Η αλήθεια ισί ότι να μανγκέλα τι βακερέλ κάτι ασακό ανταβά εδάφιος. Ανταβά βακέρντιβελα εκχέ τζενέσκε σο περέλα, δηλαδή νακχέλα προβλήματα παλάλ γιαβερέστε ή δυσκολίες, αλλά ιστίλα πάλι, δηλαδή ντέλα-λεν πέρα.

Ντικχέν ο λάφια σο ισί πιο οπρέ ντα πιο τελέ ανταλέ εδαφιόσταρ: «Μα γκέραβ-τουτ σαρ πφιρνό πασέ κο κχερ κι δίκαιε τζενέσκο· μα κερ καταστροφή ο τθαν σο μπεσέλα. Σόσκε ο δίκαιος, ατζέ-ντα άμα κα περέλ εφτά φαρ, κα ιστίλ πάλι, αλλά ο πφιρνέ κα περέν κατά προβλήματα. Κάνα περέλα το ντουσμάνι, μα τι χαιρίνες, ντα κάνα τζάλα τι περέλ, μα τι αβέλ το γκι».​—Παρ. 24:​15-17.

Μερικοί βακερένα ότι ο εδάφιος 16 ισί εκχέ τζενέσκε σο μπορεί τι περέλ κι αμαρτία αλλά σοράν μετανιώνελα ντα αβέλα πάλι αμάλ ι Ντεβλέσαρ. Για παράδειγμας, ντούι παπάζια κατά Βρετανία γραφιντέ ότι μπουτ τζενέ σο κερένα λάφι ι Ντεβλέσκε, εμ κο πουρανέ μπρεσά εμ ακανά, εξηγίνενα ανταβά εδάφιος αντικάς. Ο παπάζια επίσης βακερντέ ότι ανταβά μανγκέλα τι βακερέλ ότι «εκ λατσσό τζενό μπορεί τι περέλ μπαρέ αμαρτιέντε αλλά ποτές να τσσιναβέλα τι μανγκέλ ι Ντεβλές ντα ιστίλα σόσκε κάθε φαρ μετανιώνελα». Κάτι ασακό κα ντικχίντιβελας λατσσό εκχέ τζενέσκε σο να μανγκέλα τι τζαλ κόντρα κι αμαρτία. Βοβ μπορεί τι αμντίνελα ότι, ατζέ-ντα άμα κα κερέλ αμαρτίες παλάλ γιαβερέστε, ο Ντεβέλ πάντα κα συγχωρίνελ-λες.

Αλλά να μανγκέλα τι βακερέλ ανταβά ο εδάφιος 16.

Ο εβραϊκός λάφι σο μεταφράντιβελα «περέλ» ντα «περέλα» κο εδάφια 16 ντα 17 μπορεί τι βακέρντιβελ μπουτέ τροπόντζαρ. Για παράδειγμας, εκ γκουρούβ περέλα κο ντρομ, εκ τζενό περέλα κατά νταράτσα ή εκ χουρντό μπαρ περέλα κι πφουβ. (Δευτ. 22:4, 8· Αμώς 9:9) Αλλά ανταβά λάφι μπορεί τι βακέρντιβελ γιαβέρσοϊ-ντα: «Ο Ιεχωβά σικαβέλα κο τζενό κάι τι τζαλ κάνα κερέλα Λέσκο γκι. Παρόλο σο μπορεί τι περέλ, να κα ατσσόλ τελέ, σόσκε ο Ιεχωβά ασταρέλα-λες κατά βας».​—Ψαλμ. 37:​23, 24· Παρ. 11:5· 13:​17· 17:20.

Όμως, ντικχέν σο βακερντάς ο καθηγητής Έντουαρντ Πλάμτρε: «Ο εβραϊκός λάφι σο μανγκέλα τι βακερέλ [«περάβα»] να βακέρντιβελα ποτές για τι σικαβέλ ότι κάποιος περέλα κι αμαρτία». Εκ γιαβέρ σπουδαγμέ τζενό βακερέλα για το εδάφιος 16: «Εκ τζενό σο κα μανγκέλας τι κερέλ ζιάνι κο υπηρέτες κι Ντεβλέσκε κα μαρέλας-πες σινανέ ντα κα κερέλας ζιάνι πέσκε, επειδή βον ντένα-λεν πέρα, ενώ ο πφιρνέ όχι!»

Οτθάρ, ανταλένταρ αγαβάσα ότι ο εδάφιος Παροιμίες 24:​16 να βακερέλα ότι εκ τζενό πελό κι αμαρτία αλλά ότι νακχέλα προβλήματα ή δυσκολίες, ντα μπουτ φαρ παλάλ γιαβερέστε. Ανταλέ πφιρνέ ντουνιάστε, ο δίκαιος μπορεί τι νασφάλιβελ ή τι τθερέλ γιαβερά προβλήματα. Μπορεί ατζέ-ντα τι τθερέλ μπαρί κόντρα κατά τζενέ σο κερένα κουμάντος. Αλλά ισί σίγουρος ότι ο Ντεβέλ κα αβέλ πασέ λέστε ντα ότι κα βοηθίνελ-λες τι ντελ-λεν πέρα ντα τι τζαν λατσσές ο πράγματα λέσκε ζωγιάτε. Ανέν τουμαρέ γκοντιάτε καζόμ φαρ ντικχλέν ι Ντεβλέσκε υπηρετόν τι ντεν-λεν πέρα. Σόσκε αβέλα-πες ανταβά; Επειδή ισινάμ σίγουροι ότι «ο Ιεχωβά βοηθίνελα σαρέ οντουλέν σο περένα ντα βάντελα σαρέ οντουλέν σο ισί ντιπ κχινέ κατά πφαριπέ σο τθερένα πουμαρέ γκίστε».​—Ψαλμ. 41:​1-3· 145:​14-19.

«Ο δίκαιος» να χαιρίνελα σο ο γιαβερά-ντα τθερένα προβλήματα. Χαιρίνελα σόσκε τζανέλα ότι «ο πράγματα κα τζαν λατσσές οντουλένγκε σο νταρένα κατά αληθινός Ντεβέλ, σόσκε νταρένα λέσταρ».​—Εκκλ. 8:​11-13· Ιώβ 31:​3-6· Ψαλμ. 27:5, 6.