Η ΝΤΑΪΑΝΑ ισί πιο μπαρί από 80 μπρεσένγκι ντα τσσιντιντάς μπουτ ο τελευταία μπρεσά. Ο ρομ λάκο σο τθερέλας Αλτσχάιμερ ντα ισινέ αντρέ σε γηροκομείος, μουλό. Επίσης, χασαρντάς πι ντουέ τσσαβέν κο μεριπέ ντα τθερέλας καρκίνος. Όμως, ο πφραλά ντα ο πφενιά ντικχένα-λα πάντα χαρούμενη κο συναθροίσεις ντα κο έργος.

Ο Τζον ισινέ επίσκοπος πιο μπουτ από 43 μπρεσά. Μανγκέλας μπουτ πο διορισμός ντα να νακχέλας λέσκε γκοντιάταρ ότι κα κερέλας κάτι γιαβέρ πι ζωγιάτε. Αλλά έπρεπε τι τσσιναβέλ τι αβέλ επίσκοπος για τι φροντίνελ εκχέ νασφαλέ τζενές πι φαμιλιάταρ. Κάνα ο πφραλά ντα ο πφενιά σο τζανένας-λες αρακχένα-λες κο συνελεύσεις, να ντικχένα καέκ αλλαγή οπρά-λέστε. Συνεχίνελα τι τθερέλ μπουτ χαρά.

Σαρ αβέλα-πες τι τθερέλ χαρά η Νταϊάνα ντα ο Τζον; Σαρ μπορίνελα κάποιος σο υποφερίνελα τι αβέλ χαρούμενος; Ντα σαρ μπορίνελα εκ τζενό τι τθερέλ χαρά ατζέ-ντα άμα πρέπει τι μουκχέλ εκ διορισμός σο μανγκέλα; Η Αγία Γραφή ντέλα-αμέν ι απάντηση. Βακερέλα: «Ο δίκαιος κα αρακχέλ χαρά κο Ιεχωβά». (Ψαλμός 64:​10) Μπορίνασα τι αγαβάς ανταγιά αλήθεια ατζέ πιο λατσσές αν κα ντικχάς καλά πράγματα ανένα χαρά σο ατσσόλα ντα καλά ανένα χαρά σο να ατσσόλα.

Κάποια πράγματα σχεδόν πάντα ανένα χαρά. Για παράδειγμας, σκεφτίνεν εκ ερωτευμέ ζευγάρι σο παντρίνελα. Ή εκχέ τζενές σο αβέλα ντατ ή σο λέλα εκ διορισμός κι υπηρεσία κι Ιεχωβάσκι. Ανταλά πράγματα ανένα χαρά σόσκε σαρέ ισί δώρα κατά Ιεχωβά. Βοβ ντινάς-αμέν ο μπιαβ, ι ικανότητα τι κεράς τσσαβέν ντα ι ευκαιρία τι κεράς πράγματα κι οργάνωση λέσκι.​—Γένεση 2:​18, 22· Ψαλμός 127:3· 1 Τιμόθεο 3:1.

Όμως, η χαρά σο ανένα κάποια πράγματα μπορεί τι ατσσόλ για χάνικ. Δυστυχώς, κάποιος μπορεί μα τι ατσσόλ πιστός πι ρομνιάτε ή τι μερέλ. (Ιεζεκιήλ 24:​18· Ωσηέ 3:1) Μερικά τσσαβέ να ντένα καν ούτε πουμαρέ νταντές ντα πουμαρέ νταγιά ούτε ι Ντεβλές, ενώ μπορεί ατζέ-ντα τι χαν αποκοπή. Για παράδειγμας, ο τσσαβέ ι Σαμουηλίσκε να υπηρετίνενας ι Ιεχωβάς με σωστός τρόπος, ντα ο Δαβίδ τθερέλας  μπουτ προβλήματα πι φαμιλιάτε επειδή αμαρτιντάας με την Βηθ-σαβεέ. (1 Σαμουήλ 8:​1-3· 2 Σαμουήλ 12:​11) Όταν αβένα-πες ασακέ πράγματα, να ανένα χαρά αλλά στεναχώρια ντα μπουτ ντουκχ.

Μερικές φορές να μπορίνασα τι συνεχίνας σε εκ διορισμός κι υπηρεσία κι Ιεχωβάσκι επειδή μπορεί τι ισινάμ νασφαλέ ή πρέπει τι φροντίνας αμαρί φαμιλί ή επειδή αβιλί εκ αλλαγή κι οργάνωση. Μπουτ τζενέ σο έπρεπε τι μουκχέν πουμαρό διορισμός βακερένα ότι μανγκένας μπουτ τι νιωθίνεν πάλι ι χαρά σο ανέλας λένγκε λένγκο διορισμός.

Αγαβάσα ότι ασακέ χαρές μπορεί μα τι ατσσόν για μπουτ. Υπαρχίντιβελα άραγες εκ γιαβέρ χαρά σο ατσσόλα ατζέ-ντα κάνα ο πράγματα κι ζωή αβένα δύσκολα; Πρέπει τι υπαρχίντιβελα επειδή ο Σαμουήλ, ο Δαβίδ ντα γιαβερά να χασαρντέ πουμαρί χαρά κάνα νακχένας δοκιμασίες.

Ο Ιησούς τζανέλας σο ισί αληθινή χαρά. Πριν τι αβέλ κι πφουβ, η Γραφή βακερέλα αμένγκε ότι “χαιρίνελας πάντα σο ισινέ ανγκλάλ [κο Ιεχωβά]”. (Παροιμίες 8:​30) Αλλά κάνα αβιλό κι πφουβ, μερικές φορές αρακχέλας ανγκλά-πέστε μπαρέ δυσκολίες. Όμως, ο Ιησούς αρακχέλας χαρά κάνα κερέλας οντουβά σο μανγκέλας λέσκο Ντατ. (Ιωάννης 4:​34) Σο κα βακεράς ι δύσκολε σαατίνγκε σο νακχλάς πριν τι μερέλ; Η Γραφή βακερέλα: «Για τη χαρά σο τθερέλας ανγκλά-πέστε νταϊντιντάς ο κας σο βασανιντέ-λες». (Εβραίους 12:2) Μπορίνασα τι σικλιάς μπουτ πράγματα ντουέ λαφίνταρ σο βακερντάς ο Ιησούς ι αληθινέ χαράκε.

Εκ φαρ, 70 μαθητές βουρτισάλε κο Ιησούς σοράν κατά έργος. Ισινέ χαρούμενοι σαρέ ι πραγματένγκε σο κερντέας, ντα σο νικαντέας δαιμονέν. Όμως, ο Ιησούς βακερντάς λένγκε: «Μα χαιρίνεν επειδή ο δαίμονες ντένα-τουμέν καν, αλλά τι χαιρίνεν επειδή τουμαρέ ναβά γραφισάλε κο ουρανός». (Λουκάς 10:​1-9, 17, 20) Βα, η ευλογία ι Ιεχωβάσκι ισί πιο σημαντική ντα ντέλα πιο μπαρί χαρά σαρέ κατά ειδικοί διορισμοί.

Εκ γιαβέρ φαρ, ο Ιησούς κερέλας λάφι κο τζενέ ντα εκ Ιουδαία τζουβέλ εντυπωσιασάλι μπουτ λέσκε λαφίνταρ σο βακερντάς ότι λέσκι ντάι πρέπει τι ισινέ μπουτ ευτυχισμέ σο τθερέλας  ασακέ τσσαβές. Αλλά ο Ιησούς απαντιντάς: «Όχι· ευτυχισμέ ισί κον ασουνέλα ντα κερέλα οντουλά σο βακερέλα ο λάφι ι Ντεβλέσκο!» (Λουκάς 11:​27, 28) Ισί μπουτ σουκάρ τι χαιρίνας αμαρέ τσσαβένγκε. Αλλά οντουβά σο ανέλα αμένγκε χαρά σο ατσσόλα ισί τι ντας καν ι Ιεχωβάς ντα τι αβάς λέσκε αμαλά.

Λάσα μπαρί χαρά κάνα νιωθίνασα ι ευλογία ι Ιεχωβάσκι. Ντα παρόλο σο να μπεϊντίνασα ο δοκιμασίες, ναστί λένα αμένταρ αμαρί χαρά. Αλλά κάνα ατσσάσα πιστοί αζομάν σο νακχάσα ο δοκιμασίες, αμαρί χαρά αβέλα ατζέ πιο μπαρί. (Ρωμαίους 5:​3-5) Επίσης, ο Ιεχωβά ντέλα πο πνεύμας οντουλέντε σο τθερένα λέσκε εμπιστοσύνη, ντα η χαρά ισί αντρέ κο καρπός κι πνευμάσκο. (Γαλάτες 5:​22) Ανταβά βοηθίνελα-αμέν τι αγαβάς σόσκε ο εδάφιος Ψαλμός 64:​10 βακερέλα: «Ο δίκαιος κα αρακχέλ χαρά κο Ιεχωβά».

Άκ’ σόσκε η Νταϊάνα ντα ο Τζον μπορισάλε τι ατσσικιαρέν πουμαρί χαρά παρόλο σο τθερένας δυσκολίες. Η Νταϊάνα βακερέλα: «Τζάβα κο Ιεχωβά για τι αρακχαβάβ-μαν σαρ κα αρακχαβέλας-πες εκ χουρντό πι νταντέστε». Ντα βακερέλα: «Αισθάναβα ότι ευλογιντάς-μαν ντα ντινάς-μαν ι ζορ τι συνεχίναβ τι κεράβ έργος χωρίς τι χασαράβ μο ασαπέ». Σόσκε ο Τζον συνεχιντάς τι αβέλ χαρούμενος ντα τι κερέλ μπουτ πράγματα κάνα τσσιναντάς τι αβέλ επίσκοπος; Βοβ βακερέλα: «Κο 1998 διορισάλομ τι σικλιαράβ κι Σχολή Διακονικής Εκπαίδευσης. Από αζομάν, κερντόμ πιο μπουτ προσωπική μελέτη». Βακερέλα ότι ο αλλαγές σο έπρεπε τι κερέλ βοβ ντα λέσκι ρομνί ισινέ πιο εύκολες επειδή ισινέ πάντα έτοιμοι τι κερέν σο-ντα διορισμός τι ντέλας-λεν ο Ιεχωβά. Επίσης, βακερέλα: «Να μετανιωσάλαμ ιτς».

Μπουτ τζενέ αγαντέ ότι ο λάφια σο ισί κο Ψαλμός 64:​10 ισί μπαγιά. Σκεφτίνεν, για παράδειγμας, εκχέ ζευγαρίς σο υπηρετιντάς πιο μπουτ από 30 μπρεσά κο Μπέθελ κι Αμερική. Σοράν διορισάλε ειδικοί σκαπανείς. Βον βακερένα: «Ισί λογικός τι στεναχωρίντιβες κάνα χασαρέσα κάτι σο μανγκέσα». Αλλά βακερντέ: «Ναστί αβέσα στεναχωριμέ για πάντα». Μόλις λιντέ πουμαρό νεβό διορισμός, αρχισάλε τι τζαν κο έργος ι πφραλέντζαρ. Επίσης, βακερντέ: «Προσευχίντιβαας για κάποια μπουτ συγκεκριμέ πράγματα. Κάνα ντικχλάμ σαρ λάας απάντηση αμαρέ προσευχιέντε, λιντάμ ενθάρρυνση ντα χαρά. Χάνικ καιρός αφού γκιλάμ οντουλέ κχανγκιριάτε, αρχισάλε γιαβερά-ντα τζενέ ο σκαπανικός, ντα αμέν ευλογισάλαμ με ντούι μελέτες σο κερένας πρόοδος».

Νανέ πάντα εύκολος τι αβάς χαρούμενοι, ντα κα αβέν φαρ σο κα αβάς στεναχωριμέ. Όμως, ο Ιεχωβά παρηγορίνελα-αμέν ι λαφίντζαρ σο ισί κο εδάφιος Ψαλμός 64:​10. Ατζέ-ντα αν νιωθίνασα ότι χασαρντάμ αμαρό κουράγιος, μπορίνασα τι αβάς σίγουροι ότι αν ατσσιλάμ πιστοί σο-ντα τι νακχάσα, “κα αρακχάς χαρά κο Ιεχωβά”. Επίσης, μπορίνασα τι μπεκλεντίνας ότι κα αβέλ «νεβό ουρανός ντα νεβί πφουβ» σαρ ντινάς πο λάφι ο Ιεχωβά. Αζομάν, σαρέ κα αβέν τέλειοι ντα “πφερντέ χαρά για πάντα” σαρέ οντουλένγκε σο κα κερέλ ο Ιεχωβά.​—Ησαΐας 65:​17, 18.

Σκεφτίνεν σο μανγκέλα τι βακερέλ ανταβά. Κα τθεράς τέλεια υγεία ντα κα ιστιάς κάθε πρωί πφερντέ ζορ. Σαρέ ο πράγματα σο κερντέ-αμέν τι στεναχωρίντιβας να κα ανέν αμένγκε ντουκχ αζομάν. Ο Ιεχωβά βακερέλα αμένγκε ότι «ο πουρανέ να κα αβέν κι γκοντί ούτε κο γκι». Κα ντικχάς πάλι αμαρέ αγαπημέ τζενέν σο μουλέ, ντα κα νιωθίνας σαρ ο ντατ ντα η ντάι ι τσσαγιάκε σο ισινέ 12 μπρεσένγκι κάνα αναστιντάς-λα ο Ιησούς: «Βον λιντέ μπαρί χαρά ντα πφερντιλό λένγκο γκι ευτυχία». (Μάρκος 5:​42) Σαρέ ο τζενέ κι πφουβ κα αβέν μπαγιά δίκαιοι ντα κα “αρακχέν χαρά κο Ιεχωβά” για πάντα.