Κάνα ο Ιεχωβά ντινάς εντολή ι τζενέν τι “πφερέν ι πφουβ ντα τι τθερέν-λα πουμένγκε”, σικαντάς ότι σαρί η πφουβ κα αβέλας παράδεισος. (Γέν. 1:​28) Οντουλά σο κα λεν πουμένγκε ι πφουβ κο νεβό ντουνιάς κα χρειαζίντιβελ τι ντεν καν κι εντολή ανταγιά. Αλλά η πφουβ κι αρχή να κα αβέλ παράδεισος σόσκε ο κήπος της Εδέμ να υπαρχίντιβελα ακανά. Σοράν κατά Αρμαγεδδώνας, κα τθερέν τι κερέν μπουτ πράγματα για τι καθαρίνεν τθανά σο ακανά ισί κατεστραμμέ. Ανταβά να κα αβέλ ιτς εύκολος!

Ανταβά ανέλα αμαρέ γκοντιάτε ι μπουτί σο τθερένας τι κερέν ο Ισραηλίτες κάνα βουρτισάλε κατά Βαβυλώνα. Λένγκε τθεμέστε να τζουβντιόλας καέκ για 70 μπρεσά. Αλλά ο Ησαΐας βακερντάς ότι, ι Ιεχωβάσκε βοηθειάσαρ, κα μπορίνενας τι κερέν-λες σουκάρ πάλι. Η προφητεία βακερέλας: «Κα κερέλ λάκι έρημος τι αβέλ σαρ η Εδέμ ντα λάκι σουκί πεδιάδα σαρ ο κήπος ι Ιεχωβάσκο». (Ησ. 51:3) Ο Ιεχωβά βοηθιντάς ι Ισραηλιτέν τι κερέν-λες ανταβά. Ι Ιεχωβάσκε βοηθειάσαρ, οντουλά σο κα λεν πουμένγκε ι  πφουβ κα κερέν-λα τι αβέλ εκ σουκάρ παράδεισος. Ατζέ-ντα ακανά, τουμέν μπορίνενα τι σικαβέν ότι μανγκένα τι βοηθίνεν ανταλέ μπουτιάτε.

Εκ τρόπος ισί τι κερέν ο πο λατσσό για τι ατσσικιαρέν τουμαρό κχερ ντα τουμαρέ πράγματα πάκι ντα εκχέ σειράστε. Αβέλα-πες τι κερέν-λες ανταβά σο-ντα τι κερέν τουμαρέ γείτονες. Ατζέκ, μπορίνενα τι βοηθίνεν κο πακλίκι ντα κο λατσσαριπέ σο κερντιόλα κι Αίθουσα Βασιλείας ντα κι Αίθουσα Συνελεύσεων σο τζάνα τουμέν. Άμα μπορίνενα, κερέν εκ αίτηση για τι βοηθίνεν άμα κα αβέλ-πες εκ καταστροφή οτθέ πασέ σο μπεσένα. Αντικάς, σικαβένα ότι κα μανγκένας τι βοηθίνεν άμα κα αβέλ ανάγκη. Πουτσέν-τουμέν: “Μπορίναβα ακανά τι σικλιάβ μπουτιά σο κα μπορίναβας τι κεράβ άμα ο Ιεχωβά κα μουκχέλ-μαν τι τζουβντιάβ για πάντα κι πφουβ;”

Κάνα τζουβντιαρντάς ι τσσαγιά σο τθερέλας ο Ιάειρος, ο Ιησούς, χωρίς τι χασαρέλ σαάτι, βακερντάς ι τζενένγκε τι ντεν-λα τι χαλ. (Μάρκ. 5:​42, 43) Μπέκιμ να ισινέ δύσκολος λένγκε τι βοηθίνεν οντουλέ τερνέ τσσαγιά. Σκεφτίνεν όμως καζόμ μπουτί κα χρειαζίντιβελ τι κεράς κάνα ο Ιησούς κα τζουβντιαρέλ “σαρέ οντουλέν σο ισί κο μεζάρια”. (Ιωάν. 5:​28, 29) Η Γραφή να βακερέλα αμένγκε ντιπ σαρ κα αβέν ο πράγματα. Αλλά μπορίνασα τι ανάς αμαρέ γκοντιάτε ότι ο αναστημέ κα χρειαζίντιβεν βοήθεια για τι αρακχέν χαμπέ, εκ τθαν τι μπεσέν ντα σέα. Μπορίνενα από ακανά τι σικαβέν ότι ισινέν έτοιμοι τι βοηθίνεν; Ντικχέν ακαλά ερωτήσεις.

Κάνα λένα αμπέρι κι κχανγκιρί ότι κα αβέλ τουμένγκε ο επίσκοπος περιοχής, καλίνενα-λες τουμαρέ κχερέστε τι χαν γιεκ; Κάνα πφραλά ντα πφενιά σο ισινέ κο Μπέθελ αλλάνενα διορισμός ντα αβένα τουμαρέ κχανγκιριάτε ή κάνα εκ επίσκοπος περιοχής τσσιναβέλα πι υπηρεσιάταρ, κα μπορίνενας τι βοηθίνεν-λεν τι αρακχέν κχερ; Άμα εκ περιφερειακή ή ειδική συνέλευση κα αβέλ-πες τουμαρέ τθεμέστε, κα μπορίνενας τι βοηθίνεν κο μπουτ μπουτιά σο πρέπει τι κερντιόν πριν ή σοράν κατά συνέλευση; Ή κα αβέν έτοιμοι τι καλωσορίνεν ι πφραλέν σο κα αβέν;

Κατά λάφια σο διαβάνασα κο Πράξεις 24:​15, μπεκλεντίνασα τι αναστίντιβεν δισεκατομμύρια τζενέ. Μπουτ λένταρ να τθερένας ι ευκαιρία τι σικλιόν ι Ιεχωβάσκε. Αλλά κα τθερέν ανταγιά ευκαιρία κάνα κα αναστίντιβεν. a Βον κα τθερέν μπουτ τι σικλιόν. Τζενέ σο υπηρετίνενα πιστά ι Ντεβλές ντα τθερένα κερντό μπουτ έργος κα βοηθίνεν λένγκε σικλιαριμάστε. (Ησ. 11:9) Η Σαρλότ, σο κερντάς έργος κι Ευρώπη, κι Νότια Αμερική ντα κι Αφρική μπεσέλα σαρ σαρ ανταλέσκε. Βόι βακερέλα χαράσαρ: «Μπεσάβα σαρ σαρ τι σικλιαράβ τζενέν σο κα αναστίντιβεν. Κάνα διαβάναβα εκχέσκε σο τζουβντιλό κο πουρανέ μπρεσά, μπουτ φαρ σκεφτίναβα: “Άμα σικλιλόας ι Ιεχωβάσκε, λέσκι ζωή κα αβέλας ντιπ γιαβέρσοϊ”. Μπεκλεντίναβα σαρ σαρ τι βακεράβ κο αναστημέ καζόμ σουκάρ πράγματα χασαρντέ».

Ατζέ-ντα πιστοί υπηρέτες ι Ιεχωβάσκε σο τζουβντιλέ πριν τι αβέλ ο Ιησούς κι πφουβ κα τθερέν μπουτ τι σικλιόν. Ανέν τουμαρέ γκοντιάτε σο μπαρί χαρά ντα προνόμιος κα αβέλ τι βακερέν ι Δανιηλίσκε σαρ νικίστιλε μπαγιά ο προφητείες σο γραφιντάς αλλά να αγαβέλας-λεν. (Δαν. 12:8) Ντα κα αβέλ μπουτ σουκάρ τι βοηθίνεν ι Ρουθιά ντα ι Ναομιά τι σικλιόν ότι λένγκε φαμιλιάταρ αβιλό ο Μεσσίας. Σο μπαρί χαρά κα λας τι βοηθίνας κο πρόγραμμας κι σικλιαριμάσκο σο κα αβέλ-πες σαρί κι πφουβ, χωρίς τι τθεράς ο προβλήματα σο ισί-αμέν ανταλέ πφιρνέ ντουνιάστε!

Σαρ μπορίνενα τι σικαβέν ακανά ότι ισινέν έτοιμοι τι βοηθίνεν οντουλέ προγραμμάστε; Εκ τρόπος ισί τι μαρέν-τουμέν τι αβέν πο λατσσέ κο σικλιαριπέ ντα τι μουτθαβέν ο λατσσέ αμπέρια σο βακέρντιβενα σαρί κι πφουβ. (Ματθ. 24:​14) Ατζέ-ντα άμα ακανά ναστί κερένα μπουτ πράγματα ιτιρί τουμαρέ ηλικιάταρ ή γιαβερέ πραγματένταρ, κάνα κερένα ο πο λατσσό σο μπορίνενα, σικαβένα ότι μανγκένα τι σικλιαρέν ι αναστημέ τζενέν.

Βα, ισί λατσσό τι σκεφτίνεν ακαλά σημαντικές ερωτήσεις: Μπεσάβα μπαγιά τι τθεράβ μάνγκε ι πφουβ; Μπεκλεντίναβα σαρ σαρ τι βοηθίναβ ι αναστημέ τζενέν ντα τι σικλιαράβ-λεν; Μπορίνενα τι σικαβέν ότι ισινέν έτοιμοι άμα ακανά κερένα πράγματα σο μοιάζενα οντουλέντζαρ σο κα κερέν κάνα κα λεν τουμένγκε ι πφουβ!