1. Καβά πράγμας κεράσα σαρέ σαρ βακερέλα ο εδάφιος 1 Θεσσαλονικείς 5:11;

 ΛΑΤΣΣΑΡΝΤΑΣ ποτές τουμαρί κχανγκιρί εκ Αίθουσα Βασιλείας; Άμα βα, σίγουρα ντένα-τουμέν γκοντί ι πρώτη συνάθροιση κι νεβί αίθουσα. Ισινένας πφερντέ εκτίμηση ι Ιεχωβάσκε. Μπέκιμ ροβένας κατά χαρά ντα ναστί γκιλιαβένας ο πρώτος ύμνος. Αμαρέ αίθουσες, σο ισί λατσσές κερντέ, ισαρένα ι Ιεχωβάς. Αλλά ισαράσα-λες ατζέ πο μπουτ κάνα κεράσα εκ πράγμας σο ισί πο σημαντικός κατά τθανένγκο λατσσαριπέ. Ανταβά πράγμας ισί τι ντας ζορ ι τζενέν σο αβένα κο τθανά σο ντάσα λατρεία ι Ντεβλές. Ανταβά τθερέλας ο απόστολος Παύλος πι γκοντιάτε κάνα βακερντάς ο λάφια σο ισί κο εδάφιος 1 Θεσσαλονικείς 5:​11, σο ισί ο εδάφιος-ντα ανταλέ μαθημάσκο.​—Διαβάνεν.

2. Σο κα ντικχάς ανταλέ μαθημάστε;

² Ο απόστολος Παύλος ισί μπουτ λατσσό παράδειγμας σόσκε τζανέλας σαρ τι ντελ ζορ πι πφραλέν ντα πι πφενίν. Αγαβέλας λένγκι ντουκχ. Ανταλέ μαθημάστε, κα ντικχάς σαρ βοηθίνελας-λεν (1) τι νταϊντίνεν δοκιμασίες, (2) τι τθερέν ειρήνη ο εκ ι γιαβερέσαρ ντα (3) τι μπαριαρέν πουμαρί πίστη κο Ιεχωβά. Κα σικλιάς σαρ τι μοιάζας λέστε ντα αντικάς τι ντας ζορ αμαρέ πφραλέν ντα πφενίν αντιβές.​—1 Κορ. 11:1.

3. Σαρ ντικχέλας ο Παύλος ο έργος ντα ι μπουτί;

³ Ο Παύλος τθερέλας μπουτ μπαρό μανγκιπέ πι πφραλένγκε. Τζανέλας μπουτ λατσσές σαρ ισί τι νακχές ζόρια, οτθάρ αγαβέλας ο γκι ι πφραλένγκο ντα ι πφενίνγκο σο νακχένας δοκιμασίες. Εκ φαρ, ο Παύλος ατσσιλό μπι-λοβένγκο, οτθάρ έπρεπε τι αρακχέλ μπουτί για τι νικαβέλ ο μαντρό πέσκε ντα πι αμαλένγκε. (Πράξ. 20:​34) Τζανέλας τι λατσσαρέλ τσαντίρια. Κάνα ερεσλό κι Κόρινθος, κι αρχή κερέλας μπουτί γιεκ ι Ακυλάσαρ ντα ι  Πρισκιλλάσαρ σο λατσσαρένας βον-ντα τσαντίρια. Αλλά «κάθε σάββατος» κερέλας έργος κο Ιουδαίοι ντα κο Μπαλαμέ. Σοράν, κάνα αβιλό ο Σίλας ντα ο Τιμόθεος, «ο Παύλος αρχισάλο τι αβέλ συνέχεια απασχολημέ κο λάφι». (Πράξ. 18:​2-5) Ο Παύλος ποτές να μπισταρντάς ότι ο πο σημαντικός πράγμας κι ζωή ισινέ τι υπηρετίνελ ι Ιεχωβάς. Επειδή ισινέ βοβ-ντα μπουτιαρνό, μπορίνελας τι ενθαρρύνελ πι πφραλέν ντα πι πφενίν. Βον τθερένας δυσκολίες ντα έπρεπε τι ανέν ο αναγκαία πουμαρέ φαμιλίντε. Αλλά ο Παύλος βακερέλας λένγκε μα τι νασέλ λένγκι γκοντί κατά «πο σημαντικά πράγματα», σο τθερένα τι κερέν με τη λατρεία ι Ιεχωβάσκι.​—Φιλιπ. 1:10.

4. Σαρ βοηθιντέ ο Παύλος ντα ο Τιμόθεος πουμαρέ πφραλέν τι νταϊντίνεν ι κόντρα ι τζενένγκι;

⁴ Κάνα κερντιλί η κχανγκιρί κι Θεσσαλονίκη, ο τζενέ γκιλέ μπουτ κόντρα ι νεβέ πφραλέντζαρ. Ο χολιαμέ ντουσμάνια σο γκιντισάλεας σαρέ γιεκ, ναστί αρακχένας ι Παυλός ντα ι Σιλάς, οτθάρ γκερντέ ζορίσαρ μερικέ πφραλέν ανγκλάλ κο αρχηγοί κι τθεμέσκε, ντα ντένας βίκος ζουρανές: «Ανταλά τζενέ τζάνα κόντρα κο εντολές κι Καισαράσκε». (Πράξ. 17:6, 7) Ανέν τουμαρέ γκοντιάτε καζόμ πρέπει τι νταρασάλε οντουλά νεβέ Χριστιανοί κάνα ντικχλέ ότι ο τζενέ ι τθεμέσκε τζάνας λέντζαρ κόντρα. Ιτιρί ανταλέσταρ μπέκιμ μα τι μανγκένας τι κερέν αζόμ μπουτ πράγματα ι Ιεχωβάσκε, αλλά ο Παύλος να μανγκέλας τι αβέλ-πες ανταβά. Παρόλο σο βοβ ντα ο Σίλας έπρεπε τι νασέν, κερντέ ο πο λατσσό για τι αβέν σίγουροι ότι οντιά νεβί κχανγκιρί κα αρακχάντιβελας λατσσές. Ο Παύλος βακερντάς κο Θεσσαλονικείς: «Μπουτσσαντάμ ι Τιμοθεός, αμαρέ πφραλές . . . για τι ντελ-τουμέν ζορ ντα τι λοκχιαρέλ τουμαρό γκι ντα αντικάς τι κερέλ λατσσιπέ τουμαρέ πακιαϊμάστε, για μα τι περέλ καέκ ιτιρί ανταλέ στεναχωριένταρ». (1 Θεσ. 3:2, 3) Αγαντίντιβελα ότι ο Τιμόθεος, οντουλένταρ σο ντικχλάας πι τθεμέστε κο Λύστρα, τζανέλας λατσσές σο μανγκέλας τι βακερέλ τι τζαν τούσαρ κόντρα. Ντικχλάας σαρ ντινάς ζορ ο Παύλος κο πφραλά οτθέ. Επειδή ο Τιμόθεος ντικχλάας οντουλέ περιπτωσιάτε ο βας ι Ιεχωβάσκο, μπορίνελας τι κερέλ πι νεβέ πφραλέν ντα πφενίν τι αβέν σίγουροι ότι σαρέ κα τζάνας λατσσές λένγκε-ντα.​—Πράξ. 14:8, 19-22· Εβρ. 12:2.

5. Σο λατσσιπέ ντικχλάς ο Μπράιαντ κατά βοήθεια εκχέ πρεσβυτερόσκι;

⁵ Καλέ γιαβερέ τροπόσαρ ντέλας ζορ ο Παύλος πι πφραλέν; Κάνα ο Παύλος ντα ο Βαρνάβας βουρτισάλε κο Λύστρα, κο Ικόνιος ντα κι Αντιόχεια, τσσουντέ πρεσβυτερόν κι κάθε κχανγκιρί. (Πράξ. 14:​21-23) Σίγουρα, οντουλά πρεσβύτεροι αντέ λοκχιπέ κο κχανγκιριά, σαρ ανένα ο πρεσβύτεροι-ντα αντιβές. Ντικχέν σο βακερντάς εκ πφραλ, ο Μπράιαντ: «Κάνα ισινόμας 15 μπρεσένγκο, μο ντατ νασλό κατά κχερ ντα μι ντάι χαλάς αποκοπή. Νιωθίναβας κορκορό ντα χασαρντόμ μι ζορ». Σο βοηθιντάς-λες τι νταϊντίνελ οντουλέ πφαρέ βακιτίστε; Βοβ βακερέλα: «Εκ πρεσβύτερος, ο Τόνι, κερέλας μάντζαρ λάφι κο συναθροίσεις ντα γιαβερτθέ. Βακερέλας μάνγκε τζενένγκε σο ισινέ ευτυχισμέ παρόλο σο τθερένας δοκιμασίες. Διαβάνελας μάνγκε ο εδάφιος Ψαλμός 27:​10 ντα βακερέλας μάνγκε μπουτ φαρ ι Εζεκιάσκε, σο υπηρετίνελας πιστά παρόλο σο λέσκο ντατ να μουκχλάς λατσσό παράδειγμας». Σαρ βοηθισάλο ο Μπράιαντ; Βοβ βακερέλα: «Ι ζοριάσαρ σο ντινάς-μαν ο Τόνι, αρχισάλομ ο σκαπανικός, ντα ανταβά αντάς μάνγκε εκ μπουτ πφερντί ζωή». Τουμέν πρεσβύτεροι, τι αβέν τζανγκαντέ για τι βοηθίνεν οντουλέν σο, σαρ ο Μπράιαντ, μπορεί τι χρειαζίντιβενα εκ «λατσσό λάφι» σο κα ντελ-λεν ζορ.​—Παρ. 12:25.

6. Σαρ ντέλας ζορ ο Παύλος πι πφραλέν ντα πι πφενίν αντράλ αληθινέ ιστοριένταρ;

⁶ Ο Παύλος αντάς κι πφραλένγκι γκοντί ότι, ι Ιεχωβάσκε ζοριάσαρ, εκ «μπαρό σύννεφος  μαρτυρένγκο» νταϊντιντάας κο προβλήματα. (Εβρ. 12:1) Ο Παύλος αγαβέλας ότι ο ιστορίες ι τζενένγκε, σο νταϊντιντέας σαβέ τι μανγκές προβλήματα ανγκλέ, μπορίνενας τι ντεν κουράγιος ι πφραλέν ντα ι πφενίν ντα τι βοηθίνεν-λεν τι τθερέν πουμαρέ γιακχά κι «πόλη κι τζουβντέ Ντεβλέσκι». (Εβρ. 12:​22) Ανταβά αβέλα-πες αντιβές-ντα. Σαρέ λάσα ζορ κάνα διαβάνασα σαρ βοηθιντάς ο Ιεχωβά ι Γεδεωνίς, ι Βαρακίς, ι Δαβιδίς, ι Σαμουηλίς ντα μπουτέ γιαβερέν. (Εβρ. 11:​32-35) Αλλά αμαρέ ντιβεσέντε-ντα ισί μπουτ παραδείγματα τζενένγκε σο σικαντέ πίστη. Κο παγκόσμια κεντρικά γραφεία, λάσα μπουτ φαρ γράμματα πφραλένταρ ντα πφενίνταρ σο λένγκι πίστη ζουράνιλι κάνα διαβαντέ ι ιστορία εκχέ πιστέ τζενέσκι αμαρέ ντιβεσένταρ.

7. Σο σικλιάσα κατά Παυλόσκε λάφια σο ισί κο εδάφια Ρωμαίους 14:​19-21;

⁷ Ντάσα ζορ αμαρέ πφραλέν ντα πφενίν κάνα βακεράσα ντα κεράσα πράγματα σο ανένα ι ειρήνη κι κχανγκιρί. Να μουκχάσα ο διαφορετικές απόψεις τι ανέν αμένγκε διχόνοια. Ατζέ-ντα άμα τθεράσα δίκιος, να μανγκάσα τι αβέν-πες ο πράγματα σαρ μπεϊντίνασα αμέν κάνα η άποψη ι γιαβερένγκι να τζάλα κόντρα κι Αγία Γραφή. Σκεφτίνεν εκ παράδειγμας. Κι κχανγκιρί κι Ρώμη ισινέ εμ Ιουδαίοι Χριστιανοί εμ Χριστιανοί γιαβερέ τθεμένταρ. Κάνα ο Μωσαϊκός Νόμος τσσινάντιλο, ο υπηρέτες ι Ιεχωβάσκε να χρειαζίντιβελας τι ντεν καν κο νόμοι σο βακερένας μα τι χαν μερικά πράγματα. (Μάρκ. 7:​19) Οτθάρ μπερί, μερικοί Ιουδαίοι Χριστιανοί πακιάνας ότι μπορίνενας τι χαν σαρέ ο χαμπίματα. Όμως, γιαβερά Ιουδαίοι Χριστιανοί πακιάνας ότι να ισινέ σωστός ανταβά. Η κχανγκιρί ισινέ διχομέ ιτιρί ανταλέσταρ. Ο Παύλος σικαντάς λένγκε καζόμ σημαντικός ισί τι ατσσικιαρέν ι ειρήνη κι κχανγκιρί κάνα βακερντάς: «Πο λατσσές μα τι χας μας ούτε τι πις μολ ούτε τι κερές τίποτα σο κα μπορίνελας τι κερέλ τι πφραλές τι χασαρέλ πι πίστη». (Διαβάνεν Ρωμαίους 14:​19-21) Αντικάς, ο Παύλος βοηθιντάς πι πφραλέν τι αγαβέν καμπόρ ζιάνι κερέλας ανταβά, εμ λένγκε εμ σαρί κι κχανγκιρί. Ντα ισινέ βοβ-ντα έτοιμος τι αλλάνελ για μα τι κερέλας ι γιαβερέν τι χασαρέν πουμαρί πίστη. (1 Κορ. 9:​19-22) Αμέν-ντα κα ντας ζορ ι γιαβερέν ντα κα ατσσικιαράς ι ειρήνη άμα να χάσα-αμέν λέντζαρ για τι αβέν-πες ο πράγματα αντικάς σαρ μπεϊντίνασα.

8. Σο κερντάς ο Παύλος κάνα αβιλό-πες κάτι σο κα μπορίνελας τι κερέλ ζιάνι κι ειρήνη κι κχανγκιριάκι;

⁸ Ο Παύλος ντινάς λατσσό παράδειγμας σόσκε ατσσικιαρέλας ι ειρήνη οντουλέντζαρ σο τθερένας γιαβέρ άποψη οπράλ σημαντικέ πραγματέντε. Φιρειπείν, μερικά πφραλά κι πρώτη Χριστιανική κχανγκιρί βακερένας ότι ο τζενέ κατά γιαβερά τθεμά σο αβιλέας Χριστιανοί έπρεπε τι κερέν περιτομή, μπέκιμ για μα τι κερένας λένγκε λάφια ο τζενέ ι ντουνιάσκε. (Γαλ. 6:​12) Ο Παύλος να συμφωνίνελας ιτς λέντζαρ, αλλά αντίς τι μανγκέλ τι νακχέλ λέσκο, μανγκλάς ταπεινά ι συμβουλή ι αποστολόνγκι ντα ι πρεσβυτερόνγκι κι Ιερουσαλήμ. (Πράξ. 15:1, 2) Οντουβά σο κερντάς ο Παύλος βοηθιντάς οντουλέ Χριστιανόν τι ατσσικιαρέν ι χαρά ντα ι ειρήνη κι κχανγκιρί.​—Πράξ. 15:​30, 31.

9. Σαρ κα κεράς οντουβά σο κερέλας ο Παύλος;

⁹ Άμα αβιλό-πες εκ μπαρό πρόβλημας, κα ανάς ι ειρήνη άμα κα μανγκάς συμβουλή οντουλένταρ σο τσσουντάς ο Ιεχωβά τι αρακχαβέν ι κχανγκιρί. Μπουτ φαρ, μπορίνασα τι αρακχάς σο τι κεράς αντράλ κατά εκδόσεις αμαρέ ή κατά οδηγίες σο ντέλα η οργάνωση. Άμα ντάσα καν οντουλέ οδηγιέντε ντα να μανγκάσα τι αβέν-πες ο πράγματα σαρ μπεϊντίνασα αμέν, κα βοηθίνας τι αβέλ ειρήνη κι κχανγκιρί.

10. Σο γιαβέρ κερντάς ο Παύλος για τι ανέλ ι ειρήνη κι κχανγκιρί;

 ¹⁰ Ο Παύλος ανέλας ι ειρήνη σόσκε σικαβέλας κο γιαβερά ο λατσσέ ιδιότητες πι πφραλένγκε, μα ο μπέτι. Για παράδειγμας, κάνα μπιτισκιαρέλας ι επιστολή σο μπουτσσαντάς κο Ρωμαίοι, γραφιντάς οτθέ ο ναβά μπουτέ τζενένγκε, ντα ο πο μπουτ φαρ βακερέλας εκ λατσσό λάφι ή κάτι σο τθερέλας τι κερέλ λέντζαρ. Κα αβάς σαρ ο Παύλος άμα κα κεράς λάφι ι λατσσέ ιδιοτητένγκε σο τθερένα αμαρέ πφραλά ντα πφενιά. Αντικάς, κα βοηθίνας-λεν τι αβέν πο πασέ ο εκ κο γιαβέρ ντα ανταβά κα ντελ ζορ κι κχανγκιρί μανγκιμάσαρ.

11. Σαρ κα ανάς πάλι ι ειρήνη άμα τθεράσα εκ πρόβλημας ι γιαβερέντζαρ κι κχανγκιρί;

¹¹ Ισί φαρ σο ατζέ-ντα ο γκοντιαβέρ Χριστιανοί μπορεί μα τι συμφωνίνενα ο εκ ι γιαβερέσαρ ή τι χαν-πες λαφίντζαρ. Ανταβά αβιλό-πες κο Παύλος ντα λέσκε λατσσέ αμαλέστε κο Βαρνάβας. Βον ο ντούι χαλέ-πες μπουτ σόσκε ο εκ βακερέλας τι λεν ι Μαρκός παλά-πουμέντε κο ιεραποστολικός ταξίδι σο κα κερένας, αλλά ο γιαβέρ να μανγκέλας. «Χολιασάλε μπουτ ο εκ ι γιαβερέσκε», ντα ο κάθε εκ λιντάς πο ντρομ. (Πράξ. 15:​37-39) Αλλά ο Παύλος, ο Βαρνάβας ντα ο Μάρκος αβιλέ πάλι λατσσέ αμαλά ντα αντικάς σικαντέ καζόμ αξία τθερέλας λένγκε η ειρήνη ντα η ενότητα ι κχανγκιριάκι. Σοράν, ο Παύλος βακερντάς κο γιαβερά λατσσέ λάφια ι Βαρναβάσκε ντα ι Μαρκόσκε. (1 Κορ. 9:6· Κολ. 4:​10) Σο-ντα πρόβλημας τι τθεράσα αμέν-ντα ι γιαβερέντζαρ κι κχανγκιρί, πρέπει τι αρακχάς-λεν ντα σοράν τι συνεχίνας τι τθεράς αμαρέ γκοντιάτε λένγκε λατσσέ ιδιότητες. Αντικάς, κα ανάς ι ειρήνη ντα ι ενότητα.​—Εφεσ. 4:3.

12. Καλά ισί μερικές δυσκολίες σο νακχένα αμαρέ πφραλά ντα πφενιά;

¹² Ντάσα ζορ αμαρέ πφραλέν ντα πφενίν κάνα μπαριαράσα λένγκι πίστη κο Ιεχωβά. Μερικέν πρασάνα-λεν λένγκε τζενέ σο νανέ Χριστιανοί, οντουλά σο κερένα μπουτί λέντζαρ ή ο συμμαθητές. Γιαβερά ισί μπουτ νασφαλέ ή ντουκχαντάς λένγκο γκι εκ τζενό. Γιαβερά πάλι ισί μπολντέ Χριστιανοί μπουτ μπρεσά ντα μπεκλεντίνενα μπουτ βακίτι τι αβέλ ο τέλος ανταλέ ντουνιάσκο. Ιτιρί ανταλέ πραγματένταρ μπορεί τι αβέλ πφαρό μερικέ Χριστιανόνγκε τι ατσσικιαρέν πουμαρί πίστη. Ο πρώτοι Χριστιανοί-ντα τθερένας ασακέ δυσκολίες. Σαρ ντέλας ζορ ο Παύλος πι πφραλέν ντα πι πφενίν;

13. Σαρ βοηθίνελας ο Παύλος ι πφραλέν σο πρασάνας-λεν ο γιαβερά οντουλένγκε σο πακιάνας;

¹³ Ο Παύλος ντέλας ζορ πι πφραλέν ντα πι πφενίν αντράλ κατά Γραφή. Για παράδειγμας, ο Ιουδαίοι Χριστιανοί μπέκιμ να τζανένας σο τι απαντίνεν πουμαρέ τζενένγκε σο βακερένας λένγκε ότι ι Ιουδαιόνγκι θρησκεία ισινέ πο λατσσί κατά Χριστιανόνγκι. Σίγουρα, η επιστολή σο γραφιντάς ο Παύλος κο Εβραίοι ντινάς μπουτ ζορ οντουλέ Χριστιανόν. (Εβρ. 1:5, 6· 2:2, 3· 9:​24, 25) Λέσκε ζουρανέ λάφια μπορίνενας τι βοηθίνεν-λεν για τι πφάντεν, σαρ τι βακεράας, ο μούι οντουλένγκο σο κατηγορίνενας-λεν. Αντιβές, μπορίνασα τι βοηθίνας αμαρέ πφραλέν, σο πρασάνα-λεν ο γιαβερά, τι σικαβέν αντράλ κατά εκδόσεις αμαρέ σόσκε πακιάσα οντουλά σο πακιάσα. Ντα μπορίνασα τι βοηθίνας αμαρέ τερνέν τι σικαβέν οντουλένγκε σο πρασάνα-λεν σόσκε πακιάνα ότι ο Ντεβέλ κερντάς σαρέ ο πράγματα αντράλ κατά βιβλιάρια Δημιουργήθηκε η Ζωή; ντα Σαρ Αβιλί η Ζωή​—Παντς Ερωτήσεις σο Ισί Λατσσό τι Κεράς.

14. Σο γιαβέρ κερέλας ο Παύλος παρόλο σο ντέλας μπουτ πι σαατίσταρ για τι βακερέλ ο λατσσέ αμπέρια ντα τι σικλιαρέλ;

¹⁴ Ο Παύλος τσσίντελας πι πφραλέν ντα πι πφενίν τι σικαβέν μανγκιπέ αντράλ “λατσσέ πραγματένταρ”. (Εβρ. 10:​24) Βοηθίνελας πι πφραλέν ντα πι πφενίν, μα σάντε οντουλέντζαρ σο βακερέλας, αλλά οντουλέντζαρ-ντα σο κερέλας. Για παράδειγμας, κάνα πελί μποκχ κι  Ιουδαία, ο Παύλος βοηθιντάς τι μπουτσσάντιβελ βοήθεια κο πφραλά οτθέ. (Πράξ. 11:​27-30) Ντα παρόλο σο ο Παύλος ντέλας μπουτ πι σαατίσταρ για τι βακερέλ ο λατσσέ αμπέρια ντα τι σικλιαρέλ, ρόντελας πάντα τρόπους για τι ντελ κο τσορορέ οντουλά σο χρειαζίντιβενας. (Γαλ. 2:​10) Αντικάς, κερέλας πι πφραλέν τι πακιάν ατζέ πο μπουτ ότι ο Ιεχωβά κα αρακχαβέλας-λεν. Αντιβές, κάνα ντάσα αντράλ αμαρέ γκίσταρ αμαρό σαάτι, αμαρί ζορ ντα αμαρέ ικανότητες για τι βοηθίνας αμαρέ πφραλέν, μπαριαράσα αμέν-ντα λένγκι πίστη. Ανταβά κεράσα-λες κάνα ντάσα λοβέ-ντα ι εργόσκε σο αβέλα-πες σαρό κο ντουνιάς. Ανταλέ τροπόντζαρ ντα γιαβερέντζαρ, βοηθίνασα αμαρέ πφραλέν ντα πφενίν τι αβέν σίγουροι ότι ο Ιεχωβά να κα μουκχέλ-λεν ποτές.

15, 16. Σο πρέπει τι κεράς οντουλένγκε σο τθερένα μπίζουρανι πίστη;

¹⁵ Ο Παύλος να τσσιναντάς τι ντελ ζορ οντουλέντε σο τθερένας μπίζουρανι πίστη. Αγαβέλας λένγκι ντουκχ ντα βακερέλας λένγκε λατσσέ λάφια σουκάρ τροπόσαρ. (Εβρ. 6:9· 10:​39) Για παράδειγμας, σαρί κι επιστολή σο γραφιντάς ι Εβραιόνγκε βακερντάς μπουτ φαρ ο λάφι «αμέν», ντα αντικάς σικαβέλας ότι βοβ-ντα έπρεπε τι ντελ καν κο συμβουλές σο ντέλας. (Εβρ. 2:1, 3) Σαρ ο Παύλος, αντικάς αμέν-ντα να τσσιναβάσα τι ντας ζορ οντουλέντε σο τθερένα μπίζουρανι πίστη. Κεράσα-λες ανταβά κάνα σικαβάσα ότι πφαμπάσα λένγκε. Αντικάς, κεράσα-λεν τι αβέν σίγουροι ότι μανγκάσα-λεν. Αμαρί τατί ντα γκουλντί φωνή μπορεί τι αβέλ αζόμ σημαντική καζόμ ισί ο λάφια-ντα σο μπέκιμ βακεράσα για τι ντας ζορ.

¹⁶ Ο Παύλος κερέλας πι πφραλέν ντα πι πφενίν τι αβέν σίγουροι ότι ο Ιεχωβά τζανέλας ο λατσσέ πράγματα σο κερντέας. (Εβρ. 10:​32-34) Αμέν μπορίνασα τι κεράς κάτι ασακό κάνα βοηθίνασα εκχέ πφραλές σο λέσκι πίστη αβιλί μπίζουρανι. Μπέκιμ κα αβέλας λατσσό τι μανγκάς  λέσταρ τι βακερέλ αμένγκε σαρ σικλιλό ι αλήθεια ή τι βοηθίνας-λες τι ντελ-πες γκοντί σαρ ντικχλάας ι Ιεχωβάσκο βας πι ζωγιάτε. Ατζέ, κα μπορίναας τι βακεράς ι πφραλέσκε ότι ο Ιεχωβά να μπισταρντάς ο μανγκιπέ σο σικαντάας ανγκλέ ντα ότι να κα μουκχέλ-λες κο ντιβεσά σο κα αβέν. (Εβρ. 6:​10· 13:5, 6) Ασακέ συζητήσεις μπορεί τι τσσίντεν ανταλέ αγαπητέ τζενέν τι συνεχίνεν τι υπηρετίνεν ι Ιεχωβάς.

17. Καλά πράγματα μπορίνασα τι σικλιάς τι κεράς πο λατσσές;

¹⁷ Σαρ εκ τζενό σο λατσσαρέλα κχερά, καζόμ τζάλα, αβέλα πο λατσσό πι μπουτιάτε, αντικάς αμέν-ντα μπορίνασα τι σικλιάς τι ντας πο λατσσές ζορ ο εκ ι γιαβερές. Κα βοηθίνας ι γιαβερέν τι αρακχέν ι ζορ τι νταϊντίνεν δοκιμασίες κάνα βακεράσα λένγκε παραδείγματα τζενένγκε σο νταϊντιντέ ανγκλέ. Μπορίνασα τι ανάς ι ειρήνη κάνα βακεράσα ο λατσσίματα σο ντικχάσα κο γιαβερά ντα τι ατσσικιαράς ι ειρήνη κάνα αβένα-πες προβλήματα. Ατζέ, μπορίνασα μα τι τσσιναβάς τι μπαριαράς ι πίστη αμαρέ πφραλένγκι ντα πφενίνγκι, κάνα κεράσα λέντζαρ λάφι σημαντικέ αληθειένγκε σο ισί κι Γραφή, κάνα κεράσα πράγματα για τι βοηθίνας-λεν ντα κάνα ντάσα ζορ οντουλέν σο αβιλέ πνευματικά μπίζουρανε.

18. Σο μανγκένα τι κερέν αντράλ τουμαρέ γκίσταρ;

¹⁸ Οντουλά σο λατσσαρένα τθανά για τι ντιντιόλ λατρεία νιωθίνενα ευτυχισμέ ντα πφερντέ. Αμέν νιωθίνασα ευτυχισμέ ντα πφερντέ κάνα ντάσα ζορ ι γιαβερέν αντρέ κι κχανγκιρί. Αβέλα ο σαάτι σο ο τθανά σο λατσσαράσα χαλάντιβενα, αλλά ο λατσσιπέ σο κεράσα κάνα ντάσα ζορ ι γιαβερέν μπορίνελα τι ατσσόλ για πάντα! Οτθάρ, τι μανγκάς αντράλ αμαρέ γκίσταρ τι “ενθαρρύνας ο εκ ι γιαβερές ντα τι ντας ζορ ο εκ ι γιαβερές”.​—1 Θεσ. 5:11.