1, 2. Σόσκε πρέπει σαρέ ο Χριστιανοί τι μανγκέν τι σικλιόν για την ανάσταση σο κα αβέλ-πες κο ουρανός;

Ο ΠΙΟ μπουτ τζενέ σο υπηρετίνενα ι Ιεχωβάς ακανά μπεκλεντίνενα τι τζουβντιόν για πάντα κι πφουβ. Αλλά χάνικ Χριστιανοί σο τραμπίντιλε ι Ντεβλέσκε πνευμάσαρ μπεκλεντίνενα τι αναστίντιβεν για τι τζουβντιόν κο ουρανός. Οντουλά χρισμέ μανγκένα τι τζανέν σαρ κα αβέλ λένγκι ζωή κο ουρανός. Αλλά σόσκε πρέπει τι σικλιόν ανταλέσκε οντουλά-ντα σο κα τζουβντιόν κι πφουβ; Σαρ κα ντικχάς, ανταγιά ανάσταση κα ανέλ ευλογίες οντουλένγκε-ντα σο μπεκλεντίνενα τι τζουβντιόν για πάντα κι πφουβ. Οντουλέσκε, είτε μπεκλεντίνασα τι τζουβντιάς για πάντα κο ουρανός είτε κι πφουβ, πρέπει τι μανγκάς τι σικλιάς για την ανάσταση σο κα αβέλ-πες κο ουρανός.

² Ο Ντεβέλ κερντάς μερικέ μαθητέν ι Ιησούσκε τι γραφίνεν για την ανάσταση σο κα αβέλας-πες κο ουρανός. Ο απόστολος Ιωάννης βακερντάς: «Ακανά ισινάμ τσσαβέ ι Ντεβλέσκε, αλλά ατζέ να σικάντιλο σο κα αβάς. Όμως, τζανάσα ότι κάνα βοβ κα σικάντιβελ κα αβάς σαρ λέστε». (1 Ιωάν. 3:2) Οντουλέσκε, ο χρισμέ Χριστιανοί να τζανένα σαρ κα αβέν κάνα κα αναστίντιβεν κο ουρανός πνευματικέ σωμάσαρ. Όμως, τζανένα ότι κα ντικχέν ι Ιεχωβάς πουμαρέ γιακχίντζαρ κάνα κα αβέλ-πες ανταβά. Η Γραφή να μουτθαβέλα σαρέ ο πράγματα για την ανάσταση κο ουρανός, αλλά ο απόστολος Παύλος βακερντάς χάνικ πράγματα λάκε. Ο χρισμέ κα αβέν γιεκ ι Χριστόσαρ κάνα «κα κερέλ καταστροφή σαρέ οντουλέν σο κερένα κουμάντος ντα σαρέ οντουλέν σο τθερένα ζορ».  Αντρέ οντουλέντε σο κα καταστραφίνελ ισί εμ «ο τελευταίος ντουσμάνι, ο μεριπέ». Κο τέλος, ο Ιησούς​—γιεκ οντουλέντζαρ σο κα κερέν λέσαρ κουμάντος—​κα ντελ ι εξουσία κο Ιεχωβά. (1 Κορ. 15:​24-28) Σο σουκάρ βακίτι κα αβέλ οντουβά! *

3. Σαρ βοηθιντάς ι Παυλός η πίστη σο τθερέλας κι ανάσταση σαρ σικαβένα ο εδάφια 1 Κορινθίους 15:​30-32;

³ Η πίστη σο τθερέλας ο Παύλος κι ανάσταση βοηθιντάς-λες τι νταϊντίνελ μπουτ δοκιμασίες. (Διαβάνεν 1 Κορινθίους 15:​30-32) Ο Παύλος βακερντάς κο Κορίνθιοι: «Κάθε ντιβές ο μεριπέ ισί ανγκλά-μάντε». Επίσης γραφιντάς: «Ουσαρντόμ θηριόντζαρ κι Έφεσος». Μπορεί τι μανγκέλας τι βακερέλ ότι ουσαρντάς μπαγιά με άγρια ζώα κι Έφεσος. (2 Κορ. 1:8· 4:​10· 11:​23) Ή μπορεί τι κερέλας λάφι Ιουδαιόνγκε ντα γιαβερένγκε σο τζάνας λέσαρ κόντρα ντα ισινέ σαρ “θηρία”. (Πράξ. 19:​26-34· 1 Κορ. 16:9) Σο-ντα τι μανγκέλας τι βακερέλ, ο Παύλος νακχέλας μπουτ δύσκολα. Αλλά να τσσιναντάς τι πακιάλ ότι ανγκλά-πέστε κα τθερέλας λατσσέ ντιβεσά.​—2 Κορ. 4:​16-18.

4. Σαρ ντέλα ζορ ι Χριστιανόν αντιβές η ανάσταση; (Ντικχέν ι φωτογραφία κι ανγκλαϊνί σελίδα)

⁴ Τζουβντιάσα επικίνδυνε ντιβεσέντε. Μερικά πφραλά πελέ κο βαστά τζενένγκε σο ισί εγκληματίες. Γιαβερά τζουβντιόνα τθεμέντε σο αβένα-πες τζένγκια ντα νανέ ιτς αρακχαντέ. Γιαβερά πάλι τσσουβένα σε κίνδυνος πουμαρί ζωή ή πουμαρί ελευθερία σόσκε υπηρετίνενα ι Ιεχωβάς τθεμέντε σο να μουκχένα-λεν τι κερέν κάποια πράγματα ή τσσιναντέ ντιπ αμαρό έργος. Όμως, σαρέ ανταλά πφραλά ντα πφενιά να τσσιναβένα τι ντεν λατρεία ι Ιεχωβάς ντα ισί μπουτ λατσσό παράδειγμας αμένγκε. Να νταρένα, σόσκε τζανένα ότι, ατζέ-ντα άμα κα χασαρέν πουμαρί ζωή ακανά, ο Ιεχωβά κα ντελ-λεν κάτι μπουτ πιο λατσσό κο ντιβεσά σο κα αβέν.

5. Καβά επικίνδυνος πράγμας κα μπορίνελας τι κερέλ-αμέν μα τι πακιάς κι ανάσταση;

⁵ Ο Παύλος βακερντάς πι πφραλένγκε εκχέ επικίνδυνε πραγμάσκε σο σκεφτίνενας μερικοί: «Άμα ο μουλέ να κα τζουβντιόν, “τι χας ντα τι πιάς επειδή γιαβίν κα μεράς”». Μερικά τζενέ σκεφτίνενας αντικάς ατζέ-ντα πριν τι μπιάντιβελ ο Παύλος. Ατθέ ο Παύλος μπορεί τι τθερέλας πι γκοντιάτε ο λάφια ι εδαφιόσκε Ησαΐας 22:​13, σο κερέλα λάφι ι Ισραηλιτένγκε. Αντίς τι μανγκέν τι τθερέν λατσσί φιλία ι Ντεβλέσαρ, μανγκένας τι νακχέν λατσσές. Οντουλέντζαρ σο κερένας ο Ισραηλίτες ισινέ σαρ τι βακερένας «αντιβές ισινάμ, γιαβίν να ισινάμ» σαρ βακερένα μπουτ τζενέ αντιβές. Όμως, η Γραφή βακερέλα ότι ο Ισραηλίτες τσσιντιντέ μπουτ επειδή σκεφτίνενας αντικάς.​—2 Χρον. 36:​15-20.

6. Σόσκε πρέπει τι τραμπίνας γκοντιάσαρ αμαλέν αμέν σο πακιάσα ότι κα τζουβντιόν ο μουλέ;

⁶ Επειδή τζανάσα ότι ο Ιεχωβά μπορίνελα τι τζουβντιαρέλ ι μουλέν, πρέπει τι τραμπίνας αμαρέ αμαλέν γκοντιάσαρ. Ο πφραλά κι Κόρινθος έπρεπε μα τι κερέν παρέα τζενέντζαρ σο να πακιάνας ότι κα αβέλ ανάσταση. Σο σικλιάσα αμέν αντιβές; Άμα κεράσα συνέχεια παρέα τζενέντζαρ σο μανγκένα σάντε τι νακχέν λατσσές, κα τθεράς μπέτι αποτελέσματα. Άμα εκ αληθινός Χριστιανός κερέλα μπουτ παρέα ασακέ τζενέντζαρ, κα χαλαβέλ ο λατσσέ πράγματα σο ισί σικλό τι σκεφτίνελ ντα τι κερέλ. Ασακέ τζενέ μπορεί ατζέ-ντα τι κερέν-λες τι αμαρτίνελ, κάτι σο να μανγκέλα ιτς ο Ντεβέλ. Οτθάρ, ο Παύλος βακερντάς ξεκάθαρα: «Τσσουβέν γκοντί ντα κερέν οντουβά σο ισί δίκαιος ντα μα αμαρτίνεν».​—1 Κορ. 15:​33, 34.

7. Σο μπορεί τι πουτσένας μερικοί για την ανάσταση σαρ σικαβένα ο εδάφια 1 Κορινθίους 15:​35-38;

⁷ Διαβάνεν 1 Κορινθίους 15:​35-38. Εκ τζενό σο κα μανγκέλας τι κερέλ ι γιαβερέν μα τι αβέν σίγουροι ότι κα αβέλ-πες ανάσταση μπορεί τι πουτσέλας: «Σαρ κα τζουβντιόν ο μουλέ;» Ισί λατσσό τι ντικχάς ι απάντηση ι Παυλόσκι σόσκε μπουτ τζενέ αντιβές βακερένα ότι αβένα διάφορα πράγματα σοράν κατά μεριπέ. Αλλά σο σικλιαρέλα η Αγία Γραφή;

8. Καβά παράδειγμας μπορίνελα τι βοηθίνελ-αμέν τι αγαβάς σαρ κα αναστίντιβεν οντουλά σο κα τζουβντιόν κο ουρανός;

⁸ Κάνα εκ τζενό μερέλα, λέσκο σώμας κερνιόλα. Αλλά Οντουβά σο λατσσαρντάς-λεν σαρέ μπορίνελα τι τζουβντιαρέλ οντουλέ τζενές ντα τι ντελ-λες εκ νεβό σώμας. (Γέν. 1:1· 2:7) Ο Παύλος βακερντάς εκ παράδειγμας για τι σικαβέλ ότι ο Ντεβέλ να κα χρειαζίντιβελας τι ντελ πάλι εκχέ τζενές ο ίδιος σώμας. Σκεφτίνεν εκ «σπόρος». Εκ σπόρος γκιβέσκο σο σπειρίντιβελα κι πφουβ μπαριόλα ντα αβέλα νεβό γκιβ. Οντουβά γκιβ ισί μπουτ διαφορετικός κατά χουρντό σπόρος. Ο Παύλος βακερντάς ανταβά παράδειγμας για τι σικαβέλ ότι Οντουβά σο λατσσαρντάς-αμέν μπορίνελα τι ντελ εκ «σώμας αντικάς σαρ μανγκέλα».

9. Σο βακερένα ο εδάφια 1 Κορινθίους 15:​39-41 ι διαφορετικέ σωματένγκε;

⁹ Διαβάνεν 1 Κορινθίους 15:​39-41. Ο Παύλος βακερέλα ότι ο Ντεβέλ να κερντάς σαρέ ο σώματα ίδια. Για παράδειγμας, ο σώματα ι ζωόνγκε σο τθερένα σταρ πιντρέ, ι τσιρικλένγκε ντα ι ματσσένγκε ισί διαφορετικά. Βακερντάς ότι ο κχαμ ισί διαφορετικός κατά τσσιμούτ. Επίσης βακερντάς ότι «κάθε τσεργάν τθερέλα πιρό σουκαριπέ». Ισί μπαγιά ότι ναστί ντικχάσα ι διαφορά αμαρέ γιακχίντζαρ. Όμως, ο επιστήμονες βακερένα αμένγκε ότι υπαρχίντιβενα σαβέ τι μανγκές τσεργανιά, μερικά ισί μπαρέ, γιαβερά χουρντέ, μερικά λολέ, γιαβερά παρνέ ή κίτρινα σαρ ισί ο κχαμ. Ο Παύλος βακερντάς επίσης ότι «ισί σώματα κο ουρανός ντα σώματα κι πφουβ». Σο μανγκέλας  τι βακερέλ; Ότι αμέν ατθέ κι πφουβ τθεράσα σώματα σο ισί κερντέ τσικάταρ αλλά κο ουρανός υπαρχίντιβενα πνευματικά σώματα, σαρ ισί ο σώματα ι αγγελόνγκε.

10. Σο σώμας κα τθερέν οντουλά σο αναστίντιβενα για τι τζουβντιόν κο ουρανός;

¹⁰ Ντεν σημασία σο βακερντάς σοράν ο Παύλος: «Αντικάς ισί η ανάσταση ι μουλένγκι-ντα. Περέλα σωμάσαρ σο ισί τι μερέλ, ιστίλα σωμάσαρ σο ναστί μερέλα». Όμως, κάνα ι τζενέσκο σώμας μερέλα, κερνιόλα ντα αβέλα τσικ. (Γέν. 3:​19) Σαρ αβέλα-πες εκ τζενό τι “ιστίλ σωμάσαρ σο ναστί μερέλα”; Ο Παύλος να κερέλας λάφι εκχέ τζενέσκε σο αναστίντιβελα για τι τζουβντιόλ κι πφουβ, σαρ ο τζενέ σο τζουβντιαρντάς ο Ηλίας, ο Ελισαιέ ντα ο Ιησούς. Ο Παύλος κερέλας λάφι εκχέ τζενέσκε σο αναστίντιβελα “πνευματικέ” σωμάσαρ για τι τζουβντιόλ κο ουρανός.​—1 Κορ. 15:​42-44.

11, 12. Σο αλλαγή αβιλί-πες κο Ιησούς κάνα αναστισάλο, ντα σαρ αβέλα-πες κάτι ασακό κο χρισμέ-ντα;

¹¹ Κάνα ο Ιησούς ισινέ ατθέ κι πφουβ, τθερέλας σώμας κερντό τσικάταρ. Αλλά κάνα αναστισάλο, «αβιλό πνεύμας σο ντέλα ζωή» ντα βουρτισάλο κο ουρανός. Αντικάς ο χρισμέ-ντα κα αναστίντιβεν πνευματικέ σωμάσαρ για τι τζουβντιόν κο ουρανός. Ο Παύλος βακερντάς: «Σαρ ιριντάμ ι εικόνα οντουλέσκι σο κερντιλό τσικάταρ, αντικάς κα ιριάς ι εικόνα-ντα οντουλέσκι σο αβιλό κατά ουρανός».​—1 Κορ. 15:​45-49.

¹² Ισί σημαντικός τι ντας-αμέν γκοντί ότι ο Ιησούς να αναστισάλο τζενέσκε σωμάσαρ. Χάνικ πριν τι τελειώνελ ο κεφάλαιος 15, ο Παύλος βακερντάς: «Σώμας ντα ρατ ναστί ντένα κι Βασιλεία κι Ντεβλέσκι» κο ουρανός. (1 Κορ. 15:​50) Ο απόστολοι ντα γιαβερά χρισμέ να κα αναστίντιβενας κο ουρανός σωμάσαρ σο ισί τι μερέλ ντα ισί κερντό τσικάταρ ντα ρατέσταρ. Κάνα κα αναστίντιβενας; Ο Παύλος βακερντάς ότι ανταγιά ανάσταση κα αβέλας-πες κο μέλλον, να κα αβέλας αμέσως σοράν λένγκε μεριμάσταρ. Κάνα γραφιντάς ι Πρώτη Επιστολή κο Κορινθίους, μερικοί μαθητές  “σοτέας ο σοϊπέ ι μεριμάσκο”, σαρ για παράδειγμας, ο απόστολος Ιάκωβος. (Πράξ. 12:1, 2) Γιαβερά απόστολοι ντα χρισμέ κα “σοβένας ο σοϊπέ ι μεριμάσκο” πιο σοράν.​—1 Κορ. 15:6.

13. Σο κα αβέλας-πες κι παρουσία κι Ιησούσκι;

¹³ Εμ ο Ιησούς εμ ο Παύλος βακερντέας ότι κα αβέλας εκ σημαντικός βακίτι​—η παρουσία ι Χριστόσκι. Αζομάν κα αβένας-πες τζένγκια, σεισμοί, νασφαλίματα ντα γιαβερά μπέτι πράγματα σαρό κο ντουνιάς. Ντικχάσα ανταγιά προφητεία ι Γραφιάκι τι νικιόλ μπαγιά κατά 1914. Αλλά κα αβέλας-πες κάτι γιαβέρ-ντα σο ισί σημαντικός. Ο Ιησούς βακερντάς ότι ο λατσσέ αμπέρια ι Ντεβλέσκε Βασιλειάκε κα βακέρντιβενας «σαρί κι πφουβ για τι ασουνέν-λεν σαρέ ο τθεμά, ντα αζομάν κα [αβέλας] ο τέλος». (Ματθ. 24:3, 7-14) Ο Παύλος βακερντάς ότι η “παρουσία ι Κυριόσκι” κα αβέλας βακίτι-ντα σο κα αναστίντιβενας ο χρισμέ Χριστιανοί σο “σοτέας ο σοϊπέ ι μεριμάσκο”.​—1 Θεσ. 4:​14-16· 1 Κορ. 15:23.

14. Σο αβέλα-πες ι χρισμέ πφραλέντζαρ σο μερένα κι παρουσία κι Χριστόσκι;

¹⁴ Ο χρισμέ σο μερένα ακανά αναστίντιβενα οντιά στιγμή για τι τζουβντιόν κο ουρανός. Ανταβά σικαβένα-λες ο λάφια ι Παυλόσκε κο εδάφια 1 Κορινθίους 15:​51, 52: «Να κα σοβάς σαρέ ο σοϊπέ ι μεριμάσκο, σαρέ όμως κα αλλάνας, σε εκ στιγμή, μπουτ σουγκό, καζόμ κα μπασέλ η τελευταία σάλπιγγα». Ανταλά λάφια ι Παυλόσκε νικιόνα μπαγιά ακανά! Κάνα αναστίντιβενα, ανταλά πφραλά ι Χριστόσκε τθερένα μπαρί χαρά. Κα αβέν «πάντα ι Κυριόσαρ».​—1 Θεσ. 4:17.

15. Σο μπουτί τθερένα τι κερέν οντουλά σο κα αλλάνεν «μπουτ σουγκό»;

¹⁵ Η Γραφή βακερέλα αμένγκε σο κα κερέν κο ουρανός οντουλά σο αλλάνενα «μπουτ σουγκό». Ο Ιησούς βακερέλα λένγκε:  «Οντουλέστε σο νικίνελα ντα κερέλα οντουλά σο κεράβα μέχρι κο τέλος κα νταβ εξουσία οπράλ κο τθεμά, αντικάς σαρ λιντόμ εξουσία μι Νταντέσταρ. Ντα κα κερέλ κουμάντος σαρ τσομπάνης ι τζενέν σιδερένιε ραβδίσαρ για τι πφανγκιόν σαρ κχορέ». (Αποκ. 2:​26, 27) Βον κα αβέν γιεκ ι Ιησούσαρ κάνα κα κερέλ κουμάντος σαρ τσομπάνης ι τθεμέν σιδερένιε ραβδίσαρ.​—Αποκ. 19:​11-15.

16. Σαρ κα νικίνεν μπουτ τζενέ ο μεριπέ;

¹⁶ Ντικχίντιβελα ξεκάθαρα ότι ο χρισμέ κα νικίνεν ο μεριπέ. (1 Κορ. 15:​54-57) Επειδή κα αναστίντιβεν, κα ντιντιόλ-λεν ι ευκαιρία τι βοηθίνεν τι νασέλ ο πφιρνιπέ σαρό κατά ντουνιάς κάνα κα αβέλ ο Αρμαγεδδώνας. Εκατομμύρια γιαβερά Χριστιανοί, μουρσά ντα τζουβλιά, κα σώντιβεν κατά «μπαρί στεναχώρια» ντα κα νακχέν κο νεβό ντουνιάς. (Αποκ. 7:​14) Σαρέ οντουλά κα ντικχέν πουμαρέ γιακχίντζαρ εκ γιαβέρ μπαρί νίκη​—κα ιστίν δισεκατομμύρια τζενέ σο μουλέ. Σκεφτίνεν σο μπαρί χαρά κα τθεράς κάνα κα αβέλ-πες ανταβά! (Πράξ. 24:​15) Σαρέ οντουλά σο κα ατσσόν αφοσιωμέ κο Ιεχωβά κα νικίνεν ο μεριπέ σο λιντάμ κατά Αδάμ. Κα τζουβντιόν για πάντα.

17. Σο πρέπει τι κεράς ακανά σαρ βακερέλα ο εδάφιος 1 Κορινθίους 15:58;

¹⁷ Κάθε Χριστιανός σο τζουβντιόλα ακανά πρέπει τι αβέλ πφερντό εκτίμηση οντουλένγκε σο γραφιντάς ο Παύλος κο Κορίνθιοι για την ανάσταση. Τθεράσα μπουτ λόγους τι ντας καν κι Παυλόσκι συμβουλή ντα τι τθεράς μπουτ πράγματα τι κεράς «κο έργος κι Κυριόσκο». (Διαβάνεν 1 Κορινθίους 15:​58) Άμα πάντα κεράσα ο πιο λατσσό κο έργος, κα τθεράς εκ μπουτ ευτυχισμέ ζωή κο ντιβεσά σο κα αβέν. Να νακχέλα αμαρέ γκοντιάταρ καζόμ σουκάρ κα αβέλ οντουβά βακίτι. Σίγουρα, κα σικαβέλ αμένγκε ότι να μαράσα-αμέν ι Κυριόσκε σινανέ.