Οντουλέ μαθημάστε, σικλιλάμ ότι, κι πραγματικότητα, ισί σάντε εκ μπαρό ζήτημας σο επηρεάνελα σαρέ ι τζενέν ντα ι αγγελόν: Ανταβά ισί τι αγιάντιβελ ι Ιεχωβάσκο ναβ. Ο ζήτημας της κυριαρχίας, δηλαδή άμα ο τρόπος σο ο Ιεχωβά κερέλα κουμάντος ισί ο πο λατσσό, τθερέλα σχέση με το μπαρό ζήτημας. Αλλά εμ άμα ο τζενέ κα ατσσικιαρέν σαστό πουμαρό γκι λέστε τθερέλα σχέση με το μπαρό ζήτημας.

Σόσκε βακεράσα ακανά ότι ο πο μπαρό ζήτημας τθερέλα τι κερέλ ι Ιεχωβάσκε ναβέσαρ ντα ότι λέσκο ναβ πρέπει τι αγιάντιβελ; Κα ντικχάς τριν λόγους.

Πρώτον, ο Μπενγκ γκιλό κόντρα κο ναβ κι Ιεχωβάσκο, ή γιαβέρτουλους κι φήμη λέσκι, κο κήπος της Εδέμ. Η ερώτηση σο κερντάς πφιρνιμάσαρ ο Μπενγκ κι Εύα μανγκέλας τι σικαβέλ ότι ο Ιεχωβά να ντέλα αντράλ πι γκίσταρ ντα ότι τσσουβέλα πι υπηρετόνγκε κανόνες σο νανέ λογικοί. Σοράν ο Μπενγκ βακερντάς ο αντίθετος οντουλέσταρ σο βακερντάας ο Ιεχωβά, δηλαδή ότι ο Ντεβέλ ισί ψεύτης. Αντικάς, βακερντάς ψέματα για τι χαλαβέλ ι Ιεχωβάσκο ναβ. Αβιλό ο «Διάβολος», σο μανγκέλα τι βακερέλ «οντουβά σο βακερέλα ψέματα για τι χαλαβέλ ι γιαβερένγκο ναβ». (Ιωάν. 8:​44) Επειδή η Εύα πακιαντάς ο ψέματα ι Μπενγκέσκε, να ντινάς καν ι Ντεβλές ντα γκιλί κόντρα κι κυριαρχία λέσκι. (Γέν. 3:​1-6) Μέχρι αντιβές, ο Μπενγκ βακερέλα ψέματα για τι χαλαβέλ ι Ιεχωβάσκο ναβ ντα τι σικαβέλ ότι Λέσκο χαρακτήρας νανέ λατσσό. Ο τζενέ σο πακιάνα οντουλά ψέματα ισί πο εύκολος μα τι ντεν καν ι Ιεχωβάς. Οτθάρ, ο υπηρέτες ι Ιεχωβάσκε πακιάνα ότι ισί μπαρί αδικία σο βακέρντιβενα ψέματα για τι χαλάντιβελ ι Ιεχωβάσκο άγιος ναβ. Ανταβά ισί ο πο μπαρό λόγος σο υπαρχίντιβενα ο βάσανα ντα ο γκεραλιπέ κο ντουνιάς.

Δεύτερον, για τι κερέλ λατσσιπέ σαρί κι δημιουργία, ο Ιεχωβά ισί αποφασισμέ τι δικαιώνελ πο ναβ ντα τι νασκιαρέλ οπρά-λέσταρ σαρί ι λατζ. Ανταβά ισί ο πο σημαντικός ζήτημας ι Ιεχωβάσκε. Άκ’ σόσκε βακερέλα: «Σο-ντα τι αβέλ, κα αγιάναβ μο μπαρό ναβ». (Ιεζ. 36:​23) Ο Ιησούς σικαντάς ξεκάθαρα σο πρέπει τι αβέλ πο σημαντικός κο προσευχές σαρέ ι Ιεχωβάσκε πιστέ υπηρετόνγκε κάνα βακερντάς: «Τι αγιάντιβελ το ναβ». (Ματθ. 6:9) Η Αγία Γραφή σικαβέλα μπουτ φαρ καζόμ σημαντικός ισί τι αγιάντιβελ ο ναβ ι Ιεχωβάσκο. Ντικχέν χάνικ παραδείγματα: «Ντεν κο Ιεχωβά ι δόξα σο αξίνελα λέσκο ναβ». (1 Χρον. 16:​29· Ψαλμ. 96:8) «Γκιλιαβέν ύμνους λέσκε δοξασμέ ναβέστε». (Ψαλμ. 66:2) «Κα ισαράβ το ναβ για πάντα». (Ψαλμ. 86:​12) Εκ φαρ σο ο Ιεχωβά κερντάς λάφι κατά ουρανός ισινέ κι Ιερουσαλήμ, κο ναός, κάνα ο Ιησούς βακερντάς: «Δοξαντόμ-λες ντα κα δοξάναβ-λες πάλι».​—Ιωάν. 12:​28. a

Τρίτον, ο σκοπός ι Ιεχωβάσκο πάντα κα τθερέλ σχέση λέσκε ναβέσαρ, ή γιαβέρτουλους με τη φήμη λέσκι. Σκεφτίνεν: Σαρ κα αβέν ο πράγματα σοράν κατά τελευταία δοκιμασία σο κα αβέλ κι Βασιλεία κι Χριστόσκι σο κα ατσσικιαρέλ χίλια μπρεσά;  Κα συνεχίνεν ο άγγελοι ντα ο τζενέ τι αβέν τρουγιμέ κο μπαρό ζήτημας, σο ισί τι αγιάντιβελ ο ναβ ι Ιεχωβάσκο; Για τι απαντίνας ανταλέ ερωτησιάτε, τι ντας-αμέν γκοντί ο ντούι ζητήματα σο τθερένα σχέση με το μπαρό ζήτημας. Ο εκ ισί άμα ο τζενέ κα ατσσικιαρέν σαστό πουμαρό γκι κο Ντεβέλ ντα ο γιαβέρ ισί κον τθερέλα ο δικαίωμας τι κερέλ κουμάντος σαρό κο ντουνιάς. Αζομάν ο τζενέ να κα χρειαζίντιβελ τι σικαβέν πουμαρί αφοσίωση κο Ιεχωβά. Κα αβέν τέλειοι ντα ντιπ δοκιμασμέ. Κα τθερέν ανγκλά-πουμέντε ζωή για πάντα. Κα συνεχίνεν ο άγγελοι ντα ο τζενέ τι συζητίνεν κον τθερέλα ο δικαίωμας τι κερέλ κουμάντος σαρό κο ντουνιάς ή ατζέ-ντα τι αβέν τρουγιμέ ιτιρί ανταλέσταρ; Νάα. Αζομάν κα αβέλ ντιπ σίγουρος ότι ο τρόπος σο κερέλα κουμάντος ο Ιεχωβά ισί ο πο λατσσό σαριλένταρ. Όμως, σο κα βακεράς ι Ιεχωβάσκε ναβέσκε;

Αζομάν, σαρέ κα τζανέν ι αλήθεια ι Ιεχωβάσκε ντα λέσκο ναβ κα αβέλ ντιπ αγιασμέ. Όμως, κα συνεχίνελ τι αβέλ ο πο σημαντικός πράγμας σαρέ λέσκε υπηρετόνγκε κο ουρανός ντα κι πφουβ. Σόσκε; Επειδή σαρέ κα ντικχέν ι Ιεχωβάς τι συνεχίνελ τι κερέλ μπουτ σουκάρ πράγματα. Σκεφτίνεν: Αφού ο Ιησούς κα ντελ ταπεινά σαρί ι εξουσία κο Ιεχωβά, ο Ντεβέλ κα αβέλ «τα πάντα σαριλένγκε». (1 Κορ. 15:​28) Σοράν ανταλέσταρ, ο τζενέ κι πφουβ κα απολαμβάνεν «ι ελευθερία σο τθερένα με δόξα ο τσσαβέ ι Ντεβλέσκε». (Ρωμ. 8:​21) Ντα ο Ιεχωβά κα κερέλ τι νικιόλ ντιπ μπαγιά λέσκο σκοπός, σο ισί τι γκίντελ σαρέ πι υπηρετόν κο ουρανός ντα κι πφουβ σαρ εκ μπαρί, ενωμέ φαμιλί.​—Εφεσ. 1:10.

Σαρ κα επηρεάνεν ανταλά πράγματα ι φαμιλί ι Ιεχωβάσκι κο ουρανός ντα κι πφουβ; Σίγουρα, κα συνεχίνας τι μανγκάς μπουτ τι δοξάνας συνέχεια ο σουκάρ ναβ ι Ιεχωβάσκο. Ο ψαλμωδός Δαβίδ γραφιντάς ι Ντεβλέσκε πνευμάσαρ: «Δοξασμέ τι αβέλ ο Ιεχωβά Ντεβέλ . . . Σαρέ τι ισαρέν λέσκο δοξασμέ ναβ για πάντα». (Ψαλμ. 72:​18, 19) Καζόμ μπρεσά-ντα τι νακχέν, κα αρακχάς συνέχεια νεβέ ντα μπουτ σουκάρ λόγους τι κεράς-λες ανταβά.

Ο ναβ ι Ιεχωβάσκο σικαβέλα σαρέ ο πράγματα σο τθερένα τι κερέν λέσαρ. Οτθάρ, λέσκο ναβ ανέλα αμαρέ γκοντιάτε πρώτα λέσκι αγάπη. (1 Ιωάν. 4:8) Πάντα κα ντας-αμέν γκοντί ότι η αγάπη τσσιντιντάς ι Ιεχωβάς τι δημιουργίνελ-αμέν, τι ντελ ο λύτρος ντα τι σικαβέλ ότι ο τρόπος σο κερέλα κουμάντος ισί δίκαιος. Αλλά κα ντικχάς συνέχεια ι Ιεχωβάς τι σικαβέλ μπαρί αγάπη κι δημιουργία λέσκι. Καζόμ μπρεσά-ντα τι νακχέν, κα μανγκάς τι πλησιάνας ατζέ πο μπουτ αμαρέ Νταντές ντα τι γκιλιαβάς ύμνους λέσκε δοξασμέ ναβέστε.​—Ψαλμ. 73:28.