ΙΣΤΟΡΙΑ ΜΙ ΖΩΓΙΑΚΙ
Μουκχλόμ Πράγματα Παλάλ για τι Ακολουθίναβ ι Κυριός
Όταν ισινόμας 16 μπρεσένγκο, μο ντατ βακερντάς μάνγκε: «Άμα γκιλάν τι κερές λάφι ι Ντεβλέσκε, μα βούρτινε παλάλ. Άμα βουρτισάλαν, κα πφανγκάβ το τσανγκά». Οτθάρ, αποφασιντόμ τι νασάβ κατά κχερ. Ανταγιά ισινέ η πρώτη φαρ σο μουκχλόμ πράγματα παλάλ για τι ακολουθίναβ ι Ιησούς, αμαρέ Κυριός.
ΣΟΣΚΕ ισινέ μο ντατ αζόμ νευριασμέ; Κα εξηγίναβ τουμένγκε. Μπιάντιλομ 29 Ιουλίου κο 1929 ντα μπαριλόμ εκχέ γκαβέστε κο Μπουλακάν κο Φιλιππίνες. Να τθεράας μπουτ λοβέ ντα αμαρί ζωή ισινέ απλή. Όταν ισινόμας χουρντό ο στρατός της Ιαπωνίας αβιλό κο Φιλιππίνες ντα κερντάς τζένγκι. Αμαρό γκαβ όμως ισινέ ντουρ, οντουλέσκε να επηρεασάλαμ μπουτ κατά τζένγκι. Να τθεράας ραδιόφωνος, τηλεόραση ή εφημερίδες, οτθάρ ασουνάας ι τζενγκίσκε σάντε κατά γιαβερά τζενέ.
Τθεράβας εφτά πφραλέν ντα πφενίν, ντα όταν ισινόμας οχτώ μπρεσένγκο μο πάππους ντα μι μπάμπα λιντέ-μαν τι μπεσάβ λέντε. Παρόλο σο ισινάμας Καθολικοί, μο πάππους συζητίνελας ι θρησκειάκε ντα δεχτίνελας έντυπα σο ντένας-λες λέσκε αμαλά. Ντάβα-μαν γκοντί σο κάποτε σικαντάς μάνγκε ο βιβλιάρια Προστασία, Ασφάλεια ντα Αποκαλυφθέντα κι τσσιπ ταγκαλόγκ, * (ντικχ ι υποσημείωση) ντα επίσης εκ Αγία Γραφή. Μπεϊντίναβας τι διαβάναβ ι Γραφή, ντα πιο μπουτ ο σταρ Ευαγγέλια. Ανταβά κερντάς-μαν τι μανγκάβ τι ακολουθίναβ ο παράδειγμας ι Ιησούσκο.—Ιωάννης 10:27.
ΣΙΚΛΙΑΒΑ ΤΙ ΑΚΟΛΟΥΘΙΝΑΒ Ι ΚΥΡΙΟΣ
Ο στρατός της Ιαπωνίας νασλό κατά Φιλιππίνες κο 1945. Περίπου αζομάν, μο ντατ ντα μι ντάι βακερντέ μάνγκε τι βουρτίναβ κχερέ. Μο πάππους βακερντάς μάνγκε τι τζαβ, οτθάρ γκιλόμ.
Κο Δεκέμβριος κο 1945, Μάρτυρες του Ιεχωβά κατά πόλη Ανγκάτ αβιλέ για τι κερέν έργος αμαρέ γκαβέστε. Εκ πφουρό Μάρτυρας αβιλό αμαρέ φαμιλιάτε ντα εξηγιντάς αμένγκε σο βακερέλα η Γραφή ι “τελευταίε ντιβεσένγκε”. (2 Τιμόθεο 3:1-5) Καλιντάς-αμέν εκχέ γκαβέστε οτθέ πασέ για τι παρακολουθίνας εκ μελέτη κατά Γραφή. Με γκιλόμ, παρόλο σο να αβιλέ μο ντατ ντα μι ντάι. Ισινάμας περίπου 20 τζενέ, ντα μερικοί κερένας ερωτήσεις σο τθερένας τι κερέν ι Γραφιάσαρ.
Να αγαβάβας λατσσές οντουλά σο συζητίνενας, οτθάρ αποφασιντόμ τι νασάβ. Οντιά στιγμή όμως αρχισάλε τι γκιλιαβέν εκ ύμνος ι Βασιλειάκο. Μπεϊντιντόμ μπουτ ο ύμνος, οντουλέσκε μπεσλόμ. Μετά κατά
ύμνος ντα κατά προσευχή, καλιντέ-αμέν σαριλέν κι γιαβέρ Κυριακή εκχέ συναθροισιάτε κο Ανγκάτ.Ανταγιά συνάθροιση αβιλί κι φαμιλί Κρουζ ντα μερικά τζενέ αμένταρ πφιρντάμ σχεδόν οχτώ χιλιόμετρα για τι τζας οτθέ. Γκιντίντιλε περίπου 50 τζενέ ντα κερντάς μάνγκε μπαρί εντύπωση σο ατζέ-ντα χουρντέ τσσαβέ απαντίνενας ερωτησιέντε σο τθερένας τι κερέν με δύσκολα θέματα κατά Γραφή. Αφού γκιλόμ μερικέ συναθροισιέντε, ο πφραλ Νταμιάν Σάντος, εκ πφουρό σκαπανέας σο πριν ισινέ δήμαρχος, βακερντάς μάνγκε τι μπεσάβ λέσκε κχερέστε αρατί. Σχεδόν σαρί οντιά ιράτ συζητίναας ι Γραφιάκε.
Οντουλά μπρεσά, ο τζενέ μπολντιόνας μόλις σικλιόνας ο βασικά πράγματα ι Γραφιάκε. Μετά από χάνικ συναθροίσεις, ο πφραλά πουτσλέ μαν ντα γιαβερέν: «Μανγκένα τι μπολντιόν;» Με απαντιντόμ: «Βα, μανγκάβα». Τζανάβας ότι μανγκάβας “τι υπηρετίναβ σαρ δούλος ι Κυριός, ι Χριστός”. (Κολοσσαείς 3:24) Γκιλάμ εκχέ λενιάτε οτθέ πασέ ντα ντούι αμένταρ μπολντιλάμ 15 Φεβρουαρίου κο 1946.
Αγαβάβας ότι ο Χριστιανοί σο ισί μπολντέ πρέπει τι κερέν λάφι ι Ντεβλέσκε, σαρ κερέλας ο Ιησούς-ντα. Μο ντατ πακιάλας ότι ισινόμας χουρντό για τι κεράβ έργος ντα ότι να χρειαζίντιβελας τι κεράβ έργος απλά επειδή μπολντιλόμας. Εξηγιντόμ λέσκε ότι ο Ντεβέλ μανγκέλα τι βακεράς ο λατσσέ αμπέρια ι Βασιλειάκε. (Ματθαίος 24:14) Επίσης, βακερντόμ μι νταντέσκε ότι έπρεπε τι ατσσάβ πιστός κι υπόσχεση σο ντινόμ κο Ντεβέλ. Αζομάν ισινέ σο απειλιντάς-μαν ι λαφίντζαρ σο βακερντόμ κι αρχή. Ισινέ αποφασισμέ τι εμποδίνελ-μαν τι κεράβ έργος. Ανταγιά ισινέ η πρώτη φαρ σο έπρεπε τι μουκχάβ παλάλ μερικά πράγματα, ή γιαβέρτουλους τι κεράβ θυσίες, για τι υπηρετίναβ ι Ιεχωβάς.
Η φαμιλί Κρουζ βακερντάς μάνγκε τι μπεσάβ λέντζαρ κο Ανγκάτ. Επίσης, βακερντέ μάνγκε ντα πουμαρέ χουρντέ τσσαγιάκε, ι Νοράκε, τι αβάς σκαπανείς. Αρχισάλαμ ο ντούι-ντα ο σκαπανικός 1 Νοεμβρίου κο 1947. Η Νόρα γκιλί τι υπηρετίνελ σε εκ γιαβέρ πόλη, ενώ με μπεσλόμ κο Ανγκάτ.
ΕΚ ΓΙΑΒΕΡ ΕΥΚΑΙΡΙΑ ΓΙΑ ΤΙ ΜΟΥΚΧΑΒ ΠΡΑΓΜΑΤΑ ΠΑΛΑΛ
Αφού κερντόμ σκαπανικός για ντούι μπρεσά, ο Ερλ Στιούαρτ, εκ πφραλ κατά Μπέθελ, κερντάς εκ ομιλία ανγκλάλ σε πιο μπουτ από 500 τζενέ κι κεντρική πλατεία του Ανγκάτ. Βοβ κερντάς λάφι κο αγγλικά ντα σοράν με βακερντόμ χάνικ λαφίντζαρ, κι τσσιπ ταγκαλόγκ, σο βακερέλας λέσκι ομιλία. Ανταγιά ισινέ η πρώτη κατά μπουτ ομιλίες σο κερντόμ μετάφραση σαρέ ανταλά μπρεσά. Σαρ μπορίναβας τι κεράβ-λες ανταβά; Παρόλο σο γκιλόμ σχολείος σάντε εφτά μπρεσά, μο δάσκαλοι κερένας συχνά λάφι αγγλικά. Επίσης, διαβάναβας κο αγγλικά μπουτ κατά έντυπα αμαρένταρ επειδή τθεράας χάνικ έντυπα κι τσσιπ ταγκαλόγκ. Ανταλά πράγματα βοηθιντέ-μαν τι αγαβάβ λατσσές ι αγγλική τσσιπ ντα τι κεράβ μετάφραση κο ομιλίες.
Ο πφραλ Στιούαρτ βακερντάς κι εκκλησία σο τθερένας οτθέ ότι ο ιεραπόστολοι κα νασένας για τι παρακολουθίνεν ι συνέλευση «Αύξηση της Θεοκρατίας» κι Νέα Υόρκη, σο ισί κο ΗΠΑ, κο 1950. Οτθάρ, ο γραφείος τμήματος μανγκέλας εκχέ ή ντουέ σκαπανίν για τι βοηθίνεν κο Μπέθελ. Με ισινόμας εκ κατά πφραλά σο γκιλέ. Μουκχλόμ πάλι παλάλ ο πράγματα σο συνηθίναβας τι κεράβ, ανταγιά φαρ για τι βοηθίναβ κο Μπέθελ.
Γκιλόμ κο Μπέθελ 19 Ιουνίου κο 1950. Ο Μπέθελ ισινέ σε εκ μπαρό ντα πουρανό κχερ, εκχέ τθανέστε σο ισινέ 10 στρέμματα ντα ντονταλάι τθερέλας μπαρέ δέντρα. Οτθέ υπηρετίνενας περίπου ντεσουντούι εργένια πφραλά. Νωρίς το πρωί, βοηθίναβας κι κουζίνα. Από τις 9:00 ντα μετά, σιδερώναβας σέα κο πλυντήρια. Κεράβας ο ίδια πράγματα κο απόγευμας-ντα. Ατζέ-ντα όταν ο ιεραπόστολοι βουρτισάλε κατά διεθνή συνέλευση, μπεσλόμ κο Μπέθελ. Κεράβας σο-ντα μανγκένας μάνταρ ο πφραλά. Τσουβάβας σε κούτες ο περιοδικά για τι τζαν κο ταχυδρομείος, κεράβας ο συνδρομές ντα μπεσάβας κι ρεσεψιόν.
ΝΑΣΑΒΑ ΚΑΤΑ ΦΙΛΙΠΠΙΝΕΣ ΓΙΑ ΤΙ ΤΖΑΒ ΚΙ ΣΧΟΛΗ ΓΑΛΑΑΔ
Κο 1952, σιοβ γιαβερά τζενέ κατά Φιλιππίνες ντα με γκιλάμ κι 20ή τάξη της Σχολής Γαλαάδ. Ισινόμας ενθουσιασμέ! Ενώ ισινάμας κο Ηνωμένες Πολιτείες, ντικχάας ντα τζουβντιάας μπουτ πράγματα σο ισινέ νεβέ αμένγκε. Η ζωή ισινέ μπουτ διαφορετική οντουλάταρ σο συνηθιντάμας κο χουρντό γκαβ σο τζουβντιάβας.
Μερικέ πφραλέντζαρ σο νακχλάμ μαζί ι Σχολή Γαλαάδ
Για παράδειγμας, έπρεπε τι σικλιάς τι χρησιμοποιήνας συσκευές ντα σκεύη σο να τθεράας ξαναντικχλό ποτές. Ατζέ-ντα ο καιρός ισινέ διαφορετικός! Εκ ντιβές όταν ιστίντιλομ πρωί, σαρέ ισινέ ντιπ παρνέ αβρί. Ισινέ η πρώτη φαρ σο ντικχάβας βιβ. Ισινέ μπουτ σουκάρ, αλλά μετά από χάνικ αγαντόμ ότι ισινέ μπουτ παγωμέ!
Μπεϊντιντόμ αζόμ μπουτ ι εκπαίδευση κι Γαλαάδ σο ανταλά αλλαγές να πειράνενας-μαν. Αμαρέ δάσκαλοι ισινέ μπουτ λατσσέ ντα σικλιαρντέ-αμέν σαρ τι διαβάνας προσεκτικά ντα τι ρόντας. Η εκπαίδευση κι Γαλαάδ σίγουρα βοηθιντάς-μαν τι κεράβ πιο ζουρανί μι φιλία ι Ιεχωβάσαρ.
Όταν τελειωντόμ κατά σχολή, διορισάλομ για χάνικ ειδικός σκαπανέας κο Μπρονξ κι Πόλη της Νέας Υόρκης. Οτθάρ, κο Ιούλιος κο 1953, μπορισάλομ τι παρακολουθίναβ ι Συνέλευση της Κοινωνίας του Νέου Κόσμου σο αβιλί-πες οτθέ κο Μπρονξ. Μετά κατά συνέλευση, ξαναγκιλόμ σε εκ διορισμός σο τθεράβας κο Φιλιππίνες.
ΜΟΥΚΧΑΒΑ Ι ΛΑΤΣΣΙ ΖΩΗ ΣΟ ΤΘΕΡΑΒΑΣ ΚΙ ΠΟΛΗ
Ο πφραλά κο Μπέθελ διοριντέ-μαν επίσκοπος περιοχής. Ανταβά κα ντέλας-μαν πιο μπουτ ευκαιρίες για τι μοιάζαβ κο Ιησούς, σο τζάλας σε πόλεις σο ισινέ ντουρ για τι βοηθίνελ ι Ιεχωβάσκε λαός. (1 Πέτρου 2:21) Η περιοχή σο τθεράβας ισινέ κι κεντρική Λουζόν, σο ισί ο πιο μπαρό νησίς κο Φιλιππίνες. Τθεράβας τι τζαβ κο Μπουλακάν, Νουέβα Εσίχα, Τάρλακ ντα Σαμπάλες. Για τι τζαβ σε κάποιες πόλεις, έπρεπε τι νακχάβ ο μπαρέ βεσά σο βακέρντιβενα Σιέρα Μάδρε. Να τζάνας λεωφορεία ή τρένα οντουλέ τθανέντε, οτθάρ μανγκάβας οντουλένταρ σο οδηγίνενας φορτηγά τι μουκχέν-μαν τι μπεσάβ παλάλ σε κορμούς σο γκερένας πουμαρέ φορτηγόντζαρ. Μπουτ φαρ μουκχένας-μαν τι μπεσάβ, αλλά να ισινέ-ντα ο πιο άνετος τρόπος για τι ταξιδίνες.
Ο πιο μπουτ εκκλησίες ισινέ χουρντέ ντα νεβέ. Οτθάρ, ο πφραλά σικαβένας εκτίμηση όταν βοηθίναβας-λεν τι οργανώνεν πιο λατσσές ο συναθροίσεις ντα ο έργος.
Πιο σοράν, διορισάλομ σε εκ περιοχή σο βακέρντιβελα Μπικόλ. Οντουλέ περιοχιάτε, υπαρχίντιβενας μπουτ απομονωμέ όμιλοι σο ο ειδικοί σκαπανείς κερένας έργος τθανέντε σο να τθερένας ξαναγκιλό ποτές Μάρτυρες. Εκχέ κχερέστε σο μπεσάβας, ο καμπινές σο τθερένας ισινέ εκ γούρνα κι πφουβ ντα οπράλ κι γούρνα τθερέλας ντούι σανέ πφαλιά. Σο ισταντόμ κο πφαλιά, πελέ κι γούρνα, ντα γιεκ λέντζαρ πελόμ με-ντα. Λιντάς μάνταρ μπουτ σαάτι για τι τθοβάβ-μαν ντα τι αβάβ έτοιμος για το πρωϊνός!
Ενώ υπηρετίναβας οντουλέ περιοχιάτε αρχισάλομ τι σκεφτίναβ ι Νορά, σο ξεκινισάλιας ο σκαπανικός γιεκ μάντζαρ. Αζομάν, ισινέ ειδική σκαπάνισσα κι Πόλη Ντουμαγκέτε, ντα γκιλόμ τι ντικχάβ-λα. Σοράν, μπουτσσαβάας γράμματα ο εκ ι γιαβερέσκε για χάνικ καιρός ντα κο 1956 παντρισάλαμ. Η πρώτη εβδομάδα αμαρέ μπιαβέσκι νακχλάμ-λα εκχέ εκκλησιάτε σο γκιλάμ τι υπηρετίνας κο νησίς Ράπου Ράπου. Οτθέ έπρεπε τι νικλιάς βεσά ντα τι πφιράς μπουτ, αλλά ισινάμας μπουτ χαρούμενοι σο υπηρετίναας μαζί ντα βοηθίναας ι πφραλέν οντουλέ περιοχέντε σο ισινέ μπουτ ντουρ.
ΚΑΛΙΝΤΕ-ΜΑΝ ΤΙ ΥΠΗΡΕΤΙΝΑΒ ΠΑΛΙ ΚΟ ΜΠΕΘΕΛ
Αφού κερντάμ ο έργος περιοχής περίπου σταρ μπρες, ο πφραλά καλιντέ-αμέν τι τζας κο γραφείος τμήματος. Αρχισάλαμ τι κεράς μπουτί οτθέ κο Ιανουάριος κο 1960. Σαρέ ανταλά μπρεσά σο ισινάμ κο Μπέθελ, σικλιλόμ μπουτ κατά πφραλά σο υπηρετίνασα γιεκ ντα τθερένα μπαρέ ευθύνες κι Ιεχωβάσκι οργάνωση. Η Νόρα-ντα τθερέλας μπουτ σουκάρ ντα διαφορετικούς διορισμούς κο Μπέθελ.
Κεράβα εκ ομιλία σε συνέλευση ενώ εκ τζενό μεταφράνελα κι τσσιπ κεμπουάνο
Τθεράβας ι χαρά τι ντικχάβ τι μπαριόλ μπουτ ο αριθμός ι τζενένγκο σο υπηρετίνενα ι Ιεχωβάς κο Φιλιππίνες. Όταν αβιλόμας κο Μπέθελ ισινόμας τερνό ντα εργένη, ντα υπαρχίντιβενας περίπου 10.000 ευαγγελιζόμενοι σαρό κο τθεμ. Ακανά υπαρχίντιβενα 200.000 ντα πιο μπουτ ευαγγελιζόμενοι κο Φιλιππίνες, ενώ εκατοντάδες πφραλά ντα πφενιά κερένα μπουτί κο Μπέθελ για τι υποστηρίνεν ο έργος ι Ντεβλέσκο.
Καζόμ νακχένας ο μπρεσά, για τι αβέν ο μπουτιά χρειαζίντιβαας πιο μπουτ τθαν κο Μπέθελ. Οτθάρ ο Κυβερνών Σώμας μανγκλάς αμένταρ τι αρακχάς εκ τθαν σο κα μπορίναας τι χτίνας εκ πιο μπαρό Μπέθελ. Ο πφραλ σο υπηρετίνελας σαρ επίσκοπος τυπογραφείου ντα με γκιλάμ κχερ κχερέστε κι γειτονιά σο ισινέ ο Μπέθελ ντα πουτσάας άμα μανγκέλας κάποιος τι μπικινέλ πο τθαν. Καέκ να μανγκέλας, ντα μάλιστα εκ τζενό βακερντάς αμένγκε: «Αμέν ο Κινέζοι να μπικινάσα. Σάντε κινάσα».
Μεταφράναβα εκ ομιλία σο κερέλα ο πφραλ Άλμπερτ Σρόντερ
Όμως, εκ ντιβές αβιλό-πες κάτι σο να μπεκλεντίναας-λες. Εκ κατά γείτονες σο τθεράας κα τζάλας τι μπεσέλ κο Ηνωμένες Πολιτείες ντα πουτσλάς-αμέν άμα κα μανγκάας τι κινάς λέσκο τθαν. Σοράν, ατζέκ εκ γείτονας αποφασιντάς τι μπικινέλ πο τθαν, ντα μάλιστα κερντάς ι γιαβερέ γειτονέν-ντα τι κερέν ο ίδιος. Κιντάμ μέχρι ο τθαν οντουλέσκο σο βακερντάας αμένγκε: «Αμέν ο Κινέζοι να μπικινάσα». Μπουτ σουγκό, ο τθαν για το γραφείος τμήματος αβιλόας τριν φαρ πιο μπαρό. Ισινόμ σίγουρος ότι ανταβά μανγκέλας ο Ιεχωβά τι αβέλ-πες.
Κο 1950, ισινόμας ο πιο τερνό αντρέ κι φαμιλί Μπέθελ. Ακανά, μι ρομνί ντα με ισινάμ ο πιο πφουρέ. Να μετανιώναβα σο ακολουθιντόμ ι Κυριός κάι-ντα σικαβέλας μάνγκε τι τζαβ κάθε φαρ. Παρόλο σο μο ντατ ντα μι ντάι παλντιντέας-μαν πουμαρέ κχερέσταρ, ο Ιεχωβά ντινάς-μαν εκ μπαρί φαμιλί τζενέντζαρ σο μανγκένα-λες. Πακιάβα μπαγιά ότι ο Ιεχωβά ντέλα-αμέν οντουλά σο χρειαζίντιβασα, σο-ντα διορισμός τι τθεράς. Η Νόρα ντα με ευχαριστίνασα ι Ιεχωβάς σαρέ ι λατσσέ πραγματένγκε σο ντινάς-αμέν, ντα βακεράσα γιαβερέγκε-ντα τι δοκιμάνεν-λες.—Μαλαχίας 3:10.
Ο Ιησούς βακερντάς εκ φαρ εκχέ τζενέσκε σο γκίντελας φόροι ντα λέσκο ναβ ισινέ Ματθαίος Λευί τι αβέλ λέσκο ακόλουθος. Σο κερντάς ο Ματθαίος; «Μουκχλάς-λεν σαρέ παλάλ, ιστίντιλο ντα αρχισάλο τι ακολουθίνελ-λες». (Λουκάς 5:27, 28) Με-ντα τθεράβας ι ευκαιρία τι μουκχάβ παλάλ πράγματα για τι ακολουθίναβ ι Ιησούς, ντα βακεράβα σαρέ μι γκίσαρ γιαβερένγκε-ντα τι κερέν-λες ανταβά για τι τθερέν μπουτ ευλογίες.
Χαιρίναβα σο συνεχίναβα τι υπηρετίναβ κο Φιλιππίνες
^ παρ. 6 Νικαβένας-λεν ο Μάρτυρες του Ιεχωβά αλλά ακανά να τυπώντιβενα.