1. Σο χρειαζίντιβελα τι κεράς για τι ερεσάς μέχρι κο τέλος κι ντρομέσκο, σαρ βακερέλα ο εδάφιος Εβραίους 12:1;

 Η ΑΓΙΑ ΓΡΑΦΗ μοιασκιαρέλα αμαρί Χριστιανική ζωή με εκ αγώνας. Οντουλά σο τθάβντενα ντα ερεσένα μέχρι κο τέλος, κα κερδίνεν ι αιώνια ζωή. (2 Τιμ. 4:7, 8) Χρειαζίντιβελα τι κεράς μπαρέ προσπάθειες για τι συνεχίνας τι τθάβντας, ατζέ πο μπουτ επειδή ο τέλος ι ντρομέσκο ισί μπουτ πασέ. Ο απόστολος Παύλος, σο κερδιντάς κο αγώνας κι ζωγιάκο, σικαντάς σο κα βοηθίνελ-αμέν τι κερδίνας αμέν-ντα. Βακερντάς αμένγκε «τι φουρτίνας οπρ’ αμένταρ κάθε πφαριπέ ντα . . . τι τθάβντας με υπομονή κο αγώνας σο ισί ανγκλ’ αμέντε».​—Διαβάνεν Εβραίους 12:1.

2. Σο μανγκέλα τι βακερέλ «τι φουρτίνας οπρ’ αμένταρ κάθε πφαριπέ»;

² Κάνα ο Παύλος γραφιντάς ότι πρέπει «τι φουρτίνας οπρ’ αμένταρ κάθε πφαριπέ», μήπως μανγκέλας τι βακερέλ ότι σαρ Χριστιανοί δεν πρέπει τι βάντας καέκ φορτίος; Νάα, να μανγκέλας τι βακερέλ ανταβά. Οκιά μπάνταρ, μανγκέλας τι βακερέλ ότι πρέπει τι νασκιαράς σο-ντα πφαριπέ να χρειαζίντιβελα τι βάντας. Εκ ασακό πφαριπέ κα μπορίνελας τι κερέλ-αμέν τι τθάβντας πο δύσκολα ντα τι κχινιαρέλ-αμέν. Για τι νταϊντίνας, πρέπει τι αγαβάς σουγκό σο-ντα πφαριπέ να χρειαζίντιβελα τι βάντας, επειδή ανταβά πφαριπέ κα μπορίνελας τι τσσιναβέλ αμαρί φόρα. Οτθάρ, πρέπει τι φουρτίνας-λες. Βέβαια, δεν πρέπει τι φουρτίνας οπρ’ αμένταρ ο φορτία σο πρέπει τι βάντας. Άμα κα κεράς-λες ανταβά, να κα ατσσάς κο αγώνας. (2 Τιμ. 2:5) Καλά φορτία πρέπει τι βάντας;

3. (α) Σο πρέπει τι βάντας, σαρ βακερέλα ο εδάφιος Γαλάτες 6:​5; (β) Σο κα ντικχάς ανταλέ μαθημάστε, ντα σόσκε;

³ Διαβάνεν Γαλάτες 6:5. Ο Παύλος βακερντάς κάτι σο πρέπει τι βάντας. Γραφιντάς ότι «ο κάθε εκ κα βάντελ πο φορτίος». Οτθέ,  ο Παύλος κερέλας λάφι για το φορτίος σο πρέπει τι βάντελ ο κάθε εκ σαρ υπηρέτης ι Ντεβλέσκο, κάτι σο πρέπει τι κερέλ-λες ο κάθε εκ κορκορό. Ανταλέ μαθημάστε, κα ντικχάς καλά πράγματα ισί κο «φορτίος» αμαρό ντα σαρ μπορίνασα τι βάντας-λες. Επίσης, κα αγαβάς καβά ισί ο πφαριπέ σο να χρειαζίντιβελα τι βάντας, αλλά μπέκιμ τι βάντασα-λες, ντα κα σικλιάς σαρ μπορίνασα τι φουρτίνας-λες οπρ’ αμένταρ. Άμα βάντασα αμαρό φορτίος ντα φουρτίνασα ο πφαριπέ σο να χρειαζίντιβελα τι βάντας, ανταβά κα βοηθίνελ-αμέν τι τθάβντας κο αγώνας κι ζωγιάκο ντα τι κερδίνας.

4. Σόσκε νανέ πφαριπέ ο λάφι σο ντινάμ τι τζουβντιάς ι Ιεχωβάσκε; (Ντικχέν ι φωτογραφία-ντα)

⁴ Ο λάφι σο ντινάμ τι τζουβντιάς ι Ιεχωβάσκε. Κάνα αφιερωντάμ αμαρί ζωή κο Ιεχωβά, ντινάμ αμαρό λάφι ότι κα ντας-λες λατρεία ντα κα κεράς οντουβά σο μανγκέλα. Πρέπει τι ατσσικιαράς αμαρό λάφι. Ισί μπαρί ευθύνη τι τζουβντιάς αντικάς σαρ βακερντάμ κι αφιέρωση αμαρί, αλλά νανέ πφαριπέ. Ανταβά ισί μπαγιά επειδή ο Ιεχωβά δημιουργιντάς-αμέν για τι κεράς οντουβά σο μανγκέλα. (Αποκ. 4:​11) Τσσουντάς αντρ’ αμέντε ι επιθυμία τι σικλιάς λέσκε ντα τι ντας-λες  λατρεία, ντα κερντάς-αμέν τι μοιάζας λέστε. Αντικάς, μπορίνασα τι πλησιάνας-λες ντα τι χαιρίνας κάνα κεράσα οντουβά σο μανγκέλα. (Ψαλμ. 40:8) Επίσης, κάνα κεράσα οντουβά σο μανγκέλα ο Ντεβέλ ντα ακολουθίνασα λέσκε Τσσαβές, “λοκχιόλα” αμαρό γκι.​—Ματθ. 11:​28-30.

5. Σο κα βοηθίνελ-τουμέν τι ατσσικιαρέν τουμαρό λάφι τι τζουβντιόν ι Ιεχωβάσκε; (1 Ιωάννη 5:3)

⁵ Σαρ μπορίνενα τι βάντεν ανταβά φορτίος; Κα βοηθίνεν-τουμέν ντούι πράγματα. Πρώτον, τι κερέν συνέχεια πο ζουρανί τουμαρί αγάπη ι Ιεχωβάσκε. Μπορίνενα τι κερέν-λες ανταβά κάνα σκεφτίνενα λατσσές σαρέ ο λατσσέ πράγματα σο κερντάς τουμένγκε ντα ο ευλογίες σο κα ντελ-τουμέν. Καζόμ πο μπουτ μπαριόλα τουμαρί αγάπη ι Ντεβλέσκε, αζόμ πο εύκολος κα αβέλ τουμένγκε τι ντεν-λες καν. (Διαβάνεν 1 Ιωάννη 5:3) Δεύτερον, τι μοιάζεν κο Ιησούς. Βοβ κερντάς σαρέ οντουλά σο μανγκέλας ο Ντεβέλ επειδή προσευχίντιβελας κο Ιεχωβά τι βοηθίνελ-λες ντα τθερέλας πο γιακχά κο ευλογίες σο κα λέλας. (Εβρ. 5:7· 12:2) Σαρ ο Ιησούς, τι προσευχίντιβεν τουμέν-ντα κο Ιεχωβά για τι ντελ-τουμέν ζορ ντα τι ατσσικιαρέν λατσσές τουμαρέ γκοντιάτε ι ελπίδα σο τθερένα για αιώνια ζωή. Καζόμ μπαριόλα τουμαρί αγάπη ι Ντεβλέσκε ντα μοιάζενα λέσκε Τσσαβέστε, κα μπορίνεν τι ατσσικιαρέν τουμαρό λάφι τι τζουβντιόν ι Ιεχωβάσκε.

6. Σόσκε πρέπει τι κεράς αμαρέ υποχρεώσεις κι φαμιλί; (Ντικχέν ι φωτογραφία-ντα)

⁶ Αμαρέ υποχρεώσεις κι φαμιλί. Κο αγώνας κι ζωγιάκο, πρέπει τι μανγκάς ι Ιεχωβάς ντα ι Ιησούς πο μπουτ αμαρέ τζενένταρ. (Ματθ. 10:​37) Αλλά ανταβά να μανγκέλα τι βακερέλ ότι μπορίνασα τι μουκχάς κι νάκρη ο υποχρεώσεις αμαρέ φαμιλιάκε, σαρ τι αβένας εμπόδιος για τι κεράς ο γκι ι Ντεβλέσκο ντα ι Χριστόσκο. Ίσα ίσα, για τι κεράς ι Ντεβλές ντα ι Χριστός τι χαιρίνεν, χρειαζίντιβελα τι κεράς ι μπουτί σο ντινάς-αμέν ο Ιεχωβά αντρέ κι φαμιλί. (1 Τιμ. 5:4, 8) Άμα κα κεράς-λες ανταβά, κα αβάς πο ευτυχισμέ. Ο Ιεχωβά τζανέλα ότι ο φαμιλιά κα αβέν ευτυχισμέ κάνα ο ζευγάρι σικαβέλα αγάπη ντα σεβασμός ο εκ ι γιαβερέσκε, κάνα ο ντατ ντα η ντάι μανγκένα ντα σικλιαρένα πουμαρέ τσσαβέν ντα κάνα ο τσσαβέ ντένα καν πουμαρέ νταντέστε ντα πουμαρέ νταγιάτε.​—Εφεσ. 5:​33· 6:1, 4.

7. Σαρ μπορίνενα τι κερέν ι μπουτί σο ντινάς-τουμέν ο Ιεχωβά αντρέ κι φαμιλί;

⁷ Σαρ μπορίνενα τι βάντεν ανταβά φορτίος; Καγιά-ντα μπουτί τι ντινάς-τουμέν ο Ιεχωβά αντρέ κι φαμιλί, μα κερέν απλώς οντουβά σο νιωθίνενα ότι ισί σωστός, οντουβά σο ισί συνηθισμέ οτθέ σο μπεσένα ή οντουβά σο βακερένα ο ειδικοί ότι πρέπει τι κερέν, αλλά κερέν ο γκοντιαβέρ συμβουλές ι Γραφιάκε. (Παρ. 24:3, 4) Τι χρησιμοποιήνεν λατσσές αμαρέ εκδόσεις. Οτθέ κα αρακχέν λατσσέ ιδέες σο σικαβένα τουμένγκε σαρ τι εφαρμόνεν ο αρχές ι Γραφιάκε. Για παράδειγμας, η σειρά θεματέντζαρ «Συμβουλές για την Οικογένεια» τθερέλα μπουτ σουκάρ πληροφορίες ι προβληματένγκε σο νακχένα αντιβές ο ζευγάρια, ο νταντά ντα ο νταγιά ντα ο τερνέ. b Τι αβέν αποφασισμέ τι κερέν σο-ντα βακερέλα η Γραφή, ατζέ-ντα άμα γιαβερά τζενέ τουμαρέ φαμιλιάταρ να ντένα καν ανταλέστε. Άμα κα κερέν-λες ανταβά, κα βοηθίντιβελ τουμαρί φαμιλί ντα τουμέν κα τθερέν ι ευλογία ι Ιεχωβάσκι.​—1 Πέτρ. 3:1, 2.

8. Σαρ μπορίνενα τι επηρεάνεν-αμέν αμαρέ αποφάσεις;

⁸ Η ευθύνη σο τθεράσα για το αποφάσεις σο λάσα. Ο Ιεχωβά ντινάς-αμέν εκ δώρος σο ισί η ελευθερία τι τραμπίνας σο κα κεράς, ντα μανγκέλα τι αβάς ευτυχισμέ επειδή λάσα λατσσέ αποφάσεις. Όμως, να αρακχαβέλα-αμέν κατά αποτελέσματα σο αβένα κατά μπέτι αποφάσεις. (Γαλ. 6:7, 8) Οντουλέσκε, δεχτίνασα ο αποτελέσματα κατά μπέτι αποφάσεις σο λιντάμ,  κατά λάφια σο βακερντάμ χωρίς τι σκεφτίνας ντα κατά πράγματα σο κερντάμ σιγκιαριμάσαρ. Μπέκιμ κερντάμ κάτι ντα χάνα-αμέν ο τύψεις. Αλλά επειδή τζανάσα ότι πρέπει τι λας ι ευθύνη για το αποφάσεις αμαρέ, ανταβά μπορίνελα τι τσσίντελ-αμέν τι μουτθαβάς αμαρέ αμαρτίες, τι διορθώνας αμαρέ λάθη ντα τι προσπαθίνας μα τι κεράς-λεν πάλι. Άμα κα κεράς-λεν ανταλά, κα βοηθίντιβας τι ατσσάς κο αγώνας κι ζωγιάκο.

9. Σο μπορίνενα τι κερέν άμα λιντέν εκ μπέτι απόφαση; (Ντικχέν ι φωτογραφία-ντα)

⁹ Σαρ μπορίνενα τι βάντεν ανταβά φορτίος; Άμα να μπορίνενα τι αλλάνεν εκ μπέτι απόφαση, δεχτίνεν ο πράγματα σαρ ισί ακανά. Αγαβέν ότι να μπορίνενα τι αλλάνεν ο παρελθόν. Μα χρησιμοποιήνεν τουμαρό σαάτι ντα τουμαρί ζορ για τι δικαιολογίνεν-τουμέν ή για τι κατηγορίνεν τουμέν ή γιαβερέν για το μπέτι αποφάσεις σο λιντέν. Αντίς ανταλέσκε, δεχτίνεν τουμαρέ λάθη ντα προσπαθίνεν τι κερέν ο πο λατσσό σο μπορίνενα ακανά. Άμα νιωθίνενα τύψεις για κάποιο λάθος σο κερντέν, προσευχίντιβεν ταπεινά κο Ιεχωβά, μουτθαβέν τουμαρό λάθος ντα μανγκέν λέσταρ τι συγχωρίνελ-τουμέν. (Ψαλμ. 25:​11· 51:3, 4) Μανγκέν συγνώμη οντουλένταρ σο μπέκιμ πληγωντέν-λεν, ντα άμα χρειαζίντιβελα, μανγκέν βοήθεια κατά πρεσβύτεροι. (Ιακ. 5:​14, 15) Σικλιόν τουμαρέ λαθίνταρ ντα προσπαθίνεν μα τι κερέν-λεν πάλι. Αντικάς, μπορίνενα τι αβέν σίγουροι ότι ο Ιεχωβά κα τζιτζίνελ τουμένγκε ντα κα στηρίνελ-τουμέν.​—Ψαλμ. 103:​8-13.

10. Σόσκε ισί μπαρό πφαριπέ τι νιωθίνας ότι πρέπει συνέχεια τι κεράς πο μπουτ; (Γαλάτες 6:4)

¹⁰ Κάνα νιωθίνασα ότι πρέπει συνέχεια τι κεράς πο μπουτ. Μπορεί τι αβέλ πφαρό αμένγκε άμα συγκρίνασα αμαρό νεαυτός γιαβερέντζαρ. (Διαβάνεν Γαλάτες 6:4) Άμα συγκρίνασα συνέχεια αμαρό νεαυτός γιαβερέντζαρ, κα μπορίναας τι αρχίνας τι ζηλίνας-λεν ντα τι τζας κόντρα λέντζαρ. (Γαλ. 5:​26) Άμα προσπαθίνασα τι πετυχίνας σο πετυχίνενα ο γιαβερά, παρόλο σο κι πραγματικότητα ανταβά να αβέλα-πες, μπορεί τι κεράς ζιάνι αμαρέ νεαυτόστε. Σκεφτίνεν ακαβά-ντα: Η Γραφή βακερέλα αμένγκε ότι «κάνα εκ τζενό μπεκλεντίνελα εκχέ πραγμάσκε σο να αβέλα νασφάλιβελα λέσκο γκι». Καζόμ πο μπουτ κα νασφάλιβελ αμαρό γκι άμα ανταβά πράγμας να κα μπορίνελας ποτές τι αβέλ-πες! (Παρ. 13:​12) Ανταβά κα μπορίνελας τι λελ αμαρί ζορ ντα τι τσσιναβέλ αμαρί φόρα κο αγώνας κι ζωγιάκο.​—Παρ. 24:10.

11. Σο μπορίνελα τι βοηθίνελ-τουμέν άμα νιωθίνενα ότι πρέπει συνέχεια τι κερέν πο μπουτ;

¹¹ Σαρ μπορίνενα τι φουρτίνεν οπρά-τουμένταρ ανταβά πφαριπέ; Μα μπεκλεντίνεν τουμαρέ νεαυτόσταρ πο μπουτ οντουλένταρ σο μπεκλεντίνελα ο Ιεχωβά. Βοβ ποτές να μπεκλεντίνελα τι ντεν κάτι σο να τθερένα. (2 Κορ. 8:​12) Τι αβέν σίγουροι ότι ο Ιεχωβά να συγκρίνελα οντουλά σο κερένα τουμέν οντουλέντζαρ σο κερένα ο γιαβερά. (Ματθ. 25:​20-23) Ντικχέλα πολύτιμη τουμαρί υπηρεσία σο ντένα αντράλ τουμαρέ γκίσταρ, τουμαρί πίστη ντα τουμαρί υπομονή. Τι αβέν ταπεινοί ντα τι δεχτίνεν ότι τουμαρί ηλικία, τουμαρί υγεία ντα ο πράγματα τουμαρέ ζωγιάτε μπέκιμ τσσουβένα τουμένγκε όρια οντουλέντε σο μπορίνενα τι κερέν ακανά. Σαρ ο Βαρζελαΐ, αντικάς τουμέν-ντα μα σακιντίνεν τι βακερέν όχι σε μερικά προνόμια άμα δυσκολίνελα-τουμέν τουμαρί υγεία ή τουμαρί ηλικία. (2 Σαμ. 19:​35, 36) Σαρ ο Μωυσής, τι δεχτίνεν ι βοήθεια ι γιαβερένγκι ντα τι ντεν ευθύνες κο γιαβερά κάνα ανταβά αβέλα-πες. (Έξοδ. 18:​21, 22) Άμα ισινέν ταπεινοί, να κα νιωθίνεν ότι πρέπει συνέχεια τι κερέν πο μπουτ σόσκε ανταβά κα μπορίνελας τι κερέλ ατζέ πο δύσκολος τουμαρό αγώνας ι ζωγιάκο.

12. Φταίνασα αμέν για το μπέτι αποφάσεις ι γιαβερένγκε; Εξηγίνεν.

¹² Κάνα νιωθίνασα ότι αμέν φταίνασα για το μπέτι αποφάσεις ι γιαβερένγκε. Ναστί λάσα αποφάσεις ι γιαβερένγκε, ούτε μπορίνασα πάντα  τι αρακχαβάς-λεν κατά αποτελέσματα σο ανένα λένγκε μπέτι αποφάσεις. Για παράδειγμας, εκ τσσαβό ή εκ τσσάι μπορεί τελικά τι αποφασίνελ τι τσσιναβέλ τι υπηρετίνελ ι Ιεχωβάς. Ανταγιά απόφαση μπορίνελα τι ανέλ μπαρί ντουκχ κο γκι κι νταντέσκο ντα κι νταγιάκο. Όμως, ο νταντά ντα ο νταγιά σο κατηγορίνενα πουμαρό νεαυτός για τη μπέτι απόφαση σο λιντάς λένγκο τσσαβό βάντενα εκ μπουτ μπαρό πφαριπέ. Εκ πφαριπέ σο ο Ιεχωβά να μπεκλεντίνελα λένταρ τι βάντεν.​—Ρωμ. 14:12.

13. Σο μπορίνενα τι κερέν ο νταντά ντα ο νταγιά άμα λένγκο τσσαβό λιντάς εκ μπέτι απόφαση;

¹³ Σαρ μπορίνενα τι φουρτίνεν οπρά-τουμένταρ ανταβά πφαριπέ; Αγαβέν ότι ο Ιεχωβά ντινάς-αμέν σαριλέν ι ελευθερία τι τραμπίνας σο κα κεράς. Μουκχέλα ι κάθε εκχές τι τραμπίνελ σο κα κερέλ. Επίσης, ο κάθε εκ μπορίνελα τι τραμπίνελ άμα κα υπηρετίνελ-λες. Ο Ιεχωβά τζανέλα ότι να κα αβέν τέλεια νταντά ντα νταγιά. Μανγκέλα απλώς τι κερέν ο πο λατσσό σο μπορίνενα. Τουμαρό τσσαβό τθερέλα ι ευθύνη για την απόφαση σο λιντάς, όχι τουμέν. (Παρ. 20:​11) Όμως, μπορεί τι στεναχωρίντιβενα για το λάθη σο κερντέν καζόμ μπαριαρένας-λες. Άμα αβέλα-πες ανταβά, βακερέν κο Ιεχωβά σαρ νιωθίνενα ντα μανγκέν λέσταρ τι συγχωρίνελ-τουμέν. Βοβ τζανέλα ότι ναστί αλλάνενα οντουβά σο αβιλό-πες. Αλλά ούτε μπεκλεντίνελα τουμένταρ τι αρακχαβέν τουμαρέ τσσαβές για μα τι γκίντελ οντουβά σο φυτιντάς. Ντεν-τουμέν γκοντί ότι, άμα τουμαρό τσσαβό κα κερέλ ατζέ-ντα ι πο χουρντί προσπάθεια τι βουρτίνελ κο Ιεχωβά, Βοβ κα δεχτίνελ-λες παλάλ αντράλ πι γκίσταρ.​—Λουκ. 15:​18-20.

14. Σόσκε ο μπαρέ τύψεις ισί εκ πφαριπέ σο πρέπει τι φουρτίνας οπρ’ αμένταρ;

¹⁴ Κάνα νιωθίνασα μπαρέ τύψεις. Κάνα αμαρτίνασα, ισί λογικός τι νιωθίνας τύψεις. Όμως ο μπαρέ τύψεις ισί εκ πφαριπέ σο ο Ιεχωβά να κα μανγκέλας ποτές τι βάντας. Ισί εκ πφαριπέ σο πρέπει τι φουρτίνας οπρ’ αμένταρ. Σαρ αγαβάσα ότι ο τύψεις σο νιωθίνασα ισί μπαρέ; Άμα μουτθαντάμ αμαρί αμαρτία, μετανιωσάλαμ ντα ακανά κεράσα ο πο λατσσό για μα τι κεράς-λα πάλι, μπορίνασα τι αβάς σίγουροι ότι ο Ιεχωβά συγχωριντάς-αμέν. (Πράξ. 3:​19) Άμα κερντάμ ανταλά τριν βήματα, ο Ιεχωβά να μανγκέλα τι συνεχίνας  τι νιωθίνας τύψεις. Τζανέλα καζόμ μπαρό ζιάνι κερένα ο τύψεις σο να νασένα. (Ψαλμ. 31:​10) Άμα κα χαλ-αμέν η στεναχώρια, μπορεί τι μουκχάς ο αγώνας ι ζωγιάκο.​—2 Κορ. 2:7.

15. Σο μπορίνενα τι κερέν άμα νιωθίνενα μπαρέ τύψεις; (1 Ιωάννη 3:​19, 20) (Ντικχέν ι φωτογραφία-ντα)

¹⁵ Σαρ μπορίνενα τι φουρτίνεν οπρά-τουμένταρ ανταβά πφαριπέ; Κάνα χάνα-τουμέν ο μπαρέ τύψεις, τι ανέν τουμαρέ γκοντιάτε ότι ο Ντεβέλ “συγχωρίνελα μπαγιά”. (Ψαλμ. 130:4) Κάνα βοβ συγχωρίνελα οντουλέν σο μετανιώνενα μπαγιά, ντέλα πο λάφι: «Να κα νταβ-μαν γκοντί λένγκι αμαρτία». (Ιερ. 31:​34) Ανταβά μανγκέλα τι βακερέλ ότι ο Ιεχωβά να κα ανέλ ατζέκ φαρ πι γκοντιάτε τουμαρέ πουρανέ αμαρτίες. Οτθάρ, μα αμντίνεν ότι ο μπέτι αποτελέσματα σο τθερένα ιτιρί τουμαρέ αμαρτιένταρ σικαβένα ότι να συγχωριντάς-τουμέν. Ντα μα χολιάνεν τουμαρέ νεαυτόσκε άμα τουμαρέ πουρανέ αμαρτίες να μουκχένα-τουμέν τι κερέν ακανά οντουλά σο κα μανγκένας κι υπηρεσία κι Ιεχωβάσκι. Ο Ιεχωβά να συνεχίνελα τι σκεφτίνελ τουμαρέ αμαρτίες, ντα ούτε τουμέν πρέπει τι κερέν-λες ανταβά.​—Διαβάνεν 1 Ιωάννη 3:​19, 20.

16. Σο πρέπει τι αγαβάς σαρέ αμέν σο τθάβντασα;

¹⁶ Καζόμ τθάβντασα κο αγώνας κι ζωγιάκο, πρέπει “τι τθάβντας λατσσές για τι λας ο βραβείος”. (1 Κορ. 9:​24) Μπορίνασα τι κεράς-λες ανταβά άμα αγαβάσα ι διαφορά σο τθερέλα ο φορτίος σο πρέπει τι βάντας κατά πφαριπέ σο πρέπει τι φουρτίνας οπρ’ αμένταρ. Ανταλέ μαθημάστε, ντικχλάμ σάντε χάνικ παραδείγματα σο σικαβένα καλά πράγματα πρέπει τι βάντας ντα καλά πράγματα πρέπει τι φουρτίνας. Αλλά κα μπορίναας τι βακεράς γιαβερά-ντα. Ο Ιησούς βακερντάς ότι κα μπορίνελας “τι κχινιόλ αμαρό γκι κατά μπουτ χαμπέ ντα κατά μπουτ πιπέ ντα κατά ανησυχίες ι ζωγιάκε”. (Λουκ. 21:​34) Ανταλά ντα γιαβερά εδάφια μπορίνενα τι βοηθίνεν-τουμέν τι ντικχέν καλά αλλαγές μπέκιμ χρειαζίντιβενα τι κερέν καζόμ τθάβντενα κο αγώνας κι ζωγιάκο.

17. Σόσκε μπορίνασα τι αβάς σίγουροι ότι κα κερδίνας κο αγώνας κι ζωγιάκο;

¹⁷ Μπορίνασα τι αβάς σίγουροι ότι κα κερδίνας κο αγώνας κι ζωγιάκο επειδή ο Ιεχωβά ντέλα-αμέν ι ζορ σο χρειαζίντιβασα. (Ησ. 40:​29-31) Οτθάρ, μα τσσιναβέν τι τθάβντεν φοράσαρ! Τι μοιάζεν κο απόστολος Παύλος, σο μαρντάς-πες για τι λελ ο βραβείος σο ισινέ ανγκλά-λέστε. (Φιλιπ. 3:​13, 14) Καέκ ναστί τθάβντελα κο αγώνας ανταβά τουμένγκε, αλλά ι Ιεχωβάσκε βοηθειάσαρ μπορίνενα τι κερδίνεν. Ο Ιεχωβά κα βοηθίνελ-τουμέν τι βάντεν τουμαρέ φορτία ντα τι φουρτίνεν οπρά-τουμένταρ ο πφαριπέ σο να χρειαζίντιβελα τι βάντεν. (Ψαλμ. 68:​19) Γιεκ ι Ιεχωβάσαρ, κα μπορίνεν τι τθάβντεν τουμαρό αγώνας με υπομονή ντα τι κερδίνεν.