1, 2. (α) Σο ισί αμαρτία, ντα σαρ μπορίνασα τι νικίνας-λα; (Ντικχέν επίσης ο «Σο Μανγκέλα τι Βακερέλ») (β) Σο κα ντικχάς ανταλέ μαθημάστε ντα κο γιαβερά μαθήματα σο ισί κι Σκοπιά ανταγιά; (Ντικχέν επίσης ι «Σημείωση Οντουλένγκε σο Διαβάνενα Ανταγιά Σκοπιά» σο ισί ανταλέ περιοδικόστε)

 ΚΑΖΟΜ μπουτ μανγκέλα-τουμέν ο Ιεχωβά Ντεβέλ; Εκ μπουτ λατσσό τρόπος για τι λεν ι απάντηση ισί τι σικλιόν σο κερντάς ο Ιεχωβά για τι σώνελ-τουμέν κατά αμαρτία ντα κατά μεριπέ. Η αμαρτία a ισί εκ ντουσμάνι σο ανέλα αμένγκε μπαρί ντουκχ ντα σο ναστί νικίνασα-λες κορκορέ. Σαρέ κάθε ντιβές κεράσα αμαρτίες. Ντα ιτιρί κατά αμαρτία μεράσα. (Ρωμ. 5:12) Όμως τθεράσα λατσσέ αμπέρια-ντα. Ι Ιεχωβάσκε βοηθειάσαρ μπορίνασα σίγουρα τι νικίνας ι αμαρτία!

² Ο Ιεχωβά Ντεβέλ για πο μπουτ από 6.000 μπρεσά βοηθίνελα ι τζενέν τι τζαν κόντρα κι αμαρτία. Σόσκε κερέλα-λες ανταβά; Επειδή μανγκέλα-αμέν. Μανγκλάς ι τζενέν από αζομάν σο λατσσαρντάς-λεν. Οτθάρ κερντάς μπουτ πράγματα για τι βοηθίνελ-λεν κάνα αμαρτίνενα. Ο Ντεβέλ τζανέλα ότι η αμαρτία γκερέλα κο μεριπέ ντα βοβ να μανγκέλα τι μεράς. Μανγκέλα τι τζουβντιάς για πάντα. (Ρωμ. 6:23) Άκ’ ανταβά μανγκέλα τουμένγκε-ντα. Ανταλέ μαθημάστε κα ντικχάς τριν ερωτήσεις: (1) Σαρ ο Ιεχωβά ντινάς ελπίδα κο αμαρτωλά τζενέ; (2) Σο κερντέ ο αμαρτωλά τζενέ κο πουρανέ μπρεσά για τι κερέν ι Ιεχωβάσκο  γκι; (3) Σο κερντάς ο Ιησούς για τι σώνελ ι τζενέν κατά αμαρτία ντα κατά μεριπέ;

ΣΑΡ Ο ΙΕΧΩΒΑ ΝΤΙΝΑΣ ΕΛΠΙΔΑ ΚΟ ΑΜΑΡΤΩΛΑ ΤΖΕΝΕ;

3. Σαρ αμαρό πρώτος ντατ ντα αμαρί πρώτη ντάι αβιλέ αμαρτωλοί;

³ Κάνα ο Ιεχωβά κερντάς ι πρώτε μουρσές ντα ι πρώτε τζουβλιά, μανγκλάς τι αβέν χαρούμενοι. Ντινάς-λεν εκ μπουτ σουκάρ κχερ, ο δώρος ι μπιαβέσκο ντα εκ μπουτί σο κα πφερέλας-λεν. Έπρεπε τι πφερένας ι πφουβ πουμαρέ τσσαβέντζαρ ντα τι κερένας-λα παράδεισος σαρ ισινέ ο κήπος της Εδέμ. Ντινάς-λεν σάντε εκ τανί εντολή. Ντα προειδοποιηντάς-λεν ότι άμα κα τραμπίνενας μα τι ντεν καν οντιά εντολή κα μερένας. Τζανάσα σο αβιλό-πες. Εκ πνεύμας σο να ντικχίντιβελας, οντουβά σο να μανγκέλας ι Ντεβλές ή ι τζενέν, τσσουντάς ι Αδαμίς ντα ι Ευά κο πειρασμός μα τι ντεν καν ι Ντεβλές. Ο Αδάμ ντα η Εύα κερντέ ανταβά σο μανγκέλας οντουβά πφιρνό άγγελος, ο Μπενγκ. Να ντινέ μπέσα πουμαρέ λατσσέ Νταντέστε, ντα αμαρτιντέ. Σαρ τζανάσα ο λάφια ι Ιεχωβάσκε νικίστιλε μπαγιά. Επειδή να ντινέ καν, ο Αδάμ ντα η Εύα τσσιντιντέ μπουτ σαρέ πουμαρέ ζωγιάτε. Πφουρίλιλε ντα τελικά μουλέ.​—Γέν. 1:28, 29· 2:8, 9, 16-18· 3:1-6, 17-19, 24· 5:5.

4. Σόσκε ο Ιεχωβά μισίνελα ι αμαρτία ντα βοηθίνελα-αμέν τι τζας λάσαρ κόντρα; (Ρωμαίους 8:20, 21)

⁴ Ο Ιεχωβά τσσουντάς ανταγιά ιστορία κι Αγία Γραφή για τι σικλιάς κάτι σημαντικός. Βοηθίνελα-αμέν τι αγαβάς σόσκε μισίνελα αζόμ μπουτ ι αμαρτία. Η αμαρτία χαλαβέλα αμαρί φιλία ι Ιεχωβάσαρ ντα γκερέλα-αμέν κο μεριπέ. (Ησ. 59:2) Ο Μπενγκ μισίνελα ι Ιεχωβάς ντα ι τζενέν. Άκ’ σόσκε τσσουντάς κο πειρασμός ι Αδαμίς ντα ι Ευά τι αμαρτίνεν, ντα συνεχίνελα τι τσσουβέλ κο πειρασμός ι τζενέν αντιβές. Οτθάρ κάνα ο Αδάμ ντα η Εύα αμαρτιντέ ο Μπενγκ μάλλον αμντισάλο ότι χαλαντάας ο σκοπός σο τθερέλας ο Ιεχωβά ι τζενένγκε. Αλλά να αγαντάς καζόμ μπουτ μανγκέλα ο Ιεχωβά ι τζενέν. Ο Ντεβέλ ποτές να αλλαντάς ο σκοπός σο τθερέλας για το προσάγγονα ι Αδαμίσκε ντα ι Ευάκε. Μανγκέλα σαρέ ι τζενέν, οτθάρ ντινάς αμέσως ελπίδα σαριλέντε. (Διαβάνεν Ρωμαίους 8:20, 21) Ο Ιεχωβά τζανέλας ότι μερικοί κατά προσάγγονα λένγκε κα τραμπίνενας τι μανγκέν-λες ντα τι μανγκέν λέσκι βοήθεια για τι τζαν κόντρα κι αμαρτία. Ο Ιεχωβά πουταρντάς ο ντρομ για τι μπορίνεν ανταλά τζενέ τι τζαν πασέ λέστε ντα τι σώντιβεν κατά αμαρτία ντα κατά μεριπέ. Σο κα κερέλας ο Ιεχωβά για τι μπορίνεν τι αβέν-πες σαρέ ανταλά;

5. Κάνα ο Ιεχωβά ντινάς για πρώτη φαρ ελπίδα κο αμαρτωλά τζενέ; Εξηγίνεν. (Γένεση 3:15)

⁵ Διαβάνεν Γένεση 3:15. Ο Ιεχωβά χωρίς τι χασαρέλ χρόνος βακερντάς ότι κα καταστραφίνελας ι Μπενγκές ντα ντινάς ελπίδα σαρέ κο τζενέ. Ο Ντεβέλ βακερντάς ότι κα αβέλας εκ «προσάγγονος» σο κα σώνελας ι τζενέν. Οντουβά προσάγγονος κα καταστραφίνελας ι Μπενγκές ντα αντικάς κα νασκιαρέλας σαρέ ο προβλήματα σο αντάας βοβ κι Εδέμ. (1 Ιωάν. 3:8) Όμως οντουβά προσάγγονος κα τσσίντελας μπουτ για κάποιος βακίτι. Ο Μπενγκ κα ντέλας-λες ντα κα οδηγίνελας-λες κο μεριπέ. Ανταβά κα ανέλας ι πο μπαρί ντουκχ κο Ιεχωβά. Αλλά οντιά ντουκχ να κα τζάλας χαμέ επειδή τελικά κα σώντιβενας μπουτ τζενέ κατά αμαρτία ντα κατά μεριπέ!

ΣΑΡ ΚΕΡΕΝΑΣ Ι ΙΕΧΩΒΑΣΚΟ ΓΚΙ Ο ΑΜΑΡΤΩΛΑ ΤΖΕΝΕ ΚΟ ΠΟΥΡΑΝΕ ΜΠΡΕΣΑ;

6. Σο κερντέ πιστά τζενέ, σαρ ο Άβελ ντα ο Νώε, για τι τζαν πασέ κο Ιεχωβά;

⁶ Καζόμ νακχένας ο μπρεσά, ο Ιεχωβά ντέλας-αμέν τι αγαβάς ατζέ πο λατσσές σαρ ο αμαρτωλά τζενέ μπορίνενα τι τζαν πασέ λέστε. Ο Άβελ σο ισινέ ο δεύτερος τσσαβό ι Αδαμίσκο ντα ι Ευάκο ισινέ ο πρώτος τζενό σο πακιαντάς κο Ιεχωβά σοράν οντουλέσταρ σο αβιλό-πες κι Εδέμ. Ο Άβελ μανγκέλας ι Ιεχωβάς ντα μανγκέλας τι κερέλ λέσκο γκι ντα τι τζαλ πασέ λέστε. Οτθάρ ντινάς λέστε εκ θυσία. Ο Άβελ  ισινέ τσομπάνης, οντουλέσκε λιντάς μερικέ πι μπρακένταρ ντα ντινάς-λεν σαρ θυσία κο Ιεχωβά. Σαρ ντικχλάς-λες ανταβά ο Ιεχωβά; «Ο Άβελ ντα η θυσία λέσκι κερντέ ι Ιεχωβάσκο γκι». (Γέν. 4:4) Ο Ιεχωβά μπεϊντιντάς ασακέ θυσίες σο κερντέ γιαβερά-ντα τζενέ σο μανγκένας-λες ντα ντένας λέστε μπέσα, σαρ ο Νώε. (Γέν. 8:20, 21) Επειδή δεχτιντάς ασακέ θυσίες ο Ιεχωβά σικαντάς ότι ο αμαρτωλά τζενέ μπορίνενα τι κερέν λέσκο γκι ντα τι τζαν πασέ λέστε. b

7. Σο σικλιάσα κατά Αβραάμ σο ισινέ έτοιμος τι θυσιάνελ πι τσσαβές;

⁷ Ο Αβραάμ ισινέ εκ τζενό σο τθερέλας ζουρανί πίστη κο Ιεχωβά. Ο Ιεχωβά μανγκλάς λέσταρ τι κερέλ κάτι μπουτ δύσκολος, τι ντελ πι τσσαβές τον Ισαάκ σαρ θυσία. Σίγουρα, ανταβά ισινέ ο πο δύσκολος πράγμας σο έπρεπε τι κερέλ ο Αβραάμ. Αλλά ντινάς καν κο Ιεχωβά. Κάνα ο Αβραάμ ισινέ τι μουνταρέλ πι τσσαβές ο Ντεβέλ σταματιντάς-λες. Ανταβά παράδειγμας σικαβέλα σο κα κερέλας ο Ιεχωβά κο μέλλον. Ισινέ έτοιμος τι ντελ πι αγαπημέ Τσσαβές σαρ θυσία. Ο Ιεχωβά μανγκέλα μπουτ ι τζενέν.​—Γέν. 22:1-18.

8. Σο σικλιάσα κατά θυσίες σο βακερέλας ο Νόμος τι κερέν; (Λευιτικό 4:27-29· 17:11)

⁸ Κάνα ο Ιεχωβά ντινάς ο Νόμος κο Ισραηλίτες βακερντάς λένγκε τι θυσιάνεν ζώα για τι συγχωρίντιβεν λένγκε αμαρτίες. (Διαβάνεν Λευιτικό 4:27-29· 17:11) Ασακέ θυσίες σικαβένας ι πο μπαρί θυσία σο κα κερέλας ο Ιεχωβά για τι σώνελ ντιπ ι τζενέν κατά αμαρτία. Ο Ντεβέλ βακερντάς πι προφητέντε τι γραφίνεν ι προσαγγονίσκε σο βακέρντιλοας ότι κα αβέλας. Σαρ σικάντιλο, ισινέ εκ ξεχωριστός Τσσαβό ι Ντεβλέσκο σο κα τσσίντελας μπουτ ντα κα μερέλας. Κα θυσιάντιβελας σαρ εκ μπρακό. (Ησ. 53:1-12) Σκεφτίνεν: ο Ιεχωβά κα κανονίνελας τι ντελ πι αγαπημέ Τσσαβές σαρ θυσία για τι σώνελ ι τζενέν κατά αμαρτία ντα κατά μεριπέ​—για τι σώνελ τουμέν!

ΣΟ ΚΕΡΝΤΑΣ Ο ΙΗΣΟΥΣ ΓΙΑ ΤΙ ΣΩΝΕΛ-ΑΜΕΝ;

9. Σο βακερντάς ο Ιωάννης ο Βαφτιστής κάνα ντικχλάς ι Ιησούς; (Εβραίους 9:22· 10:1-4, 12)

⁹ Κο μπρες 29, ο υπηρέτης ι Ντεβλέσκο ο Ιωάννης ο Βαφτιστής ντικχλάς ι Ιησούς κατά Ναζαρέτ ντα βακερντάς: «Άκ’ ο Μπρακό ι Ντεβλέσκο σο νασκιαρέλα ι αμαρτία ι ντουνιάσκι!» (Ιωάν. 1:29) Ανταλά λάφια σικαβένα ότι ο Ιησούς ισινέ ο ξεχωριστός προσάγγονος σο ο Ντεβέλ ντινάας πο λάφι ότι κα αβέλας. Ο Ιησούς κα ντέλας πι ζωή. Τελικά ο προσάγγονος ι Ιεχωβάσκο αβιλόας για τι σώνελ ντιπ ι τζενέν κατά αμαρτία.​—Διαβάνεν Εβραίους 9:22· 10:1-4, 12.

10. Σαρ ο Ιησούς σικαντάς ότι “αβιλό τι βικίνελ” αμαρτωλόν;

¹⁰ Ο Ιησούς τσσουντάς πο μπαρί προσοχή κο τζενέ σο λέλας-λεν μπέτι επειδή ισινέ αμαρτωλοί ντα βακερέλας λένγκε τι ακολουθίνεν-λες. Τζανέλας ότι η αμαρτία ισινέ οντιά σο ανέλας σαρέ ο βάσανα ι τζενένγκε. Οντουλέσκε βοηθιντάς ατζέ πο μπουτ ι τζενέν σο τσσίντενας μπουτ ιτιρί κατά αμαρτίες σο κερντέας. Βακερντάς ακαβά παράδειγμας: «Να χρειαζίντιβενα γιατρός ο ζουρανέ, αλλά ο νασφαλέ». Ντα πο σοράν βακερντάς: «Με να αβιλόμ τι βικίναβ δίκαιε τζενέν, αλλά αμαρτωλόν». (Ματθ. 9:12, 13) Ντα ανταβά ισινέ σο κερέλας ο Ιησούς. Κάνα εκ τζουβέλ τσσορντάς πο δάκρυα οπράλ λέσκε πιντρέντε ντα τθοντάς-λεν, βοβ κερντάς λάσαρ λάφι σουκάρ τροπόσαρ ντα συγχωριντάς λάκε αμαρτίες. (Λουκ. 7:37-50) Σικλιαρντάς μπουτ σημαντικές αλήθειες κι Σαμαρείτισσα κι χανίγκ, παρόλο σο τζανέλας ότι τζουβντιόλας εκχέ μουρσέσαρ σο να ισινέ παντριμέ λέσαρ. (Ιωάν. 4:7, 17-19, 25, 26) Η αμαρτία γκερέλα ι τζενέν κο μεριπέ αλλά ο Ντεβέλ ντινάς κο Ιησούς ατζέ-ντα  ι ζορ τι ανέλ πάλι κι ζωή μουρσέν, τζουβλίν, χουρντέν ντα μπαρέν.​—Ματθ. 11:5.

11. Σόσκε ο αμαρτωλά τζενέ μανγκένας τι τζαν πασέ κο Ιησούς;

¹¹ Αγαβάσα σόσκε ο τζενέ σο κερντέας μπέτι πράγματα νιωθίνενας άνετα τι τζαν πασέ κο Ιησούς. Βοβ πφαμπόλας λένγκε ντα τζιτζίνελας λένγκε. Να νταρένας τι κερέν λέσαρ λάφι. (Λουκ. 15:1, 2) Ο Ιησούς ισαρντάς ασακέ τζενέν σο σικαντέ πίστη λέστε ντα σικαντάς λένγκε λατσσιπέ. (Λουκ. 19:1-10) Ο Ιησούς σικαντάς κο τζενέ καζόμ μπουτ τζιτζίνελα λένγκε ο Ιεχωβά. (Ιωάν. 14:9) Οντουλέντζαρ σο βακερέλας ντα κερέλας σικλιαρντάς ότι ο Ιεχωβά τζιτζίνελα ντα τθερέλα αγάπη ι ατελή τζενένγκε ντα μανγκέλα τι βοηθίνελ-λεν. Ο Ιησούς βοηθιντάς ι αμαρτωλόν τι μανγκέν τι αλλάνεν πουμαρί ζωή ντα τι ακολουθίνεν-λες.​—Λουκ. 5:27, 28.

12. Σο σικλιαρντάς ο Ιησούς ότι κα κερέλας λέσκο μεριπέ;

¹² Ο Ιησούς τζανέλας ότι κα θυσιάνελας πι ζωή. Μπουτ φαρ βακερντάς πι μαθητένγκε ότι κα προδόντιβελας ντα κα καρφώντιβελας κο κας. (Ματθ. 17:22· 20:18, 19) Τζανέλας ότι ανταγιά θυσία κα λέλας ντουρ ι αμαρτία κατά ντουνιάς, σαρ βακερντάας ο Ιωάννης ντα ο προφήτες. Επίσης ο Ιησούς βακερντάς ότι αφού κα ντέλας πι ζωή, σοράν ανταλέσταρ κα “ταρτίνελας σαβέ τι μανγκές τζενέν πέστε”. (Ιωάν. 12:32) Οντουλά σο κα πακιάνας κο Ιησούς ντα κα μαρένας-πες τι μοιάζεν λέστε κα κερένας ι Ιεχωβάσκο γκι. Αν κα κερένας-λες ανταβά, ο αποτέλεσμας κα αβέλας τι “ελευθερώντιβεν  κατά αμαρτία”. (Ρωμ. 6:14, 18, 22· Ιωάν. 8:32) Οτθάρ, ο Ιησούς μπίνταρανες μανγκλάς τι μερέλ ανταλέ μπέτι τροπόσαρ για τι σώνελ-αμέν.​—Ιωάν. 10:17, 18.

13. Σαρ μουλό ο Ιησούς, ντα σο σικλιαρέλα-αμέν λέσκο μεριπέ ι Ιεχωβά Ντεβλέσκε; (Ντικχέν ι φωτογραφία-ντα)

¹³ Εκ κατά λατσσέ αμαλά ι Ιησούσκε προδοντάς-λες, σοράν λέσκε ντουσμάνια ασταρντέ-λες, προσβαλιντέ-λες ντα κατηγοριντέ-λες πραγματένγκε σο να κερντάας ποτές. Λιντέ απόφαση τι μουνταρέν ι Ιησούς ντα σοράν βασανιντέ-λες. Τελικά ο στρατιώτες καρφωντέ ι Ιησούς κο κας για τι μουνταρέν-λες. Καζόμ ο Ιησούς νταϊντίνελας πιστά σαρέ ανταλά δοκιμασίες, υπαρχίντιβελας Κάποιος σο νιωθίνελας πο μπαρί ντουκχ λέσταρ​—ο Ιεχωβά Ντεβέλ. Ο Ιεχωβά τθερέλας ι ζορ ντα μπορίνελας τι τσσιναβέλ-λες ανταβά, αλλά να κερντάς-λες. Σόσκε; Αφού μανγκέλα αζόμ μπουτ πι Τσσαβές, σαρ μπορισάλο τι μουκχέλ-λες τι τσσίντελ αζόμ μπουτ ντα τι μερέλ; Κερντάς-λες ανταβά επειδή μανγκέλα αμέν. Ο Ιησούς βακερντάς: «Ο Ντεβέλ μανγκλάς ι ντουνιάς αζόμ μπουτ σο ντινάς πι μοναδικέ Τσσαβές, για μα τι καταστραφίντιβελ κον σικαβέλα πίστη λέστε, αλλά τι τζουβντιόλ για πάντα».​—Ιωάν. 3:16.

14. Σο σικλιαρέλα-τουμέν η θυσία ι Ιησούσκι;

¹⁴ Η θυσία ι Ιησούσκι ισί ο πο μπαρό τρόπος σο σικαβέλα ο Ιεχωβά καζόμ μπουτ μανγκέλα ι προσαγγονίν ι Αδαμίσκε ντα ι Ευάκε. Σικαβέλα καζόμ μπουτ μανγκέλα ο Ιεχωβά τουμέν. Ντινάς ο πο λατσσό σο τθερέλας ντα νταϊντιντάς μπουτ μπαρί ντουκχ για τι σώνελ-τουμέν κατά αμαρτία ντα κατά μεριπέ. (1 Ιωάν. 4:9, 10) Βα, μανγκέλα τι βοηθίνελ ι κάθε εκχές αμένταρ τι τζαλ κόντρα κι αμαρτία ντα τι νικίνελ!

15. Σο πρέπει τι κεράς για τι βοηθίντιβας κατά θυσία ι Ιησούσκι;

¹⁵ Αντράλ κατά δώρος ι Ντεβλέσκο, κατά θυσία λέσκε μοναδικέ Τσσαβέσκι, αβέλα-πες τι συγχωρίντιβεν αμαρέ αμαρτίες. Αλλά για τι συγχωρίνελ ο Ντεβέλ αμαρέ αμαρτίες πρέπει τι κεράς κάτι. Σο ισί ανταβά; Ο Ιωάννης ο Βαφτιστής ντα σοράν ο Ιησούς Χριστός-ντα ντινέ ι απάντηση: «Μετανιώνεν, σόσκε η Βασιλεία ι ουρανόσκι ισί πασέ». (Ματθ. 3:1, 2· 4:17) Οτθάρ άμα μανγκάσα τι πολεμίνας ι αμαρτία ντα τι τζας πασέ αμαρέ λατσσέ Νταντέστε πρέπει τι μετανιώνας. Αλλά σο μανγκέλα τι βακερέλ τι μετανιώνας ντα σαρ ανταβά βοηθίνελα-αμέν τι πολεμίνας ι αμαρτία; Κο γιαβέρ μάθημας κα ντικχάς ι απάντηση.