπάθεια, μπορεί τι κερέν οντουβά σο αμντίνενας ότι ναστί αβέλας-πες.

20. Σο σικλιάσα κατά εδάφια Ρωμαίους 12:​6-8;

²⁰ Ο τρίτος πράγμας σο σικλιάσα κατά παράδειγμας σο βακερντάς ο Παύλος ισί κο Ρωμαίους 12:​6-8. (Διαβάνεν) Ατθέ ο Παύλος σικαβέλα πάλι ότι κάθε τζενό κι κχανγκιρί τθερέλα διαφορετικά χαρίσματα. Ακανά όμως βακερέλα ότι πρέπει τι χρησιμοποιήνας σο-ντα χάρισμας τθεράσα για τι ντας ζορ ι πφραλέν κι κχανγκιρί.

21, 22. Σο σικλιάσα κατά Ρόμπερτ ντα κατά Φελίτσε;

²¹ Ντικχέν ο παράδειγμας εκχέ πφραλέσκο σο κα βακεράς λέσκε Ρόμπερτ. Αφού υπηρετιντάς εκχέ γιαβερέ τθεμέστε, διορισάλο τι υπηρετίνελ κο Μπέθελ πι τθεμέστε. Παρόλο σο ο πφραλά ντινέ-λες τι αγαβέλ ότι να αλλαντέ λέσκο διορισμός επειδή κερντάς κάτι λάθος, βοβ βακερντάς: «Μπουτ μασεκά να ισινόμας χαρούμενος επειδή αμντίναβας ότι κάτι να κερντόμας λατσσές. Ισινέ φαρ σο μανγκάβας  τι νασάβ κατά Μπέθελ». Σαρ αρακχλάς πάλι πι χαρά; Εκ πφραλ σο ισινέ βοβ-ντα πρεσβύτερος αντάς λέσκε γκοντιάτε ότι ο Ιεχωβά σικλιαρντάς-αμέν κο διορισμοί σο τθεράας πριν για τι αβάς πιο χρήσιμοι κο διορισμός στο τθεράσα ακανά. Ο Ρόμπερτ αγαντάς ότι έπρεπε τι τσσιναβέλ τι ντικχέλ παλάλ ντα τι αρχίνελ τι ντικχέλ σο μπορίνελα τι κερέλ ακανά.

²² Ο πφραλ Φελίτσε Επίσκοπο νακχλάς κάτι ασακό. Γιεκ πι ρομνιάσαρ νακχλέ ι Σχολή Γαλαάδ κο 1956 ντα υπηρετιντέ κο έργος περιοχής κι Βολιβία. Κο 1964, κερντέ τσσαβές. Ο Φελίτσε βακερντάς: «Ισινέ αμένγκε μπουτ δύσκολος τι μουκχάς αμαρό διορισμός σο μανγκάας μπουτ. Η αλήθεια ισί ότι χασαρντόμ σχεδόν εκ μπρες μι ζωγιάταρ επειδή ισινόμας μπουτ στεναχωριμέ. Αλλά ο Ιεχωβά βοηθιντάς-μαν τι αλλάναβ ο τρόπος σο σκεφτίναβας ντα τι ντικχάβ πιο μπουτ μι νεβί ευθύνη σαρ ντατ». Μήπως τουμέν-ντα νιωθίνενα σαρ ο Ρόμπερτ ή ο Φελίτσε; Μήπως χασαρντέν τουμαρί ζορ επειδή ανταγιά στιγμή να τθερένα ο διορισμοί σο τθερένας ανγκλέ; Άμα βα, κα αβέν πιο ευτυχισμέ άμα κα τθερέν τουμαρέ γιακχά κο πράγματα σο μπορίνενα τι κερέν ακανά για τι υπηρετίνεν ι Ιεχωβάς ντα τουμαρέ πφραλέν. Χρησιμοποιήνεν τουμαρέ χαρίσματα ντα ικανότητες για τι βοηθίνεν γιαβερέν ντα αντικάς κα συνεχίνεν τι κερέν μπουτ πράγματα ντα κα αρακχέν χαρά καζόμ ντένα ζορ ι πφραλέν κι κχανγκιρί.

23. Καβά πράγμας πρέπει τι σκεφτίνας, ντα σο κα ντικχάς κο γιαβέρ μάθημας;

²³ Ο κάθε εκ αμένταρ ισί σημαντικός ι Ιεχωβάσκε. Βοβ μανγκέλα τι αβάς αντρέ λέσκε φαμιλιάτε. Άμα ντάσα αμαρέ σαατίσταρ για τι σκεφτίνας σαρ τι ντας ζορ αμαρέ πφραλέν ντα σοράν κεράσα-λες ανταβά, να κα νιωθίνας ότι να ισινάμ σημαντικοί αντρέ κι κχανγκιρί! Αλλά σαρ πρέπει τι ντικχάς ι γιαβερέν κι κχανγκιρί; Σαρ μπορίνασα τι σικαβάς ότι σεβάνασα-λεν; Κο γιαβέρ μάθημας, κα ντικχάς ανταβά σημαντικός θέμας.