1. Σαρ απαντίνελα μπουτ φαρ ο Ιεχωβά κο προσευχές πι υπηρετόνγκε;

 ΤΖΑΝΕΝΑΣ ότι ο Ιεχωβά μπορίνελα τι χρησιμοποιήνελ-τουμέν για τι απαντίνελ κι προσευχή σο κερέλα εκ τζενό αντράλ πι γκίσταρ; Ανταβά μπορεί τι αβέλ-πες είτε ισινέν πρεσβύτεροι είτε διακονικοί υπηρέτες είτε σκαπανείς είτε ευαγγελιζόμενοι. Αβέλα-πες είτε ισινέν τερνέ είτε πφουρέ, είτε πφραλά είτε πφενιά. Κάνα εκ τζενό σο μανγκέλα ι Ιεχωβάς ντέλα βίκος για τι βοηθίνελ-λες, αμαρό Ντεβέλ μπουτ φαρ “λοκχιαρέλα λέσκο γκι” αντράλ κατά πρεσβύτεροι ντα γιαβερέ πιστέ υπηρετόνταρ. (Κολ. 4:​11) Σο μπαρό προνόμιος ισί τι υπηρετίνας ι Ιεχωβάς ντα αμαρέ πφραλέν αντικάς! Μπορίνασα τι κεράς-λες ανταβά κάνα αβέλα εκ νασφαλιπέ, εκ καταστροφή ή τζάνα αμέντζαρ κόντρα.

2. Σόσκε μπέκιμ τι αβέλ δύσκολος τι βοηθίνας ι γιαβερέν κάνα αβέλα εκ νασφαλιπέ;

² Εκ μπαρό νασφαλιπέ μπέκιμ μα τι μουκχέλ-αμέν τι κεράς μπουτ πράγματα ο εκ ι γιαβερέσκε. Φιρειπείν, μπέκιμ μανγκάσα τι τζας αμαρέ αμαλέντε αλλά, άμα κα κεράς-λες ανταβά, κα ανάς αμέν ντα ι γιαβερέν σε κίνδυνος. Μπέκιμ μανγκάσα τι καλίνας τζενέν σο ζορίντιβενα τι ντεν-λεν πέρα για τι χας γιεκ, αλλά ανταβά-ντα μα τι αβέλα-πες. Μπέκιμ μανγκάσα τι βοηθίνας ι γιαβερέν, αλλά ισί δύσκολος σόσκε μερικά τζενέ αμαρέ φαμιλιάταρ ισί νασφαλέ. Όμως, μανγκάσα τι βοηθίνας αμαρέ πφραλέν, ντα αβέλα ι Ιεχωβάσκο γκι κάνα κεράσα σο νακχέλα αμαρέ βαστέσταρ λένγκε. (Παρ. 3:​27· 19:​17) Σο μπορίνασα τι κεράς;

3. Σο σικλιάσα κατά πρεσβύτεροι κι κχανγκιρί σο ισί η Ντέζι; (Ιερεμίας 23:4)

³ Σο μπορίνενα τι κερέν ο πρεσβύτεροι. Άμα ισινέν πρεσβύτεροι, σικλιόν λατσσές ι μπρακέν. (Διαβάνεν Ιερεμίας 23:4) Η Ντέζι, σο ντικχλάμ λάκε κο γιαβέρ μάθημας, βακερέλα:  «Ανγκλέ, ο πρεσβύτεροι μι ομιλόστε νικιόνας μάντζαρ ντα γιαβερέντζαρ κο έργος ντα κερένας παρέα αμέντζαρ». b Ανταβά κερντάς-λες πο εύκολος ι πρεσβυτερόνγκε τι βοηθίνεν-λα κάνα αβιλό ο νασφαλιπέ COVID-19 ντα ιτιρί ανταλέσταρ μουλέ μερικοί λάκε τζενένταρ.

4. Σόσκε ο πρεσβύτεροι μπορισάλε τι βοηθίνεν οντουλέ πφενιά, ντα καβά ισί ο σικλιαριπέ;

⁴ Η Ντέζι βακερέλα: «Ντικχάβας ι πρεσβυτερόν σαρ αμαλά, οτθάρ ισινέ μάνγκε πο εύκολος τι πουτράβ-μαν λένγκε». Σο σικλιόνα ο πρεσβύτεροι; Αρακχαβέν οντουλέν σο ντιντιλέ τουμαρέ βαστέντε πριν τι αβέλ εκ πρόβλημας. Τι αβέν λέντζαρ αμαλά. Άμα κα αβέλ εκ νασφαλιπέ ντα ναστί κα τζαν τι ντικχέν-λεν πασάλ, προσπαθίνεν τι κερέν λέντζαρ λάφι γιαβέρσοϊ. «Μπάζιμα κο ίδιος ντιβές, διαφορετικοί πρεσβύτεροι λένας-μαν τηλέφωνος ή μπουτσσαβένας μάνγκε μηνύματα», ντέλα-πες γκοντί η Ντέζι. «Ο εδάφια σο βακερένας μάνγκε ερεσένας μι γκίστε, παρόλο σο τζανάβας-λεν λατσσές».

5. Σαρ μπορίνενα ο πρεσβύτεροι τι σικλιόν σο χρειαζίντιβενα ο πφραλά ντα ο πφενιά, ντα σαρ μπορίνενα τι βοηθίνεν-λεν;

⁵ Εκ τρόπος για τι σικλιόν σο χρειαζίντιβενα τουμαρέ πφραλά ντα πφενιά ισί τι κερέν λένγκε ερωτήσεις χωρίς τι ανέν-λεν σε δύσκολη θέση. (Παρ. 20:5) Τθερένα χαμπέ, φάρμακα ντα γιαβερά σημαντικά πράγματα; Μήπως υπαρχίντιβελα ο κίνδυνος τι χασαρέν πουμαρί μπουτί ή ατζέ-ντα πουμαρό κχερ; Μήπως μανγκένα τι βοηθίνας-λεν τι κερέν μερικά χαρτιά για τι λεν κάτι κατά κράτος; Μερικά πφραλά ντινέ κι Ντέζι πράγματα σο τθερέλας ανάγκη. Αλλά οντουβά σο βοηθιντάς-λα πο μπουτ τι νταϊντίνελ ισινέ ο μανγκιπέ σο σικαντέ λάκε ο πρεσβύτεροι ντα η ζορ σο ντινέ-λα κατά Γραφή. Βόι βακερέλα: «Ο πρεσβύτεροι προσευχίντιβενας μάντζαρ. Παρόλο σο να ντάβα-μαν γκοντί λατσσές σο βακερένας, ντάβα-μαν γκοντί σαρ νιωθίναβας. Αντράλ λένταρ ο Ιεχωβά βακερέλας μάνγκε: “Να ισινάν κορκορί”».​—Ησ. 41:​10, 13.

6. Σο μπορίνενα τι κερέν μπουτ πφραλά κι κχανγκιρί για τι βοηθίνεν ι γιαβερέν; (Ντικχέν ι φωτογραφία)

⁶ Σο μπορίνενα τι κερέν ο γιαβερά. Μπεκλεντίνασα ότι ο πρεσβύτεροι κα αρακχαβέν ι πφραλέν ντα ι πφενίν κι κχανγκιρί. Αλλά ο Ιεχωβά βακερέλα σαρέ αμένγκε τι ντας ζορ ντα βοήθεια κο γιαβερά. (Γαλ. 6:​10) Ατζέ-ντα άμα κα κεράς κάτι χουρντό εκχέ πφραλέσκε σο ισί νασφαλό, κα σικαβάς λέσκε ότι μανγκάσα-λες. Εκ μαξίμι κα μπορίνελας τι μπουτσσαβέλ εκ κάρτα ή εκ ζωγραφιά για τι ντελ ζορ εκχέ πφραλές. Εκ τερνό κα μπορίνελας τι κερέλ μερικά μπουτιά ή ψώνια εκχέ πφενιάκε. Εκ γιαβέρ κα  μπορίνελας τι κερέλ εκ χαμπέ ντα τι μουκχέλ-λες κο κχερ εκχέ νασφαλέ πφραλέσκο, χωρίς τι τσσουβέλ-πες καέκ σε κίνδυνος. Ισί μπαγιά ότι, κάνα εκ νασφαλιπέ πφιρντιόλα μπουτ, σαρέ κι κχανγκιρί μανγκάσα ζορ. Κα μπορίναας τι ατσσάς χάνικ πο μπουτ σοράν κατά συνάθροιση για τι κεράς λάφι ι πφραλέντζαρ ντα ι πφενίντζαρ, είτε πασάλ είτε κατά Ίντερνετ. Εμ ο πρεσβύτεροι τθερένα ανάγκη τι ντας-λεν ζορ. Ισί πφραλά σο μπουτσσαβένα κάρτες για τι βακερέν ευχαριστώ ι πρεσβυτερόνγκε, σόσκε ο πρεσβύτεροι τθερένα πο μπουτ πράγματα τι κερέν αντρέ εκχέ νασφαλιμάστε. Σο σουκάρ ισί τι κεράς αμέν-ντα κάτι για τι “ενθαρρύνας ο εκ ι γιαβερές ντα τι ντας ζορ ο εκ ι γιαβερές”!​—1 Θεσ. 5:11.

7. Καγιά δυσκολία μπορεί τι αβέλ σοράν εκχέ καταστροφιάταρ;

⁷ Εκ καταστροφή μπορίνελα τι αλλάνελ μπουτ σουγκό ι ζωή εκχέ τζενέσκι οτθέ σο να μπεκλεντίνελα-λες. Μπορεί τι χασαρέλ οντουλά σο τθερέλα, πο κχερ ή ατζέ-ντα πι τζενέν. Ανταλά μπέτι πράγματα αβένα-πες εμ αμαρέ πφραλέντε ντα πφενίντε. Σαρ κα βοηθίνας-λεν;

8. Σο μπορίνενα τι κερέν ο πρεσβύτεροι ντα ο σορέ ι φαμιλίνγκε πριν τι αβέλ εκ καταστροφή;

⁸ Σο μπορίνενα τι κερέν ο πρεσβύτεροι. Πρεσβύτεροι, βοηθίνεν τουμαρέ πφραλέν τι αβέν έτοιμοι πριν τι αβέλ εκ καταστροφή. Τι αβέν σίγουροι ότι σαρέ κι κχανγκιρί τζανένα σο πρέπει τι κερέν για τι ατσσόν αρακχαντέ ντα για τι κερέν λάφι ι πρεσβυτερόντζαρ. Η Μάργκαρετ, σο ντικχλάμ λάκε κο γιαβέρ μάθημας, βακερέλα: «Κο ανάγκες σο τθερέλα αμαρί κχανγκιρί, ο πρεσβύτεροι βακερντέ αμένγκε ότι ισινέ ατζέ μπαρό κίνδυνος τι αβέλ εκ γιακ αμαρέ τθανέστε. Βακερντέ ότι άμα κα ντιντιόλ εντολή τι νασάς αμαρέ κχερέσταρ ή άμα ο πράγματα κα αβέν επικίνδυνα, πρέπει τι νασάς χωρίς τι χασαράς σαάτι». Ο πφραλά ντινέ ανταλά οδηγίες οπράλ κο σαάτι, σόσκε παντς εβδομάδες πο σοράν αβιλί εκ μπουτ μπαρί γιακ. Κι φαμιλιάκι λατρεία, ο σορέ ι φαμιλίνγκε μπορίνενα τι ντικχέν γιεκ πουμαρέ φαμιλιάσαρ σο κα κερέλ ο κάθε εκ λένταρ. Άμα ισινέν προετοιμασμέ εμ τουμέν εμ τουμαρέ τσσαβέ, μπέκιμ τι αβέν πο ήρεμοι άμα κα αβέλ εκ καταστροφή.

9. Σαρ μπορίνενα ο πρεσβύτεροι τι κερέν ο πράγματα εκχέ σειράσαρ πριν ντα σοράν εκχέ καταστροφιάταρ;

⁹ Άμα ισινέν επίσκοπος εκχέ ομιλόσκο, μα μπεσέν τι αβέλ εκ καταστροφή για τι γκίντεν ο νεβέ αριθμοί ντα διευθύνσεις σαρέ ι πφραλένγκε κο όμιλος, σο μανγκένα τι ντεν-λεν. Γραφίνεν-λεν εκχέ τθανέστε ντα τθερέν αντρέ πάντα ο πο νεβέ στοιχεία. Αντικάς, άμα κα αβέλ εκ καταστροφή, κα μπορίνεν τι κερέν λάφι ι κάθε εκχέσαρ κο όμιλος για τι ντικχέν σο χρειαζίντιβελα. Μπουτσσαβέν ανταλά πληροφορίες κο συντονιστής κο πρεσβυτέριος ντα βοβ κα κερέλ λάφι ι επισκοπόσαρ τουμαρέ περιοχιάκο. Κάνα ανταλά πφραλά κερένα μπουτί γιεκ, κα μπορίνεν τι βοηθίνεν μπουτ. Σοράν κατά γιακ, ο επίσκοπος ι περιοχιάκο κι κχανγκιρί σο ισί η Μάργκαρετ ατσσιλό τζανγκαντό 36 σαάτια, ντα βοηθίνελας ι πρεσβυτερόν τι ντικχέν σαρ κα κερέν λάφι πασέ 450 πφραλέντζαρ σο μουκχλέας πουμαρό κχερ ντα σαρ κα αρακχαβέν-λεν. (2 Κορ. 11:​27) Αντικάς, αρακχλέ τθαν τι μπεσέν σαρέ ο πφραλά σο χρειαζίντιβενας-λες.

10. Σόσκε ισί σημαντικός ι πρεσβυτερόνγκε τι αρακχαβέν ι πφραλέν; (Ιωάννης 21:15)

¹⁰ Ο πρεσβύτεροι τθερένα ι ευθύνη τι ντεν κο πφραλά ζορ κατά Γραφή ντα τι βοηθίνεν οντουλέν σο τθερένα πφανγκό γκι. (1 Πέτρ. 5:2) Κάνα αβέλα εκ καταστροφή, ο πρεσβύτεροι πρέπει πρώτα τι αβέν σίγουροι ότι σαρέ ο πφραλά ντα ο πφενιά ισί αρακχαντέ, τθερένα χαμπέ, σέα ντα εκ τθαν τι μπεσέν. Όμως ατζέ-ντα κάνα κα νακχέν μπουτ μασεκά, ο πφραλά κα συνεχίνεν τι μανγκέν τι ντιντιόλ-λεν ζορ κατά Γραφή ντα λοκχιπέ κο γκι. (Διαβάνεν Ιωάννης 21:​15) «Μανγκέλα σαάτι για τι αρακχές πάλι τι ζορ»,  βακερέλα ο Χάρολντ, σο ισί σε εκ Επιτροπή Τμήματος ντα κερντάς λάφι μπουτέ πφραλέντζαρ ντα πφενίντζαρ σο νακχλέ φυσικές καταστροφές. «Χάνικ χάνικ μπέκιμ τι τσσουβέν πουμαρί ζωή εκχέ σειράστε, αλλά ναστί κα μπιστρέν εκχέ τζενές σο μανγκένας ντα μουλό, εκ σημαντικός σέι σο χασάρντιλο ή ότι νακχλέ εκ μπαρό κίνδυνος ντα σωσάλε ι τελευταία στιγμή. Κάθε φαρ σο αβένα λένγκε γκοντιάτε σαρέ ανταλά, μπέκιμ τι ντουκχαβέν λένγκο γκι. Ανταβά να μανγκέλα τι βακερέλ ότι τθερένα χάνικ πίστη. Ισί λογικός τι νιωθίνεν αντικάς, τζενέ ισινάμ».

11. Καλά ανάγκες τθερένα ο φαμιλιά μπουτ φαρ;

¹¹ Ι πρεσβυτερόνγκε ισί μπουτ σημαντικός «τι ροβέν οντουλέντζαρ σο ροβένα». (Ρωμ. 12:​15) Ο πρεσβύτεροι χρειαζίντιβελα τι ανέν κι γκοντί κι πφραλένγκι σο νακχλέ εκ καταστροφή ότι ο Ιεχωβά ντα ο πφραλά ατζέ ατζέ μανγκένα-λεν. Πρέπει τι βοηθίνεν ι φαμιλίν τι ατσσικιαρέν πουμαρό πνευματικός πρόγραμμας: τι προσευχίντιβεν, τι σικλιαρέν-πες κατά Γραφή ντα τι τζαν κο συναθροίσεις ντα κο έργος. Ατζέ, μπορίνενα τι σικαβέν κο νταντά ντα κο νταγιά καζόμ λατσσό ισί τι βοηθίνεν πουμαρέ τσσαβέν τι τθερέν πουμαρέ γιακχά πραγματέντε σο ναστί κερέλα λένγκε ζιάνι καέκ καταστροφή. Νταντάλεν ντα νταγιάλεν, ανέν κι γκοντί τουμαρέ τσσαβένγκι ότι ο Ιεχωβά κα αβέλ πάντα λένγκο Αμάλ ντα να κα τσσιναβέλ τι αβέλ οτθέ λένγκε. Ντα μα μπιστρέν τι βακερέν λένγκε ότι ισί αντρέ εκχέ φαμιλιάτε πφραλέντζαρ ντα πφενίντζαρ σαρό κατά ντουνιάς, σο μανγκένα τι τθάβντεν για τι βοηθίνεν-λεν.​—1 Πέτρ. 2:17.

12. Σο μπορίνενα τι κερέν ο γιαβερά για τι βοηθίνεν κάνα αβέλα εκ καταστροφή; (Ντικχέν ι φωτογραφία)

¹² Σο μπορίνενα τι κερέν ο γιαβερά. Άμα κα αβέλ εκ καταστροφή πασέ τουμέντε, πουτσέν ι πρεσβυτερόν σαρ τι βοηθίνεν. Μπέκιμ μπορίνενα τι ντεν εκ τθαν σο κα μπεσέν για χάνικ είτε οντουλά σο μουκχλέ πουμαρό κχερ είτε οντουλά σο γκιλέ τι βοηθίνεν κι οικοδόμηση. Ή μπορίνενα τι μπουτσσαβέν χαμπίματα ντα γιαβερά πράγματα πφραλέντε σο τθερένα-λεν ανάγκη. Άμα η καταστροφή κα αβέλ ντουρ τουμένταρ, πάλι μπορίνενα τι βοηθίνεν. Σαρ; Ι προσευχιέντζαρ σο κερένα οντουλέ τζενένγκε. (2 Κορ. 1:​8-11) Μπέκιμ μπορίνενα τι ντεν τουμαρέ λοβένταρ κο παγκόσμιος έργος για τι βοηθίνεν κο προσπάθειες σο αβένα-πες οντουλέ πφραλένγκε. (2 Κορ. 8:​2-5) Άμα μπορίνενα τι τζαν οτθέ σο αβιλί η καταστροφή για τι βοηθίνεν, πουτσέν ι πρεσβυτερόν σο πρέπει τι κερέν. Άμα κα βακέρντιβελ τουμένγκε τι τζαν, μάλλον ο πφραλά κα σικλιαρέν-τουμέν για τι χρησιμοποιήνεν-τουμέν καζόμ πο λατσσές αβέλα-πες.

13. Καλά δυσκολίες νακχένα αμαρέ πφραλά τθεμέντε σο τσσιναντέ αμαρό έργος;

¹³ Τθεμέντε σο τσσιναντέ αμαρό έργος, η ζωή ισί ατζέ πο δύσκολη. Ο πφραλά οντουλέ τθεμέντε συνεχίνενα τι τθερέν προβλήματα ι λοβέντζαρ, τι νασφάλιβεν ντα τι χασαρέν κο μεριπέ τζενέν σο μανγκένα. Αλλά ιτιρί κατά κόντρα σο τζάνα λέντζαρ, μπέκιμ ο πρεσβύτεροι μα τι μπορίνεν τι τζαν πφραλέντε σο τθερένα ανάγκη για τι ντεν-λεν ζορ, ή ατζέ-ντα μα τι μπορίνεν τι κερέν λέντζαρ λάφι ελεύθερα. Ανταβά αβιλό-πες κο Αντρέι σο ντικχλάμ λέσκε κο γιαβέρ μάθημας. Εκ πφεν λέσκε ομιλόστε τθερέλας προβλήματα ι λοβέντζαρ. Σοράν η πφεν ντινάς τρακάρα ντα χρειαζίντιβελας τι κερέλ μπουτ εγχειρήσεις, οτθάρ ναστί κερέλας μπουτί. Παρόλο σο τζάνας λέντζαρ κόντρα ντα ισινέ εμ ο Κορωνοϊός, ο πφραλά κερντέ ο πο λατσσό για τι βοηθίνεν. Ο Ιεχωβά ντικχέλας.

14. Σαρ ντένα ο πρεσβύτεροι λατσσό παράδειγμας κάνα ντένα μπέσα κο Ιεχωβά;

¹⁴ Σο μπορίνενα τι κερέν ο πρεσβύτεροι. Ο Αντρέι προσευχισάλο ντα κερντάς σο νακχέλας λέσκε βαστέσταρ. Σαρ απαντιντάς ο Ιεχωβά; Τσσιντιντάς πφραλέν σο μπορίνενας τι κερέν πο μπουτ πράγματα για τι βοηθίνεν-λα. Μερικοί γκερένας ι πφενιά κο γιατρός πουμαρέ κουρσάσαρ ντα γιαβερά ντινέ-λα λοβέ. Ο Ιεχωβά τσσιντιντάς-λεν τι κερέν ο πο λατσσό ντα ευλογιντάς οντουλά σο κερντέ μπίνταρανες, σαρέ γιεκ. (Εβρ. 13:​16) Πρεσβύτεροι, κάνα τσσινάντιβελα ο έργος, μανγκέν γιαβερένταρ-ντα τι κερέν πράγματα. (Ιερ. 36:5, 6) Ντα ο πο σημαντικός, ντεν μπέσα κο Ιεχωβά. Βοβ μπορίνελα τι βοηθίνελ-τουμέν τι αρακχαβέν αμαρέ πφραλέν ντα πφενίν.

15. Σαρ μπορίνασα τι ατσσάς γιεκ αμαρέ πφραλέντζαρ κάνα ο τζενέ τζάνα αμέντζαρ κόντρα;

¹⁵ Σο μπορίνενα τι κερέν ο γιαβερά. Κάνα ο τζενέ τσσιναβένα αμαρό έργος, μπέκιμ χρειαζίντιβελα τι γκιντίντιβας χουρντέ ομιλόντε ι συναθροισιένγκε. Οτθάρ αγαβάσα ότι ισί πο σημαντικός από ποτές τι τζας-λεν λατσσές αμαρέ πφραλέντζαρ. Πολεμίνεν ι Μπενγκές, μα ο εκ ι γιαβερές. Μα ατσσόν κο λάθη τουμαρέ πφραλένγκε. Άμα αβιλό-πες κάτι λέντζαρ, αρακχέν-λεν σουγκό. (Παρ. 19:​11· Εφεσ. 4:​26) Τι αβέν έτοιμοι τι βοηθίνεν ι γιαβερέν. (Τίτο 3:​14) Η βοήθεια σο ντένας ο γιαβερά κι πφεν σο τθερέλας ανάγκη κερντάς λατσσιπέ σαρό κο όμιλος. Ο πφραλά αβιλέ πο πασέ ο εκ κο γιαβέρ ντα νιωθίνενας σαρ φαμιλί.​—Ψαλμ. 133:1.

16. Σαρ διαβάνασα κο εδάφια Κολοσσαείς 4:3, 18, σαρ μπορίνασα τι βοηθίνας αμαρέ πφραλέν ντα πφενίν σο τζάνα λέντζαρ κόντρα;

¹⁶ Χιλιάδες πφραλά ντα πφενιά υπηρετίνενα ι  Ιεχωβάς παρόλο σο ο κυβερνήσεις τσσιναντέ αμαρό έργος. Μερικοί λένταρ ισί φυλακισμέ σόσκε μανγκένα τι ατσσόν πιστοί. Μπορίνασα τι προσευχίντιβας λένγκε ντα λένγκε φαμιλίνγκε. Επίσης μπορίνασα τι προσευχίντιβας οντουλένγκε σο βοηθίνενα μπίνταρανες ι φυλακισμέ πφραλέν παρόλο σο ισί ο κίνδυνος τι ασταρέν λεν-ντα. Κερένα-λες ανταβά καζόμ βοηθίνενα-λεν τι ατσσόν πασέ κο Ιεχωβά, ντένα-λεν ο πράγματα σο χρειαζίντιβενα ντα τσσίντενα λένταρ κο δικαστήρια. c (Διαβάνεν Κολοσσαείς 4:3, 18) Μα μπιστρέν ποτές καζόμ ζορ τθερένα τουμαρέ προσευχές!​—2 Θεσ. 3:1, 2· 1 Τιμ. 2:1, 2.

17. Σαρ μπορίνενα τι προετοιμάντιβεν από ακανά ι ντιβεσένγκε σο κα τζαν τουμέντζαρ κόντρα;

¹⁷ Τουμέν ντα τουμαρί φαμιλί μπορίνενα τι προετοιμάντιβεν από ακανά ι ντιβεσένγκε σο κα τζαν τουμέντζαρ κόντρα. (Πράξ. 14:​22) Μα τσσουβέν τουμαρέ γκοντιάτε σαρέ ο μπέτι πράγματα σο κα μπορίνενας τι αβέν-πες τουμένγκε. Οκιά μπάνταρ, αβέν πο λατσσέ αμαλά ι Ιεχωβάσαρ ντα βοηθίνεν τουμαρέ τσσαβέν-ντα τι κερέν-λες ανταβά. Άμα μπάζιμα νιωθίνενα ότι τασαβέλα-τουμέν η ανησυχία, πουτρέν τουμαρό γκι κο Ντεβέλ. (Ψαλμ. 62:7, 8) Κερέν λάφι σαρ φαμιλί ντα βακερέν σαρέ ο λόγοι σο τθερένα τι ντεν μπέσα λέστε. d Σαρ αβέλα-πες εκχέ καταστροφιάσαρ-ντα, κάνα προετοιμάντιβενα ντα ντένα μπέσα κο Ιεχωβά, κα σικλιαρέν τουμαρέ τσσαβέν τι αβέν μπίνταρανε ντα τι τθερέν ειρήνη.

18. Σο ντιβεσά τθεράσα ανγκλ’ αμέντε;

¹⁸ Η ειρήνη ι Ντεβλέσκι κερέλα-αμέν τι νιωθίνας αρακχαντέ. (Φιλιπ. 4:6, 7) Αντράλ κατά ειρήνη ανταγιά, ο Ιεχωβά γαλίνελα αμαρό γκι παρόλο σο μπορεί τι τθεράσα νασφαλίματα, καταστροφές ντα τι τζάνα αμέντζαρ κόντρα. Χρησιμοποιήνελα μπουτιαρνέ πρεσβυτερόν για τι αρακχαβέν-αμέν. Ντα ντέλα-αμέν σαριλέν ο προνόμιος τι βοηθίνας ο εκ ι γιαβερές. Η ειρήνη σο τθεράσα ακανά κα βοηθίνελ-αμέν τι νακχαβάς ατζέ πο μπαρέ δοκιμασίες σο τθεράσα ανγκλ’ αμέντε, ατζέ-ντα ι «μπαρί στεναχώρια». (Ματθ. 24:​21) Οντουβά βακίτι, κα χρειαζίντιβελ τι ατσσικιαράς αμαρί ειρήνη ντα τι βοηθίνας γιαβερέν-ντα τι κερέν-λες ανταβά. Σοράν ανταλέσταρ, να κα νακχάς ασακέ δυσκολίες σο ανένα αμένγκε νταρ. Βα, κα αβέλ ο ντιβές σο κα τθεράς οντουβά σο μανγκέλας πάντα ο Ιεχωβά αμένγκε​—τέλεια ειρήνη σο να κα νασέλ ποτές.​—Ησ. 26:3, 4.