1. Σόσκε μανγκλάς ο Ιησούς κατά Ιεχωβά τι αρακχαβέλ οντουλέν σο τζάνας παλά-λέστε;

 Ι ΙΡΑΤ πριν τι μερέλ, ο Ιησούς μανγκλάς κάτι μπουτ σημαντικός πι Νταντέσταρ, κατά Ιεχωβά. Μολιντάς ι Ιεχωβάς τι αρακχαβέλ οντουλέν σο τζάνας παλά-λέστε. (Ιωάν. 17:​15, 20) Σίγουρα, ο Ιεχωβά πάντα ντικχέλας πι λαός, δηλαδή πφαμπόλας λέσκε ντα αρακχαβέλας-λες. Όμως, ο Ιησούς τζανέλας ότι οντουλά σο τζάνας παλά-λέστε, κα τθερένας μπουτ μπαρί κόντρα κατά Μπενγκ. Ο Ιησούς αγαβέλας-ντα ότι οντουλά σο τζάνας παλά-λέστε κα χρειαζίντιβενας ι βοήθεια ι Ιεχωβάσκι για τι τζαν κόντρα κι μπαρί χολί κι Μπενγκέσκι.

2. Σόσκε να χρειαζίντιβελα τι νταράς κάνα τθεράσα δυσκολίες σαρ αγαβάσα κατά εδάφια Ψαλμός 33:​18-20;

² Ανταβά ντουνιάς σο ισί κο βαστά κι Μπενγκέσκε ανέλα μπουτ προβλήματα ι αληθινέ Χριστιανόνγκε αντιβές. Νακχάσα δυσκολίες σο κερένα-αμέν τι χασαράς αμαρί ζορ, ατζέ-ντα δοκιμάνενα αμαρί αφοσίωση κο Ιεχωβά. Αλλά σαρ κα ντικχάς ανταλέ μαθημάστε, να χρειαζίντιβελα τι νταράς. Ο Ιεχωβά ντικχέλα-αμέν. Ντικχέλα αμαρέ προβλήματα ντα μανγκέλα τι βοηθίνελ-αμέν τι κεράς-λεν κουμάντος. Ακανά κα ντικχάς ντούι παραδείγματα κατά Γραφή σο σικαβένα σαρ ο Ιεχωβά «ντικχέλα οντουλέν σο νταρένα λέσταρ».​—Διαβάνεν Ψαλμός 33:​18-20.

3. Κάνα μπέκιμ νιωθίνασα κορκορέ;

³ Παρόλο σο ισινάμ αντρέ εκχέ μπαρέ φαμιλιάτε, σο σαρέ ντένα λατρεία ι Ιεχωβάς, ισί φαρ σο μπέκιμ νιωθίνασα κορκορέ. Για παράδειγμας, ο τερνέ μπέκιμ νιωθίνενα κορκορέ κάνα βακερένα οντουλά σο πακιάνα ανγκλάλ πουμαρέ συμμαθητέντε κο σχολείος ή κάνα αλλάνενα κχανγκιρί. Μερικοί αμένταρ μπέκιμ τθεράσα πφανγκό γκι ή χασαρντάμ αμαρί ζορ σόσκε αμντίνασα ότι πρέπει τι ντας-λεν πέρα κορκορέ. Μπέκιμ σακιντίνασα τι πουτράς αμαρό γκι κο γιαβερά σόσκε νταράσα ότι να κα αγαβέν-αμέν. Ντα μπάζιμα, μπέκιμ να ισινάμ σίγουροι άμα πφαμπόλα αμένγκε μπαγιά καέκ τζενό. Κάνα νιωθίνασα κορκορέ, αμντίνασα ότι να τθεράσα  καέκ βοήθεια ντα χάλα-αμέν ο άγχος. Ο Ιεχωβά να μανγκέλα τι νιωθίνας αντικάς. Σόσκε βακεράσα-λες ανταβά;

4. Σόσκε βακερντάς ο προφήτης Ηλίας: «Ατσσιλόμ σάντε με»;

⁴ Ντικχέν ο παράδειγμας ι πιστέ Ηλιάσκο. Η Ιεζάβελ χαλάας σοβέλ τι μουνταρέλ-λες ντα βοβ νασλό τθαβντιμάσαρ για τι σώνελ-πες. (1 Βασ. 19:​1-9) Σοράν 40 ντα πο μπουτ ντιβεσένταρ, κορκορό αντρέ εκχέ σπηλιάτε, βακερντάς βικόσαρ κο Ιεχωβά: «Ατσσιλόμ σάντε με [κατά προφήτες]». (1 Βασ. 19:​10) Ισινέ γιαβερά-ντα προφήτες κο τθεμ. Ο Αβδιού μπορισάλοας τι σώνελ 100 προφητέν κατά Ιεζάβελ. (1 Βασ. 18:7, 13) Σόσκε ο Ηλίας νιωθίνελας αζόμ κορκορό; Μήπως αμντίνελας ότι ο προφήτες σο σωντάας ο Αβδιού μουλέας; Μήπως νιωθίνελας κορκορό σόσκε καέκ γιαβέρ να αρχισάλο τι υπηρετίνελ ι Ιεχωβάς κάνα σικάντιλο κο βες Κάρμηλος ότι ο Ιεχωβά ισινέ ο αληθινός Ντεβέλ; Μήπως νιωθίνελας ότι καέκ να τζανέλας ότι λέσκε ντουσμάνια μανγκένας τι μουνταρέν-λες; Ή μήπως αμντίνελας ότι καέκ να πφαμπόλας λέσκε; Η ιστορία να βακερέλα αμένγκε ντιπ σο τθερέλας ο Ηλίας αντρέ πι γκίστε. Αλλά ισινάμ σίγουροι ότι ο Ιεχωβά αγαβέλας σόσκε νιωθίνελας ο Ηλίας κορκορό ντα ότι τζανέλας ντιπ λατσσές σαρ τι βοηθίνελ-λες.

5. Σαρ ντινάς ο Ιεχωβά ι Ηλιάς τι αγαβέλ ότι να ισινέ κορκορό;

⁵ Ο Ιεχωβά βοηθιντάς ι Ηλιάς μπερεκέτι τροπόντζαρ. Τσσιντιντάς-λες τι κερέλ λάφι. Πουτσλάς-λες ντούι φαρ: «Σο κερέσα ατθέ;» (1 Βασ. 19:9, 13) Ο ντούι-ντα φαρ, ο Ιεχωβά ασουνέλας καζόμ πουτρέλας ο Ηλίας πο γκι. Ο Ιεχωβά απαντιντάς κο Ηλίας κάνα σικαντάς λέσκε ότι ισινέ οτθέ ντα ότι τθερέλας μπαρί ζορ. Ντα βακερντάς κο Ηλίας ότι μπουτ γιαβερά-ντα Ισραηλίτες υπηρετίνενας-λες. (1 Βασ. 19:​11, 12, 18) Σίγουρα, ο Ηλίας λοκχιλό κάνα πουταρντάς πο γκι κο Ιεχωβά ντα ασουντάς λέσκι απάντηση. Ο Ιεχωβά ντινάς κο Ηλίας σημαντικούς διορισμούς. Μανγκλάς λέσταρ τι σικαβέλ ότι ο Αζαήλ κα αβέλας βασιλιάς κι Συρία, ο Ιηού βασιλιάς κο Ισραήλ ντα ο Ελισαιέ προφήτης. (1 Βασ. 19:​15, 16) Κάνα ο Ιεχωβά ντινάς κο Ηλίας ανταλά διορισμούς, βοηθιντάς-λες τι τθερέλ πο γιακχά λατσσέ πραγματέντε. Ντα ντινάς-λες εκχέ λατσσέ συνεργατής, ι Ελισαιές. Σαρ μπορίνενα τουμέν τι λεν ι βοήθεια ι Ιεχωβάσκι κάνα νιωθίνενα κορκορέ;

6. Καλέ πραγματένγκε μπορίνενα τι προσευχίντιβεν κάνα νιωθίνενα κορκορέ; (Ψαλμός 62:8)

 ⁶ Ο Ιεχωβά βακερέλα τουμένγκε τι προσευχίντιβεν λέστε. Ντικχέλα τουμαρέ προβλήματα ντα μανγκέλα τι αβέν σίγουροι ότι κα ασουνέλ τουμαρέ προσευχές κάνα-ντα τι αβέλ. (1 Θεσ. 5:​17) Αβέλα λέσκο γκι κάνα ασουνέλα πι υπηρετόν. (Παρ. 15:8) Καλέ πραγματένγκε μπορίνενα τουμέν τι προσευχίντιβεν κάνα νιωθίνενα κορκορέ; Πουτρέν τουμαρό γκι κο Ιεχωβά σαρ κερντάς ο Ηλίας. (Διαβάνεν Ψαλμός 62:8) Βακερέν λέσκε ι πραγματένγκε σο αγχώνενα-τουμέν ντα σαρ κερένα-τουμέν τι νιωθίνεν. Μανγκέν κατά Ιεχωβά τι βοηθίνελ-τουμέν τι κερέν κουμάντος οντουλά σο τθερένα τουμαρέ γκίστε. Για παράδειγμας, άμα νιωθίνενα κορκορέ ντα νταρένα κάνα κερένα έργος κο σχολείος, μανγκέν λέσταρ τι βοηθίνελ-τουμέν τι αβέν μπίνταρανε. Μπορίνενα ατζέ-ντα τι μανγκέν λέσταρ τι ντελ-τουμέν σοφία για τι βακερέν λατσσιμάσαρ οντουλά σο πακιάνα. (Λουκ. 21:​14, 15) Άμα τθερένα πφανγκό γκι ή χασαρντέν τουμαρί ζορ, μανγκέν κατά Ιεχωβά τι βοηθίνελ-τουμέν τι κερέν λάφι εκχέ γκοντιαβέρ Χριστιανόσαρ ανταλέσκε. Μπορίνενα τι μανγκέν κατά Ιεχωβά τι βοηθίνελ οντουλές σο κα μουτθαβέν λέσκε τουμαρό πρόβλημας τι αγαβέλ-τουμέν. Πουτρέν τουμαρό γκι κο Ιεχωβά, ντικχέν σαρ απαντίνελα τουμαρέ προσευχιέντε ντα δεχτίνεν ι βοήθεια ι γιαβερένγκι. Άμα κερντέν-λες ανταβά, να κα νιωθίνεν αζόμ κορκορέ.

7. Σο σικλιόνα τουμέν κατά Μαουρίσιο;

⁷ Ο Ιεχωβά ντινάς-αμέν σαριλέν εκ έργος σο πφερέλα-αμέν. Μπορίνασα τι αβάς σίγουροι ότι ντικχέλα ντα εκτιμίνελα σαρέ οντουλά σο κεράσα κι κχανγκιρί ντα κο έργος. (Ψαλμ. 110:3) Σαρ αβέλα-πες ο έργος τι βοηθίνελ-τουμέν κάνα νιωθίνενα κορκορέ; Ντικχέν ο παράδειγμας εκχέ τερνέσκο σο βακερένα λέσκε Μαουρίσιο. * Χάνικ πο σοράν λέσκε μπολντιμάσταρ, εκ κατά πο λατσσέ αμαλά λέσκε χάνικ χάνικ νασλό κατά αλήθεια. «Καζόμ ντικχάβας-λες τι τσσίντελ-πες ντουρ κατά Ιεχωβά, αρχισάλομ τι τσσιναβάβ τι νταβ μπέσα μι νεαυτόστε», βακερέλα ο Μαουρίσιο. «Να τζανάβας άμα μπορίναβας τι ατσσικιαράβ μο λάφι τι υπηρετίναβ ι Ιεχωβάς ντα τι ατσσάβ λέσκε φαμιλιάτε. Νιωθίναβας κορκορό ντα αμντίναβας ότι καέκ να αγαβέλας-μαν». Σο βοηθιντάς ι Μαουρισιός; Βοβ βακερέλα: «Κεράβας πο μπουτ έργος. Ανταβά βοηθιντάς-μαν τι τσσιναβάβ τι σκεφτίναβ σάντε μο νεαυτός ντα οντουλά σο τθεράβας μι γκίστε. Ισινόμας χαρούμενος ντα να νιωθίναβας αζόμ κορκορό κάνα νικιάβας ι γιαβερέντζαρ κο έργος». Ισί μπαγιά ότι ατζέ-ντα κάνα ναστί συνεργαζίντιβασα πασάλ αμαρέ πφραλέντζαρ ντα πφενίντζαρ κο έργος, λάσα ζορ κάνα κεράσα γιεκ λέντζαρ πράγματα σαρ ισί ο έργος αντράλ κατά επιστολές ντα κατά τηλέφωνος. Σο γιαβέρ βοηθιντάς ι Μαουρισιός; Βακερέλα: «Κεράβας πο μπουτ πράγματα κι κχανγκιρί-ντα. Προετοιμάναβας ντα κεράβας καζόμ πο λατσσές αβέλας-πες ο διορισμοί σο ντιντιόνας-μαν. Ανταλά διορισμοί  κερντέ-μαν τι νιωθίναβ ότι τθεράβας αξία εμ ι Ιεχωβάσκε εμ ι γιαβερένγκε».

8. Σαρ κερένα-αμέν τι νιωθίνας ο μπουτ μπαρέ δοκιμασίες;

⁸ Μπεκλεντίνασα ότι κα τθεράς δοκιμασίες ανταλέ τελευταίε ντιβεσέντε. (2 Τιμ. 3:1) Όμως, ο δοκιμασίες μπέκιμ τι αβέν αζομάν σο να κα μπεκλεντίνας ντα εκχέ τροπόσαρ σο να νακχλόας αμαρέ γκοντιάταρ. Μπέκιμ τι τθεράς εκ μπαρό οικονομικός πρόβλημας, τι λας αμπέρι ότι τθεράσα εκ πφαρό νασφαλιπέ ή τι μερέλ εκ τζενό σο μανγκάσα μπουτ. Ασακέ σαατίντε, μπέκιμ πφανγκιόλα μπουτ αμαρό γκι. Μπέκιμ χασαράσα αμαρί ζορ, ντα πο μπουτ άμα ντικχίντιβελα ότι τθεράσα δοκιμασίες παλάλ γιαβερέστε, ή ατζέ χειρότερα, άμα νακχάσα μπερεκέτι δοκιμασίες γιεκ. Ντεν-τουμέν γκοντί όμως ότι ο Ιεχωβά ντικχέλα-αμέν ντα λέσκε βοηθειάσαρ μπορίνασα τι νακχαβάς με σιγουριά σο-ντα δοκιμασία τι τθεράς.

9. Βακερέν μερικές δοκιμασίες σο τθερέλας ο Ιώβ.

⁹ Σκεφτίνεν σαρ βοηθιντάς ο Ιεχωβά ι πιστέ Ιωβίς. Βοβ τθερέλας μπερεκέτι μπαρέ δοκιμασίες αντρέ χάνικ βακιτίστε. Αντρέ εκχέ ντιβεσέστε, ο Ιώβ σικλιλό ότι χασαρντάς σαρέ πο ζώα ντα ότι μουλέ λέσκε υπηρέτες ντα λέσκε τσσαβέ σο μανγκέλας-λεν μπουτ. (Ιώβ 1:​13-19) Χάνικ πο σοράν, καζόμ συνεχίνελας τι τθερέλ μπαρί ντουκχ πι γκίστε, αβιλό λέσκε εκ μπουτ πφαρό ντα μπέτι νασφαλιπέ. (Ιώβ 2:7) Ο πράγματα ισινέ αζόμ μπέτι σο ο Ιώβ βακερντάς: «Τζουνγκασάλομ μι ζωγιάταρ· να μανγκάβα τι τζουβντιάβ γιαβέρ».​—Ιώβ 7:16.

10. Σαρ ντινάς ο Ιεχωβά κο Ιώβ σο-ντα χρειαζίντιβελας για τι νταϊντίνελ πο δοκιμασίες; (Ντικχέν ι φωτογραφία κι ανγκλαϊνί σελίδα)

¹⁰ Ο Ιεχωβά ντικχέλας ι Ιωβίς. Επειδή ο Ιεχωβά μανγκέλας ι Ιωβίς, ντινάς-λες σο-ντα χρειαζίντιβελας για τι νταϊντίνελ πο δοκιμασίες ντα τι ατσσόλ πιστός. Κερντάς λάφι κο Ιώβ ντα αντάς λέσκε γκοντιάτε ότι ισί μπουτ γκοντιαβέρ Ντεβέλ ντα ότι αρακχαβέλα μανγκιμάσαρ οντουλέν σο λατσσαρντάς. Βακερντάς λέσκε μπουτέ ζωόνγκε σο κερένα-αμέν τι σαστίνας. (Ιώβ 38:1, 2· 39:9, 13, 19, 27· 40:​15· 41:1, 2) Ατζέκ, ο Ιεχωβά μπουτσσαντάς ι Ιωβίσκε εκχέ πιστέ τερνές, σο βακερένας λέσκε Ελιού, για τι ντελ-λες ζορ ντα τι κοβλιαρέλ λέσκι ντουκχ. Ο Ελιού βακερντάς λέσκε τι αβέλ σίγουρος ότι ο Ιεχωβά ευλογίνελα πάντα πι υπηρετόν σο νταϊντίνενα. Αλλά ο Ιεχωβά κερντάς ι Ελιούς τι ντελ κο Ιώβ μερικές λατσσέ συμβουλές-ντα. Ο Ελιού βοηθιντάς ι Ιωβίς τι τσσιναβέλ τι σκεφτίνελ αζόμ μπουτ πο νεαυτός κάνα αντάς λέσκε γκοντιάτε ότι ισί μπουτ χουρντό ανγκλάλ κο Ιεχωβά, Οντουλέστε σο λατσσαρντάς-λεν σαρέ. (Ιώβ 37:​14) Ο Ιεχωβά επίσης ντινάς κο Ιώβ εκ διορισμός: τι προσευχίντιβελ πι τρινέ αμαλένγκε σο αμαρτιντέας. (Ιώβ 42:​8-10) Σαρ βοηθίνελα ο Ιεχωβά αμέν αντιβές κάνα τθεράσα μπαρέ δοκιμασίες;

11. Σαρ βοηθίνελα-αμέν η Γραφή κάνα τθεράσα δοκιμασίες;

¹¹ Ο Ιεχωβά να κερέλα αμέντζαρ λάφι σαρ κερντάς ι Ιωβίσαρ, αλλά κερέλα αμέντζαρ λάφι αντράλ πι Λαφίσταρ κατά Αγία Γραφή. (Ρωμ. 15:4) Κοβλιαρέλα αμαρί ντουκχ αντράλ κατά ελπίδα οντουλένγκε σο κα αβέν ανγκλ’ αμέντε. Ντικχέν χάνικ σκέψεις κατά Γραφή σο μπορίνενα τι κοβλιαρέν αμαρί ντουκχ κάνα τθεράσα δοκιμασίες. Κι Γραφή, ο Ιεχωβά βακερέλα αμένγκε τι αβάς σίγουροι ότι τίποτα, ούτε ο μπαρέ δοκιμασίες, “ναστί τσσιναβέλα-αμέν λέσκε μανγκιμάσταρ”. (Ρωμ. 8:​38, 39) Ντα βακερέλα αμένγκε τι αβάς σίγουροι ότι βοβ «ισί πασέ σαρέ οντουλέντε σο ρόντενα λέσκε» αντράλ κατά προσευχή. (Ψαλμ. 145:​18) Ο Ιεχωβά βακερέλα αμένγκε ότι, άμα μανγκάσα λέσκι βοήθεια, κα νταϊντίνας σο-ντα δοκιμασία τι νακχάς ντα κα αβάς χαρούμενοι ατζέ-ντα άμα τσσίντασα μπουτ. (1 Κορ. 10:​13· Ιακ. 1:2, 12) Ο Λάφι ι Ντεβλέσκο ανέλα αμαρέ γκοντιάτε ότι αμαρέ δοκιμασίες ατσσικιαρένα χάνικ ανγκλάλ κο ευλογίες σο ντέλα-αμέν βοβ  τι τθεράς για πάντα. (2 Κορ. 4:​16-18) Ο Ιεχωβά ντέλα-αμέν ι ελπίδα ότι κα καταστραφίνελ οντουλέν σο ανένα σαρέ αμαρέ προβλήματα​—ι Μπενγκές ντα οντουλέν σο ισί πφιρνέ σαρ βοβ. (Ψαλμ. 37:​10) Σικλιλέν αβριάλ εδάφια σο κοβλιαρένα τουμαρί ντουκχ ντα σο μπορίνενα τι βοηθίνεν-τουμέν τι νταϊντίνεν ο δοκιμασίες σο κα αβέν;

12. Σο μπεκλεντίνελα αμένταρ ο Ιεχωβά τι κεράς για τι ντικχάς λατσσιπέ λέσκε Λαφίσταρ;

¹² Ο Ιεχωβά μπεκλεντίνελα αμένταρ τι ντας αμαρέ σαατίσταρ για τι σικλιαράς-αμέν κατά Γραφή ντα τι σκεφτίνας αχόρτ οντουλά σο διαβάνασα. Κάνα κεράσα οντουλά σο σικλιάσα, αμαρί πίστη αβέλα πο ζουρανί, ντα αβάσα πο πασέ αμαρέ Νταντέστε, κο Ιεχωβά. Αντικάς, λάσα ζορ για τι νταϊντίνας δοκιμασίες. Ατζέκ, ο Ιεχωβά ντέλα πο άγιος πνεύμας οντουλέντε σο ντένα μπέσα λέσκε Λαφίστε. Ανταβά πνεύμας μπορίνελα τι ντελ αμέν ι «ζορ σο ισί πο μπαρί αμαρέ ζοριάταρ» για τι νταϊντίνας σο-ντα δοκιμασία τι τθεράς.​—2 Κορ. 4:​7-10.

13. Σαρ βοηθίνελα-αμέν ο πνευματικός χαμπέ σο ντέλα «ο πιστός ντα φρόνιμος δούλος» τι νταϊντίνας δοκιμασίες;

¹³ Ι Ιεχωβάσκε βοηθειάσαρ, «ο πιστός ντα φρόνιμος δούλος» νικαβέλα μπουτ θέματα, βίντεα ντα γκιλιά σο βοηθίνενα-αμέν τι τθεράς ζουρανί πίστη ντα τι ατσσάς πασέ κο Ιεχωβά. (Ματθ. 24:​45) Πρέπει τι χρησιμοποιήνας σο-ντα ντέλα-αμέν ο Ιεχωβά καζόμ πο λατσσές αβέλα-πες. Εκ πφεν κατά Ηνωμένες Πολιτείες βακερντάς ότι ισί πφερντί εκτίμηση σαρέ ανταλέ πνευματικέ χαμπέσκε. Βόι βακερέλα: «Κο 40 μπρεσά σο υπηρετίναβα ι Ιεχωβάς, έπρεπε τι σικαβάβ μπουτ φαρ ότι τθεράβα σαστό μο γκι κο Ντεβέλ». Αμαρί πφεν τθερέλας μπαρέ δοκιμασίες: λάκο πάππους μουλό ιτιρί εκχέ τζενέσταρ σο οδηγίνελας ματό, λάκο ντατ ντα λάκι ντάι νασφάλιλε πφαρές ντα μουλέ, ντα βόι νακχλάς καρκίνος ντούι φαρ. Σο βοηθιντάς-λα τι νταϊντίνελ; Βόι βακερέλα: «Ο Ιεχωβά πάντα φροντίνελας-μαν. Ο πνευματικός χαμπέ σο ντινάς αντράλ κατά πιστός ντα φρόνιμος δούλος βοηθιντάς-μαν τι νταϊντίναβ. Χάρη ανταλέσταρ, μπορίναβα τι βακεράβ σαρ ο Ιώβ: “Μέχρι τι μεράβ, κα ατσσικιαράβ σαστό μο γκι κο Ντεβέλ!”»​—Ιώβ 27:5.

14. Σαρ βοηθίνελα-αμέν ο Ιεχωβά αντράλ κατά πφραλά ντα κατά πφενιά κάνα τθεράσα δοκιμασίες; (1 Θεσσαλονικείς 4:9)

¹⁴ Ο Ιεχωβά σικλιαρντάς πι υπηρετόν τι μανγκέν ο εκ ι γιαβερές ντα τι κοβλιαρέν ι ντουκχ ο εκ ι γιαβερέσκι κάνα ισί δυσκολίες. (2 Κορ. 1:3, 4· διαβάνεν 1 Θεσσαλονικείς 4:9) Σαρ ο Ελιού, αμαρέ πφραλά ντα πφενιά μανγκένα αντράλ πουμαρέ γκίσταρ τι βοηθίνεν-αμέν τι ατσσάς πιστοί κάνα τθεράσα δυσκολίες. (Πράξ. 14:​22) Για παράδειγμας, ντικχέν σαρ ο πφραλά  κι κχανγκιρί σο ισί η Νταϊάν ντινέ-λα ζορ ντα βοηθιντέ-λα τι ατσσόλ πασέ κο Ιεχωβά κάνα λάκο ρομ τθερέλας εκ πφαρό νασφαλιπέ. Βόι βακερέλα: «Ο πράγματα να ισινέ ιτς εύκολα. Αλλά νιωσάλαμ ι ζουρανί ντα τατί ανγκάλι ι Ιεχωβάσκι ανταλέ δύσκολε μασικέντε. Ο πφραλά ντα ο πφενιά αμαρέ κχανγκιριάτε κερντέ μπουτ πράγματα για τι βοηθίνεν-αμέν. Αβένας τι ντικχέν-αμέν, λένας-αμέν τηλέφωνος, ντένας-αμέν ανγκάλι ντα ανταλά βοηθιντέ-αμέν τι νταϊντίνας. Επειδή να οδηγίναβα, βον κανονίνενας τι τζαβ κο συναθροίσεις ντα τι νικιάβ κο έργος κάνα μπορίναβας». Σο μπαρί ευλογία ισί τι αβάς αντρέ εκχέ ασακέ πνευματικέ φαμιλιάτε σο μανγκέλα-αμέν μπουτ!

15. Σόσκε ισινάμ σίγουροι ότι μπορίνασα τι ντας-λεν πέρα ι προβληματέντζαρ;

¹⁵ Σαρέ κα τθεράς δοκιμασίες. Όμως, σαρ σικλιλάμ, ποτές να κα νακχάς-λεν κορκορέ. Σαρ εκ λατσσό ντατ, αντικάς ο Ιεχωβά-ντα ντικχέλα-αμέν εμ. Ισί πασέ αμέντε, έτοιμος τι ασουνέλ-αμέν ντα τι κερέλ κάτι κάνα μολίνασα-λες τι βοηθίνελ-αμέν. (Ησ. 43:2) Ισινάμ σίγουροι ότι μπορίνασα τι ντας-λεν πέρα ι προβληματέντζαρ σόσκε ντινάς-αμέν αντράλ πι γκίσταρ σο-ντα χρειαζίντιβασα για τι νταϊντίνας. Ντινάς-αμέν ο δώρος ι προσευχιάκο, ι Αγία Γραφή, μπουτ πνευματικός χαμπέ ντα πφραλέν σο μανγκένα-αμέν για τι βοηθίνεν-αμέν κάνα τθεράσα ανάγκη.

16. Σο μπορίνασα τι κεράς για μα τι τσσιναβέλ ο Ιεχωβά τι φροντίνελ-αμέν;

¹⁶ Ισινάμ πφερντέ εκτίμηση σο αμαρό Ντατ, ο Ιεχωβά, ντικχέλα-αμέν! «Αμαρό γκι χαιρίνελα κο πράγματα σο τθερένα τι κερέν λέσαρ». (Ψαλμ. 33:​21) Μπορίνασα τι σικαβάς ι Ιεχωβάσκε ότι εκτιμίνασα σο φροντίνελα-αμέν μανγκιμάσαρ κάνα χρησιμοποιήνασα σαρέ οντουλά σο ντέλα-αμέν για τι βοηθίνελ-αμέν. Ατζέ, χρειαζίντιβελα τι κεράς σο νακχέλα αμαρέ βαστένταρ για μα τι τσσιναβέλ ο Ντεβέλ τι φροντίνελ-αμέν. Γιαβερέ λαφίντζαρ, άμα να τσσιναβάσα τι κεράς ο πο λατσσό για τι ντας καν κο Ιεχωβά ντα τι κεράς σο-ντα ισί σωστός λέσκε γιακχίντε, βοβ κα ντικχέλ-αμέν για πάντα!​—1 Πέτρ. 3:12.