ΜΑΘΗΜΑΣ 32
Τι Πφιρέν Τουμαρέ Ντεβλέσαρ με Ταπεινότητα ντα Μετριοφροσύνη
«Τι πφιρές τι Ντεβλέσαρ με μετριοφροσύνη!»—ΜΙΧ. 6:8.
ΥΜΝΟΣ 26 Ι Ιεχωβάσαρ τι Πφιρές!
ΣΟ ΚΑ ΝΤΙΚΧΑΣ *
1. Σο βακερντάς ο Δαβίδ για την ταπεινότητα ι Ιεχωβάσκι;
ΜΠΟΡΙΝΑΣΑ μπαγιά τι βακεράς ότι ο Ιεχωβά ισί ταπεινός; Βα. Ο Δαβίδ εκ φαρ βακερντάς: «Ντέσα-μαν τι ασπίδα σο σώνελα, ντα τι ταπεινότητα κερέλα-μαν μπαρό». (2 Σαμ. 22:36· Ψαλμ. 18:35) Μπορεί ο Δαβίδ τι τθερέλας πι γκοντιάτε ο ντιβές σο ο προφήτης Σαμουήλ γκιλό λέσκε νταντέσκε κχερέστε για τι σικαβέλ κον κα αβέλας σοράν βασιλιάς κο Ισραήλ. Ο Δαβίδ ισινέ ο πιο χουρντό κατά οχτώ τσσαβέ. Όμως, λες τραμπιντάς ο Ιεχωβά τι αβέλ βασιλιάς σοράν κατά Σαούλ.—1 Σαμ. 16:1, 10-13.
2. Σο κα ντικχάς ανταλέ μαθημάστε;
2 Ο Δαβίδ σίγουρα νιωθίνελας σαρ ο ψαλμωδός σο βακερντάς ότι ο Ιεχωβά «κερέλα τελέ για τι ντικχέλ ο ουρανός ντα ι πφουβ, ντα βάντελα κατά τσικ οντουλές σο νανέ σημαντικός. Νικαβέλα ι τσορορές . . . για τι τσσουβέλ-λες τι μπεσέλ τζενέντζαρ σο αστάρντιβενα βασιλιαδένγκε φαράταρ». (Ψαλμ. 113:6-8) Ανταλέ μαθημάστε, πρώτα κα ντικχάς σαρ σικαντάς ο Ιεχωβά ταπεινότητα ντα σο σικλιάσα λέσταρ. Σοράν, κα σικλιάς πιο μπουτ για την μετριοφροσύνη κατά βασιλιάς Σαούλ, κατά προφήτης Δανιήλ ντα κατά Ιησούς.
ΣΟ ΣΙΚΛΙΑΣΑ ΚΑΤΑ ΙΕΧΩΒΑ;
3. Σαρ συμπεριφερίντιβελα αμένγκε ο Ιεχωβά, ντα σο σικαβέλα ανταβά;
3 Ο Ιεχωβά σικαβέλα ότι ισί ταπεινός κατά τρόπος σο συμπεριφερίντιβελα πι υπηρετόνγκε σο ισί ατελείς. Να δεχτίνελα απλά αμαρί λατρεία, αλλά ντικχέλα-αμέν σαρ αμαλά. (Ψαλμ. 25:14) Για τι μπορίνας τι αβάς λέσαρ αμαλά, ο Ιεχωβά ντινάς πι Τσσαβές σαρ θυσία αμαρέ αμαρτιένγκε. Καζόμ μπουτ τζιτζίνελα ντα πφαμπόλα αμένγκε!
4. Σο ντινάς-αμέν ο Ιεχωβά, ντα σόσκε;
4 Σκεφτίνεν εκ γιαβέρ τρόπος σο ο Ιεχωβά σικαβέλα ότι ισί ταπεινός. Βοβ κερντάς-λεν σαρέ, οντουλέσκε κα μπορίνελας μα τι μουκχέλ-αμέν τι τραμπίνας σο τι κεράς αμαρέ ζωγιάτε. Αλλά να κερντάς-λες ανταβά. Κερντάς-αμέν τι μοιάζας λέστε ντα ντινάς-αμέν ι ελευθερία τι τραμπίνας σο κα κεράς. Παρόλο σο ισινάμ μπουτ χουρντέ ανγκλά-λέστε, μανγκέλα τι τραμπίνας τι υπηρετίνας-λες σαρέ αμαρέ γκίσαρ επειδή μανγκάσα-λες ντα αγαβάσα ο λατσσιπέ σο τθεράσα κάνα ντάσα-λες καν. (Δευτ. 10:12· Ησ. 48:17, 18) Ισινάμ πφερντέ εκτίμηση ι Ιεχωβάσκε σο ισί αζόμ ταπεινός!
Ο Ιησούς κο ουρανός. Πασέ λέστε ισί μερικοί οντουλένταρ σο κα κυβερνίνεν λέσαρ. Γιεκ ντικχένα μπουτέ αγγελόν. Μερικοί άγγελοι τζάνα κι πφουβ για τι κερέν πουμαρέ διορισμοί. Ο Ιεχωβά ντινάς ευθύνες σαρέ ανταλέντε σο ντικχίντιβενα κι φωτογραφία (Ντικχέν ι παράγραφος 5)
5. Σαρ σικλιαρέλα-αμέν ο Ιεχωβά τι αβάς ταπεινοί; (Ντικχέν ι φωτογραφία κι ανγκλαϊνί σελίδα)
5 Ο Ιεχωβά σικλιαρέλα-αμέν ι ταπεινότητα οντουλένταρ σο κερέλα αμένγκε. Βοβ ισί Οντουβά σο τθερέλα ι πιο μπαρί σοφία σαριλένταρ. Όμως, μανγκέλα τι ασουνέλ οντουβά σο τθερένα τι βακερέν ο γιαβερά. Για παράδειγμας, ο Ιεχωβά μουκχλάς πι Τσσαβές τι βοηθίνελ-λες κάνα κερντάς σαρέ ο πράγματα. (Παρ. 8:27-30· Κολ. 1:15, 16) Ντα παρόλο σο ο Ιεχωβά ισί ο πιο ζουρανό, ντέλα γιαβερέντε-ντα ευθύνες. Για παράδειγμας, τσσουντάς ι Ιησούς τι αβέλ Βασιλιάς κι Βασιλεία, ντα κα ντελ ευθύνες κο 144.000 τζενέ σο κα κυβερνίνεν γιεκ ι Ιησούσαρ. (Λουκ. 12:32) Σίγουρα, ο Ιεχωβά σικλιαρντάς ι Ιησούς για τι αβέλ Βασιλιάς ντα Αρχιερέας. (Εβρ. 5:8, 9) Σικλιαρέλα οντουλέν-ντα σο κα κυβερνίνεν γιεκ ι Ιησούσαρ, αλλά αφού κα ντελ-λεν ανταβά διορισμός, να κα προσπαθίνελ τι κερέλ κουμάντος λένγκι μπουτί. Οκιά μπάνταρ, ντέλα λένγκε μπέσα ντα ισί σίγουρος ότι κα κερέν οντουβά σο μανγκέλα βοβ.—Αποκ. 5:10.
Μοιάζασα κο Ιεχωβά κάνα σικλιαράσα γιαβερέν ντα ντάσα-λεν μπουτιά τι κερέν (Ντικχέν ο παράγραφοι 6, 7) *
6, 7. Σαρ μπορίνενα ι φαμιλίνγκε σορέ, ο πρεσβύτεροι, ο νταντά ντα ο νταγιά τι μοιάζεν κο Ιεχωβά;
6 Άμα αμαρό Ντατ, ο Ιεχωβά, σο να τθερέλα Ησ. 41:10) Σο γιαβέρ μπορίνενα τι σικλιόν κατά Ιεχωβά οντουλά σο τθερένα εξουσία;
ανάγκη καεκχέσκι βοήθεια, ντέλα ευθύνες γιαβερέντε, καζόμ πιο μπουτ πρέπει τι κεράς-λες αμέν ανταβά! Για παράδειγμας, μήπως ισινέν σορέ κι φαμιλί ή πρεσβύτεροι κι κχανγκιρί; Σαρ ο Ιεχωβά, τι ντεν μπουτιά γιαβερέντε ντα μα τι προσπαθίνεν τι κερέν κουμάντος λένγκι μπουτί. Κάνα μοιάζενα κο Ιεχωβά, εμ κα αβέλ-πες η μπουτί εμ κα σικλιαρέν ι γιαβερέν ντα κα βοηθίνεν-λεν τι αβέν σίγουροι πουμαρέ νεαυτόσκε. (7 Η Γραφή σικαβέλα ότι ο Ιεχωβά μανγκέλα τι ασουνέλ σο τθερένα τι βακερέν ο άγγελοι, σο ισί λέσκε τσσαβέ. (1 Βασ. 22:19-22) Νταντάλεν ντα νταγιάλεν, σαρ μπορίνενα τι κερέν οντουβά σο κερέλα ο Ιεχωβά; Κα αβέλας λατσσό τι μανγκέν τουμαρέ τσσαβένταρ τι βακερέν τουμένγκε σαρ πακιάνα ότι πρέπει τι αβέλ-πες εκ μπουτί. Ντα άμα αβέλα-πες, τι κερέν οντουβά σο βακερντέ τουμένγκε.
8. Σαρ σικαντάς υπομονή ο Ιεχωβά κο Αβραάμ ντα κι Σάρρα;
8 Εκ γιαβέρ τρόπος σο ο Ιεχωβά σικαβέλα ταπεινότητα ισί ότι κερέλα υπομονή. Για παράδειγμας, ο Ιεχωβά κερέλα υπομονή κάνα λέσκε υπηρέτες βακερένα με σεβασμός ότι να αγαβένα ντιπ λέσκε αποφάσεις. Ασουντάς κάνα ο Αβραάμ βακερντάς λέσκε ότι να αγαβέλας ντιπ σόσκε μανγκέλας τι καταστραφίνελ ο Σόδομα ντα ο Γόμορρα. (Γέν. 18:22-33) Ντα ντεν-τουμέν γκοντί σαρ συμπεριφερισάλο ο Ιεχωβά λέσκε ρομνιάκε, ι Σαρράκε. Να προσβαλισάλο ούτε χολιασάλο σο ασάντιλι κάνα ντινάς-λεν πο λάφι ότι κα ατσσόλας κχαμνί πι πφουριματέντε. (Γέν. 18:10-14) Αλλά σικαντάς σεβασμός ι Σαρράκε.
9. Σο σικλιόνα κατά Ιεχωβά ο νταντά, ο νταγιά ντα ο πρεσβύτεροι;
9 Νταντάλεν, νταγιάλεν ντα πρεσβύτεροι, σο σικλιόνα κατά Ιεχωβά; Σκεφτίνεν σο κερένα κάνα τουμαρέ τσσαβέ ή μερικοί κατά κχανγκιρί βακερένα ότι να αγαβένα ντιπ τουμαρέ αποφάσεις. Μήπως σιγκιαρένα τι διορθώνεν-λεν; Ή προσπαθίνενα τι αγαβέν οντουβά σο βακερντέ τουμένγκε; Ο φαμιλιά ντα ο κχανγκιριά σίγουρα βοηθίντιβενα μπουτ κάνα οντουλά σο τθερένα εξουσία μοιάζενα κο Ιεχωβά. Μέχρι ακανά, ντικχλάμ σο σικλιάσα για την ταπεινότητα κατά παράδειγμας ι Ιεχωβάσκο. Ακανά, κα σικλιάς σαρ τι σικαβάς μετριοφροσύνη κατά παραδείγματα σο ισί κι Γραφή.
ΣΟ ΣΙΚΛΙΑΣΑ ΚΑΤΑ ΓΙΑΒΕΡΕΝΓΚΟ ΠΑΡΑΔΕΙΓΜΑΣ;
10. Σαρ βοηθίνελα-αμέν ο Λάφι ι Ντεβλέσκο;
10 Ο Ιεχωβά, αμαρό «Μπαρό Εκπαιδευτής», τθερέλα παραδείγματα αντρέ πι Λαφίστε για τι σικλιαρέλ-αμέν. (Ησ. 30:20, 21) Σικλιάσα κατά ιστορίες ι Γραφιάκε σο βακερένα τζενένγκε σο τθερένας λατσσέ ιδιότητες, σαρ ισί η μετριοφροσύνη, δηλαδή τι αγαβάς αμαρέ όρια. Σικλιάσα επίσης οντουλέ τζενένταρ σο να σικαντέ ασακέ σουκάρ ιδιότητες.—Ψαλμ. 37:37· 1 Κορ. 10:11.
11. Σο σικλιάσα κατά Σαούλ;
11 Σκεφτίνεν σο αβιλό-πες κο βασιλιάς Σαούλ. Κάνα ισινέ τερνό, αγαβέλας πο όρια ντα σακιντίνελας τι λελ πιο μπουτ ευθύνες. (1 Σαμ. 9:21· 10:20-22) Όμως, καζόμ νακχέλας ο καιρός αβιλό μπαρικανό ντα κερντάς πράγματα σο να τθερέλας ο δικαίωμας τι κερέλ. Ανταβά αβιλό-πες χάνικ καιρός αφού αβιλό βασιλιάς. Εκ φαρ, χασαρντάς πι υπομονή καζόμ μπεκλεντίνελας τι αβέλ ο προφήτης Σαμουήλ. Αντίς τι ντελ μπέσα κο Ιεχωβά ντα τι μουκχέλ λέσκε βαστέστε ι λαός, ο Σαούλ κερντάς εκ θυσία παρόλο σο να τθερέλας ο δικαίωμας τι κερέλ-λες ανταβά. Οτθάρ, χασαρντάς ι Ιεχωβάσκι ευλογία ντα ι θέση σο τθερέλας σαρ βασιλιάς. (1 Σαμ. 13:8-14) Κα σικαβάς σοφία άμα κα σικλιάς ανταλέ παραδειγμάσταρ ντα να κα κεράς πράγματα σο να τθεράσα ο δικαίωμας τι κεράς.
12. Σόσκε ο Δανιήλ ισινέ λατσσό παράδειγμας;
12 Όμως, ντικχέν ο λατσσό παράδειγμας σο μουκχλάς ο προφήτης Δανιήλ σο να ισινέ σαρ ο Σαούλ. Σαρέ πι ζωγιάτε, ο Δανιήλ ατσσιλό ταπεινός ντα πάντα μανγκέλας κατά Ιεχωβά τι οδηγίνελ-λες. Για παράδειγμας, κάνα ο Ιεχωβά χρησιμοποιηντάς-λες για τι εξηγίνελ ο σουνό σο ντικχλάς ο Ναβουχοδονόσορας, ο Δανιήλ να βακερντάς ότι βοβ κορκορό κερντάς-λες ανταβά. Αλλά ντινάς σαρί ι δόξα κο Ιεχωβά. (Δαν. 2:26-28) Σο σικλιάσα αμέν ανταλέσταρ; Άμα ο πφραλά μπεϊντίνενα αμαρέ ομιλίες ή άμα ισινάμ λατσσέ κο έργος, πρέπει τι ντας-αμέν γκοντί τι ντας σαρί ι δόξα κο Ιεχωβά. Πρέπει τι αγαβάς ότι ναστί κα κεράας ανταλά πράγματα άμα ο Ιεχωβά να κα βοηθίνελας-αμέν. (Φιλιπ. 4:13) Κάνα κεράσα-λες ανταβά, κεράσα οντουβά σο κερντάς ο Ιησούς-ντα. Σόσκε βακεράσα-λες ανταβά;
13. Σο σικλιάσα για τη μετριοφροσύνη κατά Ιησούς σαρ βακερένα ο εδάφια Ιωάννης 5:19, 30;
13 Παρόλο σο ο Ιησούς ισινέ ο τέλειος Τσσαβό ι Ντεβλέσκο, πάντα μουκχέλας-πες κο Ιεχωβά. (Διαβάνεν Ιωάννης 5:19, 30) Ποτές να μανγκλάς τι καπτίνελ πι Νταντέσκι εξουσία. Ο εδάφιος Φιλιππησίους 2:6 βακερέλα αμένγκε ότι «να νακχλό λέσκε γκοντιάταρ τι καπτίνελ ι Ντεβλέσκι θέση, δηλαδή τι αβέλ ίσος ι Ντεβλέσαρ». Ο Ιησούς αγαβέλας ότι ναστί κερέλας-λεν σαρέ ντα σεβάνελας πι Νταντέσκι εξουσία.
Ο Ιησούς τζανέλας ο όρια σο τθερέλας λέσκι εξουσία ντα να νακχέλας-λεν (Ντικχέν ι παράγραφος 14)
14. Σο κερντάς ο Ιησούς κάνα μανγκλέ λέσταρ κάτι σο να τθερέλας ο δικαίωμας τι ντελ;
14 Σκεφτίνεν σο κερντάς ο Ιησούς κάνα ο Ιάκωβος ντα ο Ιωάννης γιεκ πουμαρέ νταγιάσαρ μανγκλέ λέσταρ κάτι σο να τθερέλας ο δικαίωμας τι ντελ. Χωρίς τι σακιντίνελ, ο Ιησούς βακερντάς ότι σάντε λέσκο Ντατ μπορίνελας τι αποφασίνελ κον κα μπεσέλας δεξιά ντα αριστερά λέσταρ κι Βασιλεία. (Ματθ. 20:20-23) Ο Ιησούς αγαβέλας ότι ναστί κερέλας-λεν σαρέ. Τθερέλας μετριοφροσύνη. Ποτές να κερντάς κάτι σο ο Ιεχωβά να ντινάας-λες ο δικαίωμας τι κερέλ. (Ιωάν. 12:49) Σαρ μπορίνασα τι κεράς οντουβά σο κερντάς ο Ιησούς;
Σαρ κα αβάς μετριόφρονες σαρ ο Ιησούς; (Ντικχέν ο παράγραφοι 15, 16) *
15, 16. Σαρ κα κεράς ι συμβουλή ι Γραφιάκι σο ισί κο εδάφιος 1 Κορινθίους 4:6;
15 Μοιάζασα κο Ιησούς κάνα κεράσα ι συμβουλή ι Γραφιάκι σο ισί κο εδάφιος 1 Κορινθίους 4:6: «Πρέπει τι ακολουθίνεν σάντε ο πράγματα σο ισί γραμμέ». Οτθάρ, κάνα μανγκένα αμένταρ συμβουλή, δεν πρέπει τι βακεράς σο πακιάσα αμέν ή τι βακεράς ο πρώτος πράγμας σο αβέλα αμαρέ γκοντιάτε. Αλλά πρέπει τι βακεράς ο συμβουλές σο αρακχάσα κι Γραφή ντα κο έντυπα. Αντικάς, αγαβάσα ότι ναστί τζανάσα-λεν σαρέ. Κάνα κεράσα-λες ανταβά, ισινάμ μετριόφρονες σόσκε σικαβάσα ότι αγαβάσα ότι ο συμβουλές ι Ιεχωβάσκε ισί πάντα πιο λατσσέ αμαρένταρ.—Αποκ. 15:3, 4.
16 Μανγκάσα τι σικαβάς μετριοφροσύνη, όχι σάντε για τι δοξάνας ι Ιεχωβάς, αλλά για τι κεράς κάτι γιαβέρ-ντα σο ισί μπουτ σημαντικός. Ακανά κα ντικχάς σαρ η ταπεινότητα ντα η μετριοφροσύνη ντένα-αμέν χαρά ντα βοηθίνενα-αμέν τι τζας-λεν λατσσές ι γιαβερέντζαρ.
ΣΟΣΚΕ ΙΣΙ ΛΑΤΣΣΟ ΤΙ ΣΙΚΑΒΑΣ ΤΑΠΕΙΝΟΤΗΤΑ ΝΤΑ ΜΕΤΡΙΟΦΡΟΣΥΝΗ;
17. Σόσκε ισί χαρούμενοι ο τζενέ σο ισί ταπεινοί ντα σικαβένα μετριοφροσύνη;
17 Κάνα ισινάμ ταπεινοί ντα σικαβάσα μετριοφροσύνη, ισινάμ χαρούμενοι. Σόσκε; Άμα αγαβάσα ότι ναστί κεράσα-λεν σαρέ, κα εκτιμίνας σο-ντα βοήθεια λάσα κατά γιαβερά. Για παράδειγμας, σκεφτίνεν σο αβιλό-πες κάνα ο Ιησούς κερντάς λατσσές ι ντεσέ λεπρόν. Σάντε εκ τανό λένταρ βουρτισάλο για τι ευχαριστίνελ ι Ιησούς σο κερντάς-λες λατσσές λέσκε πφαρέ νασφαλιμάσταρ. Οντουβά ταπεινός μουρς αγαβέλας ότι ναστί αβέλας λατσσές κορκορό, οντουλέσκε ισινέ πφερντό εκτίμηση για τη βοήθεια σο λιντάς, ντα δοξαντάς ι Ντεβλές ανταλέσκε.—Λουκ. 17:11-19.
18. Σαρ κα τζας-λεν λατσσές ι γιαβερέντζαρ άμα ισινάμ ταπεινοί ντα σικαβάσα μετριοφροσύνη; (Ρωμαίους 12:10)
18 Ο τζενέ σο ισί ταπεινοί ντα σικαβένα μετριοφροσύνη ο πιο μπουτ φαρ τζάνα-λεν λατσσές ι γιαβερέντζαρ ντα τθερένα λατσσέ αμαλέν. Σόσκε; Επειδή αγαβένα ο λατσσέ ιδιότητες ι γιαβερένγκε ντα ντένα λένγκε μπέσα. Ο τζενέ σο ισί ταπεινοί ντα σικαβένα μετριοφροσύνη χαιρίνενα κάνα ο γιαβερά Ρωμαίους 12:10.
κερένα λατσσές σο-ντα διορισμός λένα ντα ισαρένα-λεν.—Διαβάνεν19. Σόσκε δεν πρέπει τι αβάς μπαρικανέ τζενέ;
19 Οκιά μπάνταρ, ο μπαρικανέ τζενέ δυσκολίντιβενα τι ισαρέν ι γιαβερέν, σόσκε μπεϊντίνενα πιο μπουτ τι ισαρέν-λεν ο γιαβερά. Συγκρίνενα πουμαρό νεαυτός ι γιαβερέντζαρ ντα προσπαθίνενα τι αβέν πιο λατσσέ κατά γιαβερά. Αντίς τι σικλιαρέν ι γιαβερέν ντα τι ντεν-λεν ευθύνες, βακερένα: «Άμα μανγκέσα τι αβέλ-πες κάτι σωστά»—δηλαδή σαρ μπεϊντίνενα βον—«πρέπει τι κερές-λες κορκορό». Ο μπαρικανό τζενό ο πιο μπουτ φαρ μανγκέλα τι αβέλ ο πιο σημαντικός ντα ισί πφερντό ζήλια. (Γαλ. 5:26) Ασακέ τζενέ να τθερένα φιλίες σο ατσσικιαρένα μπουτ. Άμα κα αγαβάς ότι ισινάμ μπαρικανέ, πρέπει τι προσευχίντιβας αντράλ αμαρέ γκίσταρ κο Ιεχωβά για τι βοηθίνελ-αμέν τι “τσσουβάς νεβέ πράγματα αμαρέ γκοντιάτε” ντα αντικάς τι νασκιαράς αντρ’ αμένταρ ο μπαρικανιπέ.—Ρωμ. 12:2.
20. Σόσκε πρέπει τι αβάς ταπεινοί ντα τι σικαβάς μετριοφροσύνη;
20 Ισινάμ πφερντέ εκτίμηση σο τθεράσα ο παράδειγμας ι Ιεχωβάσκο! Ντικχάσα καζόμ ταπεινός ισί κατά τρόπος σο συμπεριφερίντιβελα πι υπηρετόνγκε, ντα μανγκάσα τι μοιάζας λέστε. Επίσης, μανγκάσα τι μοιάζας οντουλέντε σο ισινέ μετριόφρονες ντα τθερένας ο προνόμιος τι πφιρέν ι Ντεβλέσαρ. Μανγκάσα τι ντας πάντα κο Ιεχωβά ι δόξα σο αξίνελα. (Αποκ. 4:11) Άμα κα κεράς ανταλά πράγματα, κα μπορίνας αμέν-ντα τι πφιράς αμαρέ Νταντέσαρ, ι Ιεχωβάσαρ, σο μανγκέλα ι τζενέν σο ισί ταπεινοί ντα σικαβένα μετριοφροσύνη.
ΥΜΝΟΣ 43 Τι Ατσσόν Τζανγκαντέ ντα Ζουρανέ
^ παρ. 5 Εκ τζενό σο ισί ταπεινός τζιτζίνελα ντα πφαμπόλα ι γιαβερένγκε. Επειδή ο Ιεχωβά κερέλα-λες ανταβά, τζανάσα ότι ισί ταπεινός. Ανταλέ μαθημάστε, κα ντικχάς σαρ ο παράδειγμας ι Ιεχωβάσκο βοηθίνελα-αμέν τι αβάς ταπεινοί. Επίσης, κα σικλιάς πιο μπουτ για την μετριοφροσύνη κατά βασιλιάς Σαούλ, κατά προφήτης Δανιήλ ντα κατά Ιησούς.
^ παρ. 58 ΣΟ ΣΙΚΑΒΕΛΑ Η ΦΩΤΟΓΡΑΦΙΑ: Εκ πρεσβύτερος ντέλα πι σαατίσταρ για τι σικλιαρέλ εκχέ τερνέ πφραλές τι αβέλ υπεύθυνος κο τομείς κι κχανγκιριάκε. Σοράν, ο πρεσβύτερος να ελεγχίνελα σο-ντα κερέλα ο πφραλ, αλλά μουκχέλα-λες τι κερέλ κορκορό πο διορισμός.
^ παρ. 62 ΣΟ ΣΙΚΑΒΕΛΑ Η ΦΩΤΟΓΡΑΦΙΑ: Εκ πφεν πουτσέλα εκχέ πρεσβυτερός άμα κα αβέλας σωστός τι τζαλ εκχέ μπιαβέστε σο κα αβέλ εκχέ κχανγκιριάτε σο τθερέλα ο Χριστιανικός ντουνιάς. Ο πρεσβύτερος να βακερέλα λάκε σο πακιάλα βοβ αλλά ντικχέλα γιεκ λάσαρ μερικές αρχές ι Γραφιάκε.