1. Σόσκε εκτιμίνενα ι τζενέν σο κερένα υπομονή;

 ΣΑΡΕ εκτιμίνασα ι τζενέν σο κερένα υπομονή. Σόσκε; Σεβάνασα οντουλέν σο μπορίνενα τι μπεκλεντίνεν εκχέ πραγμάσκε χωρίς τι νευριάνεν. Κάνα κεράσα λάθη, εκτιμίνασα σο ο γιαβερά κερένα υπομονή αμέντζαρ. Ντα εκτιμίνασα σο ο πφραλ σο κερντάς-αμέν μελέτη κερντάς αμέντζαρ υπομονή καζόμ μαράας-αμέν τι σικλιάς, τι δεχτίνας ή τι κεράς αμαρέ ζωγιάτε εκ σικλιαριπέ ι Γραφιάκο. Πο μπουτ σαριλένταρ, ισινάμ πφερντέ εκτίμηση ι Ιεχωβά Ντεβλέσκε σο κερέλα υπομονή αμέντζαρ!​—Ρωμ. 2:4.

2. Καλέ περιπτωσιέντε μπέκιμ ισί δύσκολος αμένγκε τι κεράς υπομονή;

² Παρόλο σο εκτιμίνασα ι υπομονή ι γιαβερένγκι, μπέκιμ νανέ πάντα εύκολος αμένγκε τι κεράς υπομονή. Για παράδειγμας, μπέκιμ ισί δύσκολος αμένγκε τι ατσσάς ήρεμοι άμα κολλισάλαμ κι κίνηση, ντα ατζέ πο μπουτ άμα αργισάλαμ. Μπέκιμ χολιάνασα κάνα ο γιαβερά νευριάνενα-αμέν. Ντα, κάποιες φαρ, μπέκιμ ισί δύσκολος τι συνεχίνας τι μπεκλεντίνας ι νεβέ ντουνιάσκε σο ντινάς πο λάφι τι ανέλ ο Ιεχωβά. Κα μανγκένας τι τθερέν πο μπουτ υπομονή; Ανταλέ μαθημάστε, κα ντικχάς σο μανγκέλα τι βακερέλ τι κεράς υπομονή ντα σόσκε ανταβά ισί αζόμ σημαντικός. Επίσης, κα εξετάνας σο μπορίνελα τι βοηθίνελ-αμέν τι σικλιάς τι τθεράς πο μπουτ υπομονή.

3. Σαρ αντιδράνελα ο τζενό σο κερέλα υπομονή κάνα ο γιαβερά ενοχλίνενα-λες;

³ Ντικχέν σταρ τρόπους σο μπορίνασα τι κεράς υπομονή. Πρώτον, ο τζενό σο κερέλα υπομονή να χολιάνελα εύκολα. Κάνα ο γιαβερά κερένα κάτι για τι ενοχλίνεν-λες, ατσσόλα ήρεμος ντα να κερέλα λένγκε ο ίδια. Επίσης, να συμπεριφερίντιβελα μπέτι τροπόσαρ κάνα κάτι ζορισκιαρέλα-λες. Ο λάφι «να χολιάνελα εύκολα» αρακχάσα-λες πρώτη φαρ κι Γραφή οτθέ σο βακερέλα ότι ο  Ιεχωβά ισί «Ντεβέλ σο τζιτζίνελα ντα πφαμπόλα ι γιαβερένγκε, σο να χολιάνελα εύκολα, ντα ισί πφερντό αφοσιωμέ αγάπη ντα αλήθεια».​—Έξοδ. 34:6.

4. Σαρ αντιδράνελα ο τζενό σο κερέλα υπομονή κάνα χρειαζίντιβελα τι μπεκλεντίνελ;

⁴ Δεύτερον, ο τζενό σο κερέλα υπομονή μπορίνελα τι μπεκλεντίνελ ήρεμα. Άμα κάτι λέλα πο μπουτ χρόνος οντουλέσταρ σο έπρεπε τι λελ, εκ ασακό τζενό προσπαθίνελα μα τι νευριάνελ ούτε τι χολιάνελ. (Ματθ. 18:​26, 27) Ισί μπουτ περιπτώσεις σο χρειαζίντιβελα τι μπεκλεντίνας ήρεμα. Για παράδειγμας, χρειαζίντιβελα τι ασουνάς με υπομονή κάνα εκ τζενό κερέλα λάφι, χωρίς τι τσσιναβάς-λες. (Ιώβ 36:2) Επίσης, μπέκιμ χρειαζίντιβασα υπομονή κάνα βοηθίνασα εκχέ τζενές σο κεράσα-λες μελέτη τι αγαβέλ εκ σικλιαριπέ ι Γραφιάκο ή τι τσσιναβέλ εκ μπέτι συνήθεια.

5. Καβά ισί εκ γιαβέρ τρόπος για τι κεράς υπομονή;

⁵ Τρίτον, ο τζενό σο κερέλα υπομονή να κερέλα ο πράγματα σιγκιαριντός. Ισί μπαγιά ότι μπάζιμα πρέπει τι κεράς κάποια πράγματα σουγκό. Όμως, κάνα ο τζενό σο κερέλα υπομονή τθερέλα τι κερέλ εκ σημαντική μπουτί, ούτε αρχίνελα-λα σιγκιαριντός ούτε προσπαθίνελα τι μπιτισκιαρέλ-λα σιγκιαριντός. Οκιά μπάνταρ, μπεσέλα χάνικ ντα σκεφτίνελα σο κα κερέλ. Σοράν, ντέλα καζόμ σαάτι χρειαζίντιβελα για τι κερέλ λατσσές ανταγιά μπουτί.

6. Σαρ αντιδράνελα ο τζενό σο κερέλα υπομονή κάνα νακχέλα προβλήματα ή δοκιμασίες;

⁶ Τέταρτον, ο τζενό σο κερέλα υπομονή προσπαθίνελα τι νταϊντίνελ ο προβλήματα χωρίς τι γκρινιάνελ. Βέβαια, νανέ κακός τι πουτράς αμαρό γκι εκχέ λατσσέ αμαλέστε ντα τι βακεράς λέσκε σαρ νιωθίνασα εκχέ προβλημάσκε σο νακχάσα. Όμως, ο τζενό σο κερέλα υπομονή κα σκεφτίνελ σαρέ ο λατσσέ πράγματα πι ζωγιάτε, ντα κα κερέλ ο πο λατσσό σο μπορίνελα για τι συνεχίνελ τι υπηρετίνελ ι Ιεχωβάς χαράσαρ. (Κολ. 1:​11) Σαρ Χριστιανοί, χρειαζίντιβελα τι κεράς υπομονή σαρέ ανταλέ τροπόντζαρ. Σόσκε; Για τι ντικχάς μερικούς λόγους.

7. Σόσκε ισί αζόμ σημαντικός τι νταϊντίνας με υπομονή, σαρ βακερένα ο εδάφια Ιακώβου 5:7, 8; (Ντικχέν ι φωτογραφία-ντα)

⁷ Η υπομονή ισί μπουτ σημαντική για τι σώντιβας. Σαρ ο πιστοί υπηρέτες κο πουρανέ μπρεσά, χρειαζίντιβελα τι μπεκλεντίνας με υπομονή για τι κερέλ ο Ντεβέλ πο υποσχέσεις τι νικιόν μπαγιά. (Εβρ. 6:​11, 12) Η Γραφή μοιασκιαρέλα-αμέν με εκ γεωργός. (Διαβάνεν Ιακώβου 5:7, 8) Ο γεωργός μαρέλα-πες για τι φυτίνελ ντα τι ποτίνελ οντουβά σο σπειριντάς, αλλά να τζανέλα κάνα ακριβώς κα μπαριόν ο σπόροι. Οτθάρ, μπεκλεντίνελα με υπομονή, ντα ισί σίγουρος ότι κα γκίντελ ι σοδειά. Αντικάς αμέν-ντα, ατσσάσα απασχολημέ κο πνευματικά πράγματα, παρόλο σο “να τζανάσα καβά ντιβές αβέλα αμαρό Κύριος”. (Ματθ. 24:​42) Μπεκλεντίνασα με υπομονή, ντα ισινάμ σίγουροι ότι πι βακιτίστε ο Ιεχωβά κα κερέλ τι νικιόν μπαγιά σαρέ λέσκε υποσχέσεις. Άμα κα χασαράς αμαρί υπομονή, μπέκιμ μα τι νταϊντίνας γιαβέρ τι μπεκλεντίνας ντα τι αρχίνας τι νασάς κατά αλήθεια. Ντα μπέκιμ τι αρχίνας τι μανγκάς τι τθεράς πράγματα σο κα ανέν αμένγκε αμέσως χαρά. Άμα όμως τθεράσα υπομονή, κα μπορίνας τι νταϊντίνας μέχρι κο τέλος ντα τι σώντιβας.​—Μιχ. 7:7· Ματθ. 24:13.

8. Σαρ βοηθίνελα-αμέν η υπομονή τι τζας-λεν λατσσές ι γιαβερέντζαρ; (Κολοσσαείς 3:​12, 13)

⁸ Η υπομονή βοηθίνελα-αμέν τι τζας-λεν λατσσές ι γιαβερέντζαρ. Βοηθίνελα-αμέν τι ασουνάς προσεκτικά κάνα κερένα λάφι ο γιαβερά. (Ιακ. 1:​19) Επίσης, η υπομονή ανέλα ειρήνη. Αρακχαβέλα-αμέν για μα τι κεράς κάτι σιγκιαριντός ούτε τι κεράς λάφι σκληρέ τροπόσαρ κάνα ισινάμ πιεσμέ. Ντα άμα σικαβάσα υπομονή, να κα χολιάνας εύκολα κάνα εκ τζενό πληγώνελα-αμέν. Αντίς τι κεράς λέσκε αμέν-ντα ο ίδια, “κα νταϊντίνας ο εκ ι γιαβερές ντα κα συγχωρίνας ο εκ ι γιαβερές αντράλ αμαρέ γκίσταρ”.​—Διαβάνεν Κολοσσαείς 3:​12, 13.

9. Σαρ βοηθίνελα-αμέν η υπομονή κάνα χρειαζίντιβελα τι λας αποφάσεις; (Παροιμίες 21:5)

⁹ Η υπομονή βοηθίνελα-αμέν επίσης τι λας πο λατσσέ αποφάσεις. Αντίς τι κεράς κάτι σιγκιαριντός ή τι κεράς σο τσσινέλα αμαρί γκοντί οντιά στιγμή, ντάσα αμαρέ σαατίσταρ για τι σικλιάς καζόμ πο μπουτ πράγματα αβέλα-πες για το επιλογές σο τθεράσα, ντα σοράν τι αποφασίνας καγιά ισί η πο λατσσί. (Διαβάνεν Παροιμίες 21:5) Για παράδειγμας, άμα ρόντασα μπουτιάκε, μπέκιμ τι περάς κο πειρασμός τι δεχτίνας ι πρώτη μπουτί σο κα αρακχάς, ατζέ-ντα άμα ανταβά μανγκέλα τι βακερέλ ότι κα χασαράς μερικές συναθροίσεις ή κα κεράς πο χάνικ πράγματα κο έργος. Όμως, άμα κεράσα υπομονή, κα ντας αμαρέ σαατίσταρ για τι σκεφτίνας πράγματα σαρ ακαλά: καζόμ ντουρ ισί ανταγιά μπουτί, καζόμ σαάτια ισί ντα σαρ κα επηρεάνελ αμαρί φαμιλί ντα αμαρί φιλία ι Ιεχωβάσαρ. Η υπομονή μπορεί τι γλιτώνελ-αμέν από εκ λάθος απόφαση.

10. Σαρ μπορίνελα εκ Χριστιανός τι σικλιόλ τι τθερέλ υπομονή ντα τι ατσσικιαρέλ-λα;

¹⁰ Τι προσευχίντιβεν για πο μπουτ υπομονή. Η υπομονή ισί αντρέ κο καρπός κι πνευμάσκο. (Γαλ. 5:​22, 23) Οτθάρ, μπορίνασα τι προσευχίντιβας για άγιος πνεύμας ντα τι μανγκάς κατά Ιεχωβά τι βοηθίνελ-αμέν τι σικλιάς τι τθεράς ανταβά καρπός. Άμα νακχάσα εκ πρόβλημας σο δοκιμάνελα αμαρί υπομονή, “συνεχίνασα τι μανγκάς” τι βοηθίνελ-αμέν ο άγιος πνεύμας τι κεράς υπομονή. (Λουκ. 11:9, 13) Μπορίνασα επίσης τι μανγκάς κατά Ιεχωβά τι βοηθίνελ-αμέν τι ντικχάς ο πράγματα αντικάς σαρ ντικχέλα-λεν βοβ. Σοράν, χρειαζίντιβελα τι κεράς ο πο λατσσό σο μπορίνασα για τι κεράς υπομονή κάθε ντιβές. Καζόμ πο μπουτ προσευχίντιβασα για υπομονή ντα μαράσα-αμέν τι κεράς υπομονή, αζόμ πο μπουτ κα ασταρέλ ρίζες ανταγιά ιδιότητα  αντρέ αμαρέ γκίστε ντα κα αβέλ εκ με το χαρακτήρας αμαρό.

11, 12. Σαρ σικαντάς υπομονή ο Ιεχωβά;

¹¹ Τι σκεφτίνεν λατσσές παραδείγματα τζενένγκε κατά Γραφή. Η Γραφή τθερέλα μπουτ παραδείγματα τζενένγκε σο σικαβένας υπομονή. Άμα σκεφτίνασα λατσσές ανταλά ιστορίες, σικλιάσα καλέ τροπόντζαρ μπορίνασα τι σικαβάς υπομονή. Πριν τι ντικχάς χάνικ ανταλέ παραδειγματένταρ, τι ντας προσοχή κο πο μπαρό παράδειγμας σο σικαντάς υπομονή, κι Ιεχωβάσκο.

¹² Κο κήπος της Εδέμ, ο Μπενγκ βακερντάς ψέματα για τι χαλαβέλ ι Ιεχωβάσκο ναβ ντα προσπαθιντάς τι σικαβέλ ότι ο Ιεχωβά να κερέλα κουμάντος δίκαιε ντα λατσσέ τροπόσαρ. Αντίς τι καταστραφίνελ αμέσως ι Μπενγκές, ο Ιεχωβά κερντάς υπομονή ντα ατσσικιαρντάς-πες, επειδή τζανέλας ότι κα χρειαζίντιβελας χρόνος για τι σικάντιβελ ότι ο τρόπος σο κερέλα Βοβ κουμάντος ισί ο πο λατσσό. Καζόμ μπεκλεντίνελα, νταϊντίνελα ι λατζ σο αβιλί λέσκε ναβέστε. Επίσης, ο Ιεχωβά μπεκλεντίνελα με υπομονή για τι τθερέν γιαβερά-ντα τζενέ ι ευκαιρία τι λεν αιώνια ζωή. (2 Πέτρ. 3:9, 15) Οτθάρ, εκατομμύρια τζενέ γνωριντέ-λες. Άμα κα τθεράς αμαρέ γιακχά κο λατσσίματα σο αβιλέ επειδή ο Ιεχωβά κερέλα υπομονή, μάλλον κα αβέλ αμένγκε πο εύκολος τι μπεκλεντίνας λέσκε βακιτίσκε για τι ανέλ ο τέλος.

13. Σαρ μοιάζελας ο Ιησούς τέλεια πι Νταντέστε κο τρόπος σο κερέλας υπομονή; (Ντικχέν ι φωτογραφία-ντα)

¹³ Ο Ιησούς μοιάζελα τέλεια πι Νταντέστε κο τρόπος σο κερέλα υπομονή ντα σικαβέλας ανταγιά ιδιότητα κάνα ισινέ κι πφουβ. Μάλλον να ισινέ πάντα εύκολος λέσκε τι κερέλ υπομονή, ειδικά κο γραμματείς ντα κο Φαρισαίοι σο ισινέ υποκριτές. (Ιωάν. 8:​25-27) Όμως, ο Ιησούς να χολιάνελας εύκολα, ακριβώς σαρ να χολιάνελας λέσκο Ντατ-ντα. Να κερέλας  λένγκε ο ίδια κάνα προσβαλίνενας-λες ή προσπαθίνενας τι νευριάνεν-λες. (1 Πέτρ. 2:​23) Ο Ιησούς νταϊντίνελας με υπομονή ο δοκιμασίες χωρίς τι γκρινιάνελ. Άκ’ σόσκε η Γραφή βακερέλα αμένγκε τι “σκεφτίνας λατσσές οντουλές σο νταϊντιντάς αζόμ μπουτ μπέτι λάφια αμαρτωλέ τζενένταρ”! (Εβρ. 12:2, 3) Ι Ιεχωβάσκε βοηθειάσαρ, μπορίνασα αμέν-ντα τι νταϊντίνας με υπομονή σο-ντα δοκιμασία τι νακχάς.

14. Σο σικλιάσα κατά υπομονή σο κερντάς ο Αβραάμ; (Εβραίους 6:​15) (Ντικχέν ι φωτογραφία-ντα)

¹⁴ Σο αβέλα-πες άμα οντουλά σο μπεκλεντίναας για το τέλος να νικίστιλε μπαγιά ατζέκ; Μπέκιμ τι μπεκλεντίναας τι αβέλ ο τέλος πριν από μπουτ βακίτι. Μπέκιμ τι νταράς ότι να κα τζουβντιάς μπουτ για τι ντικχάς-λες. Σο κα βοηθίνελ-αμέν τι συνεχίνας τι μπεκλεντίνας με υπομονή; Ντικχέν ο παράδειγμας του Αβραάμ. Κάνα ο Αβραάμ ισινέ 75 μπρεσένγκο ντα να τθερέλας τσσαβέν, ο Ιεχωβά ντινάς-λες πο λάφι: «Κα κεράβ-τουτ μπαρό λαός». (Γέν. 12:​1-4) Ντικχλάς ο Αβραάμ τι νικιόλ μπαγιά ανταγιά υπόσχεση; Όχι σαρί. Αφού νακχλάς ι λεν Ευφράτης ντα μπεκλεντίνελας 25 μπρεσά, ο Αβραάμ ντικχλάς πι τσσαβές, τον Ισαάκ, τι μπιάντιβελ, ντα ανταβά ισινέ εκ θαύμας. Ντα αφού νακχλέ ατζέκ 60 μπρεσά, μπιάντιλε λέσκε αγγόνια, ο Ησαύ ντα ο Ιακώβ. (Διαβάνεν Εβραίους 6:​15) Αλλά ο Αβραάμ να ντικχλάς ποτές πι προσαγγονίν τι αβέν εκ μπαρό λαός ντα τι λεν ο Υποσχεμέ Τθεμ. Όμως, οντουβά πιστός μουρς τθερέλας εκ μπουτ λατσσί φιλία πι Δημιουργόσαρ. (Ιακ. 2:​23) Ντα κάνα κα αναστίντιβελ, καζόμ κα χαιρίνελ κάνα κα σικλιόλ ότι η πίστη ντα η υπομονή λέσκι αντέ ευλογίες σαρέ ι τθεμένγκε! (Γέν. 22:​18) Σο σικλιάσα αμέν; Μπέκιμ αμέν μα τι ντικχάς ανταγιά στιγμή τι νικιόν μπαγιά σαρέ ο υποσχέσεις ι Ιεχωβάσκε. Άμα όμως κα κεράς υπομονή σαρ κερντάς ο Αβραάμ, μπορίνασα τι αβάς σίγουροι ότι ο Ιεχωβά κα  ευλογίνελ-αμέν ακανά ντα ατζέ πο μπουτ κο νεβό ντουνιάς σο ντινάς πο λάφι ότι κα ανέλ.​—Μάρκ. 10:​29, 30.

15. Σο κα μπορίναας τι ντικχάς κάνα σικλιαράσα-αμέν κατά Γραφή;

¹⁵ Η Γραφή τθερέλα μπουτ γιαβερά-ντα παραδείγματα τζενένγκε σο κερένας υπομονή. (Ιακ. 5:​10) Σόσκε μα τι ντικχέν ασακέ παραδείγματα κάνα σικλιαρένα-τουμέν κατά Γραφή; b Για παράδειγμας, παρόλο σο ο Δαβίδ ισινέ μπουτ τερνό κάνα τραμπίντιλο τι αβέλ βασιλιάς κο Ισραήλ, έπρεπε τι μπεκλεντίνελ μπουτ μπρεσά μέχρι τι αρχίνελ τι κερέλ κουμάντος σαρ βασιλιάς. Ο Συμεών ντα η Άννα ντένας λατρεία κο Ιεχωβά πιστά καζόμ μπεκλεντίνενας τι αβέλ ο Μεσσίας. (Λουκ. 2:​25, 36-38) Καζόμ σικλιαρένα-τουμέν ασακέ ιστοριένταρ, τι ρόντεν ο απαντήσεις ακαλέ ερωτησιέντε: Σο μπέκιμ τι βοηθιντάς ανταλέ τζενές τι κερέλ υπομονή; Σαρ βοηθίντιλο ανταλέσταρ; Σαρ μπορίναβα τι μοιάζαβ λέστε; Κάτι γιαβέρ σο κα βοηθίνελ-τουμέν ισί τι σικλιόν οντουλένγκε σο να κερντέ υπομονή. (1 Σαμ. 13:​8-14) Κα μπορίνενας τι πουτσέν-τουμέν: “Σο κερντάς-λεν μα τι σικαβέν υπομονή; Καλά μπέτι αποτελέσματα τθερένας επειδή να σικαντέ υπομονή;”

16. Σαρ βοηθίντιβασα κάνα κεράσα υπομονή;

¹⁶ Τι σκεφτίνεν σαρ βοηθίνελα-τουμέν η υπομονή. Κάνα σικαβάσα υπομονή, ισινάμ πο ευτυχισμέ ντα πο ήρεμοι. Οτθάρ, η υπομονή μπορίνελα τι κερέλ λατσσιπέ αμαρέ γκοντιάτε ντα αμαρέ σωμάστε. Κάνα κεράσα υπομονή ι γιαβερέντζαρ, τζάσα-λεν πο λατσσές λέντζαρ. Αμαρί κχανγκιρί ισί πο ενωμέ. Άμα κάποιος κερέλα κάτι για τι ενοχλίνελ-αμέν αλλά αμέν να νευριάνασα εύκολα, να κα μουκχάς ο πρόβλημας τι αβέλ ατζέ πο μπαρό. (Ψαλμ. 37:8, υποσ.· Παρ. 14:​29) Αλλά ο πο σημαντικός ισί ότι, κάνα κεράσα υπομονή, μοιάζασα αμαρέ Νταντέστε σο ισί κο ουρανός ντα πλησιάνασα-λες ατζέ πο μπουτ.

17. Σο πρέπει τι αβάς αποφασισμέ τι κεράς;

¹⁷ Η υπομονή ισί μπαγιά εκ σουκάρ ιδιότητα σο βοηθίνελα-αμέν σαριλέν! Παρόλο σο μπάζιμα νανέ πάντα εύκολος τι κεράς υπομονή, ι Ιεχωβάσκε βοηθειάσαρ, μπορίνασα τι συνεχίνας τι σικλιάς τι τθεράς ανταγιά ιδιότητα. Καζόμ μπεκλεντίνασα με υπομονή ι νεβέ ντουνιάσκε, μπορίνασα τι αβάς σίγουροι ότι «η γιακχ ι Ιεχωβάσκι ντικχέλα οντουλέν σο νταρένα λέσταρ, οντουλέν σο μπεκλεντίνενα λέσκι αφοσιωμέ αγάπη». (Ψαλμ. 33:​18) Οτθάρ, τι αβάς σαρέ αποφασισμέ τι συνεχίνας τι ιριάς ι υπομονή.