1, 2. Σο κα ντικχάς ανταλέ μαθημάστε;

ΣΑΡ κα νιωθίνενας άμα κα αργίνελας τι αβέλ εκ δέμας σο τθερένας μπαρί ανάγκη; Κα στεναχωρίντιβενας; Ο εδάφιος Παροιμίες 13:​12 βακερέλα: «Κάνα εκ τζενό μπεκλεντίνελα εκχέ πραγμάσκε σο να αβέλα νασφάλιβελα λέσκο γκι». Αλλά σαρ κα νιωθίνενας άμα κα σικλιόνας ότι υπαρχίντιβελας λόγος σο να αβιλό ατζέκ; Αζομάν, μάλλον κα κερένας υπομονή ντα κα μπεκλεντίνενας τι αβέλ.

² Ανταλέ μαθημάστε, κα ντικχάς χάνικ αρχές ι Γραφιάκε σο βοηθίνενα-αμέν τι “μπεκλεντίνας με υπομονή”. (Μιχ. 7:7) Σοράν, κα ντικχάς καλέ ντουέ πραγματένγκε πρέπει τι μπεκλεντίνας με υπομονή τι κερέλ κάτι ο Ιεχωβά. Κο τέλος, κα ντικχάς καλά ευλογίες κα λεν ο τζενέ σο μπεκλεντίνενα αντράλ πουμαρέ γκίσταρ ι Ιεχωβάσκε.

3. Σο σικλιάσα κατά εδάφιος Παροιμίες 13:11;

³ Εκ παράδειγμας σο σικαβέλα αμένγκε ότι πρέπει τι νταϊντίνας ισί κο εδάφιος Παροιμίες 13:​11, σο βακερέλα: «Ο χουλανιπέ σο κερντιόλα σουγκό κο τέλος κα χασάρντιβελ, αλλά ο χουλανιπέ οντουλέσκο σο κερντάς-λες χάνικ χάνικ κα αβγατίντιβελ». Σο σικλιάσα ανταλέ εδαφιόσταρ; Εκ γκοντιαβέρ τζενό κα τθερέλ ο πιο λατσσό αποτέλεσμας άμα κα κερέλ ο πράγματα προσεκτικά ντα με υπομονή.

4. Σο σικλιάσα κατά εδάφιος Παροιμίες 4:18;

⁴ Ο εδάφιος Παροιμίες 4:​18 βακερέλα αμένγκε ότι «ο ντρομ ι δίκαιε τζενένγκο ισί σαρ ο φως ι ντισαράκο σο μπαριόλα χάνικ χάνικ μέχρι ο κχαμ τι τζαλ ντιπ οπρέ». Ανταλά λάφια σικαβένα ντιπ λατσσές ότι ο Ιεχωβά βοηθίνελα πι λαός τι αγαβέλ χάνικ χάνικ οντουβά σο τθερέλα πι γκοντιάτε. Επίσης,  βοηθίνελα-αμέν τι αγαβάς σαρ εκ Χριστιανός κερέλα αλλαγές πι ζωγιάτε ντα σαρ αβέλα πιο λατσσό αμάλ ι Ιεχωβάσκο. Ναστί αβέλα εκ τζενό λατσσό αμάλ ι Ιεχωβάσκο αντρέ εκχέ ντιβεσέστε. Άμα σικλιαράσα-αμέν κατά Γραφή ντα κεράσα αμαρέ ζωγιάτε ο συμβουλές σο λάσα αντράλ κατά οργάνωση ντα κατά Λάφι ι Ντεβλέσκο, χάνικ χάνικ κα τθεράς ο ιδιότητες σο τθερέλας ο Χριστός. Επίσης, κα σικλιάς πιο μπουτ ι Ντεβλέσκε. Ντικχέν σαρ σικαντάς-λες ανταβά εκχέ παραδειγμάσαρ ο Ιησούς.

5. Καβά παράδειγμας βακερντάας ο Ιησούς για τι σικαβέλ ότι εκ τζενό χρειαζίντιβελα χρόνος για τι κερέλ αλλαγές πι ζωγιάτε;

⁵ Ο Ιησούς βακερντάς εκ παράδειγμας για τι εξηγίνελ ότι ο λατσσέ αμπέρια ι Βασιλειάκε ισί σαρ εκ χουρντό σπόρος σο μπαριόλα χάνικ χάνικ αντρέ κο γκι οντουλένγκο σο μανγκένα ο σωστός. Βακερντάς: «Ο σπόροι νικαβένα ρίζες ντα μπαριόνα​—σαρ αβέλα-πες ανταβά, [ο τζενό σο τσσουντάς ο σπόρος] να τζανέλα. Κορκορί η πφουβ, χάνικ χάνικ, νικαβέλα καρπός. Πρώτα νικιόλα η χουρντί τσαρ, σοράν ο στάχυ ντα σοράν μπαριόλα ο γκιβ οπράλ κο στάχυ». (Μάρκ. 4:​27, 28) Σο μανγκέλας τι βακερέλ ο Ιησούς; Μανγκέλας τι βακερέλ ότι σαρ εκ φυτός μπαριόλα χάνικ χάνικ, αντικάς εκ τζενό-ντα σο σικλιόλα ο λατσσέ αμπέρια ι Βασιλειάκε κα χρειαζίντιβελ χρόνος για τι κερέλ αλλαγές πι ζωγιάτε. Για παράδειγμας, καζόμ αβένα πιο πασέ κο Ιεχωβά ο τζενέ σο κεράσα-λεν μελέτη, αρχίνασα τι ντικχάς ο μπουτ λατσσέ αλλαγές σο κερντέ πουμαρέ ζωγιάτε. (Εφεσ. 4:​22-24) Αλλά πρέπει τι ντας-αμέν γκοντί ότι ο Ιεχωβά κερέλα οντουβά χουρντό σπόρος τι μπαριόλ.​—1 Κορ. 3:7.

6, 7. Σο σικλιάσα κατά τρόπος σο κερντάς ο Ιεχωβά ι πφουβ;

⁶ Σαρέ κο πράγματα, ο Ιεχωβά ντέλα με υπομονή καζόμ-ντα χρόνος χρειαζίντιβελα για τι μπιτισκιαρέλ οντουβά σο τθερέλα τι κερέλ. Κερέλα-λες ανταβά για τι ανέλ δόξα πι ναβέστε ντα τι βοηθίνελ αμέν-ντα. Σκεφτίνεν, για παράδειγμας, σαρ ετοιμαντάς χάνικ χάνικ ι πφουβ ι τζενένγκε.

⁷ Η Γραφή, καζόμ εξηγίνελα αμένγκε σαρ κερντάς ο Ιεχωβά ι πφουβ, βακερέλα ότι κανονιντάς καζόμ μπαρί κα αβέλ, κερντάς-λα  σταθερή ντα «τσσουντάς ο μπαρ ι γωνιάκο». (Ιώβ 38:5, 6) Ατζέ-ντα μπεσλό τι σκεφτίνελ οντουλά σο κερντάς. (Γέν. 1:​10, 12) Σκεφτίνεν σαρ νιωθίνενας ο άγγελοι καζόμ ντικχένας κάθε νεβό πράγμας σο κερέλας ο Ιεχωβά. Πρέπει τι νιωθίνενας μπουτ σουκάρ! Επειδή ντικχλέ-λες ανταβά «πφερντιλέ χαρά». (Ιώβ 38:7) Σο σικλιάσα αμέν; Χρειαζίντιβελας χιλιάδες μπρεσά ο Ιεχωβά για τι κερέλ ι πφουβ, ο τσεργανιά, ο ζώα ντα ι τζενέν, αλλά κάνα ντικχλάς σαρέ οντουλά σο κερντάς βακερντάς ότι “ισινέ μπουτ λατσσέ”.​—Γέν. 1:31.

8. Σο κα ντικχάς ακανά;

⁸ Σαρ ντικχλάμ κο παραδείγματα πιο οπρέ, κο Λάφι κι Ντεβλέσκο αρακχάσα μπουτ αρχές σο σικλιαρένα-αμέν ότι πρέπει τι κεράς υπομονή. Ακανά κα ντικχάς καλέ ντουέ πραγματένγκε πρέπει τι μπεκλεντίνας με υπομονή ι Ιεχωβάσκε.

9. Καβά ισί εκ πράγμας σο πρέπει τι μπεκλεντίνας με υπομονή ι Ιεχωβάσκε;

⁹ Μπορεί τι χρειαζίντιβελα τι μπεκλεντίνας τι απαντίνελ ο Ιεχωβά αμαρέ προσευχιέντε. Κάνα προσευχίντιβασα τι τθεράς ι ζορ τι νταϊντίνας εκ πρόβλημας ή τι βοηθίνελ-αμέν τι τσσιναβάς τι κεράς εκ μπέτι πράγμας, μπορεί τι νιωθίνασα ότι αργίνελα τι απαντίνελ αμαρέ προσευχιέντε. Σόσκε να απαντίνελα ο Ιεχωβά σουγκό σαρέ κο προσευχές σο κεράσα;

10. Σόσκε πρέπει τι μπεκλεντίνας με υπομονή τι απαντίνελ ο Ιεχωβά αμαρέ προσευχιέντε;

¹⁰ Ο Ιεχωβά ασουνέλα-αμέν μπουτ λατσσές κάνα προσευχίντιβασα λέστε. (Ψαλμ. 65:2) Κατά προσευχές σο κεράσα αντράλ αμαρέ γκίσταρ αγαβέλα ι πίστη σο τθεράσα λέστε. (Εβρ. 11:6) Κάνα προσευχίντιβασα κο Ιεχωβά τι βοηθίνελ-αμέν τι κεράς οντουβά σο μανγκέλα αμένταρ, βοβ μανγκέλα τι ντικχέλ ότι ισινάμ έτοιμοι τι κεράς πράγματα σο ταιριάνενα οντουλέντζαρ σο βακερντάμ αμαρέ προσευχιέντε. (1 Ιωάν. 3:​22) Οτθάρ, κάνα μανγκάσα κατά Ιεχωβά τι βοηθίνελ-αμέν τι τσσιναβάς εκ μπέτι πράγμας, μπορεί τι χρειαζίντιβελα τι κεράς υπομονή ντα τι κεράς σο νακχέλα αμαρέ βαστένταρ για τι αλλάνας. Ο Ιησούς βοηθιντάς-αμέν τι αγαβάς ότι μερικέ προσευχιέντε μπορεί μα τι ντιντιόλ-αμέν σουγκό η απάντηση. Βακερντάς: «Συνεχίνεν τι μανγκέν ντα κα ντιντιόλ-τουμέν· συνεχίνεν τι ρόντεν ντα κα αρακχέν· συνεχίνεν τι μπασκιαρέν ντα κα πουτάρντιβελ τουμένγκε. Σόσκε κον μανγκέλα λέλα, ντα κον ρόντελα αρακχέλα, ντα οντουλέσκε σο μπασκιαρέλα κα πουτάρντιβελ». (Ματθ. 7:7, 8) Άμα κεράσα-λες ανταβά ντα “να τσσιναβάσα τι κεράς προσευχή”, ισινάμ σίγουροι ότι αμαρό Ντατ, ο Ιεχωβά, ασουνέλα ντα κα απαντίνελ αμαρέ προσευχιέντε.​—Κολ. 4:2.

11. Σαρ βοηθίνελα-αμέν ο εδάφιος Εβραίους 4:​16 κάνα ντικχίντιβελα ότι η απάντηση εκχέ προσευχιάτε αργίνελα;

¹¹ Παρόλο σο η απάντηση εκχέ προσευχιάτε μπορεί τι ντικχίντιβελα ότι αργίνελα, ο Ιεχωβά ντέλα πο λάφι ότι κα απαντίνελ αμαρέ προσευχιάτε ακριβώς «αζομάν σο κα χρειαζίντιβας βοήθεια». (Διαβάνεν Εβραίους 4:​16) Άκ’ σόσκε ποτές δεν πρέπει τι βακεράς ότι ο Ιεχωβά κερντάς λάθος άμα να λιντάμ απάντηση εκχέ προσευχιάτε αζομάν σο αμντίναας ότι πρέπει τι λας-λα. Για παράδειγμας, μερικοί προσευχίντιβενα μπουτ μπρεσά ακανά τι αβέλ η Βασιλεία ι Ντεβλέσκι για τι καταστραφίνελ ανταβά ντουνιάς. Ο Ιησούς βακερντάς τι κεράς προσευχή ανταλέσκε. (Ματθ. 6:​10) Αλλά καζόμ μπαρό ντινιλιπέ κα αβέλας άμα εκ τζενό κα χασαρέλας πι πίστη κο Ντεβέλ επειδή ο τέλος να αβιλό αζομάν σο μπεκλεντίνενας λέσκε ο τζενέ! (Αββακ. 2:3· Ματθ. 24:​44) Ισί λατσσό τι συνεχίνας τι μπεκλεντίνας ι Ιεχωβάσκε ντα τι προσευχίντιβας λέστε με πίστη. Ο τέλος κα αβέλ αζομάν σο πρέπει τι αβέλ, σόσκε ο Ιεχωβά τραμπιντάς “ο ντιβές ντα ο σαάτι” σο κα κερέλ-λες ανταβά. Ντα οντουβά ντιβές  κα αβέλ ο πιο σωστός βακίτι σαριλένγκε.​—Ματθ. 24:​36· 2 Πέτρ. 3:15.

12. Κάνα μπορεί τι αβέλ αμένγκε δύσκολος τι κεράς υπομονή;

¹² Μπορεί τι χρειαζίντιβελ τι κεράς υπομονή ντα τι νταϊντίνας εκ αδικία. Ο τζενέ ανταλέ ντουνιάστε μπουτ φαρ συμπεριφερίντιβενα μπέτι ι τζουβλίνγκε, οντουλένγκε σο ισί γιαβερέ τθεμέσταρ ή οντουλένγκε σο τθερένα γιαβέρ κουλτούρα. Γιαβερένγκε πάλι συμπεριφερίντιβενα μπέτι επειδή τθερένα εκ πρόβλημας κο σώμας ή κι γκοντί. Μπουτ υπηρέτες ι Ιεχωβάσκε τσσιντιντέ μπουτ πράγματα επειδή πακιάνα οντουλά σο βακερέλα η Αγία Γραφή. Κάνα νακχάσα ασακέ αδικίες πρέπει τι ντας-αμέν γκοντί ο λάφια ι Ιησούσκε: «Οντουβά σο κα νταϊντίνελ μέχρι κο τέλος κα σώντιβελ». (Ματθ. 24:​13) Αλλά σο κα κερέν άμα κα αγαβέν ότι εκ πφραλ αντράλ τουμαρέ κχανγκιριάταρ κερντάς εκ μπαρί αμαρτία; Αφού κα σικλιόν-λες ανταβά ο πρεσβύτεροι, κα μουκχέν-λες οπρά-λέντε ντα μπεκλεντίνεν με υπομονή τι κερέν ο πράγματα σαρ μανγκέλα ο Ιεχωβά; Σο μπορεί τι κερέν ο πρεσβύτεροι κάνα εκ πφραλ κερέλα εκ μπαρί αμαρτία;

13. Σο μανγκέλα ο Ιεχωβά τι κερέν ο πρεσβύτεροι κάνα εκ τζενό κερέλα εκ μπαρί αμαρτία;

¹³ Κάνα ο πρεσβύτεροι σικλιόνα ότι εκ πφραλ κι κχανγκιρί κερντάς εκ μπαρί αμαρτία, κερένα προσευχή ντα μανγκένα «η σοφία σο γουλίλα οπράλ» για τι αγαβέν σο μανγκέλα ο Ιεχωβά τι κερέν. (Ιακ. 3:​17) Οντουβά σο μανγκένα τι κερέν ισί τι βοηθίνεν ι τζενές σο αμαρτιντάς τι νασέλ «κατά λάθος ντρομ σο λιντάς». (Ιακ. 5:​19, 20) Μανγκένα επίσης τι κερέν ο πιο λατσσό σο μπορίνενα για τι αρακχαβέν ι κχανγκιρί ντα τι ντεν ζορ οντουλέν σο τθερένα ντουκχ αντρέ πουμαρέ γκίστε. (2 Κορ. 1:3, 4) Κάνα ο πρεσβύτεροι σικλιόνα ότι εκ τζενό κερντάς εκ μπαρί αμαρτία, πρέπει πρώτα τι σικλιόν σο αβιλό-πες μπαγιά, κάτι σο μπορεί τι λελ χρόνος. Σοράν, κερένα προσευχή ντα λατσσιμάσαρ ντένα κο τζενό σο αμαρτιντάς συμβουλές αντράλ κατά Γραφή ντα διορθώνενα-λες «ακριβώς καζόμ χρειαζίντιβελα». (Ιερ. 30:​11) Ο πρεσβύτεροι να μουκχένα τι νακχέλ μπουτ χρόνος αλλά να σιγκιαρένα-ντα τι λεν εκ απόφαση. Κάνα ο πρεσβύτεροι κερένα οντουβά σο βακερέλα ο Ιεχωβά, σαρέ κι κχανγκιρί βοηθίντιβενα μπουτ. Αλλά ατζέ-ντα άμα ο πρεσβύτεροι κερένα ο πράγματα αντικάς σαρ μανγκέλα ο Ιεχωβά, εκ τζενό σο ισί αθώος μπορεί τι συνεχίνελα τι τθερέλ ντουκχ αντρέ πι γκίστε. Άμα νιωθίνενα αντικάς, σο μπορίνενα τι κερέν για τι κοβλιαρέν τουμαρί ντουκχ;

14. Καβά παράδειγμας αντράλ κατά Γραφή μπορίνελα τι βοηθίνελ-τουμέν τι νταϊντίνεν άμα αδικιντάς-τουμέν μπουτ εκ γιαβέρ Χριστιανός;

 ¹⁴ Μήπως αδικιντάς-τουμέν μπουτ εκ πφραλ, εκ πφεν ή εκ γιαβέρ τζενό; Κο Λάφι κι Ντεβλέσκο κα αρακχέν μπουτ λατσσέ παραδείγματα σο σικλιαρένα-αμέν σαρ τι μπεκλεντίνας τι διορθώνελ ο Ιεχωβά ο πράγματα. Για παράδειγμας, παρόλο σο ο πφραλά ι Ιωσηφίσκε αδικιντέ-λες, να μουκχλάς λένγκε αμαρτίες τι κερέν-λες τι ατσσικιαρέλ χολί αντρέ πέστε. Οκιά μπάνταρ, κερντάς ο πιο λατσσό για τι υπηρετίνελ ι Ιεχωβάς ντα βοβ ευλογιντάς-λες σο κερντάς υπομονή ντα νταϊντιντάς. (Γέν. 39:​21) Σοράν, ο Ιωσήφ μπορισάλο τι συγχωρίνελ πι πφραλέν ντα τι ντικχέλ σαρ ευλογιντάς-λες ο Ιεχωβά. (Γέν. 45:5) Σαρ ο Ιωσήφ, αντικάς αμέν-ντα λάσα ζορ κάνα ισινάμ πασέ κο Ιεχωβά ντα μπεκλεντίνασα τι διορθώνελ ι αδικία κο σωστός σαάτι.​—Ψαλμ. 7:​17· 73:28.

15. Σο βοηθιντάς εκχέ πφενιά τι νταϊντίνελ ντα τι τθερέλ ειρήνη;

¹⁵ Σίγουρα, νανέ σαρέ ο αδικίες αζόμ μπαρέ σαρ οντουλά σο νταϊντιντάς ο Ιωσήφ, αλλά σαρέ στεναχωρίντιβασα σαρ-ντα τι αδικίνεν-αμέν. Κάνα τθεράσα πρόβλημας εκχέ τζενέσαρ, ατζέ-ντα άμα οντουβά τζενό να υπηρετίνελα ι Ιεχωβάς, κα βοηθίντιβας μπουτ άμα κα κεράς ο αρχές ι Γραφιάκε. (Φιλιπ. 2:3, 4) Ντικχέν εκ εμπειρία. Εκ πφεν τσσουντάς πι γκίστε κάνα εκ γιαβέρ πφεν σο νικίστιλεας γιεκ κο έργος, βακερντάς κο γιαβερά λάφια λάκε σο να σικαβένας λατσσιπέ ντα να ισινέ μπαγιά. Αντίς τι σιγκιαρέλ τι κερέλ κάτι, η πφεν μπεσλί για τι σκεφτίνελ ο παράδειγμας ι Ιησούσκο. Κάνα προσβαλίνενας-λες, να προσβαλίνελας βοβ-ντα. (1 Πέτρ. 2:​21, 23) Επειδή τθερέλας ανταβά πι γκοντιάτε, αποφασιντάς μα τι κερέλ τίποτα. Σοράν, σικλιλί ότι οντιά πφεν ισινέ μπουτ νασφαλί ντα ισινέ μπουτ αγχωμέ. Η πφεν αγαντάς ότι να πακιάλας μπαγιά οντουλά σο βακερντάας. Οντουλέσκε, χαιρισάλι μπουτ σο νταϊντιντάς με υπομονή οντουβά σο αβιλό-πες ντα τθερέλας ειρήνη.

16. Σο μπορεί τι λοκχιαρέλ τουμαρό γκι κάνα νακχένα εκ αδικία; (1 Πέτρου 3:12)

¹⁶ Άμα νακχένα εκ αδικία ή κάτι γιαβέρ σο πφανγκέλα τουμαρό γκι, τι ντεν-τουμέν γκοντί ότι ο Ιεχωβά ισί πασέ οντουλέντε «σο τθερένα πφανγκό γκι». (Ψαλμ. 34:​18) Μανγκέλα-τουμέν σο κερένα υπομονή ντα μουκχένα οπρά-λέστε ο πφαριπέ σο βάντενα. (Ψαλμ. 55:​22) Βοβ ισί ο Κριτής σαρέ ι πφουβιάκο. Ντικχέλα σαρέ οντουλά σο αβένα-πες. (Διαβάνεν 1 Πέτρου 3:​12) Κάνα τθερένα  προβλήματα σο ναστί νασκιαρένα-λεν, κα μπεκλεντίνεν αντράλ τουμαρέ γκίσταρ τι κερέλ κάτι ο Ιεχωβά;

17. Σο ντέλα-αμέν πο λάφι ότι κα κερέλ ο Ιεχωβά σαρ βακερέλα ο εδάφιος Ησαΐας 30:18;

¹⁷ Ατζεχάνικ, αμαρό Ντατ, ο Ιεχωβά, κα ευλογίνελ-αμέν μπουτ κάνα κα αβέλ λέσκι Βασιλεία. Ο εδάφιος Ησαΐας 30:​18 βακερέλα: «Ο Ιεχωβά μπεκλεντίνελα με υπομονή για τι σικαβέλ τουμένγκε λατσσιπέ, ντα κα ιστίλ για τι σικαβέλ τουμένγκε έλεος. Επειδή ο Ιεχωβά ισί δίκαιος Ντεβέλ. Ευτυχισμέ ισί σαρέ οντουλά σο μπεκλεντίνενα λέσκε». Κον μπεκλεντίνελα ι Ιεχωβάσκε κα λελ μπουτ ευλογίες εμ ακανά αλλά εμ κο νεβό ντουνιάς σο κα αβέλ.

18. Καλά ευλογίες μπεκλεντίνασα τι τθεράς ανγκλ’ αμέντε;

¹⁸ Κάνα ο λαός ι Ντεβλέσκο κα νακχέλ κο νεβό ντουνιάς, να κα τθεράς ποτές πάλι ο προβλήματα σο τθεράσα ακανά. Η αδικία κα χασάρντιβελ ντα η ντουκχ να κα αβέλ πάλι. (Αποκ. 21:4) Να κα μαράς-αμέν οντουλένγκε σο τθεράσα ανάγκη σόσκε κα αβέν μπουτ ανταλένταρ. (Ψαλμ. 72:​16· Ησ. 54:​13) Σο μπαρί ευλογία κα αβέλ ανταγιά!

19. Καλέ πραγμάσκε προετοιμάνελα-αμέν χάνικ χάνικ ο Ιεχωβά ακανά;

¹⁹ Ο Ιεχωβά, για τι προετοιμάνελ-αμέν ακανά ι ζωγιάκε σο κα τθεράς λέσκε Βασιλειάτε, βοηθίνελα-αμέν τι τσσιναβάς ο μπέτι πράγματα σο ισινάμ σικλέ τι κεράς ντα τι τθεράς ο ιδιότητες σο μανγκέλα βοβ. Μα χασαρέν τουμαρί ζορ ντα μα τσσιναβέν τι υπηρετίνεν ι Ιεχωβάς. Ο πιο λατσσέ πράγματα ισί ανγκλ’ αμέντε! Επειδή τθεράσα εκ σουκάρ ελπίδα ανγκλ’ αμέντε, μα τι τσσιναβάς τι νταϊντίνας αντράλ αμαρέ γκίσταρ ντα τι μπεκλεντίνας ι Ιεχωβάσκε τι κερέλ σαρέ οντουλά σο ντινάς πο λάφι ότι κα κερέλ!