1, 2. Σο βακερέλα αμένγκε τι κεράς ο εδάφιος Εβραίους 13:4;

ΣΑΡΕ μανγκάσα τι σεβάνας ι Ιεχωβάς. Βοβ αξίνελα αμαρό σεβασμός ντα ντέλα πο λάφι ότι κα σεβάνελ-αμέν βοβ-ντα. (1 Σαμουήλ 2:​30· Παροιμίες 3:9· Αποκάλυψη 4:​11) Επίσης, μανγκέλα τι σεβάνας ι γιαβερέ τζενέν, σαρ για παράδειγμας ι τζενέν σο τθερένα εξουσία. (Ρωμαίους 12:​10· 13:7) Αλλά πρέπει τι σεβάνας μπουτ κάτι γιαβέρ-ντα. Ο μπιαβ.

² Ο απόστολος Παύλος γραφιντάς: «Ο μπιαβ τι τθερέλ μπαρί αξία σαριλένγκε, ντα ο κρεβάτι ι ρομέσκο ντα ι ρομνιάκο μα τι αβέλ μαγαριμέ». (Εβραίους 13:4) Ο Παύλος βακερντάς κο Χριστιανοί ότι ο μπιαβ πρέπει τι τθερέλ λένγκε μπαρί αξία, δηλαδή τι σεβάνεν-λες. Τουμέν τθερένα ανταγιά άποψη ι μπιαβέσκε, ντα ειδικά τουμαρέ μπιαβέσκε, αν ισινέν παντριμέ;

3. Καγιά σημαντική συμβουλή ντινάς ο Ιησούς ι μπιαβέσκε; (Ντικχ ι φωτογραφία σο ισί κι αρχή)

³ Άμα τθερέλα τουμένγκε μπαρί αξία ο μπιαβ, ακολουθίνενα εκ μπουτ λατσσό παράδειγμας. Ο Ιησούς σεβάνελας ο μπιαβ. Κάνα ο Φαρισαίοι πουτσλέ-λες για το διαζύγιος, βοβ  βακερντάς ο λάφια σο βακερντάας ο Ντεβέλ ι πρώτε μπιαβέσκε: «Οτθάρ, ο τζενό κα μουκχέλ πι νταντές ντα πι νταγιά, ντα ο ντούι κα αβέν εκ σώμας». Επίσης, βακερντάς: «Ανταβά σο ο Ντεβέλ κερντάς εκ, τζενό μα τι χωρίνελ-λες».​—Διαβάνεν Μάρκος 10:​2-12· Γένεση 2:24.

4. Σο σκοπός τθερέλας ο Ιεχωβά ι μπιαβέσκε;

⁴ Ο Ιησούς συμφωνίνελας ότι ο Ντεβέλ κερντάς ο μπιαβ ντα ότι ο παντριμέ πρέπει τι αβέν γιεκ σαρί πουμαρί ζωή. Κάνα ο Ντεβέλ κερντάς ο πρώτος μπιαβ, να βακερντάς κο Αδάμ ντα κι Εύα ότι κα μπορίνενας τι λεν διαζύγιος. Λέσκο σκοπός ισινέ «ο ντούι» τι ατσσόν για πάντα ενωμέ πουμαρέ μπιαβέστε.

5. Σαρ ο μεριπέ επηρεαντάς ο μπιαβ;

⁵ Σαρ τζανένα, όμως, κάνα ο Αδάμ αμαρτιντάς αλλαξάλε μπουτ πράγματα. Εκ πράγμας σο αλλαξάλο ισινέ ότι ο τζενέ αρχισάλε τι μερέν, ντα ανταγιά αλλαγή επηρεαντάς ο μπιαβ. Ο απόστολος Παύλος εξηγιντάς κο Χριστιανοί ότι ο μεριπέ ντέλα τέλος κο μπιαβ ντα οντουβά σο ατσσόλα κι ζωή μπορίνελα τι παντρίνελ πάλι.​—Ρωμαίους 7:​1-3.

6. Σο σικλιαρέλα-αμέν ο Μωσαϊκός Νόμος για το τρόπος σο ντικχέλα ο Ντεβέλ ο μπιαβ;

⁶ Ο Νόμος σο ντινάς ο Ντεβέλ κο Ισραήλ τθερέλας οδηγίες ι μπιαβέσκε. Για παράδειγμας, εκ Ισραηλίτης μπορίνελας τι λελ μπουτέ ρομνίν. Ανταβά έθιμος νικίστιλο πριν τι ντελ ο Ντεβέλ ο Νόμος. Όμως, ο Νόμος να μουκχέλας ι μουρσέν τι συμπεριφερίντιβεν με μπέτι τρόπος κο τζουβλιά ντα κο τσσαβέ. Για παράδειγμας, άμα εκ Ισραηλίτης κα παντρίνελας εκχέ τζενιάσαρ σο ισινέ δούλη ντα σοράν κα λέλας γιαβερέ ρομνιά, έπρεπε τι συνεχίνελ τι φροντίνελ πι πρώτε ρομνιά. Ο Ντεβέλ μανγκέλας λέσταρ τι συνεχίνελ τι αρακχαβέλ-λα ντα τι φροντίνελ-λα. (Έξοδος 21:9, 10) Αμέν να ακολουθίνασα αντιβές ο Μωσαϊκός Νόμος. Αλλά σικλιαρέλα-αμέν ότι ο Ντεβέλ ντικχέλα ο  μπιαβ σαρ κάτι μπουτ σημαντικός. Ανταβά σίγουρα βοηθίνελα-αμέν τι σεβάνας ο μπιαβ.

7, 8. (α) Σο βακερέλας ο Νόμος για το διαζύγιος κο εδάφιος Δευτερονόμιο 24:​1; (β) Σαρ ντικχέλα ο Ιεχωβά ο διαζύγιος;

⁷ Σο βακερέλας ο Νόμος για το διαζύγιος; Παρόλο σο ο Ιεχωβά ποτές να τθερέλας πι γκοντιάτε τι χωρίνελ εκ ρομ ντα εκ ρομνί, ο Νόμος μουκχέλας εκχέ Ισραηλιτής τι λελ διαζύγιος πι ρομνιάταρ άμα κα “ντικχέλας λάτε κάτι σο να ισινέ σωστός”. (Διαβάνεν Δευτερονόμιο 24:1) Ο Νόμος να εξηγίνελας καβά πράγμας μπορεί “μα τι ισινέ σωστός”. Έπρεπε μα τι αβέλ εκ χουρντό λάθος, αλλά εκ πράγμας σο ανέλας λατζ ή κάτι μπουτ σοβαρός. (Δευτερονόμιο 23:​14) Δυστυχώς, κι Ιησούσκε ντιβεσά μπουτ Ιουδαίοι λένας διαζύγιος «χωρίς τι αβέλ σοβαρός λόγος». (Ματθαίος 19:3) Να μανγκάσα τι κεράς-λες αμέν-ντα ανταβά.

⁸ Κο ντιβεσά σο τζουβντιόλας ο Μαλαχίας, ο μουρσά λένας διαζύγιος πουμαρέ πρώτε ρομνιάταρ, μάλλον για τι παντρίνεν εκχέ πιο χουρντέ τζουβλιάσαρ σο να υπηρετίνελας ι Ιεχωβάς. Αλλά ο Ντεβέλ σικαντάς ξεκάθαρα σαρ ντικχέλας ο διαζύγιος. Βοβ βακερντάς: «Μισίναβα ο διαζύγιος». (Μαλαχίας 2:​14-16) Κι αρχή, ο Ντεβέλ βακερντάς ότι ο τζενό «κα μουκχέλ πι νταντές ντα πι νταγιά ντα κα αβέλ γιεκ πι ρομνιάσαρ σαρ εκ σώμας» ντα από αζομάν λέσκι άποψη ι μπιαβέσκε να αλλαξάλι. (Γένεση 2:​24) Ο Ιησούς σικαντάς ότι ντικχέλα ο μπιαβ σαρ ντικχέλα-λες λέσκο Ντατ κάνα βακερντάς: «Ανταβά σο ο Ντεβέλ κερντάς εκ, τζενό μα τι χωρίνελ-λες».​—Ματθαίος 19:6.

9. Σο μανγκένα τι βακερέν ι Ιησούσκε λάφια σο ισί κο εδάφια Μάρκος 10:​11, 12;

⁹ Κάποιος μπορεί τι σκεφτίνελ: “Αβέλα-πες εκ Χριστιανός τι λελ διαζύγιος ντα τι παντρίνελ πάλι;” Προσοχίνεν σο βακερντάς ο Ιησούς: «Κον κα λελ διαζύγιος πι ρομνιάταρ ντα κα παντρίνελ γιαβεράσαρ κερέλα λουμνιπέ ντα αδικίνελα-λα, ντα άμα εκ τζουβέλ κα λελ διαζύγιος πι ρομέσταρ ντα κα παντρίνελ γιαβερέσαρ, κερέλα λουμνιπέ». (Μάρκος 10:​11, 12· Λουκάς 16:​18) Ο Ιησούς, ανταλέ λαφίντζαρ, σικαντάς ξεκάθαρα ότι σεβάνελας ο μπιαβ ντα μανγκέλας ο γιαβερά-ντα τι κερέν ο ίδιος. Άμα εκ ρομ κα λέλας διαζύγιος πι πιστέ ρομνιάταρ ντα κα παντρίνελας πάλι, κα κερέλας λουμνιπέ. Ο ίδιος κα αβέλας-πες άμα εκ ρομνί-ντα κα λέλας διαζύγιος πι πιστέ ρομέσταρ. Ανταβά αβέλα-πες επειδή σάντε ο διαζύγιος να ντέλα τέλος κο μπιαβ. Κο γιακχά κι Ντεβλέσκε, ο ντούι συνεχίνενα τι αβέν «εκ σώμας». Επίσης, ο Ιησούς βακερντάς ότι άμα εκ μουρς κα λέλας διαζύγιος πι πιστέ ρομνιάταρ, βόι μπορεί τι κερέλας λουμνιπέ. Σαρ κα αβέλας-πες ανταβά; Οντουλά μπρεσά, εκ χωριμέ ρομνί μπορεί τι νιωθίνελας ότι έπρεπε τι παντρίνελ πάλι για τι μπορίνελ τι ντελ-λεν πέρα. Αν κα αβέλας-πες ανταβά, κα κερέλας λουμνιπέ.

10. Καβά ισί ο μόνος λόγος σο κα μπορίνελας εκ Χριστιανός τι λελ διαζύγιος ντα τι παντρίνελ πάλι;

 ¹⁰ Ο Ιησούς βακερντάς κάνα αβέλα-πες τι λελ εκ τζενό διαζύγιος: «Βακεράβα τουμένγκε ότι κον λέλα διαζύγιος πι ρομνιάταρ, παρόλο σο να γκιλί γιαβερέσαρ, ντα παντρίνελα εκχέ γιαβεράσαρ, κερέλα λουμνιπέ». (Ματθαίος 19:9) Πιο τζανγκλέ, ο Ιησούς βακερντάας-λες ανταβά κι Επί του Όρους Ομιλία-ντα. (Ματθαίος 5:​31, 32) Κο ντούι-ντα φαρ, ο Ιησούς κερντάς λάφι ι “λουμνιμάσκε”. Ο λουμνιπέ τθερέλα τι κερέλ διάφορε αμαρτιέντζαρ. Λουμνιπέ ισί κάνα εκ παντριμέ τζενό τζάλα γιαβερέσαρ ή κάνα εκ τζενό ποκινέλα εκχέ γιαβερές για τι τζαλ λέσαρ, κάνα τζενέ σο νανέ παντριμέ τζάνα ο εκ ι γιαβερέσαρ, κάνα τζάνα μουρσά μουρσέντζαρ ή τζουβλιά τζουβλίντζαρ ντα κάνα εκ τζενό τζάλα με εκ ζώος. Άμα, για παράδειγμας, εκ παντριμέ μουρς κα κερέλ λουμνιπέ, λέσκι ρομνί κα αποφασίνελ άμα κα λελ λέσταρ διαζύγιος ή να κα λελ. Άμα κα λελ, κι Ντεβλέσκε γιακχά να κα αβέν παντριμέ.

11. Σόσκε μπορεί εκ Χριστιανός τι τραμπίνελ μα τι λελ διαζύγιος ατζέ-ντα άμα μπορίνελα τι λελ;

¹¹ Ο Ιησούς να βακερντάς ότι ο αντρόγυνος πρέπει τι λελ διαζύγιος άμα ο εκ κατά ντούι κερντάς λουμνιπέ. Για παράδειγμας εκ ρομνί, σο λάκο ρομ κερντάς λουμνιπέ, μπορεί τι τραμπίνελ τι ατσσόλ λέσαρ. Σόσκε; Μπορεί τι μανγκέλα-λες ατζέκ. Μπορεί τι μανγκέλα τι συγχωρίνελ-λες ντα τι κερέλ πράγματα γιεκ λέσαρ για τι κερέν πουμαρό μπιαβ πιο ζουρανό. Ισί μπαγιά ότι άμα κα λελ διαζύγιος ντα να κα παντρίνελ πάλι, κα τθερέλ δυσκολίες. Για παράδειγμας, σαρ κα ντελ-λεν πέρα ντα σο κα αβέλ-πες με το σεξουαλικές ανάγκες λάκε; Σο κα κερέλ για μα τι νιωθίνελ κορκορί; Σο κα αβέλ-πες ι τσσαβέντζαρ; Αν κα λέλας διαζύγιος, κα αβέλας εύκολος λάκε τι μπαριαρέλ-λεν κι αλήθεια; (1 Κορινθίους 7:​14) Σίγουρα, οντουβά σο ατσσιλό πιστός πι ρομέστε ή πι ρομνιάτε ντα τραμπίνελα τι λελ διαζύγιος μπορεί τι τθερέλ μπαρέ δυσκολίες.

12, 13. (α) Καλά πράγματα αβιλέ κο μπιαβ του Ωσηέ; (β) Σόσκε ο Ωσηέ λιντάς παλάλ πι ρομνιά, ντα σο σικλιάσα λέσκε μπιαβέσταρ;

¹² Η εμπειρία σο τθερέλας ο προφήτης Ωσηέ σικλιαρέλα-αμέν μπουτ πράγματα για το τρόπος σο ντικχέλα ο Ντεβέλ ο μπιαβ. Ο Ντεβέλ βακερντάς κο Ωσηέ τι λελ εκχέ ρομνιά σο βακερένας λάκε Γόμερ. Βόι κα “κερέλας λουμνιπέ” ντα κα κερέλας “τσσαβέν πι λουμνιμάσταρ”. Η Γόμερ ντα ο Ωσηέ κερντέ εκχέ τσσαβές. (Ωσηέ 1:2, 3) Σοράν, η Γόμερ κερντάς εκχέ τσσαγιά ντα εκχέ τσσαβές, μάλλον γιαβερέ μουρσέσαρ. Παρόλο σο η Γόμερ να κερντάς σάντε εκ φαρ λουμνιπέ, ο Ωσηέ ατσσιλό παντριμέ λάσαρ. Σοράν, βόι μουκχλάς-λες ντα αβιλί δούλη. Βοβ όμως ποκιντάς για τι λελ-λα παλάλ. (Ωσηέ 3:1, 2) Ο Ιεχωβά, αντράλ κατά Ωσηέ, σικαντάς σαρ συγχωριντάς μπουτ φαρ ι Ισραηλιτέν παρόλο σο να ισινέ πιστοί Λέστε ντα ντένας λατρεία γιαβερέ ντεβλέντε. Σο σικλιάσα ανταλέσταρ;

¹³ Άμα ο ρομ ή η ρομνί σο ισί παντριμέ εκχέ Χριστιανόσαρ κερντάς λουμνιπέ, οντουβά σο ατσσιλό πιστός κο γιαβέρ πρέπει τι λελ εκ απόφαση. Ο Ιησούς βακερντάς ότι οντουβά σο ατσσιλό πιστός μπορίνελα τι λελ διαζύγιος ντα σοράν τι παντρίνελ πάλι. Όμως, να κα αβέλας λάθος άμα ο τζενό σο ατσσιλό πιστός κα τραμπίνελας τι συγχωρίνελ πι ρομές ή πι ρομνιά. Ο Ωσηέ λιντάς παλάλ πι ρομνιά. Κάνα η Γόμερ βουρτισάλι κο Ωσηέ, βακερντάς λάκε ότι δεν έπρεπε τι τζαλ γιαβερέ  μουρσέσαρ. Ο Ωσηέ να “σοβέλας” λάσαρ για χάνικ καιρός. (Ωσηέ 3:3, υποσημείωση) Αλλά σοράν πρέπει τι αρχισάλο πάλι τι σοβέλ λάσαρ. Ανταβά σικαντάς ότι ο Ντεβέλ μανγκέλας τι δεχτίνελ παλάλ ι Ισραηλιτέν ντα τι συνεχίνελ τι τθερέλ εκ λατσσί σχέση λέντζαρ. (Ωσηέ 1:​11· 3:​3-5) Σο σικλιαρέλα-αμέν ανταβά ι μπιαβέσκε; Άμα ο τζενό σο ατσσιλό πιστός αρχισάλο πάλι τι σοβέλ πι ρομέσαρ ή πι ρομνιάσαρ, σικαβέλα ότι συγχωριντάς λες ή λα. (1 Κορινθίους 7:3, 5) Άμα κερντάς-λες ανταβά, να αβέλα-πες τι λελ διαζύγιος. Ο ρομ ντα η ρομνί πρέπει τι προσπαθίνεν γιεκ ντα τι βοηθίνελ ο εκ ι γιαβερές τι ντικχέλ ο μπιαβ σαρ ο Ντεβέλ.

14. Σαρ βακερένα ο εδάφια 1 Κορινθίους 7:​10, 11, σο μπορεί τι αβέλ-πες εκχέ μπιαβέστε;

¹⁴ Σαρέ ο Χριστιανοί πρέπει τι σεβάνεν ο μπιαβ σαρ σεβάνελα-λες ο Ιεχωβά ντα ο Ιησούς. Όμως, μερικοί μπορεί μα τι κερένα-λες ανταβά επειδή σαρέ ισινάμ ατελείς. (Ρωμαίους 7:​18-23) Οτθάρ, δεν πρέπει τι κερέλ αμένγκε εντύπωση ότι μερικοί Χριστιανοί κο πρώτος αιώνας τθερένας μπαρέ προβλήματα πουμαρέ μπιαβέστε. Ο Παύλος γραφιντάς ότι «δεν πρέπει η ρομνί τι μουκχέλ πι ρομές». Αλλά μερικές φορές ανταβά αβέλας-πες.​—Διαβάνεν 1 Κορινθίους 7:​10, 11.

15, 16. (α) Σο πρέπει τι κερέλ εκ αντρόγυνος κάνα τθερέλα προβλήματα κο μπιαβ, ντα σόσκε; (β) Σαρ μπορίνελα τι αβέλ-πες ανταβά άμα ο εκ κατά ντούι να υπηρετίνελα ι Ντεβλές;

¹⁵ Ο Παύλος να εξηγιντάς σόσκε χωρίνενας ο αντρόγυνα αζομάν. Αλλά τζανάσα ότι ο πρόβλημας να ισινέ ότι ο ρομ κερντάς λουμνιπέ. Άμα κερντάας-λες ανταβά, η ρομνί κα μπορίνελας τι λελ διαζύγιος ντα τι παντρίνελ πάλι. Ο Παύλος γραφιντάς ότι εκ ρομνί σο χωρισάλι πι ρομέσταρ πρέπει «τι ατσσόλ μπι-ρομέσκι ή τι αρακχέλ-λεν πι ρομέσαρ». Άρα, κι Ντεβλέσκε γιακχά συνεχίνενας τι αβέν παντριμέ. Ο Παύλος βακερντάς ότι σο-ντα προβλήματα τι τθερένα, άμα καέκ κατά ντούι να κερντάς λουμνιπέ, πρέπει τι προσπαθίνεν τι αρακχέν-λεν, δηλαδή τι λύνεν πουμαρέ προβλήματα ντα τι ατσσόν γιεκ. Μπορίνενα τι μανγκέν κατά πρεσβύτεροι τι βοηθίνεν-λεν. Ο πρεσβύτεροι να κα τσσίντεν κατά μουρς ή κατά τζουβέλ, αλλά κα ντεν-λεν λατσσέ συμβουλές κατά Αγία Γραφή.

¹⁶ Όμως, σο αβέλα-πες άμα εκ πφραλ ή εκ πφεν ισί παντριμέ εκχέ τζενέσαρ σο να υπηρετίνελα ι Ιεχωβάς; Όταν τθερένα προβλήματα κο μπιαβ, ισί λατσσό τι χωρίνεν; Σαρ ντικχλάμ, η Γραφή βακερέλα ότι ο λουμνιπέ ισί εκ λόγος σο μπορίνελα εκ αντρόγυνος τι λελ διαζύγιος. Αλλά κι Γραφή να αρακχάσα λόγους για τι  χωρίνελ εκ αντρόγυνος. Ο Παύλος γραφιντάς: «Αν εκ τζουβέλ τθερέλα ρομές σο νανέ κι πίστη, ντα βοβ μανγκέλα τι μπεσέλ λάσαρ, μα τι μουκχέλ πι ρομές». (1 Κορινθίους 7:​12, 13) Ανταβά ισί αμαρέ ντιβεσένγκε-ντα.

17, 18. Σόσκε ατσσιλέ παντριμέ μερικοί Χριστιανοί παρόλο σο τθερένας μπαρέ προβλήματα;

¹⁷ Μερικέ περιπτωσιέντε, εκ “ρομ σο νανέ κι πίστη” σικαβέλα ότι να «μανγκέλα τι μπεσέλ» πι ρομνιάσαρ. Για παράδειγμας, μπορεί τι νταπέλα-λα αζόμ μπουτ σο βόι νιωθίνελα ότι λάκι υγεία ή ατζέ-ντα λάκι ζωή ισί σε κίνδυνος. Μπορεί μα τι μανγκέλα τι ανέλ ο αναγκαία λάκε ντα κι φαμιλί ή μα τι μουκχέλα-λα τι κερέλ τίποτα για τι υπηρετίνελ ι Ντεβλές. Αν αβέλα-πες κάτι ασακό, εκ πφεν μπορεί τι αποφασίνελ ότι λάκο ρομ, παρόλο σο μπορεί μα τι παραδεχτίνελα-λες, να «μανγκέλα τι μπεσέλ λάσαρ» ντα ότι πρέπει τι χωρίνελ. Γιαβερά Χριστιανές όμως ασακέ περιπτωσιέντε τραμπιντέ τι μπεσέν πουμαρέ ρομέσαρ. Νταϊντιντέ ντα προσπαθιντέ τι κερέν πιο ζουρανό πουμαρό μπιαβ. Σόσκε;

¹⁸ Άμα εκ ρομ ντα εκ ρομνί κα χωρίνεν ιτιρί ασακέ πραγματένταρ, κι Ντεβλέσκε γιακχά ισί ατζέ παντριμέ, ντα μπορεί τι τθερέν ο δυσκολίες σο ντικχλάμ πιο τζανγκλέ. Ο απόστολος Παύλος βακερντάς ατζέκ εκ λόγος για τι ατσσόν γιεκ. Βοβ γραφιντάς: «Ο ρομ σο νανέ κι πίστη αγιάντιβελα χάρη πι ρομνιάταρ, ντα η ρομνί σο νανέ κι πίστη αγιάντιβελα χάρη κο πφραλ· άμα να κα αβένας μαζί, τουμαρέ τσσαβέ κα αβένας μαγαριμέ, αλλά ακανά ισί άγια». (1 Κορινθίους 7:​14) Μπουτ Χριστιανοί τραμπιντέ τι ατσσόν πουμαρέ ρομέσαρ ή ρομνιάσαρ, σο να υπηρετίνενας ι Ιεχωβάς, παρόλο σο τθερένας μπαρέ προβλήματα. Χαιρισάλε μπουτ σο κερντέ ανταγιά θυσία επειδή πιο σοράν λένγκο ρομ αβιλό ή λένγκι ρομνί αβιλί Μάρτυρας ι Ιεχωβάσκε.​—Διαβάνεν 1 Κορινθίους 7:​16· 1 Πέτρου 3:1, 2.

19. Σόσκε ισί η Χριστιανική κχανγκιρί πφερντί τζενέντζαρ σο τθερένα ευτυχισμέ μπιαβά;

¹⁹ Ο Ιησούς κερντάς λάφι για το διαζύγιος ντα ο απόστολος Παύλος ντινάς συμβουλές ι χωριμάσκε. Ο ντούι-ντα μανγκένας τι σεβάνεν ο υπηρέτες ι Ντεβλέσκε ο μπιαβ. Αντιβές σαρό κο ντουνιάς, η Χριστιανική κχανγκιρί ισί πφερντί τζενέντζαρ σο τθερένα ευτυχισμέ μπιαβά. Μπορίνενα τι ντικχέν μπουτ ευτυχισμέ αντρόγυνα τουμαρέ κχανγκιριάτε, αφοσιωμέ μουρσέν σο μανγκένα πουμαρέ ρομνίν ντα αφοσιωμέ τζουβλίν σο σεβάνενα πουμαρέ ρομέν. Σαρέ σικαβένα ότι ο μπιαβ τθερέλα μπαρί αξία. Χαιρίνασα σο εκατομμύρια παντριμέ τζενέ σικαβένα καζόμ μπαγιά ισί ο λάφια ι Ντεβλέσκε: «Οτθάρ, ο τζενό κα μουκχέλ πι νταντές ντα πι νταγιά ντα κα αβέλ γιεκ πι ρομνιάσαρ, ντα ο ντούι κα αβέν εκ σώμας».​—Εφεσίους 5:​31, 33.