1. Σαρ κα σικλιάς τι μπεϊντίνας τι σικλιαράς-αμέν κατά προφητείες ι Γραφιάκε;

 «ΜΠΕΪΝΤΙΝΑΒΑ μπουτ τι σικλιαράβ-μαν κατά προφητείες ι Γραφιάκε», βακερέλα εκ τερνό πφραλ, ο Μπεν. Τουμέν, συμφωνίνενα λέσαρ; Ή μήπως νιωθίνενα ότι ισί μπουτ δύσκολος τι αγαβέν ο προφητείες; Μπορεί ατζέ-ντα τι αμντίνεν ότι ισί βαρετός τι σικλιαρέν-τουμέν κατά προφητείες. Άμα όμως κα σικλιόν σόσκε ο Ιεχωβά γραφιντάς-λεν πι Λαφίστε, μπέκιμ τι αλλάνεν γνώμη.

2. Σο κα ντικχάς ανταλέ μαθημάστε;

² Ανταλέ μαθημάστε, κα ντικχάς σόσκε πρέπει τι σικλιάς ο προφητείες ι Γραφιάκε ντα σαρ μπορίνασα τι σικλιαράς-αμέν λένταρ. Σοράν, κα εξετάνας ντούι προφητείες κατά βιβλίος του Δανιήλ σο κα βοηθίνεν-αμέν ακανά άμα κα αγαβάς-λεν.

3. Σο χρειαζίντιβελα τι κεράς για τι αγαβάς ο προφητείες ι Γραφιάκε;

³ Για τι αγαβάς ο προφητείες ι Γραφιάκε, χρειαζίντιβελα τι μανγκάς βοήθεια. Σκεφτίνεν ακαβά παράδειγμας: Ανέν τουμαρέ γκοντιάτε ότι τζάνα εκχέ τθανέστε σο να τζανένα, αλλά εκ τουμαρέ αμαλένταρ σο κερέλα ταξίδι τουμέντζαρ τζανέλα λατσσές οντιά περιοχή. Τζανέλα ακριβώς κάι ισινέν ντα κάι γκερέλα ο κάθε ντρομ. Σίγουρα, κα αβέλας τουμαρό γκι σο μανγκλάς τουμαρό αμάλ τι αβέλ τουμέντζαρ! Αντικάς ο Ιεχωβά-ντα τζανέλα καλέ βακιτίστε τζουβντιάσα ντα σο ισί ανγκλάλ αμαρέ ντρομέστε. Οτθάρ, για τι αγαβάς ο προφητείες ι Γραφιάκε, πρέπει τι μανγκάς ταπεινά ι Ιεχωβάσκι βοήθεια.​—Δαν. 2:​28· 2 Πέτρ. 1:​19, 20.

4. Σόσκε κανονιντάς ο Ιεχωβά τι γραφίντιβεν προφητείες λέσκε Λαφίστε; (Ιερεμίας 29:​11) (Ντικχέν ι φωτογραφία-ντα)

⁴ Σαρ κάθε λατσσό ντατ ντα κάθε λατσσί ντάι, αντικάς ο Ιεχωβά-ντα μανγκέλα λέσκε τσσαβέ τι τθερέν εκ ευτυχισμέ μέλλον. (Διαβάνεν Ιερεμίας 29:​11) Αλλά ο Ιεχωβά μπορίνελα τι βακερέλ αμένγκε ακριβώς σο κα αβέλ-πες ανγκλ’ αμέντε, κάτι σο  ναστί κερέλα-λες αμαρό ντατ ντα αμαρί ντάι. Κανονιντάς τι γραφίντιβεν προφητείες λέσκε Λαφίστε για τι τζανάς ο σημαντικά πράγματα πριν τι αβέν-πες. (Ησ. 46:​10) Ο προφητείες ι Γραφιάκε ισί μπουτ σουκάρ δώρα αμαρέ Νταντέσταρ σο ισί κο ουρανός. Σαρ όμως μπορίνενα τι αβέν σίγουροι ότι οντουλά σο βακερέλα η Γραφή ότι κα αβέν-πες κα νικιόν μπαγιά;

5. Σο μπορίνελα τι σικλιόλ εκ τερνό κατά εμπειρία του Μαξ;

⁵ Κο σχολείος, αμαρέ τερνέ μπουτ φαρ ισί αντρέ τζενέντε σο τθερένα χάνικ ή ιτς σεβασμός ι Γραφιάκε. Οντουλά τζενέ βακερένα ντα κερένα πράγματα σο μπορεί τι τσσουβέν αμφιβολίες κι γκοντί εκχέ τερνέ Μαρτυράσκι. Ντικχέν ι εμπειρία εκχέ πφραλέσκι, του Μαξ, σο βακερέλα: «Κάνα ισινόμας έφηβος, αρχισάλομ τι τθεράβ αμφιβολίες ντα μα τι αβάβ σίγουρος ότι μο ντατ ντα μι ντάι σικλιαρένας-μαν ι αληθινή θρησκεία ντα ότι η Αγία Γραφή ισί κατά Ντεβέλ». Σο κερντάς λέσκο ντατ ντα λέσκι ντάι; Βοβ βακερέλα: «Λένγκι αντίδραση ισινέ ήρεμη, παρόλο σο τζανάβα ότι ανησυχισάλε». Ο ντατ ντα η ντάι του Μαξ απαντιντέ λέσκε ερωτησιέντε αντράλ κατά Γραφή. Αλλά κερντάς κάτι ο Μαξ-ντα. «Μπεσλόμ κορκορό ντα σικλιαρντόμ-μαν κατά προφητείες ι Γραφιάκε», βακερέλα ο Μαξ, «ντα κερντόμ λάφι οντουλένγκε σο σικλιλόμ γιαβερέ τερνέντζαρ». Καβά ισινέ ο αποτέλεσμας; Ο Μαξ συνεχίνελα: «Σοράν ανταλέσταρ, ισινόμας σίγουρος ότι η Αγία Γραφή ισί κατά Ντεβέλ!»

6. Σο χρειαζίντιβελα τι κερέν άμα τθερένα αμφιβολίες, ντα σόσκε;

⁶ Άμα, σαρ ο Μαξ, αρχίνενα τι τθερέν αμφιβολίες ντα μα τι αβέν σίγουροι ότι η Γραφή βακερέλα ι αλήθεια, να χρειαζίντιβελα τι νιωθίνεν τύψεις. Χρειαζίντιβελα όμως τι κερέν κάτι ανταλέσκε. Η αμφιβολία ισί σαρ ι σκουριά. Άμα να κα τσσουβάς λάκε σημασία, μπορεί χάνικ χάνικ τι καταστραφίνελ κάτι πολύτιμος. Για τι αρχίνεν τι νικαβέν ι σκουριά, σο μπορίνελα τι καταστραφίνελ τουμαρί πίστη, χρειαζίντιβελα τι πουτσέν-τουμέν: “Πακιάβα οντουλά σο βακερέλα η Γραφή για το μέλλον;” Άμα να ισινέν σίγουροι, χρειαζίντιβελα τι σικλιαρέν-τουμέν κατά προφητείες ι Γραφιάκε σο ήδη αβιλέ-πες. Σαρ μπορίνενα τι κερέν-λες ανταβά;

7. Σαρ κερντάς ο Δανιήλ, σαρ μπορίνασα αμέν-ντα τι σικλιαράς-αμέν κατά προφητείες; (Δανιήλ 12:​10) (Ντικχέν ι φωτογραφία-ντα)

⁷ Ο Δανιήλ σικαντάς πι παραδειγμάσαρ σαρ τι σικλιαράς-αμέν κατά προφητείες. Διαβάνελας ο προφητείες για το σωστός λόγος, για τι σικλιόλ ι αλήθεια. Ο Δανιήλ ισινέ επίσης ταπεινός. Τζανέλας ότι ο Ιεχωβά κα βοηθίνελας-λες τι αγαβέλ ο προφητείες άμα κα ατσσόλας πασέ λέστε ντα άμα κα ντέλας-λες καν. (Δαν. 2:​27, 28· διαβάνεν Δανιήλ 12:​10) Ο Δανιήλ σικαβέλας ότι ισινέ ταπεινός επειδή στηρίντιβελας κο Ιεχωβά για βοήθεια. (Δαν. 2:​18) Επίσης, ο Δανιήλ σικλιαρέλας-πες προσεκτικά. Ρόντελας κο Γραφές σο υπαρχίντιβενας αζομάν. (Ιερ. 25:​11, 12· Δαν. 9:2) Σαρ μπορίνενα τι μοιάζεν κο Δανιήλ;

8. Σόσκε μερικοί να μανγκένα τι πακιάν ότι ο προφητείες ι Γραφιάκε νικιόνα μπαγιά, αλλά σο πρέπει τι κεράς αμέν;

⁸ Σκεφτίνεν άμα σικλιαρένα-τουμέν κατά προφητείες για το σωστός λόγος. Κερένα-λες ανταβά επειδή μανγκένα μπαγιά τι σικλιόν ι  αλήθεια; Άμα βα, ο Ιεχωβά κα βοηθίνελ-τουμέν. (Ιωάν. 4:​23, 24· 14:​16, 17) Καβά ισί εκ γιαβέρ λόγος σο κα μπορίνελας εκ τζενό τι σικλιαρέλ-πες κατά προφητείες; Μερικοί κερένα-λες ανταβά σόσκε προσπαθίνενα τι σικαβέν ότι η Γραφή νανέ κατά Ντεβέλ. Αμντίνενα ότι, άμα η Γραφή νανέ κατά Ντεβέλ, τθερένα ο δικαίωμας τι αποφασίνεν κορκορέ καβά ισί ο σωστός ντα καβά ισί ο λάθος, ντα τι τζουβντιόν σαρ μανγκένα βον. Αμέν όμως, χρειαζίντιβελα τι σικλιαράς-αμέν κατά προφητείες για το σωστός λόγος. Επίσης, για τι αγαβάς ο προφητείες ι Γραφιάκε, χρειαζίντιβασα εκ σημαντική ιδιότητα.

9. Καγιά ιδιότητα χρειαζίντιβελα για τι αγαβάς ο προφητείες ι Γραφιάκε; Εξηγίνεν.

⁹ Τι αβέν ταπεινοί. Ο Ιεχωβά ντέλα πο λάφι τι βοηθίνελ ι ταπεινέ τζενέν. (Ιακ. 4:6) Οτθάρ, χρειαζίντιβελα τι προσευχίντιβας για τι βοηθίνελ-αμέν τι αγαβάς ο προφητείες ι Γραφιάκε. Πρέπει επίσης τι δεχτίνας ότι χρειαζίντιβασα ι βοήθεια κατά πιστός δούλος, σο χρησιμοποιήνελα-λες ο Ιεχωβά, για τι ντελ-αμέν ο πνευματικός χαμπέ κο σωστός σαάτι. (Λουκ. 12:​42) Ο Ιεχωβά ισί Ντεβέλ σο κερέλα σαρέ ο πράγματα εκχέ σειράσαρ, άρα ισί λογικός τι χρησιμοποιήνελ σάντε ι πιστέ δουλός για τι βοηθίνελ-αμέν τι αγαβάς ο αλήθειες σο ισί λέσκε Λαφίστε.​—1 Κορ. 14:​33· Εφεσ. 4:​4-6.

10. Σο σικλιόνα κατά εμπειρία της Έστερ;

¹⁰ Τι σικλιαρέν-τουμέν προσεκτικά. Τραμπίνεν εκ προφητεία σο μπεϊντίνενα ντα ρόντεν πρώτα λάκε. Ανταβά κερντάς εκ πφεν, η Έστερ. Μπεϊντίνελας ο προφητείες σο βακερένας ότι κα αβέλας ο Μεσσίας. Η Έστερ βακερέλα: «Κάνα ισινόμας 15 μπρεσένγκι, αρχισάλομ τι ρόνταβ πράγματα σο σικαβένα ότι οντουλά προφητείες γραφίντιλε μπαγιά πριν τι αβέλ ο Ιησούς». Κάνα διαβαντάς για το Ρόλοι της Νεκράς Θάλασσας, νασλέ σαρέ λάκε αμφιβολίες. «Μερικοί λένταρ γραφίντιλε πριν τι αβέλ ο Χριστός», βακερέλα η Έστερ, «άρα ο προφητείες σο τθερένας ισινέ σίγουρα κατά Ντεβέλ». Βέβαια, βακερέλα: «Κάποια πράγματα χρειαζίντιλο τι διαβάναβ-λεν μπουτ φαρ για τι αγαβάβ-λεν». Αλλά αβέλα λάκο γκι σο κερντάς ανταγιά προσπάθεια. Αφού σικλιαρντάς-πες προσεκτικά μπερεκέτι προφητειένταρ, βακερέλα: «Μπορισάλομ η ίδια τι ντικχάβ καθαρά ότι οντουλά σο βακερέλα η Αγία Γραφή ισί μπαγιά!»

11. Σαρ βοηθίντιβασα κάνα ισινάμ σίγουροι ότι οντουλά σο βακερέλα η Γραφή ισί μπαγιά;

¹¹ Κάνα ντικχάσα σαρ νικίστιλε μπαγιά μερικές προφητείες σο ισί κο Λάφι κι Ντεβλέσκο, ντάσα μπουτ μπέσα κο Ιεχωβά ντα κο τρόπος σο οδηγίνελα-αμέν. Επίσης, ο προφητείες ι Γραφιάκε βοηθίνενα-αμέν τι ατσσικιαράς τζουβντί αμαρί ελπίδα για το μέλλον, σο-ντα δοκιμασίες τι νακχάσα ακανά. Για τι ντικχάς χάνικ λαφίντζαρ ντούι προφητείες σο γραφιντάς ο Δανιήλ ντα νικιόνα μπαγιά ακανά. Άμα κα αγαβάς-λεν, ανταβά μπορίνελα τι βοηθίνελ-αμέν τι λας γκοντιαβέρ αποφάσεις.

12. Σο μανγκένα τι σικαβέν ο πιντρέ κατά «σίδερος ανακατουμέ κοβλέ τσικάσαρ»; (Δανιήλ 2:​41-43)

¹² Διαβάνεν Δανιήλ 2:​41-43. Κο σουνό σο ντικχλάς ο βασιλιάς Ναβουχοδονόσορας ντα εξηγιντάς ο Δανιήλ, ο πιντρέ ι αγαλμάσκε σο  ντικχλάς ο βασιλιάς ισινέ κερντέ κατά «σίδερος ανακατουμέ κοβλέ τσικάσαρ». Καζόμ ντικχάσα ανταγιά προφητεία γιεκ γιαβερέ προφητειέντζαρ σο ισί κο βιβλία Δανιήλ ντα Αποκάλυψη, αγαβάσα ότι ο πιντρέ μανγκένα τι σικαβέν ι Αγγλοαμερικανική Παγκόσμια Δύναμη, σο ισί ο πο ζουρανέ κυβερνήσεις αμαρέ ντιβεσέντε. Ο Δανιήλ κερέλα λάφι για την παγκόσμια δύναμη ανταγιά ντα βακερέλα ότι «η βασιλεία κα αβέλ εμ ζουρανί εμ μπίζουρανι». Σόσκε όμως εμ μπίζουρανι; Επειδή ο τζενέ, σο ισί η κοβλί τσικ, να μουκχένα ανταγιά παγκόσμια δύναμη τι χρησιμοποιήνελ σαρί πι ζορ, σο ισί σαρ σίδερος. b

13. Καλά σημαντικές αλήθειες σικλιάσα επειδή αγαβάσα ανταγιά προφητεία;

¹³ Σικλιάσα σημαντικές αλήθειες κατά άγαλμας σο ισί κι προφητεία του Δανιήλ, ειδικά κατά πιντρέ ι αγαλμάσκε. Πρώτον, η Αγγλοαμερικανική Παγκόσμια Δύναμη σικαντάς ότι ισί ζουρανί. Για παράδειγμας, κχελντάς σημαντικός ρόλος για τι κερδίντιβεν ο ντούι παγκόσμιοι πόλεμοι. Όμως, ανταγιά παγκόσμια δύναμη χασαρντάς πι ζορ ντα κα συνεχίνελ τι χασαρέλ-λα επειδή ο τζενέ σο ισί οντουλέ τθεμένταρ χάνα-πες εμ ο εκ ι γιαβερέσαρ εμ με την κυβέρνηση. Δεύτερον, η Αγγλοαμερικανική Παγκόσμια Δύναμη κα αβέλ η τελευταία παγκόσμια δύναμη σο κα κυβερνίνελ πριν τι αβέλ η Βασιλεία ι Ντεβλέσκι, σο κα τσσουβέλ τέλος σαρέ κο βασιλείες κι τζενένγκε. Παρόλο σο γιαβερά τθεμά μπορεί μπάζιμα τι τζάνα κόντρα κι Αγγλοαμερικανική Παγκόσμια Δύναμη, να κα περαβέν-λα. Τζανάσα-λες ανταβά επειδή ο «μπαρ», σο μανγκέλα τι βακερέλ ι Βασιλεία ι Ντεβλέσκι, κα νασκιαρέλ ο πιντρέ, ο κομμάτι κατά άγαλμας σο μανγκέλα τι σικαβέλ ι Αγγλοαμερικανική Παγκόσμια Δύναμη.​—Δαν. 2:​34, 35, 44, 45.

14. Σόσκε κα λας γκοντιαβέρ αποφάσεις άμα κα αγαβάς ι προφητεία σο βακερέλα ι πιντρένγκε σο ισί κερντέ κατά σίδερος ντα κατά τσικ;

¹⁴ Ισινέν τουμέν σίγουροι ότι η προφητεία του Δανιήλ ι πιντρένγκε σο ισί κερντέ κατά σίδερος ντα κατά τσικ ισί μπαγιά; Άμα βα, ανταβά κα επηρεάνελ ο τρόπος σο τζουβντιόνα. Να κα μαρέν-τουμέν τι νικαβέν μπουτ λοβέ ή τι τθερέν μπουτ υλικά πράγματα εκχέ ντουνιάστε σο ατζεχάνικ κα καταστραφίντιβελ ντιπ. (Λουκ. 12:​16-21· 1 Ιωάν. 2:​15-17) Άμα κα αγαβέν ανταγιά προφητεία, ανταβά κα βοηθίνελ-τουμέν επίσης τι ντικχέν καζόμ σημαντικός ισί τι βακερέν ντα τι σικλιαρέν ο λατσσέ αμπέρια. (Ματθ. 6:​33· 28:​18-20) Αφού κα σικλιαρέν-τουμέν ανταλέ προφητειάταρ, τι σκεφτίνεν: “Σικαβένα μο αποφάσεις ότι ισινόμ σίγουρος ότι ατζεχάνικ η Βασιλεία ι Ντεβλέσκι κα τσσουβέλ τέλος σαρέ κι τζενένγκε κυβερνήσεις;”

15. Κον ισί «ο βασιλιάς κατά βορράς» ντα «ο βασιλιάς κατά νότος» αντιβές; (Δανιήλ 11:40)

¹⁵ Διαβάνεν Δανιήλ 11:​40. Κο Δανιήλ κεφάλαιος 11, διαβάνασα για ντούι βασιλιάδες, δηλαδή ντούι κυβερνήσεις, σο χάνα-πες κον κα κερέλ κουμάντος σαρό κο ντουνιάς. Κάνα ντικχάσα ανταγιά προφητεία γιεκ γιαβερέ προφητειέντζαρ κι Γραφή, μπορίνασα τι αγαβάς ότι «ο βασιλιάς κατά βορράς» ισί η Ρωσία ντα ο τθεμά σο ισί λάσαρ, ενώ «ο βασιλιάς κατά νότος» ισί η Αγγλοαμερικανική Παγκόσμια Δύναμη. c

16. Καλά δυσκολίες νακχένα οντουλά σο τζουβντιόνα οτθέ σο κερέλα κουμάντος «ο βασιλιάς κατά βορράς»;

¹⁶ Ο υπηρέτες ι Ντεβλέσκε σο τζουβντιόνα οτθέ σο κερέλα κουμάντος «ο βασιλιάς κατά βορράς» νταϊντίνενα μπαρό διωγμός λέσταρ. Μερικέ Μαρτυρέν νταπλέ-λεν ντα τσσουντέ-λεν φυλακή οντουλένγκε σο πακιάνα. Αντίς τι νταρασκιαρέλ αμαρέ πφραλέν, η κόντρα σο τζάλα  λέντζαρ ο «βασιλιάς κατά βορράς» μπαριαρέλα λένγκι πίστη. Σόσκε; Επειδή αμαρέ πφραλά τζανένα ότι ο διωγμός σο νακχέλα ο λαός ι Ντεβλέσκο κερέλα τι νικιόν μπαγιά ο προφητείες του Δανιήλ. d (Δαν. 11:​41) Επειδή τζανάσα ανταβά πράγμας, ατσσικιαράσα ζουρανί αμαρί ελπίδα ντα ατσσάσα πιστοί κο Ιεχωβά.

17. Καλά δυσκολίες νακχλέ ο υπηρέτες ι Ντεβλέσκε οτθέ σο κερέλα κουμάντος «ο βασιλιάς κατά νότος»;

¹⁷ Κο παρελθόν, «ο βασιλιάς κατά νότος»-ντα γκιλό κόντρα κι Ντεβλέσκο λαός. Ανταβά αβιλό-πες, για παράδειγμας, κο Πρώτος Παγκόσμιος Πόλεμος ντα κο Δεύτερος Παγκόσμιος Πόλεμος, κάνα μπουτ πφραλά γκιλέ φυλακή ντα μερικέ τερνέ Μαρτυρέν παλντιντέ-λεν κατά σχολείος επειδή ατσσιλέ ουδέτεροι. Κο τελευταία μπρεσά όμως, η αφοσίωση ι Ιεχωβάσκε Μαρτυρένγκι σο τζουβντιόνα οτθέ σο κερέλα κουμάντος ανταβά βασιλιάς δοκιμάντιβελα γιαβερέ τροπόντζαρ. Για παράδειγμας, πριν κατά εκλογές, εκ Χριστιανός μπέκιμ τι τζαλ κο πειρασμός τι στηρίνελ εκ πολιτικός κόμμας ή εκχέ συγκεκριμέ βουλευτής. Μπορεί μα τι ερεσέλ κο σημείος τι ψηφίνελ, αλλά πι γκοντιάτε ντα πι γκίστε τι τσσίντελ λένταρ. Καζόμ σημαντικός  ισί τι ατσσάς πολιτικά ουδέτεροι, όχι σάντε οντουλέντζαρ σο κεράσα, αλλά εμ οντουλέντζαρ σο σκεφτίνασα ντα νιωθίνασα!​—Ιωάν. 15:​18, 19· 18:36.

18. Σο κεράσα κάνα ο «βασιλιάς κατά βορράς» ντα ο «βασιλιάς κατά νότος» τζάλα κόντρα ο εκ ι γιαβερέσαρ; (Ντικχέν ι φωτογραφία-ντα)

¹⁸ Οντουλά σο να τθερένα πίστη κο προφητείες κι Γραφιάκε μπέκιμ τι ανησυχίνενα μπουτ κάνα ντικχένα ι «βασιλιάς κατά βορράς» ντα ι «βασιλιάς κατά νότος» τι «ντεν ο εκ ι γιαβερές πουμαρέ σινγκέντζαρ». (Δαν. 11:​40, υποσ.) Ο ντούι-ντα βασιλιάδες τθερένα μπερεκέτι πυρηνικά όπλα για τι νασκιαρέν κάθε ζωή κατά πφουβ. Αλλά τζανάσα ότι ο Ιεχωβά να κα μουκχέλ τι αβέλ-πες κάτι ασακό. (Ησ. 45:​18) Οτθάρ, αντίς η κόντρα σο τθερένα ανταλά ντούι βασιλιάδες τι ανέλ αμένγκε ανησυχία, κερέλα πο ζουρανί αμαρί πίστη. Ντέλα-αμέν τι αγαβάς ότι ο τέλος ανταλέ ντουνιάσκο ισί πασέ.

19. Σο πρέπει τι αγαβάς κο πράγματα σο τθερένα τι κερέν με το προφητείες ι Γραφιάκε;

¹⁹ Να τζανάσα σαρ κα νικιόν μπαγιά μερικές προφητείες ι Γραφιάκε. Ατζέ-ντα ο προφήτης Δανιήλ να αγαβέλας σο μανγκένας τι βακερέν σαρέ οντουλά σο γραφίνελας. (Δαν. 12:8, 9) Αλλά επειδή αμέν να αγαβάσα σαρ ακριβώς κα νικιόλ μπαγιά εκ προφητεία, ανταβά να μανγκέλα τι βακερέλ ότι να κα νικιόλ μπαγιά. Ισινάμ σίγουροι ότι ο Ιεχωβά κα μουτθαβέλ αμένγκε σο-ντα χρειαζίντιβελα τι τζανάς ακριβώς κο σωστός βακίτι, σαρ κερντάς κο πουρανέ-ντα μπρεσά.​—Αμώς 3:7.

20. Καλά σουκάρ προφητείες ι Γραφιάκε κα ντικχάς ατζεχάνικ τι νικιόν μπαγιά, ντα σο πρέπει τι συνεχίνας τι κεράς;

²⁰ Ο τθεμά κα βακερέν «ειρήνη ντα ασφάλεια». (1 Θεσ. 5:3) Σοράν, ο κυβερνήσεις ι ντουνιάσκε κα τζαν κόντρα κι ψεύτικη θρησκεία ντα κα καταστραφίνεν-λα. (Αποκ. 17:​16, 17) Σοράν, κα κερέν επίθεση κο λαός κι Ντεβλέσκο. (Ιεζ. 38:​18, 19) Ανταλά πράγματα κα γκερέν αμέσως κο τελευταίος τζένγκι, κο Αρμαγεδδώνας. (Αποκ. 16:​14, 16) Μπορίνασα τι αβάς σίγουροι ότι ανταλά πράγματα κα αβέν-πες ατζεχάνικ. Μέχρι τι αβέλ-πες ανταβά όμως, τι συνεχίνας τι σικαβάς αμαρί εκτίμηση αμαρέ λατσσέ Νταντέσκε σο ισί κο ουρανός καζόμ πακιάσα ότι ο προφητείες ι Γραφιάκε ισί σημαντικές ντα βοηθίνασα γιαβερέν-ντα τι πακιάν ο ίδιος.