1, 2. Σο κα ντικχάς ανταλέ μαθημάστε;

ΜΠΑΖΙΜΑ, μπορεί τι σκεφτίνασα καζόμ χάνικ τζουβντιάσα ντα καζόμ πφερντί βάσανα ισί αμαρί ζωή. (Ιώβ 14:1) Ισί φαρ σο ανταβά κερέλα-αμέν τι χασαράς αμαρί ζορ. Μπουτ υπηρέτες ι Ιεχωβάσκε κο πουρανέ μπρεσά νιωθίνενας αντικάς. Μερικοί μάλιστα μανγκένας τι μερέν. (1 Βασ. 19:​2-4· Ιώβ 3:​1-3, 11· 7:​15, 16) Αλλά ο Ιεχωβά πάντα λοκχιαρέλας λένγκο γκι ντα ντέλας-λεν ζορ. Οντουλά σο νακχλέ γραφίντιλε για τι ντεν-αμέν κουράγιος ντα τι σικλιαρέν-αμέν.​—Ρωμ. 15:4.

² Ανταλέ μαθημάστε, κα ντικχάς σαρ μερικοί υπηρέτες ι Ιεχωβάσκε νταϊντιντέ δοκιμασίες σο κερντέ-λεν τι χασαρέν πουμαρί ζορ. Κα ντικχάς σο νακχλάς ο Ιωσήφ ο τσσαβό ι Ιακωβίσκο, η χήρα Ναομί ντα λάκι μπορί η Ρουθ, ο Λευίτης σο γραφιντάς ο Ψαλμός 73 ντα ο απόστολος Πέτρος. Σαρ ντινάς-λεν ζορ ο Ιεχωβά; Ντα σο σικλιάσα αμέν οντουλένταρ σο νακχλέ; Ο απαντήσεις βοηθίνενα-αμέν τι αβάς σίγουροι ότι «ο Ιεχωβά ισί πασέ οντουλέντε σο τθερένα πφανγκό γκι» ντα ότι «σώνελα οντουλέν σο χασαρντέ πουμαρί ζορ».​—Ψαλμ. 34:​18, υποσ.

3, 4. Σο αβιλό-πες κο Ιωσήφ κάνα ισινέ τερνό;

³ Ο Ιωσήφ ισινέ πασέ 17 μπρεσένγκο κάνα ντικχλάς ντούι σουνέ, σο ισινέ ο ντούι-ντα κατά Ντεβέλ. Ανταλά σουνέ μανγκένας τι βακερέν ότι εκ ντιβές λέσκι φαμιλί κα σικαβέλας λέσκε μπαρό σεβασμός. (Γέν. 37:​5-10) Όμως, χάνικ πιο σοράν οντουλέ σουνένταρ σο ντικχλάς, αβιλέ-πες μπουτ μπέτι πράγματα λέσκε ζωγιάτε. Λέσκε πφραλά αζομάν να σεβάνενας-λες ιτς ντα μπικιντέ-λες. Χάνικ πιο σοράν αβιλό δούλος κο κχερ κι Πετεφρίσκο σο ισινέ εκ αρχηγός κι Αίγυπτος.  (Γέν. 37:​21-28) Αντρέ εκχέ ντιβεσέστε σαρί λέσκι ζωή αλλαξάλι. Οτθέ σο ισινέ ο αγαπημέ τσσαβό πι νταντέσκο, αβιλό δούλος κι Αίγυπτος ντα κερέλας μπουτί εκχέ τζενέσκε σο πακιάλας ψεύτικε ντεβλέντε.​—Γέν. 39:1.

⁴ Αλλά ο προβλήματα ι Ιωσηφίσκε κα αβένας ατζέ πιο μπαρέ. Η ρομνί ι Πετεφρίσκι κατηγοριντάς-λες σινανέ ότι κερντάς-λα τι σοβέλ λέσαρ ζορίσαρ. Χωρίς τι ντικχέλ άμα ανταβά ισινέ μπαγιά, ο Πετεφρής ντινάς εντολή τι τσσουβέν-λες κι φυλακή ντα τι πφάντεν-λες τζαντζιρίντζαρ. (Γέν. 39:​14-20· Ψαλμ. 105:​17, 18) Σκεφτίνεν σαρ πρέπει τι νιωθίνελας ο τερνό Ιωσήφ σο κατηγοριντέ-λες ότι γκιλό τι κερέλ εκχέ τζουβλιά τι σοβέλ λέσαρ ζορίσαρ! Ντα σκεφτίνεν σο μπαρί λατζ μπορεί τι ανέλας ανταβά κι Ιεχωβάσκο ναβ! Σίγουρα ο Ιωσήφ τθερέλας λόγους τι χασαρέλ πι ζορ.

5. Σο κερντάς ο Ιωσήφ για μα τι χασαρέλ σαρί πι ζορ;

⁵ Κάνα ο Ιωσήφ ισινέ δούλος ντα σοράν κάνα τσσουντέ-λες κι φυλακή, να ισινέ λέσκε βαστέστε τι κερέλ μπουτ πράγματα. Σο βοηθιντάς-λες τι ντικχέλ ο πράγματα σαρ μανγκέλας ο Ιεχωβά; Αντίς τι σκεφτίνελ σαρέ οντουλά σο ναστί κερέλας, κερέλας λατσσές ι μπουτί σο ντιντιλί-λες. Αλλά ο πιο σημαντικός ισινέ ότι πάντα τσσουβέλας ι Ιεχωβάς πρώτα πι ζωγιάτε. Οντουλέσκε-ντα ο Ιεχωβά ευλογίνελας σο-ντα κερέλας ο Ιωσήφ.​—Γέν. 39:​21-23.

6. Σαρ μπορεί τι λοκχιόλας ο γκι ι Ιωσηφίσκο καζόμ ανέλας πι γκοντιάτε ο σουνέ σο ντικχλάας;

⁶ Επίσης, ο Ιωσήφ μπορεί τι λέλας ζορ κάνα ανέλας πι γκοντιάτε ο σουνέ σο ντικχλάας ανγκλέ. Οντουλά σουνέ σικαβένας ότι κα ντικχέλας πάλι πι φαμιλί ντα ο πράγματα λέσκε ζωγιάτε κα αβένας πιο λατσσέ. Ντα ανταβά αβιλό-πες. Κάνα ο Ιωσήφ ισινέ πασέ 37 μπρεσένγκο, λέσκε σουνέ αρχισάλε τι νικιόν μπαγιά εκχέ μπουτ σουκάρ τροπόσαρ!​—Γέν. 37:7, 9, 10· 42:6, 9.

7. Σο κα βοηθίνελ-αμέν τι νταϊντίνας ο δοκιμασίες σαρ βακερέλα ο εδάφιος 1 Πέτρου 5:10;

⁷ Σο σικλιάσα αμέν. Η ιστορία ι Ιωσηφίσκι ανέλα αμαρέ γκοντιάτε ότι ανταβά ντουνιάς  ισί πφερντό δυσκολίες ντα ότι μερικά τζενέ κα αδικίνεν-αμέν. Ατζέ-ντα εκ πφραλ ή εκ πφεν μπορεί τι ντουκχαβέλ αμαρό γκι. Αλλά άμα ντικχάσα ότι ο Ιεχωβά ισί αμαρό Βράχος ντα Οντουβά σο αρακχαβέλα-αμέν, να κα χασαράς αμαρί ζορ ντα να κα τσσιναβάς τι υπηρετίνας-λες. (Ψαλμ. 62:6, 7· διαβάνεν 1 Πέτρου 5:​10) Ντεν-τουμέν γκοντί επίσης ότι ο Ιωσήφ πρέπει τι ισινέ πασέ 17 μπρεσένγκο κάνα ο Ιεχωβά κερντάς-λες τι ντικχέλ οντουλά σουνέ. Άρα, ο Ιεχωβά ντέλα μπέσα κο τερνέ σο υπηρετίνενα-λες. Αντιβές, ισί μπουτ τερνέ σαρ ο Ιωσήφ ντα τθερένα βον-ντα μπαρί πίστη κο Ιεχωβά. Ντα μερικοί λένταρ τσσουβντιλέ άδικα κι φυλακή επειδή μανγκλέ τι ατσσόν αφοσιωμέ κο Ντεβέλ.​—Ψαλμ. 110:3.

8. Σο αβιλό-πες κι Ναομί ντα κι Ρουθ;

⁸ Επειδή πελίας μπαρί μποκχ, η Ναομί ντα λάκι φαμιλί νασλέας πουμαρέ κχερέσταρ κατά Ιούδας ντα γκιλέ τι τζουβντιόν κο Μωάβ. Οτθέ, λάκο ρομ ο Ελιμέλεχ μουλό ντα μουκχλάς-λα ντουέ τσσαβέντζαρ. Σοράν, ο ντούι-ντα τσσαβέ παντρισάλε Μωαβιτισσέν, η εκχιάκε βακερένας λάκε Ρουθ ντα ι γιαβεράκε Ορφά. Όμως, ντες μπρεσά σοράν, ο ντούι μουρσά μουλέ ντα να κερντέας τσσαβέν. (Ρουθ 1:​1-5) Σκεφτίνεν καζόμ πφανγκέ γκίσκε ισινέ οντουλά τριν τζουβλιά! Η Ρουθ ντα η Ορφά μπορίνενας τι παντρίνεν πάλι. Αλλά σαρ κα ντέλας-λεν πέρα η πφουρί Ναομί; Η Ναομί χασαρντάας αζόμ μπουτ πι ζορ σο εκ φαρ βακερντάς: «Μα ντεν-μαν βίκος Ναομί. Ντεν-μαν βίκος Μαρά, σόσκε ο πιο Μπαρό κερκιαρντάς μπουτ μο γκι». Ντιπ πφανγκέ γκίσαρ, αποφασιντάς τι βουρτίνελ κι Βηθλεέμ. Γκιλί παλά-λάτε η Ρουθ-ντα.​—Ρουθ 1:7, 18-20.

9. Σαρ ντινάς η Ρουθ ζορ κι Ναομί σαρ βακερένα ο εδάφια Ρουθ 1:​16, 17, 22;

⁹ Σαρ βοηθίντιλι η Ναομί; Βοηθιντάς-λα η αφοσιωμέ αγάπη. Για παράδειγμας, η Ρουθ σικαντάς αφοσιωμέ αγάπη κι Ναομί κάνα μπεσλί λάσαρ. (Διαβάνεν Ρουθ 1:​16, 17, 22) Κι Βηθλεέμ, η Ρουθ κερέλας μπουτ μπουτί για τι γκίντελ τζοβ, δηλαδή κριθάρι, πέσκε ντα πι σασάκε. Αντικάς, η Ρουθ κερντάς λατσσό ναβ.​—Ρουθ 3:​11· 4:15.

10. Καλέ τροπόντζαρ σικαβέλας ο Ιεχωβά ότι πφαμπόλας ι τσορορένγκε σαρ ισινέ η Ναομί ντα η Ρουθ;

¹⁰ Ο Ιεχωβά ντινάας κο Ισραηλίτες εκ νόμος σο σικαβέλας καζόμ μπουτ πφαμπόλας ι τσορορένγκε σαρ ισινέ η Ναομί ντα η Ρουθ. Βακερντάας πι λαόσκε τι μουκχέν ο γκιβ σο ισινέ κι νάκρη κι χωραφίσκι για τι τζαν ο τσορορέ τι γκίντεν-λες. (Λευιτ. 19:9, 10) Αντικάς, η Ναομί ντα η Ρουθ να κα χρειαζίντιβελας τι μανγκέν κατά γιαβερά τι ντεν-λεν τι χαν. Μπορίνενας τι γκίντεν πουμαρό χαμπέ κορκορέ.

11, 12. Σαρ ντινάς ο Βοόζ χαρά κι Ναομί ντα κι Ρουθ;

¹¹ Ο τζενό σο τθερέλας ο χωράφι σο γκίντελας γκιβ η Ρουθ ισινέ εκ χουλανό μουρς σο βακερένας λέσκε Βοόζ. Ο Βοόζ μπεϊντιντάς αζόμ μπουτ ι αφοσίωση ντα ι αγάπη σο σικαβέλας η Ρουθ πι σασάκε σο κιντάς ι πφουβ σο τθερέλας η Ναομί πι φαμιλιάσαρ ντα παντρισάλο με την Ρουθ. (Ρουθ 4:​9-13) Κερντέ εκχέ τσσαβές σο τσσουντέ λέσκε Ωβήδ. Σοράν, ο Ωβήδ αβιλό πάππους ι Δαβιδίσκο.​—Ρουθ 4:17.

¹² Σκεφτίνεν καζόμ χαρούμενη ισινέ η Ναομί κάνα λιντάς πι αγκαλιάτε ι χουρντέ Ωβηδίς ντα προσευχισάλι κο Ιεχωβά για τι βακερέλ λέσκε ευχαριστώ! Αλλά η Ναομί ντα η Ρουθ κα τθερέν γιαβερά-ντα ευλογίες. Κι ανάσταση, κα σικλιόν ότι ο Μεσσίας, ο Ιησούς Χριστός, αστάρντιβελας κατά Ωβήδ!

13. Καλά σημαντικά πράγματα σικλιάσα κατά Ναομί ντα κατά Ρουθ;

¹³ Σο σικλιάσα αμέν. Κάνα νακχάσα δοκιμασίες, μπορεί τι χασαράσα αμαρί ζορ ντα τι τθεράσα μπαρί ντουκχ αμαρέ γκίστε. Μπορεί τι σκεφτίνασα ότι ο προβλήματα να  κα νασέν ποτές οπρ’ αμένταρ. Κάνα νακχέλα αμαρέ γκοντιάταρ κάτι ασακό, πρέπει τι ντας σαρί αμαρί μπέσα αμαρέ Νταντέστε, κο Ιεχωβά, ντα τι ατσσάς πασέ αμαρέ πφραλέντε ντα πφενίντε σο ισί κι κχανγκιρί. Ισί μπαγιά ότι ο Ιεχωβά μπορεί μα τι νασκιαρέλ εκ δοκιμασία. Για παράδειγμας, να αντάς παλάλ κι Ναομί λάκε ρομές ντα λάκε τσσαβέν σο μουλέας. Αλλά κα βοηθίνελ-αμέν τι νταϊντίνας. Μπάζιμα, μπορεί τι κερέλ-λες ανταβά αντράλ κατά πφραλά ντα κατά πφενιά.​—Παρ. 17:17.

14. Σόσκε εκ Λευίτης χασαρντάς σαρί πι ζορ;

¹⁴ Οντουβά σο γραφιντάς ο Ψαλμός 73 ισινέ Λευίτης. Οτθάρ, τθερέλας ο μπαρό προνόμιος τι υπηρετίνελ κο τθαν σο ντένας λατρεία ι Ιεχωβάς. Αβιλό όμως ο ντιβές σο χασαρντάς πι ζορ. Σόσκε; Αρχισάλο τι ζηλίνελ ι πφιρνέ ντα ι μπαρικανέ τζενέν, όχι επειδή κερένας μπέτι πράγματα, αλλά επειδή ντικχίντιβελας ότι τθερένας πιο λατσσί ζωή λέσταρ. (Ψαλμ. 73:​2-9, 11-14) Ντικχίντιβελας ότι τθερένας-λεν σαρέ: χουλανιπέ, λατσσί ζωή, ιτς προβλήματα. Σαρέ οντουλά σο ντικχέλας ο ψαλμωδός κερντέ-λες τι χασαρέλ αζόμ μπουτ πι ζορ σο βακερντάς: «Σίγουρα, σινανέ ατσσικιαρντόμ πάκι μο γκι ντα τθοντόμ μο βαστά κατά μελ ι γκεραλιμάσκι». Ντικχίντιβελα ότι χάνικ ατζέ ντα κα τσσιναβέλας τι υπηρετίνελ ι Ιεχωβάς.

15. Σαρ αρακχλάς πάλι πι ζορ ο Λευίτης σαρ βακερένα ο εδάφια Ψαλμός 73:​16-19, 22-25 σο γραφιντάς βοβ;

¹⁵ Διαβάνεν Ψαλμός 73:​16-19, 22-25. Ο Λευίτης “τσσουντάς-πες κο εντυπωσιακός τθαν κι Ντεβλέσκο”. Οτθέ, ισινέ γιεκ γιαβερέ τζενέντζαρ σο ντένας λατρεία ι Ιεχωβάς ντα αντικάς μπορισάλο τι ηρεμίνελ, τι σκεφτίνελ καθαρά ντα τι κερέλ προσευχή για τι ντικχέλ σο αβέλας-πες λέσαρ. Ανταβά βοηθιντάς-λες τι αγαβέλ ότι να σκεφτίνελας λατσσές, ότι αντικάς σαρ τζάλας κα τσσιναβέλας τι υπηρετίνελ ι Ιεχωβάς. Αγαντάς επίσης ότι ο πφιρνέ ισί «τθανέστε σο γλιστρίνελα» ντα ότι κα “αβέλ λένγκο τέλος”. Για τι νασκιαρέλ ανταλά μπέτι αισθήματα ντα τι αρακχέλ πάλι πι ζορ, ο Λευίτης ψαλμωδός χρειαζίντιβελας τι ντικχέλ ο πράγματα αντικάς σαρ ντικχέλας-λεν ο Ιεχωβά. Κάνα κερντάς-λες  ανταβά, ηρεμισάλο πάλι ντα νιωσάλο ευτυχισμέ. Βακερντάς: «Εκτός [κατά Ιεχωβά] να μανγκάβα τίποτα κι πφουβ».

16. Σο σικλιάσα κατά Λευίτης;

¹⁶ Σο σικλιάσα αμέν. Ποτές μα τι ζηλίνας ι πφιρνέν σο ντικχίντιβελα ότι τθερένα λατσσί ζωή. Λένγκι ευτυχία νανέ μπαγιά ντα να κα ατσσόλ μπουτ. Να κα τζουβντιόν για πάντα. (Εκκλ. 8:​12, 13) Άμα ζηλίνασα-λεν, κα χασαράς αμαρί ζορ ντα μπορεί τι χαλαβάς αμαρί φιλία ι Ιεχωβάσαρ. Οτθάρ, άμα ποτές κα νιωθίνεν σαρ ο Λευίτης, κερέν οντουβά σο κερντάς βοβ: ντεν καν κο συμβουλές κι Ιεχωβάσκε ντα κερέν παρέα τζενέντζαρ σο κερένα οντουβά σο μανγκέλα Βοβ. Άμα τσσουβένα πρώτα ι Ιεχωβάς τουμαρέ ζωγιάτε, κα αβέν μπαγιά ευτυχισμέ. Ντα κα ατσσόν κο ντρομ σο γκερέλα κι «πραγματική ζωή».​—1 Τιμ. 6:19.

17. Σόσκε χασαρντάς ο Πέτρος πι ζορ;

¹⁷ Ο απόστολος Πέτρος ισινέ σίγουρος πι νεαυτόσκε. Αλλά μπάζιμα βακερέλας ντα κερέλας πράγματα χωρίς τι σκεφτίνελ-λεν, ντα σοράν μετανιώνελας. Για παράδειγμας, κάνα ο Ιησούς βακερντάς πι αποστολόνγκε ότι κα τσσίντελας μπουτ ντα κα μερέλας, ο Πέτρος μανγκλάς τι τσσουβέλ λέσκε γκοντί ντα βακερντάς λέσκε: «Να κα αβέλ-πες τούκε κάτι ασακό». (Ματθ. 16:​21-23) Αζομάν ο Ιησούς διορθωντάς ι Πετρός. Κάνα μπουτ τζενέ αβιλέ τι ασταρέν ι Ιησούς, ο Πέτρος να σκεφτιντάς ιτς ντα τσσιντάς ο καν εκχέ τζενέσκο. (Ιωάν. 18:​10, 11) Ο Ιησούς διορθωντάς πάλι ι Πετρός. Επίσης, ο Πέτρος βακερντάς ότι, ατζέ-ντα άμα ο γιαβερά απόστολοι κα μουκχένας ι Χριστός, βοβ ποτές να κα μουκχέλας-λες! (Ματθ. 26:​33) Αλλά η νταρ κατά τζενέ κερντάς-λες τι χασαρέλ ανταγιά σιγουριά σο τθερέλας, ντα βακερντάς τριν φαρ ότι να τζανέλας ι Ιησούς. Ο Πέτρος χασαρντάς πι ζορ ντα «νικίστιλο αβρί ντα ροντάς γκίσαρ». (Ματθ. 26:​69-75) Μάλλον σκεφτίνελας άμα κα συγχωρίνελας-λες ποτές ο Ιησούς.

18. Σαρ βοηθιντάς ο Ιησούς ι Πετρός τι αρακχέλ πι ζορ;

¹⁸ Όμως, ο Πέτρος να τσσιναντάς τι υπηρετίνελ  ι Ιεχωβάς παρόλο σο χασαρντάας πι ζορ. Σοράν κατά λάθος σο κερντάς, αγαντάς-πες, ντα συνεχιντάς τι υπηρετίνελ ι Ιεχωβάς γιεκ ι γιαβερέ αποστολόντζαρ. (Ιωάν. 21:​1-3· Πράξ. 1:​15, 16) Σο βοηθιντάς-λες; Πιο τζανγκλέ, ο Ιησούς κερντάας προσευχή για μα τι χασαρέλ ο Πέτρος πι ζορ, ντα επίσης βακερντάας λέσκε τι βουρτίνελ ντα τι ντελ ζορ πι πφραλέντε. Ο Ιεχωβά απαντιντάς οντουλέ προσευχιάτε. Σοράν, ο Ιησούς σικαντάς-πες κο Πέτρος για τι ντελ-λες ζορ. (Λουκ. 22:​32· 24:​33, 34· 1 Κορ. 15:5) Εκ φαρ σο ο απόστολοι να ασταρντέ ιτς ματσσέν σαρί ι ιράτ, ο Ιησούς σικαντάς-πες λένγκε. Αζομάν, ντινάς κο Πέτρος ι ευκαιρία τι βακερέλ λέσκε πάλι καζόμ μπουτ μανγκέλας-λες. Ο Ιησούς συγχωριντάας πι λατσσέ αμαλές ντα ντινάς-λες τι κερέλ πιο μπουτ πράγματα.​—Ιωάν. 21:​15-17.

19. Σαρ βοηθίνενα-αμέν ο εδάφια Ψαλμός 103:​13, 14 τι ντικχάς αμαρέ αμαρτίες σαρ ντικχέλα-λεν ο Ιεχωβά;

¹⁹ Σο σικλιάσα αμέν. Ο τρόπος σο συμπεριφερισάλο ο Ιησούς κο Πέτρος σικαβέλα ο έλεος ι Ιησούσκο, σο μοιάζελα ντιπ πι Νταντέστε. Οτθάρ, κάνα κεράσα λάθη, δεν πρέπει τι αμντίνας ότι ο Ιεχωβά να κα συγχωρίνελ-αμέν ποτές. Πρέπει τι ντας-αμέν γκοντί ότι ο Μπενγκ μανγκέλα τι σκεφτίνας αντικάς. Οντουλέσκε, τι μαράς-αμέν τι ντικχάς αμαρό νεαυτός ντα οντουλέν σο ντουκχαβένα αμαρό γκι σαρ ντικχέλα-αμέν αμαρό Ντατ, ο Ιεχωβά, σο πφαμπόλα αμένγκε ντα μανγκέλα-αμέν μπουτ.​—Διαβάνεν Ψαλμός 103:​13, 14.

20. Σο κα ντικχάς κο γιαβέρ μάθημας;

²⁰ Ο παράδειγμας σο μουκχλάς ο Ιωσήφ, η Ναομί ντα η Ρουθ, ο Λευίτης ντα ο Πέτρος κερέλα-αμέν τι αβάς σίγουροι ότι «ο Ιεχωβά ισί πασέ οντουλέντε σο τθερένα πφανγκό γκι». (Ψαλμ. 34:​18) Μπάζιμα, ο Ιεχωβά μουκχέλα τι νακχάς εκ δοκιμασία ντα τι χασαράς αμαρί ζορ. Όμως, κάνα νταϊντίνασα εκ δοκιμασία Λέσκε βοηθειάσαρ, αμαρί πίστη μπαριόλα. (1 Πέτρ. 1:6, 7) Κο γιαβέρ μάθημας, κα ντικχάς ατζέ πιο λατσσές σαρ βοηθίνελα ο Ιεχωβά πι αφοσιωμέ υπηρετόν σο χασαρντέ πουμαρί ζορ, επειδή μπορεί τι κερένα λάθη ή τι νακχένα δυσκολίες.