Ο Τζενέ σο Διαβάνενα Πουτσένα
Κον κα κερέλ ο σημείωμας σο βακέρντιβελα κο εδάφιος 2 Θεσσαλονικείς 3:14, ο πρεσβυτέριος ή ο κάθε Χριστιανός ξεχωριστά;
Ο απόστολος Παύλος γραφιντάς κο Χριστιανοί κι Θεσσαλονίκη: «Άμα κάποιος να ντέλα καν αμαρέ λαφίστε αντράλ κατά γράμμας ανταβά, σημειώνεν-λες». (2 Θεσ. 3:14) Ανγκλέ, βακεράας ότι ανταβά έπρεπε τι κερέλας-λες ο πρεσβυτέριος. Άμα εκ τζενό συνεχίνελας μα τι ντελ καν κο αρχές κι Γραφιάκε παρόλο σο ντιντιλέ-λες μπουτ φαρ συμβουλές, ο πρεσβύτεροι κα μπορίνενας τι κερέν εκ ομιλία για τι προειδοποιήνεν ι κχανγκιρί ανταλέσκε. Σοράν ανταλέσταρ, ο πφραλά κι κχανγκιρί να κα κερένας παρέα ι σημειωμέ τζενέσαρ.
Όμως, χρειαζίντιβελα τι αβέλ-πες εκ αλλαγή. Ι συμβουλή σο ντινάς ο Παύλος ντικχίντιβελα ότι πρέπει τι κερέλ-λα ο κάθε Χριστιανός ξεχωριστά κάνα χρειαζίντιβελα ανταβά. Άρα να χρειαζίντιβελα τι κερέν ο πρεσβύτεροι ομιλία για τι προειδοποιήνεν ι κχανγκιρί. Σόσκε αβέλα-πες ανταγιά αλλαγή; Ντικχέν ι συμβουλή ι Παυλόσκι γιεκ ι λαφίντζαρ σο ισί πο οπρέ ντα πο τελέ.
Ο Παύλος βακερντάς ότι μερικοί οντουλέ κχανγκιριάτε “να ντένας καν”. Να ντένας σημασία σε μερικές συμβουλές ι Ντεβλέσκε. Εκ γιαβέρ φαρ σο γκιλόας ο Παύλος για τι ντικχέλ-λεν ντινάας-λεν ακαγιά εντολή: «Άμα εκ τζενό να μανγκέλα τι κερέλ μπουτί, δεν πρέπει τι χαλ». Μερικοί όμως συνεχίνενας μα τι μανγκέν τι κερέν μπουτί για τι νικαβέν ο αναγκαία παρόλο σο μπορίνενας τι κερέν-λες ανταβά. Επίσης, ανακατούντιβενας κο θέματα κι γιαβερένγκε. Σαρ έπρεπε τι συμπεριφερίντιβεν ο Χριστιανοί ασακέ τζενέντε;—2 Θεσ. 3:6, 10-12.
«Σημειώνεν-λες», βακερντάς ο Παύλος. Ο πουρανό μπαλαμανό λάφι σο υπαρχίντιβελας ανταλέ εδαφιόστε μανγκέλας τι σικαβέλ τι αγαβέν καβά τζενό κερέλας ασακέ πράγματα ντα τι τθερέν πουμαρί γκοντί για μα τι επηρεάντιβεν λέσταρ. Ο Παύλος ντινάς ανταγιά οδηγία σαρί κι κχανγκιρί, όχι σάντε κο πρεσβύτεροι. (2 Θεσ. 1:1· 3:6) Οτθάρ, ο κάθε εκ Χριστιανός σο ντικχέλας ότι εκ πφραλ να ντέλας καν σε εκ συμβουλή ι Γραφιάκι κα τραμπίνελας “μα τι κερέλ παρέα” ανταλέ τζενέσαρ σο να ντέλας καν.
Μήπως ανταβά μανγκέλας τι βακερέλ ότι έπρεπε τι συμπεριφερίντιβενας ανταλέ τζενέσκε σαρ οντουλέντε σο ατσσικιαρντάας-λεν ντουρ η κχανγκιρί; Νάα, επειδή ο ο Παύλος βακερντάς σοράν: «Τι ντεν-λες συμβουλές σαρ πφραλ». Άρα, κάθε Χριστιανός ξεχωριστά κα μπορίνελας τι αβέλ λέσαρ κο συναθροίσεις ντα τι νικιόλ λέσαρ κο έργος, αλλά κα τραμπίνελας μα τι κερέλ λέσαρ παρέα. Σόσκε; «Για τι λατζάλ», βακερντάς ο Παύλος. Αντικάς κάνα τσσιναβάσα τι κεράς παρέα αμαρέ πφραλέσαρ, μπορεί τι λατζάλ ανταλέσκε σο κερέλα ντα τι αλλάνελ.—2 Θεσ. 3:14, 15.
Σαρ μπορίνενα ο Χριστιανοί αντιβές τι κερέν ανταγιά συμβουλή; Πρώτα, πρέπει τι αβάς σίγουροι ότι μπαγιά ανταβά τζενό «να ντέλα καν» σαρ βακερντάς ο Παύλος. Βοβ να βακερέλας τι τσσιναβάς ι παρέα οντουλέντζαρ σο τθερένα διαφορετική συνείδηση αμένταρ ντα οτθάρ τραμπίνενα τι κερέν κάτι γιαβέρ, ούτε οντουλέντζαρ σο μπεϊντίνενα διαφορετικά πράγματα αμένταρ. Ντα να βακερντάς τι τσσιναβάς ι παρέα οντουλέντζαρ σο απλά πληγωντέ-αμέν. Ο Παύλος τθερέλας πι γκοντιάτε οντουλέν σο να μανγκένας τι ντεν καν κο ξεκάθαρες συμβουλές κι Γραφιάκε.
Αντιβές, άμα κα αγαβάς ότι εκ πφραλ ή εκ πφεν να ντέλα καν, a κα τραμπίνας από κορκορέ μα τι κεράς λέσαρ παρέα. Ανταγιά ισί αμαρί απόφαση. Οτθάρ να κα συζητίνας-λα γιαβερέντζαρ εκτός αμαρέ φαμιλιάταρ σο ισί Μάρτυρες ντα τζουβντιάσα λέντζαρ κο ίδιος κχερ. Ντα κα συνεχίνας τι αβάς ανταλέ τζενέσαρ κο συναθροίσεις ντα κο έργος. Κάνα κα αλλάνελ ο τρόπος σο σκεφτίνελα ντα πι συμπεριφορά κα αρχίνας τι κεράς λέσαρ πάλι παρέα.
a Για παράδειγμας, εκ πφραλ μπορεί μα τι μανγκέλα τι κερέλ μπουτί για τι νικαβέλ ο αναγκαία παρόλο σο μπορίνελα τι κερέλ-λες ανταβά. Επίσης εκ πφραλ ή εκ πφεν μπορεί τι επιμίνελα τι κερέλ γνωριμία εκχέ τζενέσαρ ή τζενιάσαρ σο νανέ Μάρτυρας, ή μπορεί τι πφιραβέλα λάφια σο ανένα διχόνοια ή κουτσομπολιά σο κερένα μπαρό ζιάνι κο γιαβερά. (1 Κορ. 7:39· 2 Κορ. 6:14· 2 Θεσ. 3:11, 12· 1 Τιμ. 5:13) Οντουλά σο συνεχίνενα τι κερέν κάτι ασακό ισί αντρέ κο τζενέ σο «να ντένα καν».
