1. Σαρ ντικχένα μπουτ τζενέ ι μπουτί;

ΣΑΡ ντικχένα ι μπουτί ο πιο μπουτ τζενέ τουμαρέ τθεμέστε; Ακανά μπουτέ τθεμέντε, ο τζενέ μαρένα-πες ντα κερένα μπουτί πιο μπουτ σαρέ κατά γιαβερά μπρεσά σο νακχλέ. Ο τζενέ σο κερένα μπουτ σαάτια μπουτί, ο πιο μπουτ φαρ να ερεσαβένα τι ξεκουράντιβεν, τι μπεσέν πουμαρέ φαμιλιάσαρ ή τι σικλιόν ι Ντεβλέσκε. (Εκκλ. 2:​23) Όμως, ισί τζενέ-ντα σο να μπεϊντίνενα ιτς τι κερέν μπουτί, οτθάρ αρακχένα δικαιολογίες για μα τι κερέν μπουτί.​—Παρ. 26:​13, 14.

2, 3. Σαρ ντικχέλα ο Ιεχωβά ντα ο Ιησούς ι μπουτί;

² Είτε κερένα μπουτ μπουτί ο τζενέ είτε να μπεϊντίνενα-λα ιτς, ντικχέν σαρ ντικχέλα ι μπουτί ο Ιεχωβά ντα ο Ιησούς. Ισινάμ σίγουροι ότι ο Ιεχωβά κερέλα μπουτί. Ο Ιησούς σικαντάς-λες ξεκάθαρα ανταβά κάνα βακερντάς: «Μο Ντατ κερέλα μπουτί μέχρι ακανά, με-ντα κεράβα μπουτί». (Ιωάν. 5:​17) Σκεφτίνεν σαρί ι μπουτί σο κερντάς ο Ντεβέλ κάνα λατσσαρντάς ι μπουτέ αγγελόν, ο τσεργανιά ντα ο πλανήτες. Ντικχάσα επίσης ο μπερεκέτι σουκάρ πράγματα σο κερντάς ατθέ κι πφουβ. Ο ψαλμωδός μπουτ σωστά βακερντάς: «Καζόμ μπουτ ισί οντουλά σο κερντάν, Ιεχωβά! Σαρέ με σοφία κερντάν-λεν. Η πφουβ ισί πφερντί οντουλέντζαρ σο κερντάν».​—Ψαλμ. 104:24.

³ Ο Ιησούς μοιάζελας πι Νταντέστε. Ο Τσσαβό βοηθιντάς ι Ντεβλές κάνα «λατσσαρέλας ο ουρανός». Ισινέ γιεκ ι Ιεχωβάσαρ σαρ εκ «μπουτ λατσσό εργάτης». (Παρ. 8:​27-31) Μπουτ πιο σοράν, κάνα ο Ιησούς ισινέ κι πφουβ, κερντάς μπουτ λατσσί μπουτί. Οντιά μπουτί ισινέ σαρ χαμπέ λέσκε,  ντα οντουλά σο κερέλας σικαβένας ότι μπουτσσαντάας-λες ο Ντεβέλ.​—Ιωάν. 4:​34· 5:​36· 14:10.

4. Σο σικλιάσα κατά Ιεχωβά ντα κατά Ιησούς για την ξεκούραση;

⁴ O Ιεχωβά ντα ο Ιησούς κερένα μπουτ μπουτί. Μανγκέλα τι βακερέλ ανταβά ότι δεν πρέπει τι μπεσάς ιτς; Νάα. Ο Ιεχωβά να κχινιόλα ιτς, οτθάρ να χρειαζίντιβελα τι ξεκουράντιβελ. Αλλά η Γραφή βακερέλα ότι, κάνα ο Ιεχωβά λατσσαρντάς ο ουρανός ντα ι πφουβ, σοράν «τσσιναντάς τι κερέλ μπουτί ντα ξεκουρασάλο». (Έξοδ. 31:​17) Σαρ ντικχίντιβελα, ο Ιεχωβά τσσιναντάς τι κερέλ μπουτί ντα νιωσάλο πφερντό οντουλέντζαρ σο κερντάας. Ο Ιησούς-ντα, παρόλο σο κερέλας μπουτ μπουτί καζόμ τζουβντιόλας κι πφουβ, αρακχέλας σαάτι τι ξεκουράντιβελ ντα τι χαλ πι αμαλέντζαρ.​—Ματθ. 14:​13· Λουκ. 7:34.

5. Σο ισί δύσκολος μπουτέ τζενένγκε;

⁵ Η Γραφή βακερέλα κι Ντεβλέσκο λαός τι κερέν μπουτί. Ι Ντεβλέσκε υπηρέτες πρέπει τι αβέν μπουτιαρνέ, όχι σάντε τι μπεσέν πέσκε. (Παρ. 15:​19) Μπορεί τουμέν-ντα τι κερένα μπουτί για τι ντεν τουμαρέ φαμιλιάτε ο αναγκαία. Ντα σαρέ ο μαθητές ι Χριστόσκε τθερένα ι ευθύνη τι βακερέν ο λατσσέ αμπέρια. Αλλά χρειαζίντιβενα ξεκούραση-ντα. Ισί μπάζιμ δύσκολος τουμένγκε τι αρακχέν σαάτι τι κερέν μπουτί, τι τζαν κο έργος ή τι ξεκουράντιβεν; Σαρ τζανάσα καζόμ μπουτί τι κεράς ντα καζόμ τι μπεσάς;

6. Σαρ σικαβένα ο εδάφια Μάρκος 6:​30-34 ότι ο Ιησούς τθερέλας ισορροπημέ άποψη ι μπουτιάκε ντα για την ξεκούραση;

⁶ Κι μπουτί η ισορροπία ισί σημαντική. Ι Ντεβλέσκε πνευμάσαρ, ο βασιλιάς Σολομών γραφιντάς: «Ισί βακίτι . . . ι κάθε μπουτιάκε». Κερντάς λάφι μπουτέ πραγματένγκε σαρ ισί η μπουτί, ο ροϊπέ, ο ασαπέ ντα ο κχελιπέ. (Εκκλ. 3:​1-8) Αγαντίντιβελα ότι ντούι σημαντικά πράγματα κι ζωή ισί η μπουτί ντα η ξεκούραση. Ο Ιησούς ισινέ ισορροπημέ κο ντούι-ντα. Εκ φαρ, ο απόστολοι βουρτισάλε κατά έργος. Κερένας αζόμ πράγματα σο «να ερεσαβένας ούτε τι χαν». Ο Ιησούς βακερντάς: «Ελάν κορκορέ εκχέ τθανέστε σο νανέ τζενέ ντα ξεκουράντιβεν χάνικ». (Διαβάνεν Μάρκος 6:​30-34) Παρόλο σο ο Ιησούς ντα λέσκε μαθητές ναστί ξεκουράντιβενας πάντα καζόμ μανγκένας, ο Ιησούς τζανέλας ότι σαρέ χρειαζίντιβενας ξεκούραση.

7. Σαρ κα βοηθίντιβας άμα κα σικλιάς ο νόμος ι Σαββατόσκο;

⁷ Μπάζιμα σαρέ χρειαζίντιβασα τι ξεκουράντιβας ή τι αλλάνας οντουλά σο κεράσα κάθε ντιβές. Ανταβά ντικχίντιβελα κατά μπουτ σημαντική εντολή σο ντινάς ο Ντεβέλ κο Ισραηλίτες. Βακερντάς λένγκε τι κερέν ο Σάββατος κάθε εβδομάδα. Αμέν αντιβές να ισινάμ τελάλ κατά Μωσαϊκός Νόμος. Αλλά κα αβέλ λατσσό τι σικλιάς σο βακερέλας οντουλέ ντιβεσέσκε. Κα σικλιάς πράγματα σο κα βοηθίνεν-αμέν τι αγαβάς σαρ ντικχάσα ι μπουτί ντα ι ξεκούραση.

8. Καλέ πραγμάσκε ισινέ ο Σάββατος σαρ βακερένα ο εδάφια Έξοδος 31:​12-15;

⁸ Ο Ντεβέλ κερντάς σαρέ ο πράγματα αντρέ σιοβ «ντιβεσέντε» ντα σοράν, σαρ βακερέλα ο Λάφι ι Ντεβλέσκο, τσσιναντάς τι λατσσαρέλ πράγματα κι πφουβ. (Γέν. 2:2) Αλλά ο Ιεχωβά μανγκέλα ι μπουτί ντα μέχρι ακανά κερέλα γιαβερά-ντα μπουτιά. (Ιωάν. 5:​17) Ο Ιεχωβά κερντάς μπουτί σιοβ «ντιβεσά» ντα ξεκουρασάλο ο γιαβέρ «ντιβές» ντα βακερντάς ι Ισραηλιτένγκε τι κερέν ο ίδιος. Ο Ντεβέλ βακερντάς ότι ο Σάββατος ισινέ εκ σημάδι σο σικαβέλας ότι κερντάς συμφωνία ι Ισραηλιτέντζαρ. Ισινέ ντιβές για «τι ξεκουράντιβεν . . . , άγιος ι Ιεχωβάσκε». (Διαβάνεν Έξοδος 31:​12-15)  Καέκ ναστί κερέλας μπουτί, ούτε ο χουρντέ, ούτε ο δούλοι, ούτε ο ζώα. (Έξοδ. 20:​10) Αντικάς, ο Ισραηλίτες κα τθερένας πιο μπουτ πουμαρέ γκοντιάτε ο πράγματα ι Ντεβλέσκε.

9. Καγιά λάθος άποψη ι Σαββατόσκε τθερένας μερικά τζενέ κο ντιβεσά κι Ιησούσκε;

⁹ Ο Σάββατος κερέλας λατσσιπέ ι Ντεβλέσκε λαόσκε. Όμως, μπουτ παπάζια κο ντιβεσά κι Ιησούσκε τθερένας μπουτ λάθος άποψη οντουλέ ντιβεσέσκε. Βακερένας ότι ισινέ παράνομος ατζέ-ντα τι γκίντελας εκ τζενό χάνικ γκιβ ή τι κερέλας λατσσές εκχέ νασφαλές κο Σάββατος. (Μάρκ. 2:​23-27· 3:​2-5) Ανταβά να μανγκέλας-λες ο Ντεβέλ, ντα ο Ιησούς σικαντάς-λες ξεκάθαρα οντουλένγκε σο μανγκένας τι ασουνέν.

10. Σο σικλιάσα κατά τρόπος σο ντικχέλας ο Ιησούς ο Σάββατος σαρ βακερένα ο εδάφια Ματθαίος 12:​9-12;

¹⁰ Ο Ιησούς ντα ο Ιουδαίοι σο τζάνας παλά-λέστε κερένας ο Σάββατος σόσκε ισινέ τελάλ κατά Μωσαϊκός Νόμος. * Ο Ιησούς όμως σικαντάς οντουλέντζαρ σο βακερντάς ντα κερντάς ότι να ισινέ λάθος τι κερέν λατσσέ πράγματα ι γιαβερένγκε κο Σάββατος. Βακερντάς ξεκάθαρα: «Να τζάλα κόντρα κο νόμος εκ τζενό σο κερέλα λατσσιπέ κο Σάββατος». (Διαβάνεν Ματθαίος 12:​9-12) Να πακιάλας ότι ισινέ λάθος τι κερέλ εκ τζενό λατσσέ πράγματα ι γιαβερένγκε κο Σάββατος. Οντουλά σο κερντάς ο Ιησούς σικαβένας σόσκε κερένας ο Σάββατος. Επειδή ξεκουράντιβενας κατά μπουτιά, τθερένας ι ευκαιρία τι τζαν πιο πασέ κο Ντεβέλ. Ο Ιησούς μπαριλό εκχέ φαμιλιάτε σο ντικχίντιβελα ότι κερέλας-λες ανταβά.  Αγαβάσα-λες ανταβά οντουλένταρ σο κερντάς ο Ιησούς κάνα ισινέ πι τθεμέστε κι Ναζαρέτ: «Σαρ κερέλας κο Σάββατα, γκιλό κι συναγωγή ντα ιστίντιλο τι διαβάνελ».​—Λουκ. 4:​15-19.

11. Κον ισινέ λατσσό παράδειγμας ι Ιησούσκε κι μπουτί;

¹¹ Ο Ιωσήφ ντικχέλας ι μπουτί σαρ ντικχέλας-λα ο Ντεβέλ. Σικλιαρντάς ι Ιησούς τι αβέλ ξυλουργός. (Ματθ. 13:​55, 56) Ο Ιησούς μάλλον ντικχέλας ότι ο Ιωσήφ κερέλας κάθε ντιβές μπουτ μπουτί για τι νικαβέλ-λεν πέρα πι μπαρέ φαμιλιάσαρ. Ισί σημαντικός ότι ο Ιησούς βακερντάς πι μαθητένγκε: «Οντουβά σο κερέλα μπουτί αξίνελα τι ποκίντιβελ». (Λουκ. 10:7) Βα, ο Ιησούς τζανέλας σο μανγκέλα τι βακερέλ τι κερές μπουτ μπουτί.

12. Καλά εδάφια σικαβένα σο βακερέλα η Γραφή ι μπουτ μπουτιάκε;

¹² Ο απόστολος Παύλος-ντα τζανέλας σο μανγκέλα τι βακερέλ τι κερές μπουτ μπουτί. Η πιο σημαντική μπουτί σο κερέλας ισινέ τι βακερέλ κο γιαβερά ι Ιησούσκε ναβέσκε ντα λέσκε λαφίνγκε. Όμως, ο Παύλος κερέλας μπουτί-ντα για τι νικαβέλ-λεν πέρα. Ο πφραλά κι Θεσσαλονίκη τζανένας ότι “κχινιόλας ντα μαρέλας-πες κι μπουτί ντισάρα ντα ιράτ για μα τι αβέλ βάρος καεκχέσκε”. (2 Θεσ. 3:8· Πράξ. 20:​34, 35) Ατθέ ο Παύλος μπορεί τι βακερέλας πι μπουτιάκε σο ισινέ τι κερέλ τσαντίρια. Καζόμ ισινέ κι Κόρινθος, μπεσέλας κο Ακύλας ντα κι Πρίσκιλλα ντα «κερέλας λέντζαρ μπουτί» σόσκε βον-ντα κερένας τσαντίρια. Κάνα ο Παύλος βακερντάς ότι κερέλας μπουτί «ντισάρα ντα ιράτ», να μανγκέλας τι βακερέλ ότι να τσσιναβέλας ποτές τι κερέλ μπουτί. Ισινέ φαρ σο να κερέλας μπουτί, σαρ για παράδειγμας κο Σάββατος. Οντουβά ντιβές τθερέλας ι ευκαιρία τι κερέλ έργος κο Ιουδαίοι, σο βον-ντα να κερένας μπουτί κο Σάββατος.​—Πράξ. 13:​14-16, 42-44· 16:​13· 18:​1-4.

13. Σο σικλιάσα κατά παράδειγμας ι Παυλόσκο;

¹³ Ο απόστολος Παύλος μουκχλάς λατσσό παράδειγμας. Παρόλο σο έπρεπε τι κερέλ μπουτί, αρακχέλας χρόνος τι κερέλ “ο άγιος έργος, τι βακερέλ ο λατσσέ αμπέρια ι Ντεβλέσκε”. (Ρωμ. 15:​16· 2 Κορ. 11:​23) Βακερέλας ι γιαβερένγκε-ντα τι κερέν-λες ανταβά. Βακερντάς ότι ο Ακύλας ντα η Πρίσκιλλα ισινέ λέσκε «συνεργάτες κο έργος σο τθερέλα τι κερέλ ι Ιησού Χριστόσαρ». (Ρωμ. 12:​11· 16:3) Ο Παύλος βακερέλας κο Κορίνθιοι «τι τθερέν μπουτ πράγματα τι κερέν κο έργος κι Κυριόσκο». (1 Κορ. 15:​58· 2 Κορ. 9:8) Επίσης, ο Ιεχωβά ντινάς-λες πο πνεύμας τι γραφίνελ: «Άμα εκ τζενό να μανγκέλα τι κερέλ μπουτί, δεν πρέπει τι χαλ».​—2 Θεσ. 3:10.

14. Σο μανγκέλας τι βακερέλ ο Ιησούς ι λαφίντζαρ σο ισί κο εδάφιος Ιωάννης 14:12;

¹⁴ Η πιο σημαντική μπουτί ανταλέ τελευταίε ντιβεσέντε ισί ο έργος σο κεράσα για τι βακεράς ο λατσσέ αμπέρια ντα τι κεράς μαθητέν. Ο Ιησούς βακερντάς ότι λέσκε μαθητές κα κερένας ατζέ πιο μπαρέ πράγματα λέσταρ! (Διαβάνεν Ιωάννης 14:​12) Να μανγκέλας τι βακερέλ ότι κα κεράας θαύματα σαρ κερέλας βοβ. Μανγκέλας τι βακερέλ ότι οντουλά σο τζάνας παλά-λέστε κα βακερένας ο λατσσέ αμπέρια ντα κα σικλιαρένας πιο μπουτ τζενέν, πιο μπουτ τθανέντε ντα πιο μπουτ καιρός λέσταρ.

15. Σο πρέπει τι πουτσάς-αμέν, ντα σόσκε;

¹⁵ Άμα κερένα μπουτί, πουτσέν-τουμέν: “Τθεράβα ο ναβ μπουτιαρνέ τζενέσκο μι μπουτιάτε; Τελειώναβα μο μπουτιά οπράλ κο σαάτι ντα καζόμ πιο λατσσές αβέλα-πες;” Άμα μπορίνενα τι βακερέν «βα», μάλλον κα ντελ τουμένγκε μπέσα τουμαρό αφεντικός. Ντα ο τζενέ σο ντικχένα-τουμέν κα μανγκέν ατζέ πιο μπουτ τι ασουνέν ο λατσσέ αμπέρια. Για τι αγαβέν σαρ βακερένα  ο λατσσέ αμπέρια ντα σαρ σικλιαρένα, πουτσέν-τουμέν: “Τθεράβα ο ναβ τζενέσκο σο κερέλα μπουτ πράγματα κο έργος; Προετοιμάντιβαβα λατσσές κάνα τζάβα πρώτη φαρ κο τζενέ; Τζάβα σουγκό τι ντικχάβ πάλι οντουλέν σο μανγκένα τι σικλιόν πιο μπουτ; Κεράβα ο έργος διάφορε τροπόντζαρ;” Άμα μπορίνενα τι βακερέν «βα», κα αρακχέν χαρά τουμαρέ εργόστε.

16. Σαρ ντικχέλας ο Ιησούς ντα ο απόστολοι ι ξεκούραση, αλλά σαρ ντικχένα-λα μπουτ τζενέ αντιβές;

¹⁶ Ο Ιησούς τζανέλας ότι μπάζιμα εμ βοβ εμ ο απόστολοι χρειαζίντιβελας τι μπεσέν χάνικ. Όμως, σαρ αζομάν, αντικάς αντιβές-ντα, μπουτ τζενέ ισί σαρ ο χουλανό τζενό σο βακερντάς ο Ιησούς κι παραβολή. Οντουβά τζενό βακερέλας πέσκε: «Μπες τούκε, χα, πι, νακχ λατσσές». (Λουκ. 12:​19· 2 Τιμ. 3:4) Λέσκε, ο πιο σημαντικός κι ζωή ισινέ τι μπεσέλ πέσκε ντα τι νακχέλ λατσσές. Οκιά μπάνταρ, ο Ιησούς ντα λέσκε απόστολοι να ντικχένας ο πράγματα αντικάς.

17. Σο κεράσα κάνα να κεράσα μπουτί;

¹⁷ Αμέν αντιβές προσπαθίνασα τι αβάς σαρ ο Ιησούς, οντουλέσκε κάνα να κεράσα μπουτί, να μπεσάσα αμένγκε σάντε, αλλά βακεράσα ο λατσσέ αμπέρια ντα τζάσα κο συναθροίσεις. Ισί μπουτ σημαντικός αμένγκε τι κεράς μαθητέν ντα τι τζας κο συναθροίσεις, οτθάρ κεράσα ο πιο λατσσό ανταλέ πραγματένγκε. (Εβρ. 10:​24, 25) Ατζέ-ντα κάνα ισινάμ κο διακοπές, τζάσα κο συναθροίσεις κάι-ντα τι αβάς ντα ρόντασα ευκαιρίες τι κεράς λάφι ι Γραφιάκε κο τζενέ σο αρακχάσα.​—2 Τιμ. 4:2.

18. Σο μανγκέλα τι κεράς αμαρό Βασιλιάς, ο Χριστός Ιησούς;

¹⁸ Ισινάμ πφερντέ εκτίμηση σο αμαρό Βασιλιάς, ο Χριστός Ιησούς, να μπεκλεντίνελα αμένταρ τι κεράς πράγματα σο ναστί κεράσα ντα βοηθίνελα-αμέν τι τθεράς ισορροπημέ άποψη ι μπουτιάκε ντα για την ξεκούραση! (Εβρ. 4:​15) Βοβ μανγκέλα τι ξεκουράντιβας καζόμ χρειαζίντιβελα. Αλλά μανγκέλα τι κεράς μπουτ μπουτί-ντα για τι τθεράς ο αναγκαία ντα τι τζας κο έργος για τι κεράς μαθητέν, εκ έργος σο πφερέλα-αμέν. Κο γιαβέρ μάθημας, κα ντικχάς σο κερντάς ο Ιησούς για τι ελευθερώνελ-αμέν κατά αμαρτία.