1, 2. (α) Σο ισί ιωβηλαίος; (Ντικχ ο πλαίσιος «Σο Ισινέ ο Ιωβηλαίος;») (β) Καλέ πραγμάσκε βακερντάς ο Ιησούς κο εδάφια Λουκάς 4:​16-18;

ΜΕΡΙΚΕ τθεμέντε, αβένα-πες γιορτές κάνα εκ τζενό πφάντελα 50 μπρεσά σαρ βασιλιάς ή βασίλισσα. Οντουβά μπρες μπουτ φαρ βακέρντιβελα ιωβηλαίος οντουλέ βασιλιάσκο. Η γιορτή σο αβέλα-πες κο ιωβηλαίος μπορεί τι ατσσικιαρέλ εκ ντιβές, εκ εβδομάδα ή ατζέ πιο μπουτ, αλλά σοράν τελειώνελα ντα μπουτ σουγκό μπιστάρντιβελα.

² Αμέν κα ντικχάς εκ πιο λατσσό ιωβηλαίος, πιο λατσσό ατζέ-ντα κατά γιορτή σο ατσσικιαρέλας εκ μπρες ντα αβέλας-πες κάθε 50 μπρεσά κο πουρανό Ισραήλ. Οντουβά πουρανό Ιωβηλαίος ντέλας ελευθερία κο Ισραηλίτες. Σόσκε τθερέλα σημασία αμένγκε αντιβές; Επειδή ο Ιωβηλαίος μπρες ι Ισραηλιτένγκο ανέλα αμαρέ γκοντιάτε εκ μπουτ σουκάρ πράγμας σο κερέλα αντιβές-ντα ο Ιεχωβά για τι τθεράς ελευθερία σο κα ατσσικιαρέλ για πάντα, εκ ελευθερία σο βακερντάς ο Ιησούς.​—Διαβάνεν Λουκάς 4:​16-18.

3. Σαρ βοηθίντιβενας ο Ισραηλίτες κατά Ιωβηλαίος σαρ βακερένα ο εδάφια Λευιτικό 25:​8-12;

³ Μπορίνασα τι αγαβάς πιο λατσσές σο μανγκέλας τι βακερέλ ο Ιησούς κάνα βακερντάς για ελευθερία άμα κα ντικχάς πρώτα ο Ιωβηλαίος σο βακερντάς ο Ντεβέλ ι Ισραηλιτένγκε τι κερέν. Ο Ιεχωβά βακερντάς λένγκε: «Οπράλ κο 50 μπρεσά πρέπει τι αβέλ άγιος μπρες τουμένγκε ντα τι βακερέν ότι κα αβέλ ελευθερία κο τθεμ σαρέ οντουλένγκε σο μπεσένα οτθέ. Ανταβά κα αβέλ Ιωβηλαίος τουμένγκε, ντα ο κάθε εκ τουμένταρ κα βουρτίνελ πι τθανέστε ντα πι φαμιλιάτε». (Διαβάνεν Λευιτικό 25:​8-12) Κο γιαβέρ μάθημας, ντικχλάμ σαρ βοηθίντιβενας ο Ισραηλίτες κατά Σάββατος σο κερένας κάθε  εβδομάδα. Όμως, σαρ βοηθίντιβενας κατά Ιωβηλαίος; Βακερέν ότι εκ Ισραηλίτης ισινέ πφερντό μπόρτζια ντα αναγκασάλο τι μπικινέλ πο τθαν για τι ποκινέλ-λεν. Κάνα κα αβέλας ο Ιωβηλαίος μπρες, κα λέλας παλάλ πο τθαν. Αντικάς βοβ μπορίνελας τι «βουρτίνελ πι τθανέστε», ντα σοράν κα λένας οντουβά τθαν λέσκε τσσαβέ. Επίσης, άμα εκ τζενό ισινέ μπουτ τσορορό μπορεί τι ερεσέλας κο σημείος τι μπικινέλ εκχές πι τσσαβένταρ, ή ατζέ-ντα πες, σαρ δούλος για τι ποκινέλ πο μπόρτζι. Κάνα κα αβέλας ο Ιωβηλαίος μπρες, ο δούλος κα “βουρτίνελας πι φαμιλιάτε”. Αντικάς, καέκ να κα ατσσόλας για πάντα δούλος! Σο σουκάρ ανταβά πράγμας σο κερντάς ο Ιεχωβά!

4, 5. Σόσκε ισί αμένγκε σημαντικός αντιβές ο πουρανό Ιωβηλαίος;

⁴ Καλέ γιαβερέ τροπόσαρ βοηθίντιβενας ο Ισραηλίτες κατά Ιωβηλαίος; Ο Ιεχωβά βακερντάς: «Καέκ τουμένταρ δεν πρέπει τι τσορόλιβελ, σόσκε ο Ιεχωβά σίγουρα κα ευλογίνελ-τουτ κο τθεμ σο ντέλα-τουτ σαρ κληρονομιά ο Ιεχωβά το Ντεβέλ για τι λες-λες τούκε». (Δευτ. 15:4) Σο μπαρί διαφορά οντουλένταρ σο αβένα-πες κο ντουνιάς αντιβές, σο μπουτ φαρ ο χουλανέ αβένα πιο χουλανέ ντα ο τσορορέ πιο τσορορέ!

⁵ Σαρ Χριστιανοί, να ισινάμ τελάλ κατά Μωσαϊκός Νόμος. Ανταβά μανγκέλα τι βακερέλ ότι να κεράσα ο Ιωβηλαίος για τι ελευθερώντιβεν ο δούλοι, για τι νασέν οπρ’ αμένταρ ο μπόρτζια ντα για τι λας παλάλ αμαρέ φαμιλιάκο τθαν. (Ρωμ. 7:4· 10:4· Εφεσ. 2:​15) Όμως, ο Ιωβηλαίος ισί αμένγκε σημαντικός. Σόσκε; Επειδή ανέλα αμαρέ γκοντιάτε σο κερντάς ο Ιεχωβά για τι ελευθερώνελ-αμέν κατά αμαρτία.

6. Καλέ πραγμάσταρ χρειαζίντιβελα τι ελευθερώντιβεν σαρέ ο τζενέ;

⁶ Σαρέ χρειαζίντιβελα τι ελευθερώντιβας σόσκε ισινάμ σκλάβοι κι αμαρτία ντα ανταγιά ισί εκ μπουτ μπέτι σκλαβιά. Οντουλέσκε, πφουρίλιβασα, νασφάλιβασα ντα μεράσα. Μπουτ τζενέ αγαβένα καζόμ μπαγιά ισί ανταβά κάνα ντικχένα-πες κο ανιάς ή κάνα τζάνα κο γιατρός για τι αβέν λατσσές. Επίσης, κάνα κεράσα αμαρτίες χασαράσα αμαρί ζορ. Ο απόστολος Παύλος βακερντάς ότι ισινέ “αιχμάλωτος κο νόμος κι αμαρτιάκο  σο ισινέ λέσκε σωμάστε”. Σοράν, βακερντάς: «Σο ταλαιπωρία τσσίνταβα! Κον κα σώνελ-μαν κατά σώμας σο οδηγίνελα-μαν ανταλέ μεριμάστε;»​—Ρωμ. 7:​23, 24.

7. Σο βακερντάας ο Ησαΐας ι ελευθεριάκε;

⁷ Ευτυχώς, ο Ντεβέλ πουταρντάς ο ντρομ για τι σώντιβας, τι ελευθερώντιβας κατά αμαρτία. Ανταγιά ελευθερία αβέλα αντράλ κατά Ιησούς. Περίπου 700 μπρεσά πριν τι αβέλ ο Ιησούς κι πφουβ, ο προφήτης Ησαΐας βακερντάας ότι κα αβέλας εκ μπαρί ελευθερία. Ανταγιά μπαρί ελευθερία κα αβέλας μπουτ πιο λατσσί οντουλάταρ σο τθερένας ο Ισραηλίτες κο Ιωβηλαίος μπρες. Ο Ησαΐας γραφιντάς: «Ο πνεύμας ι πιο Μπαρέ Κυριόσκο, ι Ιεχωβάσκο, ισί οπρά-μάντε, σόσκε ο Ιεχωβά τραμπιντάς-μαν για τι βακεράβ λατσσέ αμπέρια οντουλένγκε σο τθερένα κοβλό γκι. Μπουτσσαντάς-μαν τι πφάνταβ ο πληγές οντουλένγκε σο τθερένα πφανγκό γκι, τι βακεράβ κο αιχμάλωτοι ότι κα ελευθερώντιβεν». (Ησ. 61:1) Κάσκε βακέρντιλι ανταγιά προφητεία;

8. Κον κερέλα τι νικιόλ μπαγιά η προφητεία σο βακερντάς ο Ησαΐας ι ελευθεριάκε;

⁸ Ανταγιά σημαντική προφητεία ι ελευθεριάκε αρχισάλι τι αβέλ-πες μπαγιά αφού ο Ιησούς αρχισάλο πο έργος. Κάνα γκιλό κι συναγωγή πι τθεμέστε, κι Ναζαρέτ, ο Ιησούς διαβαντάς ανταλά λάφια ι Ησαϊάσκε κο Ιουδαίοι σο ισινέ γκιντιμέ οτθέ. Ο Ιησούς βακερντάς ότι βοβ κερέλα τι νικιόν μπαγιά ακαλά λάφια: «Πνεύμας ι Ιεχωβάσκο ισί οπρά-μάντε, σόσκε βοβ τραμπιντάς-μαν τι βακεράβ λατσσέ αμπέρια κο τσορορέ. Μπουτσσαντάς-μαν τι βακεράβ κο αιχμάλωτοι ότι κα ελευθερώντιβεν ντα κο κορορέ ότι κα ντικχέν πάλι, τι ελευθερώναβ οντουλέν σο τθερένα πφανγκό γκι, τι βακεράβ ότι αβιλό ο μπρες σο ο Ιεχωβά σικαβέλα λατσσιπέ». (Λουκ. 4:​16-19) Σαρ κερντάς ο Ιησούς τι νικιόλ μπαγιά ανταγιά προφητεία;

9. Καλέ ελευθεριάκε μπεκλεντίνενας μπουτ τζενέ κο ντιβεσά κι Ιησούσκε;

⁹ Η ελευθερία σο βακερντάας ο Ησαΐας ντα σο διαβαντάας λάκε ο Ιησούς αρχισάλι τι ντιντιόλ κο ντιβεσά κι Ιησούσκε. Τζανάσα-λες ανταβά σόσκε ο Ιησούς βακερντάς: «Αντιβές νικιόνα μπαγιά ανταλά λάφια ι Γραφιάκε σο ασουντέν». (Λουκ. 4:​21) Μπουτ οντουλένταρ σο ασουντέ οντουλά σο διαβαντάς ο Ιησούς μάλλον μπεκλεντίνενας τι ελευθερώντιβεν κατά Ρωμαίοι σο κυβερνίνενας-λεν. Μπορεί τι νιωθίνενας σαρ ο ντούι μουρσά σο βακερντέ: «Αμέν . . . μπεκλεντίναας ότι βοβ ισινέ οντουβά σο κα ανέλας ελευθερία κο Ισραήλ». (Λουκ. 24:​13, 21) Αλλά τζανάσα ότι ο Ιησούς να βακερέλας πι μαθητένγκε τι τζαν κόντρα  κο Ρωμαίοι σο κυβερνίνενας μπουτ σκληρέ τροπόσαρ. Βακερντάς λένγκε τι ντεν «οντουλά σο ισί ι Καισαράσκε κο Καίσαρας». (Ματθ. 22:​21) Σαρ αντάς όμως ο Ιησούς ελευθερία κο τζενέ αζομάν;

10. Κατάρ ελευθερωντάς ο Ιησούς ι τζενέν;

¹⁰ Ο Τσσαβό ι Ντεβλέσκο αβιλό για τι βοηθίνελ ι τζενέν τι ελευθερώντιβεν ντουέ τροπόντζαρ. Πρώτον, ο Ιησούς πουταρντάς ο ντρομ για τι ελευθερώντιβεν ο τζενέ κατά παπαζίνγκε λάφια σο ανένας πφαριπέ λένγκε γκίστε. Μπουτ Ιουδαίοι αζομάν ισινέ σκλαβωμέ κο παραδόσεις ντα κο λάθος πράγματα σο πακιάνας. (Ματθ. 5:​31-37· 15:​1-11) Οντουλά σο βακερένας ότι βοηθίνενας ι τζενέν τι σικλιόν ι Ντεβλέσκε ισινέ σαρ κορορέ σόσκε να υπηρετίνενας ι Ντεβλές σαρ μανγκέλας βοβ. Επειδή να δεχτιντέ ι Μεσσιάς ντα ι αλήθεια σο σικλιαρέλας, ατσσιλέ κο καρανίκι ντα κι αμαρτία. (Ιωάν. 9:1, 14-16, 35-41) Ο Ιησούς σικλιαρντάς ι αλήθεια ντα μουκχλάς λατσσό παράδειγμας, ντα αντικάς σικαντάς ι τζενένγκε σο τθερένας κοβλό γκι σαρ τι ελευθερώντιβεν κατά ψεύτικα λάφια.​—Μάρκ. 1:​22· 2:​23–3:5.

11. Καλέ δεύτερε τροπόσαρ ελευθερωντάς ο Ιησούς ι τζενέν;

¹¹ Δεύτερον, ο Ιησούς αντάς ελευθερία επειδή ντινάς ι ευκαιρία σαρέ κο τζενέ τι ελευθερώντιβεν ντα μα τι αβέν σκλάβοι κι αμαρτία. Επειδή ο Ιησούς ντινάς πι ζωή, ο Ντεβέλ κα μπορίνελας τι συγχωρίνελ ο αμαρτίες οντουλένγκε σο σικαβένα πίστη ντα δεχτίνενα ο λύτρος σο ντινάς Βοβ. (Εβρ. 10:​12-18) Ο Ιησούς βακερντάς: «Αν ο Τσσαβό κα ελευθερώνελ-τουμέν, κα τθερέν αληθινή ελευθερία». (Ιωάν. 8:​36) Ανταγιά ελευθερία ισινέ σίγουρα πιο μπαρί οντουλάταρ σο μπορίνελας τι λελ εκ Ισραηλίτης κο Ιωβηλαίος μπρες! Για παράδειγμας, εκ τζενό σο ελευθερώντιβελας κο Ιωβηλαίος μπρες μπορεί τι αβέλας πάλι δούλος ντα, σο-ντα τι κερέλας, εκ ντιβές κα μερέλας.

12. Κον ισινέ ο πρώτοι σο βοηθίντιλε κατά ελευθερία σο βακερντάς ο Ιησούς;

¹² Κι Πεντηκοστή κο 33 Κ.Χ., ο Ιεχωβά τραμπιντάς πι άγιε πνευμάσαρ ι αποστολόν ντα γιαβερέ πιστέ μουρσέν ντα τζουβλίν. Λιντάς-λεν για τι αβέν λέσκε τσσαβέ ντα, κάνα κα αβέλας ο βακίτι, τι τζαν κο ουρανός για τι κυβερνίνεν γιεκ ι Ιησούσαρ. (Ρωμ. 8:2, 15-17) Βον ισινέ ο πρώτοι σο βοηθίντιλε κατά ελευθερία σο βακερντάς ο Ιησούς κι συναγωγή κι Ναζαρέτ. Οντουλά μουρσά ντα τζουβλιά να ισινέ ακανά σκλαβωμέ κο ψεύτικα πράγματα σο σικλιαρένας ντα κερένας ο παπάζια. Κο γιακχά κι Ντεβλέσκε, ισινέ ελεύθεροι κατά αμαρτία-ντα σο ανέλα μεριπέ. Ο συμβολικός Ιωβηλαίος σο αρχισάλο κάνα τραμπίντιλε ο  μαθητές ι Χριστόσκε κο 33 Κ.Χ. κα ασταρέλ μέχρι τι νακχέν ο χίλια μπρεσά ι Ιησούσκε Βασιλειάκε. Σο κα αβέλ-πες μέχρι αζομάν;

13, 14. Εκτός κατά χρισμέ Χριστιανοί, καλά γιαβερά μπορίνενα τι λεν ι ελευθερία σο βακερντάς ο Ιησούς;

¹³ Αμαρέ ντιβεσέντε, εκατομμύρια λατσσέ τζενέ σαρέ κατά τθεμά ισί κατά “γιαβερά μπρακέ”. (Ιωάν. 10:​16) Βον να τραμπίντιλε κατά Ντεβέλ τι αβέν βασιλιάδες ι Ιησούσαρ οπρέ. Η Γραφή βακερέλα ότι βον μπεκλεντίνενα τι τζουβντιόν για πάντα κι πφουβ. Μπεκλεντίνενα τουμέν-ντα ανταλέσκε;

¹⁴ Ατζέ-ντα ακανά απολαμβάνενα μερικά κατά λατσσέ πράγματα σο τθερένα οντουλά σο τραμπίντιλε τι κυβερνίνεν κι Ντεβλέσκι Βασιλεία. Επειδή πακιάνα κι θυσία κι Ιησούσκι, μπορίνενα τι μανγκέν συγχώρηση τουμαρέ αμαρτιένγκε. Ανταβά ανέλα τουμένγκε ι ευλογία ι Ντεβλέσκι ντα εκ λατσσί συνείδηση ανγκλά-λέστε. (Εφεσ. 1:7· Αποκ. 7:​14, 15) Ανέν τουμαρέ γκοντιάτε ο ευλογίες-ντα σο τθερένα επειδή ελευθερωσάλεν κατά ψεύτικα πράγματα σο πακιάνας μπρεσά. Ο Ιησούς βακερντάς: «Κα σικλιόν ι αλήθεια ντα η αλήθεια κα ελευθερώνελ-τουμέν». (Ιωάν. 8:​32) Σαβί χαρά ανέλα ανταγιά ελευθερία!

15. Καγιά ελευθερία ντα καλά ευλογίες μπεκλεντίνασα τι αβέν;

¹⁵ Μπεκλεντίνασα όμως τι αβέλ ατζέ πιο μπαρί ελευθερία. Μπουτ σουγκό, ο Ιησούς κα νασκιαρέλ ι ψεύτικη θρησκεία ντα ο πφιρνικανέ κυβερνήσεις ι τζενένγκε. Ο Ντεβέλ κα αρακχαβέλ «εκ μπαρό πλήθος» τζενένγκο σο υπηρετίνενα-λες ντα σοράν κα  ντελ-λεν ευλογίες κο Παράδεισος κι πφουβ. (Αποκ. 7:9, 14) Μπουτ τζενέ κα τζουβντιόν πάλι ντα κα τθερέν ι ευκαιρία τι ελευθερώντιβεν σαρέ κατά μπέτι πράγματα σο αντάς η αμαρτία ι Αδαμίσκι.​—Πράξ. 24:15.

16. Καγιά μπαρί ελευθερία κα τθερέν ο τζενέ;

¹⁶ Κι Βασιλεία σο κα ατσσικιαρέλ χίλια μπρεσά, ο Ιησούς ντα οντουλά σο κα κυβερνίνεν λέσαρ κα βοηθίνεν ι τζενέν τι τθερέν τέλεια υγεία ντα τέλεια φιλία ι Ντεβλέσαρ. Οντουβά βακίτι, σο κα αβέν σαρέ ο πράγματα σαρ ισινέ κι αρχή ντα ο τζενέ κα ελευθερώντιβεν, κα αβέλ σαρ ο Ιωβηλαίος μπρες ι Ισραηλιτένγκο. Σαρέ οντουλά σο υπηρετίνενα ι Ιεχωβάς σαστέ γκίσαρ κι πφουβ κα αβέν τέλειοι, ντα η αμαρτία κα νασέλ ντιπ λένταρ.

17. Σο βακερένα ο εδάφια Ησαΐας 65:​21-23 ότι κα αβέλ-πες κι Ντεβλέσκο λαός; (Ντικχ ι φωτογραφία κι ανγκλαϊνί σελίδα)

¹⁷ Ο εδάφια Ησαΐας 65:​21-23 σικαβένα αμένγκε σαρ κα αβέλ η ζωή κι πφουβ. (Διαβάνεν) Να κα μπεσάς πφαντέ βαστέντζαρ σαρό ο ντιβές. Η Γραφή σικαβέλα ότι αζομάν ι Ντεβλέσκε υπηρέτες κα κερέν εκ σημαντική μπουτί σο κα πφερέλ-λεν. Κάνα κα νακχέλ οντουβά βακίτι, μπορίνασα τι αβάς σίγουροι ότι «η δημιουργία κα ελευθερώντιβελ για μα τι αβέλ σκλαβωμέ εκχέ σωμάστε σο κερνιόλα, αλλά κα λελ ι ελευθερία σο τθερένα με δόξα ο τσσαβέ ι Ντεβλέσκε».​—Ρωμ. 8:21.

18. Σόσκε ισινάμ σίγουροι ότι κα αβέν μπουτ σουκάρ ντιβεσά;

¹⁸ Κο πουρανό Ισραήλ ο Ιεχωβά βοηθιντάς ι Ισραηλιτέν τι αρακχέν σαάτι εμ για τι κερέν μπουτί εμ για τι ξεκουράντιβεν, ντα κα κερέλ-λες ανταβά πι λαόσκε κι Βασιλεία κι Χριστόσκι-ντα σο κα ατσσικιαρέλ χίλια μπρεσά. Ισινάμ σίγουροι ότι αζομάν κα αβέλ βακίτι τι ντας λατρεία ι Ντεβλές. Η λατρεία ι Ντεβλέσκι ισί μπουτ σημαντική για τι αβάς ευτυχισμέ αντιβές, ντα αντικάς κα αβέλ κο νεβό ντουνιάς-ντα. Κι Βασιλεία κι Χριστόσκι, σαρέ ο πιστά τζενέ κα αβέν ευτυχισμέ σόσκε κα κερέν εκ μπουτί σο κα πφερέλ-λεν ντα κα υπηρετίνεν ι Ντεβλές.