1, 2. Σόσκε ισί λατσσό τι ασουνάς Οντουλές σο κερντάς-αμέν κάνα τραμπίνασα σο τι κεράς αμαρέ ζωγιάτε; (Ντικχ ο φωτογραφίες σο ισί κι αρχή)

ΑΜΑ ισινάν τερνό, μπουτ τζενέ μπορεί τι βακερένα τούκε σο τι κερές κο μέλλον. Το δάσκαλοι ή γιαβερά τζενέ μπορεί τι βακερένα τούκε τι σπουδάνες ή τι αρακχές εκ μπουτί σο κα νικαβές λάταρ μπουτ λοβέ. Αλλά ο Ιεχωβά βακερέλα τούκε κάτι γιαβέρ. Μανγκέλα τι κερές ο πιο λατσσό κο σχολείος για τι μπορίνες τι κερές εκ μπουτί σο κα βοηθίνελ-τουτ τι τθερές ο απαραίτητα κάνα κα μπαριός. (Κολοσσαείς 3:​23) Αλλά τζανέλα επίσης ότι κάνα ισινάν τερνό, πρέπει τι λες σημαντικές αποφάσεις σο κα επηρεάνεν το μέλλον. Οτθάρ, ντέλα-τουτ αρχές σο σικαβένα τούκε σο τι κερές ντα βοηθίνενα-τουτ τι κερές λέσκο γκι ανταλέ τελευταίε ντιβεσέντε.​—Ματθαίος 24:14.

² Τι ντες-τουτ γκοντί ότι ο Ιεχωβά τζανέλα-λεν σαρέ. Τζανέλα σο κα αβέλ-πες ανγκλ’ αμέντε ντα τζανέλα ακριβώς κάνα κα αβέλ ο τέλος ανταλέ ντουνιάσκο. (Ησαΐας 46:​10· Ματθαίος  24:3, 36) Ο Ιεχωβά τζανέλα τουτ-ντα. Τζανέλα σο κα ανέλ τούκε χαρά ντα σο κα ανέλ τούκε στεναχώρια. Ο συμβουλές ι τζενένγκε μπορεί τι ντικχίντιβενα λατσσέ, αλλά άμα να αβένα αντράλ κατά Ντεβλέσκο Λάφι, να βοηθίνενα-αμέν μπαγιά.​—Παροιμίες 19:21.

3, 4. Σαρ επηρεασάλο ο Αδάμ, η Εύα ντα λένγκε τσσαβέ κατά συμβουλή ι Μπενγκέσκι;

³ Ο Μπενγκ ισινέ ο πρώτος σο ντινάς κο τζενέ συμβουλές σο να ισινέ λατσσέ. Βακερντάς κι Εύα ότι βόι ντα ο Αδάμ κα αβένας πιο ευτυχισμέ άμα κα τραμπίνενας τι τζουβντιόν σαρ μανγκένας βον. (Γένεση 3:​1-6) Αλλά ο Μπενγκ ντικχέλας πο νεαυτός! Μανγκέλας κατά Αδάμ ντα κατά Εύα, αλλά εμ λένγκε τσσαβένταρ, τι ντεν καν ντα λατρεία λέστε, όχι κο Ιεχωβά. Όμως, ο Μπενγκ να κερντάας τίποτα λατσσό ι τζενένγκε. Ο Ιεχωβά ισινέ οντουβά σο ντινάς-λεν σο-ντα τθερένας. Κερντάς-λεν ζευγάρι, ντινάς-λεν εκ μπουτ σουκάρ κήπος τι μπεσέν ντα λένγκο τέλειος σώμας για τι μπορίνεν τι τζουβντιόν για πάντα.

⁴ Δυστυχώς, ο Αδάμ ντα η Εύα να ντινέ καν ι Ντεβλές. Κάνα κερντέ-λες ανταβά, νασλέ Οντουλέσταρ σο ντινάς-λεν ζωή. Ο αποτελέσματα ισινέ μπουτ μπέτι. Σαρ εκ λουλούδι σο τσσινάσα-λες, ο Αδάμ ντα η Εύα αρχισάλε σιγά σιγά τι πφουρίλιβεν ντα μουλέ. Λένγκε τσσαβέ-ντα τσσιντιντέ τιμωρία, ντα ανταβά αβέλα-πες αμέντζαρ-ντα. (Ρωμαίους 5:​12) Ο πιο μπουτ τζενέ αντιβές να ντένα σημασία κι Ντεβλέσκε Λάφια ντα κερένα σο μανγκένα βον. (Εφεσίους 2:​1-3) Καλά ισί ο αποτελέσματα; Η Αγία Γραφή βακερέλα ότι «να υπαρχίντιβελα σοφία» κάνα ο τζενέ τζάνα κόντρα κο Ιεχωβά.​—Παροιμίες 21:30.

5. Σο τζανέλας ο Ιεχωβά ι τζενένγκε, ντα σόσκε τθερέλας δίκιος;

⁵ Ο Ιεχωβά τζανέλας ότι κα υπαρχίντιβενας τζενέ, ντα μπουτ τερνέ-ντα, σο κα μανγκένας τι σικλιόν λέσκε ντα τι υπηρετίνεν-λες. (Ψαλμός 103:​17, 18· 110:3) Ανταλά τερνέ τθερένα μπαρί αξία ι Ιεχωβάσκε! Άμα ισινάν τούι-ντα εκ λένταρ, σίγουρα τθερέσα μπερεκέτι “λατσσέ πράγματα” κατά Ντεβέλ, ντα ανταλά κερένα-τουτ τι αβές ατζέ πιο ευτυχισμέ. (Διαβάνεν Ψαλμός 103:5· Παροιμίες 10:​22) Κα ντικχάς σταρ ανταλέ πραγματένταρ: Ο πνευματικός χαμπέ, ο λατσσέ αμαλά, ο λατσσέ στόχοι ντα ι αληθινή ελευθερία.

6. Σόσκε πρέπει τι φροντίνες ι ανάγκη σο τθερέσα ι πνευματικέ πραγματένγκε, ντα σο ντέλα ο Ιεχωβά για τι βοηθίνελ-τουτ;

⁶ Ο ζώα να τθερένα ανάγκη ο πνευματικά πράγματα, δηλαδή τι σικλιόν Οντουλέσκε σο κερντάς-λεν. Αλλά αμέν τθεράσα. (Ματθαίος 4:4) Κάνα ασουνάσα ι Ντεβλές, αγαβάσα πιο λατσσές ο πράγματα, τθεράσα σοφία ντα ευτυχία. Ο Ιησούς βακερντάς: «Ευτυχισμέ ισί οντουλά σο αγαβένα ότι τθερένα ανάγκη ο πνευματικά πράγματα». (Ματθαίος 5:3) Ο Ντεβέλ ντέλα-αμέν ι Γραφή ντα, αντράλ κατά «πιστός ντα φρόνιμος δούλος», ντέλα-αμέν έντυπα σο βοηθίνενα-αμέν τι κεράς αμαρί πίστη πιο ζουρανί. (Ματθαίος 24:​45) Βακεράσα ότι ανταλά έντυπα ισί πνευματικός χαμπέ επειδή μπαριαρένα αμαρί πίστη ντα κερένα πιο ζουρανί αμαρί φιλία ι Ιεχωβάσαρ. Σο μπερεκέτι πνευματικός χαμπέ τθεράσα!​—Ησαΐας 65:​13, 14.

7. Σαρ κα βοηθίνελ-τουτ ο πνευματικός χαμπέ σο ντέλα ο Ντεβέλ;

⁷ Ο πνευματικός χαμπέ κα ντελ-τουτ  σοφία ντα ικανότητα τι σκεφτίνες λατσσές. Ανταλά ιδιότητες κα αρακχαβέν-τουτ μπουτέ πραγματένταρ. (Διαβάνεν Παροιμίες 2:​10-14) Για παράδειγμας, κα βοηθίνεν-τουτ τι αγαβές ο ψέματα, σαρ ισί ο ψέμας ότι να υπαρχίντιβελα Δημιουργός ή ότι ο λοβέ ντα ο υλικά πράγματα κα κερέν-τουτ ευτυχισμέ. Ντα κα βοηθίνεν-τουτ μα τι μανγκές ντα μα τι κερές πράγματα σο νανέ τι λατσσιμάσκε. Οτθάρ, κερ ο πιο λατσσό για τι αβές γκοντιαβέρ ντα τι σκεφτίνες λατσσές. Κα αγαβές ότι ο Ιεχωβά μανγκέλα-τουτ ντα μανγκέλα ο πιο λατσσό τούκε.​—Ψαλμός 34:8· Ησαΐας 48:​17, 18.

8. Σόσκε πρέπει ακανά τι τζας πιο πασέ κο Ντεβέλ, ντα σαρ κα βοηθίνελ-τουτ ανταβά κο ντιβεσά σο κα αβέν;

⁸ Ατζεχάνικ, ι Μπενγκέσκο ντουνιάς κα καταστραφίντιβελ σαρό. Σάντε ο Ιεχωβά κα μπορίνελ τι αρακχαβέλ-αμέν ντα τι ντελ-αμέν οντουλά σο χρειαζίντιβασα, σαρ για παράδειγμας ο χαμπέ ανταλέ ντιβεσέσκο! (Αββακούμ 3:2, 12-19) Οτθάρ, ακανά ισί ο σαάτι τι τζας πιο πασέ κο Ντεβέλ ντα τι μπαριαρές τι εμπιστοσύνη λέστε. (2 Πέτρου 2:9) Άμα κα κερές-λες ανταβά, σο-ντα τι αβέλ-πες, κα νιωθίνες σαρ ο Δαβίδ σο γραφιντάς: «Τθεράβα ι Ιεχωβάς πάντα ανγκλά-μάντε. Βοβ ισί κο δεξιά μάνταρ, οτθάρ ποτές να κα περάβ».​—Ψαλμός 16:8.

9. (α) Σαρ βακερέλα ο εδάφιος Ιωάννης 6:​44, σο κερέλα ο Ιεχωβά; (β) Καβά σουκάρ πράγμας αβέλα-πες κάνα ντικχάσα πρώτη φαρ γιαβερέ Μαρτυρέν;

⁹ Κάνα ντικχέσα πρώτη φαρ εκχέ τζενές σο νανέ κι αλήθεια, καζόμ πράγματα τζανέσα λέσκε; Μπορεί τι τζανέσα σάντε λέσκο ναβ ντα σαρ ισί αβριάλ. Αλλά νανέ αντικάς κάνα ντικχέσα πρώτη φαρ εκχέ τζενές σο ισί κι αλήθεια. Τζανέσα ότι μανγκέλα ι Ιεχωβάς. Τζανέσα ότι ο Ιεχωβά ντικχλάς κάτι λατσσό λέστε ντα αντάς-λες πι φαμιλιάτε για τι υπηρετίνελ-λες. (Διαβάνεν Ιωάννης 6:​44) Ατζέ-ντα άμα ισί γιαβερτθάρ ή μπαριλό γιαβέρτουλους, τζανέσα μπουτ πράγματα λέσκε ντα βοβ τζανέλα μπουτ πράγματα τούκε!

10, 11. Σαρ μοιάζενα ο Μάρτυρες ι Ιεχωβάσκε ο εκ ι γιαβερέσαρ, ντα σαρ επηρεάνελα-τουτ ανταβά;

 ¹⁰ Κάνα ντικχέσα πρώτη φαρ εκχέ γιαβερέ Μαρτυράς, τζανέσα ότι μοιάζενα κο πιο σημαντικά πράγματα. Τζανέσα ότι ατζέ-ντα άμα κερένα λάφι γιαβέρ τσσιπ, ο ντούι-ντα κερένα λάφι ι «πάκι τσσιπ» ι αληθειάκι. (Σοφονίας 3:9) Ανταβά μανγκέλα τι βακερέλ ότι ο ντούι-ντα πακιάνα κο ίδιος Ντεβέλ, ντένα καν κο ίδιοι κανόνες ντα τθερένα ι ίδια ελπίδα για το μέλλον. Ανταλά πράγματα βοηθίνενα-τουμέν τι ντεν μπέσα ο εκ κο γιαβέρ ντα τι κερέν εκ ζουρανί φιλία σο κα ατσσόλ για πάντα.

¹¹ Κάνα υπηρετίνεσα ι Ιεχωβάς, μπορίνεσα μπαγιά τι βακερές ότι τθερέσα ι πιο λατσσέ αμαλέν. Τθερέσα αμαλέν σαρό κο ντουνιάς, ατζέ-ντα άμα να τζανέσα-λεν ατζέκ! Κον γιαβέρ, σο νανέ κι Ιεχωβάσκο λαός, τθερέλα ανταβά μπουτ σουκάρ δώρος;

12. Καλά λατσσέ στόχους μπορίνεσα τι τσσουβές;

¹² Διαβάνεν Εκκλησιαστής 11:​9–12:1. Τθερέσα στόχους σο προσπαθίνεσα τι πετυχίνες; Μπορεί τι τσσουντάν στόχος τι διαβάνες ι Γραφή κάθε ντιβές ή τι κερές λάφι ντα τι σικλιαρές πιο λατσσές κο συναθροίσεις. Ή μπορεί τι προσπαθίνεσα τι χρησιμοποιήνες πιο λατσσές ι Γραφή κο έργος. Σαρ νιωθίνεσα κάνα ντικχέσα ότι αβέσα πιο λατσσό ή κάνα βακερένα-λες τούκε ο γιαβερά; Τθερέσα μπουτ χαρά. Σόσκε; Επειδή κερέσα οντουβά σο μανγκέλα τούταρ ο Ιεχωβά, σαρ κερντάς ο Ιησούς-ντα.​—Ψαλμός 40:8· Παροιμίες 27:11.

13. Σόσκε ισί πιο λατσσό τι τσσουβές στόχους κι υπηρεσία κι Ντεβλέσκι, ντα όχι ανταλέ ντουνιάστε;

¹³ Κάνα τσσουβέσα στόχους κι υπηρεσία κι Ιεχωβάσκι, κερέσα εκ έργος σο ντέλα-τουτ χαρά ντα πφερέλα τι ζωή. Ο Παύλος βακερντάς: «Τι αβέν σταθεροί, ντα πάντα τι τθερέν μπουτ πράγματα τι κερέν κο έργος κι Κυριόσκο, επειδή τζανένα ότι ο Κύριος εκτιμίνελα τουμαρέ μπαρέ προσπάθειες». (1 Κορινθίους 15:​58) Αλλά κάνα ο τζενέ τσσουβένα στόχους ανταλέ ντουνιάστε, σαρ ισί τι νικαβέν λοβέ ή τι τθερέν μπαρό ναβ, νανέ μπαγιά ευτυχισμέ. Ατζέ-ντα άμα κα τζαν ανγκλάλ ανταλέ ντουνιάστε, μπουτ φαρ νιωθίνενα τσουτσέ αντρέ-πουμέντε. (Λουκάς 9:​25) Σικλιάσα-λες ανταβά κατά βασιλιάς Σολομών.​—Ρωμαίους 15:4.

14. Σο σικλιόσα οντουλέσταρ σο κερντάς ο Σολομών;

¹⁴ Ο Σολομών, σο ισινέ εκ κατά πιο χουλανέ ντα μπαρέ τζενέ, μανγκέλας τι σικλιόλ κάτι. Βακερντάς αντρέ πέστε: «Κα δοκιμάναβ ο απολαύσεις για τι ντικχάβ σο λατσσιπέ αβέλα ανταλένταρ». (Εκκλησιαστής 2:​1-10) Οτθάρ, κερντάς πααλίς κχερά, μπουτ σουκάρ κήπους ντα πάρκα, ντα σο γιαβέρ ντέλας λέσκο γκι. Νιωθίνελας σοράν πφερντό ντα ευτυχισμέ; Κάνα αντάς πι γκοντιάτε σαρέ οντουλά σο κερντάς, βακερντάς: «Αγαντόμ ότι σινανέ κερντόμ-λεν σαρέ . . . Τίποτα . . . να αξίνελας μπαγιά». (Εκκλησιαστής 2:​11) Τούι κα σικλιός οντουλέσταρ σο κερντάς ο Σολομών;

15. Σόσκε χρειαζίντιβεσα πίστη, ντα σαρ κα βοηθίνελ-τουτ, σαρ σικλιάσα κατά εδάφιος Ψαλμός 32:8;

¹⁵ Ισί τζενέ σο σικλιόνα πράγματα κι ζωή σάντε κάνα κερένα λάθη ντα τθερένα μπέτι αποτελέσματα. Ο Ιεχωβά να μανγκέλα τι αβέλ-πες ανταβά τούκε-ντα. Μανγκέλα τι ντες-λες καν. Για τι κερές-λες ανταβά χρειαζίντιβεσα πίστη, ντα ποτές να κα μετανιώνες  ι πραγματένγκε σο τραμπίνεσα χάρη κι πίστη σο τθερέσα. Ντα ο Ιεχωβά ποτές να κα μπιστρέλ “ι αγάπη σο σικαντάν λέσκε ναβέσκε”. (Εβραίους 6:​10) Οτθάρ, κερ σο νακχέλα τι βαστέσταρ για τι κερές τι πίστη ζουρανί. Αντικάς, κα τραμπίνες λατσσέ πράγματα κι ζωή ντα κα ντικχές ότι το Ντατ σο ισί κο ουρανός μανγκέλα ο πιο λατσσό τούκε.​—Διαβάνεν Ψαλμός 32:8.

16. Σόσκε πρέπει τι εκτιμίνας ι ελευθερία ντα τι χρησιμοποιήνας-λα γκοντιάσαρ;

¹⁶ Ο Παύλος γραφιντάς: «Οτθέ σο ισί ο πνεύμας ι Ιεχωβάσκο, ισί ελευθερία». (2 Κορινθίους 3:​17) Ο Ιεχωβά μανγκέλα ι ελευθερία, ντα κερντάς τουτ-ντα τι μανγκές-λα. Αλλά μανγκέλα τι χρησιμοποιήνες γκοντιάσαρ τι ελευθερία για τι αρακχαβέλ-τουτ. Μπορεί τι τζανέσα τερνέν σο ντικχένα πορνογραφία, κερένα λουμνιπέ, ασχολίντιβενα με αθλήματα σο ισί μπουτ επικίνδυνα ντα λένα ναρκωτικά ή ματιόνα. Κι αρχή, ανταλά πράγματα μπορεί τι ντικχίντιβενα σουκάρ, αλλά μπουτ φαρ ανένα μπέτι αποτελέσματα. Για παράδειγμας, ισί τζενέ σο ναστί τσσιναβένα ασακέ πράγματα ντα γιαβερά νασφάλιβενα ή ατζέ-ντα μερένα. (Γαλάτες 6:7, 8) Ο τερνέ σο κερένα ασακέ πράγματα μπορεί τι αμντίνενα ότι ισί ελεύθεροι, αλλά νανέ.​—Τίτο 3:3.

17, 18. (α) Σαρ αβάσα μπαγιά ελεύθεροι κάνα ντάσα καν ι Ντεβλές; (β) Σαρ ισινέ ο Αδάμ ντα η Εύα πιο ελεύθεροι κατά τζενέ αντιβές;

¹⁷ Οκιά μπάνταρ, ισί λατσσό αμένγκε τι ντας καν ι Ιεχωβάς. Κερέλα λατσσιπέ κι υγεία ντα ελευθερώνελα-αμέν μπαγιά. (Ψαλμός 19:​7-11) Ντα κάνα χρησιμοποιήνεσα γκοντιάσαρ τι ελευθερία, ή γιαβέρτουλους κάνα τραμπίνεσα τι ντες καν κο τέλειοι νόμοι ντα αρχές σο ντέλα ο Ντεβέλ, σικαβέσα λέσκε, αλλά εμ τι νταντέσκε ντα τι νταγιάκε, ότι μπορίνενα τι ντεν τούκε μπέσα ντα πιο μπουτ ελευθερία. Ντα ο Ιεχωβά ντέλα πο λάφι ότι ατζεχάνικ κα ντελ σαρέ πι πιστέ υπηρετόντε τέλεια ελευθερία, σο βακέρντιβελα κι Γραφή «ελευθερία σο τθερένα με δόξα ο τσσαβέ ι Ντεβλέσκε».​—Ρωμαίους 8:21.

¹⁸ Ανταγιά ισινέ η ελευθερία σο τθερένας ο Αδάμ ντα η Εύα. Κο κήπος της Εδέμ, σάντε εκ πράγμας βακερντάς λένγκε ο Ντεβέλ μα τι κερέν, μα τι χαν εκχέ δεντρόσταρ. (Γένεση 2:9, 17) Πακιάσα ότι ο Ντεβέλ ισινέ άδικος ή λέλας λένταρ λένγκι ελευθερία κάνα βακερντάς-λες ανταβά; Σίγουρα όχι! Σκέφτινε ότι ο τζενέ κερντέ μπουτ νόμοι ντα ότι τσσουβένα ι γιαβερέν τι ντεν-λεν καν ζορίσαρ. Αλλά ο Ιεχωβά ντινάς κο Αδάμ ντα κι Εύα σάντε εκ νόμος.

19. Σαρ σικλιαρέλα-αμέν ο Ιεχωβά ντα ο Ιησούς για τι αβάς ελεύθεροι;

¹⁹ Ο τρόπος σο συμπεριφερίντιβελα ο Ιεχωβά πι υπηρετόνγκε σικαβέλα ότι ισί μπουτ γκοντιαβέρ. Αντίς τι ντελ-αμέν μπουτ νόμοι, σικλιαρέλα-αμέν με υπομονή τι ντας καν κο νόμος σο βακερέλα τι μανγκάς ι γιαβερέν. Σικλιαρέλα-αμέν τι ντας καν κο αρχές λέσκε ντα τι μισίνας ο γκεραλιπέ. (Ρωμαίους 12:9) Κι Επί του Όρους Ομιλία, λέσκο Τσσαβό, ο Ιησούς, βοηθιντάς-αμέν τι αγαβάς σόσκε κερένα  μπέτι πράγματα ο τζενέ. (Ματθαίος 5:​27, 28) Ντα κο νεβό ντουνιάς, σαρ Βασιλιάς κι Βασιλεία κι Ντεβλέσκι, κα συνεχίνελ τι σικλιαρέλ-αμέν τι ντικχάς ο λατσσιπέ ντα ο γκεραλιπέ σαρ ντικχέλα-λες βοβ. (Εβραίους 1:9) Ο Ιησούς κα κερέλ-αμέν τι αβάς τέλειοι κι γκοντί ντα κο σώμας. Σκέφτινε σαρ κα αβέλ αμαρί ζωή κάνα να κα νικιόλ αμένταρ τι κεράς μπέτι πράγματα ντα να κα τσσίντας τιμωρία κατά αμαρτία. Αζομάν, σαρ ντινάς πο λάφι ο Ιεχωβά, κα ντελ-αμέν ι “ελευθερία με δόξα” σο μπεσάσα σαρ σαρ τι τθεράς.

20. (α) Σαρ χρησιμοποιήνελα ο Ιεχωβά πι ελευθερία; (β) Σαρ κα μοιάζες λέστε;

²⁰ Αμαρί ελευθερία κα τθερέλ όρια κο νεβό ντουνιάς-ντα. Σαρ; Πάντα κα χρειαζίντιβελ τι οδηγίνελ-αμέν αμαρί αγάπη ι Ντεβλέσκε ντα ι τζενένγκε. Κάνα κεράσα-λες ανταβά, μοιάζασα κο Ιεχωβά. Παρόλο σο ο Ιεχωβά τθερέλα ελευθερία χωρίς όρια, τραμπίνελα τι μουκχέλ ι αγάπη τι οδηγίνελ σαρέ οντουλά σο κερέλα, εμ ι συμπεριφορά σο τθερέλα αμένγκε. (1 Ιωάννη 4:7, 8) Ισί λογικός τι βακεράς ότι ισινάμ μπαγιά ελεύθεροι σάντε κάνα μοιάζασα λέστε.

21. (α) Σαρ νιωθίνελας ο Δαβίδ ι Ιεχωβάσκε; (β) Σο κα ντικχάς κο γιαβέρ μάθημας;

²¹ Εκτιμίνεσα ο μπερεκέτι λατσσέ πράγματα σο ντινάς-τουτ ο Ιεχωβά σαρ ισί ο πνευματικός χαμπέ, ο λατσσέ αμαλά, ο λατσσέ στόχοι ντα η ευκαιρία τι τθερές τέλεια ελευθερία ανγκλά-τούτε; (Ψαλμός 103:5) Μπορεί τι νιωθίνεσα σαρ ο Δαβίδ σο βακερντάς κι προσευχή ο λάφια σο ισί κο Ψαλμός 16:​11: «Σικλιαρέσα-μαν ο ντρομ ι ζωγιάκο. Οτθέ σο ισινάν τούι ισί μπαρί χαρά· κο δεξιά τούταρ ισί ευτυχία για πάντα». Κο γιαβέρ μάθημας, κα ντικχάς γιαβερά-ντα σουκάρ αλήθειες σο αρακχάσα κο Ψαλμός 16. Κα σικαβέν τούκε σαρ κα τθερές ι πιο λατσσί ζωή σο κα μπορίνεας τι τθερές!