1. Καλά λατσσέ πράγματα κερντέ μέχρι ακανά μπουτ τερνέ;

 ΚΑΘΕ μπρες, μπολντιόνα χιλιάδες τερνέ Χριστιανοί. Τουμέν, μπολντιλέν; Άμα βα, ο πφραλά ντα ο πφενιά κι κχανγκιρί χαιρίνενα τουμένγκε, σαρ χαιρίνελα ο Ιεχωβά-ντα! (Παρ. 27:​11) Ανέν τουμαρέ γκοντιάτε καζόμ λατσσέ πράγματα κερντέν μέχρι ακανά. Σικλιαρντέν-τουμέν μπουτ λατσσές κατά Αγία Γραφή, μπέκιμ κερένα-λες ανταβά μπρεσά ακανά. Αντικάς, αβιλέν σίγουροι ότι η Γραφή ισί ο Λάφι ι Ντεβλέσκο. Επίσης, σικλιλέν ντα μανγκλέν Οντουλές σο ντινάς πο πνεύμας για τι γραφίντιβελ η Γραφή. Τουμαρό μανγκιπέ ι Ιεχωβάσκε μπαριλό αζόμ μπουτ σο αποφασιντέν τι ντεν τουμαρό λάφι τι υπηρετίνεν-λες ντα τι μπολντιόν. Ανταβά ισί μπουτ σουκάρ!

2. Σο κα ντικχάς ανταλέ μαθημάστε;

 ² Πριν τι μπολντιόν, νακχλέν δυσκολίες ντα έπρεπε τι σικαβέν τουμαρί πίστη. Αλλά καζόμ μπαριόνα, κα τθερέν νεβέ δοκιμασίες. Ο Μπενγκ κα μαρέλ-πες τι κερέλ-τουμέν τι τσσιναβέν τι μανγκέν ντα τι υπηρετίνεν ι Ιεχωβάς. (Εφεσ. 4:​14) Μα μουκχέν τι αβέλ-πες ανταβά. Σο κα βοηθίνελ-τουμέν τι ατσσικιαρέν τουμαρί αφοσίωση κο Ιεχωβά ντα ο λάφι σο ντινέν ότι κα υπηρετίνεν-λες; Πρέπει τι συνεχίνεν τι τζαν ανγκλάλ, δηλαδή τι “μαρέν-τουμέν τι ερεσέν κο σημείος τι αβέν ζουρανέ κι πίστη”. (Εβρ. 6:1) Αλλά σαρ μπορίνενα τι κερέν-λες ανταβά;

3. Σο πρέπει τι κερέν σαρέ ο Χριστιανοί σοράν κατά μπολντιπέ;

³ Σοράν κατά μπολντιπέ, σαρέ χρειαζίντιβελα τι κεράς ι συμβουλή σο ντινάς ο απόστολος Παύλος κο Χριστιανοί κι Έφεσος. Βακερντάς λένγκε τι αβέν Χριστιανοί σο ισί «κο μπάριπε». (Εφεσ. 4:​13) Γιαβερέ λαφίντζαρ, δεν έπρεπε τι τσσιναβέν τι τζαν ανγκλάλ. Μπορίνασα τι αγαβάς σο μανγκέλας τι βακερέλ ο Παύλος κάνα μοιασκιαρντάς ο πνευματικός μπάριπε εκχέ Χριστιανόσκο ι τροπόσαρ σο μπαριόλα εκ χουρντό. Εκ ντατ ντα εκ ντάι μανγκένα ντα καμαρώνενα πουμαρέ χουρντέ μαξιμίς. Αλλά ο χουρντό μαξίμι ναστί ατσσόλα για πάντα αντικάς. Καζόμ νακχέλα ο βακίτι, κα χρειαζίντιβελ τι νασκιαρέλ οπρά-πέσταρ «σαρέ ο πράγματα σο κερέλα εκ χουρντό». (1 Κορ. 13:​11) Ανταβά αβέλα-πες ι Χριστιανόντζαρ-ντα. Σοράν κατά μπολντιπέ, δεν πρέπει τι τσσιναβάς τι τζας ανγκλάλ. Ακανά κα ντικχάς μερικές συμβουλές σο κα βοηθίνεν-αμέν.

4. Καγιά ιδιότητα μπορίνελα τι βοηθίνελ-τουμέν τι τζαν ανγκλάλ; Εξηγίνεν. (Φιλιππησίους 1:9)

⁴ Μπαριαρέν τουμαρό μανγκιπέ ι Ιεχωβάσκε. Ακανά-ντα μανγκένα ι Ιεχωβάς μπουτ. Αλλά τουμαρό μανγκιπέ λέσκε μπορίνελα τι αβέλ ατζέ πο μπαρό. Σαρ; Ο απόστολος Παύλος βακερέλα εκ τρόπος κο εδάφιος Φιλιππησίους 1:9. (Διαβάνεν) Ο Παύλος κερντάς προσευχή «τι μπαριόλ συνέχεια [ι Φιλιππησιόνγκο] μανγκιπέ». Άρα, μπορίνασα τι μπαριαράς αμαρό μανγκιπέ. Κα κεράς-λες ανταβά άμα κα “σικλιάς ντα κα αγαβάς πο μπουτ πράγματα”. Καζόμ πο μπουτ σικλιάσα ι Ιεχωβάς, αζόμ πο μπουτ μανγκάσα-λες ντα εκτιμίνασα οντουβά σο ισί ντα οντουλά σο κερέλα. Μανγκάσα ατζέ πο μπουτ τι κεράς λέσκο γκι ντα ποτές μα τι πφανγκάς-λες. Μαράσα-αμέν τι αγαβάς σο μανγκέλα αμένταρ τι κεράς ντα σαρ τι κεράς-λες.

5, 6. Σαρ μπορίνασα τι μπαριαράς αμαρό μανγκιπέ ι Ιεχωβάσκε; Εξηγίνεν.

⁵ Μπορίνασα τι μπαριαράς αμαρό μανγκιπέ ι Ιεχωβάσκε άμα σικλιάσα πο λατσσές λέσκε Τσσαβές, σο μοιάζελα ντιπ πι Νταντέστε. (Εβρ. 1:3) Ο πο λατσσό τρόπος για τι σικλιάς ι Ιησούς ισί τι ρόντας αχόρτ κο σταρ Ευαγγέλια. Άμα να ισινέν ατζέ σικλέ τι διαβάνεν ι Αγία Γραφή κάθε ντιβές, κα μπορίνενας τι κερέν-λες ακανά. Καζόμ διαβάνενα ο ιστορίες σο τθερένα τι κερέν ι Ιησούσαρ, ντεν πο μπουτ σημασία λέσκε ιδιοτητέντε. Ο τζενέ να λατζάνας τι κερέν λάφι ι Ιησούσαρ. Διαβάνασα ότι λιντάς μανγκιμάσαρ πι ανγκαλιάτε χουρντέ τσσαβέν. (Μάρκ. 10:​13-16) Σικαβέλας λατσσιπέ πι μαθητένγκε ντα βον να σακιντίνενας τι βακερέν λέσκε οντουλά σο τθερένας πουμαρέ γκοντιάτε. (Ματθ. 16:​22) Οπράλ ανταλέστε, ο Ιησούς μοιάζελας πι Νταντέστε. Ι Ιεχωβάσαρ-ντα να λατζάσα τι κεράς λάφι. Μπορίνασα τι κεράς προσευχή λέστε. Κάνα προσευχίντιβασα, μπορίνασα τι πουτράς λέσκε αμαρό γκι. Ισινάμ σίγουροι ότι βοβ να κα κρίνελ-αμέν. Μανγκέλα-αμέν ντα πφαμπόλα αμένγκε.​—1 Πέτρ. 5:7.

⁶ Ο Ιησούς αγαβέλας ι ντουκχ ι τζενένγκι. Ο απόστολος Ματθαίος βακερέλα: «Κάνα ντικχλάς ι τζενέν, τζιτζισάλο λένγκε, επειδή ισινέ ντινέ ντα τρουγιμέ σαρ μπρακέ σο να τθερένα τσομπανής». (Ματθ. 9:​36) Ντα σαρ νιωθίνελα ο Ιεχωβά; Ο Ιησούς βακερντάς: «Να μανγκέλα μο Ντατ σο ισί κο ουρανός τι χασάρντιβελ ούτε εκ τανό ανταλέ χουρντένταρ». (Ματθ. 18:​14) Σο μπουτ μανγκέλα-αμέν ο Ιεχωβά! Καζόμ σικλιάσα πο λατσσές ι Ιησούς, αμαρό μανγκιπέ ι Ιεχωβάσκε μπαριόλα.

7. Σαρ κα βοηθίνελ-τουμέν η παρέα γκοντιαβέρ Χριστιανόντζαρ;

⁷ Μπορίνενα τι μπαριαρέν τουμαρό μανγκιπέ ντα τι τζαν ανγκλάλ σαρ Χριστιανοί άμα ντένα τουμαρέ σαατίσταρ-ντα για τι σικλιόν πο λατσσές γκοντιαβέρ πφραλέν ντα πφενίν  κι κχανγκιρί. Ντικχέν καζόμ χαρούμενοι ισί. Να μετανιώνενα σο τραμπιντέ τι υπηρετίνεν ι Ιεχωβάς. Μανγκέν λένταρ τι πουτρέν τουμένγκε εμπειρίες σο τθερένας κι υπηρεσία κι Ιεχωβάσκι. Κάνα τθερένα τι λεν εκ σημαντική απόφαση, μανγκέν λένγκι συμβουλή. Ντεν-τουμέν γκοντί ότι η επιτυχία αβέλα κάνα μπουτ τζενέ σο τθερένα σοφία βακερένα πουμαρέ απόψεις ο εκ κο γιαβέρ.​—Παρ. 11:14.

8. Σο μπορίνενα τι κερέν κάνα να ισινέν σίγουροι οντουλένγκε σο βακερέλα η Αγία Γραφή;

⁸ Αβέν σίγουροι οντουλένγκε σο πακιάνα. Σαρ βακερντάμ κι  παράγραφος 2, ο Μπενγκ κα μαρέλ-πες τι τσσιναβέλ-τουμέν τι τζαν ανγκλάλ σαρ Χριστιανοί. Εκ τρόπος ισί ότι μπέκιμ τι κερέλ-τουμέν μα τι αβέν σίγουροι οντουλένγκε σο σικλιαρέλα η Αγία Γραφή. Για παράδειγμας, κα αβέλ ο ντιβές σο μερικά τζενέ κα μανγκέν τι κερέν-τουμέν τι πακιάν κι εξέλιξη, εκχέ σικλιαριμάστε σο ανέλα λατζ κο Ντεβέλ. Κάνα ισινένας πο χουρντέ, μπέκιμ να ασουντένας ιτς ανταλέ σικλιαριμάσκε ή να χάλας-τουμέν αζόμ μπουτ ανάγκη. Αλλά ακανά σο μπαριλέν, τουμαρέ καθηγητές μπέκιμ σικλιαρένα-τουμέν ανταλέ πραγμάσκε κο σχολείος. Οντουλά σο βακερένα μπέκιμ ντικχίντιβενα τουμένγκε λογικά. Αλλά ανταβά να μανγκέλα τι βακερέλ ότι βον ροντιντέ λατσσές για τι ντικχέν άμα ισί Ντεβέλ. Ντεν-τουμέν γκοντί οντουβά σο βακερέλα ο εδάφιος Παροιμίες 18:​17: «Κον κερέλα πρώτος λάφι ντικχίντιβελα ότι τθερέλα δίκιος, μέχρι σο αβέλα ο γιαβέρ ντα κερέλα λέσκε ερωτήσεις για τι σικάντιβελ άμα ισί αντικάς ο πράγματα». Αντίς τι πακιάν σο-ντα σικλιαρένα-τουμέν κο σχολείος, σικλιόν μπουτ λατσσές ο αλήθειες σο ισί κο Λάφι κι Ντεβλέσκο, κι Αγία Γραφή. Ρόντεν κο εκδόσεις αμαρέ. Κερέν λάφι πφραλέντζαρ ντα πφενίντζαρ σο ανγκλέ πακιάνας κι εξέλιξη. Πουτσέν-λεν σο κερντάς-λεν τι αβέν σίγουροι ότι ισί εκ Ντεβέλ σο μανγκέλα-αμέν. Ασακέ συζητήσεις κα βοηθίνεν-τουμέν τι ντικχέν σαρ ισί μπαγιά ο πράγματα.

9. Σο σικλιόνα τουμέν κατά Μελίσα;

⁹ Εκ πφεν, η Μελίσα, ντικχλάς μπαρό λατσσιπέ σο ροντιντάς άμα ο Ντεβέλ λατσσαρντάς-λεν σαρέ. * Βόι βακερέλα: «Κο σχολείος, σικλιαρένα-τουτ ι εξέλιξη εκχέ τροπόσαρ σο κερέλα-τουτ τι πακιάς-λα. Κι αρχή, να μανγκάβας τι ρόνταβ σόσκε νταράβας μα τι αρακχάβας ότι η εξέλιξη ισί μπαγιά. Σκεφτιντόμ όμως ότι ο Ιεχωβά να μανγκέλα τι υπηρετίνας-λες πφαντέ γιακχίντζαρ. Οτθάρ, αποφασιντόμ τι ρόνταβ.  Διαβαντόμ ο βιβλίος Υπάρχει Δημιουργός που Ενδιαφέρεται για Εσάς; ντα ο βιβλιάρια Δημιουργήθηκε η Ζωή; ντα Σαρ Αβιλί η Ζωή​—Παντς Ερωτήσεις σο Ισί Λατσσό τι Κεράς. Ισινέ ντιπ οντουβά σο χρειαζίντιβαβας. Σο σουκάρ κα αβέλας τι κεράβας-λες ανταβά πο τζανγκλέ».

10, 11. Σο κα βοηθίνελ-τουμέν τι ατσσόν πάκι κι Ντεβλέσκε γιακχά; (1 Θεσσαλονικείς 4:3, 4)

¹⁰ Νασέν κατά λάθος πράγματα. Κάνα ο τζενέ ισί τερνέ, μανγκένα ατζέ πο μπουτ τι κερέν σεξ, ντα μπέκιμ ο γιαβερά τι ζορισκιαρέν-τουμέν τι κερέν λουμνιπέ. Ο Μπενγκ ανταβά μανγκέλα τι κερέν. Σο κα βοηθίνελ-τουμέν τι ατσσόν πάκι κι Ντεβλέσκε γιακχά; (Διαβάνεν 1 Θεσσαλονικείς 4:3, 4) Κάνα κερένα προσευχή κο Ιεχωβά, βακερέν λέσκε σο τθερένα αντρέ τουμαρέ γκίστε ντα μανγκέν λέσταρ τι ντελ-τουμέν ζορ. (Ματθ. 6:​13) Ντεν-τουμέν γκοντί ότι ο Ιεχωβά μανγκέλα τι βοηθίνελ-τουμέν, όχι τι κρίνελ-τουμέν. (Ψαλμ. 103:​13, 14) Μπορίνελα τι βοηθίνελ-τουμέν η Γραφή-ντα. Η Μελίσα δυσκολίντιβελας τι νασκιαρέλ πι γκοντιάταρ ο λουμνικανέ πράγματα. Βόι βακερέλα: «Ο διάβασμας ι Γραφιάκο κάθε ντιβές, βοηθιντάς-μαν μα τι τσσιναβάβ τι προσπαθίναβ. Ανέλας μι γκοντιάτε ότι ισινόμ ι Ιεχωβάσκι ντα ότι μανγκάβα-λες μι ζωγιάτε».​—Ψαλμ. 119:9.

¹¹ Μα μαρέν-τουμέν τι ντεν πέρα τουμαρέ προβλήματα κορκορέ. Κερέν λάφι τουμαρέ νταντέσαρ ντα τουμαρέ νταγιάσαρ ανταλέσκε. Σίγουρα νανέ εύκολος τι βακερέν σο τθερένα αντρέ τουμαρέ γκίστε, αλλά ισί σημαντικός τι κερέν-λες ανταβά. Η Μελίσα βακερέλα: «Προσευχισάλομ τι τθεράβ θάρρος ντα σοράν κερντόμ λάφι μι νταντέσαρ ι προβλημάσκε σο τθεράβας. Κάνα κερντόμ-λες ανταβά, λοκχιλό μπουτ μο γκι. Τζανάβας ότι ο Ιεχωβά καμαρώνελας-μαν».

12. Σαρ μπορίνενα τι λεν λατσσέ αποφάσεις;

¹² Μουκχέν ο αρχές ι Γραφιάκε τι σικαβέν τουμένγκε σο τι κερέν. Καζόμ μπαριόνα, τουμαρό ντατ ντα τουμαρί ντάι κα μουκχέν-τουμέν τι λεν πο μπουτ αποφάσεις κορκορέ. Αλλά τουμέν ατζέκ ατζέκ να τζανένα μπουτ πράγματα. Σο μπορίνενα τι κερέν για μα τι χαλαβέν τουμαρί φιλία ι Ιεχωβάσαρ εκχέ λαθόσταρ; (Παρ. 22:3) Εκ πφεν, η Κάρι, βακερέλα σο βοηθιντάς-λα τι λελ πο λατσσέ αποφάσεις. Αγαντάς ότι ο γκοντιαβέρ Χριστιανοί να χρειαζίντιβενα τι τθερέν κανόνες σαρέ ι πραγματένγκε. Βόι βακερέλα: «Χρειαζίντιβελας τι αγαβάβ ι Γραφιάκε αρχές, όχι σάντε κανόνες». Κάνα διαβάνενα ι Γραφή, πουτσέν-τουμέν: “Σο σικαβένα μάνγκε ανταλά εδάφια ι τροπόσκε σο σκεφτίνελα ο Ιεχωβά; Μήπως τθερένα αρχές σο μπορίνενα τι βοηθίνεν-μαν τι κεράβ ο σωστός; Άμα βα, σο λατσσιπέ κα ντικχάβ άμα κα κεράβ-λεν;” (Ψαλμ. 19:7· Ησ. 48:​17, 18) Άμα διαβάνενα ι Γραφή ντα σκεφτίνενα λατσσές λάκε αρχές, κα αβέλ τουμένγκε πο εύκολος τι λεν αποφάσεις σο κερένα ο γκι ι Ιεχωβάσκο. Καζόμ να τσσιναβένα τι τζαν ανγκλάλ, κα ντικχέν ότι να χρειαζίντιβενα κανόνες σαρέ ι πραγματένγκε σόσκε κα αγαβέν σαρ σκεφτίνελα ο Ιεχωβά.

13. Σαρ μπορίνενα τι βοηθίνεν-τουμέν ο λατσσέ αμαλά; (Παροιμίες 13:20)

¹³ Τραμπίνεν αμαλέν σο μανγκένα ι Ιεχωβάς. Σαρ ντικχλάμ, ο λατσσέ αμαλά κα βοηθίνεν-τουμέν μπουτ τι αβέν γκοντιαβέρ Χριστιανοί. (Διαβάνεν Παροιμίες 13:​20) Εκ πφεν, η Σάρα, χασαρέλας πι χαρά. Αλλά αβιλό-πες κάτι σο βοηθιντάς-λα τι αλλάνελ. Βόι βακερέλα: «Αρακχλόμ λατσσέ αμαλέν ντιπ κο σωστός σαάτι. Εκχέ τερνέ πφενιάσαρ διαβάναας γιεκ κάθε εβδομάδα ι Σκοπιά. Εκ γιαβέρ αμαλίν βοηθιντάς-μαν τι αρχίναβ τι νταβ απαντήσεις κι συνάθροιση. Μι αμαλένγκε βοηθειάσαρ, αρχισάλομ τι σικλιαράβ-μαν κατά Γραφή ντα τι προσευχίντιβαβ πο λατσσές. Κερντόμ μι φιλία ι Ιεχωβάσαρ πο ζουρανί ντα αρακχλόμ πάλι μι χαρά».

14. Σαρ κερντάς ο Τζούλιεν λατσσέ αμαλέν;

 ¹⁴ Σαρ κα αρακχέν αμαλέν σο κα βοηθίνεν-τουμέν; Ο Τζούλιεν, σο ακανά ισί πρεσβύτερος, βακερέλα: «Κάνα ισινόμας τερνό, κερντόμας λατσσέ αμαλέν σο νικιάβας λέντζαρ κο έργος. Οντουλά αμαλά κερένας ο έργος αντράλ πουμαρέ γκίσταρ, ντα βοηθιντέ-μαν τι ντικχάβ καζόμ σουκάρ ισί ο έργος. Μανγκλόμ τι λαβ ο σκαπανικός. Επίσης, αγαντόμ ότι να τθεράβας μπουτέ λατσσέ αμαλέν σόσκε ρόνταβας σάντε αμαλένγκε σο ισινέ μι ηλικιάτε. Πο σοράν, κερντόμ λατσσέ αμαλέν κο Μπέθελ-ντα. Λένγκο παράδειγμας βοηθιντάς-μαν τι τραμπίναβ πο λατσσί διασκέδαση, ντα ανταβά αντάς-μαν πο πασέ κο Ιεχωβά».

15. Σο βακερντάς ο Παύλος κο Τιμόθεος ι αμαλένγκε; (2 Τιμόθεο 2:​20-22)

¹⁵ Σο κα κερέν άμα αγαντέν ότι εκ τζενό κι κχανγκιρί νανέ λατσσί παρέα τουμένγκε; Ο Παύλος τζανέλας ότι μερικά τζενέ κι πρώτη Χριστιανική κχανγκιρί να ισινέ λατσσές πνευματικά, οτθάρ βακερντάς κο Τιμόθεος τι ατσσόλ ντουρ λένταρ. (Διαβάνεν 2 Τιμόθεο 2:​20-22) Αμαρί φιλία ι Ιεχωβάσαρ ισί μπουτ σημαντική. Δεν πρέπει τι μουκχάς καεκχές τι κερέλ ζιάνι κι φιλία σο μαρντάμ-αμέν αζόμ μπουτ τι τθεράς αμαρέ Νταντέσαρ.​—Ψαλμ. 26:4.

16. Σο στόχους πρέπει τι τραμπίνεν;

¹⁶ Τσσουβέν στόχους σο κα κερέν τουμένγκε λατσσιπέ. Τραμπίνεν στόχους σο κα κερέν ζουρανί τουμαρί πίστη ντα κα βοηθίνεν-τουμέν τι αβέν πο γκοντιαβέρ Χριστιανοί. (Εφεσ. 3:​16) Για παράδειγμας, μπέκιμ τι αποφασίνεν τι κερέν πο λατσσό ο πρόγραμμας σο τθερένα τι σικλιαρέν-τουμέν ντα τι διαβάνεν ι Γραφή. (Ψαλμ. 1:2, 3) Ή μπέκιμ τι αγαβέν ότι πρέπει τι προσευχίντιβεν πο μπουτ φαρ ντα αντράλ τουμαρέ γκίσταρ. Μπέκιμ χρειαζίντιβελα τι ντεν πο μπαρί προσοχή κι διασκέδαση σο τραμπίνενα ντα κο σαάτι σο χαλαβένα λάτε. (Εφεσ. 5:​15, 16) Κάνα ο Ιεχωβά ντικχέλα ότι μαρένα-τουμέν μπουτ τι τζαν ανγκλάλ, αβέλα λέσκο γκι.

17. Σο λατσσιπέ κα ντικχάς άμα βοηθίνασα ι γιαβερέν;

¹⁷ Αβάσα πο γκοντιαβέρ Χριστιανοί κάνα βοηθίνασα ι γιαβερέν. Ο Ιησούς βακερντάς: «Ισί πο ευτυχισμέ εκ τζενό κάνα ντέλα παρά κάνα λέλα». (Πράξ. 20:​35) Κα ντικχέν μπαρό λατσσιπέ άμα ντένα τουμαρέ σαατίσταρ ντα τουμαρέ τερνικανέ ζοριάταρ για τι βοηθίνεν ι γιαβερέν. Για παράδειγμας, μπορίνενα τι τσσουβέν στόχος τι βοηθίνεν ι πφουρέν ντα ι μπίζουρανε τζενέν  τουμαρέ κχανγκιριάτε. Φιρειπείν, μπορίνενα τι κερέν λένγκε ψώνια ή τι βοηθίνεν-λεν με το ηλεκτρονικές συσκευές. Άμα ισινέν μουρσά, τσσουβέν στόχος τι αβέν διακονικοί υπηρέτες για τι υπηρετίνεν τουμαρέ πφραλέν ντα πφενίν. (Φιλιπ. 2:4) Ντα σικαβένα μανγκιπέ οντουλένγκε σο νανέ κι κχανγκιρί κάνα βακερένα λένγκε ο λατσσέ αμπέρια ι Βασιλειάκε. (Ματθ. 9:​36, 37) Άμα αβέλα-πες, τσσουβέν στόχος τι κερέν πο μπουτ πράγματα κι υπηρεσία κι Ιεχωβάσκι.

18. Σαρ κα τζαν ανγκλάλ σαρ Χριστιανοί άμα κα κερέν πο μπουτ πράγματα κι υπηρεσία κι Ιεχωβάσκι;

¹⁸ Άμα κα κερέν πο μπουτ πράγματα κι υπηρεσία κι Ιεχωβάσκι, κα ντιντιόν-τουμέν μπουτ ευκαιρίες τι τζαν ανγκλάλ σαρ Χριστιανοί. Ο σκαπανικός μπέκιμ τι πουτρέλ τουμένγκε ο ντρομ τι νακχέν ι Σχολή για Ευαγγελιστές της Βασιλείας. Μπέκιμ τι μπορίνεν τι υπηρετίνεν κο Μπέθελ ή τι βοηθίνεν τι κερντιόν τθανά για τι ντιντιόλ λατρεία κο Ιεχωβά. Εκ τερνί σκαπάνισσα, η Κέιτλιν, βακερέλα: «Ο σαάτι σο ντάβας κο έργος γκοντιαβέρ πφραλέντζαρ ντα πφενίντζαρ βοηθιντάς-μαν μπουτ τι αβάβ πο πασέ κο Ιεχωβά σοράν μι μπολντιμάσταρ. Λένγκο παράδειγμας τσσιντιντάς-μαν τι σικλιαράβ-μαν πο μπουτ κατά Γραφή ντα τι αβάβ πο λατσσί κο σικλιαριπέ».

19. Καλά ευλογίες κα τθερέν άμα να τσσιναντέν τι τζαν ανγκλάλ σαρ Χριστιανοί;

¹⁹ Άμα να τσσιναντέν τι τζαν ανγκλάλ σαρ Χριστιανοί, κα τθερέν μπουτ ευλογίες. Να κα χαλαβέν τουμαρό τερνιπέ πραγματέντε σο να τθερένα αξία. (1 Ιωάν. 2:​17) Να κα νακχέν ι ντουκχ σο ανένα ο μπέτι αποφάσεις. Οκιά μπάνταρ, κα τθερέν μπαγιά επιτυχία ντα ευτυχία. (Παρ. 16:3) Τουμαρό λατσσό παράδειγμας κα ντελ ζορ τουμαρέ πφραλέν ντα πφενίν, εμ ι χουρντέν εμ ι μπαρέν. (1 Τιμ. 4:​12) Ντα ο πο σημαντικός, κα τθερέν ειρήνη ντα κα αβέν πφερντέ σόσκε κα κερέν ο γκι ι Ιεχωβάσκο ντα κα αβέν λατσσέ αμαλά λέσαρ.​—Παρ. 23:​15, 16.