ΚΑΝΑ ο γιαβερά κερένα αμένγκε λατσσέ πράγματα, νιωθίνασα σουκάρ. Αμαρί ντουκχ κοβλιόλα κάνα τζανάσα ότι ο γιαβερά πφαμπόνα αμένγκε. Σαρέ μπεϊντίνασα τι σικαβέν αμένγκε λατσσιπέ, αλλά σαρ κα σικλιάς τι σικαβάς λατσσιπέ αμέν-ντα;

Εκ τζενό σο σικαβέλα λατσσιπέ πφαμπόλα μπαγιά ι γιαβερένγκε ντα σικαβέλα-λες ανταβά πι λαφίντζαρ ντα οντουλέντζαρ σο κερέλα. Νανέ απλά εκ λατσσό τζενό, αλλά κερέλα λατσσιπέ κο γιαβερά επειδή μανγκέλα ι τζενέν ντα αγαβέλα σο τθερένα πουμαρέ γκίστε. Ατζέ πιο σημαντικός ισί ότι ο λατσσιπέ ισί αντρέ κο καρπός κι πνευμάσκο. (Γαλάτες 5:​22, 23) Ο Ιεχωβά μανγκέλα τι σικαβάς λατσσιπέ, οτθάρ κα ντικχάς σαρ κερέλα-λες ανταβά Βοβ ντα λέσκο Τσσαβό ντα σαρ μπορίνασα τι μοιάζας λέντε.

Ο Ιεχωβά σικαβέλα λατσσιπέ σαριλένγκε, ατζέ-ντα «κο αχάριστοι ντα κο πφιρνέ». (Λουκάς 6:​35) Για παράδειγμας, «κερέλα τι νικιόλ ο κχαμ εμ ι γκεραλένγκε εμ ι λατσσένγκε ντα ανέλα ο μπρισίμ εμ οντουλένγκε σο ισί δίκαιοι εμ οντουλένγκε σο νανέ». (Ματθαίος 5:​45) Ατζέ-ντα ο τζενέ σο να πακιάνα ότι ο Ιεχωβά ισί Οντουβά σο κερντάς-λεν σαρέ, επηρεάντιβενα κατά λατσσέ πράγματα σο ντέλα ντα μπορεί τι ισί χαρούμενοι.

Ο Ιεχωβά σικλιαρέλα-αμέν τι σικαβάς λατσσιπέ αντράλ κατά λατσσέ πράγματα σο κερντάς κο Αδάμ ντα κι Εύα. Κάνα αμαρτιντέ, «σουβντέ πέσκε φύλλα χχελινγκινάκε για μα τι ντικχίντιβεν». Αλλά ο Ιεχωβά τζανέλας ότι αβρί κατά Εδέμ κα χρειαζίντιβενας σέα σο κα αρακχαβένας-λεν πιο μπουτ, σόσκε η πφουβ ισινέ καταραμέ ντα πφερντί «καντρέ». Οτθάρ, ο Ιεχωβά σικαντάς λένγκε λατσσιπέ ντα κερντάς λένγκε «μπαρέ σέα από δέρμας».​—Γένεση 3:7, 17, 18, 21.

Ο Ιεχωβά σικαβέλα λατσσιπέ «εμ ι γκεραλένγκε εμ ι λατσσένγκε», αλλά σικαβέλα πιο μπουτ λατσσιπέ πι πιστέ υπηρετόνγκε. Για παράδειγμας, αζομάν σο τζουβντιόλας ο προφήτης Ζαχαρίας, εκ άγγελος ανησυχίνελας σόσκε ο Ισραηλίτες τσσιναντέας τι κερέν ι Ιεχωβάσκο ναός κι Ιερουσαλήμ. Ο Ιεχωβά ασουντάς ο λάφια ι αγγελόσκε ντα βακερντάς λέσκε “λατσσέ λάφια για τι παρηγορίνελ-λες”. (Ζαχαρίας 1:​12, 13) Ο Ιεχωβά κερντάς κάτι ασακό κο προφήτης Ηλίας-ντα. Εκ φαρ, ο Ηλίας νιωθίνελας αζόμ στεναχωριμέ ντα κορκορό σο μανγκλάς κατά Ιεχωβά τι μουνταρέλ-λες. Ο Ιεχωβά σικαντάς ότι ενδιαφερίντιβελας οντουλένγκε σο νιωθίνελας ο Ηλίας ντα μπουτσσαντάς εκχέ αγγελός τι ντελ-λες ζορ. Ντα βακερντάς λέσκε ότι να ισινέ κορκορό. Ο λατσσιπέ ι Ιεχωβάσκο ντινάς ζορ κο Ηλίας για μα τι τσσιναβέλ τι κερέλ πο έργος. (1 Βασιλέων 19:​1-18) Όμως, σαρέ κατά υπηρέτες ι Ιεχωβάσκε, κον βακερένα ότι μοιάζελα λέστε πιο μπουτ κο τρόπος σο σικαβέλα λατσσιπέ;

Κάνα ο Ιησούς ισινέ κι πφουβ, ο τζενέ ντικχένας καζόμ λατσσό ισινέ. Ποτές να συμπεριφερίντιβελας μπέτι ντα ποτές να τσσουβέλας ι γιαβερέν τι κερέν ζορίσαρ οντουβά σο μανγκέλας. Πφαμπόλας ι γιαβερένγκε  ντα βακερντάς: «Ελάν μάντε, σαρέ τουμέν σο μαρένα-τουμέν ντα τθερένα μπουτ φορτία οπρά-τουμέντε, ντα με κα λοκχιαράβ-τουμέν. . . . Επειδή μο ζυγός ισί λατσσό». (Ματθαίος 11:​28-30) Ο Ιησούς ισινέ μπουτ λατσσό, οτθάρ ο τζενέ τζάνας παλά-λέστε κάι-ντα τι τζάλας. Τζιτζίνελας λένγκε ντα οτθάρ παρβαρέλας-λεν, κερέλας-λεν λατσσές ντα σικλιαρέλας-λεν «μπουτ πράγματα» πι Νταντέσκε.​—Μάρκος 6:​34· Ματθαίος 14:​14· 15:​32-38.

Ο Ιησούς αγαβέλας σο τθερένας ο τζενέ πουμαρέ γκίστε, σικαβέλας λένγκε λατσσιπέ ντα πφαμπόλας λένγκε. Ατζέ-ντα κάνα να ισινέ εύκολος λέσκε, βοηθίνελας λατσσιμάσαρ σαρέ οντουλέν σο τζάνας λέστε. (Λουκάς 9:​10, 11) Σκεφτίνεν σο αβιλό-πες ι τζουβλιάσαρ σο ισινέ νασφαλί ντα χασαρέλας ρατ. Μανγκέλας τι αβέλ λατσσές, οτθάρ ασταρντάς ο σέα ι Ιησούσκε. Αλλά σαρ βακερέλας ο Μωσαϊκός Νόμος, δεν έπρεπε τι κερέλ-λες ανταβά σόσκε ισινέ μαγαριμέ. (Λευιτικό 15:​25-28) Σο κερντάς ο Ιησούς; Να κερντάς λάφι χολιάσαρ. Ντικχλάς ότι νταρέλας, ντα τζιτζισάλο λάκε σόσκε τσσίντελας ταλαιπωρία 12 μπρεσά. Ο Ιησούς βακερντάς λάκε: «Μι τσσάι, τι πίστη κερντάς-τουτ λατσσές. Τζα λατσσιμάσαρ, ντα μα τι τθερές ατζέκ φαρ ανταβά μπέτι νασφαλιπέ». (Μάρκος 5:​25-34) Σο μπαρό λατσσιπέ σικαντάς ο Ιησούς!

Κο παραδείγματα σο ντικχλάμ πιο οπρέ, σικλιλάμ ότι σικαβάσα λατσσιπέ, όταν κεράσα πράγματα για τι βοηθίνας ι γιαβερέν. Ο Ιησούς σικαντάς καζόμ σημαντικός ισί ανταβά κάνα βακερντάς ι παραβολή ι λατσσέ Σαμαρειτίσκι. Εκ Ιουδαίος πελόας κι τσορένγκε βαστά ντα βον νταπλέ-λες ντα μουκχλέ-λες τι μερέλ κο ντρομ. Εκ Σαμαρείτης σο νακχέλας οτθάρ τζιτζισάλο λέσκε, παρόλο σο ο Σαμαρείτες ισινέ ντουσμάνια ι Ιουδαιόντζαρ. Ο λατσσιπέ κερντάς-λες τι βοηθίνελ ι ντινέ τζενές. Καθαριντάς λέσκε πληγές ντα γκερντάς-λες σε εκ ξενοδοχείος. Ο Σαμαρείτης ποκιντάς για τι φροντίνεν ι Ιουδαιός ντα βακερντάς ότι κα ποκινέλας σο-ντα γιαβέρ κα χρειαζίντιβελας.​—Λουκάς 10:​29-37.

Ο λατσσιπέ κα κερέλ-αμέν τι σκεφτίνας ι γιαβερέν ντα τι ντας-λεν ζορ όχι σάντε οντουλέντζαρ σο κεράσα αλλά αμαρέ λαφίντζαρ-ντα. Η Γραφή βακερέλα: «Ο τζενό σο ανησυχίνελα τσσουβέλα μπαρό πφαριπέ πι γκίστε, αλλά ο λατσσό λάφι κερέλα-λες τι χαιρίνελ». (Παροιμίες 12:​25) Κάνα ο λατσσιπέ ντα η αγαθότητα κερένα-αμέν τι βακεράς λάφια σο ντένα ζορ ι γιαβερέν, κα πφεράς-λεν χαρά. * (Ντικχ ι υποσημείωση) Αμαρέ λατσσέ λάφια κα σικαβέν ότι πφαμπάσα λένγκε ντα κα βοηθίνεν-λεν τι νταϊντίνεν ο προβλήματα.​—Παροιμίες 16:24.

Σαρέ μπορίνασα τι σικαβάς λατσσιπέ σόσκε ο Ντεβέλ κερντάς σαρέ ι τζενέν τι μοιάζεν λέστε. (Γένεση 1:​27) Για παράδειγμας, ο Ιούλιος, εκ Ρωμαίος αξιωματικός σο ισινέ υπεύθυνος για τι γκερέλ ι Παυλός κι Ρώμη, «σικαντάς λατσσιπέ κο [απόστολος] Παύλος ντα μουκχλάς-λες τι τζαλ πι αμαλέντε για τι φροντίνεν-λες» κι Σιδώνα. (Πράξεις 27:3) Κάνα ο καράβι σο ισινέ ο Παύλος ντα γιαβερά τζενέ βουλιαξάλο, ο τζενέ σο μπεσένας κι Μάλτα σικαντέ «λατσσιπέ σο να ισινέ συνηθισμέ» ντα τσσουντέ γιακ για τι ταταρέν-λεν. (Πράξεις 28:1, 2) Οντουλά τζενέ αζομάν κερντέ λατσσιπέ. Αλλά για τι κεράς ι Ιεχωβάσκο γκι, πρέπει πάντα τι σικαβάς λατσσιπέ.

Ο Ιεχωβά μανγκέλα τι τθεράς ο λατσσιπέ αντρέ κο γκι ντα τι σικαβάς-λες σο-ντα κεράσα αμαρέ ζωγιάτε. Άκ’ σόσκε βακερέλα αμένγκε τι “ιριάς” ο λατσσιπέ. (Κολοσσαείς 3:​12) Αλλά ισί φαρ σο νανέ εύκολος τι σικαβάς λατσσιπέ. Σόσκε; Μπορεί τι ισινάμ λατζανέ, μα τι ντάσα μπέσα αμαρέ νεαυτόστε, τι αβάς χάνικ εγωιστές ή μα τι νικιόλα αμένταρ τι κεράς λατσσιπέ οντουλένγκε σο τζάνα αμέντζαρ κόντρα. Αλλά άμα μανγκάσα κατά Ιεχωβά τι ντελ-αμέν πο άγιος πνεύμας ντα κεράσα ο πιο λατσσό για τι μοιάζας Λέστε, βοβ κα βοηθίνελ-αμέν τι αβάς τζενέ σο σικαβένα μπαγιά λατσσιπέ.​—1 Κορινθίους 2:12.

 Σαρ κα σικαβάς πιο μπουτ λατσσιπέ; Πουτσέν-τουμέν: “Ασουνάβα ι γιαβερέν προσεκτικά ντα προσπαθίναβα τι αγαβάβ σαρ νιωθίνενα; Ισινόμ τζανγκαντό για τι αγαβάβ κάνα τθερένα ανάγκη; Κάνα ισινέ η τελευταία φαρ σο σικαντόμ λατσσιπέ εκχέ τζενέσκε σο νανέ μι φαμιλιάταρ ή μο αμάλ;” Σοράν, κερέν συγκεκριμέ πράγματα, σαρ ισί τι σικλιόν πιο λατσσές ι γιαβερέν, ντα πιο μπουτ, ι πφραλέν κι κχανγκιρί. Αντικάς, κα σικλιόν σο προβλήματα τθερένα ντα σο χρειαζίντιβενα. Σοράν, κερέν σο νακχέλα τουμαρέ βαστέσταρ για τι σικαβέν κο γιαβερά ο λατσσιπέ σο μανγκένα τι σικαβέν βον τουμένγκε. (Ματθαίος 7:​12) Μανγκέν κατά Ιεχωβά τι βοηθίνελ-τουμέν ντα βοβ κα ευλογίνελ οντουλά σο κερένα για τι αβέν τζενέ σο σικαβένα λατσσιπέ.​—Λουκάς 11:13.

Ο Παύλος βακερντάς ότι εκ κατά πράγματα σο κερένας-λες τι αβέλ λατσσό υπηρέτης ι Ντεβλέσκο ισινέ ο λατσσιπέ. (2 Κορινθίους 6:​3-6) Ο τζενέ μανγκένας τι αβέν πασέ κο Παύλος επειδή βακερέλας ντα κερέλας λατσσέ πράγματα ντα πφαμπόλας ι τζενένγκε. (Πράξεις 28:​30, 31) Άμα σικαβάσα λατσσιπέ αμέν-ντα, ο γιαβερά μπορεί τι μανγκέν τι σικλιόν ι αλήθεια. Κάνα σικαβάσα λατσσιπέ σαριλένγκε, ατζέ-ντα οντουλένγκε σο τζάνα αμέντζαρ κόντρα, μπορεί τι ερεσάς λένγκε γκίστε ντα τι κεράς-λεν τι αλλάνεν. (Ρωμαίους 12:​20) Σοράν, μπορεί τι μανγκέν τι σικλιόν πιο μπουτ ι Γραφιάκε.

Κο Παράδεισος, σαρέ κα σικαβέν λατσσιπέ ο εκ κο γιαβέρ. Οντουλά σο κα αναστίντιβεν κα ντικχέν, μερικοί λένταρ για πρώτη φαρ, σο ισί ο πραγματικός λατσσιπέ. Ανταβά κα κερέλ-λεν τι σικαβέν βον-ντα λατσσιπέ κο γιαβερά. Κον να κα μανγκέλ τι σικαβέλ λατσσιπέ ντα τι βοηθίνελ ι γιαβερέν, να κα ατσσόλ κι Ντεβλέσκι Βασιλεία. Σάντε οντουλά σο σικαβένα αγάπη ντα λατσσιπέ κα τζουβντιόν για πάντα κο Παράδεισος. (Ψαλμός 37:​9-11) Οτθέ σαρέ κα αβέν αρακχαντέ ντα κα τθερέν ειρήνη! Αλλά μέχρι τι αβέλ ανταβά ντουνιάς, σαρ βοηθίντιβασα κάνα σικαβάσα λατσσιπέ;

Η Γραφή βακερέλα: «Ο λατσσό τζενό κερέλα πέσκε λατσσιπέ». (Παροιμίες 11:​17) Ο τζενέ μπεϊντίνενα τι αβέν εκχέ λατσσέ τζενέσαρ ντα μανγκένα τι σικαβέν βον-ντα λατσσιπέ λέσκε. Ο Ιησούς βακερντάς: «Σαρ συμπεριφερίντιβενα τουμέν ι γιαβερένγκε, κα συμπεριφερίντιβεν βον-ντα τουμένγκε». (Λουκάς 6:​38) Άρα, αγαβάσα ότι ισί εύκολος εκ λατσσό τζενό τι αρακχέλ λατσσέ αμαλέν ντα τι ατσσικιαρέλ-λεν.

Ο απόστολος Παύλος βακερντάς ι πφραλένγκε κι Έφεσος “τι σικαβέν λατσσιπέ ντα τι τζιτζίνεν ο εκ ι γιαβερέσκε με αγάπη, ντα τι συγχωρίνεν ο εκ ι γιαβερές αντράλ πουμαρέ γκίσταρ”. (Εφεσίους 4:​32) Κάνα σαρέ ο πφραλά σικαβένα λατσσιπέ ντα τζιτζίνενα ι γιαβερένγκε, η κχανγκιρί αβέλα ζουρανί ντα ενωμέ. Ποτές να κα μανγκάας τι κρίνας αμαρέ πφραλέν, τι κουτσομπολίνας-λεν ή τι βακεράς λάφια σο ντουκχαβένα λένγκο γκι για τι ασάς. Σο-ντα βακεράσα πρέπει πάντα τι βοηθίνελ ντα τι ντελ ζορ ι γιαβερέν. (Παροιμίες 12:​18) Άμα κα κεράς-λες ανταβά, ο πφραλά κι κχανγκιρί κα υπηρετίνεν ι Ιεχωβάς χαράσαρ.

Σαρ σικλιλάμ, ο λατσσιπέ σικαβάσα-λες σαρέ οντουλέντζαρ σο βακεράσα ντα κεράσα. Κάνα σικαβάσα λατσσιπέ, μοιάζασα κο Ιεχωβά Ντεβέλ, σο μανγκέλα ι γιαβερέν ντα ντέλα αντράλ πι γκίσταρ. (Εφεσίους 5:1) Αντικάς, κεράσα αμαρί κχανγκιρί πιο ζουρανί ντα ανάσα γιαβερέ-ντα τζενέν κι αλήθεια. Οτθάρ, τι κεράς σο νακχέλα αμαρέ βαστέσταρ για τι ντικχέν ο τζενέ ότι ο Μάρτυρες ι Ιεχωβάσκε σικαβένα λατσσιπέ!