1. Σο μανγκέλα τι βακερέλ τι μετανιώνας;

 ΚΑΝΑ κεράσα κάτι λάθος, ισί μπουτ σημαντικός τι μετανιώνας. Κι Γραφή βακερέλα ότι εκ τζενό μετανιώνελα, άμα αρχίνελα τι μισίνελ οντουβά λάθος σο κερντάς, άμα τσσιναβέλα τι κερέλ-λες ντα άμα ισί αποφασισμέ μα τι ξανακερέλ-λες ποτές.​—Ντικχέν κο Γλωσσάριος, ο λάφι «Μετάνοια» κο μπαλαμανές.

2. Σόσκε χρειαζίντιβελα σαρέ τι σικλιάς σο μανγκέλα τι βακερέλ τι μετανιώνας; (Νεεμίας 8:9-11)

² Σαρέ ο τζενέ χρειαζίντιβελα τι σικλιόν σο μανγκέλα τι βακερέλ τι μετανιώνας. Σόσκε; Επειδή σαρέ κεράσα λάθη κάθε ντιβές. Σαρέ αστάρντιβασα κατά Αδάμ ντα κατά Εύα. Οτθάρ ο κάθε εκ αμένταρ λιντάς ι αμαρτία ντα ο μεριπέ. (Ρωμ. 3:23· 5:12) Καέκ να μπορίνελα τι νασέλ ανταλέσταρ. Ατζέ-ντα μπουτ πιστά τζενέ σαρ ο απόστολος Παύλος, μαρένας-πες για τι τζαν κόντρα κι αμαρτία. (Ρωμ. 7:21-24) Μήπως ανταβά όμως μανγκέλα τι βακερέλ ότι πρέπει τι τθεράς συνέχεια εκ μπαρό πφαριπέ για το αμαρτίες σο κερντάμ; Όχι, ο Ιεχωβά συγχωρίνελα-αμέν ντα μανγκέλα τι αβάς χαρούμενοι. Σκεφτίνεν ο παράδειγμας ι Ιουδαιόνγκο κο ντιβεσά κι Νεεμιάσκε. (Διαβάνεν Νεεμίας 8:9-11) Ο Ιεχωβά να μανγκέλας τι αβέν στεναχωριμέ ντα τι κολλίνεν κο αμαρτίες σο κερντέας ανγκλέ. Αλλά μανγκέλας τι αβένας χαρούμενοι καζόμ ντένας-λες λατρεία. Ο Ιεχωβά τζανέλα ότι κάνα μετανιώνασα, ανταβά κερέλα-αμέν τι αβάς χαρούμενοι. Οτθάρ, σικλιαρέλα-αμέν σαρ τι κεράς-λες ανταβά. Άμα μετανιώνασα αμαρέ αμαρτιένγκε, μπορίνασα τι αβάς σίγουροι ότι αμαρό λατσσό Ντατ κα συγχωρίνελ-αμέν.

3. Σο κα ντικχάς ανταλέ μαθημάστε;

³ Σο μανγκέλα τι βακερέλ τι μετανιώνας; Ελάν τι ντικχάς πο μπουτ πράγματα ανταλέσκε. Κο μάθημας ανταβά, κα ντικχάς τριν πράγματα. Πρώτα κα ντικχάς σαρ σικλιαρντάς ο Ιεχωβά ι Ισραηλιτέν τι μετανιώνεν. Σοράν, κα ντικχάς σαρ ο Ιεχωβά ροντιντάς ι  αμαρτωλέ τζενένγκε για τι βοηθίνελ-λεν τι μετανιώνεν. Ντα κο τέλος, κα εξετάνας σαρ ο μαθητές ι Ιησούσκε σικλιλέ καζόμ σημαντικός ισί τι μετανιώνεν.

ΣΑΡ ΣΙΚΛΙΑΡΝΤΑΣ Ο ΙΕΧΩΒΑ Ι ΙΣΡΑΗΛΙΤΕΝ ΤΙ ΜΕΤΑΝΙΩΝΕΝ

4. Σαρ σικλιαρντάς ο Ιεχωβά ι Ισραηλιτέν τι μετανιώνεν;

⁴ Κάνα ο Ιεχωβά ντινάς κο Ισραηλίτες πο νόμοι, βον ντινέ πουμαρό λάφι τι ντεν καν κο νόμοι ανταλά. Αλλά εμ ο Ιεχωβά ντινάς πο λάφι ότι άμα βον κα ντένας καν κο νόμοι ανταλά, κα αρακχαβέλας-λεν ντα κα ευλογίνελας-λεν. Βακερντάς για το νόμοι ανταλά: «Ανταγιά εντολή σο ντάβα-τουτ αντιβές νανέ μπουτ δύσκολη τούκε ούτε αζόμ πφαρί σο ναστί κερέσα-λα». (Δευτ. 30:11, 16) Αλλά άμα βον κα τζάνας κόντρα λέστε, για παράδειγμας άμα κα τραμπίνενας τι ντεν λατρεία γιαβερέ ντεβλέντε, βοβ κα λέλας οπρά-λένταρ πι ευλογία ντα σοράν βον κα τσσίντενας μπουτ. Όμως ανταβά να μανγκέλα τι βακερέλ ότι να κα μπορίνενας τι ξανακερδίνεν ι ευλογία ι Ντεβλέσκι. Κα μπορίνενας τι “βουρτίνεν κο Ιεχωβά, πουμαρέ Ντεβλέστε ντα τι ασουνέν λέσκι φωνή”. (Δευτ. 30:1-3, 17-20) Γιαβερέ λαφίντζαρ, κα μπορίνενας τι μετανιώνεν. Άμα κα κερένας-λες ανταβά, ο Ιεχωβά κα τζάλας πασέ λέντε ντα κα ευλογίνελας-λεν πάλι.

5. Σαρ ο Ιεχωβά σικαβέλας ότι να τσσιναντάς τι βοηθίνελ πι υπηρετόν; (2 Βασιλέων 17:13, 14)

⁵ Ο λαός σο τραμπιντάας ο Ιεχωβά γκιλό λέσαρ κόντρα παλάλ γιαβερέστε. Ντέλας λατρεία ψεύτικε ντεβλέντε ντα κερέλας γιαβερά-ντα μπουτ μπέτι πράγματα. Ο αποτέλεσμας ισινέ τι τσσίντελ μπουτ. Όμως ο Ιεχωβά να τσσιναντάς τι βοηθίνελ πι υπηρετόν για τι ντεν-λες λατρεία πάλι. Μπουτσσαβέλας συνέχεια προφητέν για τι βοηθίνεν ι λαός τι μετανιώνελ ντα τι υπηρετίνελ πάλι ι Ιεχωβάς σαρέ πι γκίσαρ.​—Διαβάνεν 2 Βασιλέων 17:​13, 14.

6. Σαρ ο Ιεχωβά χρησιμοποιηντάς πι προφητέν για τι σικλιαρέλ πι λαός καζόμ σημαντικός ισί τι μετανιώνεν; (Ντικχέν ι φωτογραφία-ντα)

⁶ Ο Ιεχωβά μπουτ φορές χρησιμοποιήνελας πι προφητέν για τι προειδοποιήνελ ντα τι διορθώνελ πι λαός. Για παράδειγμας, ο Ντεβέλ βακερντάς αντράλ κατά Ιερεμίας: «Βούρτινε Ισραήλ σο ισινάν πφαρέ σορέσκο . . . Να κα ντικχάβ-τουτ χολιάσαρ, σόσκε ισινόμ αφοσιωμέ . . . Να κα  ατσσάβ χολιαμέ για πάντα. Σάντε αγάβ το λάθος, σόσκε γκιλάν κόντρα ι Ιεχωβάσαρ». (Ιερ. 3:12, 13) Αντράλ κατά Ιωήλ, ο Ιεχωβά βακερντάς: «Βουρτίνεν μάντε σαρέ τουμαρέ γκίσαρ». (Ιωήλ 2:12, 13) Αντράλ κατά Ησαΐας βακερντάς: «Καθαρίνεν τουμαρό νεαυτός· λεν ανγκλά-μάνταρ ο μπίλατσσε πράγματα σο κερένα· τσσιναβέν τι κερέν ο γκεραλιπέ». (Ησ. 1:16-19) Ντα ο Ιεχωβά πουτσλάς αντράλ κατά Ιεζεκιήλ: «Μήπως μπεϊντίναβα τι μερέλ ο πφιρνό; . . . Να μανγκάβα πο μπουτ τι νασέλ πι ντρομένταρ ντα τι συνεχίνελ τι τζουβντιόλ; Να μανγκάβα τι μερέλ καέκ, . . . οτθάρ βουρτίνεν για τι τζουβντιόν». (Ιεζ. 18:23, 32) Ο Ιεχωβά μπεϊντίνελα τι ντικχέλ ι τζενέν τι μετανιώνεν επειδή μανγκέλα τι συνεχίνεν τι τζουβντιόν για πάντα! Άρα ο Ιεχωβά να μπεσέλα απλά πφαντέ βαστέντζαρ χωρίς τι ντελ κο αμαρτωλοί καέκ βοήθεια. Ακανά κα ντικχάς γιαβερά-ντα παραδείγματα ανταλέσκε.

7. Σο σικλιαρντάς ο Ιεχωβά πι λαός αντράλ κατά παράδειγμας του προφήτη Ωσηέ ντα λέσκε ρομνιάκο;

⁷ Τσσουβέν σημασία ότι ο Ιεχωβά σικλιαρντάς πι λαός αντράλ από εκ αληθινός παράδειγμας​—αντράλ κατά Γόμερ, σο ισινέ η ρομνί του προφήτη Ωσηέ. Αφού κερντάς λουμνιπέ, μουκχλάς τον Ωσηέ εκχέ γιαβερέ μουρσέσκε. Μήπως να αβέλας-πες τι αλλάνελ ανταγιά τζουβέλ; Ο Ιεχωβά, σο διαβάνελα ο γκιά, βακερντάς κο Ωσηέ: «Τζα πάλι, μανγκ ι ρομνιά σο μανγκέλα-λα εκ γιαβέρ μουρς ντα σο κερέλα λουμνιπέ, σαρ ο Ιεχωβά μανγκέλα πι λαός Ισραήλ ενώ βον τζάνα γιαβερέ ντεβλέντε». (Ωσηέ 3:1· Παρ. 16:2) Προσοχίνεν ότι η ρομνί του Ωσηέ ατζέ ατζέ κερέλας ανταγιά σοβαρή αμαρτία. Όμως ο Ιεχωβά βακερντάς κο Ωσηέ τι συγχωρίνελ-λα ντα τι λελ-λα παλάλ για τι συνεχίνελ τι αβέλ λέσκι ρομνί. a Αντράλ ανταλέ παραδειγμάσταρ, ο Ιεχωβά μανγκέλας τι σικαβέλ πι λαόσκε σαρ νιωθίνελας λέσκε. Παρόλο σο συνεχίνενας τι κερέν σοβαρές αμαρτίες, βοβ να τσσιναντάς τι μανγκέλ-λεν ντα συνεχίνελας τι ρόντελ λένγκε ντα τι βοηθίνελ-λεν τι μετανιώνεν ντα τι αλλάνεν πουμαρί ζωή. Μήπως ανταβά παράδειγμας μανγκέλα τι βακερέλ ότι ο Ιεχωβά, σο “ρόντελα ο γκιά”, ρόντελα προσωπικά ι κάθε εκχέ τζενέσκε σο κερέλα εκ σοβαρή αμαρτία ντα προσπαθίνελα τι βοηθίνελ-λες τι μετανιώνελ; (Παρ. 17:3) Για τι ντικχάς-λες.

ΣΑΡ Ο ΙΕΧΩΒΑ ΒΟΗΘΙΝΕΛΑ Ι ΑΜΑΡΤΩΛΕ ΤΖΕΝΕΝ ΤΙ ΜΕΤΑΝΙΩΝΕΝ

8. Σαρ προσπαθιντάς ο Ιεχωβά τι βοηθίνελ τον Κάιν τι μετανιώνελ; (Γένεση 4:3-7) (Ντικχέν ι φωτογραφία-ντα)

⁸ Σαρ ο γιαβερά τσσαβέ του Αδάμ ντα της Εύας, ο Κάιν λιντάς βοβ-ντα πι νταντέσταρ ντα πι νταγιάταρ ι επιθυμία τι κερέλ ο κακός. Όμως, ο Κάιν να μπορισάλο τι κερέλ κουμάντος ανταγιά επιθυμία. Κι Γραφή βακερέλα ότι «οντουλά σο κερέλας βοβ ισινέ πφιρνικανέ». (1 Ιωάν. 3:12) Άκ’ σόσκε «ο Κάιν ντα η θυσία λέσκι να κερντέ ιτς ο γκι ι Ιεχωβάσκο». Αντίς τι αλλάνελ πι συμπεριφορά, «ο Κάιν χολιασάλο μπουτ ντα μουκχλάς πο μούι». Σο κερντάς ο Ιεχωβά σοράν; Κερντάς λάφι με τον Κάιν. (Διαβάνεν Γένεση 4:3-7) Προσοχίνεν ότι ο Ιεχωβά κερντάς λατσσιμάσαρ λάφι κο Κάιν ντα βακερντάς λέσκε ότι κα ευλογίνελας-λες άμα κα κερέλας ο λατσσιπέ. Επίσης, ο Ιεχωβά βακερντάς λέσκε ότι άμα κα συνεχίνελας τι αβέλ χολιαμέ, ανταβά κα οδηγίνελας-λες τι κερέλ κάτι μπέτι. Δυστυχώς, ο Κάιν να μανγκλάς τι ασουνέλ. Να μουκχλάς ι Ιεχωβάς τι βοηθίνελ-λες τι μετανιώνελ. Επειδή ο Κάιν να ασουντάς ι Ντεβλές, μήπως ο Ιεχωβά αποφασιντάς μα τι ξαναβοηθίνελ καεκχές τι μετανιώνελ; Σίγουρα όχι!

9. Σο κερντάς ο Ιεχωβά για τι βοηθίνελ τον Δαβίδ τι μετανιώνελ;

⁹ Ο Ιεχωβά μανγκέλας αντράλ πι γκίσταρ ι βασιλιάς Δαβίδ. Βακερντάς ότι ισινέ εκ “μουρς  αντικάς σαρ μανγκέλα λέσκο γκι”. (Πράξ. 13:22) Όμως ο Δαβίδ κερντάς κάποια μπουτ μπέτι πράγματα. Κερντάς λουμνιπέ ντα μουνταρντάς. Σαρ βακερέλας ο Μωσαϊκός Νόμος, ο Δαβίδ έπρεπε τι μερέλ. (Λευιτ. 20:10· Αριθ. 35:31) Όμως, ο Ιεχωβά μανγκέλας τι βοηθίνελ τον Δαβίδ τι μετανιώνελ. b Μπουτσσαντάς κο βασιλιάς πι προφητής, τον Νάθαν, παρόλο σο ο Δαβίδ να σικαντάας ατζέκ ούτε εκ στάλα ότι μετανιωσάλοας. Ο Νάθαν χρησιμοποιηντάς εκ παράδειγμας για τι ερεσέλ ντιπ κο γκι κι Δαβιδίσκο. Ο Δαβίδ αγαντάς ότι πφανγκλάας μπουτ ο γκι ι Ιεχωβάσκο ντα μετανιωσάλο. (2 Σαμ. 12:1-14) Βοβ γραφιντάς εκ ψαλμός σο σικαβέλα καζόμ μπουτ μετανιωσάλο οντουλένγκε σο κερντάς. (Ψαλμ. 51, επιγραφή) Μπουτ τζενέ σο κερντέ αμαρτία, κάνα διαβάνενα ανταβά ψαλμός, λοκχιόλα λένγκο γκι ντα μετανιώνενα. Ισινάμ μπουτ χαρούμενοι σο ο Ιεχωβά βοηθιντάς πι αγαπημέ υπηρετής, τον Δαβίδ, τι μετανιώνελ!

10. Σαρ νιωθίνενα σο ο Ιεχωβά κερέλα υπομονή ντα συγχωρίνελα-αμέν;

¹⁰ Ο Ιεχωβά μισίνελα σαρέ ο αμαρτίες. (Ψαλμ. 5:4, 5) Όμως, μανγκέλα αμέν, ντα κάνα αμαρτίνασα μανγκέλα τι βοηθίνελ-αμέν. Βοβ πάντα προσπαθίνελα τι βοηθίνελ ι αμαρτωλόν, ατζέ-ντα οντουλέν σο κερένα ο πο μπαρέ αμαρτίες, τι μετανιώνεν ντα τι αβέν πασέ λέστε. Καζόμ μπουτ λοκχιαρέλα-αμέν ανταβά! Κάνα σκεφτίνασα ι υπομονή σο κερέλα ο Ιεχωβά ντα καζόμ μπουτ συγχωρίνελα-αμέν, μανγκάσα τι ατσσάς πιστοί λέστε ντα τι μετανιώνας σουγκό κάνα αμαρτίνασα. Ελάν τι ντικχάς ακανά σαρ σικλιαρντάς ο Ιησούς πι μαθητέν τι μετανιώνεν.

ΣΑΡ ΣΙΚΛΙΛΕ Ο ΜΑΘΗΤΕΣ Ι ΙΗΣΟΥΣΚΕ ΤΙ ΜΕΤΑΝΙΩΝΕΝ

11, 12. Σαρ σικλιαρντάς-αμέν ο Ιησούς ότι η συγχώρηση σο σικαβέλα λέσκο Ντατ ισί κάτι σο νικιόλα λέσταρ τι κερέλ-λες; (Ντικχέν ι φωτογραφία-ντα)

¹¹ Αζομάν σο ισινέ τι αβέλ ο Μεσσίας, ο Ιεχωβά βακερντάς κο Ιωάννης κο Βαφτιστής τι βακερέλ κο λαός τι μετανιώνελ. Κάνα ο Ιησούς αρχινισάλο τι κερέλ πο έργος, βοβ-ντα βακερέλας κο τζενέ καζόμ σημαντικός ισινέ τι μετανιώνεν.​—Ματθ. 3:1, 2· 4:17.

¹² Κάνα ο Ιησούς ισινέ κι πφουβ, σικλιαρντάς ι τζενέν ότι λέσκο Ντατ συγχωρίνελα ι αμαρτωλέ τζενέν ντα ανταβά ισί κάτι σο νικιόλα λέσταρ  τι κερέλ-λες. Εκ τρόπος σο κερντάς-λες ανταβά ισινέ κάνα βακερντάς ι σουκάρ ιστορία ι τσσαβέσκι σο νασλόας πι κχερέσταρ. Ανταβά τερνό μουρς τραμπιντάς τι νασέλ πι κχερέσταρ ντα τι κερέλ μπέτι πράγματα. Όμως, πο σοράν «αγαντάς-πες» ντα βουρτισάλο κχερέ. Σο κερντάς λέσκο ντατ; Ο Ιησούς βακερντάς ότι «ντικχλάς-λες ντουράλ ντα τζιτζισάλο λέσκε, ντα τθαβντισάλο ντα ντινάς-λες ανγκάλι ντα τσσουμιντάς-λες γκουλντές». Ο τσσαβό να μπεκλεντίνελας τι συγχωρίνελ-λες λέσκο ντατ. Οτθάρ πουτσλάς-λες αν κα μπορίνελας τι μπεσέλ σαρ υπηρέτης πασέ λέστε. Αλλά λέσκο ντατ ισινέ έτοιμος τι συγχωρίνελ-λες. Βακερντάς “ακαβά ισί μο τσσαβό” ντα λιντάς-λες παλάλ κο κχερ. Λέσκο ντατ βακερντάς: «Χασάρντιλοας ντα αρακχλάμ-λες». (Λουκ. 15:11-32) Κάνα ο Ιησούς ισινέ κο ουρανός πριν τι γουλίλ κι πφουβ, σίγουρα ντικχλάς καζόμ μπουτ πφαμπόλας λέσκο Ντατ ι αμαρτωλέ τζενένγκε σο μετανιωσάλεας. Ανταγιά ιστορία σο βακερντάς αμένγκε ο Ιησούς λοκχιαρέλα μπαγιά αμαρό γκι ντα σικαβέλα καζόμ μπουτ συγχωρίνελα-αμέν αμαρό Ντατ, ο Ιεχωβά!

13, 14. (α) Σαρ σικλιλό ο απόστολος Πέτρος σο μανγκέλα τι βακερέλ τι μετανιώνελ εκ τζενό; (β) Σο σικλιαρντάς ι γιαβερέν ανταλέσκε; (Ντικχέν ι φωτογραφία-ντα)

¹³ Ο απόστολος Πέτρος σικλιλό κάτι μπουτ σημαντικός κατά Ιησούς. Καζόμ μπουτ συγχωρίνελα ο Ιεχωβά οντουλέν σο μετανιώνενα. Ο Πέτρος κερέλας μπουτ λάθη ντα ο Ιησούς ισινέ έτοιμος τι συγχωρίνελ-λες. Για παράδειγμας, αφού ο Πέτρος βακερντάς ότι να τζανέλας πι Κυριός τριν φαρ, πφαμπιλό λέσκο γκι ιτιρί οντουλέσταρ σο κερντάς. (Ματθ. 26:34, 35, 69-75) Αλλά κάνα ο Ιησούς αναστισάλο, γκιλό κο Πέτρος κάνα ισινέ κορκορό για τι μπορίνελ τι κερέλ λέσαρ λάφι. (Λουκ. 24:33, 34· 1 Κορ. 15:3-5) Ο Ιησούς τζανέλας ότι ο Πέτρος μετανιωσάλο ντα μανγκέλας τι βακερέλ λέσκε ότι συγχωριντάς-λες.

¹⁴ Ο Πέτρος αγαβέλας σαρ νιωθίνελα εκ τζενό σο μετανιωσάλο ντα συγχωρισάλο. Οτθάρ  μπορίνελας τι σικλιαρέλ ι γιαβερέν ανταλέσκε. Κάποια στιγμή σοράν κατά γιορτή της Πεντηκοστής, ο Πέτρος κερντάς εκ ομιλία μερικέ Ιουδαιόντε ντα βακερντάς ότι βον μουνταρντέ τον Μεσσία. Όμως ενθαρρυντάς-λεν ντα βακερντάς λένγκε: «Μετανιώνεν ντα αλλάνεν για τι νασέν ντιπ τουμαρέ αμαρτίες, ντα αντικάς τι αβέν ντιβεσά σο κα λοκχιαρέλ ο Ιεχωβά τουμαρό γκι». (Πράξ. 3:14, 15, 17, 19) Ο Πέτρος σικαντάς ότι εκ αμαρτωλός τζενό μετανιώνελα κάνα αλλάνελα. Ανταβά μανγκέλα τι βακερέλ ότι αλλάνελα ο λάθος τρόπος σο σκεφτίνελα, σταματίνελα τι κερέλ οντουβά μπέτι πράγμας ντα αρχίνελα τι κερέλ οντουβά σο ισί λατσσό. Ο απόστολος Πέτρος σικαντάς επίσης ότι ο Ιεχωβά κα συγχωρίνελας λένγκε αμαρτίες. Κα αβέλ σαρ τι σβήνελα ο αμαρτίες ντα τι εξαφανίντιβενα ντιπ. Ντα μπουτ μπρεσά πο σοράν ο Πέτρος βακερντάς κο Χριστιανοί: «Ο Ιεχωβά . . . κερέλα υπομονή τουμέντζαρ επειδή να μανγκέλα τι καταστραφίντιβελ καέκ τζενό αλλά σαρέ τι μετανιώνεν». (2 Πέτρ. 3:9) Σο σουκάρ ελπίδα ι Χριστιανόνγκε κάνα κερένα αμαρτίες, ατζέ-ντα σοβαρές!

15, 16. (α) Σαρ σικλιλό ο απόστολος Παύλος σο μανγκέλα τι βακερέλ τι συγχωρίντιβελ εκ τζενό; (1 Τιμόθεο 1:12-15) (β) Σο κα ντικχάς κο γιαβέρ μάθημας;

¹⁵ Ο Σαύλος κατά Ταρσό κερντάας μπουτ μπέτι πράγματα. Χάνικ τζενέ κερντέας αζόμ μπουτ μπέτι πράγματα σαρ βοβ. Τζάλας μπουτ μπαρί κόντρα ι Χριστιανόντζαρ. Ο πο μπουτ Χριστιανοί μάλλον πακιάνας ότι ποτές να κα αλλάνελας. Όμως ο Ιησούς τζανέλας ότι ο Σαύλος κα αλλάνελας ντα κα μετανιώνελας. Βοβ ντα λέσκο Ντατ ντικχλέ λατσσέ ιδιότητες κο Σαύλος. Ο Ιησούς βακερντάς: «Τραμπιντόμ-λες με». (Πράξ. 9:15) Ο Ιησούς χρησιμοποιηντάς εκ θαύμας για τι βοηθίνελ ι Σαυλός τι μετανιώνελ. (Πράξ. 7:58–8:3· 9:1-9, 17-20) Αφού αβιλό Χριστιανός, ο Σαύλος βακέρντιλο Παύλος. Μπουτ φορές βοβ βακερέλας καζόμ μπαρί εκτίμηση τθερέλας σο σικάντιλο λέσκε λατσσιπέ ντα συγχωρίντιλο. (Διαβάνεν 1 Τιμόθεο 1:​12-15) Ανταβά απόστολος βακερντάς: «Ο Ντεβέλ πι λατσσιμάσαρ μανγκέλα τι κερέλ-τουτ [τι βοηθίνελ-τουτ] τι μετανιώνες».​—Ρωμ. 2:4.

¹⁶ Σο κερντάς ο Παύλος κάνα ασουντάς ότι κι Κόρινθος ατσσικιαρένας κι κχανγκιρί εκχέ μουρσές σο κερέλας λουμνιπέ; Οντουλένταρ σο βακερντάς μπορίνασα τι σικλιάς σαρ ο Ιεχωβά σικαβέλα αγάπη κάνα διορθώνελα πι υπηρετόν. Επίσης σικλιάσα σαρ συγχωρίνελα-λεν κάνα βον μετανιώνενα. Ντα κα σικλιάς σαρ μπορίνασα τι μοιάζας λέστε. Κο γιαβέρ μάθημας κα ντικχάς σο αβιλό-πες κι κχανγκιρί κι Κόρινθος.